རྟེན་འབྲེལ་རྟོགས་པ་དབུ་མར་འཇུག་པའི་ལམ་ཡིན་པར་བསྟན་པ།

གསུམ་པ་རྟེན་འབྲེལ་རྟོགས་པ་དབུ་མར་འཇུག་པའི་ལམ་ཡིན་པར་བསྟན་པ་ནི། རྩ་བར། ཀུན་རྫོབ་རྟེན་འབྲེལ་ལེགས་པར་རྟོགས་པ་ནི། །དབུ་མ་ཆེན་པོའི་གྲོང་དུ་འཇུག་པའི་ལམ། །ཞེས་རྐང་བ་གཉིས་བྱུང༌། དེའི་ཚིག་དོན་ནི། ཀུ༵ན་རྫོ༵བ་ཡིན་པའི་རྟེ༵ན་འབྲེ༵ལ་ལེག༵ས་པ༵ར་རྟོག༵ས་པ༵་ནི༵་འདུས་བྱས་ཀྱི་ཆོས་ཐམས་ཅད་ཡང་དག་པར་ན་ཅིར་ཡང་མ་གྲུབ་ཀྱང་ཐ་སྙད་ཀུན་རྫོབ་ཏུ་མི་བསླུ་བར་རྟོགས་ནས་བླང་དོར་ཕྱིན་ཅི་མ་ལོག་པ་བྱེད་པའི་ཕྱིར་ན་ད༵བུ་མ༵་ཆེ༵ན་པོའི༵་གྲོ༵ང་ཁྱེར་དུ༷་འཇུག༵་པའི༷་ལ༵མ་ཡིན་ནོ། །འོན་ཀྱང་ལམ་གྱི་རྟེན་འབྲེལ་ལས་མ་འདས་པ་ཡིན་པས་དབུ་མ་དངོས་ནི་མ་ཡིན་ཏེ། ཐེག་མཆོག་དབུ་མ་ལས། དེ་ནི་དོན་དམ་པ་ལ་འཇུག་ཚུལ་གྱི། །ཀུན་རྫོབ་བདེན་པའི་རིམ་པ་གཅིག་ཏུ་འདོད། །དོན་དམ་ལ་ནི་རྟེན་འབྲེལ་ནམ་ཡང་མེད། །ཅེས་གསུངས་པའི་ཕྱིར། ཡང་ཁ་ཅིག་ན་རེ་སྟོང་དང་རྟེན་འབྱུང་དོན་གཅིག་ཡིན་ཏེ། རྩོད་ཟློགས་ལས། གང་གིས་སྟོང་དང་རྟེན་འབྱུང་དང༌། །དབུ་མའི་ལམ་དུ་དོན་གཅིག་པར། །གསུང་མཆོག་མཚུངས་པ་མེད་པ་ཡི། །སངས་རྒྱས་དེ་ལ་ཕྱག་འཚལ་ལོ། །ཞེས་གསུངས་པའི་ཕྱིར་ན། མ་ཁྱབ་སྟེ། སངས་རྒྱས་བྱང་སེམས་ལ་གྲགས་པའི་རང་སྟོང་དང་རྟེན་འབྱུང་གཉིས་ལེགས་པར་རྟོགས་ན་དབུ་མ་ཆེན་པོའི་གྲོང་ཁྱེར་དུ་འཇུག་པའི་ལམ་དུ་དོན་གཅིག་པ་ཡིན་ཞེས་པ་ཡིན་ནམ་སྙམ་མོ། །དེ་ལྟར་ཤེར་ཕྱིན་དང༌། ཕྱག་རྒྱ་ཆེན་པོ་དང་དུས་འཁོར་བདེ་དགྱེས་གསང་འདུས་ལ་སོགས་པ་ཟབ་མོ་མཐར་ཐུག་ཐམས་ཅད་ལ་གཞི་དང་བྲལ་འབྲས་གང་ཡིན་པ་འདུས་མ་བྱས་པ་རྟེན་འབྲེལ་ལས་འདས་པ་ཡིན་པ་དང༌། ལམ་གང་ཡིན་འདུས་བྱས་རྟེན་འབྲེལ་ལས་མ་འདས་པ་ཡིན་པའི་ཚུལ་ལེགས་པར་རྟོགས་པར་བྱས་ནས་དབུ་མ་ཆེན་པོའི་གྲོང་ཁྱེར་ལ་འཇུག་དགོས་པ་ཡིན་ནོ། །