གསུམ་པ་འབྲས་བུ་རིམ་གྱིས་པའི་ཕྱིར་མི་འོང་གི་སྐོར་བཤད་པ།

གསུམ་པ་འབྲས་བུ་རིམ་གྱིས་པའི་ཕྱིར་མི་འོང་གི་སྐོར་བཤད་པ་ལ།

སྤྱི་དོན་དང་མཐའ་རགས་ཙམ་དཔྱད་པ་གཉིས་ལས། དང་པོ་ནི། འབྲས་བུ་རིམ་གྱིས་པའི་ཕྱིར་མི་འོང་ཞུགས་པའི་མཚན་ཉིད། འབྲས་བུ་རིམ་གྱིས་པའི་ཕྱིར་འོང་འབྲས་གནས་གང་ཞིག། ཕྱིར་མི་འོང་གི་འབྲས་བུ་ཐོབ་ཕྱིར་དུ་བརྩོན་པའི་རབ་ཏུ་ཕྱེ་བའི་དགེ་འདུན་དེ་ཡིན་ཏེ། ཉ་ཊཱིཀ་ལས། གསུམ་པ་ལ་ནི་ཞུགས་པའང་ཡིན། །ཞེས་པས་འདིར་བཤད་བར་ཆད་གཅིག་པ་དེ་ཉིད་དེ། མཚན་ཉིད་ནི། ལམ་རིམ་གྱིས་པའི་ཕྱིར་འོང་འབྲས་གནས་གང་ཞིག དེའི་ཕྱིར་མི་འོང་ཐོབ་ཕྱིར་བརྩོན་པའོ། །ཞེས་གསུངས་སོ། །འབྲས་བུ་རིམ་གྱིས་པའི་ཕྱིར་མི་འོང་འབྲས་གནས་ཀྱི་མཚན་ཉིད། འབྲས་བུ་བཞི་རིམ་གྱིས་ཐོབ་པའི་རིགས་ཅན་གྱི་ཕྱིར་མི་འོང་འབྲས་གནས་ཀྱི་དགེ་འདུན་དེ་ཡིན་ཏེ། ཉ་ཊཱིཀ་ལས། མཚན་ཉིད། ལམ་རིམ་གྱིས་པའི་འབྲས་གནས་གང་ཞིག འདོད་པའི་སྒོམ་སྤང་ཉོན་མོངས་དགུ་ཟད་ཅིང་སྲིད་རྩེའི་དགུ་བ་མ་སྤངས་པའི་འཕགས་པའོ། །ཞེས་གསུངས་སོ། །སྐབས་འདིར་ལམ་རིམ་གྱིས་པའི་བརྡ་ཆད་བྱས་པ་མི་ལེགས་པར་གསེར་ཕྲེང་ལས་བཤད་དོ། །དབྱེ་ན་རང་ཡིན་གྱི་ཙམ་པོ་བ་དང་འབྲས་གནས་ཁྱད་པར་ཅན་གཉིས། འབྲས་བུ་རིམ་གྱིས་པའི་ཕྱིར་མི་འོང་འབྲས་གནས་ཙམ་པོ་བའི་མཚན་ཉིད། དགྲ་བཅོམ་པའི་འབྲས་བུ་ཐོབ་ཕྱིར་དུ་མི་བརྩོན་པའི་རབ་ཏུ་ཕྱེ་བའི་འབྲས་བུ་རིམ་གྱིས་པའི་ཕྱིར་མི་འོང་འབྲས་གནས་དེ་ཡིན་ཏེ། ཉ་ཊཱིཀ་ལས། ཙམ་པོ་ནི། ལམ་རིམ་གྱིས་པའི་ཕྱིར་མི་འོང་འབྲས་གནས་གང་ཞིག འདོད་པའི་ཉོན་མོངས་དགུ་སྤངས་ཤིང་དེ་ཡན་མ་སྤངས་སྤོང་བར་མི་བརྩོན་པ། ཞེས་གསུངས་སོ། །འབྲས་བུ་རིམ་གྱིས་པའི་ཕྱིར་མི་འོང་འབྲས་གནས་ཁྱད་པར་ཅན་གྱི་མཚན་ཉིད། དགྲ་བཅོམ་པའི་འབྲས་བུ་ཐོབ་ཕྱིར་དུ་བརྩོན་པའི་རབ་ཏུ་ཕྱེ་བའི་འབྲས་བུ་རིམ་གྱིས་པའི་ཕྱིར་མི་འོང་འབྲས་གནས་དེ་ཡིན་ཏེ། ཉ་ཊཱིཀ་ལས། ཁྱད་པར་ཅན་ནི། གང་ཞིག བསམ་གཏན་དང་པོའི་ཉོན་མོངས་ཆེན་པོའི་ཆེན་པོ་སྤོང་བ་ལ་བརྩོན་པ་ནས་སྲིད་རྩེའི་སྒོམ་སྤང་གི་ཉོན་མོངས་དགུ་བ་མ་སྤངས་ཤིང་སྤོང་བར་བརྩོན་པའི་བར་གང་རུང་ཡིན་པའོ། །ཞེས་གསུངས་སོ། །དབྱེ་ན། གཟུགས་སུ་ཉེར་འགྲོ་དང༌། གཟུགས་མེད་དུ་ཉེར་འགྲོ་དང༌། མཐོང་ཆོས་ཞི་དང༌། ལུས་མངོན་བྱེད་དང་བཞི་ལས། དང་པོའི་དབྱེ་བ་སོགས་ཉ་ཊཱིཀ་གི་གསུངས་ཟིན་ལྟར་བཀོད་ན་ཉ་ཊཱིཀ་ཡིད་ཀྱི་མུན་སེལ་ལས། དང་པོ་ལ་གསུམ་སྟེ། མངོན་པར་འགྲུབ་པ་ཙམ་གྱི། སྐྱེས་ནས་མྱོང་འགྱུར་གྱི། ལན་གྲངས་གཞན་ལ་མྱོང་འགྱུར་གྱི་ལས་ཅན་ནོ། །དང་པོ། གཟུགས་ཀྱི་ཉོན་མོངས་མ་སྤངས་པའི་ཕྱིར་མི་འོང་གཞིར་བྱས་ལ། དབང་རྣོན། ཉོན་མོངས་ཆུང་ངུ༌། གཟུགས་སུ་སྐྱེ་བའི་ཀུན་སྦྱོར་སྤངས་མངོན་པར་འགྲུབ་པའི་ཀུན་སྦྱོར་མ་སྤངས་པས་གཟུགས་ཀྱི་བར་དོར་སྐྱེས་ནས་དེར་ལམ་ཟག་མེད་བསྒོམ་ཏེ་དགྲ་བཅོམ་ཐོབ་ནས་ཚེ་མ་རྫོགས་པར་མྱུར་དུ་ལྷག་མེད་དུ་འདའ་སྟེ་དེ་ལ་མྱུར་བ་དང༌། མྱུར་བ་མིན་པ་དང༌། དུས་རིང་བོ་ཞིག་ན་འདའ་བ་གསུམ་སྟེ། བར་དོའི་ཚེ་སྟོད། ཚེ་དཀྱིལ་གཉིས་དང༌།ཐ་མ་འདི་ཚེ་མ་རྫོགས་པའི་བར་དོའི་མཇུག་གི་སྐབས་ལ་བཞག་དགོས་སོ། །དཔེར་ན། ཞོགས་མ་ཆུང་ངུ་མེ་སྟག་གྲུབ་ཙམ་ནས་འདའ་བ་དང༌། ལྕགས་ཀྱི་ཚ་ཚ་ཡར་བ་ཐུར་དུ་མ་ལོག་པར་འདའ་བ་དང༌། དེ་ས་ལ་མ་ལྷུང་ཙམ་དུ་འདའ་བ་བཞིན་ནོ། །གཉིས་པ་ནི། དེའི་དབང་འབྲིང༌། ཉོན་མོངས་ཡང་འབྲིང་པོ་ཅན། གཟུགས་སུ་སྐྱེ་བ་གཅིག་བླངས་ནས་འདའ་བ་ལ་གསུམ་སྟེ། སྐྱེས་མ་ཐག་ལྷག་བཅས་སུ་འདའ་བ། ཚེ་དཀྱིལ་ཙམ་ལ་འབད་རྩོལ་ལ་བརྟེན་ནས་འདའ་བ། ཚེ་རྫོགས་ནས་འབད་མེད་དུ་ལྷག་བཅས་ལྷག་མེད་དུ་འདའ་བ་སྟེ།ལྕགས་ཀྱི་ཚ་ཚ་ཡར་བ་ས་ལ་བབས་མ་ཐག་དང༌། རྩྭ་ཤིང་ཅུང་ཟད་བསྲེགས་ནས་དང༌། མང་བོ་ཚིག་ནས་འདའ་བ་བཞིན་ནོ། །དེ་ལྟར་གསུམ་ཚན་དང་པོ་གཉིས་པོ་དེ་ཉོན་མོངས་དབང་བོའི་བྱེ་བྲག་ལས་དབྱེ་ཞིང་ལས་ནི་དང་པོ་གསུམ་མངོན་པར་འགྲུབ་པའི། གསུམ་ཚན་གཉིས་པ་ནི་སྐྱེས་ནས་མྱོང་འགྱུར་དུ་འདྲའོ་ཞེས་སོ། །གསུམ་པ་ནི། དེའི་དབང་རྟུལ། ཉོན་མོངས་ཆེན་པོ། ལན་གྲངས་གཞན་ལ་མྱོང་འགྱུར་གྱི་ལས་ཅན་སྐྱེ་བ་གོང་དུ་བརྒྱུད་ནས་འདའ་དགོས་པ་སྟེ། དེ་ནི། བསམ་གཏན་སྤེལ་ན་འོག་མིན་འགྲོ། །དེ་འཕར་ཕྱེད་འཕར་ཐམས་ཅད་དུ། །འཆི་འཕོ་གཞན་སྲིད་རྩེ་མོར་འགྲོ། །ཞེས་ཏེ། རྒྱུ་བསམ་གཏན་སྤེལ་ན་འོག་མིན་འགྲོ ། རྒྱུ་དེ་མ་སྤེལ་བ་སྲིད་རྩེར་འགྲོའོ། །དང་པོ་ནི། སྤྱིར་འདིར་བཤད་བསམ་གཏན་སྤེལ་བའི་རྟེན་ནི། གླིང་གསུམ་གྱི་མི་དང༌། ཕྱིས་ཉམས་ན་གཟུགས་སུ་ཡང་རུང་ལ། གང་ཟག་ནི། དགྲ་བཅོམ་དང་ཕྱིར་མི་འོང་ཅི་རིགས་སོ། །འདིར་འདོད་པའི་རྟེན་ཅན་གྱི་ཕྱིར་མི་འོང་ཞིག་གཞན་པས་ལས་སུ་རུང་བ་དང༌། ལམ་སླ་བ་རྣམས་ཀྱི་མཆོག་ཡིན་པས་བཞི་བ་དང་པོར་སྤེལ་ཏེ། བདེན་པའི་རྣམ་པ་ཅན་གྱི་བཞི་བ་ཟག་མེད། ཞི་རགས་ཀྱི་རྣམ་པ་ཅན་གྱི་ཟག་བཅས། ཡང་བཞི་བ་ཟག་མེད་རྒྱུན་ཆགས་གསུམ་སྤེལ་ནས་སྙོམས་པར་འཇུག་ཅིང༌།དེ་ནས་རྒྱུན་ཕྲི་ནས་སྐད་ཅིག་གཉིས་ཟག་མེད་ལ། སྐད་ཅིག་གཉིས་ཟག་བཅས་ལ། ཡང་ཟག་མེད་སྐད་ཅིག་གཉིས་ལ་འཇུག་པའི་བར་ནི་སྦྱོར་བ་ཡིན་ལ། དེ་ནས་སྐད་ཅིག་མ་རེ་རེ་བསྲེས་པས་སྤེལ་ནུས་ན་དངོས་གཞི་གྲུབ་པས། དང་པོ་གཉིས་བར་ཆད་མེད་ལམ་ལྟ་བུ། གསུམ་པ་རྣམ་གྲོལ་ལྟ་བུའོ། །དེ་ལྟར་བཞི་བ་སྤེལ་ནས་དེའི་སྟོབས་ཀྱིས་གཞན་ཡང་སྤེལ་ལོ། །སློབ་དཔོན་ནི། སངས་རྒྱས་མིན་པས་སྐད་ཅིག་སྤེལ་མི་ནུས་པས། རྒྱུན་ཆགས་གསུམ་ལ་ཇི་སྲིད་སྙོམས་པར་འཇོག་ནུས་ན་རྫོགས་པའོ་ཞེས་སོ། །འདི་ལ་ལྔ་ཡོད་དེ། དེ་ནི་རྣམ་པ་ལྔ་ཡི་ཕྱིར། །གནས་གཙང་སྐྱེ་བ་ལྔ་ཁོ་ན། །ཞེས་པས་བཞི་བ་སྤེལ་བ་ལ་ཟག་མེད་གཉིས་ཀྱི་བར་དུ་ཟག་བཅས་གཅིག་སྤེལ་བ་གསུམ་སྤེལ་ཏེ་ཆུང་ངུ༌། དེ་ཚན་པ་གཉིས། བཞི་ལ་གཉིས་སྤེལ་འབྲིང་དྲུག་སྤེལ། དེ་ཚན་པ་གསུམ་དུ་འཇུག་པས་ཆེན་པོ་དགུ་སྤེལ། དེ་ཚན་པ་བཞི། བརྒྱད་ལ་བཞི་སྤེལ་ཤིན་ཏུ་ཆེ་བ་བཅུ་གཉིས་སྤེལ་དེ་ཚན་པ་ལྔ། བཅུ་ལ་ལྔ་སྤེལ་བ་ཤིན་ཏུ་ཆེས་ཆེ་བ་བཅོ་ལྔ་སྤེལ་ཏེ། མ་ཉམས་ན་གནས་གཙང་མ་ལྔར་སྐྱེ་མོད། དང་པོའི་རོ་མྱངས་པས་གོང་མ་གསུམ་ལས་ཉམས་ཤིང་འདོད་པར་ཚེ་འཕོས་ཏེ་ཚངས་རིས་སུ་སྐྱེས།དེར་སྔོན་གོམས་པའི་དབང་གིས་བཞི་བ་བཅོ་ལྔ་སྤེལ་བསྒོམས་ནས་བར་རྣམས་སུ་མ་ཞུགས་པར་འོག་མིན་དུ་སྐྱེས་ནས་དགྲ་བཅོམ་ཐོབ་པ་དེ་དབང་རྣོན་འཕར་བ། སྔར་བཞིན་ལས་དེ་ཚངས་རིས་ནས་གཙང་མའི་གནས་གཅིག་གམ་གཉིས་སུ་སྐྱེས་ནས་གནས་འགའ་དོར་ནས་འོག་མིན་དུ་འཇུག་པ་དབང་འབྲིང་ཕྱེད་དུ་འཕར་བ། དེ་ཚངས་ཆེན་མ་གཏོགས་གཟུགས་ཀྱི་གནས་གཞན་ཐམས་ཅད་དུ་རིམ་གྱིས་སྐྱེས་ནས་མཐར་འོག་མིན་དུ་འཇུག་པ་དབང་རྟུལ་གནས་ཐམས་ཅད་དུ་འཆི་འཕོ་བའོ། །དེ་དག་ནི་ལྷག་མཐོང་སྤྱད་པའོ། །ཚངས་ཆེན་ནི།དང་པོ་སྐྱེས་པའི་ཚངས་པ་ནི་སེམས་ཅན་འདི་རྣམས་ངས་བསྐྱེད་པའོ་སྙམ། དེར་ཕྱིས་སྐྱེས་པ་རྣམས་ཀྱང་སྔར་གྱི་ཚངས་ཆེན་དེས་ངེད་རྣམས་བསྐྱེད་ཅེས་ལྟ་བའི་གནས་ཡིན་པ་དང༌། དེའི་ཚངས་ཆེན་དེ་གནས་དེར་འགྲན་ཟླ་མེད་པའི་ལས་བསགས་པས་གཙོ་བོ་གཅིག་ཏུ་ཟད་པས་དེར་མི་སྐྱེའོ། །གཉིས་པ་ནི། གོང་འཕོ་བསམ་གཏན་མ་སྤེལ་བར་ཞི་གནས་ཤས་ཆེར་སྤྱད་ལ་སྙོམས་འཇུག་རྣམས་ཀྱི་རོ་མྱང་བར་བྱེད་ཅིང་ཚངས་ཆེན་མ་གཏོགས་ཚངས་རིས་ནས་འབྲས་བུ་ཆེ་བའི་བར་ཐམས་ཅད་དུ་སོང་ནས་གཙང་མ་བོར་ཏེ་གཟུགས་མེད་བཞིར་རིམ་གྱིས་སོང་ནས་སྲིད་རྩེར་དགྲ་བཅོམ་ཐོབ་པའོ། །ཕྱིར་མི་འོང་ལྔར་ཕྱེ་བའི་གོང་འཕོ་ནི་དེ་གཉིས་སུ་མ་ཞུགས་པར་ཡང་འདར་རུང་ངོ༌། །འོག་མིན་འགྲོ་ནི་འོག་མིན་དང༌། སྲིད་རྩེར་འགྲོ་ནི་སྲིད་རྩེར་ངེས་པར་འགྲོ་དགོས་ཏེ་སྔར་བཤད་དོ། །ཕྱིར་མི་འོང་གོང་འཕོ་ད་ཕྱིས་འོག་མིན་འགྲོའི་མཚན་ཉིད། ཕྱིར་མི་འོང་གོང་འཕོ་གང་ཞིག ལྷག་མཐོང་ཤས་ཆེར་སྤྱད་པས་ཚངས་རིས་དང་འོག་མིན་དུ་ངེས་པར་སྐྱེ་བ། དེ་འཕར་བའི་མཚན་ཉིད། ཕྱིར་མི་འོང་འོག་མིན་འགྲོ་གང་ཞིག མདུན་ན་འདོན་ནས་གྱ་ནོམ་སྣང་གི་བར་དུ་མ་ཞུགས་པར་ཚངས་རིས་ནས་འོག་མིན་ཉིད་དུ་འཇུག་པ། གཞན་གཉིས་ལའང་བསྒྲེའོ། །ཕྱིར་མི་འོང་གོང་འཕོ་ད་ཕྱིས་སྲིད་རྩེར་འགྲོའི་མཚན་ཉིད། ཕྱིར་མི་འོང་གོང་འཕོ་གང་ཞིག ད་ཕྱིས་གནས་གཙང་མ་དང་ཚངས་ཆེན་མ་གཏོགས་གཟུགས་ཀུན་དང་གཟུགས་མེད་བཞི་ཅར་དུ་རིམ་གྱིས་སྐྱེས་ནས་མཐར་སྲིད་རྩེར་དགྲ་བཅོམ་མངོན་དུ་བྱེད་པའོ། །ཞེས་གསུངས་སོ། །གཟུགས་སུ་ཉེར་འགྲོའི་གོང་ཕོ་ནི། གཟུགས་ཁམས་ཀྱི་སྐྱེ་སྲིད་དུ་ལན་གཉིས་བརྒྱུད་ནས་འདའ་བའི་ཕྱིར་མི་འོང་དེའོ། །གོང་དུ་དྲངས་བའི་ཉ་ཊཱིཀ་ལས་གཞན་གཉིས་ལའང་བསྒྲེའོ། །ཞེས་རིགས་བསྒྲེ་ཚུལ་ནི། ཕྱིར་མི་འོང་གོང་འཕོ་ད་ཕྱིས་འོག་མིན་འགྲོ་ཕྱེད་འཕར་གྱི་མཚན་ཉིད། ཕྱིར་མི་འོང་གོང་འཕོ་འོག་མིན་འགྲོ་གང་ཞིག མདུན་ན་འདོན་ནས་འབྲས་བུ་ཆེ་བའི་བར་དུ་མ་ཞུགས་པར་གཙང་མའི་གནས་གཅིག་གམ་གཉིས་སུ་སྐྱེས་ནས་གནས་འགའ་དོར་ནས་འོག་མིན་དུ་ཞུགས་ནས་མྱ་ངན་ལས་འདའ་བའི་དགེ་འདུན། ཕྱིར་མི་འོང་གོང་འཕོ་འོག་མིན་འགྲོ་གནས་ཐམས་ཅད་དུ་འཆི་འཕོ་བའི་མཚན་ཉིད། ཕྱིར་མི་འོང་གོང་འཕོ་འོག་མིན་འགྲོ་གང་ཞིག ཚངས་རིས་ནས་ཚངས་ཆེན་མ་གཏོགས་གཟུགས་ཀྱི་གནས་གཞན་ཐམས་ཅད་དུ་རིམ་གྱིས་སྐྱེས་ནས་མཐར་འོག་མིན་དུ་འཇུག་པའི་དགེ་འདུན་དེའོ། །འདི་མཛོད་རྩ་འགྲེལ་ལྟར་ཡིན་ནོ། ། གཉིས་པ་གཟུགས་མེད་ཉེར་འགྲོ་ནི། ཉ་ཊཱིཀ་ལས། གཞན་ནི་གཟུགས་མེད་འགྲོ་རྣམ་བཞི། །ཞེས་པས་གཟུགས་ཀྱི་ཉོན་མོངས་སྤངས་ཀྱང་གཟུགས་མེད་ཀྱི་ཉོན་མོངས་མ་སྤངས་པའི་ཕྱིར་མི་འོང་ལ། དེར་སྐྱེས་ནས་འདའ་བ། བྱེད་མེད། བྱེད་བཅས། གོང་འཕོ་བཞིའོ། །གཟུགས་མེད་དུ་སྐྱེ་བའི་བར་དོ་མེད་པས་བར་དོར་འདའ་བ་མེད་དོ། །མཚན་ཉིད་ནི། ལམ་རིམ་གྱིས་པའི་ཕྱིར་མི་འོང་འབྲས་གནས་གང་ཞིག འདོད་པ་ནས་ཤི་འཕོས་ནས་གཟུགས་སུ་མི་སྐྱེ་བར་གཟུགས་མེད་ཁམས་སུ་སྐྱེས་ནས་དགྲ་བཅོམ་ཐོབ་པར་བྱེད་པའོ། །དབྱེ་བ་བཞི་བོ་ལ་བརྟགས་ཤིང་འགོད་དོ། །དེ་དག་མཐོང་ལམ་ཐོབ་པའི་རྟེན་དེ་ཉིད་ཀྱིས་ཕྱིར་མི་འོང་ཐོབ་པའི་དབྱེ་བའོ། །ཞེས་གསུངས་སོ། །གཟུགས་མེད་ཉེར་འགྲོའི་གོང་འཕོ་ལ། འཕར་བ་དང་གནས་ཐམས་ཅད་འཆི་འཕོ་བ་གཉིས་བཞག་ཀྱང་གཟུགས་མེད་དུུ་ཕྱེད་འཕར་མེད་དེ། གཟུགས་མེད་དང་པོ་ནས་འཕར་ཏེ་གསུམ་པར་སྐྱེ་རུང་ཡང་དེ་ནས་གནས་གཅིག་འཕར་ཏེ་གཟུགས་མེད་ཀྱི་གནས་གཞན་འགྲོ་ས་མེད་པའི་ཕྱིར་རོ། །གསུམ་པ་མཐོང་ཆོས་ཞི་བཤད་པ་ལ། ཉ་ཊཱིཀ་ལས། མཐོང་ལམ་གྱི་རྟེན་ལ་ཕྱིར་མི་འོང་ཐོབ་ནས་ཁམས་གོང་གི་ཉོན་མོངས་ཀྱི་གཉེན་པོ་ཚེ་དེ་ལ་རྫོགས་པར་བྱས་ནས་ཚེ་དེ་ལ་དགྲ་བཅོམ་ཐོབ་པར་བྱེད་པའི་རིམ་གྱིས་པའི་ཕྱིར་མི་འོང་ཞེས་པ། རིམ་གྱིས་པའི་ཕྱིར་མི་འོང་མཐོང་ཆོས་ཞིའི་མཚན་ཉིད་དེ། གཞན་ནི་འདི་ལ་མྱ་ངན་འདའ། །ཞེས་གསུངས་སོ། །