ཐུགས་རྗེ་ཆེན་པོའི་འཁོར་ལོའི་ཕན་ཡོན། མཁས་གྲུབ་ཀརྨ་ཆགས་མེད།
༄༅། །ཐུགས་རྗེ་ཆེན་པོའི་འཁོར་ལོའི་ཕན་ཡོན་བཞུགས། །ཨོཾ་སྭ་སྟི། །སྐུ་ལྔའི་བདག་ཉིད་བླ་མ་རྡོ་རྗེ་འཆང་། །སྤྲུལ་སྐུ་ཐུབ་དྲུག་རིགས་གསུམ་མགོན་པོ་དང་། །བཀའ་བརྒྱུད་བླ་མ་ཡི་དམ་ཞི་ཁྲོའི་ཚོགས། །མཁའ་འགྲོ་ཆོས་སྐྱོང་བཀའ་སྲུང་གཏེར་བདག་ལ། །སྒོ་གསུམ་གུས་པས་གསོལ་འདེབས་ཕྱག་འཚལ་ནས། །དུས་གསུམ་སངས་རྒྱས་བྱང་སེམས་སྤྲུལ་སྐུ་རྣམས། །ལས་དང་སྐལ་ལྡན་སེམས་ཅན་འདྲེན་དོན་དུ། །ཐབས་ལ་མཁས་པས་སྤྲུལ་པ་སྣ་ཚོགས་འགྱེད། །ཕྲིན་ལས་རྣམ་བཞིའི་སྤྲུལ་པ་སྣ་ཚོགས་བསྟན། །འགྲོ་རྣམས་སྒྲིབ་བྱང་ཚོགས་གཉིས་རྫོགས་ཕྱིར་དུ། །ཚིག་ཉུང་བྱ་སླ་དོན་གཉིས་འགྲུབ་པའི་ཕྱིར། །ལས་བཞི་ལྷུན་འགྲུབ་ཆོས་ཀྱི་འཁོར་ལོ་འདིའི། །ཕན་ཡོན་བརྗོད་འདས་དཔག་མེད་བསམ་ཡས་རྣམས། །རྒྱལ་བའི་བཀའ་དང་རྒྱུད་གཞུང་དུ་མ་ནས། །གཞན་ལ་ཕན་ཕྱིར་ཉུང་ཙམ་བསྡུས་ནས་ནི། །བློ་རྨོངས་གོ་བདེ་ངེས་ཤིས་བསྐྱེད་པའི་ཕྱིར། །ཕྱོགས་མེད་དོན་དུ་ཕྱོགས་གཅིག་བཀོད་པར་བྱ། །དེ་ཡང་སྤྱི་ཡི་འཁོར་ལོ་ལ། བསྒོམ་པའི་འཁོར་ལོ། བསྲུང་བཟློག་བསད་གསུམ། འཁོར་བའི་འཁོར་ལོ། གཅོད་པའི་འཁོར་ལོ། །འཕྲོ་བའི་འཁོར་ལོ། །བཀྲ་ཤིས་ཚེ་རིང་གི་འཁོར་ལོ། །ཞི་རྒྱས་དབང་དྲག་བཞིའི་འཁོར་ལོ། །ལས་ཐམས་ཅད་ལྷུན་གྲུབ་ཀྱི་འཁོར་ལོ། །བསྐོར་བའི་འཁོར་ལོ་དང་བཅུ་གཅིག་ཡིན། བསྐོར་བའི་འཁོར་ལོ་ལ། ཆུ་འཁོར། རླུང་འཁོར། མེ་འཁོར། ས་འཁོར། ལག་འཁོར་དང་ལྔའོ། །དེའི་ནང་ནས་ཁྱད་པར་ལག་འཁོར་འདི་ཤིན་ཏུ་གལ་ཆེ་བས། དེ་ཡི་བྱ་ཐབས་ནི། རབ་གསེར་དངུལ་མཚལ་གསུམ། འབྲིང་གཡུ་དང་དུང་། ཐ་མ་སྣག་ཚས་བཞེངས་ལ། བརྒྱ་དང་རྩ་བརྒྱད་རབ་གནས་བཀྲ་ཤིས་སྨོན་ལམ་བྱས་ནས་བསྐོར་ན། ཞི་རྒྱས་དབང་དྲག་སོ་སོའི་འདོད་པའི་དངོས་གྲུབ་འཐོབ་པས་ཡིད་བཞིན་ནོར་བུ་རིན་པོ་ཆེ་ལག་ཏུ་ཡོད་པ་ཡིན་ནོ། །འཁོར་ལོ་འདི་ལ་ལུས་ངག་ཡིད་གསུམ་གྱིས་ནན་ཏན་དུ་འབད་ན། བྱ་སླ། དོན་ཆེ། རྒྱུ་ཆུང་། ཕན་ཡོན་ཤིན་ཏུ་ཆེ། འགྲུབ་མགྱོག་རང་གིས་འབད་རྩོལ་དྲག་པོ་མི་དགོས་པར་ཡི་དམ་ཌཱ་ཀི་ཆོས་སྐྱོང་རང་བཞིན་དུ་འཁོར། གནོད་བྱེད་ཐམས་ཅད་ཟིལ་གྱིས་ནོན་པར་འགྱུར་རོ། །གནད་ཀྱི་མན་ངག་གི་འཁོར་ལོ་རིན་པོ་ཆེ་རྒྱུན་དུ་སྐོར་བའི་མི་རྣམས་ཀྱིས་ནི། བླ་མ་ཡི་དམ་མཁའ་འགྲོ་བསྒོམ་ཞིང་། སྙིང་པོ་ཐམས་ཅད་དུས་གཅིག་ལ་བསྒྲང་བར་འགྱུར་རོ། བཀའ་རྒྱུད་ལུང་གསུམ་གྱི་སྙིང་པོ། འབྱུང་བའི་བཅུད། ཁམས་གསུམ་སེམས་ཅན་ཐམས་ཅད་ཀྱི་ཚེ་དང་བསོད་ནམས་ཡོན་ཏན་ཐམས་ཅད་ཀྱི་སྙིང་པོ། སྒྲུབ་པ་ཐམས་ཅད་ཀྱི་ལས་སྦྱོར་སྟོབས་ཆེ་ལ་རྒྱ་ཆེ། ལས་མྱུར་བ། དྲག་དཔའ་བ། འཁོར་ལོ་འདི་ལན་གཅིག་བསྐོར་བའི་ཡོན་ཏན་ཡང་བསམ་གྱིས་མི་ཁྱབ་བརྗོད་ཀྱིས་མི་ལང་གསུངས་སོ། །མེ་ལ་བསྐོར་ན་དུད་པས་གར་ཁྱབ་ལ་ཐར་པའི་ས་བོན་ཐེབ་པར་འགྱུར་རོ། །ཆུ་དང་རླུང་ལ་བསྐོར་ན། ཆུ་དང་རླུང་གིས་གར་ཁྱབ་པའི་སེམས་ཅན་ཐམས་ཅད་བྱང་ཆུབ་ཐོབ་པར་འགྱུར་རོ། །ལག་པས་བསྐོར་ན། མི་དང་འཁོར་ལོ་དེ་གཉིས་མཐོང་ཐོས་དྲན་རེག་གི་སེམས་ཅན་ཐམས་ཅད་དཀར་པོ་དགེ་བའི་ཆོས་ལ་འགོད་པར་འགྱུར་རོ། །དེའི་དཔལ་དང་འབྱོར་བ། གཟི་བརྗིད་དང་། ཚེ་ཡི་བཀྲག་མདངས་ནུས་པ་ཐམས་ཅད་རབ་ཏུ་རྒྱས་པར་འགྱུར་རོ། །མཐུ་རྩལ་སྟོབས་དང་བྱིན་རླབས་ཆེ་བར་འགྱུར་རོ། །འཁོར་ལོ་འདི་དུས་རྒྱུན་དུ་བསྐོར་བའི་བསོད་ནམས་ནི། ཚེ་རབས་ཐམས་ཅད་དུ་སངས་རྒྱས་དགེ་འདུན་བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་ཞལ་མཇལ་བར་འགྱུར་རོ། །ཆོས་ལ་ལོངས་སྤྱོད་པའི་སྐལ་པ་དང་ལྡན་པར་འགྱུར་རོ། །བདག་གཞན་དོན་དུ་ཆོས་ཀྱི་འཁོར་ལོ་སྐོར་བའི་སྐལ་པ་དང་ལྡན་པར་འགྱུར་རོ། །གཞན་ཡང་འཁོར་ལོ་འདི། དབང་སྡུད་དང་། ནོར་སྒྲུབ་དང་། ཚེ་སྒྲུབ་ཆེན་པོ་ཡིན། འཁོར་ལོ་འདིས་ཚེ་རིང་བ་དང་། ནད་ཉུང་བ་ལོངས་སྤྱོད་ཐམས་ཅད་འཕེལ་བར་འགྱུར་རོ། །འཁོར་ལོ་འདིས་དགྲ་རྐུན་ཇག་གསུམ། མེ་ཡི་འཇིགས་པ་དང་། ཆུ་ཡི་འཇིགས་པ་དང་། རླུང་གི་འཇིགས་པ་དང་། ས་ཡི་འཇིགས་པ་དང་། གཟའ་དང་ཐོག་གི་འཇིགས་པ་ཐམས་ཅད་ལས་ཐར་བར་འགྱུར་རོ། །འཁོར་ལོ་འདིས་མཚོན་དང་དུག་གི་འཇིགས་པ་དང་། ནད་དང་མུ་གེ་དང་། དུཿཁ་དང་ཉེས་སྐྱོན་ཐམས་ཅད་ལས་ཐར་བར་འགྱུར་རོ། །འཁོར་ལོ་འདིས་འཇིག་རྟེན་གྱི་མི་དང་། རྒྱལ་པོའི་ཆད་པ་ལས་ཀྱང་ཐར་བར་འགྱུར་རོ། །འཁོར་ལོ་འདིས་འབྱུང་པོ་དང་། རྒྱལ་འགོང་དང་བདུད་དང་མུ་སྟེགས་ལ་སོགས་དམ་ཉམས་དང་། གཟའ་དང་། ཀླུ་དང་། ས་བདག་དང་། བཙན་དང་། བདུད་དང་། མ་མོ་དང་། ལྷ་དང་། ཤ་ཟ་དང་། སྲིན་པོ་དང་། དྲི་ཟ་དང་། ཐེའུ་རང་དང་། ཁ་ཤོར་དང་། སྡེ་བརྒྱད་ལྷ་མ་སྲིན་ཐམས་ཅད་ཀྱི་གནོད་པས་མི་ཚུགས་པར་འགྱུར་རོ། །འཁོར་ལོ་འདིས་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་ཀྱི་ཕྲིན་ལས་སྒྲུབ་ཅིང་བར་ཆད་བཟློགས་ནས་བསྲུང་བར་འགྱུར་རོ། །འཁོར་ལོ་འདིས་ནོར་བུ་རིན་པོ་ཆེའི་དབྱིག་དང་མུ་ཏིག་དང་། མུ་མེན་དང་། མེ་ཤེལ་དང་། ཆུ་ཤེལ་དང་། །གསེར་དངུལ་ལ་སོགས་པ་རིན་པོ་ཆེ་སྣ་བདུན་དང་། སྟག་གཟིག་གོས་དར་རས་འཕྲུག་ལ་སོགས་པ་ལ་ལོངས་སྤྱོད་པར་འགྱུར་རོ། །འཁོར་ལོ་འདིས། ནས་དང་། འབྲས་དང་། གྲོ་དང་། སྲན་མ་ལ་སོགས་པ་འབྲུ་སྣ་དགུ་ལ་ལོངས་སྤྱོད་པར་འགྱུར་རོ། །རྟ་དང་། མ་ཧེ། གླང་བོ་ཆེ། བ་གླང་། མཛོ་དང་། དྲེལ་དང་། ར་ལུག་དང་། ནོར་ཐམས་ཅད་ལ་ལོངས་སྤྱོད་པར་འགྱུར་རོ། །འཁོར་ལོ་འདིས་རྒྱན་དང་གོས་དང་དཔལ་འབྱོར་ཕུན་སུམ་ཚོགས་པ་ལ་ལོངས་སྤྱོད་པར་འགྱུར་རོ། །འཁོར་ལོ་འདིས་ཕྱོགས་བཅུའི་སངས་རྒྱས་བྱང་སེམས་བླ་མ་ཡི་དམ་མཁའ་འགྲོ་ཆོས་སྐྱོང་ལ་རྒྱུན་དུ་མཆོད་ཅིང་། སེམས་ཅན་ལ་ཆོས་དང་ཟང་ཟིང་གི་སྦྱིན་པ་རྒྱུན་ཆད་མེད་པར་འགྱུར་རོ། །འཁོར་ལོ་འདིས་རང་གི་བླ་མ་དང་། གྲོགས་པོ་དང་། ཡི་དམ་ཞི་ཁྲོ། མཁའ་འགྲོ་ཆོས་སྐྱོང་ལ་དམ་ཚིག་ཆགས་ཉམས་དང་། འཐབ་པ་དང་། འཁོན་དང་། རྩོད་པ་དང་། གཞན་ཡང་ལུས་ངག་ཡིད་གསུམ་གྱི་ཉེས་སྐྱོན་ཐམས་ཅད་དག་པར་གསུངས། མཚམས་མེད་པ་ལྔ་དང་། ལྕི་བ་བཞི་དང་། ལོག་པ་བརྒྱད་དང་། མི་དགེ་བ་བཅུ་ལ་སོགས་པའི་སྡིག་པ་ཐམས་ཅད་ནི་འཁོར་ལོ་བསྐོར་བ་དང་འགྱོད་པ་དྲག་པོས་བཤགས་ན་བྱང་གསུངས། ཁམས་གསུམ་སྲིད་གསུམ་ལྷ་འདྲེ་མི་གསུམ་ཟས་ནོར་ཆོས་གསུམ་ཐམས་ཅད་འདུས་པར་འགྱུར་རོ། །འཁོར་ལོ་འདིས་ལྷ་མི་ཐམས་ཅད་དགའ་བར་འགྱུར་རོ། །དཀོན་མཆོག་གསུམ་པོ་ཐུགས་རྗེའི་བདག་ཉིད་ཅན་དང་། བླ་མ་དང་འཕགས་པའི་ཚོགས་ཐམས་ཅད་རྗེས་སུ་ཡི་རངས་བར་འགྱུར་རོ། །ཆོས་དེས་འགྲོ་དོན་ཕྲིན་ལས་ནི་ཕྱོགས་དང་ཕྱོགས་མེད་འབྱུང་བས་སྙན་གྲགས་གིས་སྟོང་གསུམ་གང་བར་འགྱུར་རོ། །ཆོས་བསྒྲུབ་པའི་མཐུན་རྐྱེན་ཐམས་ཅད་ལྷུན་གྱིས་འགྲུབ་ཅིང་། འགལ་རྐྱེན་བར་ཆད་ཐམས་ཅད་དང་། ནད་དང་གནོད་པ། རྐྱེན་དང་བར་ཆད། ནད་རིགས་སུམ་བརྒྱ་དྲུག་ཅུ། བགེགས་རིགས་སྟོང་ཕྲག་བརྒྱད་ཅུ། གློ་བུར་ཉི་ཁྲི་ཆིག་སྟོང་། ཡེ་འགྲོགས་སུམ་བརྒྱ་དྲུག་ཅུ། བྱད་དང་གཏད་མནན་དང་། མོ་ངན་པ་དང་། རྨི་ལམ་ངན་པ་དང་། ལྟས་ངན་པ། ཆོ་འཕྲུལ་ཆེ་བ་ལ་སོགས་པའི་མི་མཐུན་པའི་ཕྱོགས་ངན་པ་ཐམས་ཅད་འཁོར་ལོ་འདིས་ཡོན་ཏན་གྱིས་བཟློག་པར་ཨོ་རྒྱན་གྱིས་གསུངས་སོ། །འཁོར་ལོ་འདིས་ཚེ་ཡི་སྒྲུབ་པ་བརྒྱ་བྱས་པ་དང་། སྲུང་འཁོར་བརྒྱ་བཙུགས་པ་དང་། སྲུང་འཁོར་བརྒྱ་བཏགས་པ་བས་སྟོབས་ཆེ་བ་གསང་བདག་ཉིད་ཀྱིས་གསུངས། འཁོར་ལོ་འདིས་ཡོན་ཏན་ཅན་དང་། བསམ་གཏན་ཅན་དང་། ཁ་དྲག་འབྱོར་པ་ཅན་དང་། མཐུ་རྩལ་ཅན་དང་། དྲག་ཤུལ་ཅན་དང་ལྡན་པར་འགྱུར་རོ། །སྡུག་བསྔལ་དང་། དུཿཁ་ཐམས་ཅད་དང་། གོད་ཁ་ཐམས་ཅད་ལས་ཐར་བར་འགྱུར་རོ། །འཁོར་ལོ་འདིས་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་མཁའ་འགྲོ་ཆོས་སྐྱོང་ནོར་ལྷ་བཀའ་སྲུང་ཐམས་ཅད་ཀྱི་སྤྱན་ལམ་དུ་ཀུན་ཏུ་བཟང་པོའི་མཆོད་པའི་སྤྲིན་གྱིས་ནམ་མཁའ་གང་ནས་མཉེས་ཤིང་དགྱེས་ཏེ་དངོས་གྲུབ་སྟེར་བར་འགྱུར་རོ། །འཁོར་ལོ་འདི་སྐྱེ་བོ་ཕོ་མོས་བསྐོར་ན། དེའི་བསོད་ནམས་ཀྱིས་འཁོར་གཡོག་ལོངས་སྤྱོད་འཕེལ་ཞིང་རྒྱས་ཏེ། བང་མཛོད་གནས་ཁང་། ཁ་རྗེ་དབང་ཐང་ཐམས་ཅད། ཆོས་དང་མཐུན་པའི་འབྱོར་བ་ཐམས་ཅད་ཆར་བཞིན་བབས་ནས་ལོངས་སྤྱོད་ཅིང་མཐར་སངས་རྒྱས་པར་འགྱུར་རོ། །འཁོར་ལོ་འདིས་མཐར་ཐུག་སངས་རྒྱས་རབ་བདུན་དང་། ལྷ་དང་བླ་མའི་དཀྱིལ་འཁོར་ཐམས་ཅད་ཀྱི་བདག་ཉིད་དུ་གྱུར་ནས་སེམས་ཅན་གྱི་དོན་བྱེད་པར་འགྱུར་རོ། །རྒྱལ་བློན་བཙུན་མོ་འབངས་ཐམས་ཅད་དང་འགྲོ་བ་མཐའ་དག་གི་ཡིད་དུ་འོང་ཞིང་མཆོད་གནས་བྱེད་པར་འགྱུར་རོ། །དགེ་སློང་བཙུན་པ་འགའ་ཞིག་གིས་འདུལ་ཁྲིམས་ཉམས་པ་དང་བྱང་སེམས་ཉམས་པ་དང་། གསང་སྔགས་ཀྱི་དམ་ཚིག་ཉམས་ན་འགྱོད་ཚངས་བཤགས་ཤིང་འཁོར་ལོ་བསྐོར་ན་བྱང་བ་མཁའ་འགྲོ་མ་ཨ་ར་ལི་ལ་ཐུབ་པ་ཆེན་པོས་གསུངས་སོ། །འཁོར་ལོ་འདིས་ལོག་པར་ལྟ་བ་ཅན་གྱི་ཁྱིམ་དང་ཞ་ལོང་འོན་ལྐུགས་ཕོངས་པ་ཅན་གྱི་ཁྱིམ་དུ་མི་སྐྱེ། སྡིག་པས་མི་གོས་ཤིང་། རིགས་མཐོ་བ་དང་། ཚེ་རིང་། ནད་མེད། གཟུགས་བཟང་། འབྱོར་པ་ཆེ། ཆོས་དང་ལྡན་ཞིང་། རིགས་མཐུན་ལུས་གཙང་མ་ཐོབ་ནས་མཁས་བཙུན་དགེ་བའི་བཤེས་གཉེན་རྣམས་དང་ཞལ་མཇལ་ནས་ཆོས་སྤྱོད་པའི་སྐལ་པ་དང་ལྡན་པར་གསུངས། འཁོར་ལོ་འདིས་དཀར་ཕྱོགས་ཀྱི་ལྷ་ཐམས་ཅད་ཀྱིས་སྲུང་བ་དང་། སྐྱོབ་པ་དང་། སྦ་བ་དང་། སྦེད་པར་བྱེད་ཅིང་། དུས་མིན་གྱི་འཆི་བ་དང་། སྡུག་བསྔལ་ཐམས་ཅད་ལས་ཐར་ནས་བུད་མེད་བུ་འདོད་པ་རྣམས་ལ་བུ་འབྱུང་ཞིང་། ནོར་དང་ཚོང་སྒྲུབ་བྱེད་པ་རྣམས་ལ་ལྷའི་སྡོང་གྲོགས་བྱས་ནས་དོན་ཐམས་ཅད་འགྲུབ་པར་འགྱུར་རོ། །ཚེ་འཕོས་ནས་ངན་སོང་གསུམ་གྱི་སྒོ་བཀག་སྟེ། སྐྱེ་བ་དམན་པ་དང་། མཐའ་འཁོབ་ཀྱི་ལུས་སྤངས་ཏེ་མི་ལུས་གཙང་མ་ཐོབ་ནས་ཆོས་སྤྱོད་པར་འགྱུར་རོ། །དམྱལ་བ་དང་། ཡི་དྭགས་དང་། ཤ་ཟ་དང་། སྲིན་པོ་དང་། གནོད་སྦྱིན་དང་། དྲི་ཟ་ལ་སོགས་སེམས་ཅན་ཅི་ལ་སྐྱེས་ཀྱང་། སེམས་ཅན་གཞན་ལ་ཆོས་སྟོན་ཅིང་སྨོན་ལམ་གདབ་པར་འགྱུར་རོ། །འཁོར་ལོ་འདིས་ཚོགས་རྫོགས་སྒྲིབ་གཉིས་བྱང་ནས་མཐར་ཐུག་འགྱུར་མེད་ཀྱི་སྐུ་ཐོབ། འགག་མེད་ཀྱི་གསུང་ཐོབ། འཁྲུལ་མེད་ཀྱི་ཐུགས་ཐོབ། རྟོག་པ་འཆར། དགོས་འདོད་འབྱུང་བས་ཡོན་ཏན་ཕྲིན་ལས་ཐོགས་མེད་དུ་འགྲུབ་པར་འགྱུར་རོ། །ཆོས་ཐམས་ཅད་ཀྱི་མངའ་བདག་ཏུ་འགྱུར། ཐུགས་སུ་ཆུད་ནས་མི་བརྗེད་པའི་གཟུངས་བརྟན་པོར་ཐོབ་ནས། འཆད་པ་དང་། རྩོད་པ་དང་། རྩོམ་པ་ཐོགས་པ་མེད་པར་འགྱུར་རོ། །འཁོར་ལོ་འདིས། འཆི་མེད་ཀྱི་ཚེ། ཟད་མེད་ཀྱི་གཏེར། ཕོངས་མེད་ཀྱི་ནོར། མཉམ་པ་མེད་པའི་བསོད་ནམས། ཟས་སྣ་ཚོགས། གོས་སྣ་ཚོགས། འཁོར་མང་པོ་ལ་ལོངས་སྤྱོད་པར་འགྱུར་རོ། །འཁོར་ལོ་འདིས་སྨོན་ལམ་མཐར་ཕྱིན་ནས་རྣམ་པར་དག་པའི་འགྲོ་དོན་ཕྱོགས་མེད་དུ་འབྱུང་ངོ་། །གཞན་སུས་ཀྱང་འགྲན་ཟླ་ཐམས་ཅད་དང་བྲལ་བའི་བསམ་གཏན་ནམ་མཁའ་དང་མཉམ་པར་འགྱུར་རོ། །གཞན་ཐམས་ཅད་རྗེས་སུ་ཡི་རངས་བའི་དགོས་འདོད་འབྱུང་ནས་རེ་བ་ཐམས་ཅད་བསྐང་བར་འགྱུར་རོ། །འཁོར་ལོ་འདིས་སུས་ཀྱང་བློ་རུ་མི་ཚུད་པའི་མངའ་བདག་གང་བསམ་འགྲུབ་ཅིང་། ཅི་ཙམ་སྤྱད་ཀྱང་མི་ཟད་ཅིང་འཕེལ་བའི་ལོངས་སྤྱོད་དང་ལྡན་པར་འགྱུར་རོ། །འཁོར་ལོ་འདིས་ཚེ་ཕྱི་མ་བར་དོ་ནས་བཀྲ་ཤིས་པའི་རྟགས་བརྒྱད། རྒྱལ་སྲིད་སྣ་བདུན། འདོད་ཡོན་ལྔ། མཆོད་པ་ལྔ། ལྷ་མོ་བརྒྱད་སོགས་སངས་རྒྱས་ཀྱི་ཞིང་ཁམས་དང་མཆོད་པ་སྔོན་དུ་མཐོང་བར་འགྱུར་རོ། །དེ་ནས་སངས་རྒྱས་ཀྱི་ཞིང་ཁམས། ཤར་ཕྱོགས། ལྷོ་ཕྱོགས། ནུབ་ཕྱོགས། བྱང་ཕྱོགས་དེ་རྣམས་སུ་སངས་རྒྱས་རྣམ་པར་སྣང་མཛད། རྡོ་རྗེ་སེམས་དཔའ། རིན་ཆེན་འབྱུང་ལྡན། སྣང་བ་མཐའ་ཡས། དོན་ཡོད་གྲུབ་པ་རྣམས་ལས་དམ་ཆོས་ཉན་ཅིང་བསྙེན་བཀུར་བྱེད་པའི་སྐལ་བ་དང་ལྡན་པར་འགྱུར། འཁོར་བ་མ་སྟོང་བར་དུ་སེམས་ཅན་དཔག་ཏུ་མེད་པའི་དོན་འབྱུང་བར་གསུངས། འཁོར་ལོ་འདིས་ནི་མཐུ་སྟོབས་དང་ཤེས་རབ་སྙིང་རྗེ་རིགས་གསུམ་མགོན་པོ་དང་མཉམ་པར་འགྱུར་རོ། །འཇིག་རྟེན་གྱི་ཁམས་ན་རིན་པོ་ཆེ་སྣ་བདུན་གྱིས་བཀང་ནས་མཆོད་པའི་ཡོན་ཏན་བགྲང་བར་ནུས་སོ། །སེམས་བསྐྱེད་ཆེན་པོས་འཁོར་ལོ་ལན་གཅིག་བསྐོར་བའི་ཡོན་ཏན་བགྲང་བར་མི་ནུས་སོ། །འཇིག་རྟེན་གྱི་ཁམས་ཐམས་ཅད་ནས་ས་ཡི་རྡུལ་རེ་རེ་ནས་བགྲང་བར་ནུས་སོ། །ཡི་གེ་དྲུག་པའི་འཁོར་ལོ་འདི་ལན་གཅིག་བསྐོར་བའི་བསོད་ནམས་ཀྱི་ཚད་ནི་བགྲང་བར་མི་ནུས་སོ། །ཁམས་གསུམ་གྱི་སེམས་ཅན་ལ་སྲོག་གི་སྦྱིན་པ་རེ་རེ་བཏང་བ་དེ་ཡི་བསོད་ནམས་ཀྱི་ཚད་ནི་བགྲང་བར་ནུས་སོ། །སེམས་ཅན་ཐམས་ཅད་ཀྱི་དོན་དུ་འཁོར་ལོ་ལན་གཅིག་བསྐོར་བའི་བསོད་ནམས་ཀྱི་ཚད་ནི་བགྲང་བར་མི་ནུས་སོ། །དམིགས་བཅས་ཀྱི་དགེ་རྩ་ཐམས་ཅད་ཀྱི་ཡོན་ཏན་ནི་རྩིས་བགྲང་བྱར་ཡོད་ཀྱང་། དམིགས་མེད་ཀྱི་ངང་ནས་འཁོར་ལོ་འདི་ལན་གཅིག་བསྐོར་བའི་བསོད་ནམས་ཀྱི་ཚད་ནི་དུས་གསུམ་གྱི་སངས་རྒྱས་ཐམས་ཅད་ཀྱིས་བགྲང་བར་མི་ནུས་སོ། །སངས་རྒྱས་གདྒའི་ཀླུང་གི་བྱེ་མ་སྙེད་ཀྱི་གྲངས་ལ་མཆོད་པ་ཕུལ་བ་དང་བསོད་ནམས་མཉམ་པར་བཤད་དོ། །འཁོར་ལོ་འདིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ཏེ་གཟུགས་སྐུ་ཕྲིན་ལས་རྒྱུན་མི་ཆད་པར་འགྱུར་རོ། །སློབ་དཔོན་པདྨའི་ཞལ་ནས། རྒྱ་གར་ནས་བོད་དུ་འགྱུར་ཚད་ཀྱི་ཆོས་ལུས་ངག་གི་དགེ་སྦྱོར་བྱ་ཐབས་ལ་ཡི་གེ་དྲུག་པའི་འཁོར་ལོ་འདི་བས་ཕན་པ་དང་ཡོན་ཏན་ཆེ་བ་མེད་གསུངས། བྲམ་ཟེ་ཆེན་པོ་སྤང་འོད་ཟེར་བླ་མའི་ཞལ་ནས། ཡི་གེ་དྲུག་པའི་འཁོར་ལོ་འདི་ཡི་གྲངས། རབ་སྟོང་ཕྲག་གམ། འབྲིང་བརྒྱ་བདུན་ནམ། ཐ་མ་བརྒྱ་དང་རྩ་བརྒྱད་ལ་རབ་གནས་དང་བཀྲ་ཤིས་སྨོན་ལམ་ནི་བླ་མ་མཚན་ཉིད་ལྡན་པ་གཅིག་གིས་བྱས་ན་ཅི་བསམ་པའི་དོན་ཐམས་ཅད་འགྲུབ་པར་འགྱུར་རོ། །འཁོར་ལོ་འདི་དུས་ཉིན་མཚན་མེད་པར་རྒྱུན་དུ་བསྐོར་ན། དགེ་སློང་ཤོག་ལྡེབ་ཀྱི་གྲངས་ཙམ་ལ་ཞབས་ཏོག་བྱས་པའི་བསོད་ནམས་དང་མཉམ། ཡང་འཁོར་ལོ་འདི་ལ་ན་བཟའ་བསྐོན་ན་བླ་མ་ཡིག་དྲུག་གི་གྲངས་ཙམ་ལ་ན་བཟའ་གསོལ་བ་དང་བསོད་ནམས་མཉམ་མོ། །ཉིན་མཚན་དུས་དྲུག་ཏུ་བསྐོར་ན་ལུས་ངག་གི་ཆོས་སྤྱོད་ཐུན་དྲུག་གི་དགེ་སྦྱོར་དང་བསོད་ནམས་མཉམ་མོ། །གཞན་ཡང་འཇིག་རྟེན་གྱི་མི་ཐམས་ཅད་ཀྱི་ཚེ་སྒྲུབ་དང་ནོར་སྒྲུབ་དང་སྲུང་འཁོར་ཐམས་ཅད་ལ་འཁོར་ལོ་འདིས་ཆོག་པར་གསུངས། གཞན་ཡང་མོ་ལྟས་ངན་པ། འཆི་བའི་དུས་བཏབ་པ་འཁོར་ལོ་འདི་དད་བརྩོན་དྲག་པོས་བསྐོར་ན་བཟློག་པ་ལ་ཐེ་ཚོམ་མེད་དོ། །དགྲ་རྐུན་ཇག་གསུམ། ཚང་ལང་འབྲུམ་གསུམ། དམག་སྣ་ཇག་སྣ། རྐུན་སྣ་གཅན་སྣ་ཐམས་ཅད་ལ། འཁོར་ལོ་འདི་ཡོན་ཏན་འབུམ་ལྡན་བཅས་མཆོག་གི་དད་པ་དང་ངེས་ཤེས་དྲག་པོས་བསྐོར་ན་བཟློག་པར་འགྱུར་རོ། །འཁོར་ལོ་འདི་འབྲི་བ་ལ་ལྷག་ཆད་འགྲོ་བས་སྤར་འདི་ངོ་མཚར་ཆེ། མེ་འཁོར་འདི་མྱུར། ཆུ་འཁོར་འདི་ཡུན་རིང་ལ་བཀྲ་ཤིས། རླུང་འཁོར་འདི་དར་དྲག་ན་བར་ཆད་ཡོང་། ས་འཁོར་འདི་དཀའ་ཚེགས་ཆེ། འཁོར་ལོ་འདི་རིན་ཆེན་སྣ་ལྔ་དང་། སྨན་དྲི་བཟང་ལ་སོགས་པ་རྣམས་སྣག་ཚ་ལ་བསྲེས་ནས་ལྷག་ཆད་མེད་པར་བཞེངས། བླ་མ་མཚན་ཉིད་དང་ལྡན་པས་རབ་གནས་དང་། བཀྲ་ཤིས་སྨོན་ལམ་དང་བཅས་པ་བྱས་ཤིང་། རིན་པོ་ཆེ་སྣ་ལྔ་དང་། གོས་དར་གང་འཛོམ་རྒྱན་སྣ་ཚོགས་ཀྱིས་མཛེས་པར་བྱའོ། །དུས་བཟང་ལ་ཚོགས་ཀྱི་འཁོར་ལོ་བསྐོར། མཆོད་པ་སྣ་ཚོགས་འབུལ། རང་གི་འདོད་གསོལ་གྱི་སྨོན་ལམ་གང་འདོད་བཏབ་ན་འགྲུབ་པར་གསུངས་སོ། །འཁོར་ལོ་འདི་ཡོན་ཏན་འབུམ་དང་ལྡན་ཞིང་བཀྲ་ཤིས་དོན་འགྲུབ་པ་ཡིན་ནོ། །འཁོར་ལོ་འདི་སྐོར་བའི་དུས་སུ་ཙེར་ཙེར་ཟེར་ན་སྲོག་ལ་གནོད། ཏྲག་ཏྲག་ཟེར་ན་ནོར་ལ་གནོད། ཧྲག་ཧྲག་ཟེར་ན་འཁོར་ལ་གནོད་པས། སྐད་མེད་ཆུ་བོའི་རྒྱུན་བཞིན་བསྐོར། སྡིག་པ་ལ་སློབ་དཔོན་བསད་པ་དང་། ཕ་བསད་དང་། མ་བསད་དང་། སྡོམ་པ་ཉམས་པ་དང་། རང་རྒྱལ་བསད་པ་དང་། དགེ་འདུན་གྱི་བར་ལ་དབྱེན་བྱས་པ་དང་། མི་དགེ་བ་བཅུ་ལ་སོགས། སྡིག་པའི་ཕུང་པོ་རི་རབ་ཙམ་ཡང་འཁོར་ལོ་འདི་བསྐོར་ཞིང་འགྱོད་པ་དྲག་པོས་བཤགས་ན་བྱང་བར་གསུངས་སོ། ཁེ་འགྱུར་སྤོགས་གསུམ། རྐུ་རྫུན་བྱི་གསུམ། གཡོ་སྒྱུ་ཟོལ་གསུམ་ལ་སོགས་པ་ཐམས་ཅད་བྱང་བར་གསུངས་སོ། །ཡི་གེ་དྲུག་པ་འདི། རྡོ་ལ་བཞེངས་པ་དང་། བྲག་གི་ངོས་ལ་བཞེངས་པ་དང་། ཤིང་ལ་བཞེངས་པ་དང་། རིན་པོ་ཆེ་ལ་སོགས་པ་བང་མཛོད་ལ་བཞེངས་ནས། རི་ཡི་རྩེ་མོ་ལ་བཞག་པའམ། ལམ་གྱི་བཞི་མདོ་ལ་བཞག་པའམ། རི་སྣ་དང་གདོང་སྣ་ལ་བཞག་པ་བྱང་ཆུབ་སེམས་དཔའ་རེ་རེས་འགྲོ་དོན་བྱེད་པ་དང་འདྲའོ། །ཡང་ཡི་གེ་དྲུག་པ་འདི་རས་ལ་བྲིས་ནས་རབ་ཏུ་གནས་ཤིང་། གནས་བཟང་པོ་དང་། རི་ཁྲོད་གཙུག་ལག་ཁང་། ཆུ་ཆེན་པོའི་སྟེང་། རི་རྩེ་ལ་སོགས་པ་ལ་ཕྱར་ན་རླུང་དེས་གར་ཁྱབ་པའི་སེམས་ཅན་ཐམས་ཅད་བྱང་ཆུབ་ཐོབ་པར་གསུངས་སོ། །དེ་ཡི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། རྒྱལ་པོ་ཁྲི་སྲོང་ལྡེའུ་བཙན་ནས་བརྒྱུད་པའོ། །ཐུགས་རྗེ་ཆེན་པོའི་ཕན་ཡོན་ལ། མ་ཎི་ཆོས་འབྱུང་དང་གཅིགཐུགས་རྗེ་ཆེན་པོའི་རྒྱ་གཞུང་དང་གཉིས། ཐུགས་རྗེ་ཆེན་པོ་པདྨ་དཀར་པོ་དང་གསུམ། མདོ་ཟ་མ་ཏོག་དང་བཞི། རྟ་མཆོག་རོལ་པའི་རྒྱུད་དང་ལྔ། ཡང་སྙིང་འདུས་པའི་རྒྱུད་དང་དྲུག །ཕྱག་སྟོང་གི་རྒྱུད་དང་བདུན། ཕྱག་བརྒྱ་པའི་རྒྱུད་དང་བརྒྱད། གངས་ཆེན་མཚོ་རྒྱལ་གྱི་རྒྱུད་དང་དགུ། ཕྱག་གཉིས་པ་དང་བཅུ། ཕྱག་བཞི་པ་དང་བཅུ་གཅིག །རྒྱལ་བ་རྒྱ་མཆོའི་རྒྱུད་དང་བཅུ་གཉིས། ལས་མཐའི་རྒྱུད་དང་བཅུ་གསུམ། འཁོར་བ་དོང་སྤྲུག་གི་རྒྱུད་དང་བཅུ་བཞི། འཇིག་རྟེན་དབང་ཕྱུག་གི་རྒྱུད་དང་བཅོ་ལྔ། ཡིད་བཞིན་འཁོར་ལོའི་རྒྱུད་དང་བཅུ་དྲུག །མི་འཇིགས་སྐྱོབ་བྱེད་དང་བཅུ་བདུན། པདྨ་རྒྱལ་པོའི་རྒྱུད་དང་བཅོ་བརྒྱད། ཁ་སར་པཱ་ཎི་དང་བཅུ་དགུ། རྒྱལ་པོའི་བཀའ་འབུམ་དང་ཉི་ཤུ། སྤང་འོད་ཟེར་བླ་མས་མཛད་པའི་ཐུགས་རྗེ་ཆེན་པོའི་འཁོར་ལོའི་ཕན་ཡོན་རྣམས་དང་། བླ་མ་དགོངས་འདུས་ཀྱི་འཁོར་ལོའི་ཕན་ཡོན་རྣམས་དང་། གཞན་ཡང་རྒྱལ་བའི་བཀའ། སངས་རྒྱས་ཀྱི་གསུང་། མདོ་རྒྱུད་ཀྱི་སྙིང་པོ་གྲུབ་ཐོབ་གོང་མ་རྣམས་ཀྱི་བསྟན་བཅོས། བླ་མ་སྤྲུལ་སྐུ་རྣམས་ཀྱི་ལུང་། མཁས་བཙུན་དགེ་བའི་བཤེས་གཉེན་རྣམས་ཀྱི་མན་ངག་རྒྱུ་འབྲས་ལ་མཁས་པ་མང་པོའི་གསུང་བགྲོས་རྣམས་ནས་ཕན་ཡོན་བརྗོད་ཀྱིས་མི་ལང་སྟེ། སློབ་དཔོན་པདྨའི་མ་འོངས་ལུང་བསྟན་ལས། ལྷོ་ནུབ་ཏུ་འབྱོན་ཁར་ངས་སྲིན་པོ་ཐམས་ཅད་ཐུལ་བའི་རྟགས་ལ། ས་ཡི་མཐར་ཡི་གེ་དྲུག་པའི་འཁོར་ལོ་དར་ནས་ཡོང་སྟེ། དེ་དུས་འཁོར་ལོ་བསྐོར་བ་དང་། མཐོང་ཐོས་དྲན་རེག་དེའི་རླུང་ཕོག་ཚད་ཐམས་ཅད་བཀྲ་ཤིས། དོན་འགྲུབ། སྒྲིབ་པ་དག་མཐར་བྱང་ཆུབ་ཐོབ་པ་ལ་སོགས་པ་འཁོར་ལོ་འདིའི་ཕན་ཡོན་དཔག་ཏུ་མེད་པ་གསུངས་པ་མཐོང་བས། བདག་གཞན་གཉིས་ཀྱི་དོན་ཚད་མེད་པར་འགྲུབ་ཐབས་སྣང་བས་དོན་ཆེན་པོ་ལ་བསམས་ཏེ། གོང་གི་མདོ་རྒྱུད་བསྟན་བཅོས་གསུང་རབ་ཕན་ཡོན་ལུང་བསྟན་རྣམས་མཐོང་བ་དེ་རྣམས་ལ་དཔང་པོ་བྱས་ནས་བློ་ཆུང་བ་རྣམས་ཀྱིས་གོ་བདེ་བ་དང་ལོག་ལྟ་ཅན་དང་ཐེ་ཚོམ་ཅན་རྣམས་ཡིད་ཆེས་པའི་ཕྱིར། རང་གི་མཐོང་སྣང་དང་བཅས་པ་ཉུང་ངུར་བསྡུས་ནས་བྲིས་པ་ཡིན་ནོ། །ད་ལྟ་ཆོས་ཡིན་ཟེར་ནས། ལྷ་བཞེངས། རྟ་རྒྱུག །གཏམ་ཟློ། སྟོན་ཤེད་བྱེད། བཀའ་འགྱུར་བསྟན་འགྱུར་མདོ་མང་འབུམ་ལ་སོགས་པ་བྲིས་ནས་དེའི་ཕྱོགས་སུ་སེམས་ཅན་མང་པོའི་སྲོག་བཅད་ནས་བཏང་སྟེ་ཆོས་སུ་རློམ་པར་སྣང་སྟེ། དེ་ནི་ཁྲག་མཚོ་དང་རྣག་མཚོའི་དཀྱིལ་ནས་ཡི་གེ་བྲིས་པ་སྟེ། གསུང་རབ་ཁྱད་དུ་བསད་པ་མ་ཡིན་ཡང་གོ་བ་ལོག་པར་སོང་སྟེ་སྡིག་པའི་རྣམ་སྨིན་ཤིན་ཏུ་ཆེའོ། །དེ་བས་འཁོར་ལོ་འདིའི་ཕྱིར་དུ་ཆང་གྲལ་དུ་ཁ་རྩོད་བྱེད་པ་ཙམ་གྱི་སྡིག་པ་ཡང་མི་འགྲོ། ཕྱི་མའི་དོན་ཆེན་པོ་ནི་འགྲུབ། རྒྱུ་དངོས་པོ་མི་འགྲུབ། འགྲུབ་ཀྱང་མི་འགྲོ། ང་རྒྱལ་དང་དྲེགས་པ་མེད་པས་ལམ་དུ་འགྲོ་བ་ཡིན་ནོ། །ཆོས་ཡིན་ཟེར་ནས་སྡིག་པ་བྱས་པའི་སྟེང་དུ་ང་རྒྱལ་དང་དྲེགས་པ་ཆེ་ན་ནི་ཕྱི་མའི་དོན་མེད། དགེ་སྡིག་སྤེལ་མར་བྱས་པས་མགོ་བསྡོས་ཡིན། ཞེས་ཆོས་ཀྱི་རྒྱལ་པོས་གསུངས་སོ། །དེ་བས་ཚེ་ཕྱི་མའི་དོན་ལ་ཉ་ཚང་གྲོག་ཚང་གསན་གསོ་བ་དང་། རྡོ་རྗེ་གཅོད་པ་ཚར་རེ་ཙམ་དང་། འཁོར་ལོ་རེ་རེ་ཙམ་དང་། ཡི་གེ་དྲུག་པ་འབུམ་ཐེར་རེ་ཙམ་དང་། བསྔོ་བ་སྨོན་ལམ་འབུམ་ཐེར་རེ་ཙམ་གྱིས་སྒྲིབ་པ་འདག་སྟེ། ལས་ངན་པའི་སེམས་ཅན་གྱིས། དེ་འདྲ་ཤེས་ཟེར་ནས་མི་ཉན་པར་གདའ་བ་མ་ཏོགས། འཁོར་ལོ་འདི་ངོ་བོ་དགཕན་ཡོན་ཆེ། རྒྱུ་འགྲོ་ཆུང་བས་རྣམ་སྨིན་མི་འགྲོ། ཁ་ཏོན་མི་འཆག་ངེས་དོན་མི་སྒྲིབ། ཞབས་ཏོག་སླ། སུས་ཀྱང་འགྲུབ། འགྲོ་ཞོར་འདུག་ཞོར་ལ་བསྐོར་བས་ཆོག །དགེ་རྩ་ཞོར་ལ་བསྒྲུབས་པས་ཆོག །ཕྱི་མའི་དོན་ཞོར་ལ་འོང་པའི་ཆོས་འདི་ཁོ་ན་ཡིན་པས་ཐམས་ཅད་ཀྱིས་ཉམས་སུ་ལོངས་ཤིག །གཞན་ལ་སྤེལ་ཅིག །སྤྲང་པོ་ཤི་ལོག་པས་ཚེ་ཕྱི་མའི་དོན་དང་གཞན་ལ་ཨི་ཕན་བསམ་པ་མ་གཏོགས་པ་བཀའ་ལ་རས་ཆོད་དང་གཟུ་ལུམ་དང་རང་བཟོ་ཆོས་མིན་གྱི་བྱ་བ་རང་འདོད་རྒྱུ་ཟས་ཀྱི་འདོད་པ་འདྲེས་ན་མཁའ་འགྲོ་ཆོས་སྐྱོང་གིས་སྙིང་ཁྲག་དྲོངས་ཤིག །འཁོར་ལོ་འདི་ལྷ་འདྲེ་མི་གསུམ་ཁམས་གསུམ་སྲིད་པ་གསུམ་གྱི་མཐུན་སྣང་དུ་གྲུབ་ནས་ས་ཕྱོགས་ཡུལ་རིས་རྒྱལ་ཁམས་ཐམས་ཅད་དུ་ཁྱབ། ཆོས་དང་མི་མཐུན་པའི་ཕྱོགས་ལས་རྒྱལ་ཞིང་། འཇིག་རྟེན་གྱི་ཁམས་ཐམས་ཅད་དུ་དར་ནས་ཤིན་ཏུ་བཀྲ་ཤིས་པར་གྱུར་ཅིག །ཡང་མདོ་རྒྱུད་ཐམས་ཅད་ཀྱི་ནང་ནས་དམ་པ་ཆོས་ཀྱི་འཁོར་ལོ་གང་ཡིན་གང་མིན་དང་། ཚོད་བཟོ་བྱེད་པ་དང་། ཡོན་ཏན་ཨེ་ཡོད་ཨེ་མེད་ཀྱི་ཐེ་ཚོམ་དང་། མི་དད་པ་དང་། འབར་བ་དང་། ཕྱིན་ཅི་ལོག་ཏུ་བསྐོར་བ་དང་། ཡབ་སྐོར་ཡུམ་སྐོར་མེད་པར་སྐོར་བ་དང་། བར་སྐོར་ལ་བར་རྒྱུར་བྱེད་པ་ལ་སོགས་སྔ་མ་ཐོད་སྲེས་བྱས་ནས་མི་གཉེན་པར་ཕྱག་དང་བཀུར་སྟིའི་གནས་མི་བྱེད་པ་དང་། གར་ཡིན་དུ་བསྐྱུར་ནས་འགོམ་ཡུག་དང་བརྙས་ཅོས་བྱས་པའི་ཉེས་པ་ནི། སྨྱོ་བ་དང་། བརྒྱལ་བ་དང་། ཞ་ལོང་འོན་ལྐུགས་དང་། དགྲ་རྐུན་ཇག་གསུམ་དང་། གོད་ཁ་རྒྱུན་མི་འཆད་པ་འོང་ཞིང་། དབུལ་ཕོངས་དང་ཤི་ཆད། བཀྲ་མི་ཤིས་པ་སྣ་ཚོགས་བྱུང་སྟེ་ཕྱི་མའང་དམྱལ་བར་འགྲོ་ཞེས་མདོ་རྒྱུད་དེ་དག་ནས་གསུངས་སོ། །དེས་ན་ལུས་ངག་ཡིད་གསུམ་གྱི་སྒོ་ནས་དད་པ་དྭངས་བ་མོས་གུས་ཀྱིས་སྐོར་ཅིག །ཤ་རུས་སྙིང་གསུམ་གྱི་སྒོ་ནས་ཕྱག་དང་སྐོར་བ་ལ་འབད་པ་གལ་ཆེ། ཚེ་ཕྱི་མ་ལས་ངན་སྡིག་སྒྲིབ་ལ་བྲེད་པ་རྣམས་ཀྱིས་སྙིང་གི་དཀྱིལ་དུ་ཆོངས་ལ་ཉམས་སུ་ལོངས་ཤིག། ཆོས་འདི་ལས་སྟོབས་ཆེ་བ་དང་ཟབ་པ་ངས་མ་མཐོང་། ངེད་རང་ཆོས་པ་ལ་འབར་བའི་བདུད་བྱ་བ་ཡོད་དེ། བླ་མའི་སྤྱོད་པ་འདྲ་བས་མི་ནག་ཕོ་མོའི་ནང་མི་སྔོན་དུ་བཟང་བཟང་ལྟར་བྱེད་ཅིང་། བློ་ཕུག་ཆགས་སྡང་རྨོངས་གསུམ་དང་། ཚེ་འདིའི་བྱ་བ་ཆོས་བརྒྱད་དང་། སྙན་གྲགས་ཟས་ནོར་ལ་བློ་ཕུག་གཏོད་ཅིང་། ཁ་ནས་ཟས་མི་འདོད། ཟོག་དང་ཉེ་དུ་མི་འདོད། སེམས་ཅན་རྣམས་སྙིང་རེ་རྗེ་ཟེར་བའི་བདུད་ཁ་ཅིག་གིས། འཁོར་ལོ་སྐོར་བ་ལ་ཡོན་ཏན་མེད་པའི་སྟེང་དུ་སྐྱོན་འདི་དག་ཡོད་ཟེར་བ་འོང་སྟེ། དེ་ནི་འབྱུང་པོ་ཡི་དྭགས་བནྡྷེའི་ཆས་སུ་ཞུགས་ཏེ་བར་ཆད་བྱེད་དུ་འོང་བས། ཐམས་ཅད་ཀྱིས་ཡིད་ལ་བཞག་ནས་བར་ཆད་ཀྱི་དབང་དུ་མ་སོང་བ་གལ་ཆེ། ཀུ་སུ་ལུ་པས་དམྱལ་ཁམས་བཅོ་བརྒྱད་འགྲིམས་པའི་དུས་ལུས་ངག་གི་དགེ་སྦྱོར་ལ་འཁོར་ལོ་འདི་ལས་ཡོན་ཏན་ཆེ་བ་མི་འདུག་གསུངས་པས། རྒྱལ་ཁམས་སུ་ཨི་ཕན་བསམས་ནས་བཀོད་པའོ། །བདུད་དང་མུ་སྟེགས་ཀྱི་དབང་དུ་མ་སོང་བར་ཉམས་སུ་ལོངས་ཤིག །སེམས་ཅན་ཀུན་ལ་ཕན་ཐོགས་པར་གྱུར་ཅིག །ཨོཾ་མ་ཎི་པདྨེ་ཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ་ཧྲཱིཿ པདྨ་གླིང་པའི་ཆུ་འཁོར་ལ་ཕན་ཡོན་བསམ་གྱིས་མི་ཁྱབ་པར་གསུང་བ་དང་། ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྒྱུད་ལས། གང་ཞིག་བྱང་སེམས་ལྡན་པ་ཡིས། །སྐྱེས་བུ་བློ་གྲོས་སྟོབས་ལྡན་གྱིས། །ཡིག་དྲུག་གླེགས་བམ་ཆེན་པོ་བཞེངས། །བསྐྱེད་རིམ་རབ་གནས་མངའ་གསོལ་ནས། །ཆུ་འམ་རླུང་ངམ་ལག་པས་བསྐོར། །ངེས་པར་འཁོར་བ་ཕྱིར་བསྙིལ་ཞིང་། །ཕྲིན་ལས་རྣམ་བཞི་ལྷུན་གྱིས་འགྲུབ། །དེ་ཡི་ཡོན་ཏན་བརྗོད་མི་ལང་། །ཞེས་གསུངས་སོ། །ཐུགས་རྗེ་ཆེན་པོ་ཡེ་ཤེས་འཁོར་ལོའི་རྒྱུད་ལས། སེམས་དཔའ་ཆེན་པོའི་རྣལ་འབྱོར་གྱིས། །ཐབས་ཀྱིས་འགྲོ་དོན་བྱེད་འདོད་ན། །རིན་ཆེན་སྣ་ལྔའི་གླེགས་བམ་འབྲི། །རྒྱུན་འབབ་ཆུ་ལ་བསྐོར་ན་ནི། དེ་ཡིས་ལས་སྒྲིབ་མྱུར་དུ་འདག །མཐོ་རིས་ཐར་བའི་ཐེམ་སྐས་འཛུགས། །ཅེས་གསུངས་སོ། །ཐུགས་རྗེ་ཆེན་པོ་མུན་སེལ་སྒྲོན་མེའི་རྒྱུད་ལས། །བྱང་སེམས་སྐྱེས་བུ་གང་དག་གིས། །ཡིག་བདུན་འཁོར་ལོ་མང་བཞེངས་ནས། །འབྱུང་བ་བཞི་ལ་བསྐོར་བ་ན། །ཕྲིན་ལས་གང་འདོད་མྱུར་དུ་འགྲུབ། །ཁྱད་པར་རྒྱུན་ཆད་མེད་པ་ཡི། །ལུས་ལ་བསྐོར་ན་ཡང་དག་འགྲུབ། ཞེས་གསུངས་སོ། །ཨོ་རྒྱན་གྱིས་གསུངས་པ། །རིགས་ཀྱི་བུ་དང་རིགས་ཀྱི་བུ་མོ་གང་དག་བདེ་བ་ཅན་གྱི་ཞིང་དེར་སྐྱེ་བར་འདོད་པས་འཁོར་ལོ་འདི་ལ་འབད་པར་གྱིས་ཤིགམཚམས་མེད་པ་ལྔ་ཡི་སྡིག་པའང་འདིས་འདག་པར་འགྱུར།
ཨེ་མ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །བོད་ཡུལ་ཁ་བ་ཅན་གྱི་ལྷ་ཡིན་ཅིང་། ཁྱད་པར་ཆོས་འདི་ཁམས་ཀོང་སོགས་སུ་དར། །ཡིག་དྲུག་བསྟན་པ་མདོ་ཁམས་ཕོ་མོས་འཛིན། །ཞེས་གསུངས་སོ། བདུད་བཞིའི་དགྲ་ལས་རྒྱལ་བའི་འཁོར་ལོ་འདིས། །ལོག་ལྟ་མཐའ་ཡས་མ་ལུས་བཅད་གྱུར་ཏེ། །དོན་གཉིས་ལྷུན་གྲུབ་དགོངས་པ་ཡོངས་རྫོགས་ནས། །སྲིད་གསུམ་འཁོར་བ་མ་ལུས་དོང་སྤྲུགས་ཤོག །ཅེས་ཆགས་མེད་རིན་པོ་ཆེའི་གསུང་འབུམ་ལས་ཁོལ་དུ་ཕྱུང་བའོ། །