ལོ་ཙཱ་བ་བརྒྱ་རྩ་བརྒྱད་བསྡུས་ཏེ་སད་མི་མི་བདུན་ལ་སོགས་རྒྱ་གར་དུ་བརྫངས་པའི་ལེའུ།
དེ་ནས་མངའ་བདག་རྒྱལ་པོའི་ཐུགས་དགོངས་ལཿ སློབ་དཔོན་གཉིས་ཀྱི་ལུང་གྲངས་མང་གསུང་བསཿ དེ་དག་ཐམས་ཅད་བོད་དུ་ལེན་དགོས་བསམཿ བློ་རྣོ་སྙིང་རུས་ཆེ་བའི་མཆོག་གྱུར་པཿ ལོ་ཙཱ་བརྒྱ་དང་རྩ་བརྒྱད་ཚོལ་
༼༡༥༧ན༽དགོས་སྙམཿ མངའ་འོག་བོད་ཡུལ་རུ་བཞི་ཐམས་ཅད་ཀྱིཿ ལོ་བརྒྱད་ཡན་ཆད་བཅོ་བརྒྱད་མན་ཆད་ཀྱིཿ ལུས་ལ་སྐྱོན་མེད་སེམས་ལ་ཐགས་མ་ཞུགསཿ བློ་གསལ་གཡེར་ཞིང་དྲན་པ་གཞུངས་མང་བསྡུསཿ འདི་དུས་ཙ་ན་བོད་ཁམས་ཐམས་ཅད་ཀྱིཿ སྐྱེ་མཆེད་དངས་པའི་ཕ་མ་སེམས་ཁྲལ་ཆེཿ ལམ་འཇིགས་མང་ཞིང་སྲོག་མི་བརྟན་པས་སུཿ རྒྱ་གར་ཚད་པ་ཆུ་ནད་མིག་སེར་ཚཿ ལྐོག་རྔན་གཏོང་ཞིང་ཡུལ་འཁྱར་མཐའ་ལ་འབྲོསཿ དེ་དག་ཡུལ་གཞིས་རྒྱ་གར་འཁོར་ལ་སྟེརཿ ཡུལ་སྲེད་ཅན་རྣམས་རྒྱ་གར་མི་འཁོར་ཡང་ཿ སྙིང་རུས་ཅན་གྱིས་རྒྱ་གར་འགྲོ་བ་ལཿ ཡར་ཀླུངས་སྦ་མི་ཁྲི་གཞེར་ས་ཤི་ཏཿ འཁོན་རྗེ་ཀླུ་དབང་སྲུང་བ་ཞང་སེ་བཙནཿ ཤུད་བུ་ཁོང་སླེབ་སྦ་ལོ་རཏྣ་དང་ཿ རྨ་བན་རིན་ཆེན་མཆོག་དང་ཡར་ལྷ་བུཿ འཕྱོས་ཀྱི་གཉགས་ཆེན་ཛྙཱ་ན་ཀུ་མཱ་རཿ ཡོན་ཏན་སྙིང་པོ་ལེགས་སྦྱིན་ཉི་མ་དང་ཿ ལྡན་མ་རྩེ་མང་ཨཱ་ཙརྻ་ས་ལཿ བྲན་ཀ་མཱུ་ལ་ཀོ་ཥ་སྦས་ཐིར་ལེནཿ ཉང་བན་ཤ་མི་གོ་ཆ་ཨ་ནནྟཿ གནུབས་སྟོན་ནམ་མཁའི་སྙིང་པོ་འདྲེ་རྒྱལ་བློཿ རླངས་ཆེན་དཔལ་སེང་རུ་གྱོང་བཱི་རྻ་རཱཿ གྲུ་གུ་ཨེ་བག་ལང་གྲོ་དཀོན་ཅོག་འབྱུང་ཿ དྲན་པ་ནམ་མཁའ་མོན་བུ་རྒྱལ་བྱང་ཆུབཿ ཕྱི་ཤྭ་མི་ཏྲ་ཁུ་བཙན་འབྱུང་གནས་འོདཿ ཁྱུང་པོ་དབྱིད་བསོད་ངན་ལམ་རྒྱལ་མཆོག་དབྱངསཿ
༼༡༥༧བ༽གནུབས་བན་སངས་རྒྱས་ཡེ་ཤེས་སྦས་གསལ་སྣང་ཿ སྦ་ལོ་ཡེ་ཤེས་དབང་པོ་སྦ་དཔལ་དབྱངསཿ ཡེ་ཤེས་འཇམ་དབྱངས་ལྷ་ལུང་དཔལ་རྡོར་དང་ཿ ཉང་ཁམས་གོ་ཆ་ལ་སུམ་རྒྱལ་བྱང་ཆུབཿ སོག་པོ་དཔལ་ཡེ་ཨཱ་ཙར་ཡེ་ཤེས་དབྱངསཿ ཛྙཱ་ན་དེ་བ་ཀོ་ཥ་འགོས་ཆོས་གྲུབཿ བྲན་ཀ་མུ་ཏི་ཀ་དང་ལོ་ཀི་ཆུང་ཿ འོ་བྲན་དཔལ་གྱི་དབང་ཕྱུག་ཤམ་མེས་བཀོལཿ ལྷ་ལུང་ཡུལ་སྐོད་མེ་ཏོག་བྱང་ཆུབ་འབརཿ ཞང་བན་ཛྙཱ་ན་ཤེས་རབ་ཡར་རྗེ་བརྩིགསཿ སྣ་ནམ་རྡོ་རྗེ་བདུད་འཇོམས་ཡེ་ཤེས་སྡེཿ ཤཱཀྱ་པྲ་བྷ་ཨཱ་ཙར་དྷརྨཱ་ཤྲཱིཿ དེ་བ་སམྦྷ་དེ་བ་བྱང་ཆུབ་དང་ཿ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚནཿ བཻ་རོ་ཙ་ན་ཆོས་ཀྱི་ལྷུན་པོ་དང་ཿ རྩངས་བན་ལེགས་གྲུབ་དཔལ་འབྱོར་ལྷའི་ཟླ་བཿ དེ་སོགས་བརྒྱ་རྩ་བརྒྱད་ལ་ལོ་ཙཱ་བསླབསཿ དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ ཐད་ཀ་ཐད་ཀར་མཐུན་རྐྱེན་ལེགས་སྦྱར་ནསཿ བོད་ཀྱིས་སྡོམ་གསུམ་བསྲུང་བར་ཨེ་ཐུབ་སྙམཿ ཁྲུས་ཁང་གླིང་དུ་མཁན་པོ་གདན་དྲངས་ནསཿ སྦ་མི་གསལ་སྣང་དཔལ་དབྱངས་རྒྱལ་མཆོག་དབྱངསཿ ལྷ་ལུང་དཔལ་རྡོར་རྨ་རིན་ལ་སུམ་རྒྱལཿ མཁས་པ་བཻ་རོ་ཙ་ན་རབ་ཏུ་བྱུང་ཿ སད་མི་མི་བདུན་བླ་ཡི་མཆོད་གནས་བཀུརཿ ནམ་མཁའི་སྙིང་པོ་གྲུ་གུ་ཨེ་བག་ཤཿ རུ་གྱོང་བཱི་རྻ་རླངས་ཆེན་དཔལ་སེང་གེཿ
༼༡༥༨ན༽རྒྱལ་བའི་བློ་གྲོས་རྣམས་ཀྱང་རབ་ཏུ་བྱུང་ཿ དབུ་ཡི་མཆོད་གནས་བཀུར་བར་བཀའ་ལ་བཏགསཿ སད་མི་མི་བདུན་དགེ་སློང་མི་ལྔ་ལཿ དབུ་ལ་རིན་པོ་ཆེ་ཡི་པྲོག་ཞུ་བསྐོནཿ ཞལ་དུ་ལི་ཁར་ལྷ་ཡི་སྐྱེམས་དྲངས་ནསཿ འོ་སྐོལ་མཐའ་འཁོབ་བོད་ཀྱི་རྒྱལ་ཁམས་སུཿ མདོ་སྔགས་བསྟན་པ་དར་བར་བྱ་བའི་ཕྱིརཿ རྒྱ་གར་ཡུལ་དུ་ཆོས་འཚོལ་གཏོང་བ་ཡིནཿ གསེར་གྱི་པ་ཏྲ་བདུན་དང་གསེར་བྲེ་དགུཿ ཕྱག་ཏུ་སྣོམས་ལ་བོད་དུ་ཆོས་བསྒྱུར་ཅིགཿ དེ་སྐད་གསུངས་ནས་རྒྱ་གར་ཡུལ་དུ་བརྫངསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ལོ་ཙཱ་བ་བརྒྱ་རྩ་བརྒྱད་བསྡུས་ཏེ་སད་མི་མི་བདུན་ལ་སོགས་རྒྱ་གར་དུ་བརྫངས་པའི་ལེའུ་སྟེ་དོན་གཅིག་པའོཿ ཿཐ་ཐ་ཉྲ་རྒྱ་རྒྱཿ ཿ