༦ ཞྭ་མོན་རྔོག་ཟེ།
ཞྭ་མོན་རྔོག་ཟེ་ནི། ད་ལྟ་དགེ་ལུགས་པའི་སེར་འབྲས་དགའ་གསུམ་སོགས་དགོན་སྡེ་མང་བོར་གྱོན་པ་དེ་ལགས་ལ། དེའི་མཚོན་དོན་ནི། ཞྭ་གདོང་ཐལ་སྦྱར་ཟུང་འཇུག་ལོངས་སྤྱོད་རྫོགས། །ཞྭ་མདོག་སེར་བས་སྤྲུལ་སྐུ་ཐུབ་པ་མཚོན། །ཞྭ་ཡི་སྤུ་ཉག་ཆོས་ཕུང་བརྒྱད་ཁྲི་མཚོན། །ཞྭ་ཡི་གོང་སྦྱོར་ཚོགས་གཉིས་ཟུང་དུ་འཇུག །ཞྭ་འདབ་ཟུང་འབྲེལ་བདེན་གཉིས་ཟུང་འཇུག་མཚོན། །ཞྭ་དར་དམར་བོས་མཁའ་འགྲོ་འདུ་བ་མཚོན། །ཞྭ་འདབ་ཚེམས་དཀར་ཆོས་སྐྱོང་བསྐོར་བ་མཚོན། །ཞེས་པ་ལྟར། ཞྭ་དབྱིབས་ཀྱི་ཆ་ཤས་རེ་ཡང་མཚོན་དོན་རྨད་དུ་བྱུང་བ་ཡོད་དོ། །