རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཕྱེས་ནས་བསྟན་པ་ལ་རྟེན་འབྲེལ་དབུ་མ་འདོད་པ་དང་དབུ་མ་རྟེན་འབྲེལ་འདོད་པ་ལ་འདུས་བྱས་རྣམས་དབུ་མར་ཐལ་བའི་སྐྱོན་བརྗོད་པ།

བཞི་བ་རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཕྱེས་ནས་བསྟན་པ་ལ་རྟེན་འབྲེལ་དབུ་མ་འདོད་པ་དང་དབུ་མ་རྟེན་འབྲེལ་འདོད་པ་ལ་འདུས་བྱས་རྣམས་དབུ་མར་ཐལ་བའི་སྐྱོན་བརྗོད་པ་དང༌། རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཤེས་དགོས་པར་བསྟན་པ། རྟེན་འབྲེལ་རྟོགས་པ་དབུ་མར་འཇུག་པའི་ལམ་ཡིན་པར་བསྟན་པ། དོན་དམ་རྟེན་འབྲེལ་དེ་ཀུན་རྫོབ་རྟེན་འབྲེལ་རྣམས་གདོད་ནས་འགག་པའི་གཞི་བདེན་དོན་བཅུ་གཉིས་སོགས་ཡིན་པར་བསྟན་པ། དོན་དམ་རྟེན་འབྲེལ་དེ་སེམས་ཙམ་ལས་འདས་པས་དེ་སྟོན་ཞིང་འདོད་པ་རྣམས་སེམས་ཙམ་ལས་འདས་པར་བསྟན་པ་དང་ལྔ། དང་པོ་ནི། གསུམ་ལྡན་མར་བཅད་མཁས་པ་ཕལ་ན་རེ། །ཀུན་རྫོབ་རྟེན་འབྲེལ་དབུ་མ་ཆེན་པོ་སྟེ། །དབུ་མ་གང་ཡིན་རྟེན་འབྲེལ་ཡིན་ནོ་ལོ། །དེ་ལྟ་ཡིན་ན་འདུས་བྱས་མི་རྟག་པའང༌། །རྟེན་འབྲེལ་ཡིན་པས་དབུ་མ་ཡིན་པར་འགྱུར། །འདོད་ན་དོན་དམ་ཆོས་དབྱིངས་ཡིན་པར་འགྱུར། །དེ་ཡང་འདོད་ན་འདུས་མ་བྱས་སུ་འགྱུར། །འདོད་ན་ཆོས་ཅན་དང་ཡང་འགལ་བར་འགྱུར། །རྩ་བར། གསུམ་ལྡན་མར་བཅད་མཁས་པ་ཕ༵ལ་ཆེར་ན་རེ། །ཞེས་པ་ནས། འགལ་བར་འགྱུར། ཞེས་པའི་བར་ཤོ་ལོ་ཀ་གཉིས་བྱུང༌། དེ་ལ་ཚིག་དོན་དང་མཐའ་དཔྱད་གཉིས། དང་པོ་ནི། གསུ༵མ་ལྡ༵ན་མ༵ར་བཅ༵ད་མཁ༵ས་པ༵་ཕ༵ལ་ཆེར་ན༵་རེ༵། ཀུ༵ན་རྫོ༵བ་ཀྱི་རྟེན༵་འབྲེ༵ལ་གང་ཡིན་པ་དབུ༵་མ༵་ཆེན༵་པོ༵་ཡིན་པ་སྟེ༵། ད༵བུ་མ༵་ག༵ང་ཡི༵ན་པ་ཡང་རྟེ༵ན་འབྲེ༵ལ་ཡི༵ན་པས་དེ་གཉིས་ཁྱབ་མཉམ་ངོ་བོ་གཅིག་པ་ཡིན་ནོ༵་ཟེར། ལོ༵་ཞེས་པ་ཕ་རོལ་བོའི་འདོད་པ་ལ་མ་རངས་པའོ། །དེ་ཡན་ཆད་དུ་གཞན་ལུགས་བརྗོད་ནས་དེ་དགག་པ་ལ་དེ༵་ལྟ༵ར་ཡི༵ན་ན་འདུ༵ས་བྱ༵ས་མི༵་རྟག༷་པ༷འ༵ང་རྟེ༵ན་འབྲེ༵ལ་ཡི༵ན་པ༵ས་དབུ༵་མ༵་ཡི༵ན་པ༵ར་འགྱུ༵ར་ལ། དེ་ཡང་འདོ༵ད་ན༵་འདུས་བྱས་དེ་དོ༵ན་ད༵མ་ཆོ༵ས་དབྱི༵ངས་ཡི༵ན་པ༵ར་འགྱུ༵ར་བ་ཡིན་ཏེ། དབུ་མ་ཡིན་པར་འདོད་པའི་ཕྱིར། དེ༵་ཡ༵ང་འདོ༵ད་ན༵་འདུས་བྱས་དག་འདུ༵ས་མ༵་བྱ༵ས་སུ༵་འགྱུ༵ར་བར་ཐལ། དོན་དམ་ཆོས་དབྱིངས་ཡིན་པའི་ཕྱིར། འདུས་མ་བྱས་ཡིན་པར་འདོ༵ད་ན༵། ཆོས༵་ཅ༵ན་འདུས་བྱས་མི་རྟག་པ་བཟུང་བ་ད༵ང་ཡང༵་དངོས་སུ་འག༵ལ་བ༵ར་འགྱུ༵ར་ཞེས་དེ་དག་སུན་བྱུང་བ་ཡིན་ནོ། །གཉིས་པ་རྟེན་འབྲེལ་ལ་མཐའ་ཅུང་ཟད་དཔྱད་ན། ཁ་ཅིག་དབུ་མ་དང་རྟེན་འབྲེལ་ཡིན་ཁྱབ་མཉམ་ཡིན་ཟེར་བ་དང༌། ཡང་ཁ་ཅིག་གཞི་གྲུབ་ན་རྟེན་འབྲེལ་ཡིན་པས་ཁྱབ་ཟེར་བ་གཉིས་ཀའང་མི་རིགས་ཏེ། འདི་ཉིད་ཀྱི་འགྲེལ་བ་ཕྱོགས་མེད་རིས་མེད་ལས། འདུས་མ་བྱས་ཡིན་པའི་ཡོངས་གྲུབ་བཅུ་གཉིས་ཀྱང་རྟེན་འབྲེལ་ཡིན་པར་འགྱུར་ཏེ་དབུ་མ་ཡིན་པའི་ཕྱིར། འདོད་ན་འདུས་བྱས་མི་རྟག་པ་ཡིན་པར་འགྱུར་ཏེ་རྟེན་འབྲེལ་འདི་ཡིན་པའི་ཕྱིར་རོ། །དེ་ཡང་འདོད་ན་བརྫུན་པ་བསླུ་བའི་ཆོས་སུ་ཡང་འགྱུར་ཏེ། དབུ་མ་རྩ་ཤེར། བཅོམ་ལྡན་འདས་ཀྱི་ཆོས་གང་ཞིག། བསླུ་བ་དེ་ནི་བརྫུན་ཞེས་གསུངས། །འདུས་བྱས་ཐམས་ཅད་བསླུ་བའི་ཆོས། །དེས་ན་དེ་དག་རྫུན་པ་ཡིན། །ཞེས་དང༌། ཆོས་ཀྱི་ཤན་འབྱེད་ལས། ཁྱོད་ཀྱི་ལུགས་ཀྱི་དོན་དམ་པའི་བདེན་པ་རྟེན་འབྲེལ་ལས་མ་འདས་ན་རྟེན་འབྲེལ་དུ་འདོད་དགོས་ཤིང་འདུས་བྱས་སུ་འདོད་དགོས་པ་དང༌། མི་རྟག་པ་དང་བརྫུན་པ་བསླུ་བ་ལ་སོགས་པར་ཡང་འདོད་དགོས་ལ་དེ་ཡང་རིགས་པ་མ་ཡིན། ཞེས་དང༌། ཡང་དེ་ཉིད་ལས། དེས་ན་རྟེན་འབྲེལ་གང་ཡིན་སྟོང་ཉིད་ཡིན་པ་ལྟར་སྟོང་ཉིད་གང་ཡིན་རྟེན་འབྲེལ་དུ་བཞེད་པ་འདི་ཡང༌། བོད་ཀྱི་སློབ་དཔོན་འགའ་ཞིག་དང་མཐུན་གྱི་སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱི་དགོངས་པ་དང་ནི་ཤིན་ཏུ་མི་མཐུན་ནོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ནི་རྟེན་འབྲེལ་གང་ཡིན་སྟོང་ཉིད་དུ་གསུངས་ཀྱི་སྟོང་ཉིད་གང་ཡིན་རྟེན་འབྲེལ་དུ་གསུངས་པ་ནི་མེད་དོ། །ཞེས་གསུངས་པ་དང༌། འདི་ཉིད་ཀྱི་འགྲེལ་བ་ལས། གཞན་ཡང་རྟེན་འབྲེལ་དང་སྟོང་ཉིད་ངོ་བོ་གཅིག་ཏུ་འདོད་པ་ལ་སོགས་པ་ལྟ་བ་ངན་པ་གཟིང་གཟིང་པ་ནང་འགལ་གྱི་ཚོགས་འདུས་པ་འདི་རྣམས་ཐམས་ཅད་ལ་ཡང་རྫོགས་ལྡན་གྱི་ལུང་རིགས་ཡང་དག་ཐེ་ཚོམ་གྱི་དྲ་བ་ཐམས་ཅད་གཅོད་པར་བྱེད་པ་ཁྱད་པར་འཕགས་པ་རྣམས་བསྟན་པར་བྱའོ། །ཞེས་གསུངས་པའི་ཕྱིར། ཡང་ཁ་ཅིག་གཞན་སྟོང་རང་ལུགས་ལ་གཞི་གྲུབ་ན་རྟེན་འབྲེལ་ཡིན་པས་ཁྱབ་ཟེར་ན། འོ་ན་དོན་དམ་བདེན་པ་ཆོས་ཅན། རྟེན་འབྲེལ་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། འདོད་མི་ནུས་ཏེ། རི་ཆོས་ངེས་དོན་རྒྱ་མཚོ་ལས། སྟོང་ཉིད་གང་ཡིན་ཐམས་ཅད་རྟེན་འབྲེལ་དུ་འདོད་པ་ནི་འཁྲུལ་ཏེ། དོན་དམ་སྟོང་ཉིད་རྟེན་འབྲེལ་ལས་འདས་ཀྱང་ཤིན་ཏུ་མཐར་ཐུག་པའི་སྟོང་ཉིད་ཟབ་མོ་ཡིན་པའི་ཕྱིར་རོ། །ཞེས་གསུངས་པའི་ཕྱིར་རོ། །གཞན་ཡང་རྟེན་འབྲེལ་དེ་བདེན་གཉིས་ཀྱི་དབྱེ་གཞི་ཡིན་པར་ཐལ། གཞི་གྲུབ་ན་རྟེན་འབྲེལ་ཡིན་པས་ཁྱབ་པའི་ཕྱིར། འདོད་ན། དེ་མི་འཐད་པར་ཐལ། བདེན་གཉིས་གསལ་བའི་ཉི་མ་ལས། ཁ་ཅིག་རྟེན་འབྲེལ་དབྱེ་གཞིར་བྱེད་པ་མི་རིགས་ཏེ། དོན་དམ་རྟེན་འབྲེལ་ལས་འདས་པའི་ཕྱིར། ཞེས་གསུངས་པའི་ཕྱིར་རོ། །གཞན་ཡང་དོན་དམ་པའི་རང་བཞིན་ནི་གང་ལ་ཡང་མི་ལྟོས་པས་རྟེན་འབྲེལ་ལས་འདས་པ་ཡིན་ཏེ། ཐེག་མཆོག་དབུ་མ་ལས། དོན་དམ་ལ་ནི་རྟེན་འབྲེལ་ནམ་ཡང་མེད། །ཅེས་དང༌། དོན་དམ་རྟེན་འབྲེལ་དེ་ནི་རྟེན་འབྱུང་མིན། །གང་ལས་ཀྱང་ནི་མ་བྱུང་མ་ལྟོས་ལ། །མི་འགྱུར་སྤྲོས་བྲལ་རྟག་པ་ཡིན་ཕྱིར་རོ། །ཞེས་དང༌། རི་ཆོས་ངེས་དོན་རྒྱ་མཚོ་ལས། རང་བཞིན་ནི་རྒྱུ་རྐྱེན་ལས་མ་བྱུང་ཞིང༌། མ་བཅོས་ལ་གཞན་གང་ལ་ཡང་མི་ལྟོས་པར་གསུངས་ཏེ། འཕགས་པ་ཀླུ་སྒྲུབ་ཞབས་ཀྱི་ཞལ་སྔ་ནས། རང་བཞིན་རྒྱུ་དང་རྐྱེན་ལས་ནི། །འབྱུང་བར་རིགས་པ་མ་ཡིན་ནོ། །རྒྱུ་དང་རྐྱེན་ལས་བྱུང་བ་ཡི། །རང་བཞིན་བྱས་པ་ཅན་དུ་འགྱུར། །རང་བཞིན་བྱས་པ་ཅན་ཞེས་བྱར། །ཇི་ལྟ་བུར་ན་རུང་བར་འགྱུར། །རང་བཞིན་དག་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་གསུངས་པའི་ཕྱིར། རང་བཞིན་ཞེས་པ་ནི་ཆོས་ཉིད་ལ་གོ་དགོས་ཏེ། རང་བཞིན་གྱི་སྐད་དོད། སྭ་བྷ་ཝཏཱ་ངོ་བོ་ཉིད་དང་རང་བཞིན་གཉིས་ཀར་འཇུག་པ་ཡིན་ནོ། །ཡང་རྩ་ཤེས་ལས་གསུངས་པ་ལྟར། ཆོས་རྣམས་ཀྱི་རང་བཞིན་ནམ་ཆོས་ཉིད་ནི། གཞན་ལ་ལྟོས་པ་མེད་པ་ཡིན་ཏེ། བུདྡྷ་པཱ་ལི་ཏ་ལས། ངོ་བོ་ཉིདནི་བཅོས་མིན་ཡང༌། །གཞན་ལ་ལྟོས་པ་མེད་པ་ཡི། །གང་བྱ་བས་བསྒྲུབ་པར་མི་འགྱུར་བ་དང༌། རྒྱུ་དང་རྐྱེན་ལ་ཡང་ལྟོས་པར་མི་འགྱུར་བ་དང༌། ཞེས་སོགས་དང། ཚིག་གསལ་ལས། གང་གི་ཕྱིར་དེ་ལྟར་བཅོས་མ་དང༌། གཞན་ལ་ལྟོས་པ་ནི། རང་བཞིན་ཉིད་དུ་མི་འདོད་པ་དེ་ཉིད་ཀྱི་ཕྱིར་ཚ་བ་ཉིད་མེ་ཡི་རང་བཞིན་ཡིན་ནོ། །ཞེས་བྱ་བ་འདི་མི་རིགས་ཏེ་རྒྱུ་དང་རྐྱེན་ལ་རག་ལས་པའི་ཕྱིར་དང༌། སྔར་མ་བྱུང་བ་ལས་ཕྱིས་འབྱུང་བས་བྱས་པ་ཡིན་པའི་ཕྱིར་རོ། །ཞེས་དང༌། དེ་ཉིད་ལས། གང་ཞིག་སྔར་མ་བྱུང་བ་ལས་ཕྱིས་འབྱུང་བ་མ་ཡིན་པ་ཆུའི་ཚ་བའམ་ཚུར་རོལ་དང༌། ཕ་རོལ་ལམ་རིང་བོ་དང་ཐུང་ངུ་ལྟར་རྒྱུ་དང་རྐྱེན་ལ་ལྟོས་པ་དང་བཅས་པར་མ་གྱུར་པ་གང་ཡིན་པ་དེ་རང་བཞིན་ཡིན་པར་བརྗོད་དོ། །ཞེས་དང༌། སྤྱོད་བསྡུས་སྒྲོན་མར་དོན་དམ་པའི་བདེན་པ་དེ་ཡང་མ་བཅོས་པ་ནམ་མཁའ་དང་མཉམ་པ་དྲི་མ་མེད་པའི་ངོ་བོ་ཉིད་དོ། །ཞེས་གསུངས་པའི་ཕྱིར་རོ། །མཁས་པ་གཞན་གྱིས་ལུང་འདི་དག་གིས་རང་བཞིན་དེ་རྟེན་འབྲེལ་མ་ཡིན་པར་བསྟན་པ་མ་ཡིན་པར་རྒྱུ་རྐྱེན་ལ་མ་ལྟོས་པ་ཙམ་བཤད་པ་ཡིན་ཞེས་འདོད་པ་ཡང་མི་འཐད་དེ། སྤྱིར་རྟེན་འབྲེལ་ཞེས་པའི་རྟེན་པའམ་ལྟོས་པ་ཡིན་མིན་ནི་རྒྱུ་རྐྱེན་ལ་ལྟོས་མ་ལྟོས་ལ་བྱེད་དགོས་པའི་ཕྱིར་ཏེ། རྟེན་འབྲེལ་སྟོན་པའི་མདོ་དང་བསྟན་ཆོས་དག་ལས་གསུངས་པའི་ཕྱིར་ཏེ། མ་དྲོས་པའི་ཞུས་པའི་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་བར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་དང༌། མདོ་ལས། བཅོམ་ལྡན་འདས་ཀྱི་དེ་ལ་ཆོས་ཀྱི་བརྡ་ནི་འདི་ཡིན་ཏེ། འདི་ལྟ་སྟེ་འདི་ཡོད་ན་འདི་འབྱུང་འདི་སྐྱེས་པའི་འདི་སྐྱེ་སྟེ། གང་འདི་མ་རིག་པའི་རྐྱེན་གྱིས་འདུ་བྱེད། ཅེས་དང༌། དགོངས་པ་ངེས་པར་འགྲེལ་བའི་མདོ་ལས། ཡོན་ཏན་འབྱུང་གནས་ཆོས་རྣམས་ཀྱི་གཞན་གྱི་དབང་གི་མཚན་ཉིད་གང་ཞེ་ན། གང་ཆོས་རྣམས་ཀྱི་རྟེན་ཅིང་འབྲེལ་བར་འབྱུང་བ་དེཉིད་དེ་འདི་ལྟར། འདི་ཡོད་པའི་འདི་འབྱུང་འདི་སྐྱེས་པའི་ཕྱིར་འདི་སྐྱེ་བ་སྟེ། ཞེས་དང༌། མདོ་དེ་ཉིད་ལས། དོན་དམ་ཡང་དག་འཕགས་ཆོས་རྣམས་ཀྱི་སྐྱེ་བ་ངོ་བོ་ཉིད་མེད་པ་གང་ཞེ་ན། གང་ཆོས་རྣམས་ཀྱི་གཞན་གྱི་དབང་གི་མཚན་ཉིད་དོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་གཞན་གྱི་རྐྱེན་གྱི་སྟོབས་ལས་བྱུང་གི་བདག་ཉིད་ཀྱི་མ་ཡིན་པས་ན་དེའི་ཕྱིར་དེ་ནི་སྐྱེ་བ་ངོ་བོ་ཉིད་མེད་པ་ཞེས་བྱའོ། །ཞེས་དང༌། འཕགས་པ་ལས་གྱི་སྒྲིབ་པ་རྒྱུན་གཅོད་པའི་མདོ་ལས། ཤཱ་རིའི་བུ་དེ་བཞིན་གཤེགས་པ་ཆོས་ཐམས་ཅད་ནི་རྟེན་ཅིང་འབྲེལ་བར་འབྱུང་བའོ། །ཞེས་གསུངས་པའི་ཕྱིར་ཏེ། རྒྱུ་དང་རྐྱེན་གཞན་དང་གཞན་གྱིས་གཞན་སྐྱེའོ། །གཞན་འགག་གོ །ཞེས་གསུངས་པ་དང༌། ཁྱེའུ་བཞི་ཏིང་ངེ་འཛིན་ཅེས་བྱ་བའི་ཐེག་པ་ཆེན་པོའི་མདོ་ལས། གང་རྟེན་ཅིང་འབྲེལ་པ་ལས་བྱུང་བ་དེ་ནི་མི་རྟག་པའོ། །ཞེས་པ་ནས་ཡང་དག་པ་མ་ཡིན་པ་དེ་བརྫུན་པ་བསླུ་བའི་ཆོས་སོ། །གང་བརྫུན་པ་བསླུ་བའི་ཆོས་དེ་མི་བདེན་པའོ། །གང་མི་བདེན་པ་དེ་བཞིན་ཉིད་མ་ཡིན་ནོ། །གང་དེ་བཞིན་ཉིད་མ་ཡིན་པ་དེ་དེ་བཞིན་གཤེགས་པ་མ་ཡིན་ནོ། །དེ་བཞིན་གཤེགས་པ་ནི་བདེན་པ་ཡང་དག་པ་དེ་བཞིན་ཉིད་མ་ནོར་བ་དེ་བཞིན་ཉིད་གཞན་མ་ཡིན་པ་དེ་བཞིན་ཉིད། ཅེས་གསུངས་པ་དང༌། དབུ་མ་རིན་ཆེན་ཕྲེང་བ་ལས། འདི་ཡོད་པས་ན་འདི་འབྱུང་དཔེར། །རིང་པོ་ཡོད་པས་ཐུང་ངུ་བཞིན། །འདི་སྐྱེས་པས་ན་འདི་སྐྱེ་དཔེར། །མར་མེ་འབྱུང་བས་འོད་བཞིན་ནོ། །ཞེས་དང༌། རྩ་ཤེས་ལས། བྱེད་པོ་ལས་ལ་བརྟེན་བྱས་ཤིང༌། །ལས་ཀྱང་བྱེད་པོ་དེ་ཉིད་ལ། །བརྟེན་ནས་བྱུང་བ་མ་གཏོགས་པར། །གྲུབ་པའི་རྒྱུ་ནི་མ་མཐོང་ངོ། །དེ་བཞིན་ཉེར་ལེན་ཤེས་པར་བྱ། །ལས་དང་བྱེད་པོ་གསལ་ཕྱིར་རོ། །ལས་དང་བྱེད་པ་པོ་དག་གིས། །དངོས་པོ་ལྷག་མ་ཤེས་པར་བྱ། །ཞེས་དང༌། རིགས་པ་དྲུག་ཅུ་བ་ལས། །དེ་དང་དེ་རྟེན་གང་བྱུང་བ། །རང་གི་ངོ་བོ་དེར་མ་སྐྱེས། །རང་གི་ངོ་བོར་གང་མ་སྐྱེས། །དེ་ནི་སྐྱེས་ཞེས་ཇི་ལྟར་བྱ། །ཞེས་དང༌། རྩ་ཤེས་ལས། རྟེན་ཅིང་འབྲེལ་བར་འབྱུང་བ་གང༌། །དེ་ནི་སྟོང་བ་ཉིད་དུ་བཤད། །དེ་ནི་རྒྱུར་བྱས་གདགས་པ་སྟེ། །དེ་ནི་དབུ་མའི་ལམ་ཡིན་ནོ། །ཞེས་གསུངས་པའི་ཕྱིར། ལུང་འདི་དག་གིས་རྟེན་འབྲེལ་ཞེས་པ་རྒྱུ་རྐྱེན་ལ་སྦྱར་ནས་གསལ་བར་བཤད་པ་དེའི་ཕྱིར་རྒྱས་པར་རྟེན་འབྲེལ་ཀྱི་མདོ་དང༌། རྩ་ཤེས་ཀྱི་རྒྱུ་བརྟག་པ་དང་རྐྱེན་བརྟག་པ་སོགས་ལས་ཤེས་པར་འཚལ། གཞན་ཡང་མཁས་མཆོག་ཉ་དབོན་པས་འདི་ལྟར་གསུངས་ཏེ། བསྟན་པ་སྤྱི་འགྲེལ་གྱི་རྣམ་བཤད་ཡིད་ཀྱི་མུན་སེལ་ལས། དོན་དམ་ཆོས་སྐུ་ནི་རྒྱུ་རྐྱེན་གྱིས་མ་བསྐྱེད་པས་རང་བྱུང་བ་སྟེ་གདོད་ནས་རང་བཞིན་གྱིས་གྲུབ་པའི་ཆོས་དབྱིངས་ཡེ་ཤེས་ཡིན་པའི་ཕྱིར་ན་རྟེན་ཅིང་འབྲེལ་བར་འབྱུང་བ་ཡིན་པ་ལས་འདས་པ་སྟེ། དེ་མིན་ནོ། །ཞེས་དང༌། ཡང་དེ་ལས། རྩ་ཤེར། གང་གི་རྟེན་ཅིང་འབྲེལ་བར་འབྱུང་ཞེས་འཆད་པའི་དབུ་མ་ཚིག་གསལ་གྱི་སྐབས་སུ་ཡང་རྟེན་ཅིང་འབྲེལ་བར་འབྱུང་བའི་དོན་འདུས་བྱས་ཉིད་ལ་བཤད་ཅིང༌། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་ཀླུ་སྒྲུབ་ཀྱིས་གསུངས་པ་ཡང་འདུས་བྱས་ཀྱི་ཆོས་ལ་དགོངས་སྟེ་བདེན་དངོས་དགག་པའི་སྐབས་ཡིན་གྱི་འདུས་མ་བྱས་ཀྱི་ཆོས་བདེན་པ་དགག་པའི་སྐབས་མ་ཡིན་ནོ། །ཞེས་སོགས་གསུངས་སོ། །ཡང་དཔལ་ལྡན་ཐལ་འགྱུར་བའི་ལུགས་ལ་གཞི་གྲུབ་ན་རྟེན་འབྲེལ་ཡིན་པས་ཁྱབ་མ་ཁྱབ་དཔྱད་དགོས་ཏེ། གོང་དུ་དྲངས་བའི་ཚིག་གསལ་དང་བུདྡྷ་པཱ་ལི་ཏ་གཉིས་ཐལ་འགྱུར་བའི་རང་གཞུང་ཡིན་ལ་དེ་གཉིས་ཀྱི་སྐབས་སུ་རང་བཞིན་རྟེན་འབྲེལ་མ་ཡིན་པར་གསུངས་པའི་ཕྱིར་རོ། །ཡང་ཁ་ཅིག་གིས་གཞི་གྲུབ་ན་རྟེན་འབྲེལ་ཡིན་པས་ཁྱབ་པ་དང་རྟེན་འབྲེལ་ཡིན་ན་རང་སྟོང་ཡིན་པས་ཁྱབ་སྟེ། རྩ་ཤེས་ལས། གང་ཕྱིར་རྟེན་འབྱུང་མ་ཡིན་པའི། ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པའི་ཕྱིར་ཞེ་ན་དེའི་ལན་དུ། རི་ཆོས་ངེས་དོན་རྒྱ་མཚོ་ལས། །འོ་ན་རྩ་བ་ཤེས་རབ་ཏུ་གང་ཕྱིར་རྟེན་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པའི་ཕྱིར། རྟེན་འབྲེལ་གང་ཡིན་སྟོང་ཉིད་ཡིན་པ་ལྟར་སྟོང་ཉིད་གང་ཡིན་ཡང་རྟེན་འབྲེལ་ཡིན་དགོས་ལ་རྟེན་འབྲེལ་གང་ཡིན་རང་སྟོང་ཡིན་པའི་སྟོང་ཉིད་ཐམས་ཅད་རང་སྟོང་ཁོ་ན་ཡིན་ནོ། །སྙམ་དུ་འགའ་ཞིག་སེམས་པར་གྱུར་ན་དེ་ཕྱིར་བརྗོད་པར་བྱ་སྟེ། ལུང་དེས་རྟེན་འབྲེལ་གང་ཡིན་སྟོང་ཉིད་དུ་གསུངས་པ་ཡིན་གྱི་སྟོང་ཉིད་གང་ཡིན་རྟེན་འབྲེལ་དུ་གསུངས་པ་ནི་མ་ཡིན་ནོ། །གལ་དེ་སྟོང་ཉིད་གང་ཡིན་ཐམས་ཅད་རྟེན་འབྲེལ་ཡིན་པར་འདོད་ན་ནི་དོན་དམ་ཆོས་ཉིད་ཡང་དག་པའི་མཐའ་ལ་སོགས་པ་སྟོང་གཞིའི་རྣམ་གྲངས་ཐམས་ཅད་སྟོང་ཉིད་ཡིན་པའི་ཕྱིར་རྟེན་འབྲེལ་ཡིན་པར་འགྱུར་ཞིང༌། འདུས་བྱས་མི་རྟག་པ་རྫུན་པ་བསླུ་བ་ལ་སོགས་པར་ཡང་འདོད་དགོས་ལ་དེ་ཡང་རིགས་པ་མ་ཡིན་ཏེ། རྒྱལ་བའི་ཡུམ་ལས། རབ་འབྱོར་ཀུན་རྫོབ་ཀྱི་བདེན་པ་ཚད་མར་བྱས་ཏེ། འབྲས་བུ་རྣམ་པར་དགོད་པ་བསྟན་གྱི་དོན་དམ་པས་ནི་འབྲས་བུ་རྣམ་པར་འགོད་པ་བསྟན་པར་མི་ནུས་སོ། །ཞེས་སོགས་དང༌། དགོངས་འགྲེལ་གྱི་མདོར་ཡང་རབ་འབྱོར་འདི་ལྟ་སྟེ་དེ་བཞིན་ཉིད་དོན་དམ་པ་ཆོས་ལ་བདག་མེད་པ་ནི་རྒྱུ་ལས་འབྲེལ་ཏེ་བྱུང་བ་མ་ཡིན་ལ་འདུས་བྱས་མ་ཡིན་ཏེ། །དོན་དམ་ཡང་མ་ཡིན་པར་ཡང་མི་འགྱུར་ལ་དོན་དམ་པ་དེ་ལས་དོན་དམ་པ་གཞན་ཡོངས་སུ་བཙལ་བར་མི་བྱ་སྟེ། རྟག་པ་རྟག་པའི་དུས་དང་ཐེར་ཟུག་ཐེར་ཟུག་གི་དུས་སུ་དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་སྟེ། ཆོས་རྣམས་གྱི་ཆོས་ཉིད་ཆོས་གནས་པའི་དབྱིངས་དེ་ནི་འདུག་པ་ཡིན་གྱི་གཞན་དུ་མ་ཡིན་ནོ། །ཞེས་སོགས་རྒྱ་ཆེར་གསུངས་པ་རྣམས་དང་འགལ་བའི་ཉེས་པ་ཆེན་པོ་འགྱུར་བའི་ཕྱིར་རོ། །ཞེས་གསུངས་པའི་ཕྱིར་རོ། །སྐབས་འདིར་རང་ལུགས་ལ་དཔྱད་པར་བྱ་བ་འདི་ཡོད་དེ། རི་ཆོས་ལས། མཐར་ཐུག་འགོག་པའི་བདེན་པ་ཡང་རྟེན་འབྲེལ་ལས་མ་འདས་པར་འགྱུར་ལ་འདོད་ན་འདུས་བྱས་ལས་མ་འདས་པར་འགྱུར་ཞིང་དེ་ལྟ་ན་ཡང་མི་རྟག་པ་དང་རྫུན་པ་དང་བསླུ་བའི་ཆོས་ཅན་དང༌། ཞེས་དང༌། དེ་ཉིད་ལས། གལ་ཏེ་སྟོང་ཉིད་གང་ཡིན་ཐམས་ཅད་རྟེན་འབྲེལ་ཡིན་པར་འདོད་ན་ནི། ཞེས་པ་ནས། རྟེན་འབྲེལ་ཡིན་པར་འགྱུར་ཞིང་འདུས་བྱས་མི་རྟག་པ་རྫུན་པ་བསླུ་བ་ལ་སོགས་པར་ཡང་འདོད་དགོས་ལ་ཞེས་རྟེན་འབྲེལ་དང་འདུས་བྱས་དོན་གཅིག་ཡིན་པར་གསུངས་ཏེ་རྟེན་འབྲེལ་ཡིན་ན་འདུས་བྱས་ཡིན་པས་ཁྱབ་པ་སོགས་གསུངས་པའི་ཕྱིར་དང༌། ཡང་རི་ཆོས་ལས། སྐབས་འདིའི་སྟོང་ཉིད་ནི་རྟེན་འབྲེལ་རང་སྟོང་ཡིན་ལ། དེ་ནི་རྟེན་འབྲེལ་དང་ཁྱབ་མཉམ་ངོ་བོ་གཅིག་ཡིན་པར་བསྟན་ཅིང༌། དེ་ནི་ཁོ་བོ་ཅག་ཀྱང་དེ་ལྟར་འདོད་པའི་ཕྱིར་རོ། །ཞེས་རྟེན་འབྲེལ་དང་རང་སྟོང་ཁྱབ་མཉམ་ངོ་བོ་གཅིག་པར་བསྟན་ལ་དེ་ལྟར་ན་ཀུན་བཏགས་ཀྱི་ཆོས་རྣམས་ཆོས་ཅན། རྟེན་འབྲེལ་ཡིན་པར་ཐལ། རང་སྟོང་ཡིན་པའི་ཕྱིར། འདོད་ན། འདུས་བྱས་ཡིན་པར་ཐལ། རྟེན་འབྲེལ་ཡིན་པའི་ཕྱིར་ཟེར་ན། རང་ལུགས་ལ་འདོད་ཟེར་དགོས་ཏེ། འདུས་མ་བྱས་ལ་རང་བཞིན་མྱང་འདས་ལས་གཞན་མེད་ལ་འདུས་བྱས་འཇོག་ཚུལ་གཉིས་གོང་དུ་བཤད་ཟིན་པ་ལྟར་ཡིན་པའི་ཕྱིར། དེ་ལྟར་བྱས་པ་ལ་འོ་ན་ཀུན་བཏགས་ཀྱི་ཆོས་རྣམས་ཆོས་ཅན། གཞན་དབང་ཡིན་པར་ཐལ། རྟེན་འབྲེལ་ཡིན་པའི་ཕྱིར། རྟགས་གྲུབ་སྟེ། ཐེག་མཆོག་དབུ་མ་ལས། ཀུན་བཏགས་གཞན་དབང་རྟེན་འབྲེལ་ཉིད་དུ་བརྗོད། ཅེས་གསུངས་པའི་ཕྱིར། རྩ་བའི་ཐལ་འགྱུར་ལ་ཁྱབ་པ་ཡོད་དེ། རྟེན་འབྲེལ་དང་གཞན་དབང་དོན་གཅིག་ཡིན་པའི་ཕྱིར་ཏེ། ཆོས་རྗེ་ཀུན་མཁྱེན་གྱིས་མཛད་པའི་ཆོས་ཀྱི་ཤན་འབྱེད་ལས། རྟེན་འབྲེལ་དང་གཞན་དབང་དོན་གཅིག་པའི་ཕྱིར་རོ་ཞེས་དང༌། རྟེན་འབྲེལ་དང་གཞན་དབང་དང་གཞན་སྐྱེ་རྣམས་ནི་དོན་ཅིག་པ་ཁོ་ནའོ། །ཅེས་གསུངས་པའི་ཕྱིར་ཞེ་ན། མ་ཁྱབ་སྟེ། འདིའི་སྐབས་ཀྱི་གཞན་དབང་ནི་ཀུན་བཏགས་དང་གཞན་དབང་གཉིས་སུ་ཕྱེ་བའི་དེ་མ་ཡིན་པར་རྒྱུ་རྐྱེན་གཞན་ལས་སྐྱེས་པ་ཙམ་ལ་གཞན་དབང་བཞག་པ་དེ་ཡིན་པ་འདྲའོ། །འོན་ཀྱང་འདིས་སྐབས་སུ་མདོ་སྡེ་དགོང་འགྲེལ་གྱི་གཞན་དབང་དང་རྟེན་འབྲེལ་གསུངས་ཚུལ་ལ་དཔྱད་པར་བྱའོ། །ཡང་རྟེན་འབྲེལ་དང་རང་སྟོང་དོན་གཅིག་པ་ལ། མཚན་ཉིད་ཡོངས་ཆད་ཀྱི་ཀུན་བཏགས་གཏན་མེད་ཡིན་པས་རྟེན་འབྲེལ་མ་ཡིན་དགོས་ཀྱང་རང་སྟོང་ཡིན་ཟེར་བ་ལྟར་ན་ཞིབ་ཆ་ཅུང་ཟད་དགོས་སོ། །