རྒྱལ་བའི་དབང་པོ་དཔལ་ཀརྨ་པ་ཆེན་པོའི་སྐུ་ཕྲེང་རིམ་བྱོན་གྱི་གསོལ་འདེབས་བྱིན་རླབས་རོལ་མཚོ།

༄༅། །རྒྱལ་བའི་དབང་པོ་དཔལ་ཀརྨ་པ་ཆེན་པོའི་སྐུ་ཕྲེང་རིམ་བྱོན་གྱི་གསོལ་འདེབས་བྱིན་རླབས་རོལ་མཚོ་བཞུགས། ན་མོ་གུ་རུ། སྟོང་ཉིད་སྙིང་རྗེའི་རང་གཟུགས་རྒྱལ་བའི་སྲས། །ཕྱག་ན་པདྨའི་ཡེ་ཤེས་སྒྱུ་མའི་གར། །མཚན་ཐོས་ཙམ་གྱིས་འགྲོ་ཀུན་གྲོལ་མཛད་པ། །དུས་གསུམ་མཁྱེན་པའི་ཞབས་ལ་གསོལ་བ་འདེབས། །འབྱུང་བཞིའི་འཇིགས་བྲལ་གྲུབ་བརྒྱའི་འཁོར་ལོས་སྒྱུར། །བརྟུལ་ཞུགས་སྤྱོད་པས་ཧོར་སོགས་གདུལ་དཀའ་འདུལ། །ནག་ཕྱོགས་མི་མིན་འབྱུང་པོའི་གནོད་པ་བསྐྱབས། །ཀརྨ་པཀྴིའི་ཞབས་ལ༴ ས་བཅུའི་དབང་ཕྱུག་འགྲོ་ལ་རྗེས་བརྩེའི་ཐུགས། །ངོ་མཚར་རྣམ་ཐར་གཞོན་ནུ་དོན་འགྲུབ་བཞིན། །གྲགས་པའི་གཏེར་གྱུར་ཕྱག་རྫོགས་བསྟན་པའི་སྲོག །རྒྱལ་དབང་རང་བྱུང་རྡོ་རྗེར༴ ཆོས་དབྱིངས་མཁའ་ལ་ཐུགས་རྗེའི་ཆུ་འཛིན་འཁྲིགས། །ཕུལ་བྱུང་མཛད་ཕྲིན་ཆར་གྱི་རྒྱུན་བཟང་པོས། །བསྟན་འགྲོའི་བདེ་སྐྱིད་ལོ་འབྲས་བསྐྱེད་མཛད་པ། །རོལ་པའི་རྡོ་རྗེའི་ཞབས་ལ༴ མཁྱེན་བརྩེའི་ཉི་ཟླ་གསར་པའི་གཟི་འོད་ཀྱིས། །ས་གསུམ་རྒུད་པའི་མུན་ཚོགས་གཏན་བཅོམ་ཞིང་། །དགེ་ལེགས་ཕན་བདེའི་སྣང་བ་རྒྱས་མཛད་པ། །དེ་བཞིན་གཤེགས་པའི་ཞབས་ལ༴ མཁས་གྲུབ་ཀླུ་མཆོག་བྱེ་བའི་གཙུག་གི་རྒྱན། །དཔག་ཡས་ཡོན་ཏན་གཟི་འབར་ཡིད་བཞིན་དབང་། །འགྲོ་བའི་རེ་སྐོང་འདོད་དགུའི་གྲུ་ཆར་ཅན། །མཐོང་བ་དོན་ལྡན་ཞབས༴ སྒྲུབ་བརྒྱུད་གངས་རིའི་སྤོ་ལ་གནས་བཅས་ནས། །ངེས་དོན་དབུ་མ་སེང་གེའི་སྒྲ་དབྱངས་ཀྱི། །རྟག་ཆད་ལྟ་བའི་ཝ་སྐྱེས་སྔངས་མཛད་པ། །ཆོས་གྲགས་རྒྱ་མཚོའི་ཞབས༴ ཕུལ་བྱུང་སྐྱེས་ཐོབ་བློ་གྲོས་པདྨོའི་ཚལ། །ལུང་རིགས་རྩི་བཅུད་དངར་པོས་ཆེས་གཏམས་པས། །བློ་གསལ་རྐང་དྲུག་ཚོགས་རྣམས་དགའ་མཛད་པ། །མི་བསྐྱོད་རྡོ་རྗེའི་ཞབས་ལ༴ བརྒྱུད་པའི་མན་ངག་ཕབས་ཀྱིས་ལེགས་བྲན་པའི། །ཕྱག་རྒྱ་ཆེན་པོ་བདུད་རྩིའི་ཉིང་ཁུ་ཡིས། །བསྐལ་བཟང་གདུལ་འགྲོའི་རེ་བ་སྐོང་མཛད་པ། །དབང་ཕྱུག་རྡོ་རྗེའི་ཞབས་ལ༴ སྟོང་ཉིད་སྙིང་རྗེ་ཟབ་མོའི་གྲུ་ཆེན་གྱིས། །འཁོར་མཚོར་བྱིང་བའི་མཐའ་ཀླས་ཡིད་ཅན་ཀུན། །རྣམ་གྲོལ་རིན་ཆེན་གླིང་དུ་དབུགས་དབྱུང་བའི། །ཆོས་དབྱིངས་རྡོ་རྗེའི་ཞབས་ལ༴ ཚུལ་ཁྲིམས་རྣམ་པར་དག་པའི་ཆུ་གཏེར་ལས། །ཉེར་འཁྲུངས་ཏིང་འཛིན་ཆ་རྫོགས་རི་བོང་ཅན། །རྣམ་གསུམ་ཤེས་རབ་བསིལ་ཟེར་འབུམ་འཕྲོ་བ། །ཡེ་ཤེས་རྡོ་རྗེའི་ཞབས་ལ༴ ཉེས་སྤྱོད་སྡོམ་པའི་ཚུལ་ཁྲིམས་མེ་ཤེལ་ཁམས། །དགེ་བ་ཆོས་སྡུད་གསེར་གྱི་མུ་ཁྱུད་བཀྲ། །སེམས་ཅན་དོན་བྱེད་འོད་ཟེར་སྟོང་འབར་བ། །བྱང་ཆུབ་རྡོ་རྗེའི་ཞབས་ལ༴ འདུལ་ཁྲིམས་རྣམ་པར་དག་པའི་གསེར་སྦྱངས་ཁམས། །བྱང་ཆེན་སྤྱོད་པ་རྒྱ་མཚོའི་རྩིབས་སྟོང་བཀྲ། །མཆོག་གསང་འབྲས་བུའི་དྲོད་རྟགས་མུ་ཁྱུད་ཅན། །བདུད་འདུལ་རྡོ་རྗེའི་ཞབས་ལ༴ མཁས་པའི་ཡོན་ཏན་འདབ་རྒྱས་པདྨ་དཀར། །བཙུན་པའི་གེ་སར་བཟང་པོའི་དྲི་བསུང་ཅན། །བསྟན་འཛིན་ས་མོས་ཚལ་ན་ཆེས་མཐོ་བ། །ཐེག་མཆོག་རྡོ་རྗེའི་ཞབས་ལ༴ མཁྱེན་བརྩེ་ནུས་པའི་ཆུ་ཁུར་དཀྲིགས་པ་ལས། །མཁས་ཚུལ་གསུམ་གྱི་དབྱར་རྔ་ཆེར་སྒྲོགས་པས། །མཁས་གྲུབ་མདོངས་མཐའ་ཅན་རྣམས་དགའ་བྱེད་པ། །མཁའ་ཁྱབ་རྡོ་རྗེའི་ཞབས་ལ་གསོལ་བ་འདེབས། །དུས་གསུམ་རྒྱལ་བའི་ཡེ་ཤེས་ཀརྨ་པ། །ཚེ་རབས་ཕྲེང་བར་བདག་གི་བཤེས་གྱུར་ཏེ། །མོས་གུས་ཕྱག་རྒྱ་ཆེན་པོའི་གསང་ལམ་ནས། །དོན་གཉིས་ལྷུན་གྱིས་འགྲུབ་པའི་བྱིན་རླབས་སྩོལ། །ངེས་པར་འབྱུང་བའི་ཚུལ་ཁྲིམས་རྣམ་པར་དག །བྱང་ཆུབ་སེམས་འབྱོང་སྨོན་འཇུག་ལམ་མཐར་ཕྱིན། །དམ་ཚིག་རྣམ་དག་རིམ་གཉིས་ཟབ་ལམ་ལས། །སྐུ་བཞིའི་ཡེ་ཤེས་ཚེ་འདིར་མངོན་བྱེད་ཤོག །ཅེས་པའང་རྙིང་བཙུན་འདུ་གསུམ་པ་འགྱུར་མེད་པདྨ་རྣམ་རྒྱལ་དཔལ་བཟང་པོ་རེ་ཞིག་ལྗོངས་རྒྱུ་བར་ཆས་པའི་སྐབས། འཇིག་རྟེན་དབང་ཕྱུག་དཔལ་ཀརྨ་པ་ཆེན་པོའི་གསང་བ་གསུམ་གྱི་བྱིན་གྱིས་བརླབས་པའི་གནས་མདོ་ཁམས་ཀརྨ་དགོན་གྱི་ཉེ་ཞོལ་དུ་རྩེ་གཅིག་གུས་པའི་ཡིད་ཀྱིས་གསོལ་བ་བཏབ་པ་དེ་དེ་བཞིན་དུ་འགྲུབ་པའི་རྒྱུར་གྱུར་ཅིག ༈ གྲུབ་པ་མཐར་ཕྱིན་རོལ་རྩེད་ཀྱིས། །གང་འདུལ་འགྲོ་བའི་རེ་སྐོང་བ། །ཡིད་བཞིན་ནོར་བུ་ལྟ་བུའི་སྐུ། །སངས་རྒྱས་དབོན་པོ་ལ་ཕྱག་འཚལ། །ངེས་དོན་སེང་གེའི་སྒྲ་ཡིས་ནི། །ཐེག་དམན་རི་དྭགས་སྐྲག་མཛད་ཅིང་། །འགྲོ་ཚོགས་མ་རིག་གཉིད་ལས་སློང་། །སངས་རྒྱས་དབོན་པོ་ལ་ཕྱག་འཚལ། །ཟབ་ཅིང་རྒྱ་ཆེ་དྲི་མེད་པའི། །ཆོས་ཀྱི་དབྱིངས་ནི་རྟག་གཟིགས་ནས། །འགྲོ་ལ་བུ་ལྟར་རྗེས་བརྩེའི་ཐུགས། །སངས་རྒྱས་དབོན་པོ་ལ༴ བྲལ་དང་རྣམ་པར་སྨིན་པ་ཡི། །ཡོན་ཏན་རྒྱ་མཚོའི་གཏེར་མངའ་བས། །གྲགས་པ་འཛམ་གླིང་ཡོངས་ལ་ཁྱབ། །སངས་རྒྱས་དབོན་པོ་ལ༴ གང་གི་ཕྲིན་ལས་གདུགས་དཀར་གྱིས། །ས་འདི་ཡོངས་སུ་ཁེབས་པ་ལྟའི། །གྲིབ་བསིལ་བསྟན་འགྲོའི་ངལ་འཚོའི་སྨན། །སངས་རྒྱས་དབོན་པོ་ལ༴ གུ་རུའི་ཞལ་ཚབ་གཏེར་འབྱིན་གཙོ། །ཕག་གྲུའི་རྣམ་འཕྲུལ་སྒྲུབ་བརྒྱུད་དག །ངོ་མཚར་རྣམ་ཐར་དཔག་ཡས་པ། །སངས་རྒྱས་དབོན་པོ་ལ༴ འཕགས་པའི་རྣམ་ཐར་འཕགས་པ་ཡི། །སྤྱོད་ཡུལ་ཡིན་གྱི་སོ་སྐྱེས་མིན། །དེ་སླད་བདག་གིས་ཇི་ལྟར་དཔོག །སངས་རྒྱས་དབོན་པོ་ལ་ཕྱག་འཚལ། །འགྲོ་མགོན་སངས་རྒྱས་དབོན་པོ་ལ། །ཕྱག་འཚལ་བསྟོད་ཅིང་གསོལ་བཏབ་པས། །བདག་དང་མཐའ་ཡས་འགྲོ་བ་ཀུན། །སྐྱོབ་པ་ཁྱོད་འདྲ་ཉིད་གྱུར་ཅིག །ཅེས་པའང་གདན་ས་ཆེན་པོ་དཔལ་རི་བོ་ཆེར་སངས་རྒྱས་དབོན་གྱི་གཟིམས་མལ་འདྲ་ཞལ་མ་དང་རྩ་རིས་མ་གཉིས་ཀྱི་སྤྱན་སྔར་གང་ཤར་ཤུགས་འབྱུང་དུ་གསོལ་བ་འདེབས་པ་པོ་ནི་རྙིང་བན་པདྨ་རྣམ་རྒྱལ་ལོ།། ༈ ན་མོ་གུ་རུ། དཔལ་ལྡན་ཡོན་ཏན་བྱེ་བའི་སྤྲིན་ཆེན་ལས། །དགེ་ལེགས་ཕན་བདེའི་འདོད་དགུའི་གྲུ་ཆར་གྱིས། །འགྲོ་བློའི་རེ་སྐོང་རྒྱལ་བ་སྟག་ལུང་པ། །ཡབ་སྲས་བརྒྱུད་པའི་ཚོགས་ལ་ཕྱག་འཚལ་ལོ། །སྟོང་གསུམ་རི་རབ་གླིང་བཞི་ཉི་ཟླའི་ཚོགས། །ལྷ་མིའི་ལོངས་སྤྱོད་དཔལ་འབྱོར་མི་ཟད་རྒྱན། །བདག་ལུས་ཕུང་ཁམས་སྐྱེ་མཆེད་དགེ་རྩར་བཅས། །དཔལ་མགོན་བླ་མའི་ཚོགས་རྣམས་མཉེས་ཕྱིར་འབུལ། །ཐོག་མ་མེད་ནས་མ་རིག་དབང་གྱུར་པས། །སོ་ཐར་བྱང་སེམས་རིག་འཛིན་སྡོམ་པ་དང་། །འགལ་བའི་ཉེས་པ་མ་ལུས་འགྱོད་བཤགས་སྡོམ། །དག་ཚང་ཁྲུས་ཀྱི་དངོས་གྲུབ་དེང་འདིར་སྩོལ། །འཕགས་པ་རྣམས་ཀྱི་རྣམ་ཐར་བསམ་མི་ཁྱབ། །ཡེ་ཤེས་ཡངས་པའི་སྤྱོད་ཡུལ་ཟབ་མོ་ཡིས། །འཁོར་བ་དོང་སྤྲུག་འགྲོ་དོན་རླབས་པོ་ཆེར། །སྙིང་ནས་དགའ་བས་རྗེས་སུ་ཡི་རང་འབུལ། །རང་དོན་མངོན་རྫོགས་འཕགས་པ་མཆོག་རྣམས་ཀྱིས། །སྐལ་མེད་འགྲོ་རྣམས་ཡལ་བར་མི་འདོར་བར། །ཟབ་དང་རྒྱ་ཆེ་བླ་ན་མེད་པ་ཡི། །ཆོས་ཀྱི་འཁོར་ལོ་དམ་པ་བསྐོར་བར་བསྐུལ། །ཆོས་སྐུ་ལྷུན་གྲུབ་ཆེན་པོར་རྟག་བཞུགས་ཀྱང་། །འགྲོ་ཚོགས་བསོད་ནམས་རྗེས་འགྲོ་གཟུགས་ཀྱི་སྐུ། །ལོག་རྟོག་དབང་གིས་ནམ་ཡང་མི་སྒྲིབ་པར། །བསྐལ་པ་ཞིང་རྡུལ་གཡོ་མེད་རྟག་བཞུགས་གསོལ། །འདིས་མཚོན་དུས་གསུམ་བསགས་ཡོད་དགེ་ཚོགས་རྣམས། །འཁོར་གསུམ་དམིགས་པའི་དུག་གིས་ཡོངས་བཏང་ནས། །ཟག་མེད་ཆོས་དབྱིངས་ཆེན་པོར་སྔོ་བྱེད་ན། །འགྲོ་རྣམས་སྐུ་བཞིའི་ཡེ་ཤེས་མངོན་བྱེད་ཤོག །དེ་མ་ཐོབ་ཀྱི་ཚེ་རབས་ཐམས་ཅད་དུ། །དལ་འབྱོར་རྟེན་ཐོབ་དགེ་བའི་བཤེས་ཀྱིས་ཟིན། །བདེན་བཞིའི་ཚུལ་རྟོགས་འཇུག་ལྡོག་ལྷོད་མེད་ངོས། །ཐོས་བསམ་སྒོམ་པའི་ལང་ཚོ་རྒྱས་པར་ཤོག །ཁྱད་པར་ཐེག་པ་ཆེན་པོའི་ལམ་གྱི་སྲོག །རིན་ཆེན་བྱང་ཆུབ་སེམས་མཆོག་བསྐྱེད་བགྱིས་ནས། །སྟོང་ཉིད་སྙིང་རྗེའི་བློ་སྦྱོང་མཐར་ཕྱིན་ཏེ། །ཕ་རོལ་ཕྱིན་བཅུའི་ཡོན་ཏན་ཡོངས་རྫོགས་ཤོག །དབང་བཞིའི་རྒྱུད་སྨིན་དམ་ཚིག་རྣམ་པར་དག །བསྐྱེད་རླུང་ཐིག་རྫོགས་ཟབ་མོའི་རྣལ་འབྱོར་གྱིས། །ལུས་རྩ་རླུང་ཐིག་སེམས་ཀྱི་སྒྲིབ་དག་ནས། །སྐུ་བཞིའི་ཡེ་ཤེས་ཚེ་འདིར་མངོན་བྱེད་ཤོག །ཐུན་མིན་མོས་གུས་ཕྱག་རྒྱ་ཆེན་པོའི་སྲོག །མ་བཅོས་ཐ་མལ་ཤེས་པ་ཆོས་ཀྱི་སྐུ། །རང་བབ་གཉུག་མའི་ངང་དུ་ཀློད་མཁས་པས། །སྣང་སེམས་འཛིན་པ་གཞི་ལ་དག་གྱུར་ཅིག །མདོར་ན་འདི་ནས་བྱང་ཆུབ་མ་ཐོབ་བར། །འཁོར་ལོའི་མགོན་གྱིས་འབྲལ་མེད་རྗེས་བཟུང་ནས། །དད་དང་དམ་ཚིག་མོས་གུས་མཐར་ཕྱིན་ནས། །དཔལ་མགོན་བླ་མའི་གོ་འཕང་མྱུར་ཐོབ་ཤོག །ཅེས་པའང་འཕགས་མཆོག་སྤྲུལ་པའི་སྐུ་རིན་པོ་ཆེའི་ཡོངས་འཛིན་མཁས་བཙུན་བཟང་གསུམ་གྱིས་མངོན་པར་མཐོ་བ་གཏེར་སྲས་བླ་མ་དམ་པས་གསུང་བསྐུལ་གནང་ངོར་ཞེ་སྤྲུལ་མིང་འཛིན་འཇམ་དབྱངས་མཁས་གྲུབ་རྒྱ་མཚོའི་སྡེས་གདན་ས་ཆེན་པོ་དཔལ་རི་བོ་ཆེའི་ཆོས་གྲྭར་བྲིས་ཤིང་གསོལ་བ་བཏབ་པ་དེ་དེ་བཞིན་དུ་འགྲུབ་པའི་རྒྱུར་གྱུར་ཅིག ༈ རིགས་ལྡན་སྤྲུལ་པའི་རྣམ་རོལ་ཀུན་སྤངས་རྗེ། །དོལ་པོ་སངས་རྒྱས་ཏཱ་ར་ན་ཐ་སོགས། །རྟོན་པ་བཞི་ལྡན་ཀུན་མཁྱེན་ཇོ་ནང་པ། །ཡབ་སྲས་བརྒྱུད་པར་བཅས་ལ་གསོལ་བ་འདེབས། །ཟབ་གསལ་དབྱེར་མེད་གཞི་ཡི་གནས་ལུགས་རྟོགས། །སྦྱོར་བ་དྲུག་ལྡན་ལམ་མཆོག་མཐར་རུ་ཕྱིན། །ཨེ་ཝཾ་ཟུང་འཇུག་བདེ་བ་ཆེན་པོའི་སྐུ། །ཚེ་འདིར་མངོན་དུ་བྱེད་པར་བྱིན་གྱིས་རློབས། །ཞེས་པའང་པདྨ་བི་ཛས་གསོལ་བ་བཏབ་པའོ།།
༈ ཨེ་མ་ཧོ། ངོ་བོ་ཀ་དག་སྤྲོས་བྲལ་གཉུག་མའི་གཤིས། །རང་བཞིན་ལྷུན་གྲུབ་འོད་གསལ་འདུས་མ་བྱས། །རིག་རྩལ་མ་འགགས་གང་འདུལ་སྤྲུལ་པའི་སྐུ། །དུས་གསུམ་མཉམ་ཉིད་བླ་མར་གསོལ་བ་འདེབས། །ཉམས་སྣང་སེམས་ཀྱི་གོས་བྲལ་རིག་པའི་གཤིས། །ལྟ་སྒོམ་ཞེན་པའི་སྒྲོག་གིས་མ་བཅིང་པར། །ཡིན་ལུགས་ཅོག་བཞག་བཞི་ཡི་གསེང་ལམ་ནས། །ཀ་དག་ཁྲེགས་ཆོད་ཉམས་ལེན་མཐར་ཕྱིན་ཤོག །གནད་གསུམ་ཆོས་ཉིད་འཁོར་ལོའི་མན་ངག་གིས། །འོད་གསལ་སྣང་བཞིིའི་ཡེ་ཤེས་མཐར་ཕྱིན་ཏེ། །འཕོ་ཆེན་འཇའ་ལུས་རྡོ་རྗེའི་སྐུ་འགྲུབ་ནས། །འགྲོ་ཀུན་གདོད་མའི་རྒྱལ་ཐབས་ལ་འགོད་ཤོག །ཅེས་པའང་གྲུབ་ཆེན་ཤེས་རབ་ཡར་འཕེལ་གྱི་ཡང་སྤྲུལ་མཆོག་གི་བཞེད་སྐོང་དུ། སྔགས་བན་པདྨ་བི་ཛས་འཕྲལ་མར་བྲིས་པ་དགེ།