གསུམ་པ་སྒྲུབ་བྱེད་ལུང་དང་སྦྱར་བ།

གསུམ་པ་སྒྲུབ་བྱེད་ལུང་དང་སྦྱར་བ་ནི།

ཕུལ་ལམ་ཞེས་སྐྱེ་བའི་ཚེ་ཕུལ་ན་མི་སྐྱེ་བའི་ཁུངས་ནི་ལུང་སིལ་བུ་ལས་བསྙེན་པར་རྫོགས་ཟིན་པ་ཉིད་ཀྱང་བསླབ་པ་ཕུལ་བ་བསྙེན་པར་མ་རྫོགས་པ་ཞེས་བྱ་ན། བསྙེན་པར་རྫོགས་པར་བྱེད་པའི་ཚེ་ལྟ་ཅི་སྨོས། ཞེས་དང༌། ལུང་སིལ་བུ་ལས། བསྙེན་པར་རྫོགས་ཟིན་ཀྱང་ཁྱིམ་པར་ཁས་བླངས་ན། དེ་ཡང་བསྙེན་པར་མ་རྫོགས་པ་ཞེས་བྱ་ན། བསྙེན་པར་རྫོགས་པར་བྱེད་པའི་ཚེ་ན་ལྟ་སྨོས་ཀྱང་ཅི་དགོས། ཞེས་གསུངས་སོ། །བར་ཆད་བཤད་ཟིན་ཏོ། །

གཉིས་པ་རབ་བྱུང་གི་སྡོམ་པའི་ཆོ་ག་དངོས་བཤད་པ་ལ་ལྔ་ལས། དང་པོ་བར་མ་རབ་བྱུང་གི་སྡོམ་པའི་ཆོ་ག་བཤད་པ་ལ་ལྔ་ལས། དང་པོ་མཁན་པོར་གསོལ་བ་གདབ་པ་ནི།

རྩ་བར། མཁན་པོར་གསོལ་ཞེས་པ་འདིའི་དོན་ལ་ལྔ་ལས་དང་པོ་མཁན་པོར་གསོལ་བའི་དགོས་པ་ནི། མཁན་པོར་འགྱུར་བའོ། །གཉིས་པ་ཡུལ་གང་ལ་གསོལ་བ་གདབ་པ་ནི། མཁན་པོར་འོས་ཤིང་རང་གི་བསླབ་ཚིགས་དེ་ཉིད་ཀྱི་མཁན་པོར་གྱུར་ཟིན་པ་དང་མ་འབྲེལ་བ་ལའོ། །གསུམ་པ་རྟེན་གང་གིས་གསོལ་བ་གདབ་པ་ནི། རབ་ཏུ་འབྱུང་བར་འདོད་པའམ། བསྙེན་རྫོགས་ལེན་པར་འདོད་པས་སོ། །བཞི་པ་རྣམ་པ་ཅི་ཞིག་ཏུ་གསོལ་བ་གདབ་པ་ནི། མཁན་པོ་ཉིད་དུ་སྟེ། དེ་ཡང་སཾ་སྐྲྀ་ཏའི་སྐད་དུ་ཨུ་པ་དྷྱ་ཞེས་པ་སྐད་ཀྱི་བྱིངས་ཡིན་ཏེ། དེ་ནི་མཁན་པོ་ཙམ་པོ་ལ་འཇུག་གོ །ཨུ་པ་དྷ་ཞེས་པ་དེ་ལ་སྒྲའི་རྐྱེན་བྱིན་པས། ཨུ་པ་དྷ་ཨུ་པ་ཡ་ཧ་སྟེ། ཨུ་པ་དེ་ཤ་ཏི་ཞེས་གོ་རིམ་བཞིན་དུ་ཉེ་བར་འཛིན། ཉེ་བར་སྦྱོར། ཉེ་བར་ལུང་འབོགས་པའི་དོན་གྱིས་ན་མཁན་པོ་ཞེས་བྱའོ། །ལྔ་པ་ཆོ་ག་གང་གིས་གསོལ་བ་གདབ་པ་ནི། སྦྱོར་དངོས་མཇུག་གསུམ་སྡོམ་ཆོག་ལྟར་རོ། །