གཉིས་པ་བྱེ་བྲག་ཏུ་བཤད་པ།
གཉིས་པ་བྱེ་བྲག་ཏུ་བཤད་པ་ནི།
སློབ་དཔོན་ལ་ནི་སྨོད་པ་དེ། །ཡམས་དང་འཚེ་བའི་ནད་རྣམས་དང༌། །གདོན་དང་རིམས་དང་དུག་རྣམས་ཀྱིས། །རྨོངས་ཆེན་དེ་ནི་འཆི་བར་འགྱུར། །རྒྱལ་བོ་མེ་དང་སྦྲུལ་གདུག་དང༌། །ཆུ་དང་མཁའ་འགྲོ་རྐུན་པོ་དང༌། །གདོན་དང་ལོག་འདྲེན་རྣམས་ཀྱིས་ཀྱང༌། །བསད་ནས་སེམས་ཅན་དམྱལ་བར་འགྲོ །ཞེས་གསང་སྔགས་ཀྱི་དྲིན་ཐོབ་པའི་རྡོ་རྗེ་སློ༷བ་དཔོ༷ན་ལ༷་ནི༷་བསམས་བཞིན་དུ་མ་གུས་པས་སྐྱོན་བརྗོད་ཅིང་སྨོ༷ད་པ༷་བྱས་ན། བྱེད་པ་པོ་དེ༷་གནས་པའི་ས་ཕྱོགས་སུ་མི་རྣམས་ལ་ཡ༷མས་ད༷ང༌། ཉེ་བར་འཚེ༷་བ༷འི་གནོད་པ་དུ་མ་འབྱུང་ཞིང༌། སྐྱེས་བུ་དེ་ཡང་དེ་ལྟ་བུའི་ན༷ད་རྣ༷མས་ད༷ང༌། མི་མ་ཡིན་གྱི་གནོད་པའི་གདོ༷ན་རིགས་རྣམས་ད༷ང༌། ཉིན་གཅིག་པ་ལ་སོགས་པའི་རི༷མས་ནད་རྣམས་ད༷ང༌། སྦྱར་དུ༷ག་ལ་སོགས་པའི་དུག་རྣ༷མས་ཀྱི༷ས་སྲོག་བཅད་དེ་ཉེས་དམིགས་མི་ཤེས་པའི་རྨཽ༷ངས་པ་ཆེ༷ན་པོ་དེ༷་ནི༷་དུས་མ་ཡིན་པར་འཆི༷་བ༷ར་འགྱུ༷ར་རོ། །གཞན་ཡང་དེ་ལྟ་བུའི་སྐྱེས་བུ་ནི་བསོད་ནམས་དང་དབང་ཕྱུག་ཉམས་ཏེ་རྒྱ༷ལ་པོ༷འི་ཆད་པ་འབྱུང་བ་དང༌། དེ་ཉིད་གནས་པའི་ཁང་པ་དང༌། ཡུལ་ཕྱོགས་མེ༷ས་ཚིག་པ་ད༷ང༌། སྦྲུ༷༷ལ་གདུ༷ག་ཅན་གྱི་ཁ་རླངས་ཕོག་པ་དང་གཟུང་བ་ད༷ང༌། ཤ་ཟ་མཁ༷འ་འགྲོ༷་རྣམས་ཀྱིས་ཚར་གཅོད་པ་དང༌། ཆུ༷་ཆེན་པོའི་ནང་དུ་ནུབ་པ་ད༷ང་ཁྱེར་བ་དང༌། རྐུ༷ན་པོ༷་རྣམས་ཀྱིས་འཇོམས་པ་ད༷ང༌། གདོ༷ན་གྱི་གནོད་པ་ད༷ང༌། བི་ན་ཡཀྵ་ལ་སོགས་པའི་ལོ༷གས་འདྲེ༷ན་རྣ༷མས་ཀྱི༷ས་ཀྱ༷ང་མི་འདོད་པ་སྣ་ཚོགས་སྐྱེད་དེ། ཚེ་ལ་བར་ཆད་བྱས་ནས་བས༷ད་ན༷ས་སེ༷མས་ཅ༷ན་དམྱ༷ལ་བ༷་ལ་སོགས་པའི་ངན་སོང་དུ་འགྲོ༷འོ། །