སྒྲོལ་མ་འཇིགས་པ་བརྒྱད་སྐྱོབ་ལ་བསྟོད་པ་ཀ་ལ་པིངྐའི་མགྲིན་གླུ།
༈ སྒྲོལ་མ་འཇིགས་པ་བརྒྱད་སྐྱོབ་ལ་བསྟོད་པ་ཀ་ལ་པིངྐའི་མགྲིན་གླུ་ཞེས་བྱ་བ་བཞུགས།
ཨེ་མ་ཧོ། ཀ་ལིང་སྲིན་པོའི་དཔེར་འོས་སྲོག་ཆགས་ཆེ། །ཁ་གདངས་མིག་བསྒྲད་རྣོ་དབལ་མཆེ་སྡེར་ཅན། །ག་དར་གངས་རིར་གནས་བཅས་གདུག་པའི་ཉམས། །ང་རྒྱལ་སེང་གེའི་འཇིགས་པ་སྐྱོབ་ལ་བསྟོད། །ཅ་ཅོ་མི་སྙན་སྒྲ་ཡིས་སྣ་དྲངས་ནས། །ཆ་མེད་གཤིན་རྗེའི་ཡུལ་དུ་སྐྱེལ་ལ་མྱུར། །ཇ་ཁ་རྙོག་མའི་ཁྲོ་གཉེར་རླབས་འཁྲུགས་པའི། །ཉ་གྲོང་ཆུ་བོའི་འཇིགས་པ་སྐྱོབ་ལ་བསྟོད། །ཏ་ལའི་ནགས་སོགས་ཡུལ་དང་ནོར་རྫས་བསྲེགས། །ཐ་དད་ལུས་སེམས་ཚ་བའི་དབལ་གྱིས་འབྱེད། །ད་ལྟ་མཐོང་ངམ་ཐོས་པས་བཟོད་དཀའ་བའི། །ན་བུན་མེ་ཡི་འཇིགས་པ་སྐྱོབ་ལ་བསྟོད། །པ་ཏྲ་རིས་བཞིན་འཁྱོགས་འགྲོས་ཁུང་བུར་ཡིབ། །ཕ་རོལ་ཕུན་ཚོགས་མི་བཟོད་ཕྲག་དོག་ཅན། །བ་གམ་བྲག་དང་ནགས་ཁྲོད་སྟུག་པོར་རྒྱུ། །མ་རུང་དུག་སྦྲུལ་འཇིགས་པ་སྐྱོབ་ལ་བསྟོད། །ཙ་མ་ར་སོགས་སྲོག་ཆགས་ཤ་ཁྲག་རློམས། །ཚ་ཟེར་ཅན་དང་མི་མཐུན་མཚན་མོ་རུ། །ཛ་ལང་སྤྱོད་རྩུབ་སྲོག་དང་ནོར་གྱི་གཤེད། །ཝ་འདྲའི་རྐུན་པོའི་འཇིགས་པ་སྐྱོབ་ལ་བསྟོད། །ཞ་གྲུམ་ནད་བཞིན་ཕྱོགས་སུ་འགྲོ་མི་སྟེར། །ཟ་བྱེད་ཆུ་སྲིན་ཁ་ལྟར་བཙོན་རར་བསྡམས། །
འ་འུར 
་གཤེད་མའི་ཁྲོ་གཉེར་བསྲུང་མར་བཅས། །ཡ་ང་ལྕགས་སྒྲོག་འཇིགས་པ་སྐྱོབ་ལ་བསྟོད། །རྭ་ལྟར་རྒྱུད་གྱོང་གཞན་ལ་གནོད་སེམས་ཅན། །ལ་ལུང་བགྲོད་དམ་སྡོད་ཀྱང་སྦྱོར་ངན་ཤོམས། །ཤ་ཟ་མི་བསྲུན་འབྱུང་པོའི་འཇིགས་པ་དང་། །ས་བདག་རྒྱལ་པོའི་ཆད་པ་སྐྱོབ་ལ་བསྟོད། །ཧ་ལ་དུག་ཆུས་མྱོས་པའི་གཉིས་འཐུང་དང་། །ཨ་རོག་ཁ་དཀར་སྙིང་ནག་གྱིས་སྦྱར་བའི། །ཧ་ལའི་དུག་དང་རིམས་སོགས་འཇིགས་ཚོགས་ཀུན། །ཨ་ཧོ་དྲན་པས་སྐྱོབ་མཛད་སྒྲོལ་མར་བསྟོད། །འཇིགས་པ་བརྒྱད་སྐྱོབ་རྗེ་བཙུན་སྒྲོལ་མ་ལ། །བསྟོད་པ་ཀ་ལ་པིངྒའི་མགྲིན་གླུ་འདི། །འཕགས་མ་གང་ལ་རྩེ་གཅིག་དད་པའི་བློས། །དགེ་སྦྱོང་ལུང་རིག་མིང་གིས་བྲིས་པ་དགེ།།