གཉིས་པ་སྐྲ་དང་ཁ་སྤུ་བྲེགས་པ།

གཉིས་པ་སྐྲ་དང་ཁ་སྤུ་བྲེགས་པ་ནི།

སྐྲ་དང་ཁ་སྤུ་བྲེགས་ཞེས་པ་འདིའི་དོན་ལ་ལྔ་ལས། དང་པོ་སྐྲ་བྲེགས་པའི་དགོས་པ་ནི་བཞི་སྟེ། ཁྲེལ་ཡོད་ཀྱི་བསམ་པ་སྐྱེ་བ་དང༌། དོན་དང་བྱ་བ་ཉུང་བ་དང༌། ང་རྒྱལ་དང་རྒྱགས་པ་གཞོམ་པ་དང༌། སྲོག་ཆགས་ལ་གནོད་པ་སྤོང་བ་སྟེ། གཞི་འགྲེལ་ལས། སྐྲ་དང་ཁ་སྤུ་བྲེགས་ཏེ་ཞེས་བྱ་བ་ནི། འདོད་ཆགས་དང་བྲལ་བའི་རྗེས་སུ་མཐུན་པར་བྱ་བའི་ཕྱིར་དང༌། མི་བྲལ་བར་བྱ་བའི་ཕྱིར། ཞེས་སོ། །རྣམ་འབྱེད་ལས། ཕུ་ནུ་མོ་དག་སྐྲ་ནི་བྲེགས་ཤིང༌། མཆན་ཁུང་རལ་བུ་ཅན་དག་ཡིན་ན་དགོད་དུ་ཅི་ཡོད། ཅེས་དང༌། གཞི་འགྲེལ་ལས། གཙུག་ཕུད་བྲེགས་པས་ཉེ་དུ་རྣམས་ཀྱི་གྲལ་ནས་ཕྱུང་བའི་ཕྱིར་ཏེ།འཇིག་རྟེན་ན་སྨད་པ་ཞེས་བྱ་བའི་ཐ་ཚིག་གོ། །ཞེས་དང༌། ཐ་མ་ནི་དོན་གྱིས་ཐོབ་པའོ། །དགེ་སློང་དགོན་པ་བས་སྐྲ་སྲིད་དུ་སོར་གཉིས་ལས་ལྷག་པ་མི་བཞག་གོ་སྐྲ་སྨོས་པས་ཁ་སྤུ་ཡང་སྨོས་པར་འགྱུར་བའི་ཕྱིར་ཞེས་ཊཱི་ཀ་ལས་སོ། །བསྡུས་པ་ལས། དགོན་པ་པས་ནི་སྐྲ་སོར་གཉིས་འཁྱིལ་བ་བྲེག་གོ་ཞེས་ཁྱད་པར་བཤེས་གཉེན་གྱིས་བཤད་ཀྱང༌། རང་གི་རྣམ་བཤད་ལས།སོར་གཉིས་བསྐོར་བ་ཡིན་ན་དེ་ནི་རིགས་པ་མ་ཡིན། །ཞེས་དང༌། འོད་ལྡན་ལས་ཀྱང༌། དེ་ལྟར་གྱུར་ན་ཚད་སོར་ལྔར་འགྱུར་བས་སོ། །གླེང་གཞི་དེ་ཉིད་ཀྱི་ཉེས་པར་འགྱུར་བས་མི་འདོད་དེ། ཞེས་སོ། །གྲོང་མཐའ་པས་ནི་དེའི་འོག་མ་སོར་ཕྱེད་དང་གཉིས་སོ། །ཊཱི་ཀ་ལས། སོར་ཕྱེད་དང་གཉིས་ལས་ལྷག་པ་སོར་གཉིས་ཀྱི་ཚད་དུ་གྱུར་པ་དེ་ཙམ་དུ་མི་བཞག་གོ། །ཞེས་སོ། ། ལྷག་པའི་ཚད་ནི་སོར་ཕྱེད་ཡིན་པར་ཊཱི་ཀའི་ཚིག་དེས་ཤེས་སོ། །དེ་གཉིས་ལ་ཡངས་དོག་གི་ཁྱད་པར་འབྱུང་བ་ནི། ལུང་ཕྲན་ཚེགས་ལས། དགོན་པ་བ་དག་གིས་འདྲེག་མཁན་མ་རྙེད་ན་སྐྲ་སོར་གཉིས་ཀྱི་ཚད་དུ་བཞག་པར་རྗེས་སུ་གནང༌། ཞེས་གསུངས་ལ། འགྲེལ་ཆུང་ལས། དགོན་པ་ན་འདྲེག་མཁན་དཀོན་པའི་ཕྱིར་དང༌། གྲོང་མཐའ་ན་འདྲེག་མཁན་བཙལ་སླ་བའི་ཕྱིར། ཞེས་སོ། །མ་དད་པ་སྐྱེ་བའི་དགག་བྱ་འབྱུང་རིང་བ་དང་ཉེ་བའི་ཁྱད་པར་གྱིས་ཀྱང་ཡིན་ནོ། །ལུས་གཞན་མགྲིན་པ་མན་ཆད་ཀྱི་ཡང་སྤུ་བྲེག་པར་མི་བྱའོ། །འོ་ན་སྣའི་སྤུ་ཡང་འཐོག་ཏུ་མི་རུང་ངམ་སྙམ་ན། ཊཱི་ཀ་ལས། སྣའི་སྤུ་བྲེག་པ་ལ་ནི་རྣམ་གྲངས་ཀྱི་ཚིག་ཡོད་དེ། བཅོམ་ལྡན་འདས་ཀྱིས་དགེ་སློང་དག་གིས་སྣའི་སྤུ་ཕྱེད་བཏོགས་པ་ལ་རྒན་རིམ་གྱིས་སྨད་ཙེར་བླང་བར་མི་བྱའོ། །ལེན་ན་འགལ་ཚབས་ཅན་དུ་འགྱུར་རོ། །ཞེས་གསུངས་སོ། །གལ་ཏེ་སྣའི་སྤུ་རྣམ་པ་ཐམས་ཅད་དུ་བཏོགས་པར་མི་བྱ་བ་ཡིན་ན། འདི་ལ་ཅིའི་ཕྱིར་ཉེས་བྱས་སུ་བསྟན་པ་ཡིན་ཏེ། རིགས་པ་འདིས་སྔོན་གཞུང་དངོས་སུ་ཡང་ཡོད་པ་ལས་ནུབ་པར་ཤེས་སོ། ། ཆོས་གོས་གྱོན་བཞིན་དུ་ཞེས་ཆོས་གོས་སྤྱིར་སྨོས་ཀྱང་སྣམ་སྦྱར་དང་བླ་གོས་བཟུང་སྟེ། ཊཱི་ཀ་ལས། མཐང་གོས་ཀྱང་བཀག་ན་གཅེར་བུར་འགྱུར་བའི་ཕྱིར་རོ། །ཞེས་སོ། །སྐྲ་བཟེད་པའི་གོས་བཅང་བར་བྱའོ། །འདིའི་ཚད་ནི། མེ་ཏོག་ཕྲེང་རྒྱུད་ལས། བསྲུང་བའི་དོན་དུ་སྐྲ་བཟེད་ནི། །རྒྱར་ནི་ཕྱེད་དང་གཉིས་ཁྲུ་ལ། །སྲིད་དུ་ཁྲུ་ནི་གསུམ་ཡིན་ཏེ། །ལྷག་པར་བཅང་བར་མི་བྱའོ། །ཞེས་སོ། །ལུང་ཕྲན་ཚེགས་ལས། སྐྲ་བཟེད་བགོས་ནས་སྐྲ་བྲེག་པར་བྱའོ། །ཞེས་གསུངས་སོ། །ཊཱི་ཀ་ལས་ཀྱང༌། སྐྲ་བཟེད་དེ་ཡང་བགོ་བའི་དོན་ཡིན་གྱི་གདིང་བའི་དོན་ནི་མ་ཡིན་ཏེ། མེད་ན་རྔུལ་གཟན་གྱི་སོ་ཞེས་བརྗོད་པའི་ཕྱིར་རོ། །ཞེས་གསུངས་སོ། །