ཞར་ལ་ལོག་རྟོག་བསལ་བ།
ཞར་ལ་ལོག་རྟོག་བསལ་བ་ནི། ཁ་ཅིག་ཡེ་ཤེས་འོད་ལ་བཟུང་བས་འོད་ཉིད་སྣོད་བཅུད་དུ་འཁྲུལ་དུས་སྣང་བ་འཁྲུལ་པར་སྣང་ཡང་དོན་ལ་རང་འོད་ཡིན་པས། ཡེ་ཤེས་སུ་སྣང་བའི་ཕྱིར་སྣང་བ་སེམས་སུ་འཐད། ཉམས་སུ་བླངས་པས་སྣང་བ་དག་པར་སོང་བ་ཡང་རང་འོད་དུ་སྣང་ལ། འཁྲུལ་པ་དེ་ཉིད་མ་འཁྲུལ་པའི་སོར་གནས་པའོ། །ཞེས་སེམས་ཡིན་དུ་རྟོག་པ་ནི་མི་འཐད་དེ། གདངས་ལ་འཛིན་པ་སྐྱེ་དུས་གདངས་འཁྲུལ་པར་སོང་བ་མ་ཡིན་གྱི། གདངས་ལ་རྣམ་པ་འདྲ་བར་འཛིན་པས་དེའི་བག་ཆགས་སྣང་བ་སྟེ། ཁ་སང་རྟ་གླང་མཐོང་བའི་བག་ཆགས་རྨི་ལམ་གྱི་རྟ་གླང་དུ་མ་སོང་ཡང་དེའི་བག་ཆགས་སྣང་བ་བཞིན་ནོ། །འཛིན་པ་སྐྱེ་
དུས་རང་བཞིན་ཡེ་ཤེས་ཀྱི་རང་འོད་ནུབ་ནས་འཁྲུལ་སྣང་བག་ཆགས་ཀྱི་སྣང་བ་ལངས་ཏེ། ལུས་དང་ཡུལ་སྣང་དུ་སྣང་བ་ཤར་ཡང་སེམས་མ་ཡིན་ཏེ། ཁ་དོག་ལ་སོགས་པ་དངོས་སུ་སྣང་བའི་ཕྱིར་དང་། སེམས་སྣང་ལས་གཞན་མ་ཡིན་ཏེ་འཁྲུལ་སྣང་ཡིན་པའི་ཕྱིར་རོ། །དེས་ན་མེད་བཞིན་དུ་སྣང་བས་མེད་པ་ལ་གསལ་སྣང་སྟེ། ཉམས་སུ་བླངས་པ་དག་གྲོལ་བའི་འཐད་པའང་དེ་ཡིན་ནོ། །དེས་ན་རྩལ་སྣང་ངོ་ཕྱེད་པར་བྱའོ། །