གཏེར་སྲུང་དགེ་བསྙེན་སྙོན་ཁའི་གསེར་སྐྱེམས་མེ་རླུང་འཚུབས་མའི་སྒྲ་དབྱངས་ཞེས་བྱ་བ་བཞུགས་སོ།།

ཧཱུྃ། མ་བཅོས་འོད་གསལ་ཀ་དག་གཉུག་མའི་གཤིས། །ལྷུན་གྲུབ་འགགས་མེད་ཕྲིན་ལས་ཅིར་ཡང་སྣང་། །དཔལ་ཆེན་ཁྲོ་རྒྱལ་ནཱ་ག་རཀྴ་ཡིས། །སྤྲུལ་པ་དྲེགས་པ་ཀུན་གྱི་མངའ་བདག་པོ། །གཏེར་སྲུང་དགེ་བསྙེན་སྙོན་ཁ་ཞེས་བྱ་བ། །ལྷོ་ཕྱོགས་དུག་མཚོ་ཁོལ་མའི་མཚོ་འགྲམ་དུ། །གནོད་སྦྱིན་རྒྱལ་པོ་ཡཀྵ་འབར་བ་དང་། །ཀླུ་ཡི་སྲིན་མོ་དམར་མོ་སྙིང་འཕྲོག་མ། །མཐུ་ཆེན་དེ་གཉིས་སྲིད་ཅིང་བཤོས་པ་ལས། །ལྕགས་ཀྱི་སྒོ་ང་ཁ་མིག་དགུ་བ་བྱུང་། །དེ་མ་ཐག་ཏུ་ནམ་མཁའི་དབྱིངས་སུ་ཤོར། །ས་ལ་བབ་པས་ས་འོག་རིམ་དགུར་འཛུལ། །སླར་ཡང་ས་སྟེང་ཐོན་པ་ཙམ་གྱིས་ཀྱང་། །མི་སྡུག་སྒྲ་སྐད་སྣ་ཚོགས་བསྒྲགས་པ་ལས། །སེམས་ཅན་ཐམས་ཅད་འཇིགས་ཤིང་སྐྲག་པར་གྱུར། །དེ་ཚེ་དམར་མོ་སྙིང་འཕྲོག་སྐྲག་པ་ལས། །སྲིད་གསུམ་ཕུང་བྱེད་མ་རུང་པ་འདི་ནི། །འོ་སྐོལ་གཉིས་ཀྱིས་གདུལ་བར་མི་ནུས་ཏེ། །དེ་སྐད་གནོད་སྦྱིན་ཆེན་པོར་གསོལ་བ་ན། །གསང་བའི་བདག་པོ་ཕྱག་ན་རྡོ་རྗེ་ལ། །དེ་ཉིད་འདུལ་བར་ཞུ་བར་བགྲོས་པ་ལས། །རི་བོ་མ་ལ་ཡ་ཡི་རྩེ་མོ་རུ། །གནམ་ལྕགས་ཡོད་པའི་ཕོ་བྲང་ཡང་སྟེང་ན། །གསང་བའི་བདག་པོ་ཕྱག་ན་རྡོ་རྗེའི་མདུན། །སྒོ་ང་ལྕགས་ཀྱི་ཐག་པས་བསྡམས་ཏེ་འཁྱེར། །སེམས་ཅན་ཕུང་པར་བྱེད་པ་འདི་ཉིད་ནི། །བདག་ཅག་རྣམས་ཀྱིས་འདུལ་བར་མི་ནུས་པས། །དེ་སྐད་གསོལ་ཞིང་ཕྱག་ན་རྡོ་རྗེ་ལ། །ཕྱག་དང་བསྐོར་བ་བྱེད་དེ་གསོལ་བ་ན། །གསང་བའི་བདག་པོས་འདུལ་བར་ཞལ་བཞེས་ཏེ། །དེ་མ་ཐག་ཏུ་གནོད་སྦྱིན་གདུག་པ་ཅན། །འདུལ་བའི་ཏིང་ངེ་འཛིན་ལ་བཞུགས་ནས་ནི། །རང་གི་སྙིང་པོ་བརྗོད་ནས་རྡོ་རྗེ་ཡིས། །སྒོ་ངར་བརྒྱབ་སྟེ་བཀས་པའི་ནང་ཤེད་ནས། །སྙོན་ཁ་ནག་པོ་ཀླུ་བདུད་མགོ་དགུ་པ། །མི་སྡུག་སྐད་ཀྱིས་སྟོང་གསུམ་གང་བར་བྱེད། །དུག་དང་ནད་ཀྱི་རླངས་པ་སྤྲིན་ཕུང་འཁྲིགས། །འཇིག་རྟེན་སྐྱེ་འགྲོ་ཀུན་གྱི་སྲོག་གི་བདག །ཆོས་དབྱིངས་ལྷུན་གྲུབ་ངང་ལས་མ་གཡོས་ཀྱང་། །སྐུ་གཅིག་སྤྲུལ་བསྒྱུར་སྣ་ཚོགས་འགྱེད་མཛད་པ། །དུག་ལྔའི་རང་མདངས་སྐུ་ལྔར་ཤར་བ་ལས། །ཞེ་སྡང་ལས་བྱུང་ནག་པོ་ཏི་པ་ཙ། །འདོད་ཆགས་ལས་བྱུང་ཀླུ་ཡུམ་ཁྲག་མིག་མ། །ང་རྒྱལ་ལས་བྱུང་བགེགས་ཀྱི་རྒྱལ་པོ་དང་། །གཏི་མུག་ལས་བྱུང་ནག་པོ་འཛུམ་མེད་ཡིན། །ཕྲག་དོག་ལས་བྱུང་སྦྲུལ་གྱི་མཇུག་མ་ཅན། །རྟོགས་ན་ཡེ་ཤེས་ལྔ་ཡི་རང་བཞིན་ཏེ། །མ་རྟོགས་དུག་ལྔ་རང་རྒྱུད་དྲེགས་པའི་ཚུལ། །གཞན་ཡང་བྱང་ཕྱོགས་གནས་སུ་བྱོན་པའི་ཚེ། །གཉན་ཆེན་ཐང་ལྷ་ཡར་ཞུར་ཞེས་སུ་གྲགས། །སྐྱིད་ཤོད་ཀློང་ན་གཉན་ཆེན་མཁར་ནག་ཞེས། །ཕོ་མོ་རྫོང་རིང་ཀླུ་བདུད་མགོ་དགུ་པ། །དབུ་རིའི་ཕྱོགས་སུ་སྐུ་ལྷ་མཁའ་རུ་གྲགས། །སྒོས་ཆོས་ལྷ་རྒྱབ་བདུད་ཕོ་ཟླ་བའི་གདོང་། །མོན་ཁ་རིང་མོ་བདུད་ཕོ་སྐྲག་མེད་པ། །སེང་གེ་རྫོང་གསུམ་ཟུ་ར་ར་སྐྱེས་ཞེས། །མཁར་ཆུའི་གནས་སུ་དགེ་བསྙེན་སྙོན་ཁར་གྲགས། །དེ་ལྟར་སྐུ་གཅིག་སྤྲུལ་བསྒྱུར་སྣ་ཚོགས་ནི། །ངོ་བོ་གཅིག་ལ་རྣམ་འཕྲུལ་སྣ་ཚོགས་པ། །བསམ་མི་ཁྱབ་པ་ཆུ་ཟླའི་རོལ་གར་བཞིན། །དེ་ལྟར་མཐུ་ཆེན་དབང་པོ་འཁོར་བཅས་རྣམས། །རྔམ་བརྗིད་འབར་བས་སྟོང་གསུམ་གང་ནས་ཀྱང་། །རྣལ་འབྱོར་གདུང་བ་དྲག་པོས་འབོད་བའི་ཚེ། །སྐྱ་རེངས་ཆིབས་དང་ཉི་མ་ཟླ་བའི་ཟེར། །བྲ་ནག་ལ་སོགས་ཆིབས་བཞིའི་མངའ་བདག་པོ། །དྲན་པ་ཙམ་གྱིས་གནས་འདིར་གཤེགས་ནས་ཀྱང་། །གསང་ཆེན་དུར་ཁྲོད་རོལ་བའི་གནས་མཆོག་འདིར། །ཁྲག་ཞག་རྒྱ་མཚོ་འཁྱིལ་བའི་ཀློང་དཀྱིལ་ན། །ཞིང་ཆེན་གསར་རྙིང་བཀྲམ་པའི་གནས་མཆོག་འདིར། །སྔོན་གྱི་དམ་ཚིག་གཉན་པོ་རྗེས་དགོངས་ལ། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །སྔོན་ཚེ་ཞིང་པའི་བུ་མོ་ལེགས་སྐྱེས་ཀྱིས། །བཀྲ་ཤིས་རྫས་སུ་བྱིན་གྱིས་བརླབས་པའི་རྫས། །དཀར་མཛེས་ཡིད་འོང་འོ་ཞོའི་མཆོད་པ་འདི། །སྟོབས་ལྡན་དགེ་བསྙེན་སྙོན་ཁ་འཁོར་བཅས་ལ། །ཕུལ་བས་ནད་གདོན་གནོད་པ་ཞི་བར་མཛོད། །དཔག་བསམ་ལྗོན་ཤིང་ཤིང་དཀར་ལོ་མ་ཡི། །ལེགས་བསྡུས་དཔལ་ཡོན་ཕུན་ཚོགས་འབྲས་སྨིན་པའི། །བཅུད་ལྡན་རྒྱ་ཇ་ངད་ལྡན་རྒྱ་མཚོ་འདི། །གཏེར་སྲུང་དགེ་བསྙེན་སྙོན་ཁ་འཁོར་བཅས་ལ། །ཕུལ་བས་བསོད་ནམས་ཚེ་དཔལ་རྒྱས་པར་མཛོད། །རོ་བརྒྱའི་བཅུད་ལྡན་འབྲས་དྲུག་བཟང་པོ་ལ། །མྱོས་བྱེད་ཕབ་ཀྱིས་བྲན་པའི་བདུད་རྩི་ཆང་། །མ་དཱ་ན་ཡི་བདུད་རྩི་གསེར་སྐྱེམས་འདི། །ཕུལ་བས་ཁམས་གསུམ་དབང་དུ་བསྡུ་བར་མཛོད། །ཉམས་པ་བསྒྲལ་བའི་ཙིཏྟ་ཁྲག་གི་རྒྱུན། །དམར་ཆེན་རཀྟའི་རྦ་ཀློང་འཁྲུགས་པ་ལས། །འདོད་ཡོན་སྣ་ཚོགས་བཀྲ་བའི་གསེར་སྐྱེམས་འདི། །ཕུལ་བས་བྱད་ཕུར་རྦོད་གཏོང་འཇོམས་པར་མཛོད། །དེ་ལྟར་གསེར་སྐྱེམས་ཕུལ་བའི་བྱིན་རླབས་ཀྱིས། །མ་ལ་ཡ་དང་དཔལ་གྱི་ཕུག་རིང་དང་། །ལྷོ་བྲག་མཁར་ཆུ་ལ་སོགས་གནས་མཆོག་ནས། །སྔོན་ཚེ་གསང་བདག་ཕྱག་ན་རྡོ་རྗེ་དང་། །བར་དུ་རིག་འཛིན་སློབ་དཔོན་པདྨ་འབྱུང་། །ཐ་མ་སྔགས་འཆང་རཏྣ་གླིང་པ་ལ། །རང་རྟགས་སྲོག་གི་སྙིང་པོ་ཕུལ་ནས་ཀྱང་། །ལྕེ་ལ་དམ་ཚིག་བདུད་རྩི་ཉེར་བཞག་ནས། །སྤྱི་བོར་རྡོ་རྗེ་བཞག་ནས་གསང་མཚན་བཏགས། །ཅི་བགྱིའི་བཀའ་ཉན་སྒྲུབ་ཅེས་ཁས་བླངས་པ། །ཇི་ལྟར་ཁས་བླངས་དམ་བཅས་ཇི་བཞིན་དུ། །ད་ལྟར་མཁའ་འགྲོ་འདུ་བའི་གནས་མཆོག་འདིར། །སྒྲུབ་པའི་རིག་འཛིན་རྣལ་འབྱོར་བདག་ཅག་ལ། །རབ་འབྱམས་ཕྲིན་ལས་དབྱར་གྱི་མཚོ་ཆེན་ལྟར། །འབད་མེད་ལྷུན་གྲུབ་ཛ་ཧུའི་རྒྱུན་བཞིན་དུ། །རྒྱུན་མི་འཆད་པར་འདོད་པའི་དོན་རྣམས་ཀུན། །ཡིད་ལ་སྨོན་པ་མཐའ་དག་འགྲུབ་ནས་ཀྱང་། །མཐར་ཐུག་བྱང་ཆུབ་སྙིང་པོ་མ་ཐོབ་བར། །ལྷ་མཆོག་ཁྱོད་ཀྱི་ཐུགས་རྗེའི་སྟོབས་ཤུགས་ཀྱིས། །བར་ཆད་རྐྱེན་གྱི་རྣམ་སྨིན་ཅི་བྱུང་ཡང་། །གཏེར་བདག་ཁྱོད་ཀྱི་ཐུགས་རྗེའི་འོད་ཟེར་གྱིས། །མི་མཐུན་ཉེས་པའི་སྤྲིན་ཚོགས་ཀུན་བསལ་ནས། །དགེ་ལེགས་ཉི་མས་ས་སྟེང་ཁྱབ་པར་ཤོག །ཅེས་དགེ་བསྙེན་སྙོན་ཁའི་གསེར་སྐྱེམས་མེ་རླུང་འཚུབས་མའི་སྒྲ་དབྱངས་ཞེས་བྱ་བ་འདི་ནི་ས་ཕོ་རྟ་ལོའི་ཟླ་༢ཚེས་༡༢ལ་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་མགོན་ཁང་དབང་དྲག་རོལ་བ་ནས་བྲིས་པ་དགེ་འདི་འབྲི་སྐབས་སུ་འཚུབ་ལྷོང་ཅུང་ཟད་རེ་བྱུང་བས་ནམ་ཡིན་གང་བྱུང་དེས་ཆོག་མ་གསུངས་ན་ལེགས་སོ། །ཉེས་འགལ་མཆིས་ན་སྲུང་མའི་ཚོགས་ལ་བཤགས། བསྟན་དང་འགྲོ་ལ་ཕན་པའི་རྒྱུར་གྱུར་ཅིག བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །དགེའོ། །