བཞི་བ་སྤང་བྱ་ཅིག་ཆར་བ་བཤད་པ།

བཞི་བ་སྤང་བྱ་ཅིག་ཆར་བ་བཤད་པ་ལ།

སྤྱི་དོན་དང༌། མཐའ་རགས་ཙམ་དཔྱད་པ་དང་གཉིས། དང་པོ་ནི། མངོན་པ་ཀུན་བཏུས་ལས། ཅིག་ཅར་ངེས་པར་འབྱིན་པ་ནི་གང་བདེན་པ་རྣམས་མངོན་པར་རྟོགས་པར་བྱས་ནས་མི་ལྕོགས་པ་མེད་པ་ལ་བརྟེན་ཏེ། འཇིག་རྟེན་ལས་འདས་པའི་ལམ་གྱིས་ཁམས་གསུམ་ན་སྤྱོད་པའི་ཉོན་མོངས་པ་རྣམས་རྣམ་པས་གཅིག་ཅར་སྤོང་སྟེ། འདི་ནི་རྒྱུན་དུ་ཞུགས་པའི་འབྲས་བུ་དང་དགྲ་བཅོམ་པའི་འབྲས་བུ་སྟེ་འབྲས་བུ་གཉིས་ལ་གདགས་སོ། །ཕལ་ཆེར་ནི་མཐོང་བའི་ཆོས་སམ། འཆི་བའི་ཚེ་ཀུན་ཤེས་པ་ཐོབ་པར་བྱེད་དོ། །གལ་ཏེ་མི་བྱེད་ན་ཡང་དེ་སྨོན་ལམ་གྱི་སྟོབས་ཅན་ཡིན་ཏེ།སྨོན་ལམ་གྱི་དབང་གིས་འདོད་པའི་ཁམས་ཉིད་དུ་སྐྱེས་ཏེ། སངས་རྒྱས་འབྱུང་བ་མེད་པ་ན་རང་རྒྱལ་བར་འགྱུར་རོ། །ཞེས་གསུངས་ལ། ཉན་ཐོས་དབང་རྣོན་འགའ་ཞིག་ཁམས་གསུམ་གྱི་སྒོམ་སྤང་ཉོན་མོངས་ཆེན་པོའི་ཆེན་པོ་ནས་ཆུང་ངུའི་ཆུང་ངུ་དགུ་སྤང་ཐབས་དགུ་བྱས་ནས་སྤངས་ནས་མཐར་དགྲ་བཅོམ་པའི་འབྲས་བུ་མངོན་དུ་བྱེད་པ་ཡོད། དེ་ལ་རྒྱུན་ཞུགས་སྐོར་དང༌། དགྲ་བཅོམ་སྐོར་གཉིས་ཡོད། དང་པོ་ལ་ཅིག་ཅར་བའི་རྒྱུན་ཞུགས་ཞུགས་པའི་མཚན་ཉིད། ཁམས་གསུམ་གྱི་སྒོམ་སྤང་ཉོན་མོངས་ཆེན་པོའི་ཆེན་པོ་ནས་ཆུང་ངུའི་ཆུང་ངུའི་བར་སྤང་ཐབས་དགུ་བྱས་ནས་སྤོང་བའི་རྒྱུན་ཞུགས་ཞུགས་པ་དེ་ཡིན་ཏེ། ཉ་ཊཱིཀ་ལས།དང་པོའི་མཚན་ཉིད་ནི། ཁམས་གསུམ་གྱི་སྒོམ་སྤང་ཆེ་འབྲིང་ཆུང་དགུར་འཆིང་དྲིལ་དུ་སྤོང་བར་ཞུགས་པའི་ཉན་ཐོས་སྦྱོར་ལམ་སྟན་གཅིག་པའི་གང་ཟག་གམ་ཉན་ཐོས་མཐོང་ལམ་སྐད་ཅིག་བཅོ་ལྔ་བོ་གང་རུང་ལ་གནས་པའི་གང་ཟག་གང་རུང་ངོ༌། །ཞེས་གསུངས་པའི་ཕྱིར།ཅིག་ཅར་བའི་རྒྱུན་ཞུགས་འབྲས་གནས་ཀྱི་མཚན་ཉིད། ཁམས་གསུམ་གྱི་སྒོམ་སྤང་ཉོན་མོངས་ཆེན་པོའི་ཆེན་པོ་ནས་ཆུང་ངུའི་ཆུང་ངུའི་བར་སྤང་ཐབས་དགུ་བྱས་ནས་སྤོང་བའི་རྒྱུན་ཞུགས་འབྲས་གནས། དེ་ལ་ཙམ་ཁྱད་གཉིས། ཅིག་ཅར་བའི་རྒྱུན་ཞུགས་འབྲས་གནས་ཙམ་པོ་བའི་མཚན་ཉིད། སྒོམ་སྤང་ཆེན་པོའི་ཆེན་པོ་སྤངས་པ་ལ་བརྩོན་པ་མ་ཡིན་པའི་རབ་ཏུ་ཕྱེ་བས་ཅིག་ཅར་བའི་རྒྱུན་ཞུགས་འབྲས་གནས། ཅིག་ཅར་བའི་རྒྱུན་ཞུགས་འབྲས་གནས་ཁྱད་པར་ཅན་གྱི་མཚན་ཉིད། དགྲ་བཅོམ་པའི་འབྲས་གནས་ཐོབ་ཕྱིར་དུ་བརྩོན་པའི་རབ་ཏུ་ཕྱེ་བས་ཅིག་ཅར་བའི་རྒྱུན་ཞུགས་འབྲས་གནས། དེ་ལྟར་འཐད་དེ། ཉ་ཊཱིཀ་ལས། ཙམ་པོའི་མཚན་ཉིད། དེ་ལྟར་ཞུགས་ཤིང་འདོད་པའི་ཆེན་པོའི་ཆེན་པོ་མ་སྤངས་པའི་བཅུ་དྲུག་པའི་རྟོགས་པ་ལ་གནས་པའི་གང་ཟགཁྱད་པར་ཅན་གྱི་མཚན་ཉིད། ཉན་ཐོས་རྒྱུན་ཞུགས་ཅིག་ཅར་པ་གང་ཞིག འདོད་པའི་སྒོམ་སྤང་ཉོན་མོངས་ཆེན་པོའི་ཆེན་པོ་ནས་སྲིད་རྩེའི་ཆུང་ངུའི་འབྲིང་གི་བར་གང་རུང་སྤངས་ཤིང་དེ་ཆུང་ངུའི་ཆུང་ངུ་ཡན་མ་སྤངས་པའོ། །ཞེས་གསུངས་པའི་ཕྱིར་རོ། །གཉིས་པ་ཅིག་ཆར་བའི་དགྲ་བཅོམ་སྐོར་ལ། སྤང་བྱ་ཅིག་ཆར་བའི་དགྲ་བཅོམ་ཞུགས་པའི་མཚན་ཉིད། ཁམས་གསུམ་གྱི་སྒོམ་སྤང་ཉོན་མོངས་ཆེན་པོའི་ཆེན་པོ་ནས་ཆུང་ངུའི་ཆུང་ངུའི་བར་སྤང་ཐབས་དགུ་བྱས་ནས་སྤོང་བར་བྱེད་པའི་དགྲ་བཅོམ་ཞུགས་པ་དེ་ཡིན་ཏེ། ཉ་ཊཱིཀ་ལས། ཉན་ཐོས་རྒྱུན་ཞུགས་ཅིག་ཅར་པ་ཁྱད་པར་ཅན་དེ་མཚན་གཞི།ཉན་ཐོས་ཅིག་ཅར་པའི་དགྲ་བཅོམ་ཞུགས་པར་མཚོན། ཉན་ཐོས་ཅིག་ཅར་པའི་མི་སློབ་ལམ་ཐོབ་ཕྱིར་བརྩོན་པའི་རྒྱུན་ཞུགས་ཁྱད་པར་ཅན་ནོ། །ཞེས་གསུངས་པས་སོ། །སྤང་བྱ་ཅིག་ཆར་བའི་དགྲ་བཅོམ་འབྲས་གནས་ཀྱི་མཚན་ཉིད། ཁམས་གསུམ་གྱི་སྒོམ་སྤང་ཉོན་མོངས་ཆེན་པོའི་ཆེན་པོ་ནས་ཆུང་ངུའི་ཆུང་ངུའི་བར་སྤང་ཐབས་དགུ་བྱས་ནས་སྤངས་བའི་དགྲ་བཅོམ་འབྲས་གནས། དེ་ལྟར་འཐད་དེ། ཉ་ཊཱིཀ་ལས། དེའི་འབྲས་གནས་ཀྱི་མཚན་ཉིད། ཁམས་གསུམ་གྱི་སྒོམ་སྤང་ཆུང་ངུའི་ཆུང་ངུ་དགུ་འཆིང་དྲིལ་དུ་སྤངས་པའི་ཉན་ཐོས་དགྲ་བཅོམ་པའོ། །ཞེས་གསུངས་པའི་ཕྱིར་རོ། །ཅིག་ཆར་བ་ལ་འབྲས་བུ་བར་བ་གཉིས་མེད་པ་ནི། ཕྱིར་འོང་ལ་འདོད་ཉོན་དྲུག་པ་སྤངས་པའམ་མངོན་གྱུར་ལ་ཆགས་བྲལ་བྱས་ལ་གོང་མའི་སྒོམ་སྤང་གང་ལ་ཡང་ཆགས་བྲལ་མ་བྱས་པ་ཞིག་དགོས་པ་ལ་ཅིག་ཆར་བ་ལ་དེ་མེད་པ་དང༌། ཕྱིར་མི་འོང་ལ་འདོད་ཉོན་དགུ་བ་སྤངས་པའམ་མངོན་གྱུར་པ་ལ་ཆགས་བྲལ་བྱས་ལ་སྲིད་ཉོན་དགུ་བ་མ་སྤངས་པའི་གང་ཟག་ཅིག་དགོས་ཀྱང་ཅིག་ཆར་བ་ལ་དེ་མེད་པས་སོ། །