ཐལ་འགྱུར་དང་རང་རྒྱུད་གཉིས་དབུ་མའི་དབྱེ་བར་མི་རིགས་པར་བསྟན་པ།
གཉིས་པ་ཐལ་འགྱུར་དང་རང་རྒྱུད་གཉིས་དབུ་མའི་དབྱེ་བར་མི་རིགས་པར་བསྟན་པ་ནི། རང་རྒྱུད་ཐལ་འགྱུར་གཉིས་ཀ་འདུས་བྱས་ཡིན། །དེ་ཕྱིར་དེ་དག་དངོས་པོའི་མཐར་ལྟུང་ཞིང༌། །ཡོད་པའི་ཕྱོགས་སུ་ཆད་ཕྱིར་དབུ་མ་མིན། །དབུ་མ་མིན་པ་དབུ་མའི་དབྱེ་གཞི་དང༌། །ཕྱེ་བ་ཡ་ཀྱལ་གང་དུ་ཡང་མི་རུང་སྟེ། །ཚད་མ་མིན་པ་ཚད་མའི་དབྱེ་གཞི་དང༌། །ཕྱེ་བའི་ཡ་ཀྱལ་གང་དུའང་མི་རུང་བཞིན། །བདེན་པ་མིན་པ་བདེན་པའི་དབྱེ་གཞི་དང༌། །ཕྱེ་བའི་ཡ་ཀྱལ་གང་དུའང་མི་རུང་བཞིན། །རྫོགས་ལྡན་ལུགས་ནི་དེ་ལྟར་ཡིན་མོད་ཀྱང༌། །རྩ་བར། རང་རྒྱུད་ཐལ་འགྱུར་གཉིས་ཀ་འདུས་བྱས་ཡིན། ཞེས་པ་ནས། དེ་ལྟར་ཡིན་མོད་ཀྱང༌། །ཞེས་པའི་བར་ཤོ་ལོ་ཀ་གཉིས་དང་རྐང་བ་གཉིས་བྱུང༌། དེའི་ཚིག་དོན་ནི། རང༵་རྒྱུ༵ད་དུ་སྒྲུབ་པ་དང༌། ཐ༵ལ་འགྱུ༵ར་དུ་འཕེན་པ་གཉི༵ས་ཀ༵འང་འདུ༵ས་བྱ༵༵ས་ཀྱི་དངོས་པོ་ཡི༵ན་པ་དེའི༵་ཕྱི༵ར་དེ༵་ད༵ག་དངོ༵ས་པོ༵འི་མཐ༵ར་ལྟུང་ཞི༵ང་ཡོ༵ད་པ༵འི་ཕྱོག༵ས་སུ༵་ཆ༵ད་པའི་ཕྱི༵ར་ན་ད༵བུ་མ༵་བར་མ་ཕུང་པོ་གསུམ་པ་མ་ནིང་གི་གོ་འཕང་མི༵ན་ནོ། །ད༵བུ་མ༵་མི༵ན་པ༵་ཞིག་དབུ༵་མའི༵་དབྱེ༵་ག༵ཞི་ད༵ང་དབུ་མ་ལ་ཕྱེ༵་བ༵འི་ཡ༵་གྱ༵ལ་ག༵ང་དུ༵་ཡ༵ང་མི༵་རུ༵ང་སྟེ༵། དཔེར་ན་ཚ༵ད་མ༵་མི༵ན་པ༵་ཚ༵ད་མ༵འི་དབྱེེ༵་གཞི༵་ད༵ང༌། དེ་ལ་ཕྱེ༵་བ༵འི་ཡ༵་གྱ༵ལ་ག༵ང་དུ༷འ༵ང་མི༵་རུ༵ང་བ་བཞི༵ན་དང༌། བདེ༵ན་པ༵་མི༵ན་པ༵་བདེ༵ན་པ༵འི་ད༵བྱེ་གཞི༵་ད༵ང༌། ཕྱེ༵་བའི༵་ཡ༵་གྱ༵ལ་ག༵ང་དུ༵འ༵ང་མི༵་རུ༵ང་བ་བཞི༵ན་རྫོ༵གས་ལྡ༵ན་ལུག༵ས་ལ་ནི༵་དེ༵་ལྟ༵ར་ཡི༵ན་མོ༵ད་ཀྱ༵ང་གཞན་ལུགས་ལ་དེ་ལྟར་མ་ཡིན་པའི་ཕྱིར་རོ། །དེའི་དོན་མདོར་བསྡུས་ན་ཐལ་འགྱུར་དང་རང་རྒྱུད་གཉིས་ཀ་ཡོད་པའི་ཕྱོགས་སུ་ལྷུང་བས་དབུ་མ་ལས་དབྱེ་བའི་ཡ་གྱལ་ཡིན་པར་མི་རིགས་པ་དཔེ་དོན་དང་བཅས་ཏེ་བསྟན་ཏོ། །གསུམ་པ་གཞན་ལུགས་ཀྱི་དབུ་མའི་དོན་བཀག་ནས་རང་ལུགས་བསྟན་པ་ལ། གཞན་གྱི་འདོད་ལུགས་བསྟན་པ། དེ་ལྟར་འདོད་པ་དེ་སྡིག་ལྟ་ཆེན་པོ་ཡིན་པར་བསྟན་པ། སྟོང་ཉིད་ཟབ་མོ་གསུངས་པ་ཐམས་ཅད་སྟོང་གཞི་ཟབ་མོ་ལ་དགོངས་པར་བསྟན་པ། སྟོང་གཞི་ཉིད་ཟབ་མོ་མཐར་ཐུག་ཡིན་པས་དེ་སྟོན་པའི་མདོ་སྔགས་ཐམས་ཅད་དབུ་མའི་གཞུང་དུ་བསྟན་པ་དང་བཞི། དང་པོ་ནི། གསུམ་ལྡན་མར་བཅད་སྐྱོན་ཅན་རྣམས་ན་རེ། །མཐའ་དང་བྲལ་བ་ཙམ་ལ་དབུ་མ་ཞེས། །བཏགས་པར་ཟད་ཀྱི་དོན་ལ་དབུ་མ་མེད། །དབུ་མའང་དབུ་མས་སྟོང་པ་ཡིན་ཕྱིར་ལོ། །རྩ་བར། གསུམ་ལྡན་མར་བཅད་སྐྱོན་ཅན་རྣམས་ན་རེ། །ཞེས་པ་ནས། སྟོང་བ་ཡིན་ཕྱིར་ལོ། ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། གསུ༵མ་ལྡ༵ན་མ༵ར་བཅ༵ད་སྐྱོ༵ན་ཅ༵ན་རྣམ༵ས་ན༵་རེ༵། མཐ༵འ་ད༵ང་བྲལ༵་བ༵་ཙ༵མ་དེ་ལ༵་དབུ༵་མ༵་ཞེ༵ས་བཏག༵ས་པ་ཡིན་པར༷་ཙམ་དུ་ཟ༵ད་ཀྱི༷་དོ༵ན་ལ༵་ད༵བུ་མ༵་མེ༵ད་པ་ཡིན་པས་དབུ༵་མ༷འ༵ང་དབུ༵་མ༵ས་སྟོ༵ང་བ༵་ཡི༵ན་པའི་ཕྱི༵ར་ཞེས་འདོད་པ་དང༌། ལོ༵་ཞེས་པ་ནི་ཕ་རོལ་བོའི་འདོད་པ་ལ་མ་རངས་བར་བྱས་པའོ། །དེ་ལྟར་འདོད་པ་ལ་འདིའི་སྐབས་སུ་འདི་ཉིད་ཀྱི་འགྲེལ་བ་ལས། ཡིད་འབྱུང་བ་དང་སྐྱོ་ཤས་སྐྱེ་བ་དང་སྙིང་རྗེ་ཆེན་པོ་སྐྱེ་བ་ཡང་མ་ཡིན་ནོ། །ཞེས་གསུངས་སོ། །