དྲིས་ལན་ཉེར་གཅིག་པ་ལ་དྲི་ལན་གཉིས་ལས། དང་པོ་ནི།

དྲིས་ལན་ཉེར་གཅིག་པ་ལ་དྲི་ལན་གཉིས་ལས། དང་པོ་ནི།

རྟེན་འབྲེལ་ཡན་ལག་བཅུ་གཉིས་ཀྱི་གོ་རིམ་དང་ས་མཚུངས་ཇི་ལྟར་ཡིན་ཞེས་པའོ། །གཉིས་པ་ལན་ནི། རྟེན་འབྲེལ་ཡན་ལག་བཅུ་གཉིས་ཀྱི་གོ་རིམ་ནི། སྔར་བཤད་རྣམས་ལས་རྟོགས་ནུས་ཀྱང་འདིར་ཅུང་ཟད་བརྗོད་ན། ཚར་གཅིག་པའི་རྟེན་འབྲེལ་ཡན་ལག་བཅུ་གཉིས་ཚང་བའི་དབང་དུ་བྱས་ན་ཐོག་མར་མ་རིག་པ། དེ་ནས་འདུ་བྱེད་ཀྱི་ལས། དེ་ནས་རྒྱུ་དུས་ཀྱི་རྣམ་ཤེས། དེ་ནས་སྲེད་པ། དེ་ནས་ལེན་པ། དེ་ནས་སྲིད་པ། དེ་ནས་འབྲས་དུས་ཀྱི་རྣམ་ཤེས། མིང་གཟུགས། སྐྱེ་མཆེད། རེག་པ། ཚོར་བ། དེ་སྐྱེ་བ། རྒ་ཤི་རྣམས་རིམ་གྱིས་འབྱུང་བ་ཡིན་ཏེ། ས་བཟང་གི་མངོན་པ་ཀུན་བཏུས་ཀྱི་འགྲེལ་བ་ལས། རྒྱུ་འབྲས་ཚར་དུ་ཡིས་བསྡུས་པ་ནི་བྱེ་བྲག་ཏུ་སྨྲ་བའི་ལུགས་ཀྱིས། དང་པོ་གཉིས་རྒྱུ་དང༌། རྣམ་ཤེས་ལ་སོགས་པ་ལྔ་འབྲས་བུ་དང༌། སྲེད་ལེན་སྲིད་པ་གསུམ་རྒྱུ་དང༌། རྒ་ཤི་གཉིས་འབྲས་བུ་སྟེ་ཚར་གཉིས་ཀྱིས་བསྡུས་པར་ཡང་འདོད་མོད། འདི་མངལ་སྐྱེས་ཀྱི་སྲིད་པ་གཅིག་གི་མགོ་བརྩམས་ནས་མཇུག་རྫོགས་ཀྱི་བར་ལ་རྒྱུ་འབྲས་ཚར་གཅིག་ཏུའང་འདུ་བ་ཡིན་ཏེ། དེའི་གོ་རིམ་ནི་དང་པོ་གསུམ་གྱི་རྗེས་སུ་སྲེད་ལེན་སྲིད་པ་གསུམ་སྦྱར་བའོ། །ཞེས་པ་ནས། འདིར་ནི་ཡང་སྲིད་འཕེན་བྱེད་སྐྱེས་ནས་མྱོང་འགྱུར་འགའ་ཞིག་ཚེ་གཉིས་ལ་རྫོགས་པ་སྲིད་དེ། ཞེས་དང༌། མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། དེ་རྣམས་ཀྱི། གསུམ་པོ་དག་ལས་གཉིས་འབྱུང་སྟེ། །གཉིས་ལས་བདུན་འབྱུང་བདུན་ལས་ཀྱང༌། །གསུམ་འབྱུང་སྲིད་པའི་འཁོར་ལོ་ཅན། །ཉིད་ནི་ཡང་དང་ཡང་དུ་འཁོར། །ཞེས་གསུངས་པ་ལྟར་ཉོན་མོངས་པ་གསུམ་ལས་གཉིས་འབྱུང་ཞིང༌། ལས་གཉིས་ལས་སྡུག་བསྔལ་བདུན་འབྱུང་ལ། སྡུག་བསྔལ་མྱོང་བཞིན་དུའང་ཉོན་མོངས་པའི་དབང་གིས་ལས་ངན་པ་བསག་པས་སྒོ་ང་ལས་བྱ་དང་བྱ་ལས་སྒོ་ང་ལྟར་ཕན་ཚུན་འཁོར་བའི་ཚུལ་གྱིས་སེམས་ཅན་རྣམས་སྡུག་བསྔལ་བར་གནས་པ་ལ། ཞེས་གསུངས་པའི་ཕྱིར་རོ། །དེ་ལྟར་ཡིན་ན་ཐེག་མཆོག་དབུ་མ་ལས། ཚེ་གཅིག་ལ་ཡང་རྫོགས་པ་ཡོད་པ་སྟེ། །གོ་རིམ་དཀྲུག་ན་ཡན་ལག་རྫོགས་པ་འགལ། །ཞེས་དང༌། དེའི་ཟིན་བྲིས་ལས། དེ་ཡང་ཡན་ལག་བཅུ་གཉིས་པོ་རྣམས་གོ་རིམ་མ་འཁྲུགས་པར་རིམ་པ་ཇི་ལྟ་བ་བཞིན་དུ་རྫོགས་པ་ཞིག་དགོས་པ་ཡིན་གྱི། གཞན་འགའ་ཞིག་གི་འདོད་པ་ལྟར་མ་རིག་པའི་རྗེས་སུ་སྲེད་ལེན། དེ་ནས་འདུ་བྱེད་དང༌། དེ་ནས་སྲིད་པ་དང༌། དེ་ནས་རྣམ་ཤེས་དང༌། དེ་ནས་ཚོར་བ་སོགས་འབྱུང་བར་འདོད་པ་ནི་གོ་རིམ་དཀྲུགས་པའི་ཕྱིར་ན།ཡན་ལག་བཅུ་གཉིས་ཀྱི་རིམ་པ་ཚེ་གཅིག་ལ་རྫོགས་པ་འགལ་བའི་ཕྱིར་རོ། ཞེས་དང༌།འདུ་བྱེད་ཀྱི་རྐྱེན་གྱིས་རྣམ་ཤེས་ཞེས་གསུངས་པ་ཡིན་གྱི། འདུ་བྱེད་ལས་སྲིད་པ་འབྱུང་བ་ལུང་གིས་གནོད་པའི་ཕྱིར་རོ། །དེ་བཞིན་དུ་ལེན་པའི་རྐྱེན་གྱིས་སྲིད་པ་ཞེས་གསུངས་པ་ཡིན་གྱི། ལེན་པ་ལས་འདུ་བྱེད་བྱུང་བ་ལུང་དང་འགལ་བ་དང༌། ཞེས་གསུངས་པ་དག་གི་དགོངས་པ་ཇི་ལྟར་ཡིན་ཞེ་ན། དེ་དག་གི་དགོངས་པ་ནི་གནས་སྐབས་ཀྱི་རྟེན་འབྲེལ་དང་མདོའི་སྒྲས་ཟིན་གྱི་རྟེན་འབྲེལ་ལན་ལག་བཅུ་གཉིས་ནི་ཚར་གཅིག་གི་དབང་དུ་བྱས་པ་མ་ཡིན་པར་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་ཤེས། རྣམ་ཤེས་ཀྱི་རྐྱེན་གྱིས་མིང་གཟུགས་སོགས་འབྱུང་བ་སྟེ་སྔ་ཕྱི་རིམ་ཅན་དུ་རྐྱེན་དང་རྐྱེན་ཅན་དུ་གསུངས་པ་དང༌། མངོན་དུ་མ་གྱུར་བའི་རྟེན་འབྲེལ་སོགས་ཅི་རིགས་ཀྱི་དབང་དུ་བྱས་པ་ཡིན་ནམ་སྙམ་སྟེ། ཐེག་མཆོག་དབུ་མའི་ཟིན་བྲིས་ལས། དེ་ལྟར་ན་ཡན་ལག་བཅུ་གཉིས་པོ་དེ་རྣམས་ཀྱི་བག་ཆགས་ཀུན་གཞི་ལ་བཞག་པ་མངོན་དུ་མ་གྱུར་པ་དང་ས་བོན་ཡོངས་སུ་སྨིན་པ་ལས། ཡན་ལག་བཅུ་གཉིས་མངོན་དུ་འགྱུར་བ་གཉིས་འབྱུང་བ་ཐམས་ཅད་ལ་ཤེས་པར་བྱའོ། །ཞེས་གསུངས་པ་དང༌། ཀུན་བཏུས་ས་འགྲེལ་ལས།དེའི་གོ་རིམ་ནི་དང་པོ་གསུམ་གྱི་རྗེས་སུ་སྲེད་ལེན་སྲིད་པ་གསུམ་སྦྱར་བའོ། །ཞེས་གསུངས་པ་དང༌། གོང་གི་ལུང་དེ་དག་གི་སྐབས་ཐོབ་ལས་ཤེས་ནུས་པའི་ཕྱིར་རོ། །འོན་ཀྱང་རྟེན་འབྲེལ་ལ་ཆོས་ཀྱི་སྤྱན་མངའ་བའི་མཁས་པ་རྣམས་ཀྱིས་སླར་དཔྱད་པར་བྱའོ། །ཡང་ལས་གཅིག་གིས་སྐྱེ་བ་དུ་མ་འཕེན་ཡོད་ན་དེའི་རྟེན་འབྲེལ་ཡན་ལག་བཅུ་གཉིས་ཀྱི་གོ་རིམ་དང་བྱ་རྫོགས་ཀྱི་སྐད་ཅིག་མའི་རྟེན་འབྲེལ་ཡན་ལག་བཅུ་གཉིས་ཀྱི་གོ་རིམ་སོགས་ལ་དཔྱད་དོ། །ལས་གཅིག་གིས་སྐྱེ་བ་དུ་མ་འཕེན་པ་ཡོད་དེ། ཀུན་བཏུས་ས་འགྲེལ་ལས། ལས་གཅིག་གིས་ཚེ་རབས་དུ་མའི་ས་བོན་གསོས་ནས་ལུས་སྐྱེ་བ་དུ་མ་འཕེན་པའི་ལས་ཀྱང་ཡོད་དེ། མཆོད་རྟེན་ལ་ཕྱག་གུས་པ་གཅིག་ཕུལ་བས་ལུས་ཀྱིས་ནོན་པའི་རྡུལ་ཕྲ་རབ་ཀྱི་གྲངས་དང་མཉམ་པའི་འཁོར་ལོས་སྒྱུར་བ་ཐོབ་པ་ལྟ་བུའོ། །ལས་དུ་མས་ལུས་སྐྱེ་བ་གཅིག་འཕེན་པའི་ལས་ཀྱང་ཡོད་དེ། མཆོད་སྤྱིན་བརྒྱ་བྱས་པས་བརྒྱ་བྱིན་དུ་སྐྱེས་པ་ལྟ་བུའོ། །ཞེས་གསུངས་པའི་ཕྱིར། འདོད་མི་ནུས་པར་ཐལ། ཐེག་མཆོག་ཟིན་བྲིས་ལས། མ་རིག་པས་ཀུན་ནས་བསླངས་པའི་ལས་གཅིག་གིས། རྣམ་སྨིན་གཉིས་བསྐྱེད་ནུས་པར་ཐལ་བར་འགྱུར་རོ། །དེ་ནི་རྣམ་པ་ཀུན་ཏུ་མི་རུང་སྟེ། མཛོད་ལས། ལས་ནི་ཤུན་བཅས་འབྲས་བུ་བཞིན། །དེ་བཞིན་སྨན་དང་མེ་ཏོག་བཞིན། །ཞེས་དཔེ་དང་བཅས་ཏེ་གསུངས་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དེ་ནི་མངོན་པ་འོག་མ་ལྟར་ཡིན་ནམ་སྙམ་ལ་འོན་ཀྱང་ཕྱོགས་སྔ་དགག་ཚུལ་ཅི་ལྟར་ཡིན་དཔྱད་པར་བྱའོ། །ས་མཚུངས་ནི། རྟེན་འབྲེལ་ཡན་ལག་བཅུ་གཉིས་ཚར་གཅིག་པའི་དབང་དུ་བྱས་ན་ས་མཚུངས་དགོས་སམ་ཅི་ཞེ་ན། ས་མཚུངས་པ་དང་ས་ཐ་དད་པར་མ་ངེས་ལ།དེ་ཡང་ཀུན་བཏུས་ས་འགྲེལ་ལས། ས་མཚུངས་ལ་གསུམ་ལས། ཁམས་དང་ས་ལ་རྩི་བ་ནི་ཁམས་གང་ན་རྟེན་འབྲེལ་གང་ཡོད་ཅིང་དེ་རྣམས་ཀྱང་ས་མཚུངས་པའམ་མི་མཚུངས་པ་ཇི་ལྟར་ཡིན་སྙམ་ན། འདོད་པའི་ཁམས་ན་ཡན་ལག་བཅུ་གཉིས་པོ་རྫོགས་པར་ཡོད་ལ། ཁམས་གོང་མ་གཉིས་ན་བཅུ་གཉིས་པོའི་ཕྱོགས་རེ་རེ་ཡོད་དེ། གོང་མ་ན་རྒ་བ་ཇི་ལྟར་ཡོད་ན་འདུ་བྱེད་རྣམས་བརྙིངས་པ་དང་དེངས་པའོ་ཞེས་འཆད་པས་སོ། །གཟུགས་མེད་ན་རྟེན་འབྲེལ་གཟུགས་ཅན་རྣམས་མེད་དོ། །ཁམས་གསུམ་གྱིས་དགུ་པའང་རང་ས་དང་འོག་ས་དང་གོང་ས་གསུམ་མོ། །འཆི་ས་དང་སྐྱེ་ས་དང་གཉི་ག་མ་ཡིན་པ་གསུམ་དུ་འདུའོ། །དེ་ལ་མ་རིག་པ་ལས་གཞན་པའི་ཡན་ལག་བཅུ་གཅིག་ནི་གང་སྐྱེ་བར་འགྱུར་བ་དེའི་ས་པ་ཁོ་ནར་མཚུངས་ཏེ། ས་གཞན་གྱི་ལས་དང་ཉོན་མོངས་པས་ས་གཞན་གྱི་ཕུང་པོ་མངོན་པར་འགྲུབ་པ་མི་སྲིད་པའི་ཕྱིར་དང༌། ས་པ་གཞན་གྱི་རྣམ་སྨིན་ས་པ་གཞན་གྱིས་མྱོང་བར་འགལ་བའི་ཕྱིར་རོ། །དེའང་དོན་གསང་དུ། སྐྱེ་བའི་ས་པ་གང་ཡིན་པ་དེ་མངོན་པར་འགྲུབ་པར་བྱེད་པའི་ཉོན་མོངས་པ་ཡང་ངེས་པར་དེའི་ས་པ་ཁོ་ན་ཡིན་ནོ་ཞེས་པ་ལྟར་རོ། །འོ་ན་མ་རིག་པ་ཡང་གང་དུ་སྐྱེ་བར་དེའི་ས་པར་ངེས་སམ་སྙམ་ན། དེ་ནི་མངོན་པར་འགྲུབ་པར་བྱེད་པའི་ཉོན་མོངས་པ་མ་ཡིན་ཞིང༌། འཕེན་པར་བྱེད་པའི་ཉོན་མོངས་པ་ཡིན་པས་ངེས་པ་མེད་དེ། དོན་གསང་དུ། འཕེན་པར་བྱེད་པའི་ཉོན་མོངས་པ་ནི་མ་ངེས་སོ་ཞེས་བཤད་པས་སོ། །དེས་ན་མ་རིག་པ་ནི། རང་ས་ནས་རང་སར་སྐྱེ་བ་ལ། འདོད་པ་ནས་འདོད་པར་སྐྱེ་པ་ན་འདོད་པར་གཏོགས་པས་ཐམས་ཅད་ས་མཚུངས་ཤིང༌། ས་གོང་མ་བརྒྱད་རང་ས་ནས་རང་སར་སྐྱེ་བ་ལ་ནི་མ་རིག་པ་རང་གི་ས་པ་མེད་དེ།དེ་རྣམས་སུ་སྐྱེ་བ་འཕེན་པའི་ལས་ནི། ཞི་རགས་སུ་སྒོམ་པ་ཡིན་ལ། རང་ཉིད་རང་ས་ཞི་རགས་སུ་སྒོམ་པ་མེད་པའི་ཕྱིར་རོ། །དེས་ན་དང་པོ་ནས་དང་པོར་སྐྱེ་ན་མ་རིག་པ་འདོད་པར་གཏོགས་པ་ལྟ་བུ་རང་རང་གིས་འོག་མར་གཏོགས་སོ། །འོན་ཀྱང་ཞིབ་མོར་ན་ཚངས་རིས་པ་གནས་གཞན་གོང་མ་འདོད་པས། བསམ་གཏན་དང་པོའི་སེམས་དེ་ཉིད་འབྲིང་དང་ཆེན་པོར་སྒོམ་པ་ལས་མདུན་ན་འདོན་དང་ཚངས་ཆེན་དུ་སྐྱེ་བ་ལ་ནི་མ་རིག་པ་རང་གི་ས་པ་སྲིད་དེ། དེ་བཞིན་དུ་གོང་མ་གསུམ་ལའང་མཚུངས་སོ། །འོག་ས་ནས་གོང་དུ་སྐྱེ་བ་ལ་ནི་མ་རིག་པ་རང་གི་ས་པ་མེད་ཅིང༌། འདོད་པ་ནས་སྲིད་རྩེར་སྐྱེ་བ་ལ་མ་རིག་པ་ཅི་ཡང་མེད་པར་གཏོགས་པ་ལྟ་བུ་སྐྱེ་སའི་འོག་མར་ངེས་པ་ཉིད་དོ། །དོན་གསང་དུ། འདོད་ཆགས་དང་མ་བྲལ་བ་རྣམས་ལ་ས་གོང་མའི་ཉོན་མོངས་པ་ཀུན་ཏུ་མི་སྤྱོད་པའི་ཕྱིར་དང༌། ཞེས་པ་ལྟར་གོང་མའི་མ་རིག་པ་མངོན་དུ་མི་འགྱུར་ཕྱིར་རོ། །གོང་མ་ནས་འོག་མར་སྐྱེ་བ་ལ་ཡང་མ་རིག་པ་སྐྱེ་ས་དང་འཆི་ས་གཉི་གར་གཏོགས་པ་མེད་ཅིང༌། སྲིད་རྩེ་ནས་བཞི་པར་སྐྱེ་བ་ན་མ་རིག་པ་གསུམ་པར་གཏོགས་པ་ལྟ་བུ་སྐྱེ་སའི་འོག་མར་ངེས་ཏེ། གོང་མའི་རྟེན་ལ་འོག་མ་དོན་དུ་མི་གཉེར་བས་འོག་མའི་ལས་གསར་པ་མི་སོག་ལ། དེར་སྐྱེ་བའི་ལས་རྙིང་པ་ནི་འོག་མའི་རྟེན་ལ་སོག་ཅིང༌། དེའང་འོག་མའི་མ་རིག་པས་ཀུན་ནས་སློང་བའི་ཕྱིར་རོ། །འོན་ཀྱང་བསམ་གཏན་དང་པོ་ནས་འདོད་པར་སྐྱེ་བའི་མ་རིག་པ་ནི་སྐྱེ་ས་ཉིད་དུ་གཏོགས་པའོ། །དེ་ལ་རྩོད་པ་སྤང་བ་ནི། འདུ་བྱེད་ལ་སོགས་པ་བཅུ་གཅིག་སྐྱེ་ས་ཁོ་ནར་གཏོགས་ན་གོང་ས་ནས་འོག་སར་སྐྱེ་བ་ལ་འོག་མའི་སྲེད་ལེན་འབྱུང་བས། རྟེན་གོང་མ་པ་ལ་ས་འོག་མའི་ཉོན་མོངས་པ་འབྱུང་བར་འགྱུར་རོ་ཞེ་ན། གོང་མ་ལས་ཉམས་ཁའམ། ཉམས་མ་ཐག་འབྱུང་བས་དེ་ལྟར་འགྱུར་བའི་སྐྱོན་མེད་པར་དོན་གསང་དུ་བཤད་ཅིང༌། མཛོད་དུའང༌། འཆི་འཕོ་དག་ལས་ཉོན་མོངས་ཀུན། །ཞེས་པ་དང་མཐུན་ཏེ། ལྷ་ཚེ་རིང་པོ་འཆི་ཁར་ཐར་པ་ལ་སྐུར་འདེབས་ཀྱི་ལོག་ལྟ་སྐྱེས་པ་ལྟ་བུའོ། །ཞེས་གསུངས་པ་ལྟར་རོ། །རྣམ་ཤེས་ཀྱི་རྟེན་འབྲེལ་ལ་རང་དང་ཚར་གཅིག་པའི་རྟེན་འབྲེལ་རྣམས་དང་ས་མཚུངས་མི་དགོས་ཏེ། གསུམ་པ་རྣམ་ཤེས་ཀྱི་རྟེན་འབྲེལ་དེ་ཀུན་གཞིའི་རྣམ་ཤེས་ཡིན་པ་གང་ཞིག ཐེག་མཆོག་དབུ་མའི་ཟིན་བྲིས་ཀྱི་ཚིག་ཟིན་ལྟར་ན་ཀུན་གཞི་ཁམས་གསུམ་གང་གི་སས་མ་བསྡུས་པ་ལྟ་བུར་གསུངས་ཤིང་སས་བསྡུས་ཀྱང་རྒྱུ་དུས་ཀྱི་རྣམ་ཤེས་ལ་ས་མཚུངས་མི་དགོས་པའི་ཕྱིར།དང་པོ་གྲུབ་སྟེ། ཐེག་མཆོག་དབུ་མའི་ཟིན་བྲིས་ལས། གསུམ་པ་རྣམ་ཤེས་ཀྱི་ཡན་ལག་ནི། ཀུན་གཞི་རྣམ་ཤེས་ཀྱི་སྟེང་དུ་ལས་ཀྱི་བག་ཆགས་ཡོངས་སུ་བཞག་པས་རྣམ་ཤེས་དེ་ཉིད་ཡོངས་སུ་གྱུར་བའི་ཆ་ཡིན་ལ། དེ་ལ་ཡང་རྒྱུ་དུས་ཀྱི་རྣམ་ཤེས་དང༌། འབྲས་བུ་དུས་ཀྱི་རྣམ་ཤེས་གཉིས་སུ་ཡོད་དོ། །ཞེས་དང༌། གསུམ་པ་རྣམ་ཤེས་ཀྱི་རྟེན་འབྲེལ་གྱི་སྐབས་སུ་ཀུན་བཏུས་ས་འགྲེལ་ལས། རྣམ་པར་ཤེས་པ་དང་ཞེས་པ་ལས་ཀྱི་བག་ཆགས་དང་ལྡན་པའི་ཀུན་གཞི་སྟེ། དེའང་ས་བོན་བཞག་ཙམ་རྒྱུ་དུས་ཀྱི་རྣམ་ཤེས་དང༌། ནུས་པ་བརྟས་ནས་སྐྱེ་གནས་སུ་ཁྲིད་པའི་ཚེ་འབྲས་བུའི་དུས་ཀྱི་རྣམ་ཤེས་སོ། །ཞེས་གསུངས་སོ། །རྟགས་གཉིས་པ་གྲུབ་སྟེ། ཐེག་མཆོག་དབུ་མའི་ཟིན་བྲིས་ལས། ཀུན་གཞིའི་རྣམ་ཤེས་ནི་ས་དགུ་བོ་ཕྱོགས་ལྷུང་དང་བྲལ་བ་ཡིན་པས། འདོད་པའི་ཁམས་ཀྱི་རྟེན་ཅན་གྱི་སེམས་ཅན་རྣམས་ཀྱི་རྒྱུད་ཀྱི་ཀུན་གཞི་དེ་འདོད་ཁམས་ཀྱི་སས་བསྡུས་པ་མ་ཡིན་པར་འཇོག་པ་ཡིན། ཞེས་གསུངས་པའི་ཕྱིར། རང་ལུགས་ལ་ཀུན་གཞི་རྣམ་ཤེས་སས་བསྡུས་བཞག་ཀྱང་རྒྱུ་དུས་ཀྱི་རྣམ་ཤེས་རང་དང་ཚར་གཅིག་པའི་རྟེན་འབྲེལ་གཞན་རྣམས་དང་ས་མཚུངས་མི་དགོས་སོ། །གཞན་ཡང་ཆོས་རྗེ་ཀུན་མཁྱེན་གྱི་ཆོས་ཀྱི་འཇའ་ས་ལས། སེམས་ལའང་ཁམས་གསུམ་གྱིས་བསྡུས་པའི་རྣམ་ཤེས་ཚོགས་བརྒྱད་འཁོར་སེམས་བྱུང་ལྔ་བཅུ་རྩ་གཅིག་དང་བཅས་ཐམས་ཅད་སྤང་བར་བྱ་བའི་དྲི་མ་ཡིན། ཞེས་དང༌། ས་བཟང་གི་ཀུན་བཏུས་ཀྱི་འགྲེལ་བར། མ་རིག་པ་ལས་གཞན་པའི་ཡན་ལག་བཅུ་གཅིག་ནི་གང་སྐྱེ་བར་འགྱུར་བ་དེའི་ས་པ་ཁོ་ནར་མཚུངས་ཏེ། ས་གཞན་གྱི་ལས་དང་ཉོན་མོངས་པས་ས་གཞན་གྱི་ཕུང་པོ་མངོན་པར་འགྲུབ་པ་མི་སྲིད་པའི་ཕྱིར་དང༌། ས་པ་གཞན་གྱི་རྣམ་སྨིན་ས་པ་གཞན་གྱིས་མྱོང་བར་འགལ་བའི་ཕྱིར་རོ། །དེ་ཡང་དོན་གསང་དུ། སྐྱེ་བའི་ས་པ་གང་ཡིན་པ་དེ་མངོན་པར་འགྲུབ་པར་བྱེད་པའི་ཉོན་མོངས་པ་ཡང་ངེས་པར་དེའི་ས་པ་ཁོ་ན་ཡིན་ནོ་ཞེས་པ་ལྟར་རོ། །འོ་ན་མ་རིག་པ་ཡང་གང་དུ་སྐྱེ་བར་དེའི་ས་བར་ངེས་སམ་སྙམ་ན། དེ་ནི་མངོན་པར་འགྲུབ་པར་བྱེད་པའི་ཉོན་མོངས་པ་མ་ཡིན་ཞིང༌། འཕེན་པར་བྱེད་པའི་ཉོན་མོངས་པ་ཡིན་པས་ངེས་པ་མེད་དེ། དོན་གསང་དུ། འཕེན་པར་བྱེད་པའི་ཉོན་མོངས་པ་ནི་མ་ངེས་སོ། །ཞེས་སོགས་ཀྱིས་རྟེན་འབྲེལ་ཡན་ལག་བཅུ་གཉིས་ལས་མ་རིག་པ་ལས་གཞན་རྣམས་ས་མཚུངས་དགོས་པར་གསུངས་པའི་དགོངས་པ་ནི། སུམ་ཅུ་པ་ལས། གང་དུ་སྐྱེས་བ་དེ་ཡི་འོ། །ཞེས་པ་ཀུན་གཞི་རྣམ་ཤེས་དང་ཉོན་ཡིད་གཉིས་ཁམས་གང་དུ་སྐྱེ་བ་དེ་ཡི་སས་བསྡུས་ཡིན་པར་སྟོན་བྱེད་དུ་བྱས་ནས་འབྲས་དུས་ཀྱི་རྣམ་ཤེས་ལ་ས་མཚུངས་དགོས་ཞེས་གསུངས་པ་ཡིན་སྙམ། མ་རིག་པ་ལ་ས་མཚུངས་མི་དགོས་པ་ནི། དཔེར་ན་འདོད་རྟེན་ལ་ཁམས་གོང་མ་འཕེན་བྱེད་ཀྱི་ལས་ཞིག་བསགས་ན་དེའི་རྒྱུ་དུས་ཀྱི་ཐོག་མའི་རྩ་བའི་མ་རིག་པ་ནི་ཉོན་ཡིད་ཀྱི་འཁོར་གྱི་མ་རིག་པ་ཡིན་པ་གང་ཞིག གང་དུ་སྐྱེས་པ་དེ་ཡི་འོ། །ཞེས་པ་ལྟར་དེའི་སྐབས་ཀྱི་ཉོན་ཡིད་དང་དེ་དང་མཚུངས་ལྡན་རྣམས་འདོད་པའི་ཁམས་ཀྱི་སས་བསྡུས་ཡིན་ལ་དེ་འདྲའི་ལས་ནི་ཁམས་གོང་མའི་སས་བསྡུས་ཡིན་པས་ས་མི་མཚུངས་པའི་ཕྱིར། ཐོག་མའི་མ་རིག་ལ་ས་མི་མཚུངས་པས་མ་ཁྱབ་སྟེ། འདོད་པ་ནས་རང་ས་ནས་རང་སར་སྐྱེ་བའི་ལས་བསགས་པ་དག་ས་མཚུངས་སོ། །ཁམས་གཞན་ལ་དེ་ཡང་མ་ངེས་པར་བཤད་དེ། ཀུན་བཏུས་ས་འགྲེལ་ལས། དེས་ན་དང་པོ་ནས་དང་པོར་སྐྱེ་ན་མ་རིག་པ་འདོད་པར་གཏོགས་པ་ལྟ་བུ་རང་རང་གིས་འོག་མར་གཏོགས་སོ། །ཞེས་གསུངས་པའི་ཕྱིར་རོ། །དེ་ལ་ཐོག་མའི་རྩ་བའི་མ་རིག་པ་ནི་ཉོན་ཡིད་ཀྱི་འཁོར་གྱི་མ་རིག་པ་ཞིག་འཇོག་དགོས་ཏེ། ཐེག་མཆོག་དབུ་མའི་ཟིན་བྲིས་ལས། ཡན་ལག་བཅུ་གཉིས་ཀྱི་མ་རིག་པ་འདི་ལ། རྩ་བའི་མ་རིག་པ་ནི་ཉོན་ཡིད་ཀྱི་འཁོར་དུ་བྱུང་བའི་བདག་ཏུ་རྨོངས་པ་དེ་ཉིད་ཡིན་ལ། ཞེས་སོགས་གསུངས་སོ། །འོ་ན་སས་བསྡུས་ཀྱི་དོན་གང་ཞེ་ན། དེ་ནི་ཆོས་རྗེ་ཀུན་མཁྱེན་གྱི་ཚོགས་ཆོས་བདེན་བཞིའི་རྣམ་བཤད་ལས་གསུངས་པ་འདི་ལྟ་སྟེ། དེ་ལ་ཁམས་ནི་སྲེད་པའི་རིས་སུ་བཅད་ཅིང་ལྟ་བས་བདག་གིར་བྱས་པ་ཡིན་ལ། ས་ནི་འདོད་པ་ལ་འདོད་ཆགས་དང་བྲལ་བ་ན་བསམ་གཏན་དང་པོ་ཐོབ་པ་ལྟ་བུ་ཆཊ་བྲལ་གྱི་རིམ་པ་ཡིན་པས།ས་དགུས་ཁམས་གསུམ་བསྡུས་ཀྱང༌། ཁམས་གསུམ་གྱིས་ནི་ས་དགུ་མ་བསྡུས་ཏེ། བསམ་གཏན་དང་པོ་ནས་ཅི་ཡང་མེད་པའི་བར་ལ་མཐོང་ལམ་ལ་སོགས་པ་བརྟེན་པ་ན། ཁམས་ཟག་བཅས་ཡིན་ཡང་ས་ཟག་མེད་དུ་སྐྱེ་བའི་ཕྱིར་རོ། །ཞེས་སོགས་ལ་བརྟེན་ནས་སས་བསྡུས་ཀྱི་དོན་ལ་དཔྱད་ནས་དེའི་དོན་ཀུན་གཞིའི་རྣམ་ཤེས་ལ་ཚང་བ་ཡིན་ན་སས་བསྡུས་ཡིན་དགོས་ལ། ཀུན་གཞི་སས་བསྡུས་གལ་ཏེ་མ་ཡིན་ན་ཀུན་གཞི་དང་དེའི་འཁོར་རྣམས་རྟེན་འབྲེལ་བཞི་བ་མིང་གཟུགས་ཀྱི་མིང་བཞིའི་ཕུང་པོར་གཞག་དགོས་པས་རྟེན་འབྲེལ་བཞི་བ་ཡང་སས་མ་བསྡུས་པར་འགྱུར་ཏེ། ཐེག་མཆོག་དབུ་མའི་ཟིན་བྲིས་ལས། མིང་གཟུགས་ཀྱི་ཡན་ལག་འདི་ཉིད། ཅེས་པ་ནས། ཚོར་བ་དང༌། འདུ་ཤེས་དང༌། འདུ་བྱེད་ཀྱི་ཕུང་པོ་གསུམ་ནི་ཀུན་གཞི་རྣམ་ཤེས་ཀྱི་འཁོར་དུ་གྱུར་བའི་ཀུན་འགྲོ་ལྔའི་ནང་ཚན་དེ་ཉིད་ཡིན་ལ། རྣམ་ཤེས་ཀྱི་ཕུང་པོ་ནི་ཀུན་གཞི་རྣམ་ཤེས་ཉིད་དོ། །ཞེས་གསུངས་སོ། །རང་བློ་དང་མཐུན་པའི་རིགས་པས་དཔྱད་ན་ཀུན་གཞི་རྣམ་ཤེས་ལ་སས་བསྡུས་འཇོག་དགོས་སྙམ། འོན་ཀྱང་ཐེག་མཆོག་དབུ་མའི་ཟིན་བྲིས་ལས་སས་བསྡུས་མ་ཡིན་པ་ལྟ་བུར་གསུངས་པ་དམིགས་པའི་སྒོ་ནས་ཡིན་ནམ་དེའི་དགོངས་པ་འཚོལ་དགོས་སོ། །