གཏེར་སྲུང 
་རྨ་རྒྱལ་སྤོམ་རའི་བསང་ཡིག
གཏེར་སྲུང ་རྨ་རྒྱལ་སྤོམ་རའི་བསང་ཡིག་བཞུགས་སོ།། ཀྱཻ། གངས་དཀར་གཉན་གྱི་ཤེལ་བྲག་ཏུ། །གཉན་ཆེན་རྨ་རྒྱལ་སྤོམ་ར་ནི། །ཡ་མཚན་དུང་མི་དཀར་པོ་ཡི། །དུང་ཁྲབ་དཀར་པོ་སྐུ་ལ་གསོལ། །དབུ་ལ་དངུལ་དཀར་རྨོག་ཞུ་གསོལ། །ཉི་ཟླའི་ཕོད་རྒྱན་ཀྱི་ལི་ལི། །ཕྱག་གཡས་ཤེལ་གྱི་སྦ་ལྕག་བསྣམས། །གཡོན་པས་དར་མདུང་དཀར་པོ་བསྣམས། །སྟག་རལ་གཡས་ལ་གཟིག་ཤུབས་གཡོན། །དུང་རྟ་རི་ལོགས་ཙམ་ལ་ཆིབས། །རིན་ཆེན་རྟ་སྒ་ཝངས་སེ་ཝང་། །གསེར་སྲབ་གཡུ་མཐུར་སི་ལི་ལི། །རྨ་སྲས་དུང་མི་དཀར་པོ་དགུ། །སྤུ་རིས་ལྡན་པའི་རྟ་དགུ་ཆིབས། །དུང་རྨོག་ཤེལ་བེར་སྐུ་ལ་གསོལ། །སྟག་རས་གཟིག་ཤུབས་མདུང་དར་བསྣམས། །སྲིང་མོ་ལྕམ་དགུ་ཡུམ་དང་བཅས། །ཤ་རྐྱང་རྒོད་གཙོ་བྲན་དང་རོལ། །དར་གོས་རིན་ཆེན་སྣ་ལྔས་བརྒྱན། །སྦ་གླིང་མེ་ལོང་ཕྱག་ན་བསྣམས། །སྲིང་ལྕམ་བཞི་བཅུ་རྩ་ལྔ་དང་། །རྨ་རིགས་སུམ་བརྒྱ་དྲུག་ཅུ་མཆེད། །ཡང་འཁོར་སུམ་བརྒྱ་དྲུག་ཅུ་དང་། །ཕྱི་འཁོར་སུམ་བརྒྱ་དྲུག་ཅུ་དང་། །རྨ་སྨན་འབུམ་དང་བཅས་པ་ཡིས། །རྨ་གཉན་ལྕམ་དྲལ་འཁོར་བཅས་
རྣམས། །འདིར་གཤེགས་བསང་གི་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་བསང་། །རྨ་གཡང་ཟས་དང་བང་མཛོད་འབྲུ། །རྐང་བཞི་ནོར་དང་སྙན་གྲགས་སྟོབས། །རིགས་རྒྱུད་འཕེལ་དང་བཙན་དར་ཕྱུག །དཔུང་ཆེན་དངོས་གྲུབ་བདག་ལ་སྩོལ། །ཡག་ཁ་ཟུང་ལ་རྒྱལ་ཁ་བསྐྱེད། །པད་འབྱུང་བཀའ་ལས་མ་འདའ་བར།བདག་གི་ཅི་བསམ་ཐམས་ཅད་ནི། །དོན་རྣམས་མྱུར་འགྲུབ་ཕྲིན་ལས་མཛོད། །ཉམས་ཆག་ཐམས་ཅད་ཞི་བར་མཛོད། །ནད་གདོན་བར་ཆད་བསལ་དུ་གསོལ། །བཙའ་སད་སེར་གསུམ་ཞི་བར་མཛོད། །ནོར་ནད་གློ་གོར་ཧོན་གསུམ་ཟློག །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་འདི་ཡང་དོན་གཉེར་འགའ་ཡི་ངོར་རཱ་ག་ཨ་སྱས་བྲིས། མངྒ་ལཾ།།