བཞི་བ་སྨན་གྱི་གཞི་འཆད་པ།

བཞི་བ་སྨན་གྱི་གཞི་འཆད་པ་ལ།

རྩ་བར། སྨན་བསྟེན་པར་བྱའོ། །ཞེས་སོ། །

འདིའི་དོན་བཤད་པ་ལ་བརྒྱད་ལས། དང་པོ་དགོས་པའི་དོན་ནི། སྨན་བསྟེན་པས་དགེ་སློངབདེ་བ་ལ་རེག་པར་གནས་པ་དང་སྦྱིན་བདག་གིས་བསོད་ནམས་འཐོབ་པའོ། །

གཉིས་པ་སྨན་དེ་རྒྱུ་གང་ལས་བསྒྲུབ་པ་ནི། ལོག་འཚོ་སྤངས་ཤིང་ཡང་དག་པའིའཚོ་བ་ལས་བསྒྲུབ་པའོ། །

གསུམ་པ་སྨན་གྱི་དབྱེ་བ་ནི། དབྱེ་གཞི་ནི་སྨན་ཙམ་མོ། །སྨན་མཚན་ཉིད་ཐ་དད་ཀྱི་སྒོ་ནས་ཕྱེ་བས་འདིར་སྨན་རྣམ་པ་བཞིར་དབྱེ་སྟེ། རྩ་བར། དེ་ནི་རྣམ་པ་བཞིའོ། །དུས་སུ་རུངབ་དང༌། ཐུན་ཚོད་དུ་རུང་བ་དང༌། ཞག་བདུན་པ་དང༌། འཚོ་བའི་བར་དུ་བཅང་བ་ཉིད་དོ། །ཞེས་གསུངས་པས་སོ། །

བཞི་པ་སྨན་གྱི་མཚན་ཉིད་ལ་གཉིས་ལས། དང་པོ་སྨན་སྤྱིའི་མཚན་ཉིད་ལ། མཚན་གཞི་ནི་འཚོ་བའི་རྟེན་བྱེད་པའི་ཁམ་ཟས་ཏེ། ལུང་ལས། བྲམ་ཟེའི་ཁྱེའུ་དག་འདི་དགཐམས་ཅད་ནི་སྨན་ཡིན་ཞེས་དྲང་སྲོང་རྒྱུན་ཤེས་ཀྱིས་བཤད་པ་བཞིན་ནོ། །སྨན་གྱི་ཐ་སྙད་དུ་མཚོན་པའི་མཚན་ཉིད་ནི། འདོད་ཁམས་པའི་འཚོ་བའི་རྟེན་བྱེད་པའི་དྲི་རོ་རེག་བྱའི་སྐྱེ་མཆེདགསུམ་གྱིས་བསྡུས་པའི་ཁམ་ཟས་དེའོ། །མཚོ་ཊཱིཀ་ལས། སྨན་སྤྱིའི་མཚན་ཉིད་ལ། མཚན་གཞི་ནི་ཕྱི་རོལ་གྱི་དངོས་པོ་ཙམ་སྟེ། ལུང་ལས། བྲམ་ཟེའི་ཁྱེའུ་དག་འདི་དག་ཐམས་ཅད་ནི་སྨན་ཡིན་ཞེས་དྲང་སྲོང་རྒྱུན་ཤེས་ཀྱིས་བཤད་པ་བཞིན་ནོ། །སྨན་གྱི་ཐ་སྙད་དུ་མཚོན་པའི་མཚན་ཉིད་ནི། དྲི་རོ་རེག་བྱ་སྟེ་སྐྱེ་མཆེད་གསུམ་འདུས་པའི་བདག་ཉིད་དོ། །ཞེས་གསུངས་པ་ལྟར་ན་ཕྱིའི་གཟུགས་ཀྱི་སྐྱེ་མཆེད་སྨན་ཡིན་པར་འགྱུར་ལ། འདོད་ན། མཛོད་ལས། གཟུགསཀྱི་སྐྱེ་མཆེད་མ་ཡིན་དེས། །རང་དབང་གྲོལ་ལ་མི་ཕན་ཕྱིར། །ཞེས་གསུངས་པ་དང་འགལ་བར་འགྱུར་རོ། །སྒོ་མང་ཡིག་ཆར་དྲི་ཁོ་ནར་གྱུར་བའི་སྨན་ཡོད་པ་ནི། རྩ་བར། དུ་བ་རྔུབ་པར་བྱའོ། །ཞེས་པས་སྒྲུབ་པར་བྱེད་དོ། །

གཉིས་པ་སྨན་སོ་སོའི་མཚན་ཉིད་ལ་བཞི་ལས། དུས་སུ་རུང་བའི་སྨན་གྱི་མཚན་ཉིད་ནི།

སྨན་གང་ཞིག་བཀྲེས་པའི་ནད་སེལ་བ་ལ་གཙོ་བོར་ཞུགས་པའོ། །མཚན་གཞི་ནི། བཟའ་བདང་བཅའ་བའོ། །ཐུན་ཚོད་དུ་རུང་བའི་སྨན་གྱི་མཚན་ཉིད་ནི། སྨན་གང་ཞིག རྒྱུ་དུས་སུ་རུངབ་ལས་བྱུང༌། ངོ་བོ་བཏུང་བའི་བདག་ཉིད་དུ་གནས། ཅུང་ཟད་སླ་བ་དེ་ཡིན་ཏེ། རྩ་བར། ཐུནཚོད་དུ་རུང་བ་ནི་བཏུང་བ་དག་གོ །ཤིན་ཏུ་སླ་བའོ། །ཞེས་གསུངས་པའི་ཕྱིར་རོ། །མཚོ་ཊཱིཀ་ལས། དངོས་པོ་གང་ཞིག ཅེས་པ་གཞན་སྔར་ལྟར་ཡིན་ལ། སྒོ་མང་ཡིག་ཆར་རྒྱུ་སྨན་གཞནགསུམ་ལས་བྱུང་བ་ཡོད་པར་གསུངས་སོ། །ཞག་བདུན་པའི་སྨན་གྱི་མཚན་ཉིད་ནི། སྨན་གངཞིག་བཀྲེས་པ་དང་འདུས་པ་གཉིས་ཀའི་ནད་སེལ་བ་ལ་གཙོ་བོར་ཞུགས་པའོ། །སྒོ་མང་ཡིགཆར། སྨན་བཞི་བོ་གང་རུང་གང་ཞིག ཞག་བདུན་པའི་མཐའ་ཚུན་ཆོད་དུ་བྱིན་གྱིས་བརླབསཤིང་ལོངས་སྤྱོད་པར་གནང་བའི་སྨན་དེ་དེ་ཡིན་པའི་ཕྱིར། ཞེས་གསུངས་སོ། །འཚོ་བའི་བརདུ་བཅང་བའི་སྨན་གྱི་མཚན་ཉིད་ནི། སྨན་གང་ཞིག་འདུས་པའི་ནད་སེལ་བ་ལ་གཙོ་བོར་ཞུགསཔའོ། །སྒོ་མང་ཡིག་ཆར། སྨན་བཞི་གང་རུང་གང་ཞིག ཇི་སྲིད་འཚོའི་བར་དུ་བྱིན་གྱིས་བརླབསནས་བཅང་དུ་རུང་བར་གནང་བའི་སྨན་དེ་དེ་ཡིན་པའི་ཕྱིར། ཞེས་གསུངས་སོ། །འདི་ལ་ཚེ་ཇི་སྲིད་འཚོའི་བར་དང༌། ནད་ཇི་སྲིད་འཚོའི་བར་བྱིན་གྱིས་བརླབས་ནས་བཅང་བ་གཉིསཡོད་དེ། འདུལ་བ་ཀུན་བཏུས་ལས། དེ་ཕྱིན་ཆད་བདག་ཉིད་ཇི་སྲིད་འཚོའི་བར་དུའམ་སྨནདེ་དག་ཇི་སྲིད་མ་ཟད་ཀྱི་བར་དུ་བྱིན་ལེན་མ་ཞིག་པར་བྱས་ཏེ། རང་གི་བསྟེན་ཅིང་བཟའ་བར་བྱའོ། །ཞེས་དང༌། ཞུ་བ་གཉིས་ལས། ཇི་སྲིད་འཚོའི་བར་དུ་བཅང་བ་ནི། ཇི་སྲིད་འཚོའིབར་དུ་ཡོངས་སུ་ལོངས་སྤྱོད་པར་བྱའོ། །གལ་ཏེ་ཡོངས་སུ་སྤྱད་ན་ཅིར་འགྱུར་ལ། གསོགའཇོག་བྱས་པ་ཡོངས་སུ་སྤྱད་པས་ལྟུང་བྱེད་དུ་འགྱུར་རོ། །ཞེས་གསུངས་པའི་ཕྱིར་རོ། །མཚོཊཱིཀ་ལྟར་ན་སྨན་བཞི་ལས་དང་པོ་དུས་སུ་རུང་བ་མ་ཡིན་པ་གཞན་གསུམ་པོ་དག་ནི་ནད་པའིཕྱིར་བྱིན་གྱིས་བརླབ་ཅིང་བསྟེན་པར་བྱའོ། །ཊཱི་ཀ་ལས། དེ་དག་ནི་ནད་པའི་ཕྱིར་གནང་བ་ཡིན་གྱི་མི་ན་བའི་ཕྱིར་ནི་མ་ཡིན་ནོ། །ཞེས་སོ། །ལུང་གཞི་ལས། ཐུན་ཚོད་དུ་རུང་བ་བྱིན་གྱིསབརླབས་པ་དང་ཞག་བདུན་པ་བྱིན་གྱིས་བརླབས་པ་དང༌། འཚོ་བའི་བར་དུ་བཅང་བ་བྱིན་གྱིསབརླབས་པ་དེ་དག་བྲོ་མ་འཚལ་བས་འཚལ་དུ་རུང་ངམ། ཉེ་བར་འཁོར་མི་རུང་ངོ། །ཞེསགསུངས་སོ། །དེའི་དམིགས་བསལ་ནི་བུ་རམ་བྱིན་གྱིས་བརླབས་པ་དེ་དགེ་སློང་ལམ་དུ་ཞུགསཔ་དང་དགེ་བསྐོས་ལ་སོགས་པས་བཟའ་རུང་ངོ། །རུང་ཆུས་བཏབ་པ་ལ་སོགས་པ་དེ་ལྟ་བུ་ཉིད་ཀྱི་མདུན་རོལ་ཏུ་ཆུས་མ་བཏབ་ཅིང་ཚགས་ཀྱིས་མ་བཙགས་པ་དེ་སྲིད་དུ་བཅོས་པའི་ཚྭ་ལ་སོགས་པ་དག་ལ་བསྙེན་པར་རྫོགས་པ་མཚན་མཐུན་པས་ཟ་བའི་ཆེད་དུ་བྱིན་ལེན་བྱ་བའིཕྱིར་རེག་ཏུ་མི་རུང་སྟེ། ཊཱི་ཀ་ལས། བསྙེན་པར་རྫོགས་པ་མཚན་མཐུན་པས་བྱིན་ལེན་མིབྱའོ། །ཞེས་གསུངས་སོ། ། བཏུང་བ་དེའི་རྫས་སམ་རྒྱུ་དེ་ནི་འབྲས་བུ་བཏུང་བ་དེ་དང་སྨནགྱི་རིགས་གཅིག་པ་དེ་ཉིད་མ་ཡིན་ཞིང་བཅས་ལྡན་མཚན་མཐུན་བསྙེན་རྫོགས་ཀྱིས་རེག་ན་ལག་ཉའི་ཉེས་པར་འགྱུར་བའི་ཕྱིར། གལ་ཏེ་བཏུང་བ་དེའི་རྒྱུ་དུས་སུ་རུང་བ་ལས་སྒྲུབ་པ་ཡིནན་དེ་ནི་བསྙེན་རྫོགས་ཀྱིས་སྦྱར་ཞིང་ཚགས་ཀྱིས་བཙག་པར་མི་བྱ་སྟེ་ཞེས་ཤུགས་ཀྱིས་བསྟནཏོ། །འོ་ན་གང་གིས་སྦྱར་ཞིང་ཚགས་ཀྱིས་བཙག་པར་བྱ་ཞེ་ན། རྩ་བར། བསྙེན་པར་མ་རྫོགསཔས་སྦྱར་ཞིང་ཚགས་ཀྱིས་ཀྱང་བཙག་པར་བྱ། ཞེས་སོ། །དུས་མ་ཡིན་པར་རུང་བ་ཉིད་ཡིནན་ནི་བསྙེན་པར་རྫོགས་པས་སྦྱར་ཞིང་བཙགས་པ་ལ་ཡང་ཉེས་པ་མེད་དོ་ཞེས་རང་གི་རྣམབཤད་དང་ཊཱི་ཀ་ལས་མཐུན་པར་གསུངས་ཏེ། དེ་ནི་མདོ་རྩ་བས་ཀྱང་ཤུགས་ཀྱིས་བསྟན་ཏོ། །

འོ་ན་བཏུང་བའི་རྫས་དེ་དགེ་སློང་གིས་ཚགས་ཀྱིས་བཙག་ཏུ་རུང་ན། བྱིན་ལེན་མ་བྱས་པརརེག་ན་ནི་ལག་ཉར་བླངས་པའི་ཉེས་པར་འགྱུར་ལ། བྱིན་ལེན་བྱས་ནས་ཚགས་ཀྱིས་འཚགགོ་ཞེ་ན། དེ་ལྟ་བུ་ཉིད་ཀྱི་མདུན་རོལ་ཏུ་བསྙེན་པར་རྫོགས་པ་མཚན་མཐུན་པས་རེག་ཏུ་མི་རུངངོ་ཞེས་བཏུང་བའི་རྫས་དེ་ཚགས་ཀྱིས་མ་བཙགས་པ་ན་ཆོ་ག་མ་རྫོགས་པས་བཟའ་བའི་ཆེདབྱིན་ལེན་བྱར་མི་རུང་བར་གསུངས་པ་དང་འགལ་ལོ། །དེས་ན་བཏུང་བའི་རྫས་དེ་དགེ་སློང་གིས་ཇི་ལྟར་ཚགས་ཀྱིས་བཙག་པར་བྱ་སྙམ་ན། ལག་ཉ་ཁེགས་པའི་བྱིན་ལེན་བྱས་ཏེ་དགེསློང་གིས་སྦྱར་ཞིང་བཙག་པ་སྟེ། བམ་པོ་ལྔ་བཅུ་པ་ལས། གལ་ཏེ་དུས་མ་ཡིན་པར་རུང་བའིརྫས་ལས་བཏུང་བ་དེ་སྦྱོར་ན་ནི། བསྙེན་པར་རྫོགས་པས་ཀྱང་རྫས་དེ་ཉིད་བྱིན་ལེན་བྱསཏེ་སྦྱར་ཞིང་བཙགས་ལ། གང་གི་ཚེ་འཐུང་བའི་ཆུ་གྲང་མོ་གདབ་པ་དང༌། བྱིན་ལེན་སྟོབ་ཏུ་བཅུག་ནས་བཏུང་ཞེས་བཤད་དོ། །བཏུང་བའི་རྒྱུ་དེ་རྒུན་འབྲུམ་ལ་སོགས་པ་དུས་རུང་བ་ཉིདཡིན་ན་མཚན་མོའི་ཐུན་ཚོད་ཀྱི་མཐའ་གང་ཡིན་པ་དེ་བཏུང་བ་དེའི་མཐའ་ཡིན་ཏེ། བཏུང་བདེ་བྱིན་གྱིས་བརླབ་ཏུ་རུང་བའི་མཐའ་ཡང་དེ་ཡིན་ལ། བྱིན་གྱིས་བརླབ་པ་དེ་བཞག་ཅིང་བཏུངདུ་རུང་བའི་མཐའ་ཡང་དེ་ཡིན་ནོ། འོ་ན་ཐུན་ཚོད་ཀྱི་མཐའ་དེ་རང་གང་ཞེ་ན། ལུང་གཞི་ལས།

ཐུན་ཚོད་དུ་རུང་བའི་བཏུང་བ་འདི་དག་དུས་སུ་བྱིན་གྱིས་བརླབས་ན་དུས་མ་ཡིན་པར་ཡང་ལོངས་སྤྱོད་པར་བྱ་ལ་ནམ་གྱི་ཐུན་དང་པོ་ཐལ་ནས་ནི་ལོངས་སྤྱད་པར་མི་བྱའོ། །ཞེས་གསུངསལ། དེ་དང་མཐུན་པར་བམ་པོ་ལྔ་བཅུ་པ་ལས། མཚན་མོའི་ཐུན་ཚོད་དང་པོ་ལས་འདས་ནགསོག་འཇོག་ཏུ་འགྱུར། ཞེས་གསུངས་སོ། །འོན་ཀྱང་མཚན་མོའི་ཐུན་ཚོད་ཀྱི་སྐད་ཅིག་དངཔོ་ལས་འདས་ན་གསོག་འཇོག་ཏུ་འགྱུར་ཞེས་དགོངས་པ་བཀྲལ་བར་བྱ་སྟེ་འགྲེལ་ཆུང་ལས་དྲོ་ཟོས་ནས་དམར་ཐག་མ་ཆད་ཚུན་ཆད་དགེ་སློང་འཐུང་དུ་དབང༌། དམར་ཐག་གི་མཚམས་འདས་ཏེ་འཐུང་དུ་མི་དབང་ཞེས་གསུངས་ཤིང༌། ཉི་མ་ནུབ་ཏེ་དམར་ཐག་ཆད་པ་ལས་འདསན་གསོག་འཇོག་བྱས་པའོ་ཞེས་ཀྱང་འགྲེལ་ཆུང་ལས་གསུངས་པ་དང༌། ཊཱི་ཀ་ལས། ཉི་མནུབ་པའི་འོག་ཏུ་འོད་དམར་པོ་ཆགས་པ་གང་ཡིན་པ་དེ་འདས་པར་གྱུར་པ་གང་ཡིན་པ་དེ་མཚནམོའི་དང་པོ་ཡིན་ཞེས་གསུངས་པས་ཀྱང་ངོ༌། །བཏུང་བ་དེའི་རྫས་སམ་རྒྱུ་དེ་དུས་སུ་རུང་བ་ལསགཞན་ཞག་བདུན་པའམ་འཚོ་བའི་བར་དུ་བཅང་བ་ཉིད་ཡིན་ན་རྒྱུ་དེའི་བྱིན་གྱིས་བརླབཏུ་རུང་བའི་མཐའ་གང་ཡིན་པ་དེ་ནི་འབྲས་བུ་བཏུང་བ་དེ་ནི་ལོངས་སྤྱོད་དུ་རུང་བའི་མཐའ་ཡང་དེ་ཡིན་པའོ། །འདི་ནི་ལུང་སིལ་བུའི་བུ་རམ་གྱི་བཏུང་བའི་སྐབས་ནས་བཙུན་པ་བཏུང་བ་བཙགས་པ་དགུང་བདུན་པར་བྱིན་གྱིས་བརླབ་ཏུ་རུང་ངམ། ཉེ་བར་འཁོར་རུང་ངོ། །ཞེསགསུངས་པའོ། །དེས་ན་རྒྱུ་ཞག་བདུན་པ་ལས་བྱས་པའི་འབྲས་བུ་བཏུང་བ་དེ་ཡང་ཞག་བདུནཔའི་རིགས་ཉིད་ཡིན་ལ། དེ་བཞིན་དུ་རྒྱུ་འཚོ་བའི་བར་བཅང་པ་ལས་བྱས་པའི་འབྲས་བུ་བཏུངབ་དེ་ཡང་འཚོ་བའི་བར་དུ་བཅང་པའི་རིགས་ཉིད་ཡིན་པའོ། །གལ་ཏེ་རྒྱུ་བུ་རམ་ལས་བྱསཔའི་བཏུང་བ་དེ། ཞག་བདུན་པའི་རིགས་ཉིད་ཡིན་ན་ནི། རང་གི་རྣམ་བཤད་དང་ཊཱི་ཀ་ལསདུས་སུ་རུང་བ་མ་ཡིན་པའི་རྫས་ལས་བྱས་པའི་བཏུང་བ་དེ་བཏུང་བ་ཉིད་ཀྱི་ཕྱིར་དུས་ཐམསཅད་པ་ཉིད་ཡིན་པར་ཤེས་པར་བྱ་ཞིང༌། བྱིན་གྱིས་བརླབ་པའི་ཕྱིར་ནི་ཐུན་ཚོད་དུ་རུང་བ་ཉིདཡིན་པར་ཤེས་པར་བྱའོ་ཞེས་གསུངས་པ་དང་འགལ་ཞེ་ན་རྒྱུ་བུ་རམ་ལས་བྱས་པའི་བཏུངབ་དེ་ཞག་བདུན་པའི་རིགས་ཉིད་ཡིན་ཡང་ཐུན་ཚོད་དུ་རུང་བར་བྱིན་གྱིས་བརླབ་ཏུ་རུང་སྟེ། དུས་ལྷག་པ་ལ་བརྟེན་ནས་མི་འཆགས་ཀྱང༌། དུས་ཉུང་བ་ལ་བརྟེན་ན་སྐབས་འདིར་བྱིན་རླབསའཆགས་པ་ཡོན་ཏན་ཡར་ལྡན་ཡིན་པའི་ཕྱིར། ཞེས་གསུངས་སོ། །དེས་ན་ཊཱི་ཀ་ལས། ཐུནཚོད་ཀྱི་མཐའ་དང་ལྷན་ཅིག་འགལ་བ་མེད་དོ་ཞེས་གསུངས་ཏེ། ཐུན་ཚོད་དུ་རུང་བར་བྱིན་གྱིསབརླབ་ཏུ་རུང་བའི་ཕྱིར་ཐུན་ཚོད་ཀྱི་མཐའ་དང་འགལ་བ་མེད་པའོ། །མར་དཀར་དུས་སུ་རུངབ་ཡིན་ན་ལུང་སྨན་གྱི་གཞི་ལས། ཞག་བདུན་པ་ནི་མར་དཀར་དང་ཏིལ་མར་དང་སྦྲང་རྩི་དངཞེས་གསུངས་པ་དང་འགལ་ལོ། །ཧྭགས་དང་ལི་ཁ་རའི་ཁྱད་པར་ནི་བུ་རམ་གྱི་ལྦུ་བའི་ཕྱེ་མ་རྡོག་པོར་མ་བྱས་པ་ན་ཧྭགས་ཞེས་བྱ། དེ་ཉིད་རྡོག་པོར་བྱས་པ་ན་ལི་ཁ་ར་ཞེས་བྱ་སྟེ། ཤ་ཁར་དང་ཀ་ར་ཞེས་ཀྱང་བྱའོ། །དེ་དག་མཚོ་ཊཱིཀ་གསུངས་ཟིན་ལྟར་བཀོད་པའོ། །ཅུང་ཟད་དཔྱདན་ཞག་བདུན་པའི་སྨན་དུ་གྱུར་བའི་བུ་རམ་དེ་དུས་རུང་གི་སྨན་ཡིན་ཏེ། བཟའ་བ་ཡིན་པའིཕྱིར། ཁྱབ་སྟེ། ཊཱི་ཀ་ལས། དུས་སུ་རུང་བ་ཞེས་བྱ་བ་ནི། བཟའ་བར་བྱ་བ་ཐམས་ཅད་དུསསུ་རུང་བ་ཡིན་པས་ལོགས་ཤིག་ཏུ་མ་བརྗོད་དེ། བྱེ་བྲག་མེད་པའི་ཕྱིར། ཞེས་གསུངས་པའི་ཕྱིར། གོང་དུ་འདོད་ན། ཉི་མ་ཕྱེད་ཡོལ་ནས་སྤྱད་མི་རུང་བར་ཐལ། དུས་རུང་གི་སྨན་ཡིན་པའི་ཕྱིར། ཁྱབ་སྟེ། དུས་རུང་གི་སྨན་དང་ཐུན་ཚོད་དུ་རུང་བའི་སྨན་གཉིས་ལ་ཕྱི་དྲོ་སྤྱད་རུངམི་རུང་གི་ཁྱད་ཡོད་པ་སོགས་ཀྱིས་གྲུབ་པའི་ཕྱིར་ཟེར་བ་དང༌། བུ་རམ་དེ་དུས་རུང་གི་སྨན་མིན་ཟེར་ན་བུ་རམ་གྱི་ཁུ་བ་ཤིན་ཏུ་སླ་བ་ཐུན་ཚོད་དུ་རུང་བའི་སྨན་དེ་རྒྱུ་དུས་རུང་ལས་མ་བྱུང་བར་འགྱུར་ལ། དེ་ལྟར་ན་དེ་ལ་མཚོ་ཊཱིཀ་ཏུ་བཞག་པའི་ཐུན་ཚོད་དུ་རུང་བའི་སྨན་གྱི་མཚན་ཉིད་མ་ཚང་བར་འགྱུར་བའི་ཕྱིར་ཟེར་བ་དག་ལ་དཔྱད་པར་ཞུ། སྨན་གཞི་ལས། ནམགྱི་ཐུན་དང་པོ་ཐལ་ནས་ནི་ལོངས་སྤྱད་པར་མི་བྱའོ། །ཞེས་གསུངས་ལ། སྐབས་འདིར་འཇམབཞད་ཀྱིས། འདི་དུས་རུང་ལས་བྱུང་བ་ཡིན་པས་ཞིབ་ཆ་དགོས་ཏེ། རྩ་བར། གཞན་ཉིདཡིན་ན་དེའི་གང་ཡིན་པའོ། །ཞེས་བཤད་ཡོད་དོ། །ཐུན་ཚོད་དུ་རུང་བའི་སྨན་ཉི་མ་དམརཐག་ཆད་པ་ནས་སྤྱད་མི་རུང་བས་ཁྱབ་ཟེར་བ་ལྟར་ན་ཞག་བདུན་པའི་སྨན་དེ་ཞག་བདུན་གྱི་བར་སྤྱད་མི་རུང་བར་འགྱུར་དགོས་ལ། དེ་མི་རིགས་ཏེ། རྩ་བར། དུས་སུ་རུང་བ་ཉིད་ན་ཐུན་ཚོད་ཀྱི་མཐའ་ཡིན་ནོ། །གཞན་ཉིད་ཡིན་ན་དེའི་གང་ཡིན་པའོ། །ཞེས་དང༌། མཚོ་ཊཱིཀ་ལས། བཏུང་བ་དེའི་རྫས་སམ་རྒྱུ་དེ་དུས་སུ་རུང་བ་ལས་གཞན་ཞག་བདུན་པའམ་འཚོ་བའི་བར་དུ་བཅངས་བ་ཉིད་ཡིན་ན་རྒྱུ་དེའི་བྱིན་གྱིས་བརླབ་ཏུ་རུང་བའི་མཐའ་གང་ཡིན་པདེ་ནི། འབྲས་བུ་བཏུང་བ་དེ་ནི་ལོངས་སྤྱད་དུ་རུང་བའི་མཐའ་ཡང་དེ་ཡིན་པའོ། །ཞེས་གསུངསཔའི་ཕྱིར་ཟེར་ན་སྨན་བཞིར་ཕྱེ་བའི་སྨན་བཞི་འགལ་བས་དེ་དག་སོ་སོར་སྤྱད་པའི་མཐའཡང་འགལ་ཡང་སྤྱིར་མི་འགལ་ལམ་དཔྱད་པར་འཚལ་ལོ། །

ལྔ་པ་སྨན་བྱིན་གྱིས་བརླབ་པའི་ཚུལ་ནི།

རྩ་བར། བྱིན་གྱིས་བརླབས་པ་ལ་གསོགའཇོག་མི་འབྱུང་ངོ༌། །ཞེས་པ་ལ་སཽགས་པས་བསྟན་ཏོ། །འདིའི་དོན་བཤད་པ་ལ་བརྒྱད་ལས།

དང་པོ་དགོས་པ་ནི། གསོག་འཇོག་མི་འབྱུང་བ་དང་སྔར་གྱི་བྱིན་ལེན་ལན་ཅིག་བྱས་པ་དེསཆོག་སྟེ་ཡང་དང་ཡང་དུ་ཟ་བ་ན་ཡང་དང་ཡང་དུ་བྱིན་ལེན་བྱེད་མི་དགོས་པས་ཚེགས་ཆུངབས་བདེ་བ་ལ་རེག་པར་གནས་པ་དང༌། བཅས་པའི་ས་མཚམས་ཟིན་པའོ། །གཉིས་པ་དངོསཔོ་གང་བྱིན་གྱིས་བརླབ་པ་ནི་བདུན་ལས། ༡སྨན་གསུམ་ལས་གང་ཡང་རུང་བ་ཡིན་པ་སྟེ་དངཔོ་མ་ཡིན་པ་དག་ནི། ཞེས་གསུངས་པས་སོ། །༢རུང་བ་ཡིན་པ་སྟེ། ལག་ཉར་བླངས་པ་དངཞེས་མི་རུང་བ་ལ་བྱིན་རླབས་མི་འཆགས་པར་གསུངས་པས་སོ། །༣ཚད་དང་ལྡན་པ་དང༌། ༤རང་གི་ཡིན་པ་དང༌། ༥མངོན་སུམ་ན་ཡོད་པ་སྟེ། གཞན་དུ་ན་བྱིན་རླབས་ཀྱི་ཆོ་གའི་འཇུགཡུལ་མ་ཡིན་པའི་ཕྱིར་རོ། །༦རུང་ཆུ་དང་བྱིན་ལེན་ལ་སོགས་པའི་ཆོ་ག་རྫོགས་པ་སྟེ། ལུངསྨན་གྱི་གཞི་ལས། བཏུང་བ་བརྒྱད་པོ་འདི་དག་དུས་སུ་བྱིན་ལེན་བྱས། དུས་སུ་མཉེས། དུསསུ་བཙགས། དུས་སུ་བྱིན་གྱིས་བརླབས་ཞེས་གསུངས་པ་དང༌། བྱིན་ལེན་བྱས་ཏེའོ། །ཞེསགསུངས་པས་སོ། །བྱིན་ལེན་མ་བྱས་པ་ལ་བྱིན་རླབས་མི་འཆགས་སོ་ཞེས་གཞུང་ལས་གསུངསསོ། །༧སྔར་བྱིན་གྱིས་བརླབས་པ་དང་མ་འབྲེལ་བ་སྟེ། གཞན་དུ་ན་རྫས་གཞན་གྱི་སྟེང་དུ་ཆོག་དོན་མེད་པའི་ཕྱིར་རོ། །གསུམ་པ་ཡུལ་གང་གི་མདུན་དུ་བྱིན་གྱིས་བརླབ་པ་ནི། ཡུལ་དགེ་སློང་ཆོས་བདུན་ལྡན་གྱི་མདུན་དུའོ། །ཡུལ་མེད་ན་རང་གཅིག་པུས་ཀྱང་བྱིན་གྱིས་བརླབ་སྟེ། གནས་ནས་ཕྱུང་བས་ཀྱང་ངོ༌། །བཞི་པ་རྟེན་གང་གིས་བྱིན་གྱིས་བརླབ་པ་ནི། བསྙེན་པརརྫོགས་པའམ་དགེ་སློབ་མའི་སྡོམ་པ་གསོར་རུང་ཡན་ཆད་དང་ལྡན་པ་སྟེ། རྟེན་དེ་དག་ལགསོག་འཇོག་གི་ཉེས་པ་འབྱུང་བ་དགག་དགོས་པའི་ཕྱིར་རོ། །ཤེས་པ་རང་བཞིན་དུ་གནས་པ་དང༌། ལུས་ཐ་མལ་པར་གནས་པ་སྟེ། གཞན་དུ་ན་ཆོ་ག་འཆགས་པའི་རྟེན་མ་ཡིན་པའིཕྱིར་རོ། །ནད་པ་ལ་སོགས་པ་སྨན་བྱིན་གྱིས་བརླབ་པའི་རྐྱེན་ལྡན་ཡིན་པ་སྟེ། དང་པོ་མ་ཡིན་པ་ཉིད་དག་ནི་ནད་པའི་ཕྱིར་རོ། །ཞེས་དང༌། ནད་པའི་ཆེད་དུ་ཡོངས་སུ་ལོངས་སྤྱད་པའི་ཕྱིར། ཞེས་གསུངས་པས་སོ། །དེའང་ཐུན་ཚོད་དུ་རུང་བ་དང་འཚོ་བའི་བར་དུ་བཅད་པ་གཉིས་ནི་ནདཔ་ཁོ་ནས་བྱིན་གྱིས་བརླབ་ཅིང༌། སྨན་ཞག་བདུན་པ་ནི་གང་ཟག་བཞིས་བྱིན་གྱིས་བརླབ་ཏུརུང་སྟེ། དེ་ཡང་ནད་པས་བྱིན་གྱིས་བརླབ་པར་མ་ཟད། ལམ་དུ་ཞུགས་པ་དང་དགེ་བསྐོས་དངལག་གི་བླས་ཀྱང་བྱིན་གྱིས་བརླབ་ཏུ་རུང་སྟེ། ལུང་སྨན་གྱི་གཞིའི་ལུག་སྐྱེས་ཀྱི་བྱུང་བའི་དགེསློང་ལམ་དུ་ཞུགས་པའི་སྐབས་ལས། དགེ་སློང་གི་བུ་རམ་ཞག་བདུན་པར་བྱིན་གྱིས་བརླབསནས་རང་ཉིད་ཀྱིས་བསྐུར་བར་བྱའོ་ཞེས་ཆོ་ག་ལན་གསུམ་བརྗོད་པ་དང་བཅས་པ་གསུངས་སོ། །དེའི་གནད་ཀྱིས་དགེ་བསྐོས་དང་ལག་གི་བླ་ལ་ཡང་རྒྱུ་མཚན་མཚུངས་པར་སྦྱར་རོ། །དེ་བྱིན་གྱིས་བརླབས་པ་བཟའ་བ་ལ་ལམ་དུ་ཞུགས་པ་དང་དགེ་བསྐོས་དང་ལག་གི་བླ་རྣམས་ནི་ནད་པ་དང་འདྲ་བ་ཉིད་དོ་ཞེས་བྱིན་གྱིས་བརླབས་པ་བཟའ་བ་ལ་ནད་པ་དང་འདྲ་བརགསུངས་པས་བྱིན་གྱིས་རློབ་པ་ལ་ཡང་ནད་པ་དང་འདྲ་ཞེས་སྦྱར་རོ། །ལྔ་པ་དུས་གང་གི་ཚེ་བྱིན་གྱིས་བརླབ་པ་ནི། སྔ་དྲོ་ཁོ་ན་ཡིན་ཏེ། རྩ་བར། ཟས་སྔ་མའི་ཚེའོ། །ཞེས་དང༌། ཊཱི་ཀལས། བསྐོལ་བ་དང་བཙགས་པ་གཉིས་ནི་དུས་སུ་བྱས་ཀྱང་རུང༌། དུས་མ་ཡིན་པར་བྱསཀྱང་རུང་ལ། བྱིན་ལེན་བྱ་བ་དང་བྱིན་གྱིས་བརླབ་པ་ནི་དུས་ཁོ་ནར་བྱ་དགོས་ཏེ། ཞེས་སྔདྲོའི་དུས་ཁོ་ནར་བྱ་བར་གསུངས་སོ། །དེ་ལྟར་སྨན་བྱིན་གྱིས་བརླབ་དུས་ནི་སྔ་དྲོ་ཁོ་ན་ཡིན་ན་ཕྱི་དྲོ་དགེ་སློང་གློ་བུར་ནད་ཀྱིས་བཏབ་ན་འཚོ་བཅངས་ཀྱི་སྨན་བསྟེན་དུ་རུང་ན་བྱིན་གྱིས་བརླབརུང་བ་ཡིན་མིན་གང་ཡིན་དང༌། ཞག་བདུན་པའི་སྨན་དང༌། འཚོ་བཅངས་ཀྱི་སྨན་གཉིས་བྱིན་གྱིས་བརླབ་པའི་དུས་སྔ་དྲོ་དགོས་པའི་རྒྱུ་མཚན་གང་ཡིན་འཚོལ་དགོས་སོ། །དྲུག་པ་ཡུནཇི་སྲིད་དུ་བྱིན་གྱིས་བརླབ་པ་ནི། རང་གི་དུས་ཀྱི་མཐའི་བར་དུ་བྱིན་གྱིས་བརླབ་པར་བྱའོཞེས་གསུངས་ལ། དུས་ལྷག་པ་ལ་བརྟེན་ནས་མི་འཆགས་པའི་ཕྱིར་རོ། །ཞེས་གསུངས་སོ། །

བདུན་པ་ཆོ་ག་གང་གིས་བྱིན་གྱིས་བརླབ་པ་ནི་སྦྱོར་དངོས་མཇུག་གསུམ་སྟེ། སྦྱོར་བ་ནི་རུང་ཆུ་གདབ་པ་དང་ལག་པ་གཉིས་བཀྲུས་ནས་བྱིན་ལེན་བྱ་བ་སྟེ། ཁྱད་པར་དུ་ཡང་བཏུང་བ་བྱིནགྱིས་རློབ་ན་ནི་ཚགས་ཀྱིས་བཙག་པ་ཡང་སྔོན་དུ་འགྲོ་བའོ། །དངོས་གཞི་སྔགས་རྣམ་པརབཞག་པ་ལན་གསུམ་དང༌། མཇུག་ཐབས་ཡིན་ནོ་ཞེས་ལེགས་སོ་ཞེས་སོ། །བརྒྱད་པ་བྱིན་གྱིསབརླབ་པ་འཇིག་པའི་རྒྱུ་ནི། བྱིན་ལེན་འཇིག་པའི་རྒྱུ་ཀུན་གྱིས་འཇིག་སྟེ། བྱིན་རླབས་འཆགསཔའི་རྟེན་ཞིག་པའི་ཕྱིར་རོ། །གནས་སྐབས་རོ་དང་སླ་བར་གྱུར་པ་དང༌། རྟེན་ཞིང་མ་ཡིན་པརགྱུར་པ་དང༌། བྱིན་རླབས་ཀྱི་འཕེན་པ་ཟད་པ་དང༌། སྔགས་ཀྱིས་ཕྱུང་ན་ཡང་འཇིག་གོ། །རོསླར་གྱུར་ན་གསོག་འཇོག་བྱས་པ་འདིའི་ཁུངས་ནི་ལུང་སིལ་བུའི་བུ་རམ་གྱི་བཏུང་བའི་སྐབསལས། བཏུང་བ་བཙགས་པ་དགུང་བདུན་པར་བྱིན་གྱིས་བརླབ་ཏུ་རུང་ངམ། ཉེ་བར་འཁོརརུང་ངོ༌། །བཙུན་པ་ཡུན་ཇི་སྲིད་དུ་བཞག་པ་འཚལ་བར་བགྱི། ཉེ་བར་འཁོར་ཤིན་ཏུ་སླ་ཞིངམི་སྐྱུར་ལ་རང་གི་ངོ་བོ་ཉིད་མི་སྤོང་བ་དེ་སྲིད་དུའོ་ཞེས་གསུངས་པ་ཡིན་ནོ་ཞེས་རང་འགྲེལ་དང་ཊཱི་ཀས་ལུང་དེ་དྲངས་སོ། །ཊཱི་ཀ་ལས། བྱིན་ལེན་མ་བྱས་པ་ལ་གསོག་འཇོག་མི་སྲིད་པའིཕྱིར་རོ་ཞེས་གསུངས་པ་ལ། རང་གི་རྣམ་བཤད་ལས་འདི་ལ་གསོག་འཇོག་ཉིད་ལས་གཞནཔའི་རྒྱུ་རྣམ་པར་མི་གནས་པ་དེ་བས་ན་གསོག་འཇོག་ཉིད་དུ་ཤེས་པའོ་ཞེས་རོ་སླར་གྱུར་པ་འདི་ལ་འབྲས་བུ་གསོག་འཇོག་འབྱུང་བར་གསུངས་པས། དེའི་རྒྱུ་དུས་ན་བྱིན་ལེན་ཡོད་པར་འབྲས་བུའི་རྟགས་ཀྱིས་གྲུབ་བོ། །ཊཱི་ཀ་ལས། བྱིན་ལེན་མ་བྱས་པའི་ཕྱིར་རོ་ཞེས་པ་དེ་བྱིནལེན་མ་བྱས་པ་དང་འདྲ་བའི་ཕྱིར་རོ་ཞེས་དགོངས་པ་ཡིན་ནོ་ཞེས་སྔོན་གྱི་འདུལ་བ་འཛིན་པ་རྣམས་མཐུན་པར་གསུང་ཞེས་མཚོ་ཊཱིཀ་ལས་སོ། །