བདུན་པ་མངོན་པ་ལ་སོགས་པ་གཞུང་གཞན་ལ་ཡང་སྐུར་འདེབས་ཀྱི་སྐྱོན་བསལ་བ།
བདུན་པ་མངོན་པ་ལ་སོགས་པ་གཞུང་གཞན་ལ་ཡང་སྐུར་འདེབས་ཀྱི་སྐྱོན་བསལ་བ་ནི།
ཆོས་མངོན་པ་ཀུན་ལས་བཏུས་པ་ལ་སོགས་པར་ཀུན་གཞི་རྣམ་ཤེས་སྟོན་པའི་རྒྱུ་མཚན་གྱིས་སེམས་ཙམ་གྱི་རང་གཞུང་དུ་འདོད་པ་ཡང་འཁྲུལ་ཏེ། རྒྱུད་སྡེ་ཟབ་མོ་རྣམས་དང༌། སེམས་འགྲེལ་སྐོར་གསུམ་ལ་སོགས་པ་དབུ་མའི་གཞུང་ལུགས་མཐར་ཐུག་པ་རྣམས་སུ་ཡང༌། ཀུན་གཞི་རྣམ་ཤེས་ཡང་དང་ཡང་དུ་བསྟན་པའི་ཕྱིར་རོ། །ཕུང་པོ་ཁམས་དང་སྐྱེ་མཆེད་ཀྱི་རྣམ་བཞག་བསྟན་པས་ཀྱང་སེམས་ཙམ་གྱི་རང་གཞུང་དུ་མི་འགྱུར་ཏེ། དེ་དག་ནི་དབུ་མ་ཆེན་པོའི་མདོ་རྒྱུད་ཟབ་མོ་འགྲེལ་བ་དང་བཅས་པ་རྣམས་སུ་ཡང༌། ཡང་དང་ཡང་དུ་གསུངས་པའི་ཕྱིར་རོ། །གཞན་ཡང་གཞུང་འདིར། མོས་སྤྱོད་ལ་གནས་པའི་བྱང་ཆུབ་སེམས་དཔའ་མཉམ་བཞག་པས། །དོན་ཐམས་ཅད་ཡིད་ཀྱི་གཟུགས་བརྙན་ཙམ་དུ་མཐོང་བས་ན། །དོན་གྱི་འདུ་ཤེས་ལྡོག་དེ་ནས། །རྣམ་རིག་ཙམ་རང་གི་འདུ་ཤེས་ངེས་པར་གཟུང༌། །དེ་ལྟར་ནང་གི་སེམས་ཙམ་གནས་ཤིང༌། །གཟུང་བ་མེད་པར་རྟོགས་པར་བྱ་སྟེ་སྦྱོར་ལམ་དུའོ། ། དེ་ཡི་འོག་ཏུ་འཛིན་པའང་མེད་པར། །འགྱུར་ཞིང་དེ་ནས་གཟུང་འཛིན་གཉི་ག་མི་དམིགས་པ་ཆོས་ཉིད་ལ་རེག་པར་བྱ་སྟེ་ས་དང་པོ་ལ་སོགས་སུའོ། །ཞེས་སེམས་ཙམ་ལས་འདས་པའི་མདོ་དྲངས་པ་དང༌། གཞན་ཡང༌། རྟེན་འབྲེལ་མཐའ་བཞི་ལས་སྐྱེ་བ་བཀག་པ་དང༌། སྐྱེ་བ་ངོ་བོ་ཉིད་མེད་པར་གསུངས་པ་དང༌། ཆོས་ཐམས་ཅད་མ་སྐྱེས་པ་དང་མ་འགགས་པ་དང༌། གཟོད་མ་ནས་ཞི་བ་དང༌། རང་བཞིན་གྱིས་མྱ་ངན་ལས་འདས་པ་དང༌། བདག་གཉིས་ཀྱིས་སྟོང་བ་ལ་སོགས་པ་གསུངས་པའི་ཕྱིར། སེམས་འགྲེལ་སྐོར་གསུམ་གྱི་མན་ངག་ཟབ་མོ་དང་ལྡན་པས། འདོད་མཁན་མང་ཉུང་གིས་བདེན་བརྫུན་དུ་འཇོག་པ་དང་སྐྱོ་མ་སྔ་བཙན་གྱི་བག་ཆགས་སྤངས་ཏེ་ལེགས་པར་བལྟས་ན་གནས་སྐབས་སུ་སེམས་ཙམ་སྟོན་ཡང་མཐར་སེམས་ཙམ་ལས་འདས་པའི་གཞུང་དུ་གསལ་བར་འགྱུར་རོ། །གཞན་ཡང་བདག་གཉིས་ཀྱིས་སྟོང་པའི་གཞི་ཆོས་ཉིད་དོན་དམ་པ་ཡོད་པར་གསུངས་པས་ཀྱང་སེམས་ཙམ་གྱི་རང་གཞུང་དུ་མི་འགྱུར་ཏེ། དབུ་མའི་གཞུང་ལུགས་དོན་དམ་གཞན་སྟོང་སྟོན་པ་རྣམས་ལ་ཧ་ཅང་ཐལ་བར་འགྱུར་བའི་ཕྱིར་རོ། །དེ་བཞིན་དུ་རྒྱུ་མཚན་དེ་དག་གིས་ནི་མདོ་སྡེ་རྒྱན་སེམས་ཙམ་དུ་འདོད་པ་ཡང་བསལ་བ་ཡིན་ནོ། །གལ་ཏེ། ཉན་ཐོས་མ་ངེས་པ་ཁ་ཅིག་དག་ནི་ཐེག་ཆེན་ལ་དྲང་བའི་ཕྱིར་དང༌། །རྒྱལ་སྲས་མ་ངེས་པ་གཞན་དག་ཐེག་ཆེན་ལ་བློ་བསྟན་པར་ཡང་དག་གཟུང་བའི་ཕྱིར། །རྫོགས་པའི་སངས་རྒྱས་རྣམས་ཀྱིས་ནི། །རིགས་མ་ངེས་པ་རྣམས་ལ་མཐར་ཐུག་གི་ཐེག་པ་གཅིག་ཏུ་དོན་ལ་གནས་པ་དེ་གསལ་བར་བསྟན། ། ཞེས་ཐེག་གཅིག་དྲང་དོན་དུ་བསྟན་པའི་ཕྱིར། མདོ་སྡེའི་རྒྱན་དེ་སེམས་ཙམ་གྱི་གཞུང་དུ་གྲུབ་པོ། །ཞེ་ན། གཞུང་འདིས་ཐེག་གཅིག་དྲང་དོན་དུ་བསྟན་པ་ཅུང་ཟད་ཀྱང་མེད་དོ། །ཁ་ཅིག་དྲང་བའི་ཕྱིར་དང༌། གཞན་དག་ཡང་དག་གཟུང་བའི་ཕྱིར། །ཞེས་པ་འདི་དག་ནི། མཐར་ཐུག་གི་ཐེག་པ་གཅིག་ཏུ་དོན་ལ་གནས་པ་དེ་གསལ་བར་བསྟན་པའི་དགོས་པ་བསྟན་པ་ཡིན་ལ་དགོས་པ་བསྟན་པས་དྲང་དོན་དུ་འགྱུར་ན་ནི་ཧ་ཅང་ཐལ་བར་འགྱུར་རོ། །དེས་ན་ཉན་ཐོས་མ་ངེས་པ་ཐེག་ཆེན་ལ་དྲང་བའི་ཕྱིར་གསུངས་པ་དང་དྲང་དོན་ལ་ཁྱད་ཆེན་པོ་ཡོད་དོ་ ཡང་གལ་ཏེ་ལ་ལ་གཅིག་ཏུ་ཉེས་པར་སྤྱོད་ངེས་ཡོད། །ལ་ལ་དཀར་པོའི་ཆོས་རྣམས་ཀུན་ཏུ་བཅོམ། །ལ་ལ་ཐར་བའི་ཆ་མཐུན་དགེ་བ་མེད། །ལ་ལ་དཀར་པོ་དམན་པ་ཙམ་ཡོད་པ་སྟེ་དེ་རྣམས་ནི་རྒྱུ་རྒྱས་པའི་རིགས་དང་བྲལ། ། ཞེས་རིགས་ཆད་བཤད་པའི་རྒྱུ་མཚན་གྱིས་སེམས་ཙམ་གྱི་རང་གཞུང་དུ་གྲུབ་པོ་ཞེ་ན། འདི་ལ་ཡང་ཁྱབ་པ་མེད་དེ། རང་བཞིན་གྱི་རིགས་ཆད་པ་ནི་སུ་ཡང་མི་སྲིད་ཅིང༌། རྒྱས་པའི་རིགས་ཆད་པ་ནི་མང་པོ་ཡོད་ལ། དེ་ལྟར་དོན་ལ་གནས་པ་བཞིན་དུ་དབུ་མའི་གཞུང་ལུགས་མྱང་འདས་ཆེན་པོ་དང༌། སོར་མོའི་ཕྲེང་བ་ལ་ཕན་པ་དང་རྒྱུད་བླ་མ་ལ་སོགས་པ་རྣམས་སུ་ཡང་རང་བཞིན་གྱི་རིགས་ཆད་པ་ནི་མི་སྲིད་ཅིང་རྒྱས་པའི་རིགས་ཆད་པ་ཡོད་ཚུལ་ལེགས་པར་གསུངས་པ་ཡིན་ནོ། །དེ་ཡང་སེམས་ཅན་ཐམས་ཅད་སངས་རྒྱས་ཀྱི་སྙིང་པོ་ཅན་ཡིན་ཡང༌། ཐར་བའི་ས་བོན་མ་ཐེབས་པ་དང༌། དགེ་བ་མ་བསྐྱེད་པ་མང་དུ་ཡོད་པ་ལས་ཁོང་དུ་ཆུད་པར་བྱའོ། །རང་བཞིན་གྱི་རིགས་ཆད་པ་མི་སྲིད་པ་ནི་གཞུང་མདོ་སྡེའི་རྒྱན་དེ་ཉིད་དུ། དེ་བཞིན་ཉིད་དེ་ཐམས་ཅད་ལ། །ཁྱད་པར་མེད་ཀྱང་དག་གྱུར་བ། །དེ་བཞིན་གཤེགས་པ་ཐོབ་པ་ཉིད་ཡིན་པ་དེ་ཡི་ཕྱིར། ། འགྲོ་ཀུན་དེ་ཡི་སྙིང་པོ་ཅན། །ཞེས་པ་ལ་སོགས་པ་རྒྱས་པར་གསུངས་སོ། །དེ་ལྟ་བས་ན་སེམས་ཙམ་པ་རིགས་ཆད་འདོད་ཀྱི་དབུ་མ་པ་མི་འདོད་ཅེས་པ་དང༌། སེམས་ཙམ་པ་ཐེག་ཅིག་དྲང་དོན་དུ་འདོད་ཅེས་པ་དང༌། ངོ་བོ་ཉིད་གསུམ་སེམས་ཙམ་པ་ཁོ་ནའི་ཆོས་སྐད་ཡིན་ཞེས་པ་དང༌། ཀུན་གཞི་རྣམ་ཤེས་ལ་སོགས་པ་རྣམ་ཤེས་ཚོགས་བརྒྱད་སྟོན་པས་སེམས་ཙམ་ཉིད་དུ་གྲུབ་ཅེས་པ་ལ་སོགས་པར་གྲགས་པ་ངན་པས་ཁྱབ་པར་བྱས་པ་ལ་ནི་ཤེས་བྱེད་རྣམ་དག་ཅུང་ཟད་ཀྱང་མི་སྣང་ཞིང་གནོད་བྱེད་ཆེན་པོ་ཤིན་ཏུ་མང་བར་འདུག་པས་དུག་བཞིན་དུ་དོར་བར་བྱ་སྟེ་དེ་དག་ནི་སེམས་འགྲེལ་གྱི་མན་ངག་ཟབ་མོ་དང་མ་མཇལ་བས་སེམས་ཙམ་ལ་བདེན་གཉིས་སུ་འབྱེད་མ་ཤེས་པ་དང༌། གཞུང་འགའ་ཞིག་གི་འབྲུ་མ་ནོན་པ་ལ་བརྟེན་ནས་འཁྲུལ་ཞིང་བརྒྱུད་མར་འཁྲུལ་བའི་ཕྱིར་རོ། །དེ་བཞིན་དུ་རྒྱུད་སྡེ་ཟབ་མོ་གཞན་དང༌། གཞན་རྣམས་སུ། སེམས་ཆེན་པོ་དང༌། རྡོ་རྗེའི་སེམས་དང༌། བྱང་ཆུབ་སེམས་དང༌། བདེ་བའི་སེམས་དང༌། ཆགས་པ་ཆེན་པོ་དང༌། ཞེ་སྡང་ཆེན་པོ་དང༌། གཏི་མུག་ཆེན་པོ་དང༌། སེམས་དང་སེམས་བྱུང་གཞན་དང༌། རྣམ་ཤེས་གཞན་ལ་སོགས་པ་རྣམ་པ་མང་པོའི་སྒོ་ནས་དོན་དམ་པའི་སེམས་ཉིད་ཡང་དང་ཡང་དུ་གསུངས་ཤིང༌། དེ་ལས་གཞན་པའི་ཆོས་འགའ་ཡང་གཤིས་ཀྱི་གནས་ལུགས་ལ་མེད་པའི་ཕྱིར། ཆོས་ཀྱི་དབྱིངས་ལས་མ་གཏོགས་པའི་ཆོས་འགའ་ཡང་མེད་པར་གསུངས་པ་རྣམས་དང་དོན་གཅིག་པ་ཡིན་ནོ། །དེའི་ཕྱིར་གནས་སྐབས་སུ་སེམས་ཙམ་སྟོན་ཡང༌། མཐར་དེ་ལས་འདས་པ་དབུ་མ་ཆེན་པོའི་དོན་ཟབ་ཅིང་རྒྱ་ཆེ་བ་སྟོན་པའི་གཞུང་ལུགས་ཁྱད་པར་དུ་འཕགས་པ་རྣམས་སེམས་ཙམ་གྱི་རང་གཞུང་དུ་ཕབ་ན་དམ་པའི་ཆོས་སྤང་གི་ལས་སུ་འགྱུར་རོ།།