བཞི་བ་ཕྱིར་མི་འོང་ལུས་མངོན་བྱེད་བཤད་པ།

བཞི་བ་ཕྱིར་མི་འོང་ལུས་མངོན་བྱེད་བཤད་པ་ལ།

ཉ་ཊཱིཀ་ལས། འགོག་པ་ཐོབ་པའི་ཕྱིར་མི་འོང༌། །ལུས་ཀྱིས་མངོན་སུམ་བྱེད་པར་འདོད། །ཅེས་པས་རིམ་གྱིས་པའི་ཕྱིར་མི་འོང་ལུས་མངོན་བྱེད་ཀྱི་མཚན་ཉིད། རིམ་གྱིས་པའི་ཕྱིར་མི་འོང་གང་ཞིག འགོག་པའི་སྙོམས་འཇུག་དེ་སེམས་མེད་ལུས་གྱིས་མངོན་དུ་བྱེད་པའོ། །དེ་ཡང་མིའི་རྟེན་ལ་ཕྱིར་མི་འོང་ཐོབ་ནས་གཟུགས་གཟུགས་མེད་ཀྱི་སྙོམས་འཇུག་རྫོགས་པར་བྱས་ཤིང་འགོག་པའི་སྙོམས་འཇུག་ཐོབ་པར་བྱས་ནས་འདའ་བར་བྱེད་པ་ཞིག་སྟེ། འདོད་པར་ཚེ་གྱུར་འཕགས་པ་ཡིན་ན་ཚེ་དེ་ལ་འདའ། མ་གྱུར་པའི་རྟུལ་ན་ཉམས་སྲིད་པས་ཕྱི་མ་ལ་གཟུགས་སུ་སྐྱེས་ནས་འགོག་པ་ལ་ཞུགས་པས་མྱང་འདས་དང་འདྲ་བའི་ཆོས་ལུས་ཀྱིས་མངོན་དུ་བྱེད་དོ། །ཅིའི་ཕྱིར་ལུས་ཀྱིས་ཤེ་ན། དེའི་ཚེ་སེམས་མེད་པས་ལུས་ལ་བརྟེན་ཏེ་སྐྱེ་བའི་ཕྱིར། དེ་ལས་ལངས་ནས་འགོག་སྙོམས་ནི་མྱང་འདས་དང་འདྲ་བར་ཞི་བ་ཡིན་ནོ་སྙམ་དུ་སེམས་པར་འགྱུར་བ་རྣམ་ཤེས་དང་བཅས་པའི་ལུས་ཞི་བ་སྔོན་མ་ཐོབ་པ་ཐོབ་པར་འགྱུར་རོ། །ཞེས་གསུངས་སོ། །ཕྱིར་མི་འོང་ལ་དབྱེ་བ་གཞན་ཡང་ཡོད་དེ། ཉ་ཊཱིཀ་ལས། མདོ་ལས། དམ་པའི་འགྲོ་བ་བདུན་བཤད་པ་ནི། བར་དོར་འདའ་བ་གསུམ་སྐྱེས་ནས་འདའ་བ་གསུམ་གོང་འཕོ་གཅིག་ཏུ་བགྲངས་པ་དང་བདུན་ནོ། །ཕྱིར་མི་འོང་དགུར་བཤད་པ་ནི། བར་དོར་གསུམ་སྐྱེས་ནས་གསུམ་གོང་འཕོ་ལ་འཕར་གསུམ་མོ། །ཞེས་སོགས་བཤད་དོ། །ཞེས་གསུངས་སོ། །གཉིས་པ་ཕྱིར་མི་འོང་གི་སྐོར་ལ་མཐའ་རགས་ཙམ་དཔྱད་པ་ལ། ཉ་ཊཱིཀ་ལས། གཟུགས་སུ་སྐྱེ་བའི་ཀུན་སྦྱོར་སྤངས་མངོན་པར་འགྲུབ་པའི་ཀུན་སྦྱོར་མ་སྤངས་པས་གཟུགས་ཀྱི་བར་དོར་སྐྱེས་ནས་དེར་ལམ་ཟག་མེད་བསྒོམ་ཏེ་དགྲ་བཅོམ་ཐོབ་ནས་ཚེ་མ་རྫོགས་པར་མྱུར་དུ་ལྷག་མེད་དུ་འདའ་སྟེ། ཞེས་གཟུགས་སུ་སྐྱེ་བའི་ཀུན་སྦྱོར་སྤངས་བ་ལ་གཟུགས་ཀྱི་ཉོན་མོངས་དགུུ་སྤངས་དགོས་པ་མ་ཡིན་ནམ་ཐོག་མར་ལས་དེ་བསགས་པའི་ཀུན་སློང་གི་ཉོན་མོངས་པ་མ་སྤངས་བར་ལས་དེ་སྤངས་པ་མེད་དམ་ཞིབ་པར་དཔྱད་དགོས་སོ། །ཡང་བར་འདའ་བའི་སྐབས་སུུ་ཉ་ཊཱིཀ་ལས། ཚེ་མ་རྫོགས་པར་མྱུར་དུ་ལྷག་མེད་དུ་འདའ་སྟེ། ཞེས་དང༌། ཡང་སྐྱེ་འདའ་བའི་སྐབས་སུ་དེ་ལས་ཚེ་རྫོགས་ནས་འབད་མེད་དུ་ལྷག་བཅས་ལྷག་མེད་དུ་འདའ་བ་སྟེ། ཞེས་སོགས་ཀྱིས་ལྷག་བཅས་དགྲ་བཅོམ་ཚེ་མ་འཕོས་པར་ལྷག་མེད་ཐོབ་པ་ཡོད་མེད་དང༌། ལྷག་བཅས་དགྲ་བཅོམ་མ་ཐོབ་པར་ཐོག་མར་ལྷག་མེད་དགྲ་བཅོམ་ཐོབ་པ་ཡོད་མེད་དཔྱད། ཡང་མཛོད་ལས། དེ་དག་གི་ནི་ཁྱད་པར་རྣམས། །ལས་དབང་ཉོན་མོངས་བྱེ་བྲག་ལས། །ཞེས་དང༌། ཉ་ཊཱིཀ་ལས། དེའི་དབང་རྟུལ། ཉོན་མོངས་ཆེན་པོ། ལན་གྲངས་གཞན་ལ་མྱོང་འགྱུར་གྱི་ལས་ཅན་སྐྱེ་བ་གོང་དུ་བརྒྱུད་ནས་འདའ་དགོས་པ་སྟེ། ཞེས་གོང་འཕོ་དབང་རྟུལ་ཡིན་པར་གསུངས་པ་དང༌། གོང་འཕོའི་དབྱེ་བ་གསུམ་དབང་པོ་རྣོ་འབྲིང་རྟུལ་གསུམ་གྱིས། ཉ་ཊཱིཀ་ལས། དབང་རྣོན་འཕར་བ། ཞེས་དང༌། དབང་འབྲིང་ཕྱེད་དུ་འཕར་བ། ཞེས་དང༌། དབང་རྟུལ་གནས་ཐམས་ཅད་དུ་འཆི་འཕོ་བའོ། །ཞེས་གསུངས་པ་དང༌། མདོ་ལུགས་མ་ལས། ཕྱིར་མི་འོང་དབང་རྣོན་རྣམས་ནི་གནས་གཙང་མ་རྣམས་སུ་སྐྱེ་བའི་ཕྱིར་དང༌། ཞེས་གསུངས་པ་དང༌། ཀུན་བཏུས་ས་འགྲེལ་ལས། ཕྱིར་མི་འོང་དབང་རྣོན་གནས་གཙང་བར་སྐྱེ་བར་བྱ་བའི་ཕྱིར་དང༌། ཞེས་གསུངས་པ་རྣམས་གོང་འོག་བསྒྲེས་ནས་དེ་དག་གིས་དབང་པོ་རྣོ་རྟུལ་འཇོག་ཚུལ་ལ་དཔྱད་པར་བྱའོ། །སྐྱེ་འདའ་བ་ཕྱི་མ་གཉིས་ཀྱི་གོ་རིམ་ཉ་ཊཱིཀ་གོང་དུ་བཀོད་པ་ལྟར་མཛོད་ལས། དེ་ནི་བར་སྐྱེས་འདུ་བྱེད་དང༌། །འདུ་བྱེད་མེད་ཡོངས་མྱ་ངན་འདའ། །གོང་དུ་འཕོ་བ་རྣམས། ཞེས་དང༌། མངོན་རྟོགས་རྒྱན་ལས། བྱེད་དང་བྱེད་མིན། ཞེས་དང༌། མདོ་ལུགས་མ་ལས། འདུ་བྱེད་པ་དང་འདུ་བྱེད་མེད་པར་མྱ་ངན་ལས་འདའ་བ་སྟེ། ཞེས་གསུངས་པ་ལ། འོ་ན་འདུ་བྱེད་དང་བཅས་ཏེ་འདའ་བ་སྔོན་དུ་བགྲང་བ་ཡིན་པར་ཐལ། འདོད་པའི་ཕྱིར། འདོད་མི་རིགས་པར་ཐལ།མཛོད་རང་འགྲེལ་ལས། མདོ་ལས་ནི་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་སྔར་འབྱུང་བས་དེ་ཁོ་ན་བཞིན་དུ་རུང་སྟེ་ལམ་ངང་གིས་འབྱུང་བ་དང་ངང་གིས་འབྱུང་བ་མ་ཡིན་པ་དག་ནི་འབད་པ་མེད་པ་དང་འབད་པས་འཐོབ་པའི་སྒོ་ནས་མངོན་པར་འདུ་བྱེད་པ་མེད་པ་དང་མངོན་པར་འདུ་བྱེད་པས་བསྒྲུབ་པར་བྱ་བ་ཡིན་པའི་ཕྱིར་རོ། །ཞེས་དང༌། ཀུན་བཏུས་ལས། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་གང་ཞེ་ན། གང་སྐྱེས་ནས་མངོན་པར་འདུ་བྱེད་པ་མེད་པར་ལམ་མངོན་དུ་བྱས་ནས་སྡུག་བསྔལ་གྱི་མཐའ་མ་ཐོབ་པའོ། །མངོན་པར་འདུ་བྱེད་པ་དང་བཅས་པའི་ཡོངས་སུ་མྱ་ངན་ལས་འདའ་བ་གང་ཞེ་ན། གང་སྐྱེས་ནས་མངོན་པར་འདུ་བྱེད་པས་ལམ་མངོན་དུ་བྱས་ཏེ་སྡུག་བསྔལ་གྱི་མཐའ་མ་ཐོབ་པའོ། །ཞེས་དང༌། དེའི་ས་འགྲེལ་ལས། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་གང་ཞེ་ན། ཕྱིར་མི་འོང་གང་གཟུགས་ཁམས་གང་རུང་དུ་སྐྱེས་ནས་ཅུང་ཟད་ལོན་པ་ན་མངོན་པར་འདུ་བྱེད་པའི་འབད་རྩོལ་མེད་པར་སྔོན་གོམས་པ་ལས་ངང་གིས་འབྱུང་བའི་ལམ་མངོན་དུ་བྱས་ནས་སྡུག་བསྔལ་གྱི་ཐ་མ་མྱ་ངན་ལས་འདས་པ་ཐོབ་པའོ། །མངོན་པར་འདུ་བྱེད་པ་དང་བཅས་པའི་ཡོངས་སུ་མྱ་ངན་ལས་འདའ་བ་གང་ཞེ་ན། ཕྱིར་མི་འོང་གང་གཟུགས་ཁམས་གང་རུང་དུ་སྐྱེས་ནས་རིང་དུ་ལོན་པ་ན་རང་གི་ངང་གིས་མི་འབྱུང་བར། བསྒྲིམས་ཏེ་མངོན་པར་འདུ་བྱེད་པའི་འབད་རྩོལ་དང་བཅས་པས་ལམ་མངོན་དུ་བྱས་ནས་སྡུག་བསྔལ་གྱི་ཐ་མ་མྱ་ངན་ལས་འདས་པ་ཐོབ་པའོ། །ཞེས་གསུངས་པའི་ཕྱིར་ཟེར་ན་མངོན་པ་གོང་འོག་གི་ཁྱད་ཞིག་ཡིན་པར་སྣང་ངོ༌། །སྤེལ་ཆོས་ཟག་བཅས་དེ་ཉ་ཊཱིཀ་ལས་ཞི་རགས་རྣམ་པ་ཅན་དུ་གསུངས་ལ། དེ་ལྟར་ན་སྤེལ་སྒོམ་རྒྱུད་ལྡན་དེའི་འོག་ས་ལ་ཆགས་པ་དང་བྲལ་ཟིན་ན་ད་ཞི་རགས་རྣམ་ཅན་སྒོམ་པའི་དགོས་པ་གང་ཡིན་དཔྱད་དོ། །ཕྱིར་མི་འོང་གིས་གནས་གཙང་དུ་སྐྱེ་ཕྱིར་དུ་སྤེལ་སྒོམ་བསྒོམ་ན་སྔར་བཤད་ལྟར་ལན་གྲངས་གཞན་ལ་མྱོང་འགྱུར་གྱི་ལས་དེ། གནས་གཙང་འཕེན་བྱེད་དུ་ཁ་བསྒྱུར་བ་ཡིན་ན་དེ་འདྲའི་ཁ་བསྒྱུར་བའི་ལས་དེ་གསར་བསགས་ཀྱི་གང་ཟག་དེ་སྐྱེ་འཕགས་སུ་ཡིན། དེ་འཕགས་པ་ཡིན་ན། རྟེན་འབྲེལ་མདོ་འགྲེལ་ལས། བདེན་པ་མཐོང་ལ་འཕེན་པ་མེད། །ཅེས་གསུངས་པ་དང༌། རས་དཀར་པོ་ཞིག་དམར་པོ་བསྒྱུར་བ་དེའི་ཚེ་རས་དམར་པོ་དེ་གསར་ཏུ་འཐག་ཟེར་དགོས་པར་འགྱུར་བ་དང༌། བྱིས་པ་ལོ་གཅིག་ཅན་དེ་མའི་མངལ་ལས་སྐྱེས་ཚེ་དེ་དང་རྒྱུད་གཅིག་པའི་ལོ་བརྒྱད་ཅུ་ཅན་དེ་མ་སྐྱེས་པར་འགྱུར་བ་སོགས་ཀྱིས་གནོད་པའི་ཕྱིར། དེ་སོ་སྐྱེ་ཡིན་ན་སྔར་གྱི་ལས་དེ་བསགས་དུས་སུ་གནས་གཙང་སྐྱེ་བྱེད་ཀྱི་ལས་དེ་བསག་དགོས་ལ། དེ་ལྟར་ན་དེ་རྗེས་སུ་གནས་གཙང་སྐྱེ་བ་འཕེན་བྱེད་དུ་ཁ་བསྒྱུར་མི་དགོས་པར་འགྱུར་རོ་ཞེ་ན་དཔྱད། ཡང་གནས་གཙང་གི་སྐྱེ་བ་འཕེན་བྱེད་མེད་པར་ཐལ། འཕགས་པའི་གནས་གཙང་སྡུག་བདེན་མ་ཡིན་པའི་ཕྱིར་ཏེ། ཀུན་བཏུས་ས་འགྲེལ་ལས། གནས་གཙང་མ་ལྔ་སྟེ་བཅུ་བདུན་གྱི་སྟེང་དུ། གནས་གཙང་མ་ལས་ཀྱང་འདས་པ་ན་དབང་ཕྱུག་ཆེན་པོའི་གནས་ཞེས་བྱ་བ་བྱང་ཆུབ་སེམས་དཔའ་ས་བཅུ་བ་ཁོ་ན་བཞུགས་པའི་འོག་མིན་ཆེན་པོ་དང་བཅས་པའོ། །དེ་ལྟར་འཕགས་པའི་གནས་དྲུག་ནི་སྡུག་བསྔལ་གྱི་བདེན་པ་དངོས་མ་ཡིན་ཡང་གཟུགས་ཁམས་ཀྱི་ཞར་ལས་བྱུང་བའོ། ། ཞེས་གསུངས་པའི་ཕྱིར་ཟེར་ན་མངོན་པ་གོང་འོག་གི་ཁྱད་ཞིག་ཡོད་དམ་དཔྱད། ཡང་ཉ་ཊཱིཀ་ལས། བདེན་པའི་རྣམ་པ་ཅན་གྱི་བཞི་བ་ཟག་མེད། ཞི་རགས་ཀྱི་རྣམ་པ་ཅན་གྱི་ཟག་བཅས། ཡང་བཞི་བ་ཟག་མེད་རྒྱུན་ཆགས་གསུམ་སྤེལ་ནས་སྙོམས་པར་འཇུག་ཅིང༌། ཞེས་དང༌། མདོ་ལུགས་མ་ལས། བསམ་གཏན་རྣམས་སྤེལ་ནས་བསམ་གཏན་དང་པོའི་རོ་མྱངས་ཏེ་བསམ་གཏན་གསུམ་པ་ལས་ཉམས་པ། ཞེས་གསུངས་པ་ལ། བསམ་གཏན་བཞི་བའི་དངོས་གཞི་ཟག་བཅས་ཟག་མེད་གཉིས་ཀ་ལས་ཉམས་པ་མི་འཐད་པར་ཐལ། དེ་གཉིས་འཕགས་ལམ་ཡིན་པའི་ཕྱིར་རོ། ། ཡང་ན་ཟག་བཅས་ལས་ཉམས་པ་ཡོད་ཀྱང་དེ་འདྲའི་ཟག་མེད་ཉམས་པ་མེད་པའི་ཕྱིར་ཞེ་ན་དཔྱད། ཉ་ཊཱིཀ་ལས། སློབ་དཔོན་ནི། སངས་རྒྱས་མིན་པས་སྐད་ཅིག་སྤེལ་མི་ནུས་པས། ཞེས་དང༌། ཀུན་བཏུས་ས་འགྲེལ་ལས། དབྱིག་གཉེན་ལ་སོགས་པ་ནི་སྐད་ཅིག་མ་སྤེལ་བ་སངས་རྒྱས་ལས་གཞན་པས་མི་ནུས་པས་རྒྱུན་ཆགས་སྤེལ་བར་བཞེད་དོ། །ཞེས་གསུངས་པ་ལ། འོ་ན་བྱང་སེམས་ས་དང་པོ་ལ་གནས་པའི་གང་ཟག་གིས་སྐད་ཅིག་མ་གཅིག་ལ་ཏིང་ངེ་འཛིན་བརྒྱ་ལ་སྙོམས་པར་འཇུག་ནུས་པར་གསུངས་པ་དང༌།ཀུན་བཏུས་ས་འགྲེལ་ལས། དད་པའི་སྟོབས་སྐྱེད་པ་ལ་འཇུག་པ་ཕྱག་རྒྱའི་མདོར། མཚོ་དཔག་ཚད་ལྔ་འབུམ་པ་པད་མས་ཁེབས་པ་ཞིག་ལ་ལྕགས་ཀྱི་ཤིང་རྟ་མཁའ་ལྡིང་བས་ཀྱང་མགྱོགས་པའི་རྟས་དྲངས་ཏེ་པད་མའི་འདབ་མ་ཡང་མ་སྣང་བར་འགྲོ་བའི་སྐད་ཅིག་རེ་རེ་ལ་སྤྲུལ་ཤིན་ཏུ་མགྱོགས་པ་ཞིག་བྱུང་ནས་ལན་བཅུ་བཅུ་བསྐོར་བའི་ལན་གཅིག་གི་བར་ལ། ཀུན་དགའ་བོས་ཆོས་ཀྱི་རྣམ་གྲངས་མི་འདྲ་བ་བཅུ་གོ་ཞིང་འཆད་ནུས་པ་དང༌། དེའི་གཅིག་གི་བར་ལ་ཤཱ་རིའི་བུས་སྟོང་གོ་ཞིང་འཆད་ནུས་པ་དང༌། དེའི་གཅིག་གི་བར་ལ་མོའུ་འགལ་གྱི་བུས་འཇིག་རྟེན་གྱི་ཁམས་བརྒྱད་ཁྲི་རྫུ་འཕྲུལ་གྱིས་འདའ་བར་ནུས་པ་དང༌། དེའི་གཅིག་གི་བར་ལ་སངས་རྒྱས་ཀྱིས་འཇིག་རྟེན་གྱི་ཁམས་ནམ་མཁའ་དང་མཉམ་པ་ཐམས་ཅད་ཀྱི་གླིང་རེ་རེར་ཡང་མཛད་པ་བཅུ་གཉིས་རྒྱས་པ་དང་དམ་པའི་ཆོས་གནས་པ་དང༌། སྐྱེས་པའི་རབས་ཐམས་ཅད་ཀྱང་ལྷུན་གྲུབ་ཏུ་སྟོན་པར་གསུངས་པ་ལ་སོགས་པ་ལྟ་བུའོ། །ཞེས་གསུངས་པ་དང་འགལ་ཞེ་ན་སློབ་དཔོན་གྱིས་མདོ་སྡེ་བའི་ལུགས་སུ་གསུངས་པ་ཡིན་པར་འདྲའོ། །ཡང་འཕར་བའི་སྐབས་སུ་ཉ་ཊཱིཀ་ལས། མདུན་ན་འདོན་ནས་གྱ་ནོམ་སྣང་གི་བར་དུ་མ་ཞུགས་པར་ཚངས་རིས་ནས་འོག་མིན་ཉིད་དུ་འཇུག་པ། ཞེས་ཤིན་ཏུ་མཐོང་གི་བར་མ་གསུངས་བར་གྱ་ནོམ་སྣང་གི་བར་དུ་ཞེས་གསུངས་པའི་རྒྱུ་མཚན་གང་ཡིན་དཔྱད། ཡང་མདོ་ལུགས་མ་ལས། འཕགས་པ་ནི་ཚངས་ཆེན་པའི་ནང་དུ་མི་སྐྱེ་སྟེ། ལྟ་བའི་གནས་ཡིན་པ་དང་གཙོ་བོ་གཅིག་ཏུ་ཟད་པའི་ཕྱིར་རོ། །ཞེས་དང༌། ཉ་ཊཱིཀ་ལས། ཚངས་ཆེན་ནི། དང་པོ་སྐྱེས་པའི་ཚངས་པ་ནི་སེམས་ཅན་འདི་རྣམས་ངས་བསྐྱེད་པའོ་སྙམ། དེར་ཕྱིས་སྐྱེས་པ་རྣམས་ཀྱང་སྔར་གྱི་ཚངས་ཆེན་དེས་ངེད་རྣམས་བསྐྱེད་ཅེས་ལྟ་བའི་གནས་ཡིན་པ་དང༌།དེའི་ཚངས་ཆེན་དེ་གནས་དེར་འགྲན་ཟླ་མེད་པའི་ལས་བསགས་པས་གཙོ་བོ་གཅིག་ཏུ་ཟད་པས་དེར་མི་སྐྱེའོ། །ཞེས་དེ་དག་ཚངས་ཆེན་དུ་མི་སྐྱེ་བར་གསུངས་པ་ནི་མཛོད་ལུགས་ལ་དགོངས་པ་ལས་མངོན་པ་གོང་མའི་ལུགས་མ་ཡིན་པ་འདྲ་སྟེ། ཉ་ཊཱིཀ་ལས། ཀུན་བཏུས་འགྲེལ་བར། ལུས་མངོན་བྱེད་ཀྱང་རྣམ་ཐར་བརྒྱད་ལུས་ཀྱིས་མངོན་དུ་བྱེད་པ་དང༌། རིགས་ནས་རིགས་སྐྱེ་ཡང་སྐྱེ་བ་ངེས་པར་གཉིས་འཁོར་ཞེས་དང༌། འོག་མིན་འགྲོ་ཡང་ཚངས་རིས་ནས་བཟུང་སྟེ་རྒྱུན་མི་འཆད་པར་གནས་གཞན་ཐམས་ཅད་དུ་ལན་རེ་རེ་སྐྱེས་ནས་འོག་མིན་དུ་ཞུགས་ཏེ་ཞེས་ཚངས་ཆེན་དུ་ཡང་སྐྱེས་པར་བཤད་དོ། །ཞེས་དང༌། ཀུན་བཏུས་ས་འགྲེལ་ལས། འོག་མིན་དུ་འགྲོ་བ་ནི། བསམ་གཏན་གྱི་རྣམ་པ་ཆུང་ངུ་ལ་སོགས་པ་ལ་རོ་མྱང་མང་བར་བྱེད་ཅིང་ལྷག་མཐོང་ཤས་ཆེར་སྤྱོད་པའི་ཕྱིར་མི་འོང་གང་ཚངས་རིས་ནས་བཟུང་སྟེ་རྒྱུན་མི་འཆད་ཀྱི་ཁམས་ཀྱི་གནས་རིས་བཅུ་དྲུག་པོ་རྣམས་སུ་ས་ནས་སར་ལན་རེ་རེ་སྐྱེ་བ་ལེན་ཞིང༌། མཐར་སྤེལ་མར་བསྒོམས་པས་བཅུ་བདུན་པ་འོག་མིན་གྱི་བར་དུ་ཞུགས་ནས་དེར་ལམ་ལྷག་མ་མངོན་དུ་བྱས་ཏེ་སྡུག་བསྔལ་གྱི་ཐ་མ་མྱང་འདས་ཐོབ་པའོ། །མཛོད་དུ་ནི་འདི་ནས་ཚངས་རིས་སུ་སྐྱེ་ཞིང་དེ་ནས་འོག་མིན་དུ་འགྲོ་བ་འཕར་བ་དང༌། འདི་ནས་ཚངས་རིས་དང་དེ་ནས་གནས་གཙང་མའི་འོག་མ་གང་རུང་དུ་སྐྱེ་ཞིང་དེ་ནས་འོག་མིན་དུ་འགྲོ་བ་ཕྱེད་དུ་འཕར་བ་ཞེས་བྱ་བ་གཉིས་ཀྱང་གསུངས་ཤིང༌། ས་དང་སར་སྐྱེ་བའང་ལྟ་བའི་གནས་ཡིན་ཞིང་གཙོ་བོ་གཅིག་ཏུ་ཟད་པས་ཚངས་ཆེན་དུ་མི་སྐྱེ་བར་བཞེད་དོ། །ཞེས་གསུངས་པའི་ཕྱིར་རོ། །དེས་ན་འོག་མིན་འགྲོ་ཡང་མངོན་པ་གོང་འོག་མི་འདྲ་བར་མངོན་ནོ། །ཡང་ཉ་ཊཱིཀ་ལས། གཟུགས་མེད་དུ་སྐྱེ་བའི་བར་དོ་མེད་པས་བར་དོར་འདའ་བ་མེད་དོ། །ཞེས་གསུངས་པ་དེ་མི་འཐད་པར་ཐལ། གཟུགས་མེད་ཁམས་གནས་ལོགས་སུ་ཡོད་པ་དང་གཟུགས་ཡོད་པ་གང་ཞིག དེ་ཡོད་ན་བར་དོ་མེད་པའི་རྒྱུ་མཚན་མེད་པའི་ཕྱིར་ཏེ། ཐེག་མཆོག་དབུ་མ་ལས། གཟུགས་མེད་ཁམས་ཀྱང་དམན་པའི་སྒྲ་རུ་འཐད། །ཅེས་དང༌། དེའི་ཟིན་བྲིས་ལས། གཟུགས་མེད་ཁམས་ཀྱང་དམན་པའི་སྒྲ་རུ་འཐད་ཅེས་པ་ནི་ད་ལྟ་བོད་ན་གྲགས་པའི་མངོན་པའི་བསྟན་བཅོས་རྣམས་ལས་གཟུགས་མེད་ཁམས་ན་གཟུགས་མེད་དོ། །ཞཻས་གསུངས། གཟུགས་མེད་ཁམས་ན་གཟུགས་གཏན་ནས་མེད་པར་བཤད་ཀྱང་རྒྱ་གར་ན་ཡང་ཉན་ཐོས་སྡེ་བ་གསུམ་ཙམ་ཡོད་པར་འདོད་པ་དང༌། གཞན་རྣམས་ཀྱི་མདོ་སྡེ་བ་ཡང་ཡོད་པར་འདོད། ཐེག་ཆེན་གྱི་མདོ་རྣམས་ལས་ཡོད་པར་བཤད་དེ། རྒྱུད་བླའི་ཐོགས་མེད་འགྲེལ་ཆེན་དུ་ཕལ་བོ་ཆེའི་ལུང་དྲངས་པ་ལས་སྟོང་གསུམ་དར་ཡུག་ཆེན་པོའི་དཔེ་ནི།གཟུགས་ཀྱི་གནས་ཀྱི་ཐད་དུ་གཟུགས་ཁམས་ཀྱི་གནས་བྲིའོ། །གཟུགས་མེད་ཁམས་ཀྱི་གནས་ཀྱི་ཐད་དུ་ནི་གཟུགས་མེད་ཁམས་གནས་བྲིའོ། །ཞེས་གསུངས་པས་གཟུགས་མེད་ཁམས་ན་གནས་ཡོད་པར་བཤད་པས་གཟུགས་ཡོད་པར་གྲུབ་པོ། །དེ་བཞིན་དུ་མདོ་སྡེ་ས་བཅུ་པ་ལས། ས་དྲུག་པའི་ཡོན་ཏན་བསྟན་པའི་སྐབས་ན་གནས་དང་གཟུགས་སོགས་ཡོད་པར་བཤད་དོ། །སྔགས་ཀྱི་ཐེག་པ་ལས་ཀྱང་དུས་འཁོར་དུ་ལྷུན་པོའི་གཙུག་ཏོར་དཔག་ཚད་སྟོང་ཕྲག་ཉི་ཤུ་རྩ་ལྔ་ལས་གཟུགས་མེད་ཁམས་ཀྱི་གནས་སུ་བཤད་པས་སོ། ། དེས་ན་གཟུགས་མེད་ཁམས་ན་གཟུགས་གཏན་ནས་མེད་པ་ནི་མ་ཡིན་ལ་ཤིན་ཏུ་དྭངས་ཤིང་ཕྲ་བས་ན་དམན་པའི་སྒྲ་ལ་མེད་ཅེས་བཤད་པ་ཡིན་ཏེ། དཔེར་ན་ཤེས་རབ་ཆུང་བ་ལ་ཤེས་རབ་མེད་ཅེས་འཇོག་པ་ལྟ་བུའོ། ། ཞེས་གསུངས་པའི་ཕྱིར་ཞེ་ན་རང་ལུགས་དམ་པ་རྣམས་ཀྱིས་གཟུགས་མེད་ཁམས་ན་གཟུགས་ཡོད་པ་དང་མེད་པའི་གསུངས་ཟིན་དུ་མ་ཡོད་པས་དཔྱད་པར་བྱའོ། །ཡང་ཉ་ཊཱིཀ་ལས། རིམ་གྱིས་པའི་ཕྱིར་མི་འོང་ལུས་མངོན་བྱེད་ཀྱི་མཚན་ཉིད། རིམ་གྱིས་པའི་ཕྱིར་མི་འོང་གང་ཞིག འགོག་པའི་སྙོམས་འཇུག་དེ་སེམས་མེད་ལུས་ཀྱིས་མངོན་དུ་བྱེད་པའོ། །ཞེས་དང༌། མདོ་ལུགས་མ་ལས། སེམས་མེད་པས་ལུས་ལ་བརྟེན་དེ་སྐྱེ་བའི་ཕྱིར་ལུས་ཀྱིས་མངོན་གསུམ་དུ་བྱེད་པའོ། །ཞེས་གསུངས་པ་ནི་མཛོད་ལུགས་སམ་ཁ་ཆེ་བྱེ་བྲག་སྨྲ་བའི་ལུགས་ཡིན་པ་ལས་རང་ལུགས་མ་ཡིན་པར་སྣང་སྟེ། ཉ་ཊཱིཀ་ལས། ཐེག་ཆེན་ཐུན་མོང་མིན་པ་ལྟར་ན། ཏིང་ངེ་འཛིན་ཁྱད་པར་ཅན་ཞིག་སྟེ། སའི་སྙིང་བོ་འཁོར་ལོ་བཅུ་བ་ལས། བྱང་པ་རྣམས་འགོག་པའི་ཏིང་ངེ་འཛིན་ལ་སྙོམས་པར་འཇུག་སྟེ། ཏིང་ངེ་འཛིན་ལ་གནས་ནས་ཚོར་བ་གསུམ་དང་འདུ་ཤེས་གསུམ་ཡོངས་སུ་གཅོད་དེ། མངོན་པར་འདུ་བྱེད་པ་དང་གཡོ་བའི་སེམས་ཀྱི་སྤྱོད་པ་མེད་པར་ཚོར་བ་དང་འདུ་ཤེས་དང་སེམས་པ་དང་རེག་པ་དང་ཡིད་ལ་བྱེད་པ་ཀུན་གཅོད་པར་འགྱུར་རོ། །ཞེས་དང༌། ཀུན་གཞི་འཁོར་བཅས་ཡོད་ཀྱི། རྣམ་ཤེས་གཞན་མངོན་གྱུར་མེད་ཅེས་སྟོན་གྱི་ཀུན་གཞི་མིན་པའི་རིག་པ་ཡེ་མེད་དུ་སྟོན་པ་མིན་ནོ། །ཞེས་གསུངས་སོ། །དེ་ལྟ་ན་ཡང་ཀུན་གཞི་སྒྲུབ་བྱེད་ཀྱི་རིགས་པའི་སྒོ་ནས་ཅུང་ཟད་དཔྱད་རྒྱུ་ཡོད་མོད་སྐབས་བཞི་བའི་སྐབས་སུ་སླར་ཡང་དཔྱད་པར་བྱའོ། །མདོ་ལུགས་མ་ལས། གནས་གཙང་མ་རྣམས་སུ་སྐྱེས་ལ་བར་ནས་གནས་འགའ་ཙམ་བརྒལ་ཏེ་དེ་འོག་མིན་དུ་སྐྱེ་བ་དེ་ནི་ཕྱེད་དུ་འཕར་བ་ཞེས་བྱའོ། །ཞེས་གནས་འགའ་ཙམ་རྒལ་དགོས་ཀྱང་ཉ་ཊཱིཀ་ལས་དངོས་སུ་མ་གསུངས་སོ། །ཡང་མདོ་ལུགས་མ་ལས། ཇི་སྐད་དུ། གོང་དུ་འཕོ་བ་མ་ཕྱེ་བར། །དམ་པའི་འགྲོ་བ་བདུན་དུ་འདོད། །ཅེས་སོ། །འདི་དག་ཁོ་ན་དམ་པ་ཡིན་ཞིང་སློབ་པ་གཞན་དག་མ་ཡིན་པ་ནི་རྣམ་གྲངས་པའི་དམ་པ་སློབ་པ་གཞན་དག་ལ་ཡང་ཡོད་ཀྱང་འདིར་ནི་རྣམ་གྲངས་མེད་པའི་དམ་པ་ཡིན་ནོ། །འདི་དག་དགེ་བ་ཁོ་ན་ལ་འཇུག་པ་དང༌། མི་དགེ་བ་ལ་མི་འཇུག་པ་དང༌། འགྲོ་བ་འདི་དག་ཏུ་སོན་པ་ནི་དམ་པའི་དོན་ཏེ། ཇི་སྐད་དུ། དམ་པ་དམ་མིན་འཇུག་མི་འཇུག །སོན་པ་ཕྱིར་མི་འོང་ཕྱིར་ཏེ། །ཞེས་པ་དམ་པའི་འགྲོ་བ་ཡིན་ནོ། ། གོང་དུ་འགྲོ་བ་ལ་འགྲོ་བ་ཞེས་དམ་པའི་འགྲོ་བ་བདུན་ཁོ་ན་དམ་པ་ཡིན་ན་སངས་རྒྱས་དང་ཉན་ཐོས་དགྲ་བཅོམ་པ་དང་མཐོང་ཆོས་ཞི་སོགས་ལ་དམ་པ་མེད་པར་འགྱུར་རོ་ཞེ་ན་དཔྱད་པར་བྱའོ། །