གསུམ་པ་ཀོ་ལྤགས་ཀྱི་གཞི་འཆད་པ།
གསུམ་པ་ཀོ་ལྤགས་ཀྱི་གཞི་འཆད་པ་ལ།
རྩ་བར། ཡུལ་དབུས་ཀྱི་མཚམས་སོ། །
ཤར་དུ་ནི་ལི་ཁ་ར་ཤིང་འཕེལ་གྱི་མདུན་གྱི་ནགས་ལི་ཁ་རའི་ཤིང་ཚང་ཚིང་ཅན་ཞེས་བྱ་བའོ། །
ལྷོར་ནི་འདམ་བུ་ཅན་གྱི་ལྷོ་ན་ཆུ་ཀླུང་དེ་ཞེས་བྱ་བའོ། །ནུབ་ཏུ་ནི་བྲམ་ཟེའི་གྲོང་ཀ་བ་དང་ཉེ་བའི་ཀ་བ་ཞེས་བྱ་བ་གཉིས་སོ། །བྱང་དུ་ནི་ཨུ་ཤི་རཱའི་རི་ཞེས་བྱ་བའོ། །ཞེས་སོགས་བྱུང་བ་ལྟར་ཡུལ་དབུས་དང་མཐའ་འཁོབ་གཉིས་ཤེས་པར་བྱའོ། ། འདུལ་བ་བསྡུས་པ་ལས། ལིཁ་ར་ཚང་ཚིང་ཨུ་ཤི་རི། །དེ་བཞིན་གྲོང་དང་ཉེ་བའི་གྲོང༌། །ཆུ་ཀླུང་འདམ་བུ་མདའ་རྒྱུན་ཏེ། །ཤར་དང་བྱང་ཕྱོགས་སྩོགས་རྣམས་སུ། །འདི་ནི་མཐའ་འཁོབ་མཚན་ཉིད་དོ། །ཞེས་བཤད་ཀྱང༌། ལུང་ཀོ་ལྤགས་ཀྱི་གཞི་ལས། ལི་ཁ་ར་ཚང་ཚིང་ཞེས་བྱ་བ་དེ་ནི་དབུས་སོ། །དེ་ཕན་ཆད་ནི་མཐའའཁོབ་བོ། །ཨུ་ཤི་རའི་རི་ཞེས་བྱ་བ་ཡོད་དེ། དེ་ནི་དབུས་སོ། །དེ་ཕན་ཆད་ནི་མཐའ་འཁོབ་བོ། །ཞེས་གསུངས་སོ། །འདི་དག་ས་ཚིགས་ཀྱི་དབང་དུ་བྱས་ལ། ཆོས་ཚིགས་ཀྱི་དབང་དུ་བྱས་ནདགེ་སློང་ཕ་མ་དང་དགེ་བསྙེན་ཕ་མ་སྟེ་འཁོར་རྣམ་བཞི་རྒྱུ་བ་དབུས་དང་མི་རྒྱུ་བ་མཐའ་འཁོབཏུ་ཉན་ས་ལས་བཤད་དོ། །འདིར་སྔར་བཅས་ནི་ལུང་ལས་དགེ་སློང་གིས་མཆིལ་ལྷམ་བཅངཔར་མི་བྱའོ་ཞེས་གསུངས་ཏེ། དེའི་དམིགས་བསལ་ནི། རྩ་བར། མཐའ་འཁོབ་ཏུ་མཆིལ་ལྷམདག་བཅང་བར་བྱའོ། །ཞེས་སོགས་གསུངས་སོ། །ལུང་ལས། གཙུག་ལག་ཁང་དུ་ནི་ཀོ་ལྤགསཀྱི་སྟན་ལ་འདུག་པར་མི་བྱ། ཉལ་བར་མི་བྱ་ཞེས་བཀག་ཀྱང་ཁྱིམ་གཞན་དུ་གཞན་མེད་ནཀོ་ལྤགས་ལ་འདུག་པར་བྱ་ཞེས་གནང་ངོ༌། །ལུང་ལས། དོམ་ལྤགས་དེ་ཐམས་ཅད་ནི་མིག་ལ་ཕན་ནོ། །ཞེས་གསུངས་ལ། དོམ་ལྤགས་དེ། རྐང་པའི་གནས་སུ་འདིང་ཞེས་པ་ནི་མིག་གིརྩ་རྐང་མཐིལ་ན་ཡོད་པས་མིག་ལ་ཕན་པ་སྟེ། སྨན་པ་འཚོ་བྱེད་ཀྱི་བྱུང་བས་ཤེས་སོ། །ལུངལས་དགེ་སློང་གིས་ཀོ་ལྤགས་བཅང་བར་མི་བྱའོ། །ཞེས་སྤྱིར་བཏང་གསུངས་ཏེ། དེའི་དམིགསབསལ་ནི། ཨསྨ་པ་རན་ཏ་དག་ཏུ་ནི་ཀོ་ལྤགས་མི་བཅང་བར་མི་བྱའོ། །ཞེས་སོ། །འདི་ནིགནང་བའི་བསླབ་པ་སྟེ། ཊཱི་ཀ་ལས། ཡུལ་ཨསྨ་པ་རན་ཏ་ན་དག་ཏུ་ནི་ཀོ་ལྤགས་ཅི་དགརའཆང་དུ་གནང་བས། དེ་ལས་གཞན་པ་དག་ཏུ་བཀག་ཅེས་བཤད་དོ། །ལུང་མ་མོ་ལས་ཀྱང་ལྗོངས་ཨསྨ་པ་རན་ཏར་ནི་པགས་པ་དང་རྟག་ཏུ་ཁྲུས་གནང་བར་གསུངས་ཏེ། ལྗོངས་གཞནདུ་ནི་མ་ཡིན་ནོ། །ཞེས་གསུངས་སོ། །འོ་ན་ཨསྨ་པ་རན་ཏ་ལས་གཞན་པའི་མཐའ་འཁོབ་ཏུ་ཀོ་ལྤགས་གནང་ངམ་མི་གནང་ཞེ་ན། འོད་ལྡན་ལས། ཡུལ་མཐའ་འཁོབ་དག་ཏུ་ནི་མལ་དངསྟན་གཉིས་ཀ་ལ་ཡང་ཀོ་ལྤགས་གནང་ངོ་ཞེས་གསུངས་སོ། །ཀོ་ལྤགས་ཀྱི་གཞིའི་རྣམ་པར་བཤད་པ་རྫོགས་སོ།། །།