དྲི་བ་བཅུ་བདུན་པ་ནི། ཀུན་རྫོབ་བདེན་པ་ཡིན་ན་འཁྲུལ་བ་དང་སྤང་བྱ་ཡིན་པས་ཁྱབ་མ་ཁྱབ་དང་དོན་དམ་བདེན་པའི་དགག་བྱ་གང་ཡིན་ཞེས་པའི་ལན།
དྲི་བ་བཅུ་བདུན་པ་ནི། ཀུན་རྫོབ་བདེན་པ་ཡིན་ན་འཁྲུལ་བ་དང་སྤང་བྱ་ཡིན་པས་ཁྱབ་མ་ཁྱབ་དང་དོན་དམ་བདེན་པའི་དགག་བྱ་གང་ཡིན་ཞེས་པའི་ལན།
ཀུན་རྫོབ་བདེན་པ་ཡིན་ན་འཁྲུལ་བ་དང་སྤང་བྱ་ཡིན་པས་ཁྱབ་མ་ཁྱབ་དང་དོན་དམ་བདེན་པའི་དགག་བྱ་གང་ཡིན་ཞེས་པའོ། །དེའི་ལན་ནི། ཀུན་རྫོབ་བདེན་པ་ཡིན་ན་འཁྲུལ་བ་ཡིན་པས་མ་ཁྱབ་པ་འདྲ་སྟེ། ཀུན་རྫོབ་གསར་བྱུང་གི་རྣམ་མཁྱེན་ནམ་མི་སློབ་ལམ་དེ་གདུལ་བྱ་ལ་སྣང་བ་འཁྲུལ་རྒྱུའི་དབང་གིས་ཡིན་ཡང་སྤྱིར་སྐལ་ཆེན་གྲངས་མེད་ཀྱི་ཚོགས་ལས་འཁྲུངས་པས་འཁྲུལ་བ་མ་ཡིན་ནམ་སྙམ།འོ་ན་མདོ་སྡེ་རྒྱན་ལས། ཤེས་བྱ་སྤང་བྱ་རང་བཞིན་དྲི་མེད་འདོད་གང་རྣམ་པར་སྦྱང་བྱ་སྟེ། །ཞེས་དང༌། ས་བཟང་གི་མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། ཀུན་བརྟགས་གཟུང་འཛིན་མེད་པ་ལ་མེད་པར་ཤེས་པར་བྱ་ཞིང༌། གཞན་དབང་ཀུན་ཏུ་རྟོག་པ་ཙམ་དེ་སྤང་བར་བྱས་ནས་ཡོངས་གྲུབ་ཆོས་ཀྱི་དབྱིངས་རང་བཞིན་གྱིས་རྣམ་པར་དག་ཅིང་དྲི་མ་མེད་པར་འདོད་པ་གང་ཡིན་པ་དེ་གློ་བུར་གྱི་དྲི་མ་ལས་རྣམ་པར་སྦྱང་བར་བྱ། །ཞེས་གཞན་དབང་སྤང་བྱར་གསུངས་པ་མ་ཡིན་ནམ་ཞེ་ན་མ་ཡིན་ཏེ།དེའི་དགོངས་པ་ནི་གློ་བུར་གྱི་དྲི་མ་ལ་དགོངས་པ་གསལ་ཏེ། ས་བཟང་གི་མདོ་སྡེ་རྒྱན་གྱི་རྣམ་བཤད་ལས། ཡོངས་གྲུབ་དེ་ནི་ནམ་མཁའ་སྤྲིན་དང་བྲལ་བ་དང་གསེར་ས་དང་བྲལ་བ་དང་ཆུ་རྙོག་པ་དང་བྲལ་བ་ལྟར། དབྱིངས་རང་བཞིན་གྱིས་རྣམ་པར་དག་པ་ཡིན་ཡང་སྤང་བྱ་གློ་བུར་གྱི་དྲི་མ་ཉོན་མོངས་པ་ལས་ཀྱང་རྣམ་པར་དག་པས་དག་པ་གཉིས་ལྡན་དུ་འགྱུར་བར་འདོད་པའོ། །ཞེས་གསུངས་སོ། །ལམ་བདེན་རྣམས་ལམ་བདེན་ཡིན་པས་ཆ་ནས་སྐབས་དུ་མར་ཐོབ་བྱར་གསུངས་པ་ལས་སྤང་བྱར་མ་གསུངས་ལ། ཀུན་རྫོབ་བདེན་པ་ཡིན་ན་སྤང་བྱ་ཡིན་པས་མ་ཁྱབ་སྙམ་སྟེ། སངས་རྒྱས་ས་ལ་སྤང་བྱ་མེད་ལ། ལམ་སོགས་གནས་འགྱུར་མཐར་ཐུག་ཐོབ་ནས་སངས་རྒྱས་ས་ལ་དེའི་རྒྱུན་ཡོད་པར་བཤད་པ་ཡིན་ཏེ། སྐུ་གསུམ་ལ་འཇུག་པའི་མདོ་ལས། ཀུན་གཞི་རྣམ་པར་ཤེས་པ་དབྱིངས་སུ་ནུབ་པ་ནི་མེ་ལོང་ལྟ་བུའི་ཡེ་ཤེས་སོ། །ཉོན་མོངས་ཅན་གྱི་ཡིད་དབྱིངས་སུ་ནུབ་པ་ནི་མཉམ་པ་ཉིད་ཀྱི་ཡེ་ཤེས་སོ། །ཡིད་ཀྱི་རྣམ་པར་ཤེས་པ་དབྱིངས་སུ་ནུབ་པ་ནི་སོ་སོར་རྟོགས་པའི་ ཡེ་ཤེས་སོ། །སྒོ་ལྔའི་རྣམ་པར་ཤེས་པ་དབྱིངས་སུ་ནུབ་པ་ནི་བྱ་བ་གྲུབ་པའི་ཡེ་ཤེས་སོ། །ཞེས་དང༌། ཐེག་མཆོག་དབུ་མའི་རབ་བྱེད་བརྒྱད་པའི་ཟིན་བྲིས་ལས། རྣམ་ཤེས་རྣམས་གནས་འགྱུར་ཚུལ་ནི། དཔེར་ན་ལྕགས་ཀྱི་དངོས་པོ་གསེར་འགྱུར་གྱི་རྩིས་རོ་བཅུད་ཀྱིས་བཙོས་པ་ན། དེའི་ཁ་དོག་ནག་པོ་སོགས་མི་མཛེས་པ་དང༌། གྱོང་ཞིང་སྲ་བའི་དངོས་པོ་ནི་ཉམས་ཤིང༌། ལྕགས་ཀྱི་དངོས་པོ་རྒྱུན་ནི་མ་ཉམས་ཏེ། དག་པའི་གསེར་ཁ་དོག་བཟང་ཞིང་རང་བཞིན་མཉེན་པར་འགྱུར་བ་བཞིནདུ། ལམ་བསྒོམས་སྟོབས་ཀྱིས་གློ་བུར་གྱི་དྲི་མར་གྱུར་པ་རྣམ་ཤེས་རང་རང་གི་མཚན་ཉིད་རྣམས་སྤངས་ཀྱང༌། རྣམ་ཤེས་དེ་དག་གི་རིགས་རྒྱུན་གྱི་ཆ་ནམ་དུའང་མི་ལྡོག་པར་སངས་རྒྱས་ཀྱི་ཡེ་ཤེས་སུ་གནས་གྱུར་པ་ཡིན་ཏེ། དཔེར་ན་ཀུན་གཞི་རྣམ་ཤེས་ཀྱི་མཚན་ཉིད་ས་བོན་ཐམས་ཅད་པ་དང༌། རྣམ་པ་མི་གསལ་བ་སོགས་སྤངས་ཏེ། ང་ཡིར་འཛིན་པ་མེད་པ་སོགས་ཡོན་ཏན་ལྔ་དང་ལྡན་པའི་མེ་ལོང་ལྟ་བུའི་ཡེ་ཤེས་སུ་གནས་གྱུར་པ་བཞིན་ཡིན་པའི་ཕྱིར་ཏེ། ཇི་སྐད་དུ། རྗེ་བཙུན་སྒྲོལ་བའི་མགོན་པོས། བསྟན་བཅོས་ཡིད་བཞིན་ནོར་བུ་སྙིང་པོ་ངེས་པ་ལས། དངོས་རྒྱུན་གཅིག་ལ་མཚན་ཉིད་ངན་པ་དོར། །བཟང་པོའི་གནས་སྐབས་འཛིན་པ་གནས་གྱུར་ཏེ། །སྲ་བའི་དངོས་པོ་གཅིག་ལ་ལྕགས་ཀྱི་མདོག ། སྤངས་ནས་གསེར་དུ་འགྱུར་བ་ལྟ་བུ་ཡིན། །ཞེས་གསུངས་པའི་ཕྱིར་རོ། །དེས་ན་དྲི་མ་མཐའ་དག་དང་བྲལ་ཏེ་སངས་རྒྱས་པ་ན་ལམ་སྒོམ་པ་པོའི་གང་ཟག་དང་དེའི་རྒྱུད་ཀྱི་རྣམ་པར་ཤེས་པ་རྣམས་གཏན་མེད་དུ་མི་འགྲོ་བར་དེ་དག་གི་རིགས་རྒྱུན་སངས་རྒྱས་ཀྱི་སྐྱེས་བུ་དང་ཡེ་ཤེས་སུ་གནས་གྱུར་པ་ཡིན་ཏེ། དེ་ཉིད་ལས། གང་ཟག་འཁྲུལ་པ་ཟད་ན་དེ་སངས་རྒྱས། །དེ་སྤངས་གང་ཟག་ཉིད་ཀྱང་སྤང་གྱུར་མོད། །སྔ་མའི་ཤུགས་ལས་གནས་འགྱུར་ཡེ་ཤེས་འབྱུང༌། །དེ་ནི་སངས་རྒྱས་སྐྱེས་བུ་རྗེས་སུ་བརྗོད། །ཅེས་གསུངས་པའི་ཕྱིར་རོ། །གང་ཟག་དང་རྣམ་ཤེས་རྣམས་གནས་གྱུར་པ་ན་དེ་ལ་སངས་རྒྱས་ཀྱི་སྐྱེས་བུ་དང་ཡེ་ཤེས་ཞེས་བརྗོད་ཀྱི། ཡིད་ཅན་གྱི་གང་ཟག་དང་རྣམ་ཤེས་ཞེས་མི་བརྗོད་ཏེ། དཔེར་ན་ལྕགས་ཀྱི་དངོས་པོ་གསེར་དུ་གྱུར་པ་ན་དེ་ལྕགས་མ་ཡིན་པ་བཞིན་ནོ། །གལ་ཏེ་ཀུན་རྫོབ་ཀྱི་ཆོས་རྣམས་སྤང་བྱར་བཤད་པས། གསར་ཐོབ་ཀྱི་སངས་རྒྱས་ཡོན་ཏན་རྣམས་སྤང་བྱར་འགྱུར་ཏེ། ཀུན་རྫོབ་ཡིན་པའི་ཕྱིར་རོ་སྙམ་ན། ཀུན་རྫོབ་ལ་སྤང་བྱར་བཤད་པའི་སྐབས་མང་དུ་ཡོད་ཀྱང༌། དེ་ནི་སྤྱིར་བཏང་ངམ་གཙོ་ཆེ་བ་ལ་དགོངས་ནས་དེ་ལྟར་གསུངས་པ་ཙམ་ཡིན་གྱི། དམིགས་བསལ་གསར་ཐོབ་ཀྱི་སངས་རྒྱས་ཡོན་ཏན་རྣམས་སྤང་བྱའམ་སྦྱང་བྱ་མ་ཡིན་ཏེ། བསྐལ་པར་ཚོགས་བསགས་པའི་ལམ་གྱིས་བསྐྱེད་འབྲས་དང་སྦྱངས་འབྲས་ཡིན་པའི་ཕྱིར་ཏེ། ཡན་ལག་དྲུག་པའི་ངོ་སྤྲོད་ནང་མ་ལས། ལམ་བསྒོམས་པས་གསར་དུ་ཐོབ་པའི་ལྡོག་ཆ་གློ་བུར་གྱི་དྲི་མ་སྤངས་པའི་ཆ་རྣམས་དང༌། གདུལ་བྱ་གཞན་སྣང་དུ་སྟོན་པ་རྣམས་དང༌། གཞན་སྣང་དུ་འཆར་དུ་རུང་བ་རྣམས་ནི་ཀུན་རྫོབ་དང་སྦྱངས་འབྲས་ཡིན་ཞིང༌། ཞེས་དང༌། བསྟན་བཅོས་ཡིད་བཞིན་ནོར་བུ་ལས། ཀུན་རྫོབ་སངས་རྒྱས་དུས་གསུམ་བྱུང་བ་རྣམས། །ལམ་བདེན་ཉིད་ཡིན། ཞེས་དང༌། ཟབ་དོན་ཉེར་གཅིག་ལས། སངས་རྒྱས་ཀྱི་ཡོན་ཏན་གྱི་རིགས་ཐམས་ཅད་ལ་ཆོས་སྐུའི་ཡོན་ཏན་དོན་དམ་པ་སངས་རྒྱས་རང་སྣང་རེ་དང༌། གཟུགས་སྐུའི་ཡོན་ཏན་ཀུན་རྫོབ་པ་གདུལ་བྱ་གཞན་སྣང་གི་ཆ་རེ་ཐམས་ཅད་དུ་ཡོད་པ་ཡིན་ལ། ཞེས་གསུངས་པའི་ཕྱིར་རོ། །འོན་ཀྱང་སྐབས་མང་བོར་གཞན་དབང་རྣམས་སྤང་བྱ་ཡིན་གསུངས་པ་དང༌། བདེན་གཉིས་གསལ་བའི་ཉི་མ་ལས། སངས་རྒྱས་ཆོས་ཅན། ཆོས་ཉིད་དོན་དམ་མི་སྣང་བར་ཐལ། ཆོས་ཅན་ཀུན་རྫོབ་སྣང་བའི་ཕྱིར། ཁྱབ་པ་ཡོད་དེ། ཆོས་ཉིད་རྣམ་འབྱེད་དུ། དེ་སྣང་ཆོས་ཉིད་མི་སྣང་ཞིང༌། །དེ་མི་སྣང་བས་ཆོས་ཉིད་སྣང༌། །ཞེས་དང༌། སངས་རྒྱས་ཆོས་ཅན། ལྷག་མཐོང་མཐར་ཐུག་མ་ཡིན་པར་ཐལ། ཀུན་རྫོབ་སྣང་བའི་ཕྱིར། ཁྱབ་པ་ཡོད་དེ། ཕལ་ཆེན་དུ། ལྷག་མཐོང་གིས་ནི་མཐོང་གྱུར་ན། །ཐམས་ཅད་མཐོང་བ་མེད་པ་ཡིན། །ཞེས་དང༌། རྣམ་མཁྱེན་ཆོས་ཅན།འཁྲུལ་བ་གཟིགས་པར་ཐལ། རྣམ་རྟོག་དང་མ་བྲལ་བར་ཐལ། མ་རིག་བག་ཆགས་མ་བཅོམ་པར་ཐལ། མ་དག་པའི་མུན་པ་སྣང་བར་ཐལ། ཀུན་རྫོབ་ཁམས་གསུམ་པ་སྣང་བའི་ཕྱིར། ཞེས་ཀུན་རྫོབ་གཟིགས་ན་འཁྲུལ་བ་གཟིགས་དགོས་པའི་རྒྱུ་མཚན་ཀུན་རྫོབ་ཡིན་ན་འཁྲུལ་བ་ཡིན་པས་མ་ཁྱབ་ན་དེའི་རྒྱུ་མཚན་དང༌། རྒྱུ་འབྲས་དབུ་མའི་ཐིག་ལེ་ལས།ཐོབ་བྱ་སངས་རྒྱས་གནས་ལུགས་ཡིན་ནམ་མིན། །མིན་ན་འཁྲུལ་བ་ཐོབ་པས་དགོས་པ་ཅི། །ཞེས་གསུངས་པའི་དགོངས་པ་ནི་ཀུན་རྫོབ་གསར་བྱུང་གི་རྣམ་མཁྱེན་སོགས་འཁྲུལ་བ་མིན་ཀྱང་དེ་སྣང་ན་འཁྲུལ་བ་སྣང་དགོས་པའི་རྒྱུ་མཚན་ནི། དེ་སྣང་ན་འཁྲུལ་བའི་སླད་པ་ཞུགས་པའི་དབང་གིས་སྣང་དགོས་པ་དང༌། དེ་དག་སྣང་ཚུལ་དང་གནས་ཚུལ་མི་མཐུན་པའི་ཆོས་ཡིན་པའི་དབང་གིས་ཡིན་སྙམ་ཀྱང་ཆོས་ཀྱི་སྤྱན་ལྡན་རྣམས་ཀྱིས་ལེགས་པར་དཔྱད་པར་བྱའོ། །ཡང་ཀུན་རྫོབ་ཀྱི་སངས་རྒྱས་སོགས་སངས་རྒྱས་མིན་པས་སྤང་བྱ་ཡིན་ནོ་ཞེ་ན། དེ་ནི་མི་འཐད་དེ། ཀུན་རྫོབ་ཀྱི་སངས་རྒྱས་སངས་རྒྱས་མིན་པར་སངས་རྒྱས་ལ་དོན་དམ་གྱི་སངས་རྒྱས་ཀྱིས་ཁྱབ་ཟེར་བ་ནི་དོན་དམ་གྱི་ཕྱོགས་སུ་ལྷུང་བ་དང༌།དོན་དམ་གྱི་སངས་རྒྱས་སངས་རྒྱས་མིན་ཟེར་བ་ནི་ཀུན་རྫོབ་ཀྱི་ཕྱོགས་སུ་ལྷུང་བ་ཡིན་ཏེ།ས་བཟང་གི་དངོས་སློབ་འཇམ་དཔལ་གྲགས་པའི་བཀའ་བསྡུ་ལྔ་བ་མཐའ་བྲལ་དབུ་མ་ཆེན་པོའི་གྲུབ་མཐའ་རབ་གསལ་ལས། ཁ་ཅིག་མཆོག་གསུམ་ཀུན་རྫོབ་བདེན་པ་ཡིན། །སངས་རྒྱས་རྟག་བརྟན་བྱ་བ་མི་སྲིད་པས། །དོན་དམ་ཆོས་སྐུའང་སངས་རྒྱས་མ་ཡིན་ཟེར། །དེ་བཞིན་འགོག་བདེན་ཆོས་ཀྱང་ཆོས་མ་ཡིན། །དོན་དམ་དགེ་འདུན་དགེ་འདུན་མིན་ནོ་ལོ། །དོན་དམ་དཀོན་མཆོག་གསུམ་ལ་སྐུར་བ་འདེབས། །འདི་ཡང་ཀུན་རྫོབ་ཁོ་ནའི་ཕྱོགས་སུ་ལྷུང༌། །ཕྱོགས་རེའི་མཐའ་ལ་ཞེན་ནས་ཕན་ཚུན་འགོག ། ཁ་ཅིག་མཆོག་གསུམ་དོན་དམ་བདེན་པ་ཡིན། །སྐྱེ་འཇིག་ཅན་གྱི་སངས་རྒྱས་གོ་མི་ཆོད། །དེ་ཕྱིར་ཀུན་རྫོབ་གཟུགས་སྐུ་སངས་རྒྱས་མིན། །དེ་བཞིན་ལམ་གྱི་ཆོས་ཀྱང་ཆོས་མ་ཡིན། །ཀུན་རྫོབ་དགེ་འདུན་དགེ་འདུན་མིན་ཞེས་སྨྲས། །ཀུན་རྫོབ་དཀོན་མཆོག་གསུམ་ལ་སྐུར་བ་འདེབས། །འདི་ཡང་དོན་དམ་ཁོ་ནའི་ཕྱོགས་སུ་ལྷུང༌། །ཕྱོགས་རེའི་མཐའ་ལ་ཞེན་ནས་ཕན་ཚུན་འགོག ། ཐམས་ཅད་དྲིལ་ནས་མཆོག་གསུམ་ཡུལ་ནས་ཕུད། །ཞེས་པ་ནས། སངས་རྒྱས་ལ་ཡང་བདེན་གཉིས་ཟུང་དུ་འཇུག ། དམ་ཆོས་ལ་ཡང་བདེན་གཉིས་ཟུང་དུ་འཇུག ། དགེ་འདུན་ལ་ཡང་བདེན་གཉིས་ཟུང་དུ་འཇུག ། མཐའ་བྲལ་དབུ་མ་ཆེན་པོའི་གྲུབ་མཐའ་ཡིན། །མདོ་རྒྱུད་བསྟན་བཅོས་མན་ངག་སྙིང་པོ་ཡིན། །ཞེས་གསུངས་སོ། །ཁ་ཅིག་གིས་ཀུན་རྫོབ་ཀྱི་ཆོས་ཡིན་ན་འཁྲུལ་བ་ཡིན་པས་ཁྱབ་པ་ཡོད་པར་འདོད་ན་སངས་རྒྱས་ཀྱི་ས་ལ་འཁྲུལ་བ་ཡོད་པར་ཐལ་བའོ། །དྲི་བའི་ཟུར་གཉིས་པའི་ལན་ནི། ཀུན་རྫོབ་ཀྱི་ཆོས་རྣམས་གཤིས་ལ་གྲུབ་པ་ནི། དོན་དམ་བདེན་པའི་དགག་བྱའོ། །ཀུན་བརྟགས་དང་གཞན་དབང་གཉིས་དེར་འཇོག་པ་འདྲ་སྟེ། དེ་གཉིས་ཀྱིས་སྟོང་བའི་གཞི་ཡོངས་གྲུབ་ཡིན་པའི་ཕྱིར་རོ།། །།