བཞི་པ་ཆོ་ག་གང་གིས་སྦྱིན་པ།

བཞི་པ་ཆོ་ག་གང་གིས་སྦྱིན་པ་ནི།

སྦྱོར་དངོས་མཇུག་གསུམ་སྟེ། སྦྱོར་བ་རང་གིས་གསོལ་བ་ལན་གསུམ་འདེབས་པ་དང༌། དངོས་གཞི་གསོལ་བ་དང་བཞིའི་ལས་དང༌། མཇུག་ལས་ཀྱི་མཇུག་སྡུད་བརྗོད་པའོ། །ལྔ་པ་དངོས་པོ་གང་སྦྱིན་པ་ནི། མཁན་པོར་འགྱུར་བ་དེས་སྦྱར་བའི་གོས་དང་དགེ་འདུན་གྱིས་སྦྱར་བའི་ཟས་ཀྱིས་ཟླ་བ་བཞིར་གནས་པའོ། །མཐའ་ཅན་དེ་ལ་ཞེས་པའི་ཊཱི་ཀ་ལས། དེ་ལ་ཞེས་བྱ་བ་ནི་དགེ་བསྙེན་ཉིད་དུ་བྱས་པའི་མཐའ་ཅན་གྱི་མུ་སྟེགས་ཅན་ལའོ་ཞེས་བཤད་ཅིང༌། ལུང་གཞི་དང་ཀརྨ་ཤ་ཏཾ་དང་མདོ་རྩ་འགྲེལ་ལས། མུ་སྟེགས་ཅན་ལ་ལས་ཀྱིས་གནས་པ་སྦྱིན། ཞེས་གསུངས་ཀྱང༌། མུ་སྟེགས་ཅན་ལ་ལས་ཀྱིས་གནས་པ་བྱིན་པ་ལ་དོན་མེད་དེ། གསོལ་བཞིའི་ལས་ཀྱིས་གནས་པ་སྦྱིན་པའི་ཡུལ། དགེ་བསྙེན་དེ་ནི་མུ་སྟེགས་པ་མ་ཡིན་ཏེ། སོ་སོ་ཐར་པའི་སྡོམ་ལྡན་ཡིན་པའི་ཕྱིར་དང༌། དཀོན་མཆོག་གསུམ་ལ་སྐྱབས་སུ་འཛིན་པའི་ཕྱིར་རོ། དེའང་ལུང་གཞི་ལས། མུ་སྟེགས་ཅན་རབ་ཏུ་འབྱུང་བར་འདོད་པ་འོངས་ན་གསུམ་ལ་སྐྱབས་སུ་འགྲོ་བ་དང་དགེ་བསྙེན་ཉིད་དུ་ཁས་བླངས་པས་དགེ་བསྙེན་གྱི་སྡོམ་པ་བྱིན་པར་བྱའོ། །ཞེས་དང༌།འདི་ཉིད་ལས། དགེ་བསྙེན་ཉིད་དུ་བྱས་པའི་མཐའ་ཅན་དེ་ལ་དགེ་འདུན་གྱིས་ལས་ཀྱིས་གནས་པ་བྱིན་ལ། ཞེས་པས་གྲུབ་པའོ། །མཚོ་ཊཱིཀ་༡༤༨ལས། དེས་ན་ཡུལ་དེ་དགེ་བསྙེན་ཉིད་ཡིན་ཡང་ལུང་གཞི་དང་མདོ་རྩ་འགྲེལ་ལས་མུ་སྟེགས་ཅན་ཞེས་གསུངས་པ་ནི། སྔོན་མུ་སྟེགས་ཅན་ཡིན་པ་ལ་དགོངས་ཏེ། སྤོ་བའི་གཞིའི་ལུང་ཞུ་བ་ལས། སྔོན་མུ་སྟེགས་ཅན། ཞེས་གསུངས་པས་སོ། །རྩ་བར། རབ་ཏུ་འབྱུང་བའི་ཕྱིར་ཞེས་པ་ལ་སོགས་པ་འདིའི་དོན་ལ་གསུམ་ལས། ༡ སྐབས་འདིའི་བར་ཆད་ཀྱི་མཚན་ཉིད་ནི། ལོ་བཅོ་ལྔ་མ་ལོན་པ་བྱ་རོག་སྐྲོད་མི་ནུས་པ་དང༌། བྱ་རོག་སྐྲོད་ནུས་ཀྱང་ལོ་བདུན་མ་ལོན་པའོ། །སྔར་བཅས་ལ་ལོ་བཅོ་ལྔ་མ་ལོན་པ་རབ་ཏུ་འབྱིན་པ་བཀག་ནས། རྗེས་བཅས་ལ་ནི་ལོ་བདུན་ལོན་པ་དང་བྱ་རོག་སྐྲོད་ནུས་པ་ཚོགས་དོན་རབ་ཏུ་འབྱུང་བ་གནང་བ་ཡིན་གྱི། ལོ་བདུན་ལོན་ཡང་བྱ་རོག་སྐྲོད་མི་ནུས་ན་ནི་རྗེས་བཅས་ལ་ཡང་གནང་བ་མ་མཛད་དེ། ལོ་བཅོ་ལྔ་མ་ལོན་པ་བྱ་རོག་སྐྲོད་མི་ནུས་པ་ནི་རྗེས་བཅས་ཀྱི་དུས་ན་ཡང་བཀག་པ་ཉིད་དོ། །འདིར་ཚོགས་དོན་གནང་བ་དང༌། ཆིག་རྐྱང་གནང་བ་གཉིས་མ་འདྲེས་པར་བྱེད་པ་གལ་ཆེའོ། །༢ བྱེད་ལས་ནི་འབོགས་པ་པོ་ལ་ཉེས་བྱས་བསྐྱེད་པ་དང༌། ལོ་བདུན་མ་ལོན་ན་སྡོམ་པ་སྐྱེ་བ་ལ་བར་དུ་གཅོད་པ་སྟེ་སྔར་བཤད་ཟིན་ཏོ། །༣ དགག་བྱ་ནི་གཞན་རྒྱུད་ཆུད་ཟོས་པ་དང་གཞན་མ་དད་པ་སྐྱེ་བའོ། །བཀོལ་བ་བྲན་ནོ་ཞེས་པ་འདིའི་དོན་ལ་གསུམ་ལས། ༡ སྐབས་འདིའི་བར་ཆད་ཀྱི་མཚན་ཉིད་ནི། ཇོ་བོ་མི་ཡིན་པའི་བྲན་དུ་གྱུར་པའོ། །༢ བྱེད་ལས་ནི་སྡོམ་པ་གནས་པ་ལ་བར་དུ་གཅོད་ཅིང་འབོགས་པ་པོ་ལ་ཉེས་བྱས་བསྐྱེད་པའོ། །༣ དགག་བྱ་ཇོ་བོ་ལ་གནོད་པ་དང་གཞན་མ་དད་པ་སྐྱེ་བའོ། །ནད་པ་མ་ཡིན་ནམ་ཞེས་པ་འདིའི་དོན་ལ་གསུམ་ལས། ༡ སྐབས་འདིའི་བར་ཆད་ཀྱི་མཚན་ཉིད་ནི། ནད་མངོན་གྱུར་གང་ཡང་རུང་བ་དེ་དག་ནི་རབ་ཏུ་དབྱུང་བར་བྱ་བ་དང་ལྡན་པའོ། །༢ བྱེད་ལས་ནི་ཁྱད་པར་དུ་འགྲོ་བ་ལ་བར་དུ་གཅོད་ཅིང་འབོགས་པ་པོ་ལ་ཉེས་བྱས་བསྐྱེད་པའོ། །༣ དགག་བྱ་ནི་སྡོམ་པ་ཆུད་ཟོས་པ་དང་རང་གཞན་ལ་གནོད་པའོ། །རབ་ཏུ་འབྱིན་པའི་ཚེ་ནད་སྤྱི་ཙམ་དུ་དྲིས་པས་ཆོག་ལ། བསྙེན་རྫོགས་བྱེད་པའི་ཚེ་ནད་བྱེ་བྲག་ཏུ་ཕྱེ་ནས་འདྲི་དགོས་པ་རྒྱུ་མཚན་ཅིའི་ཕྱིར་ཞེ་ན། རང་བྱུང་ནི་ལོ་བདུན་ལོན་པ་ལ་བྱར་རུང་བས་དེའི་ཚེ་ན་ནད་ཅུང་ཟད་ཙམ་ལ་ཡང་ནད་དུ་འཛིན་པས། ནད་སྤྱི་ཙམ་དུ་དྲིས་པས་ཀྱང་རྟོགས་སླ་བའི་ཕྱིར་དང༌། བསྙེན་རྫོགས་ལ་ནི་ལོ་ཉི་ཤུ་ཡན་ཆད་ལོན་པ་དགོས་པས། དེའི་ཚེ་ནད་ཅུང་ཟད་ཙམ་ལ་ནད་དུ་མི་འཛིན་པས་ནད་བྱེ་བྲག་ཏུ་བཀར་ཏེ་མ་དྲིས་ན་རྟོགས་དཀའ་བའི་ཕྱིར་རཽ། །སྤྲུལ་པའོ་ཞེས་པ་འདིའི་སྐབས་ཀྱི་བར་ཆད་ཀྱི་མཚན་ཉིད་ནི། མི་མ་ཡིན་གྱིས་གཞན་དུ་སྤྲུལ་པ་སྟེ། གཞི་འགྲེལ་ལས། སྤྲུལ་བ་ཞེས་བྱ་བ་ནི་ཀླུ་ལ་སོགས་པའོ། །ཞེས་སོ། །མ་ནིང་ངོ་ཞེས་པ་འདིའི་བར་ཆད་ཀྱི་མཚན་ཉིད་ནི། རྟེན་འདོད་ཁམས་པ་གང་ཞིག དོན་ཕོ་མོ་གང་དུ་ཡང་མ་གཏོགས་པའི་སྲོག་ལྡན་ཡིན་པའི་ཆ་ནས་ཟ་མ་ཙམ་པོ་དང་ཆོས་མཚུངས་པ་ཡིན་པའོ། །ཕོ་མ་ནིང་ལྔ་ཞེས་ཕོའི་ཐ་སྙད་བཏགས་ཀྱང་ཕོ་མོ་གང་དུ་ཡང་མ་གཏོགས་སོ། །ཟ་མ་ཁྱད་པར་ཅན་མ་ནིང་དང་ངོ་བོ་གཅིག་པ་ནི་ཟ་མ་ཙམ་པོ་དང་ཆོས་མཚུངས་པའོ། །ཟླ་བ་ཕྱེད་པ་ནི་ལུང་ལས་ཟླ་བ་ཕྱེད་ཕྱེད་ན་ལུས་འགྱུར་བ་ལ་བཤད་ཅིང༌། ཊཱི་ཀ་ལས། ཟླ་བ་ཕྱེད་ཕྱེད་ན་བསམ་པ་འགྱུར་བ་ལ་བཤད་དེ། ལུང་གཞི་ལས། ཟླ་བ་ཕྱེད་ནི་བུད་མེད་ཟླ་བ་ཕྱེད་ནི་སྐྱེས་པར་འགྱུར་བའོ། །ཞེས་གསུངས་ཤིང་ཊཱི་ཀ་ལས། ཞག་བཅོ་ལྔ་ནི་བུད་མེད་ཀྱི་འདོད་ཆགས་ཀྱིས་གནོད་པར་འགྱུར་ལ་ཞག་བཅོ་ལྔ་ནི་སྐྱེས་པའི་འདོད་ཆགས་ཀྱིས་གནོད་པར་འགྱུར་བ་སྟེ། ཞེས་གསུངས་སོ། །ལུས་ཀྱི་མཚན་འགྱུར་ན་ཆགས་སེམས་ཡང་འགྱུར་ལ། ལུས་མ་འགྱུར་ན་ཡང་ཆགས་སེམས་འགྱུར་བ་སྲིད་པས། ཕྱི་མ་ཁྱབ་ཆེ་བ་ཡིན་ནོ། །གཞི་འགྲེལ་ལས། འཁྱུད་ནས་ལྡང་བའི་མ་ནིང་ནི། །སྐྱེས་པ་གཞན་གྱིས་བརྩལ་བ་ན། དབང་པོ་ལས་སུ་རུང་བ་ལྡང་བར་འགྱུར་བའམ། བུད་མེད་ལ་སོགས་པས་བརྩལ་བ་ན་དབང་པོ་ལས་སུ་རུང་བ་ལྡང་བར་འགྱུར་པའོ། །ཞེས་སོ། ཉམས་པ་ནི་ཕོ་ཡི་དབང་པོ་མཚོན་གྱིས་བཅད་པ་དང་མེས་འཚིག་པ་དང་མཛེ་ནད་ཀྱིས་རུལ་བ་དང༌། ས་སྡེ་ལས་སྔགས་ཀྱིས་ཉམས་པའང་བཤད་དོ། །ཊཱི་ཀ་ལས། མ་ནིང་ཐམས་ཅད་བསྙིལ་བར་བྱ་བ་ཡིན་ནམ་ཞེ་ན། ཞེས་པ་ནི་མ་ནིང་གི་མིང་གིས་བརྗོད་པ་ཐམས་ཅད་བསྙིལ་བར་བྱ་བ་ཡིན་ནམ་ཞེས་པའོ། །མ་ནིང་ལྔ་པོ་འདི་ལས་ཐ་མ་ཉམས་པ་མ་ནིང་ནི་མོའི་འདོད་ཆགས་ཀྱི་ཉེས་པ་བསྟེན་ན་སྡོམ་པ་བླངས་ཀྱང་མི་སྐྱེ་བར་མ་ཟད་སྔར་དགེ་སློང་ཡིན་ཡང་སྡོམ་པ་བཏང་བར་གྱུར་པ་ཡིན་ཏེ། ཊཱི་ཀ་ལས། དགེ་སློང་གི་དངོས་པོའི་སྣོད་མ་ཡིན་པར་འགྱུར་བས། ཞེས་སོ། །ཉེས་པ་མི་བསྟེན་ན་ནི་མི་བསྙིལ་ཞེས་འདིར་ཤུགས་ཀྱིས་བསྟན་ཏེ། ཞུ་འགྲེལ་ལས། ཡན་ལག་སྐྱེས་བཅད་པ་ལ་སོགས་པས་ཉམས་པར་གྱུར་པ་འདི་ཇི་སྲིད་དུ་༼མོའི་འདོད་ཆགས་སྐྱེས་ཏེ་སྐྱེས་པ་ལ་ཆགས་སེམས་སྐྱེས་པའི་དབང་གིས་ཕོའོ། །༽འགྱུར་བ་མི་བསྟེན་པ་དེ་སྲིད་དུ་དགེ་སློང་ཉིད་ཡིན་ལ། ཞེས་གསུངས་སོ། །དགེ་སློང་གིས་ཕོ་དབང་བཅད་པ་ཙམ་གྱིས་དེའི་སྡོམ་པ་བཏང་ན་ནི་དེ་ལ་ནི་སྦོམ་པོ་མི་སྐྱེད་པ་ལས་དེ་བསྐྱེད་པར་ལུང་ཞུ་བ་ལས། བཅད་དེ་འཛུད་ན་ཅིར་འགྱུར་སྦོམ་པོར་འགྱུར་རོ། །ཞེས་སོ། ། རྣམ་པར་གཏན་ལ་དབབ་པ་བསྡུ་བ་ལས། སྐྱེས་པའི་དབང་པོ་མཚོན་ལ་སོགས་པས་བཅད་པར་གྱུར་ཅིང་སྐྱེས་པའི་སྤོབས་པ་མི་འབྱུང་བ་ནི། གལ་ཏེ་ཕ་རོལ་པོ་དག་གིས་བདག་ལ་སུན་འབྱིན་པར་མི་བྱེད་ན་ནི་ཟ་མ་ཁོ་ན་ཡིན་གྱི་མ་ནིང་མ་ཡིན་ནོ། །གལ་ཏེ་སུན་འབྱིན་པར་བྱེད་ན་ནི་ཟ་མ་དང་མ་ནིང་ཡིན་པར་བརྗོད་པར་བྱའོ། །ཞེས་གསུངས་སོ། །གཞན་ཡང་ཟ་མ་དང་མ་ནིང་གཉིས་ཆོས་ཅན། ཁྱོད་ཀྱི་རྒྱུད་ལ་སོ་ཐར་གྱི་སྡོམ་པ་མེད་པར་ཐལ། ཁྱོད་སྡོམ་པའི་རྟེན་མ་ཡིན་པའི་ཕྱིར་ཏེ། རྩ་བར། ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་རྣམས་ལ། །ཞེས་གསུངས་པའི་ཕྱིར། འདོད་མི་ནུས་ཏེ། སོ་ཐར་གྱི་སྡོམ་ལྡན་ཟ་མ་དང་མ་ནིང་དུ་འགྱུར་བ་ཙམ་གྱིས་སོ་ཐར་གྱི་སྡོམ་པ་མི་གཏོང་བའི་ཕྱིར་ཏེ། ཟ་མ་དང་མ་ནིང་གང་རུང་དུ་གྱུར་ཀྱང་ཕོ་མོའི་འདོད་ཆགས་ཀྱི་འགྱུར་བ་མ་བསྟེན་གྱི་བར་དུ་སྡོམ་པ་མི་གཏོང་བའི་ཕྱིར་ཏེ། མཚོ་ཊཱིཀ་༡༥༣ལས། ཉེས་པ་མི་བསྟེན་ན་ནི་མི་བསྙིལ་ཞེས་འདིར་ཤུགས་ཀྱིས་བསྟན་ཏེ། ཞུ་འགྲེལ་ལས། ཡན་ལག་སྐྱེས་བཅད་པ་ལ་སོགས་པས་ཉམས་པར་གྱུར་བ་འདི་ཇི་སྲིད་དུ་འགྱུར་བ་མི་བསྟེན་པ་དེ་སྲིད་དུ་དགེ་སློང་ཉིད་ཡིན་ལ། ཞེས་གསུངས་པའི་ཕྱིར་ཟེར་ན་དཔྱད། རྐུ་ཐབས་སུ་གནས་པའོ་བསྙེན་པར་རྫོགས་པའི་ཆོ་ག་མ་བྱས་པ་ཉིད་དམ་མ་ཆགས་པ་ཉིད་དུ་ཤེས་ལ་ལན་གཉིས་སུ་དགེ་འདུན་དང་ལྷན་ཅིག་ལས་ཉམས་སུ་མྱོང་བར་གྱུར་པ་ཉིད་ན་དེ་ཉིད་ཡིན་ནོ། །ཞེས་པའི་སྐབས་འདིའི་བར་ཆད་ཀྱི་མཚན་ཉིད་ནི། ཡན་ལག་བཞི་ཚང་བའི་ལས་སྒྲིབ་བོ། །ཡན་ལག་ལ་བཞི་ལས། གཞིའི་ཡན་ལག་ལ་གསུམ་སྟེ་གང་དང་ལྷན་ཅིག་ཉམས་སུ་མྱོང་བའི་ཡུལ་དང༌། གང་ཉམས་སུ་མྱོང་བའི་ཆོ་ག་དང༌། གང་གིས་ཉམས་སུ་མྱོང་བའི་གང་ཟག་གོ །དང་པོ་ནི་བསྙེན་རྫོགས་རང་བཞིན་དུ་གནས་པ་བཞིར་ལོངས་པའི་དགེ་འདུན་ཏེ། ལུང་གཞི་ལས། དགེ་སློང་རང་བཞིན་གནས་པ་དག་དང་ལྷན་ཅིག ཅེས་གསུངས་ཤིང༌། བཞིར་ལོངས་དགོས་པར་འདི་ཉིད་ལས། དགེ་འདུན་དང་ལྷན་ཅིག ཅེས་གསུངས་པས་སོ། །གང་ཉམས་སུ་མྱོང་བའི་ཆོ་ག་ལ་གསུམ་སྟེ། ལས་ཀྱི་ཆོ་གའམ་དེ་དང་འདྲ་བ་ཡིན་པ་དང༌། བདག་ལ་མ་གནང་བ་ཡིན་པ་དང༌། སྐོར་གཉིས་ཡན་ཆད་ཡིན་པའོ། །དང་པོ་ནི་ལས་ཉམས་སུ་མྱོང་བར་གྱུར་པ་ཉིད་ན་ཞེས་བཤད་ཅིང་འགྲེལ་པ་རྣམས་ལས་རབ་ཏུ་འབྱིན་པའི་ཞུ་བ་ཐོས་པས་ཀྱང་རྐུ་ཐབས་སུ་གནས་པར་བཤད་པས་སོ། །གཉིས་པ་ནི་རྐུ་ཐབས་སུ་ཞེས་པས་བདག་ལ་མ་གནང་བར་གྲུབ་བོ། །གནང་བའི་ལས་གཉིས་ནི་དགེ་ཚུལ་གྱིས་ཐོས་ཀྱང་ཉེས་པ་མེད་དེ། ནང་དུ་དྲི་བའི་ཕྱིར་གསོལ་བ་ལ་སོགས་པ་བསྙེན་པར་རྫོགས་པར་བྱ་བ་ཡང་ངོ་ཞེས་དགེ་ཚུལ་གྱིས་ལས་བཅུ་བཞི་ཐོས་ཀྱང་རྐུ་ཐབས་སུ་གནས་པར་མི་འགྱུར་བ་སྲིད་དེ། དགེ་སློང་གི་སྡོམ་པ་ལན་བདུན་མནོས་ནའོ། །གསུམ་པ་ནི། རྩ་བར། ལན་གཉིས་ཞེས་པས་སོ། །ལན་གཉིས་ཞེས་པ་ནི། ལུང་གཞི་ལས། གསོ་སྦྱོང་གི་ལས་ལན་གཉིས་ལན་གསུམ་ཉམས་སུ་མྱོང་བར་གྱུར་ན། རྐུ་ཐབས་སུ་གནས་པ་ཡིན་ནོ། །ཞེས་གསུངས་ཀྱང༌། ལན་གསུམ་ཞེས་པ་རྒྱུན་བརྟན་པ་ཡིན་གྱི། ལན་གཉིས་ཀྱིས་རྐུ་ཐབས་སུ་གནས་པར་གྱུར་པ་སྟེ། གཏམ་གྱི་གཞི་ལས། རྐུ་ཐབས་སུ་གནས་པ་རབ་ཏུ་དབྱུང་བར་མི་བགྱི་བསྙེན་པར་རྫོགས་པར་མི་བགྱི་བའི་གཞི་དེ་ཉིད་ཀྱིས་རབ་ཏུ་དབྱུང་བ་དང་བསྙེན་པར་རྫོགས་པར་བགྱི་བ་མཆིས་སམ། ཡོད་དེ་ལན་གཉིས་ལན་གསུམ་གསོ་སྦྱོང་གི་ལས་ཉམས་སུ་མྱོང་བར་གྱུར་པ་དེ་ནི་རབ་ཏུ་དབྱུང་བར་མི་བྱ་བསྙེན་པར་རྫོགས་པར་མི་བྱ་ཡི། ལན་ཅིག་རྐུ་ཐབས་སུ་གསོ་སྦྱོང་ཉམས་སུ་མྱོང་བར་གྱུར་པ་དེ་ནི་རབ་ཏུ་དབྱུང་བར་བྱ་བསྙེན་པར་རྫོགས་པར་བྱའོ། །ཞེས་གསུངས་པས་ལན་གཉིས་ཀྱིས་རྐུ་ཐབས་སུ་གནས་པར་འགྲུབ་སྟེ། ལན་གསུམ་ཡན་ལག་ཏུ་དགོས་ན་ལན་གཉིས་ཉམས་སུ་མྱོང་བ་ནི་རབ་ཏུ་དབྱུང་བར་བྱ་ཞེས་གསུང་པར་རིགས་པ་ལས། ལན་ཅིག་ཉམས་སུ་མྱོང་བ་ནི་རབ་ཏུ་དབྱུང་བར་བྱ་ཞེས་གསུངས་སོ། །གང་གིས་ཉམས་སུ་མྱོང་བའི་གང་ཟག་ནི། བསྙེན་པར་མ་རྫོགས་པ་ཡིན་པ་ལ་དེར་འདུ་ཤེས་པ་དང༌། བར་ཆད་གཙོ་བོ་གཞན་དང་མི་ལྡན་པ་དང༌། རབ་བྱུང་གི་ཆ་ལུགས་དང་སྤྱོད་ལམ་འདྲ་བ་ཡིན་པ་སྟེ། བསྙེན་པར་རྫོགས་པའི་ཆོ་ག་མ་བྱས་པ་ཉིད་དམ་མ་ཆགས་པ་ཉིད་དུ་ཤེས་ལ་ཞེས་པ་དང༌། མི་མ་ཡིན་པ་དང་སྤྲུལ་པ་དང་མ་ནིང་ལ་སོགས་པ་བར་ཆད་གཙོ་བོ་གཞན་དང་ལྡན་ན་དེའི་རྐྱེན་གྱིས་རྒྱུད་ཆུད་ཟོས་ཀྱི་དགག་བྱ་མེད་པའི་ཕྱིར་དང༌། ལུང་གི་གླེང་གཞི་ལས་ཆ་ལུགས་འདྲ་བ་ལ་བརྟེན་ནས་གསུངས་ཤིང༌། ལུང་ཞུ་བ་ལས། རང་གིས་རྟགས་བླངས་ཏེ་ལན་གཉིས་ལན་གསུམ་དུ་གསོ་སྦྱོང་གི་ལས་ཉམས་སུ་མྱོང་བར་གྱུར་པ། ཞེས་དང༌། གཞི་འགྲེལ་ལས། རྐུ་ཐབས་སུ་གནས་པ་ཞེས་བྱ་བ་ནི་འདིར་རང་གིས་རྟགས་བླངས་པ་སྡོམ་པ་མ་ཐོབ་པའོ་ཞེས་གསུངས་སོ། །