འཁྲུལ་ཚུལ་དངོས་ཀྱི་རིམ་པ་བྱེ་བྲག་ཏུ་བཤད་པ་ལ་འཁྲུལ་གཞི།
གཉིས་པ་འཁྲུལ་ཚུལ་དངོས་ཀྱི་རིམ་པ་བྱེ་བྲག་ཏུ་བཤད་པ་ལྔ་སྟེ། བཤད་རྒྱུད་ལས། འཁྲུལ་ལུགས་རྒྱས་པར་ངས་བཤད་ཀྱི། །འཁྲུལ་པའི་གཞི་དང་རྒྱུ་དང་དུས། །འཁྲུལ་པའི་རྐྱེན་དང་འཁྲུལ་པ་དངོས། །ཞེས་པས། དང་པོ་འཁྲུལ་གཞི་ལ་གསུམ། ལྷུན་གྲུབ་ཀྱི་ཆོས་ཉིད་རིག་པ་འོད་ལྔ་རྣམས། ཕྱིར་གསལ་དུ་ཡུལ་དང་སེམས་དང་ལུས་ཀྱི་འཁྲུལ་གཞིར་དང་པོ་དང་བར་དང་ཐ་མ་གསུམ་གྱིས་བཤད་ནས་འཁྲུལ་གཞིར་ཕྱོགས་ཙམ་མཐུན་པས་འཐད་པ་ཡང་། དེ་ཉིད་ལས། དང་པོ་འཁྲུལ་པའི་གཞི་བསྟན་པ། །དེ་ལ་ཡང་ནི་རྣམ་པ་གསུམ། །ཆོས་ཉིད་ཡུལ་གྱི་འཁྲུལ་གཞི་དང་། །རིག་པ་སེམས་ཀྱི་འཁྲུལ་གཞི་དང་། །འོད་ལྔ་ལུས་ཀྱི་འཁྲུལ་གཞིར་བསྟན། །དང་པོ་ཆོས་ཉིད་རིས་མེད་སྟོང་། །བར་དུ་ཡེ་ཤེས་རྣམ་པར་ཤར། །ཐ་མར་འཛིན་རྟོག་བག་ཆགས་བརྟས། །དེ་ལས་སྙིག༷ས་མ༷་{སྙིང༵་པོ་༵}མེད་བཞིན་སྣང་། །དེ་ནི་ཡུལ་གྱི་འཁྲུལ་གཞི་བསྟན། །ད་ནི་སེམས་ཀྱི་འཁྲུལ་གཞི་བཤད། །དང་པོ་རིག་པ་འགག་མེད་འགྱུས། །བར་དུ་གདངས་ལ་འཛིན་པ་སྐྱེས། །ཐ་མ་སེམས་ཀྱི་རྒྱུ་བྱུང་བས། །དེ་ལས་སེམས་རྟོག་དུ་མར་ཤར། །སེམས་ཀྱི་༼འཁྲུལ་གཞི་༽གཞི་རུ་དེ་བསྟན་ནོ། །ད་ནི་ལུས་ཀྱི་འཁྲུལ་གཞི་བསྟན། །དང་པོ་རིག་པ་ཀློང་ན་གསལ། །བར་དུ་ཆོས་ཉིད་ཀློང་དུ་ཤར། །ཐ་མ་དེ་ལ་བག་ཆགས་པས། །གཟུགས་ཀྱི་ཕུང་པོ་རྡོས་བཅས་སྣང་། །ལུས་ཀྱི་འཁྲུལ་གཞི་དེས་བསྟན་ནོ། །གཞི་གསུམ་འཐད་པ་ངས་བཤད་ཀྱིས། །ཀྱེ་ཀྱེ་གསང་བདག་ངེས་པར་ཟུང་། །ཆོས་ཉིད་ཡུལ་གྱི་འཁྲུལ་གཞིར་འཐད། །ཅིའི་ཕྱིར་
རིག་མེད་བེམ་པོར་སྣང་། །རིག་པ་སེམས་ཀྱི་འཁྲུལ་གཞིར་འཐད། །ཅིའི་ཕྱིར་རིག་ཙམ་ཕྱོགས་མཐུན་ཕྱིར། །འོད་ལྔ་ཡུལ་གྱི་འཁྲུལ་གཞིར་འཐད། །ཁ་དོག་དབྱིབས་སུ་ཕྱོགས་མཐུན་ཕྱིར། །ཞེས་སོ། །སྤྱིར་གྱི་གཞི་ནི་ལྷུན་གྲུབ་ཡིན་ལ། འཁྲུལ་གཞི་ནི་དེ་ལས་བར་གྱི་བསྐལ་པ་ཤར་བའི་རིག་གདངས་ཡིན་པས་ཕྱེད་པ་ཞེས་སོ། །