དེ་ལྟར་འདོད་པ་དེ་སྡིག་ལྟ་ཆེན་པོ་ཡིན་པར་བསྟན་པ་ནི།

གཉིས་པ་དེ་ལྟར་འདོད་པ་དེ་སྡིག་ལྟ་ཆེན་པོ་ཡིན་པར་བསྟན་པ་ནི། དེ་ལྟ་ཡིན་ན་དོན་དམ་ཆོས་སྐུ་དང༌། །ངོ་བོ་ཉིད་སྐུ་ལྷན་ཅིག་སྐྱེས་སྐུ་དང༌། །རྟག་བརྟན་ཐེར་ཟུག་གཡུང་དྲུང་མཁའ་ཁྱབ་ཀྱི། །སངས་རྒྱས་ཆོས་དང་དགེ་འདུན་ཐམས་ཅད་ལ། །སྐུར་བ་བཏབ་པའི་སྡིག་ལྟ་ཆེན་པོར་འགྱུར། །གང་ཕྱིར་དེ་རྣམས་རང་གིས་མི་སྟོང་པའི། །གཞན་སྟོང་ཟབ་མོ་ཡིན་པར་གསུངས་ཕྱིར་རོ། །རྩ་བར། དེ་ལྟ་ཡིན་ན་དོན་དམ་ཆོས་སྐུ་དང༌། །ཞེས་པ་ནས། གསུངས་ཕྱིར་རོ། །ཞེས་པའི་བར་ཤོ་ལོ་ཀ་གཅིག་དང་རྐང་བ་གསུམ་བྱུང༌། དེའི་ཚིག་དོན་ནི་འདོད་པ་དེ༵་ལྟ༵་ཡི༵ན་ན༵་དོ༵ན་ད༵མ་ཆོ༵ས་ཀྱི་སྐུ༵་ད༵ང༌། ངོ༵་བོ༵་ཉིད༵་སྐུ༵་དང༌། བདེ་སྟོང་ལྷ༵ན་ཅི༵ག་སྐྱེ༵ས་པའི་སྐུ༵་ད༵ང༌། རྟ༵ག་བརྟ༵ན་ཐེ༵ར་ཟུག༵་གཡུ༵ང་དྲུ༵ང་མཁ༵འ་ཁྱ༵བ་ཀྱི༵་དོན་དམ་པའི་སང༵ས་རྒྱ༵ས་དང་ཆོ༵ས་དཀོན་མཆོག་ད༵ང༌། ད༵གེ་འདུ༵ན་དཀོན་མཆོག་ཐམ༵ས་ཅ༵ད་ལ༵་མེད་པར་བསྐུ༵ར་བ༵་བཏ༵བ་པ༵འི་སྡི༵ག་ལྟ༵་ཆེ༵ན་པོ༵ར་འགྱུ༵ར་བའི་ཕྱིར། རྒྱུ་མཚན་ག༵ང་གི་ཕྱི༵ར་ཞེ་ན། དོན་དམ་པའི་ཆོས་སྐུ་སོགས་དེ༵་རྣམ༵ས་ར༵ང་གི༵ས་མི༵་སྟོ༵ང་བ༵འི་གཞ༵ན་སྟོ༵ང་ཟ༵བ་མོ༵་ཡི༵ན་པ༵ར་གསུང༵ས་བའི་ཕྱི༵ར་ཏེ། དཀོན་མཆོག་སྤྲིན་མདོ་ལས། རིགས་ཀྱི་བུ་གལ་ཏེ་དོན་དམ་པ་མེད་དུ་ཟིན་ན་ཚངས་པར་སྤྱོད་པ་དོན་མེད་པར་འགྱུར་རོ༵། །གང་གི་ཕྱིར་དོན་དམ་པ་ཡོད་པས་ན། དེའི་ཕྱིར་བྱང་ཆུབ་སེམས་དཔའ་རྣམས་དོན་དམ་ལ་མཁས་པ་ཞེས་བྱའོ། །ཞེས་དང༌། རྒྱུད་བླ་མ་ལས། རྣམ་དབྱེ་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེ་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དང༌། རྒྱུད་བླ་ཐོགས་འགྲེལ་ལས། །དེས་ན་དེ་བཞིན་གཤེགས་པའི་སྙིང་པོ་ནི། རྣམ་པར་དབྱེ་བ་ཡོད་པ། བྲལ་ཤེས་པ་ཉོན་མོངས་པའི་སྦུབས་ཐམས་ཅད་ཀྱིས་ནི་སྟོང་བ་ཡིན་ལ། རྣམ་པར་དབྱེ་བ་མེད་པ། བྲལ་མི་ཤེས་པ། བསམ་གྱི་མི་ཁྱབ་པའི་སངས་རྒྱས་ཀྱི་ཆོས་གང་གཱའི་ཀླུང་གི་བྱེ་མ་ལས་འདས་པ་ནི་མི་སྟོང་ངོ༌། །ཞེས་གསུངས་སོ། །དེ་ལྟར་ན་གང་ཞིག་གང་ན་མེད་པ་དེ་ནི་དེས་སྟོང་ངོ། །ཞེས་ཡང་དག་པར་རྗེས་སུ་མཐོང་ལ། གང་ཞིག་ལྷག་མར་གྱུར་བ་དེ་ནི་དེ་ལ་རྟག་པར་ཡོད་དོ། །ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །ཚིགས་སུ་བཅད་པ་འདི་གཉིས་ཀྱིས་ནི་སྒྲོ་འདོགས་པ་དང༌། སྐུར་བ་འདེབས་པའི་མཐའ་དང་བྲལ་བའི་ཕྱིར་ཕྱིན་ཅི་མ་ལོག་པ་སྟོང་བ་ཉིད་ཀྱི་མཚན་ཉིད་བསྟན་ཏོ། །ཞེས་གསུངས་པའི་ཕྱིར་རོ། །