གཉིས་པ་གཞུང་དོན།
གཉིས་པ་གཞུང་དོན་ལ།
མ་གུས་པ་སྤང་བར་བསྟན་པ། གུས་པས་ཇི་ལྟར་གྲུབ་པ་དང་གཉིས། དང་པོ་ལ། བརྙས་པ་དང་སྨོད་པ་སྤང་བ། ཐུགས་དཀྲུག་པ་སྤང་བ། མ་མཐོང་བའི་ཉེས་དམིགས་བཤད་པ། དེ་དག་གི་དོན་བསྡུ་བ་དང་བཞི། དང་པོ་ལ་སྤྱིར་བསྟན་པ་དང་བྱེ་བྲག་ཏུ་བཤད་པ་གཉིས། དང་པོ་ནི། དེ་འདྲའི་མགོན་ལ་བསམས་བྱས་ནས། །སློབ་མར་གྱུར་ནས་བརྙས་ན་ནི། །སངས་རྒྱས་ཐམས་ཅད་བརྙས་བས་ན། །དེས་ནི་རྟག་ཏུ་སྡུག་བསྔལ་འཐོབ། །ཅེས་སྔར་བཤད་པའི་མཚན་ཉིད་རྣམས་དང་ལྡན་པ་དེ༷་འདྲ༷འི་བླ་མ་ལ་དབང་བསྐུར་སོགས་ཐོབ་ནས་རང་གི་མགོ༷ན་དུ་གྱུར་པ་ལ༷་ཆེད་དུ་བས༷མ་བཞིན་དུ་མ་དད་པར་བྱ༷ས་ན༷ས། སྔར་རང་ཉིད་བླ་མ་དེའི་སློ༷བ་མ༷ར་གྱུ༷ར་ཟིན་ན༷ས་ཚུལ་ཁྲིམས་དང་མི་ལྡན་པའམ། སྦྱངས་པ་མི་ཤེས་པའམ། ཕྲལ་གྱི་བྱ་བ་རྣམས་ལ་སྐྱོན་བཙལ་ཏེ་བརྙ༷ས་པ་བྱས་ན༷་ནི༷་ཕྱོགས་བཅུའི་ས༷ངས་རྒྱ༷ས་ཐ༷མས་ཅ༷ད་ལ་དེ་བཞིན་དུ་བརྙ༷ས་པ་བྱས་པར་འགྱུར་པ༷ས་ན༷། བྱེད་མཁན་གྱི་སློབ་མ་དེ༷ས་ནི༷་དུས་དེ་ནས་བཟུང་སྟེ་སྡིག་པ་མ་བྱང་གི་བར་རྟ༷ག་ཏུ༷་རྒྱུན་མི་ཆད་པར་སྡུ༷ག་བསྔ༷ལ་ཆེ་ཞིང་མང་བ་ཐོ༷བ་ཅིང་མྱོང་བར་འགྱུར་བ་ཡིན་ནོ། །