འཕགས་པ་ལྕགས་མཆུ་ནག་པོ་ཞེས་བྱ་བའི་གཟུངས།

༄༅། །ལྕགས་མཆུ་ནག་པོ་བཞུགས་སོ། །

རྒྱ་གར་སྐད་དུ། །ཨཱརྻ་ལོ་ཧ་ཀཱ་ལ་དུནྜ་ནཱ་མ་དྷ་ར་ཎི། བོད་སྐད་དུ། འཕགས་པ་ལྕགས་མཆུ་ནག་པོ་ཞེས་བྱ་བའི་གཟུངས། སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འདམ་བུའི་ཁྲོད་ན། གཟིངས་མའི་འདུག་གནས་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འཛམ་བུའི་གླིང་གི་གནས་དེར་འདོང་ངོ༌། །བཙུན་པ་དེ་ལྟར་བགྱིའོ་ཞེས་གསོལ་ནས། ཚེ་དང་ལྡན་པ་ཀུན་དགའ་བོས། བཅོམ་ལྡན་འདས་ཀྱི་ལྟར་མཉན་ནོ། །དེ་ནས་བཅོམ་ལྡན་འདས་ཀྱིས་འཛམ་བུའི་གླིང་གི་སེམས་ཅན་རྣམས་ལ་ཐུགས་བརྩེ་བའི་ཕྱིར། ཀླུའི་རྒྱལ་པོ་མ་དྲོས་པ་དང༌། རྒྱ་མཚོ་དང༌། དགའ་བོ་དང༌། འཇོག་པོ་དང༌། མཐའ་ཡས་དང༌། དུང་སྐྱོང་དང༌། གཟི་ཅན་དང༌། ཨེ་ལའི་འདབ་མ་ཅན་དང༌། མདོངས་བུ་དང༌། ཀླུའི་རྒྱལ་པོ་གློག་འབྱིན་དང༌། ཀླུའི་རྒྱལ་པོ་ཆུ་ལྷ་དང༌། ཀུའི་རྒྱལ་པོ་སྤྲིན་སྐུལ་དང༌། ཀླུའི་རྒྱལ་པོ་མགོ་བོ་དགུ་པ་དང༌། ཀླུའི་རྒྱལ་པོ་མགོ་བོ་བདུན་པ་དང༌། མགོ་བོ་དྲུག་པ་དང༌། མགོ་བོ་ལྔ་པ་དང༌། མགོ་བོ་གསུམ་པ་དང༌། མགོ་བོ་གཉིས་པ་དང༌། མགོ་བོ་སྟོང་པ་རྣམས་ལ། བཅོམ་ལྡན་འདས་ཀྱིས་མན་ས་བསྒག་གོ །ཨ་ན་ན་ཏེ། བི་ན་ན་ཏེ། བི་ཤི་ཀི་ཤི། ཨ་གུ་བི་དགུ་རེ་རེ། ཧཱུྃ་ཧཱུཾ་ཧཱུཾ་ཕཊ་ཕཊ་ཕཊ། བྷན་ཛ་ཡ་པྲ་ས་ཤྲི་ར་རཱ་ཎི། མ་ཏྲི་ཏྲ་མ་ཀྲ་ནི་ན་ནེ་ན། བྷོ་པ་ན་གེ་ན་ཏྲ་མ་ཏེ། བཛྲ་དུས་ཏེ། ན་མཽ་ར་ནཱན། སྤ་ལ་ཡ། མ་ཧཱ་རི་ཧ་ར། ཧཱུྃ་ཕཊ། མ་ཊ་མ་ཊ། ས་ར་ས་ར། བི་རི་བི་རི། མི་རི་མི་རི། སྭཱ་ཧཱ། སྔགས་ཚན་དང་པོས་ཀླུ་རྣམས་འཁྲུགས་ནས་བརྒྱལ་ལོ། བཅོམ་ལྡན་འདས་ལོ་ཏོག་དང༌། འབྲས་བུ་དང༌། སྨན་རྣམས་དང༌། རྩི་ཤིང་དང༌། མྱུ་གུ་དང༌། འདབ་མ་དང༌། མེ་ཏོག་རྣམས་སྐམ་པར་རྔོ་མི་ཐོགས་ལགས་སོ། །ཆར་དུས་སུ་འབེབས་ལགས་སོ། །རྩི་ཤིང་དང༌། ནགས་ཚལ་བསྐྱེད་པར་བགྱིད་ལགས་སོ། །འཛམ་བུའི་གླིང་གི་མི་རྣམས་ཀྱི་ལོངས་སྤྱོད་ལ་འཚེ་བར་རྔོ་མི་ཐོགས་ལགས་སོ། །སེམས་ཅན་རྣམས་ལ་རྣམ་པར་འཚེ་བར་མི་བགྱིད་དོ། །གལ་ཏེ་བཅོམ་ལྡན་འདས་ཀྱི་བཀའ་ལས་འདས་ན། བདག་ཅག་རྣམས་ཀྱི་ལུས་ཁུམས་པར་གྱུར་ཅིག །གནས་མེད་པར་གྱུར་ཅིག །ལུས་རྩུབ་པར་གྱུར་ཅིག །མཛེ་དང༌། ཤ་བཀྲ་འབྱུང་བར་གྱུར་ཅིག །མགོ་བོ་འགས་པ་དང༌། སྙིང་འབྲུལ་བར་གྱུར་ཅིག །ཅེས་བྲོ་བོར་བའོ། །ཉེ་བར་འཚེ་བ་ཐམས་ཅད་ལ་གནོད་པ་འདོར་བ་སྟེ། བཅོམ་ལྡན་འདས་མངོན་པར་འདོད་པའི་འབྱུང་པོ་བརྒྱ་སྟོང་དག་ཀྱང་སེམས་ཅན་རྣམས་ཀྱི་ཕྱིར་འོངས་ཏེ། དེ་དག་ཁྱེད་ལ་གནོད་པ་ཆེན་པོ་བྱེད་པར་འགྱུར་དུ་འོང་གིས། ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ་མྱུར་དུ་བྱེར་ཅིག །ཁྱེད་ཅག་ལས་གང་དག་སྡང་བའི་སེམས་དང་ལྡན་པ་དེ་དག་ཕུང་བར་གྱུར་ཅིག །གང་དག་བྱམས་པའི་སེམས་དང་ལྡན་ཞིང༌། ཉེས་པ་མི་འདོད་པ། བསྲུང་བར་འཇུག་པ་འདོད་པ་དག་གི་ནི་ཁྱོད་ཀྱི་ལུས་ལ་འཇུག་པར་གྱུར་ཅིག །སངས་རྒྱས་འཇིག་རྟེན་ལ་ཐུགས་བརྩེ་བ་ཅན་གྱིས་བཀའ་སྩལ་པ། སུ་མུ་སུ་མུ། སུ་མུ་སུ་མུ་སུ་མུ་སུ་མུ་རུ་སུ་མུ་རུ། སུ་མུ་རུ་སུ་མུ་རུ། མུ་རུ་མུ་རུ། མུ་རུ་མུ་རུ། མི་རི་མི་རི་སྭཱ་ཧཱ། ལྷ་རྣམས་དང༌། ཀླུ་རྣམས་དང༌། ལྷ་མ་ཡིན་རྣམས་དང༌། གནོད་སྦྱིན་ཕོ་མོ་རྣམས་ཀྱིས་ཇི་ལྟར་འདོད་པའི་ཆར་གྱི་རྒྱུན་མྱུར་བར་འབེབས་སོ། །ཀླུ་གནས་པའི་ཆུ་མིག་ཀུན་ནས་ཆབ་ཕུལ་དགུ་བླངས་ལ། ཆབ་སོ་སོར་བཞག་ལ་ཡུངས་ཀར་གྱིས་བསྔགས་ཤིང་ཆུ་རུ་བསྩལ། སྔགས་རྫོགས་པ་དང་ཀླུའི་གནས་སུ་བསྐྱལ་ལོ། །ཆར་ཇི་ལྟར་འདོད་པ་བཞིན་འབབ་པར་འགྱུར་རོ། །སངས་རྒྱས་འཇིག་རྟེན་ལ་ཐུགས་བརྩེ་བ་ཅན་གྱིས། སེམས་ཅན་རྣམས་ལ་ཕན་པ་དགོངས་པར་མངའ་བ། བྱམས་པ་ལ་གནས་པ་ཐུགས་རྗེ་དང་ལྡན་པ། དགའ་བ་ལ་གནས་པ། བཏང་སྙོམས་ལ་གནས་པར་གཤེགས་ཀྱིས། ཀྵི་ཕྲན་ནིར་གད་ཚ་ཏ་སྭཱ་ཧཱ། ནཱ་ག་ཡུ་ཡུ་སྭཱ་ཧཱ། སྤྲིན་ལ་བལྟ་ཞིང་ཕྱོགས་བཞིར་བལྟས་ལ། ཕྱག་བྱས་ཤིང་ལན་ལྔ་བཅུར་བཟླས་ན། ཆར་མྱུར་དུ་ངེས་པར་འབེབས་སོ། །ཆར་འབེབས་པའི་ཚེ། ཀླུ་མི་བསྲུན་པའི་གནས་སུ་སོང་ལ། ལུས་སྤོས་ཆུས་བཀྲུས་ལ། ཟས་དཀར་གསུམ་འཚལ་ལོ། །ཤ་ཆང་སྒོག་བཙོང་སྤོང་བར་བྱའོ། །བྱམས་པའི་སེམས་དང་ལྡན་པར་བསམས་ལ། ཁ་ཤར་ཕྱོགས་སུ་བལྟས་ལ་འཕགས་པ་རྣམས་ལ་གསོལ་བ་གདབ་བོ། ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཁྲོམ་ཉི་མས་སླ་ནཱན། གླང་པ་ནཱན་ཀུ་ལུ་ཞི་ནཱན། པི་ཏྲ་པུ་ཏྲ་ནཱན། ཡཀྵ་ཟློག་ནཱན། རི་བུ་རི་ལུ་ནཱན། བ་ལ་ཡ་ནཱན། ཧཱུཾ་ཧཱུཾ་ཕཊ་ཕཊ། བཛྲ་བཛྲ་ཛྭ་ལ་ཛི་ཧ་སྭཱ་ཧཱ། སརྦ་དུ་ཤ་ར། བི་ར་ནཱ་ག་ཤ་སྭཱ་ཧཱ། ག་རུ་ཏྲི་རུ་ཏི་སྭཱ་ཧཱ། ཡ་ཐོག་ལ་བླ་རེ་སྔོན་པོ་ཕུབ། རྒྱལ་མཚན་སྔོན་པོ་གཟུགས། རིག་སྔགས་འཆང་གདན་སྔོན་པོ། རྐང་པ་ཡང་སྔོན་པོར་དཀྲི། ལྷ་བཤོས་སྔོན་པོ། བུམ་པ་ཆུས་བཀང་བ་བཞི་དཀྱིལ་འཁོར་གྱི་གྲ་བཞིར་བཞག །དབུས་སུ་རྡོ་རྗེ་སྙིང་པོ་དང༌། ནམ་མཁའ་ལྡིང་གི་རྒྱལ་པོ་དང༌། ཀུའི་རྒྱལ་པོ་རྒྱ་མཚོ་དང༌། མཐའ་ཡས་དགོད། ཤར་ཕྱོགས་ཀྱི་པདྨ་ལ་ཀླུའི་རྒྱལ་པོ་མགོ་བོ་གསུམ་པ་དགོད། ལྷོ་ཕྱོགས་ཀྱི་པདྨའི་འདབ་མ་ལ་ཀླུ་མགོ་བོ་བདུན་པ་དགོད། ནུབ་ཕྱོགས་ཀྱི་པདྨ་ལ་ཀླུ་མགོ་བོ་ལྔ་པ་དགོད། བྱང་ཕྱོགས་ཀྱི་པདྨ་ལ་ཀླུ་མགོ་བོ་དགུ་པ་དགོད། འཕྲིན་ལས་གཞུང་ལས་བྱུང་བ་ཡང་དགོད་དོ། །ཨོཾ་ཧི་ཧུ་ལ་ཕཊ་ཕཊ། ཧཱུཾ་བི་ཛ་ཡ་ཕཊ་ཕཊ། ནཱ་ག་ལི་ཙ་ལ། ཤད་ཤད། ཛི་ལི་ཏི། པི་པྲི་ཏི། བཛྲ་ཛ་ཡ་མ་ཧཱ་བ་ལ་བིརྻ་ཡ་པར་ཀྲམ། ཀྲོ་དྷ་རཱ་ཛ་པྲ་མེ་རུ་ཕཊ་ཕཊ་དཱ། གཟུངས་འདི་བརྗོད་མ་ཐག་ཏུ། ས་ཆེན་པོ་རྣམས་གཡོ་བར་འགྱུར་རོ། །ཀླུའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ཁ་ཕུབ་ཏུ་འགྱེལ་ནས། ཚིག་འདི་སྐད་དུ་གསོལ་ཏོ། །བཅོམ་ལྡན་འདས་ད་ཕྱིན་ཆད་བཀའ་གསུངས་པ་ལྟར་བགྱིད་དོ། །བཅོམ་ལྡན་འདས་ཀྱིས་གསུངས་པ། བཛྲ་བཛྲ་ཧཱུཾ་ཧཱུཾ་ཁྲོམ་ཕཊ། ཅེས་གསུངས་པས། ཀླུའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ཁ་ཕུབ་ཏུ་འགྱེལ་ནས། རབ་ཏུ་འདར་ཏེ། བརྒྱལ་ནས་འདྲེ་ལྡོག་ཅིང་ངུའོ། །དེ་ནས་ཀླུའི་རྒྱལ་པོ་རྣམས་ཀྱིས་བཅོམ་ལྡན་འདས་ལ་སྨྲ་ཞིང་ཚིག་ཏུ་གསོལ་པ། ཀྱེ་ཧུད་བདག་ཅག་རྣམས་འཚིག་ལགས་སོ། །རྡོ་རྗེ་སྙིང་པོ་འབར་བས་འཚིག་ལགས་སོ། །མ་རུངས་ལགས་སོ། །ཞེས་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཀླུའི་རྒྱལ་པོ་རྣམས་འཛམ་བུའི་གླིང་གི་སེམས་ཅན་ལ་ཕན་པ་དང༌། བདེ་བ་དང་ལོ་ལེགས་པ་དང༌། བསྲུང་བ་དང༌། བསྐྱབ་པ་དང༌། ཞིང་རྣམས་ཀྱི་མིག་གང་བར་གྱིས་ཤིག །ལོ་ཏོག་ཕུན་སུམ་ཚོགས་པར་སྒྲུབས་ཤིག །མི་རྣམས་དང༌། མི་མ་ཡིན་པ་རྣམས་ལ་འཚེ་བར་མ་བྱེད་ཅིག །ཆར་གྱི་རྒྱུན་ཕོབ་ཅིག །འོན་ཀྱང་ཁྱོད་ཀྱིས་ཡུན་རིང་པོའི་བདེ་བ་དང༌། ཕན་པ་དང༌། ཀླུའི་གནོད་པ་ཀུན་དང་བྲལ་བར་འགྱུར་རོ། །རྐང་མང་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །ཁྱེད་ཅག་ལམ་འགྲོ་བདེ་ལེགས་ཤོག །ཕྱི་འོང་རྣམས་ཀྱང་བདེ་ལེགས་ཤོག །ཁྱེད་ཅག་སྡིག་པར་མ་གྱུར་ཅིག །སངས་རྒྱས་ལྷ་རྣམས་སྟོང་དག་གིས། །ཁྱོད་ལ་བདེ་ལེགས་བྱེད་འགྱུར་པས། །སྡང་སེམས་ལྡན་རྣམས་ཀུན་བྱེར་ཅིག །སྙིང་རྗེའི་བདག་ཉིད་ཅན་རྣམས་འཁོད། །གླིང་འདིར་ཆར་ཕོབ་འདོད་རྣམས་ཀྱིས། །ས་དང་བར་སྣང་གནས་པ་རྣམས། །སྐྱེ་དགུ་རྣམས་ལ་བྱམས་བྱེད་ཤོག །ཆར་མེད་ཐན་ཆེན་བྱུང་བའི་ཚེ། །སྔགས་ཆེན་དང་པོ་བརྒྱ་བཟླས་ནས། །བར་མ་ལྔ་བཅུ་ལྔ་བཅུ་བཟླས། །ཐ་མ་ལན་བདུན་བཟླས་པར་བྱ། །སྤྲིན་ལ་བལྟ་ཞིང་བར་བར་དུ། །སུས་ཀྱང་མ་ཚོར་ཤུབ་བུར་བཟླས། །གྲངས་ལས་ཐལ་ན་སེར་བ་འགྲུབ་པས་སྡིག་ཆེའོ། །ཀླུ་གནད་ལ་འདོར་བ་ཡིན་པས་སྡིག་ཆེའོ། །ལན་གྲངས་ཡང་ཡང་མི་དབབ་བོ། །ཞག་གཅིག་གམ། ཞག་གཉིས་སམ། ཞག་ལྔས་ཆར་གྱི་རྒྱུན་མི་དབབ་པ་མི་སྲིད་དོ། །ཆོས་ཀྱི་རྒྱལ་པོ་རྒ་ཤི་མི་མངའ་བ། །ཀུན་གྱི་སྨོན་ལམ་མྱུར་དུ་འགྲུབ་པར་ཤོག །བཅོམ་ལྡན་འདས་ཀྱིས་དེ་སྐད་ཅེས་བཀའ་བསྩལ་པ་དང༌། ཚེ་དང་ལྡན་པ་ཀུན་དགའ་བོ་དང༌། དགེ་སློང་རྣམས་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ལྕགས་མཆུ་ནག་པོ་ཞེས་བྱ་བའི་གཟུངས་ཐན་ཆེན་རབ་ཏུ་ཞི་བར་བྱེད་པ་ཀླུ་རྗེ་རིགས་ཀྱི་གཉེན་པོ་རྫོགས་སོ།། །།