གཉིས་པ་མཐའ་རགས་ཙམ་དཔྱད་པ།
གཉིས་པ་མཐའ་རགས་ཙམ་དཔྱད་པ་ལ།
གོང་དུ་ལུང་བཀོད་པ་བཞིན་ཉ་ཊཱིཀ་ལས་ཅིག་ཅར་བའི་རྒྱུན་ཞུགས་ཙམ་པོ་བ་བཅུ་དྲུག་པའི་རྟོགས་པ་ལ་གནས་པའི་གང་ཟག་དགོས་པར་ལྟ་བུར་གསུངས་ཀྱང་དེ་ལ་བཅུ་དྲུག་པ་ལམ་རྗེས་ཤེས་ཀྱི་རྗེས་སུ་གོང་མའི་འབྲས་བུ་ཐོབ་ཕྱིར་དུ་མི་བརྩོན་པ་ཞིག་ཡོད་པས་དེ་དེའི་འབྲས་གནས་ཙམ་པོ་བ་ཡིན་ནམ་སྙམ་མོ། །ཡང་དེའི་འབྲས་གནས་ཁྱད་པར་ཅན་ལ་ཉ་ཊཱིཀ་ལས་འདོད་པའི་སྒོམ་སྤང་ཆེན་པོའི་ཆེན་པོ་ནས་སྲིད་རྩེའི་ཆུང་ངུའི་འབྲིང་གི་བར་གང་རུང་སྤངས་དགོས་པ་ལྟ་བུར་གསུངས་ཀྱང་དེ་ལ་སྒོམ་སྤང་ཆེན་པོའི་ཆེན་པོ་མ་སྤངས་བའི་དགྲ་བཅོམ་པའི་འབྲས་གནས་ཐོབ་ཕྱིར་དུ་བརྩོན་པའི་ཅིག་ཅར་བའི་རྒྱུན་ཞུགས་དེ་དེའི་འབྲས་གནས་ཁྱད་པར་ཅན་ཡིན་པར་སྣང་ངོ༌། །ཐེག་དམན་དགེ་འདུན་ཉི་ཤུའི་རྣམ་བཞག་བཤད་ཟིན་ཏོ། །