བྱ་བ་ལས་འབྲས་དང་མཐུན་པར་སྨོན་པ།
བྱ་བ་ལས་འབྲས་དང་མཐུན་པར་སྨོན་པ།
ཇོ་ནང་ཏཱ་ར་ནཱ་ཐས་རང་རྣམ་མ་བཅོས་ལྷུག་པ་ལས། ངས་ནི་ཁྱི་ལུད་དེ་འདྲ་ནོར་བུ་རང་ཤིན་ཏུ་ཡིན་པ་གདའ་ལགས་ཧ་ཡི་ཕ་ཕ་ཟེར་བ་མཁས་འཇུག་ཀྱག་ཁྲམ་དེ་འདྲ་སྔར་ཡང་བྱེད་མ་མྱོང༌། ད་ཡང་མི་བྱེད། གཏམ་དྲང་ཐལ་ལེ་སྨྲ་མཁན་དེ་ཡིན། རི་གཟར་གྱི་རྦབ་ལྟར་འཕོག་ཐུག་མང་སེ་བ་ཅིག་ཡོང་སྟེ། འཕོག་ཐུག་བྱུང་བ་ཚོ་རང་འཕོག་ཐུག་ཡོང་སར་བཞུགས་པས་ལན། ཞེས་གསུངས་པ་ལྟར་བསྟན་པ་དང་འགྲོ་བའི་དོན་དུ་ཆོས་དང་གནས་ལུགས་བཞིན་སྨྲ་བའི་སྤོབས་པ་ཐོགས་པ་མེད་པ་ཐོབ་པར་གྱུར་ཅིག བསྟན་འགྲོའི་དོན་ལས་རང་དོན་དུ་མཚན་སྙན་ལ་ཞེན་པ་སྐད་ཅིག་ཙམ་ཡང་མི་སྐྱེ་བར་ཤོག་ཅིག ལས་འབྲས་དང་མཐུན་པའི་བྱ་བཞག་གང་ཡང་ལྡོག་པ་མེད་པར་གྱུར་ཅིག བྱ་བ་གང་ཡིན་ན་གཞན་ལ་ཕན་པ་རེ་འབྱུང་སྲིད་པར་བྱིན་གྱིས་བརླབ་ཏུ་གསོལ། གཞན་ལ་ཕན་མེད་གནོད་པའི་བྱ་བ་གང་ཡང་རྡུལ་ཙམ་ཡང་མ་གྲུབ་པར་གྱུར་ཅིག བྱ་བ་བཟང་ངན་གང་ལ་ཡང་ཧ་ཅང་ཞེན་ཆགས་མི་ཆེ་བར་བདེན་སྟོང་སྒྱུ་མ་ལྟ་བུར་སྒོམ་པར་གྱུར་ཅིག གཞན་གྱིས་སྣང་ཚུལ་ཇི་ལྟར་ཡིན་ཀྱང་ཐབས་མཁས་ཀྱི་བྱ་བ་རྣམས་འབད་མེད་དུ་འགྱུར་པར་གྱུར་ཅིག མདོར་ན་བྱ་བ་གང་ཡིན་ན་བསྟན་འགྲོ་ལ་ཕན་པར་འགྱུར་ན་དེ་ལྟར་དུ་འགྲུབ་པར་མཆོག་གསུམ་དང་ཆོས་ཉིད་ལས་འབྲས་བདེན་པས་འགྲུབ་པར་གྱུར་ཅིག དངོས་གྲུབ་དཔལ་ནས་བྱ་བའི་བར་གསེང་ནས་སྨོན་པའོ། །