གཉིས་པ་ཐུགས་དཀྲུག་པ་སྤང་བ།
གཉིས་པ་ཐུགས་དཀྲུག་པ་སྤང་བ་ནི།
ནམ་ཡང་སློབ་དཔོན་དག་གི་ནི། །ཀུན་དུ་སེམས་དཀྲུགས་མི་བྱ་སྟེ། །གལ་ཏེ་རྨོངས་བས་བྱས་གྱུར་ན། །དམྱལ་བར་ངེས་བར་འཚེད་པར་འགྱུར། །ཞེས་སློབ་མ་རྣམས་ཀྱིས་ན༷མ་ཀུན་ཏུ་ཡང་བྱ་བ་ཅུང་ཟད་ཙམ་ཡ༷ང་རང་གི་རྡོ་རྗེ་སློ༷བ་དཔོ༷ན་དུ་གྱུར་པ་ད༷ག་གི༷་ནི༷། རྣམ་པ་ཀུ༷ན་ཏུ༷་ཐུ༷གས་དཀྲུ༷ག་པ་དེ་མི་མཉེས་པར་གྱུར་བ་ཕྲ་མོ་ཙམ་ཡང་མི༷་བྱ༷་བ་ལ་ཞེ་སྒྲིམ་སྟེ༷་འབད་པར་བྱ་བ་ཡིན་ཏེ། ག༷ལ་ཏེ༷་ཉེས་པ་ཡོད་པ་དང་ཇི་ལྟར་བྱ་མ་ཤེས་པའི་རྨོ༷ངས་པ༷ས་སློབ་དཔོན་མི་མཉེས་པར་བྱ༷ས་གྱུ༷ར་ན༷་སྔར་བཤད་པའི་དམྱ༷ལ་བ༷ར་ཐེ་ཚོམ་མེད་པར་ངེ༷ས་པ༷ར་སྐྱེ་བ་དང༌། དེའི་ནང་ནས་ཀྱང་ཚ་བའི་དམྱལ་བར་སྐྱེ་ནས་འཚེ༷ད་པ༷ར་འགྱུ༷ར་རོ། །