རྒྱན།
གཉིས་པ་རྒྱན་ལ་ལྔ་སྟེ། ༡ ངོ་བོ་ནི། ངོ་བོའི་ཆོས་ལས་ཁྱད་པར་གྱི་ཆོས་ཀྱིས་མཛེས་པའོ། ༢ །ངེས་ཚིག །གང་ཡོད་པས་ཡོད་པ་མཛེས་པའི་ཕྱིར་རྒྱན་ནོ། ༣ །དབྱེ་ན། གསུམ་སྟེ་ཆོས་ཉིད་ཀྱི་རྒྱན་དུ་སྐུ་གསུམ། ཆོས་སྐུའི་རྒྱན་དུ་གཟུགས་སྐུ་གཉིས། །གཉིས་ཀའི་རྒྱན་དུ་ཡེ་ཤེས་ལ་རང་གདངས་འོད་ལྔ་དང་བཅས་པའོ། །དེ་ཡང་། ཀུན་གསལ་ལས། ངོ་བོ་དབྱེ་བའི་སྒོ་ནས་བསྟན། །ངེས་ཚིག་མཛེས་པས་རྒྱན་ཞེས་བྱ། །༼དབྱེ་ན་༽ཆོས་ཉིད་༼ཀྱི་༽རྒྱན་དང་ཆོས་སྐུའི་རྒྱན། །ཆོས་ཉིད་རྒྱན་ནི་སྐུ་གསུམ་ཡིན། །ཆོས་སྐུའི་རྒྱན་ནི་གཟུགས་སྐུ་གཉིས། །མཚན་ཉིད་འཛིན་པའི་འོད་ལྔ་ཡང་། །གཉིས་ཀའི་རྒྱན་དུ་དེ་བཞིན་བརྗོད། །མཚོན་དཔེ་གསེར་ལ་གཡུས་སྤྲས་འདྲ། །ངེས་ཚིག་དོན་གྱི་དབྱེ་བ་ནི། །ཆོས་ཉིད་དག་ལ་ཆོས་སྐུས་བརྒྱན། །སྟོང་པ་ཕྱང་ཆད་བསལ་བས་མཛེས། །ཆོས་ཀྱི་སྐུ་ལ་ཡེ་ཤེས་བརྒྱན། །ཡོན་ཏན་འགག་པ་མེད་པས་མཛེས། །ཡེ་ཤེས་དག་ལ་ཐུགས་རྗེས་བརྒྱན། །འགྲོ་དྲུག་༼རང་སར་འདྲེན་པས་མཛེས་༽དོན་ལ་སྦྱོར་བས་
མཛེས། །དེ་ཕྱིར་མཛེས་པའི་རྒྱན་ཞེས་བྱ། །ཞེས་སོ། ༤ །དཔེ་ལ་གསུམ་སྟེ། ཆོས་ཉིད་སྟོང་པ་ལ་ཆོས་སྐུས་བརྒྱན་པ་ནམ་མཁའ་ལ་ཉི་མས་བརྒྱན་པ་ལྟ་བུ། ཆོས་སྐུ་ལ་རིག་པ་ཡེ་ཤེས་ཀྱིས་བརྒྱན་པ་རྨ་བྱའི་སྒོ་ང་རང་འོད་ལྔ་ཕྲུ་གུའི་རིག་པས་བརྒྱན་པས་བརྒྱན་པ་ལྟ་བུ། ཡེ་ཤེས་རྟོག་མེད་ལ་ཐུགས་རྗེས་བརྒྱན་པ་མན་ཤེལ་ལས་འོད་ལྔ་ཕྱིར་གསལ་དུ་ཤར་བ་ལྟ་བུའམ། གསེར་ལ་གཡུས་སྤྲས་པ་དང་། མན་ཤེལ་ལ་འོད་གསལ་བ་དང་། སྒོ་ང་བརྡོལ་ནས་ཕྱིར་བྱུང་བ་ལྟར་རིམ་པ་བཞིན་ཤེས་པར་བྱ་སྟེ། དེ་ལས། ནམ་མཁའི་དཀྱིལ་འཁོར་ན་ཉི་ཟླ་གསལ་བར་གནས་པ་དང་གཅིག །རིན་ཆེན་གསེར་ལ་གཡུ་ཡི་ཕྲ་བཅུག་གཉིས། །ཆོས་ཉིད་ཆོས་སྐུས་བརྒྱན་པའི་དཔེ་རུ་བསྟན། །རྨ་བྱའི་སྒོ་ང་ཁ་དོག་ལྔ་ལྡན་དང་། །མན་ཤེལ་སྐུ་ལ་འོད་ལྔ་མི་འགག་པ། །ཆོས་ཀྱི་སྐུ་ལ་ཡེ་ཤེས་བརྒྱན་པའི་དཔེ། །མན་ཤེལ་རྐྱེན་༼དང་༽འཕྲད་༼པས་༽སྣང་བ་ཕྱིར་༼རུ་འབྱུང་བ་༽དབྱུང་དང་། སྒོ་ང་བྱེར་སྨིན་ཕྱིར་བྱུང་བྱ་བ་བྱེད། །ཉི་མའི་སྙིང་པོར་འོད་དང་ཟེར་འབྱུང་རྣམས། །ཡེ་ཤེས་དག་ལ་ཐུགས་རྗེས་བརྒྱན་པའི་དཔེ། །ཞེས་སོ། ༥ །མཚོན་ཚིག་ནི། དེ་ཉིད་ལས། ངས་བསྟན་རྒྱུད་ལུང་ཐམས་ཅད་དུ། །ཆོས་ཉིད་ངང་ན་ཆོས་སྐུ་གནས། །དེ་སྐད་བརྗོད་པའི་ཚིག་བྱུང་ན། །ཆོས་ཉིད་ཆོས་སྐུས་བརྒྱན་པར་བཤད། །རིག་པའི་མཚན་ཉིད་༼མཚན་ཉིད་ལྔར་བརྗོད་ཅིང་། དེ་ཡང་ཡེ་ཤེས་ལྔ་ཡི་མཚན་ཉིད་དང་། དེའི་གདངས་སུ་བརྗོད་པས་ན་༽ཡེ་ཤེས་ལྔར་བརྗོད་ཅིང་། །དེ་ཡི་རང་གདངས་ཡེ་ཤེས་ལྔར་བརྗོད་ན། །ཆོས་ཀྱི་སྐུ་ལ་ཡེ་ཤེས་བརྒྱན་པར་བཤད། །ཡེ་ཤེས་འོད་ལྔ་སྐུ་
རུ་རྫོགས་ལུགས་དང་། །དེ་ཡི་རིགས་དང་ཁ་དོག་དབྱིབས་བརྗོད་པས། །ཡེ་ཤེས་དག་ལ་ཐུགས་རྗེས་བརྒྱན་པར་བཤད། །ཅེས་སོ། །