བཞི་བ་སེམས་ཙམ་ལ་བདེན་གཉིས་ཀྱི་དབྱེ་བ་མ་ཤེས་པས་འགའ་ཞིག་འཁྲུལ་བར་བསྟན་པ།
བཞི་བ་སེམས་ཙམ་ལ་བདེན་གཉིས་ཀྱི་དབྱེ་བ་མ་ཤེས་པས་འགའ་ཞིག་འཁྲུལ་བར་བསྟན་པ་ནི།
ཡང་ལང་ཀར་གཤེགས་པའི་མདོར་ཡང༌། གནས་སྐབས་སུ་སེམས་ཙམ་སྟོན་མོད་ཀྱི། མཐར་དེ་ལས་ཡང་དག་པར་འདས་ནས་སྣང་མེད་དབུ་མ་དང༌། དེ་ལས་ཀྱང་འདས་ནས་སྣང་བཅས་དབུ་མ་སྟོན་ཅིང༌། དེ་ལ་མ་བསླེབས་ན་ཐེག་ཆེན་གྱི་དོན་ཟབ་མོ་མི་མཐོང་བར་གསུངས་ཏེ། ཇི་སྐད་དུ། སེམས་ཙམ་ལ་ནི་བརྟེན་ནས་སུ། །ཕྱི་རོལ་དོན་དུ་མི་བརྟག་གོ །ཀུན་རྫོབ་སྣང་བ་མེད་པ་ལ་བརྟེན་ནས། །སེམས་ཙམ་ལས་ནི་འདའ་བར་བྱ། །ཡང་དག་པའི་མཐའ་དམིགས་པ་ལ་བརྟེན་ནས། ། སྣང་བ་མེད་པ་ཙམ་ལས་འདའ་བར་བྱ། །རྣལ་འབྱོར་སྣང་བ་མེད་པ་ཙམ་ལ་གནས་ན། །ཐེག་པ་ཆེན་པོ་མི་མཐོང་ངོ༌། །ཞེས་པ་ལ་སོགས་པའོ། །དེ་བཞིན་དུ། གང་གི་ཚེ་ན་འདུས་བྱས་རྣམས་ཀྱི། །དམིགས་པ་ཡུལ་དང་དམིགས་པར་བྱེད་པ་ཡུལ་ཅན་དང་བྲལ་ཞིང༌། །ཀུན་རྫོབ་ཀྱི་སེམས་མེད་པའི་གཞི་དོན་དམ་གྱི་སེམས་ཙམ་མཐོང་བ་ལ། །སེམས་ཙམ་དུ་ནི་ངས་བཤད་དོ། །ཙམ་ནི་ངོ་བོ་ཉིད་ཀྱི་དབྱིངས།དང་འདུས་མ་བྱས་ཡིན་པས། རྐྱེན་དང་དངོས་པོ་སྤངས་པ་སྟེ། །མཐར་ཕྱིན་ངོ་བོ་ཉིད་ཀྱི་སྐུ་ཚངས་བའི་མཆོག །སྐུ་རྡོ་རྗེ་རྣམ་པར་སྣང་མཛད་མེ་ལོང་ཡེ་ཤེས་དེ་ལ་ངས་ནི་ཙམ་ཞེས་བཤད་ཅེས་འདུས་བྱས་ཀྱི་ཡུལ་དང་ཡུལ་ཅན་དང་རྐྱེན་དང་བྲལ་ཞིང་ཀུན་རྫོབ་ཀྱི་སེམས་མེད་པའི་གཞི། དོན་དམ་པའི་སེམས་ངོ་བོ་ཉིད་ཀྱི་དབྱིངས་དང་སྐུ་རྡོ་རྗེ་ཚངས་པའི་མཆོག་ལ་སེམས་ཙམ་དུ་གསུངས་པ་དང༌། དེ་བཞིན་དུ། ལྟ་བ་ངན་པ་ཐམས་ཅད་རྣམ་བཟློག་པ། ། བརྟག་པར་བྱ་དང་རྟོག་པ་སྤངས། །དམིགས་པ་མེད་ཅིང་སྐྱེ་མེད་ཆོས་ཉིད་འོད་གསལ་ལ། །སེམས་ཙམ་དུ་ནི་ངས་བཤད་དོ། །ཀུན་རྫོབ་ཀྱི་དངོས་མིན་དོན་དམ་གྱི་དངོས་པོ་སྟེ་ངོ་བོ་མེད་པ་ཡང་མིན། །དངོས་དང་དངོས་མེད་རྣམ་སྤངས་པའི། །དེ་བཞིན་ཉིད་ཕུང་བོ་གསུམ་པ་ནི་སེམས་བྲལ་བ། །དེ་ལ་སེམས་ཙམ་དུ་ནི་ངས་བཤད་དོ། །སྟོང་བའི་གཞི་དང་ཡང་དག་མཐའ་དང་དེ་བཞིན་ཉིད་དང་། །མྱ་ངན་འདས་དང་ཆོས་ཀྱི་དབྱིངས་དང་། །ཡིད་ཀུན་བཟང་ཀྱི་ལུས་ནི་སྣ་ཚོགས་པ། །སེམས་ཙམ་དུ་ནི་ངས་བཤད་དོ། །ཞེས་ཀུན་རྫོབ་ཀྱི་སེམས་དང་བྲལ་བའི་གཞི། དེ་བཞིན་ཉིད་དང་ཡང་དག་པའི་མཐའ་དང་རང་བཞིན་གྱིས་མྱ་ངན་ལས་འདས་པ་དང་ཆོས་ཀྱི་དབྱིངས་དང་ཡིད་ཀུན་ཏུ་བཟང་པོའི་ལུས་སྣ་ཚོགས་འོད་གསལ་ཞིང་ཡོད་མེད་ལ་སོགས་པ་མཐའ་ཐམས་ཅད་དང་བྲལ་བའི་གཞི་ལ་སེམས་ཙམ་དུ་གསུངས་ཤིང་ཡང་དེ་ཉིད་དུ། ཕྱི་རོལ་གྱི་ནི་སྣང་བ་མེད། །ལུས་དང་ལོངས་སྤྱོད་གནས་ལྟ་བུར། །དོན་དམ་གྱི་སེམས་ནི་སྣ་ཚོགས་པར་སྣང་བ། ། དེ་ལ་སེམས་ཙམ་དུ་ནི་ངས་བཤད་དོ། །ཞེས་ཕྱི་རོལ་གློ་བུར་དྲི་མའི་སྣང་བ་མེད་པའི་གཞི་བདེ་གཤེགས་སྙིང་པོ་ཆོས་ཀྱི་དབྱིངས་ཉིད་ལུས་དང་ལོངས་སྤྱོད་གནས་ལ་སོགས་པ་སྣ་ཚོགས་ཀྱི་རྣམ་པར་སྣང་བ་དོན་དམ་པའི་སེམས་ལ་སེམས་ཙམ་དུ་གསུངས་ཏེ། དེ་ལྟར་ཀུན་རྫོབ་ཀྱི་སེམས་ཙམ་ལས་འདས་པ་དོན་དམ་པའི་སེམས་ཙམ་ཡང་ཡང་གསུངས་པའི་དོན། སེམས་འགྲེལ་སྐོར་གསུམ་གྱི་མན་ངག་ཟབ་མོ་ལ་བརྟེན་ནས་ཁོང་དུ་ཆུད་པར་བྱའོ། །དེ་ལྟ་བས་ན་ལང་ཀར་གཤེགས་པ་ལ་སོགས་པ་རྣམས་སུ། དོན་དམ་པའི་སེམས་ཙམ་གསུངས་པ་ལས་འཁྲུལ་ནས། རྣམ་ཤེས་ལས་མ་འདས་པའི་སེམས་ཙམ་གྱི་རང་བཞུང་དུ་སྨྲ་བར་མི་བྱ་སྟེ། རྣམ་ཤེས་ལས་འདས་མ་འདས་ཁྱད་པར་ཤིན་ཏུ་ཆེ་བའི་ཕྱིར་རོ། །ཡང་གཞུང་དེ་དག་ཏུ་འཇིག་རྟེན་པའི་སེམས་ཙམ་གསུངས་པ་ནི་དེ་ཁོ་ན་ཉིད་ལ་འཇུག་པའི་སྒོ་དང་ཐབས་སུ་གྱུར་བ་ཡིན་གྱི། དེ་ལ་མཐར་ཐུག་ཏུ་བྱེད་པ་ནི་མ་ཡིན་ནོ། །དེ་ལ་འཇིག་རྟེན་པའི་སེམས་ཙམ་ནི་མདོ་དེ་ཉིད་དུ། །རྣམ་པར་རྟོག་པའི་བག་ཆགས་འབྲེལ། །སེམས་ལས་བྱུང་བ་སྣ་ཚོགས་པ། །མི་ལ་ཕྱི་རོལ་སྣང་བ་ནི། །འཇིག་རྟེན་པ་ཡི་སེམས་ཙམ་མོ། །ཞེས་གསུངས་ཏེ་རྟོག་གེ་བ་དག་ལ་གྲགས་པའི་སེམས་ཙམ་དང་གཅིག་གོ །དེས་ནི་མཐར་ཐུག་གི་སེམས་ཙམ་དུ་མི་རུང་སྟེ་མདོ་དེ་ཉིད་དུ། ཇི་སྲིད་སེམས་ནི་འཇུག་པའི་བར། །དེ་སྲིད་འཇིག་རྟེན་རྒྱང་འཕེན་པ་དང་འདྲ་བར་ཆོས་སྐུ་མ་ཐོབ་པ་ཡིན། །ཞེས་དང༌། གཟུང་དང་འཛིན་པའི་དངོས་པོར་ནི། །གལ་ཏེ་སེམས་ནི་འཇུག་འགྱུར་ན། །དེ་ནི་འཇིག་རྟེན་པ་ཡི་སེམས་ཡིན་པས། །དོན་དམ་གྱི་སེམས་ཙམ་དུ་ཡང་མི་རུང་ངོ༌། །ཞེས་དང༌། ནམ་མཁའ་ལ་ནི་སྤྲིན་བཞིན་དུ། །དེ་བཞིན་གློ་བུར་པའི་སེམས་ཀྱང་ཡེ་ཤེས་ལ་མི་སྣང་ངོ༌། །ཀུན་རྫོབ་ཀྱི་སེམས་ནི་ལས་ཀྱང་སྩོགས་པར་བྱེད། །ཡེ་ཤེས་ཀྱིས་ནི་རྣམ་པར་སེལ། །རྣམ་པར་མི་རྟོག་པའི་ཤེས་རབ་ཀྱིས་ནི་གློ་བུར་པའི་ཆོས་རྣམས་སྣང་མེད་དང༌། །མངོན་ཤེས་ལ་སོགས་པའི་མཐུ་ཡང་རབ་ཏུ་ཐོབ་པར་བྱེད། །ཅེས་པ་ལ་སོགས་པས་འཇིག་རྟེན་དང་འཇིག་རྟེན་ལས་འདས་པའི་སེམས་ཙམ་རྣམ་པ་གཉིས་ཀྱི་ཁྱད་པར་རྒྱ་ཆེར་གསུངས་པའི་ཕྱིར་རོ། །