བཞི་པ་མཐར་ཐུག་གི་ཡན་ལག

བཞི་པ་མཐར་ཐུག་གི་ཡན་ལག་ནི།

ཆོ་ག་དེའི་ཚིག་ཐོས་ཤིང་དོན་གོ་བས་ཏེ། ཉམས་སུ་མྱོང་བར་གྱུར་པ་ཉིད་ན། ཞེས་སོ། །རྐུ་ཐབས་ལས་སྒྲིབ་རྫོགས་ལ་ཚེ་འདིར་ནི། །སྡོམ་པའི་རྒྱུན་གྱི་དང་པོ་སྐྱེ་མིན་ཡང༌། །རྐུ་ཐབས་ལས་སྒྲིབ་རྫོགས་པའི་དགེ་ཚུལ་ལ། ། སྡོམ་རྒྱུན་སྐད་ཅིག་ཕྱི་མའི་སྡོམ་པ་སྐྱེ། །ཞེས་གཟུང་སྟེ། དགེ་ཚུལ་རྐུ་ཐབས་སུ་གནས་ན་བསྡམ་བྱའི་ཉེས་བྱས་སུ་འགྱུར་ཏེ། དེས་དེའི་སྡོམ་པ་གཏང་བར་མི་འགྱུར་བས། དེའི་སྡོམ་པ་སྐད་ཅིག་སྔ་ཕྱི་འགག་སྐྱེ་བྱེད་པ་སྟེ། ཚུལ་འདི་ནི་མཚམས་མེད་དང་ཕམ་པ་བྱུང་བ་ལ་སོགས་པ་གཞན་ལ་ཡང་ཅི་རིགས་པར་སྦྱར་ཏེ་གོ་བར་བྱའོ། །སྐབས་འདིར་མཚོ་ཊཱིཀ་ལས། འདུལ་བ་འདི་ལ་རིགས་པ་བས་ཀྱང་གཞུང་གཙོ་སྟེ། ཞེས་གསུངས་པ་ཡང་སྐབས་དུ་མར་དྲན་པར་བྱའོ། །མུ་སྟེགས་ཅན་ཞུགས་པའོ་ཞེས་པ་འདིའི་དོན་ལ་གསུམ་ལས། ༡ སྐབས་འདིའི་བར་ཆད་ཀྱི་མཚན་ཉིད་ནི། ཡན་ལག་དྲུག་ཚང་བའམ་ཡན་ལག་གསུམ་ཚང་བའི་ལས་སྒྲིབ་བོ། །༢ བྱེད་ལས་ནི་སྔར་བཤད་པ་བཞིན་ནོ། །༣ དགག་བྱ་ནི། སངས་རྒྱས་ཀྱི་བསྟན་པ་སྣོད་མ་ཡིན་པ་ལ་བཞག་པས་བསྟན་པ་ཉམས་པར་འགྱུར་བ་དང་མུ་སྟེགས་དང་སྤྱོད་ཚུལ་འདྲེས་པའོ། །མུ་སྟེགས་ཅན་ཞུགས་པ་ལ་རིགས་གཉིས་ཡོད་དེ། སྐྱ་རེངས་དང་པོ་ཤར་བའི་མཐའ་ཅན་དང༌། ལས་ཉམས་སུ་མྱོང་བའི་མཐའ་ཅན་ནོ། །དང་པོ་ནི་ཡན་ལག་དྲུག་ཚང་བའི་ལས་སྒྲིབ་སྟེ། རྩ་བར། ༡རབ་ཏུ་བྱུང་བ་འདི་ཡང་དག་པར་བླངས་པ་༢ལྟ་བ་དེ་དང་ལྡན་པ་༣ཆོས་གོས་འདི་བོར་ཏེ་༤རྒྱལ་མཚན་དེས་༥དེར་༦སྐྱ་རེངས་ཤར་ན་དེ་ཉིད་ཡིན་ནོ། །དེ་ཡང་རབ་ཏུ་བྱུང་བ་འདི་ཡང་དག་པར་བླངས་པ་ཞེས་པ་གཞི་འགྲེལ་ལས། མུ་སྟེགས་གང་གིས་རབ་ཏུ་བྱུང་བ་འདི་ཡང་དག་པར་བླངས་པ། ཞེས་སོ། །ཆོས་གོས་འདི་བོར་ཏེ་རྒྱལ་མཚན་དེས་ཞེས་སྨོས་ལ། ལྟ་བ་འདི་བོར་ཏེ་མུ་སྟེགས་ཀྱི་ལྟ་བ་དེས་ཞེས་མ་སྨོས་པ་ནི། དང་པོ་ཉིད་ནས་མུ་སྟེགས་ཀྱི་ལྟ་བ་དང་ལྡན་ན་ནང་པ་སངས་རྒྱས་པའི་ལྟ་བ་དང་པོ་ནས་མེད་པའི་ཕྱིར་དང༌། གོས་ལ་ནང་བ་དང་ཕྱི་བ་གཉིས་ཀའི་གོས་དུས་གཅིག་ཏུ་གྱོན་དུ་བཏུབ་ཀྱང༌། ལྟ་བ་ལ་མུ་སྟེགས་པའི་ལྟ་བ་དང་ལྡན་ན་ཆོས་འདི་པའི་ལྟ་བ་མེད་པར་གྲུབ་སྟེ། རྣམ་འགྲེལ་ལས། རྟོག་གཉིས་ཅིག་ཅར་འཇུག་པ་མེད། །འདི་ལྟར་རྣམ་པར་རྟོག་པ་རྣམས། །རིམ་གྱིས་འབྱུང་བར་ཡང་དག་རྟོགས། །ཞེས་གསུངས་པ་བཞིན་ནོ། །གཉིས་པ་ནི་ཡན་ལག་གསུམ་ཚང་པ་སྟེ། ༡ རབ་ཏུ་འབྱུང་བ་འདི་ཡང་དག་པར་བླངས་པ་དང༌། ༢ མུ་སྟེགས་ཀྱི་ལྟ་བ་དེ་དང་ལྡན་པ་དང༌། ༣ ལས་ལན་གཉིས་ཉམས་སུ་མྱོང་བ་དང་གསུམ་ལྡན་ཡིན་ཏེ། རྩ་བར། དེ་མ་བྱས་པ་རྐུ་ཐབས་དང་འདྲའོ། །ཞེས་པས་བསྟན་ཏོ། །དེའི་དོན་ནི་ཆོས་གོས་འདི་བོར་ཏེ་ཞེས་པ་ལ་སོགས་པ་འོག་མ་བཞི་པོ་དེ་མ་བྱས་པ་ཡང་རབ་ཏུ་བྱུང་བ་འདི་ཡང་དག་པར་བླངས་ལ་མུ་སྟེགས་ཅན་གྱི་ལྟ་བ་དེ་དང་ལྡན་ཞིང་ལན་གཉིས་སུ་དགེ་འདུན་དང་ལྷན་ཅིག་ལས་ལན་གཉིས་ཉམས་སུ་མྱོང་བ་སྟེ་ཡན་ལག་གསུམ་ཚང་ན་མུ་སྟེགས་ཅན་ཞུགས་པ་ཡིན་ནོ། །འདིར་ལས་ལན་གཉིས་ཉམས་སུ་མྱོང་བ་ཡན་ལག་ཏུ་དགོས་པ་ཡིན་ཏེ།དཔེར་ན་རྐུ་ཐབས་སུ་གནས་པ་ལ་ལས་ལན་གཉིས་ཉམས་སུ་མྱོང་བ་ཡན་ལག་ཏུ་དགོས་པ་དང་འདྲའོ་ཞེས་པའོ། །དེ་མ་བྱས་པ་ཡང་རྐུ་ཐབས་དང་འདྲའོ་ཞེས་པ་འདི་ལ་རབ་ཏུ་བྱུང་བ་འདི་ཡང་དག་པར་བླངས་པ་ཡན་ལག་ཏུ་དགོས་པར་ཊཱི་ཀ་ལས་མ་བཤད་ཀྱང་དེ་ཡན་ལག་ཏུ་དགོས་པའི་གཞུང་ནི། གཞི་འགྲེལ་ལས། མུ་སྟེགས་ཅན་གང་གིས་རབ་ཏུ་བྱུང་བ་འདི་ཡང་དག་པར་བླངས་ལ་མུ་སྟེགས་ཀྱི་ལྟ་བ་དེ་དང་ལྡན་ཞིང་ལན་གཉིས་སུ་དགེ་འདུན་དང་ལྷན་ཅིག་ལས་ཉམས་སུ་མྱོང་བར་འགྱུར་བ་གང་ཡིན་པའོ་ཞེས་བཤད་དོ། །འོ་ན་འདི་དང་རྐུ་ཐབས་སུ་གནས་པ་ལ་ཁྱད་པར་ཅི་ཞེ་ན། འདི་ལ་ནི་རབ་ཏུ་བྱུང་བ་འདི་ཡང་དག་པར་བླངས་པ་དང་མུ་སྟེགས་ཀྱི་ལྟ་བ་དང་ལྡན་པ་ཡན་ལག་ཏུ་དགོས་ལ། རྐུ་ཐབས་སུ་གནས་པ་ལ་ནི་དེ་གཉིས་ཡན་ལག་ཏུ་མི་དགོས་ཏེ། རབ་ཏུ་བྱུང་བ་གཏན་མ་བླངས་པས་ལས་ལན་གཉིས་ཉམས་སུ་མྱོང་ན་ཡང་རྐུ་ཐབས་སུ་འགྱུར་བའི་ཕྱིར་དང༌། རྣམ་འབྱེད་འགྲེལ་བ་ལས། རྐུ་ཐབས་སུ་གནས་པ་ཞེས་བྱ་བ་ནི་ཡང་དག་པའི་ལྟ་བ་དང་ལྡན་དུ་ཟིན་ཀྱང༌། ཞེས་གསུངས་སོ། །རྩ་བར། མ་བསད་པ་དང༌། ཕ་བསད་པ་དང༌། དགྲ་བཅོམ་བསད་པ་དང༌། དགེ་འདུན་གྱི་དབྱིན་བྱས་པ་དང༌།དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་ཞེས་མཚམས་མེད་པ་ལྔ་གང་རུང་བསགས་ལ་མ་སྦྱངས་ན་བར་ཆད་ཡིན་ནོ། །རྩ་བར། དགེ་སློང་མ་སུན་ཕྱུང་བ་དང་ཞེས་པའི་སྐབས་འདིའི་བར་ཆད་ཀྱི་མཚན་ཉིད་ནི། མི་གང་ཞིག་གིས་དགེ་སློང་མ་ཕམ་པས་མ་གོས་པ་ལ་དེ་ལྟར་འདུ་ཤེས་ཏེ་ལོག་གཡེམ་བྱས་པའི་ལས་ཀྱི་དངོས་གཞི་ཡོངས་སུ་རྫོགས་པའོ། ། མཚོན་པའི་དོན་ནི་དགེ་སློང་དང་དགེ་ཚུལ་མ་སུན་ཕྱུང་བ་ལ་སོགས་པའོ། །རྩ་བར། ཕམ་པར་འགྱུར་བ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ། ཞེས་པའི་སྐབས་འདིའི་བར་ཆད་ཀྱི་མཚན་ཉིད་ནི། ཕམ་པ་འཆབ་བཅས་བྱེད་པ་མ་ཉམས་པར་རང་རྒྱུད་ལ་ལྡན་པའོ། །འཆབ་མེད་ཀྱི་ཕམ་པ་རྒྱུད་ལ་ལྡན་ཡང་སྡོམ་པ་བླངས་ན་སྐྱེ་སྟེ། ཞུ་བ་ལས། བསླབ་པ་སྩལ་བས་བསླབ་པ་ཕུལ་ཏེ། བསྙེན་པར་རྫོགས་པར་བགྱི་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །ཞེས་གསུངས་པས་སོ། །མཚོན་པའི་དོན་ནི། དགེ་ཚུལ་གྱི་ཕམ་པ་དང་འདྲ་བའི་ཉེས་བྱས་ཏེ།འོད་ལྡན་ལས། མི་གསོད་ལ་སོགས་བཞི་རྣམས་ཀྱིས། །དགེ་ཚུལ་ལས་ནི་ཉམས་གྱུར་དང༌། །དགེ་སློང་བཞིན་དུ་དགེ་ཚུལ་ཡང༌། །ཕྱི་ནས་སྡོམ་སྐྱེའི་སྐལ་བ་མེད། །ཅེས་གསུངས་པས་སོ། །རྒྱུ་ལས་བཟློག་པའི་ཆད་པ་ཁས་མི་ལེན་པ་དག་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱའོ། །ཞེས་པའི་དོན་ལ་བཞི་སྟེ་བར་ཆད་ཀྱི་རང་བཞིན་དང༌། བར་ཆད་ཀྱི་བྱེད་ལས་དང༌།དགག་བྱ་ཉེས་དམིགས་དང༌། འགལ་བ་སྤང་བའོ། །དང་པོ་ནི། བསམ་པས་ནན་ཏུར་གྱི་རྒྱུ་གཏོང་ཡང་རྒྱུ་གཏོང་བར་ངག་གིས་ཁས་མི་ལེན་པའོ། །གཉིས་པ་ནི་སྡོམ་པ་སྐྱེ་ཡང་འབོགས་པ་པོ་ལ་ཉེས་བྱས་བསྐྱེད་པའོ། །གསུམ་པ་ནི་ལང་དུ་ཡོལ་བར་འགྱུར་བའོ། །བཞི་པ་ནི། ཞུ་བའི་སྐབས་ལས། རྒྱུ་ལས་བཟློག་པ་ཁས་མི་ལེན་པ་གནས་ནས་ཕྱུང་བ་ལ་ཡང་མི་སྐྱེའོ། །ཞེས་དང༌། སྐབས་འདིའི་ཊཱི་ཀ་ལས། ད་ནི་སྐྱེ་བའི་ཆོས་ཉིད་ཀྱིས་རབ་ཏུ་དབྱུང་བར་མི་འོས་པ་དག་གི་མཚན་ཉིད་བསྟན་པའི་ཕྱིར་ཞེས་བཤད་ཅིང༌། བསྙེན་པར་རྫོགས་ན་བཟོད་པ་གསོལ་ཟིན་པ་ཡིན་ནོ། །ཞེས་གསུངས་ཏེ། བསྙེན་པར་རྫོགས་ན་ཞེས་སྡོམ་པ་སྐྱེ་བར་བཤད་པ་དང་འགལ་ལོ་ཞེ་ན། འདི་དང་འོག་མ་གཉིས་ཀ་ནན་ཏུར་གྱི་རྒྱུ་ལས་བཟློག་པ་ཁས་མི་ལེན་པར་མཚུངས་ཀྱང༌།འདིར་སྡོམ་པ་སྐྱེ་བར་བཤད་པ་ནི་ནན་ཏུར་གྱི་རྒྱུ་གཏོང་ངོ་ཞེས་ངག་གིས་ཁས་མི་ལེན་ཀྱང་བསམ་པས་ནན་ཏུར་གྱི་རྒྱུ་གཏོང་བ་སྟེ། ནན་ཏུར་གྱི་རྒྱུ་ཉེས་སྤྱོད་འཕྲོ་གཅོད་སྙམ་པའི་བསམ་པ་ཅན་གྱིས་ལེན་ན་སྡོམ་པ་སྐྱེ་བའོ། །ཞུ་བའི་སྐབས་ནས་སྡོམ་པ་མི་སྐྱེ་བར་བཤད་པ་ནི་ནན་ཏུར་གྱི་རྒྱུ་གཏོང་བར་ངག་གིས་ཀྱང་ཁས་མི་ལེན་ཅིང་བསམ་པས་ཀྱང་ནན་ཏུར་གྱི་རྒྱུ་མི་གཏོང་བ་སྟེ། ནན་ཏུར་གྱི་རྒྱུ་ཉེས་སྤྱོད་འཕྲོ་མི་གཅོད་སྙམ་པའི་བསམ་པ་ཅན་གྱིས་སྡོམ་པ་བླངས་ཀྱང་མི་སྐྱེ་སྟེ། ཡན་ལག་ངེས་པའི་བྱེ་བྲག་ཡིན་པའི་ཕྱིར་རོ། །ཞེས་མཚོ་ཊཱིཀ་ལས་གསུངས་སོ། །མཛེས་པའི་བར་ཆད་ནི། རྩ་བར། ལག་རྡུམ་དག་དང་རྐང་རྡུམ་དང༌། །ལག་སོར་ཟླུམ་པོར་འཇས་པ་དང༌། །ཞེས་པ་ལ་སོགས་པ་རྣམས་ཏེ། འདི་རྣམས་རབ་ཏུ་འབྱིན་ནམ་བསྙེན་རྫོགས་བྱེད་ན། གཞོན་ཆེས་པ་ལོ་བདུན་མ་ལོན་པ་མ་གཏོགས་པ་འདི་རྣམས་ཐམས་ཅད་ལ་སྡོམ་པའི་རྒྱུ་གཞན་ཚང་ན་ལེན་པ་པོ་ལ་སྡོམ་པ་སྐྱེ། འབོགས་པ་པོ་ལ་ཉེས་བྱས་བསྐྱེད། གཞན་མ་དད་པ་བསྐྱེད་པ་སྟེ་ཐུན་མོང་གི་ཆོས་གསུམ་ཡོད་དོ། །ཕྲན་ཚེགས་འགྲེལ་བ་ལས། མཛེས་པ་ནི་ལུས་དག་པ་དང་ཡོངས་སུ་དག་པ་ནི་ལས་དག་པ་ཡིན་ནོ་ཞེས་གསུངས་ཀྱང༌། མཛེས་པ་ནི་མཛེས་པའི་བར་ཆད་མེད་པ་དང༌། ཡོངས་སུ་དག་པ་ནི་སྡོམ་པ་སྐྱེ་བའི་བར་ཆད་མེད་པ་སྟེ་ཊཱི་ཀས་དོན་དེ་ལྟར་བཤད་དོ། ། རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་ཚུལ་གྱིས་བཀའ་སྩལ་ཏོ། །བདེན་པའི་མཚན་ཉིད་ནི་བདེན་པ་ཡང་དག་པའམ་རྫུན་མི་གསུངས་བ་སྟེ། ཕྲན་ཚེགས་ལས། དྲང་སྲོང་ཆེན་པོ་རྫུན་གསུང་འགྱུར་བ་སྲིད་མ་ཡིན། །ཞེས་པས་སོ། །དེ་ལྟར་གཞི་རྩ་བའི་སྐབས་འདིར་བར་ཆད་རྣམས་ཕྱི་ནས་བསྟན་ནས། ཕྲན་ཚེགས་འགྲེལ་བའི་སྐབས་འདིར་བར་ཆད་རྣམས་སྔོན་དུ་བསྟན་པས། རྩ་འགྲེལ་གོ་རིམ་མི་མཐུན་པའི་སྐྱོན་དུ་འགྱུར་རོ་ཞེ་ན། སྐྱོན་མེད་དེ་གོ་རིམ་དེ་ལྟར་བཀོད་པས། བར་ཆད་སྟོན་པའི་གཞུང་རྣམས་ཀྱི་བར་དུ་གཞུང་གཞན་མ་ཞུགས་ཤིང་བར་ཆད་རྣམས་ཕྱོགས་གཅིག་ཏུ་བསྟན་ན་རྟོགས་པར་སླ་བའི་ཕྱིར་རོ། །ཡང་ཊཱི་ཀ་ལས། ཇི་ཙམ་གྱིས་ན་འཁོར་སུན་འབྱིན་པར་བརྗོད་པར་བྱ་ཞེ་ན། རིགས་དང་ཁ་དོག་དང་དབྱིབས་ལས་ཏེ། ཞེས་རིགས་ལ་སྐྱོན་ཆགས་པ་ནི་ལྷམ་མཁན་དང་གདོལ་པ་ལ་སོགས་པའོ། །ཁ་དོག་ལ་སྐྱོན་ཆགས་པ་ནི་ཤ་མདོག་ཁ་དོག་རྣམ་པ་བཞི་དང་སྐྲ་སེར་ལ་སོགས་པའོ། །དབྱིབས་ལ་སྐྱོན་ཆགས་པ་ནི་ལག་རྡུམ་དང་རྐང་རྡུམ་ལ་སོགས་པའོ། །དེ་ལྟར་རིགས་དང་ལུས་ལ་སྐྱོན་ཆགས་པ་རབ་ཏུ་འབྱིན་པ་དང་འཁོར་དུ་འཇོག་པ་བཀག་པའོ། །འོ་ན་ལུང་རྣམ་འབྱེད་ལས། ཐུབ་པའི་དབང་པོའི་གསུང་རབ་འདི་ལ་ནི་རིགས་གཅེས་པ་མ་ཡིན། མདོ་འདིས་རུས་གཅེས་པ་མ་ཡིན། སྒྲུབ་པ་གཅེས་པ་ཡིན་ནོ། །ཞེས་གསུངས་པ་དང༌། ཉ་པ་ལྔ་བརྒྱ་དང་འདྲེག་མཁན་ཉེ་བར་འཁོར་དང༌། བ་ལང་བདག་ལ་སོགས་པ་རབ་ཏུ་ཕྱུང་བར་ལུང་ལས་གསུངས་པ་དང་འགལ་སྙམ་ན། ཉ་པ་ལྔ་བརྒྱ་ལ་སོགས་པ་དེ་དག་ནི་སྲིད་པ་ཐ་མ་པ་སྟེ་མངོན་ཤེས་ཐོབ་པ་དག་གིས་རབ་ཏུ་འབྱིན་དུ་གནང་བ་དམིགས་བསལ་ཡིན་ཏེ། མེ་ཏོག་ཕྲེང་རྒྱུད་ལས། བསམ་དང་རྗེས་ཀྱི་བསམ་ཤེས་ཤིང༌། མངོན་ཤེས་ཡེ་ཤེས་ཐོབ་པས་ནི། །མཐུ་ཡིས་འཇིག་རྟེན་ཚིམ་བྱེད་ཕྱིར། ། རབ་ཏུ་འབྱིན་ན་ཉེས་པ་མེད། །ཅེས་གསུངས་སོ། །ལུང་ཞུ་བ་ལས། བཙུན་པ་ལས་གཅིག་གིས་གཉིས་སམ་གསུམ་བསྙེན་པར་རྫོགས་པར་གནང་ངམ། ཨུ་པ་ལི་གནང་ངོ༌། །ཞེས་གསུངས་ལ། ཆོ་ག་བརྗོད་པ་ན། ལེན་པ་པོ་གཅིག་དང་གཉིས་དང་གསུམ་ལ། འདི་ཞེས་པ་དང༌། འདི་དག་ཅེས་པ་དང༌། འདི་རྣམས་ཞེས་པ་གོ་རིམ་བཞིན་ནོ། །དགེ་འདུན་ཚོགས་པ་གཅིག་གི་དབང་དུ་བྱས་ཏེ་ལས་ཀྱི་ཆོ་ག་གཅིག་གིས་བཞི་བསྙེན་པར་རྫོགས་པར་བྱེད་ན་ནི་ལས་མི་འཆགས་སོ། །གསུམ་མན་ཆད་ཚིག་གཅིག་ཅེས་པའི་དམིགས་བསལ་ནི། དགེ་འདུན་ཚོགས་པ་ཐ་དད་ན་ལས་ཀྱི་ཆོ་ག་གཅིག་གིས་གསུམ་ལས་མང་བ་བསྙེན་རྫོགས་བྱར་རུང་བ་ཡོད་དེ། ལུང་ཞུ་བ་ལས། བཙུན་པ་ལས་བགྱིད་པ་ཕྱོགས་གཅིག་ཏུ་མཆིས་ལ་གནས་བཞིར་གང་ཟག་བཞི་བསྙེན་པར་རྫོགས་པར་གནང་ངམ། གནང་སྟེ་འདི་ལྟར་ལས་བྱེད་པའི་དགེ་སློང་གནས་བཞི་ཆར་གྱི་མཚམས་སུ། ཤིང་ངམ་མཁར་བའམ་རེ་ལྡེ་རྣམས་ཀྱིས་མནན་ཏེ་རེ་རེ་ནས་སམ་གཉིས་གཉིས་ནས་སམ། གསུམ་གསུམ་ནས་བསྙེན་པར་རྫོགས་པར་བྱ་སྟེ། བཞིར་མ་ཚང་ནའོ། །ཞེས་གསུངས་སོ། །སྐབས་འདིར་མཚོ་ཊཱིཀ་ལས། ལོ་ཚིགས་མི་ཤེས་ན་མཚན་གྱི་ཉེ་འཁོར་དུ་སྤུ་སྐྱེས་པ་དེ་ལ་དགེ་སློང་གི་སྡོམ་པ་སྦྱིན་དུ་རུང་བ་ཡིན་གྱི། སྡོམ་པ་སྐྱེ་མི་སྐྱེ་ནི་དོན་གྱི་རྗེས་སུ་འབྲང་ངོ༌། །བསྡུས་པ་ལས། ན་ཚོད་རྫོགས་པ་ནི་ལོ་ཉི་ཤུ་ལོན་པའོ། །རྟེན་རྫོགས་པ་ནི་བྱིས་པའི་བོངས་ཚོད་ལྟ་བུ་མ་ཡིན་ལ་བུས་པའི་སྐད་ལྟ་བུ་ཡང་མ་ཡིན་པ་དང༌། འདོམས་དང་མཆན་ཁུང་ལ་སོགས་པར་སྤུ་སྐྱེས་པ་དང༌། ཡོངས་སུ་སྨིན་པ་བུས་པ་ལྟ་བུའི་བློ་མ་ཡིན་པའོ། །རྟེན་རྫོགས་ཀྱང་ན་ཚོད་མ་རྫོགས་པ་བསྙེན་པར་རྫོགས་པར་བྱེད་ན་ལྟུང་བྱེད་དོ་ཞེས་མཚན་གྱི་ཉེ་འཁོར་དུ་སྤུ་སྐྱེས་ཀྱང་ན་ཚོད་མ་རྫོགས་པ་བསྙེན་རྫོགས་བྱེད་ན་ལྟུང་བྱེད་དུ་བཤད་པ་དེ་དང་གཞུང་འདི་ནས་མཚན་གྱི་ཉེ་འཁོར་དུ་སྤུ་སྐྱེས་པ་བསྙེན་པར་རྫོགས་པར་ཁས་བླང་ཞེས་བཤད་པ་དང་འགལ་ཞེ་ན། ལྟུང་བྱེད་དུ་བཤད་པ་དེ་ནི་ལོ་ཚིགས་ཤེས་པའི་དབང་དུ་བྱས་པ་ཡིན་པས་གཞུང་འདི་དང་འགལ་བ་མེད་དོ། །བསྙེན་པར་རྫོགས་པར་འདོད་པ་ནི་འགྲེལ་ཆུང་ལས། ཞག་ལྔ་དྲུག་ཚུན་ཆད་དུ་བསྙེན་པར་རྫོགས་པར་བྱེད་པ་ཞིག་ན་ཤིང་ལ་འཛེག་ཏུ་མི་གཞུག་ཅེས་བཤད་ཀྱང༌། ཞག་ལྔ་དྲུག་གི་ངེས་པ་མེད་དེ། དེ་བས་དུས་མྱུར་བ་ན་བསྙེན་རྫོགས་བྱེད་ཅིང་དེའི་ཚེ་ན་བསྙེན་རྫོགས་འདོད་པ་མ་ཡིན་པ་ཡོད་ལ། དེ་བས་དུས་རིང་བ་ན་བསྙེན་རྫོགས་བྱེད་ཅིང་དེའི་ཚེ་ན་བསྙེན་རྫོགས་འདོད་པ་ཡིན་པ་ཡང་ཡོད་པའི་ཕྱིར་རོ། །འདི་ནི་ཞག་མང་རུང་ཉུང་རུང་སྟེ་བདག་བསྙེན་པར་རྫོགས་པར་བྱེད་ཅེས་ཆེད་དུ་གཉེར་ཏེ་ཞུས་པ་ནས་བརྗོད་པ་ཐ་མ་ཕལ་ཆེར་བྱས་པ་ཡན་ཆད་དོ། །མཚམས་ཀྱི་ཕྱི་རོལ་ནི། མཐོང་བའི་སྤྱོད་ཡུལ་ལས་འདས་པའོ། །ཐལ་མོ་སྦྱར་ཏེ་བཞག་པར་བྱའོ། །ཞེས་གཞི་འགྲེལ་ལས། དེ་ལྟ་བུའི་སྤྱོད་ལམ་གྱིས། འགྲེང་སྟེ་འདུད་པ་དང་བཅས་པར་བཞག་པར་བྱའོ། །དེ་ནི་སེམས་དང་བ་བསྐྱེད་པར་བྱ་བའི་ཕྱིར། ཞེས་སོ། །མཚན་གཉིས་པའོ་ཞེས་པ་ལུས་གཅིག་ལ་ཕོ་མོའི་མཚན་གཉིས་ཀ་ཡོད་ཀྱང༌། ལུང་ལྔ་ཚན་པ་ལས། མ་ནིང་མོ་ཞེས་གསུངས་ཏེ། སྐད་དང་ཕྱི་བྱད་བུད་མེད་འདྲ་བའི་ཕྱིར་རོ། །སྐྱེས་ནས་མ་ནིང་དང་ཞེས་གོང་དུ་བསྟན་པ་སྟེ། ལུས་གཅིག་ལ་ཕོ་མོ་གཉིས་ཀའི་མཚན་ཡོད་ཀྱང༌། ལུང་ལྔ་ཚན་པ་ལས་མ་ནིང་ཕོ་ཞེས་གསུངས་ཏེ། སྐད་དང་ཕྱི་བྱད་སྐྱེས་པ་འདྲ་བའི་ཕྱིར་རོ། །ཟླ་མཚན་མི་ཟག་པའོ་ཞེས་པ་འགྲེལ་ཆུང་ལས། ཟླ་མཚན་གྱི་ཁྲག་མི་ཟག་པ་སྟེ་ལོ་བཅུ་གཉིས་མན་ཆད་ལ་མི་ཟག་པ་དང་ལྔ་བཅུ་ཡན་ཆད་ལ་ཁྲག་མི་ཟག་པ་ནི་མ་གཏོགས་ཏེ། ཞེས་སོ། །སྨན་དཔྱད་ཡན་ལག་བརྒྱད་པ་ལས་ཀྱང༌། བུད་མེད་ཟླ་བ་རེ་རེ་ཁྲག །དྭངས་མ་ལས་བྱུང་ཞག་གསུམ་འཛག །ལོ་ནི་བཅུ་གཉིས་ཡན་ཆད་ནས། །ལྔ་བཅུ་བར་འཛག་དེ་ནས་ཟད། །ཅེས་བཤད་དོ། །སྔོན་རབ་ཏུ་བྱུང་བ་ལས་ཕྱིས་བསླབ་པ་ཕུལ་བའོ་ཞེས་ཊཱི་ཀ་ལས་སོ། །སྐྱེས་པ་ལ་ནི་བར་ཆད་འདི་མེད་དེ། གཞི་འགྲེལ་ལས། སྐྱེས་པ་ལ་ནི་ལན་བདུན་རབ་ཏུ་འབྱུང་བ་གནང་བའི་ཕྱིར། ཞེས་གསུངས་སོ། ། སྐྱེས་པ་ལན་བརྒྱད་བབས་ནས་སྡོམ་པ་བླངས་ཀྱང་མི་སྐྱེ་ན་སྐྱེ་བའི་བར་ཆད་འདི་ནི་བར་ཆད་གང་དུ་གཏོགས་དཔྱད་དགོས་ཞེས་མཚོ་མཆན་ལས་གསུངས་སོ། །འོ་ན་ཐུན་མོང་མ་ཡིན་པའི་བར་ཆད་དྲུག་པོ་འདི་རྣམས་གསང་སྟེ་སྟོན་མས་ལྐོག་ཏུ་དང་ལས་བྱེད་པ་མོས་དགེ་འདུན་མའི་དབུས་སུ་འདྲི་དགོས་མོད་ཀྱི། དགེ་སློང་ལས་བྱེད་པས་གཉིས་ཀའི་དགེ་འདུན་གྱི་དབུས་སུ་བར་ཆད་འདྲི་བའི་སྐབས་སུ་བར་ཆད་དྲུག་པོ་དེ་རྣམས་འདྲི་དགོས་སམ་མི་དགོས་ཞེ་ན། དགེ་སློང་མའི་ཆོ་གའི་སྐབས་ཀྱི་ལུང་ཕྲན་ཚེགས་དང༌། ཀརྨ་ཤ་ཏཾ་ལས། མཚན་གཉིས་པ་མ་ཡིན་ནམ། གླེ་འདམས་པ་མ་ཡིན་ནམ། རྟག་ཏུ་ཟླ་མཚན་འཛག་པ་མ་ཡིན་ནམ། ཞེས་དྲི་བར་གསུངས་སོ། །འོ་ན་ལུང་ཕྲན་ཚེགས་ལས། དགེ་སློང་དག་གིས་དགེ་སློང་མའི་དགེ་འདུན་གྱི་དབུས་སུ་ཐུན་མོང་མ་ཡིན་པའི་ཆོས་རྣམས་དྲིས་པ་ན། དེ་ངོ་ཚ་ནས་གདོང་སྨད་དེ་འདུག་པའི་སྐབས་དེ་བཅོམ་ལྡན་འདས་ལ་གསོལ་བ་དང༌། བཀའ་སྩལ་པ།དགེ་སློང་གིས་ཐུན་མོང་མ་ཡིན་པའི་བར་ཆད་རྣམས་དྲི་བར་མི་བྱའོ། །དྲི་ན་འདས་པ་དང་བཅས་པར་འགྱུར་རོ་ཞེས་གསུངས་པ་དང་འགལ་ལོ་སྙམ་ན། དྲི་བ་སྔར་བཅས། མི་དྲི་བ་རྗེས་བཅས་ཏེ་ད་ལྟ་རྗེས་བཅས་ཀྱི་རྗེས་སུ་འབྲང་ངོ་ཞེས་ཤེས་པར་བྱའོ། །མི་མ་ཡིན་པའི་འགྲོ་བ་ལ་སོ་སོར་ཐར་པའི་སྡོམ་པའི་ཞིང་ཉིད་མ་ཡིན་ནོ། །འོ་ན་ལུང་གཞི་ལས། ཀླུ་གཞོན་ནུ་ཙམ་པ་སྐྱེས་ཚེས་བརྒྱད་དང་བཅུ་བཞི་ལ་ཡན་ལག་བརྒྱད་དང་ལྡན་པའི་གསོ་སྦྱོང་ལ་གནས་ཞེས་གསུངས་པ་དང༌། མཛོད་འགྲེལ་དུ་ཉན་ཐོས་ཀྱི་མདོ་དྲངས་པ་ལས་ཀྱང༌། དགེ་སློང་དག་སྒོ་ང་ལས་སྐྱེས་པའི་ཀླུ་ནི་ཟླ་བ་ཕྱེད་ཀྱི་ཚེས་བརྒྱད་ལ་གནས་ནས་བྱུང་ནས་ཡན་ལག་བརྒྱད་དང་ལྡན་པའི་བསྙེན་གནས་ལ་གནས་སོ་ཞེས་གསུངས་པ་དང་འགལ་སྙམ་ན། མཛོད་འགྲེལ་ལས། དེ་ནི་ལེགས་པར་སྤྱད་པ་ཙམ་ཡིན་གྱི་སྡོམ་པ་ནི་མ་ཡིན་ནོ་ཞེས་གསུངས་སོ། །ལྷ་དེ་མི་མ་ཡིན་པའི་འགྲོ་བ་ཡིན་པའི་ཕྱིར་སྡོམ་པའི་ཞིང་ཉིད་མ་ཡིན་པར་འདོད་ན། མཛོད་འགྲེལ་ལས། བསམ་གཏན་གྱི་སྡོམ་པ་ནི་འདོད་པ་དང་གཟུགས་ཀྱི་ཁམས་སུ་སྐྱེས་པའི་ལྷ་རྣམས་ལ་ཡང་ཡོད་ཅེས་བཤད་ཅིང༌། འོད་ལྡན་ལས་ཀྱང༌། མི་མ་ཡིན་པ་རྣམས་ལ་ཡང་བསམ་གཏན་དང་ཟག་པ་མེད་པའི་སྡོམ་པ་གཉིས་གནས་ཤིང་ཞེས་ལྷ་རྣམས་ལ་སྡོམ་པ་དེ་གཉིས་ཡོད་པར་གསུངས་སོ་ཞེ་ན། ཁྱབ་པ་མ་གྲུབ་སྟེ་མི་མ་ཡིན་པའི་འགྲོ་བ་རྣམས་ནི་སོ་སོ་ཐར་བའི་སྡོམ་པའི་ཞིང་ཉིད་མ་ཡིན་གྱི། སྡོམ་པ་གཞན་གཉིས་ཀྱི་ཞིང་ནི་ལྷ་རྣམས་ཀྱང་ཡིན་ནོ། །བྱང་གི་ཞེས་པ་ཞུ་འགྲེལ་ལས། བྱང་གི་སྒྲ་མི་སྙན་ནི་རི་རབ་ལ་ལྟོས་ནས་བྱང་ཡིན་པའི་ཕྱིར་ཞེས་བཤད་དོ། །དེ་མི་འཐད་དེ། རི་རབ་ལྷུན་པོ་ནི་སྒྲ་མི་སྙན་ལ་སོགས་པ་གླིང་བཞི་ཆར་གྱི་བྱང་ན་གནས་པའི་ཕྱིར་རོ། །ཞེས་གསུངས་སོ། ། དེས་ན་འདི་ནི་འཛམ་བུའི་གླིང་ལ་ལྟོས་ནས་བྱང་ཡིན་ཏེ། རྣམ་འབྱེད་འགྲེལ་བ་ལས། བྱང་གི་སྒྲ་མི་སྙན་ནི་འདི་ནས་བྱང་ཕྱོགས་ཡིན་པའི་ཕྱིར། ཞེས་སོ། །སྒྲ་མི་སྙན་ཞེས་པའི་རྒྱུ་མཚན་ནི། ཞུ་འགྲེལ་ལས། མི་སྒྲ་མི་སྙན་པ་དག་གནས་པའི་ཕྱིར་རོ། །ཞེས་སོ། །འཛམ་བུ་གླིང་པའི་དགེ་སློང་རྫུ་འཕྲུལ་གྱིས་སོང་སྟེ་བྱང་གི་སྒྲ་མི་སྙན་ན་གནས་པ་ནི་སྡོམ་པའི་ཞིང་ཉིད་ཡིན་ཡང་བྱང་གི་སྒྲ་མི་སྙན་དུ་སྐྱེས་པའི་མི་སྡོམ་པ་གསུམ་གའི་ཞིང་ཉིད་མ་ཡིན་ཏེ། མཛོད་འགྲེལ་ལས། ཡང་དག་པར་ལེན་པ་མེད་པ་དང་བསམ་གཏན་དང་ཏིང་ངེ་འཛིན་མེད་པའི་ཕྱིར། ཞེས་གསུངས་སོ། །སྡོམ་པའི་ཞིང་མ་ཡིན་པའི་རྒྱུ་མཚན་གཞན་ཡང་སྡོམ་པའི་སྤང་བྱ་མ་ཚང་བའི་ཕྱིར་ཏེ། བྱང་གི་སྒྲ་མི་སྙན་པ་རྣམས་ནི་ངག་འཁྱལ་མ་གཏོགས་པ་ལུས་ངག་གི་མི་དགེ་བ་བདུན་པོ་རང་བཞིན་གྱིས་མི་སྤྱོད་པའི་ཕྱིར་རོ། །དེས་ན་མཛོད་ཀྱི་འགྲེལ་བཤད་ལས། བྱང་གི་སྒྲ་མི་སྙན་པ་ནི་རང་བཞིན་གྱིས་ཚུལ་ཁྲིམས་དང་ལྡན་པའི་ཕྱིར། ཞེས་གསུངས་ཏེ། ཚུལ་ཁྲིམས་བཏགས་པ་བ་ཙམ་མོ། །སྒྲ་མི་སྙན་པ་འདིས་ནི་དེའི་གླིང་ཕྲན་དུ་སྐྱེས་པ་ཡང་སྡོམ་པའི་ཞིང་མ་ཡིན་ཞེས་མཚོན་ཏོ། །མཚན་ལན་གསུམ་གྱུར་ན། སྡོམ་པ་སྐྱེ་བའི་ཞིང་མ་ཡིན་པའི་གཞུང་ནི། རང་གི་རྣམ་བཤད་ལས། མཚན་ལན་གསུམ་གྱུར་པ་དེ་ལ་སྡོམ་པ་མི་སྐྱེའོ་ཞེས་བྱ་བའི་དོན་ཏོ། །ཞེས་དང༌། ཊཱི་ཀ་ལས། མཚན་གྱུར་པ་ལན་གྲངས་གསུམ་པོ་དེ་ལ་ཡང་སྡོམ་པའི་ཞིང་ཉིད་མེད་དེ་སྡོམ་པ་མི་སྐྱེའོ་ཞེས་བྱ་བའི་ཐ་ཚིག་གོ། །ཞེས་སོ། །མཚན་ལན་གསུམ་གྱུར་ན། སྡོམ་པ་གནས་པའི་ཞིང་མ་ཡིན་པའི་གཞུང་ནི། ལུང་ཕྲན་ཚེགས་ལས། དགེ་སློང་ཕའམ་དགེ་སློང་མ་ཡང་རུང་མཚན་ལན་གསུམ་དུ་གྱུར་ན་ཇི་ལྟར་བགྱི། ཨུ་པ་ལི་མཚན་ལན་གསུམ་དུ་གྱུར་ན་དགེ་སློང་ཕའི་དངོས་པོ་དང་མའི་དངོས་པོ་དེ་མ་ཐག་ཏུ་རྣམ་པ་ཐམས་ཅད་དུ་མི་གཞག་གོ། །ཞེས་གསུངས་སོ། །མཚན་ལན་གསུམ་གྱུར་ན། སྡོམ་པ་སྐྱེ་གནས་གཉིས་ཀའི་ཞིང་མ་ཡིན་པའི་གཞུང་ནི། འགྲེལ་ཆུང་ལས། མཚན་ལན་གསུམ་དུ་གྱུར་པའི་མི་ལ་ནི་ཁྲིམས་ཕོག་ཀྱང་མི་ཆགས་ཏེ། དགེ་སློང་ལས་མཚན་གྱུར་ནའང་ལན་གཉིས་ཀྱི་བར་དུ་ནི་ཁྲིམས་མེད་པར་མ་སོང་གི་ལན་གསུམ་དུ་གྱུར་པས་ཁྲིམས་མེད་པར་སོང་སྟེ། །ཞེས་སོ། །དེའང་གློ་བུར་དུ་མ་ནིང་གི་རིགས་སུ་གྱུར་པའི་ཕྱིར་རོ། །འོ་ན་མཚན་ལན་གསུམ་དུ་གྱུར་པས་སྡོམ་པ་གཏོང་ན། མཛོད་འགྲེལ་ལས། མཚན་གྱུར་པ་ལ་སྔོན་གྱི་སྡོམ་པ་གཏོང་བའི་རྒྱུ་ཡང་ཡོད་པ་མ་ཡིན་ལ། སྔོན་མེད་པའི་སྡོམ་པ་འཐོབ་པའི་རྒྱུ་ཡང་ཡོད་པ་མ་ཡིན་ནོ། །ཞེས་པ་དང་འགལ་ཞེ་ན། དེ་ནི་མཚན་ལན་གཅིག་གམ་ལན་གཉིས་སུ་གྱུར་པའི་དབང་དུ་བྱས་ཞེས་པ་རིགས་སོ། །མཁན་པོ་དེ་དང་ལྡན་པའི་སྡོམ་པ་སྐྱེ་བ་ལྟར་ན་མཁན་པོ་མེད་པ་ཉིད་ལ་ཡང་སྡོམ་པ་སྐྱེའོ། །འོ་ན་ད་ལྟར་གྱི་ཆོ་གས་རབ་ཏུ་བྱུང་བ་དང་བསྙེན་པར་རྫོགས་པའི་སྡོམ་པ་ནོད་པ་ཆོས་ཅན། སྡོམ་པ་སྐྱེ་བ་དེ་མཁན་པོ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པ་མ་ཡིན་པར་ཐལ། མཁན་པོ་མེད་ཀྱང་སྡོམ་པ་སྐྱེ་བ་ཡོད་པའི་ཕྱིར་རོ། །འདོད་ན། ཊཱི་ཀ་ལས། མཁན་པོ་ཉིད་དུ་གནས་པ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དག་ཡོད་ཀྱི་མི་གནས་པ་ལ་མེད་དོ། །ཞེས་མཁན་པོ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པར་གསུངས་ལ། ལུང་མ་མོ་ལས་ཀྱང༌། བསྙེན་པར་རྫོགས་པར་མི་བྱ་བ་གང་ཞེ་ན། ཕ་བསད་པ་དང༌། མ་བསད་པ་དང༌། སློབ་དཔོན་མེད་པ་དང་མཁན་པོ་མེད་པ་དང་མི་མ་ཡིན་པ་ཐམས་ཅད་དེ་འདི་དག་ནི་བསྙེན་པར་རྫོགས་པར་བྱས་ན་ཡང་བསྙེན་པར་རྫོགས་པ་མ་ཡིན་ཞེས་མཁན་པོ་མེད་ན་བསྙེན་རྫོགས་ཀྱི་སྡོམ་པ་མི་སྐྱེ་བར་བཤད་པ་དང་འགལ་ཞེ་ན། མཁན་པོ་མེད་པ་ལ་སྡོམ་པ་སྐྱེ་བར་གསུངས་པ་དང་མི་སྐྱེ་བར་གསུངས་པ་དེ། འབོགས་པ་པོ་ལ་ཉེས་བྱས་བསྐྱེད་པས་ཉེས་པ་དང་བཅས་པའི་སྡོམ་པ་སྐྱེ་བ་དང༌། ཉེས་མེད་ཀྱི་སྡོམ་པ་མི་སྐྱེ་བ་ལ་དགོངས་པ་ཡིན་ཏེ། ལུང་གླེང་གཞིའི་སྒོ་དང་པོ་དང༌། ལུང་ཞུ་བ་ལས། མཁན་པོ་མ་མཆིས་པར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི་བསྙེན་པར་རྫོགས་པ་ཞེས་བྱ་སྟེ་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །ཞེས་དང༌། ཞུ་བ་ལས། ཉེ་བར་འཁོར་མཁན་པོ་ཚུལ་ཁྲིམས་འཆལ་བས་བསྙེན་པར་རྫོགས་པར་བྱེད་ན། གལ་ཏེ་གང་ཟག་གིས་མི་ཤེས་ན་བསྙེན་པར་རྫོགས་པ་ཡིན། ཞེས་དང༌། རྩ་བར། མཁན་པོ་མེད་པ་ཉིད་ལ་ཡང་ངོ༌། །ཞེས་དང༌། མེ་ཏོག་ཕྲེང་རྒྱུད་ལས། མཁན་པོ་གཏན་མེད་ཉིད་དང་ནི། །མཁན་པོ་ཁྱིམ་པའི་རྟགས་སོགས་ཅན། །དེ་ཡང་བསྙེན་པར་རྫོགས་འགྱུར་མོད། །དགེ་སློང་འགལ་ཚབས་ཅན་དུ་འགྱུར། །ཞེས་གསུངས་སོ། །མཁན་པོ་དེ་བསྙེན་པར་མ་རྫོགས་པ་ཉིད་ཡིན་ན་ཡང་དེ་དགེ་སློང་ཉིད་ཡིན་པར་འདུ་ཤེས་ན་མཁན་པོ་དང་ལྡན་པའི་སྡོམ་པ་སྐྱེའོ། །བསྡུས་པ་ལས། མཁན་པོ་ཚུལ་ཁྲིམས་ལས་འཆལ་བའོ་ཞེས་བྱ་བར་ཤེས་ན་བསྙེན་པར་རྫོགས་པ་མ་ཡིན་ནོ། །དེ་ལས་གཞན་དུ་ན་བསྙེན་པར་རྫོགས་པའོ། །ཞེས་གསུངས་པ་ལྟར་རོ། །ཁྱིམ་པ་དང་མུ་སྟེགས་ཅན་གྱི་རྒྱལ་མཚན་ཏེ། འདི་དག་གི་ཆ་ལུགས་རྫོགས་པ་ཅན་ལ་རབ་བྱུང་གི་སོ་སོ་ཐར་པའི་སྡོམ་པའི་རྒྱུན་གྱི་དང་པོ་མི་སྐྱེའོ། །འོན་ཀྱང་ཁྱིམ་པའི་རྒྱལ་མཚན་ཅན་ལ་དགེ་བསྙེན་དང་བསྙེན་གནས་ཀྱི་སྡོམ་པ་སྐྱེ་བ་དང༌། བསམ་གཏན་གྱི་སེམས་ཐོབ་པའི་མུ་སྟེགས་པ་རང་གི་རྒྱལ་མཚན་ཅན་ལ་བསམ་གཏན་གྱི་སྡོམ་པ་སྐྱེ་བ་དང༌། དགེ་སློང་གིས་དེ་གཉིས་ཀྱི་ཆ་ལུགས་སུ་ཞུགས་ན་དགེ་སློང་གི་སྡོམ་པ་སྐད་ཅིག་སྔ་མའི་རིགས་འདྲ་སྐད་ཅིག་ཕྱི་མའི་སྡོམ་པ་སྐྱེ་བར་རིགས་སོ། །ལུང་གཞི་ལས། རིགས་ཀྱི་གཙོ་བོའི་བུ་གྲགས་པས་ཁྱིམ་པའི་ཆ་ལུགས་དང་རྒྱན་གྱིས་བརྒྱན་བཞིན་དུ་དགེ་སློང་དགྲ་བཅོམ་པར་གྱུར། ཅེས་གསུངས་པའི་དགོངས་པ་ནི་དཔྱད་དགོས་སོ། །གནས་ནས་ཕྱུང་བ་རྒྱུ་ལས་བཟློག་པ་ཁས་མི་ལེན་པ་ལ་ཡང་མི་སྐྱེའོ་ཞེས་སྦྱར་རོ། །སྡིག་སྡིག་ལྟ་བུ་སྔོན་སྡིག་པ་བྱས་བྱས་འདྲ་བ་བ་ལང་བདག་ལྟ་བུ་སྟེ། བ་ལང་གི་ཤ་ཚུགས་འདྲ་བ་ལ་སོགས་པའོ། །མགོ་སྨྱུང་ཞེས་སྔར་བསྟན་པ་དེ་ནི་མགོ་སྤྱི་བོ་ན་ཡར་རིང་བའོ། །ཕུང་ཀྲོལ་བ་ནི། རྒྱལ་པོས་ཆད་པ་གཅོད་པའི་གཤེད་བྱེད་པ་ལ་སོགས་པ་སྟེ། རང་འགྲེལ་ལས། ཕུང་ཀྲོལ་བ་ཡང་རྐུན་པོ་མ་ཡིན་པ་སྙིང་རྗེ་མེད་པ་བསད་བྱ་གསོད་པར་བྱེད་པ་ལ་སོགས་པ་སྟེ། ཞེས་གསུངས་སོ། །རྣམ་པ་གཅིག་ཏུ་ན་ཕ་མས་མ་གནང་ཡང་རྒྱལ་པོས་གནང་ན་རྒྱལ་པོ་ཕ་མའི་དབང་ཟ་བའི་བསམ་པ་ཅན་ཞེས་པ་སྟེ། ལུང་ལས། གྲོ་བཞིན་སྐྱེས་བྱེ་བ་ཉི་ཤུ་པ་ཕ་མས་མ་གནང་ཡང་རྒྱལ་པོས་གནང་སྟེ་བསྙེན་རྫོགས་མཛད་པ་ལྟ་བུའོ། །མི་མ་ཡིན་པའི་འགྲོ་བ་པ་གཉིས་ཞེས་པ་གནས་བརྟན་བྲག་དང་ཉེ་བྲག་གཉིས་ཁྲུང་ཁྲུང་མོ་ལས་སྐྱེས་པ་ལྟ་བུའོ། །མཛོད་འགྲེལ་ལས། བུད་མེད་གཞན་ལས་ནུར་ནུར་པོ་ཟགས་ནས་བུད་མེད་གཞན་གྱི་མངལ་དུ་བླུགས་ཏེ་བསྐྱངས་པ་ལ་ཡང་བུ་འབྱུང་བར་གསུངས་པ་དེ་ལྟ་བུའམ། སྐྱེད་པར་བྱེད་པ་དང་སྐྱོང་བ་བྱེད་པ་ཐ་དད་ན་དེ་གཉིས་གང་བསད་ན་མཚམས་མེད་དུ་འགྱུར་ཞེ་ན། ཕ་མ་བསད་པའི་མཚམས་མེད་འབྱུང་བ་དེ་ནི་སྐྱེད་པར་བྱེད་པའི་ཕ་མ་མིའི་འགྲོ་བ་པ་གཉིས་བསད་པ་ལས་མཚམས་མེད་པར་འགྱུར་ཏེ་མཛོད་ལས། གང་གི་ཟླ་མཚན་ལས་བྱུང་མ། །ཞེས་སོ། །ཕ་མ་མཚན་གྱུར་པ་གཉིས་བསད་པ་ལས་ཀྱང་མཚམས་མེད་པ་འབྱུང་སྟེ་ལུང་ལས་ཕ་ཡང་མ་ལགས་དགྲ་བཅོམ་པ་ཡང་མ་ལགས་པའི་སྐྱེས་པ་བསད་ན་མཚམས་མེད་པར་འགྱུར་བ་མཆིས་སམ། ཡོད་དེ་མ་མཚན་གྱུར་པ་བསད་ནའོ། །མ་ཡང་མ་ལགས་དགྲ་བཅོམ་པ་ཡང་མ་ལགས་པའི་བུད་མེད་བསད་ན་མཚམས་མེད་པར་འགྱུར་བ་མཆིས་སམ། ཡོད་དེ། ཕ་མཚན་གྱུར་པ་བསད་ནའོ་ཞེས་མཛོད་འགྲེལ་དུ་དྲངས་སོ། །མ་བསད་པ་ཙམ་བར་ཆད་ཡིན་ནམ། མཚམས་མེད་བྱས་པ་བར་ཆད་ཡིན་སྙམ་ན། མ་བསད་པ་ལ་སོགས་པ་ལྔ་ནི་མཚམས་མེད་དེ་རྫོགས་པར་བྱས་པ་ཉིད་བར་ཆད་ཀྱི་གཙོ་བོའོ། །ཡུལ་དགེ་སློང་མའམ་དགེ་སློང་ཕམ་པས་མ་གོས་པའི་རྣམ་དག་ཉིད་ལ་སྐྱེས་པའམ་བུད་མེད་གང་ཞིག་གིས་མི་ཚངས་པར་སྤྱད་པས་ཉམས་སུ་མྱོང་བ་དག་ཊཱི་ཀ་ལས། དགེ་སློང་མ་སུན་ཕྱུང་བ་ཉིད་དང༌། དགེ་སློང་ཕ་སུན་ཕྱུང་བ་ཉིད་ཡིན་ནོ། །ཞེས་གསུངས་སོ། །སྐྱེས་པས་ཀྱང་དགེ་སློང་ཕ་སུན་ཕྱུང་བ་དེ་སྲིད་དེ། ཊཱི་ཀ་ལས། དགེ་སློང་གིས་དགེ་སློང་ལ་རྩོལ་ཞིང་གཉིས་ཀས་ཉམས་སུ་མྱོང་བར་གྱུར་ན་གཉིས་ཀ་དགེ་སློང་སུན་ཕྱུང་བ་ཉིད་ཡིན་ནོ། །ཞེས་སོ། །དགེ་སློང་མའི་ཕམ་པར་འགྱུར་བ་ཐུན་མོང་མ་ཡིན་པ་སྟེ་རེག་པ་ལུས་བཀན་འཆབ་པ་བཟློག་པའི་ཕམ་པ་འཆབ་བཅས་ལྷག་པར་སྤྱད་པ་ཅན་སྡོམ་པ་སྐྱེ་བའི་བར་ཆད་དང་ལྡན་པ་དེ་ཡང་སྐྱེས་པ་ཉིད་དུ་གྱུར་པ་ནི་དབྱུང་རྫོགས་བྱར་རུང་བ་ཉིད་དོ་ཞེས་སྡོམ་པ་ལེན་ན་སྐྱེ་བ་སྟེ། སྡོམ་པ་སྐྱེ་བའི་བར་ཆད་དེ་ལས་གྲོལ་བའོ། །འོ་ན་དེ་ལྟར་མཚན་གྱུར་པ་དེས་སྡོམ་པ་མནོས་ནས་སླར་ཡང་བུད་མེད་དུ་གྱུར་ཏེ་ཕམ་པ་འཆབ་བཅས་དེ་སླར་ལོག་པར་གྱུར་པ་ན། སྡོམ་པ་གཏོང་ངམ་མི་གཏོང་ཞེ་ན་མི་གཏོང་སྟེ། གཏོང་རྒྱུ་གང་ཡང་མ་བྱུང་བའི་ཕྱིར་རོ། །བུད་མེད་བསྙེན་པར་རྫོགས་པར་བྱ་བ་ལ་དགེ་སློང་ཕའི་དགེ་འདུན་གཉུག་མར་གནས་པ་རྣམས་ཕུན་སུམ་ཚོགས་པའི་རྒྱུའམ་ཡན་ལག་ཉིད་དེ། ཊཱི་ཀ་ལས།དགེ་སློང་གཉུག་མར་གནས་པ་རྣམས་ཡན་ལག་ཉིད་ཡིན་གྱི། གློ་བུར་དུ་ལྷགས་པ་རྣམས་དང་འགྲོ་བར་ཆས་པ་རྣམས་ཡན་ལག་ཉིད་མ་ཡིན་ནོ། །ཞེས་པས་སོ། །དེའི་རྒྱུ་མཚན་ནི་ཟླ་བ་ཕྱེད་ཕྱེད་ཅིང་གདམས་ངག་སྦྱིན་པ་ལ་སོགས་པའི་བྱ་བ་ནི་གཉུག་མར་གནས་པས་ལེགས་པར་འགྲུབ་ཀྱི། འགྲོ་བར་ཆས་པ་ལ་སོགས་པས་མི་འགྲུབ་པའི་ཕྱིར་རོ། །གཉུག་མར་གནས་པའི་ཚད་ནི་གནས་དེར་ཟླ་བ་ཕྱེད་ཡན་ཆད་གནས་པ་སྟེ། སྐབས་འདི་ཉིད་ཀྱི་ལུང་ལས། གཉུག་མར་གནས་པ་དང་རིང་དུ་གནས་པ་དག་གོ། །ཞེས་དང༌། ཊཱི་ཀ་ལས། ཟླ་བ་ཕྱེད་ལས་ལྷག་པ་ནི་ཡུན་རིང་བ་ཉིད་ཡིན་པར་ཤེས་པར་བྱ་སྟེ། གསོ་སྦྱོང་གི་དུས་གཞན་གྱིས་ཆོད་པའི་ཕྱིར་རོ། །ཞེས་གསུངས་པས་གྲུབ་བོ། །ཡན་ལག་ཅེས་པ་ནི་རྒྱུ་ཡིན་ལ། འདི་ནི་ཕུན་སུམ་ཚོགས་པའི་རྒྱུ་ཡིན་གྱི། མེད་ན་མི་འབྱུང་བའི་རྒྱུ་ནི་མ་ཡིན་ཏེ། དེ་མེད་ཀྱང་མི་སྐྱེ་བ་ཙམ་གྱི་དགག་བྱ་མ་དམིགས་པའི་ཕྱིར་རོ། །རྩ་བར། སྐྱེ་བའི་ཚེ་ཉིད་ན་ཕུལ་ལམ་ཉམས་ན་མི་སྐྱེའོ། །

ཞེས་པ་འདིའི་དོན་གཏན་ལ་དབབ་པ་ལ་གསུམ་སྟེ། དངོས་སུ་བརྗོད་པའི་དོན་དང༌། ཤུགས་ཀྱིས་བསྟན་པའི་དོན་དང༌། སྒྲུབ་བྱེད་ལུང་དང་སྦྱར་བའོ། །

དང་པོ་ནི་སྐྱེ་བའི་ཚེ་ཉིད་ལ་ཊཱི་ཀས་གཉིས་སུ་ཕྱེ་སྟེ། སྐྱེ་བ་ལ་ཕྱོགས་བཞིན་པ་སྐྱེ་བའི་ཚེ་དང༌། སྐྱེ་བ་ལ་མངོན་དུ་གྱུར་པ་སྟེ་སྐྱེ་བའི་ཚེའོ། །གཞུང་འདིར་དངོས་སུ་བརྗོད་པ་ནི་དང་པོ་དེ་ཡིན་ཏེ། ཊཱི་ཀ་ལས། སྐད་ཅིག་དུ་མས་བར་དུ་ཆོད་པ་སྐྱེ་བའི་ཚེ་ཉིད་ཅེས་བྱའོ། །ཞེས་སོ། །འདི་ལ་ཊཱི་ཀ་ལས། སྐྱེ་བཞིན་པ་སྐྱེ་བའི་ཚེ་ཞེས་ཀྱང་གསུངས་ཏེ་སྐྱེ་བ་ལ་ཕྱོགས་བཞིན་པ་སྐྱེ་བའི་ཚེ་ཞེས་དགོངས་པའོ། །སྐབས་འདིའི་ཕུལ་བ་ནི་སྡོམ་པ་ལེན་པ་ན་བསླབ་པ་ཕུལ་བ་སྟེ། སྡོམ་པ་ལེན་སེམས་ལོག་པའོ། །ཉམས་པ་ནི་སྡོམ་ལེན་དེ་ཉིད་ལ་མཚན་གཉིས་ཅིག་ཅར་དུ་བྱུང་བ་ལ་སོགས་པ་སྟེ། ཊཱི་ཀ་ལས། མཚན་གཉིས་སྐྱེས་པ་ལ་སོགས་པའི་སྐྱོན་གྱིས་ཉམས་ན། ཞེས་སོ། །མཚན་ལན་གསུམ་འགྱུར་བ་ཡང་དེ་ལྟར་ཤེས་པར་བྱའོ། །