དྲི་བ་ཉེར་གཅིག་པ་ནི། ལམ་ལྔ་བོ་སོ་སོའི་ཚད་དམ་མཚན་ཉིད་ཇི་ལྟར་ཡིན་ཞེས་པའི་ལན།

དྲི་བ་ཉེར་གཅིག་པ་ནི། ལམ་ལྔ་བོ་སོ་སོའི་ཚད་དམ་མཚན་ཉིད་ཇི་ལྟར་ཡིན་ཞེས་པའི་ལན།

ལམ་ལྔ་བོ་སོ་སོའི་ཚད་དམ་མཚན་ཉིད་ཇི་ལྟར་ཡིན་ཞེས་པའོ། །དེའི་ལན་ནི།ལམ་ལྔ་སོ་སོའི་ཚད་དམ་མཚན་ཉིད་སྔར་གྲུབ་མཐའི་རྣམ་བཞག་ལེགས་བཤད་འདོད་འཇོ་རུ་ཚོགས་ཆོས་བདེན་བཞིའི་རྣམ་བཤད་དང་ས་བཟང་གི་རྒྱུད་བླའི་འགྲེལ་བ་སོགས་ཀྱི་སྒྲས་ཟིན་ལྟར་བཤད་པ་ཡིན་ལ། དེ་དང་ས་བཟང་གི་ཐེག་པ་ཆེན་པོ་མདོ་སྡེའི་རྒྱན་གྱི་རྣམ་པར་བཤད་པ་ཐེག་ཆེན་རབ་གསལ་སྣང་བ་གཉིས་དོན་ལ་གཅིག་ཏུ་བབས་པས་དེ་བཞིན་དུ་འདིར་འཆད་པ་ལ། དང་པོ་ལམ་ཀྱི་མཚན་ཉིད་ནི། མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། དང་པོ་ནི་གང་ལ་ཞུགས་ནས་མྱ་ངན་ལས་འདས་པར་ཕྱིན་པར་བྱེད་པ་ཞེས་པའམ་ཐབས་དང་ཤེས་རབ་ཟུང་དུ་འཇུག་པའི་དགེ་བ་གང་ཞིག་རྣམ་པར་གྲོལ་བའི་འཇུག་ངོགས་སུ་གྱུར་པ་སྟེ། མདོ་ལས།ཐབས་དང་བཅས་པའི་ཤེས་རབ་ནི་ལམ་མོ། །ཤེས་རབ་དང་བཅས་པའི་ཐབས་ནི་ལམ་མོ། །ཞེས་གསུངས་པ་ལྟར་རོ། །མཚན་གཞིའི་དངོས་པོ་ནི། བྱང་ཆུབ་འདོད་པས་ཀུན་ནས་བསླངས་པའི་སྒོ་གསུམ་གྱི་དགེ་བ་བྱང་ཆུབ་ཏུ་བསྔོས་པའོ། །བྱེད་ལས་ནི་ཟག་པ་དང་བཅས་པ་འབྲས་བུའི་ཆ་ཐམས་ཅད་སྡུག་བསྔལ་དུ་ཤེས་པར་བྱས་ནས་དེའི་རྒྱུ་ལས་དང་ཉོན་མོངས་པ་སྤོང་ཞིང༌། དེ་དག་གི་རྣམ་པར་དག་པ་མངོན་སུམ་དུ་བྱ་བའི་ཆེད་དུ་ཟག་པ་མེད་པའི་དགེ་བའི་རྩ་བ་རྣམས་བསྟེན་པར་བྱེད་པ་སྟེ། ཀུན་ལས་བཏུས་པར། ལམ་གང་གིས་སྡུག་བསྔལ་ཡོངས་སུ་ཤེས་པ་དང་ཀུན་འབྱུང་སྤོང་བ་དང་འགོག་པ་མངོན་དུ་བྱེད་པ་དང་ལམ་སྒོམ་པ་སྟེ། ལམ་གྱི་མཚན་ཉིད་མདོར་བསྡུས་པའོ་ཞེས་གསུངས་པ་ལྟར་རོ། །ཚོགས་ལམ་གྱི་མཚན་ཉིད་ནི། མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། དེ་ལ་དང་པོ་ཚོགས་ལམ་གྱི་མཚན་ཉིད་ནི། རང་རང་གི་བྱང་ཆུབ་ཏུ་སེམས་བསྐྱེད་ནས་དྲོད་མ་ཐོབ་ཀྱི་བར་གྱི་དགེ་བ་གང་ཞིག མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཞེས་གསུངས་སོ། །སྦྱོར་ལམ་གྱི་མཚན་ཉིད་ནི། མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། སྦྱོར་ལམ་ལའང་དོན་བདུན་གྱི་དང་པོ་མཚན་ཉིད་ནི། ཚོགས་ལམ་རྫོགས་ནས་མཐོང་ལམ་མ་ཐོབ་བར་གྱི་དགེ་བ་གང་ཞིག མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཞེས་སོ། །མཐོང་ལམ་གྱི་མཚན་ཉིད་ནི། མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། མཐོང་ལམ་ལ་ཡང་མཚན་ཉིད་ནི། ཆོས་མཆོག་རྫོགས་ནས་སྒོམ་ལམ་མ་སྐྱེས་པར་གྱི་དགེ་བ་གང་ཞིག མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཞེས་གསུངས་སོ། །སྒོམ་ལམ་གྱི་མཚན་ཉིད་ནི། མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། སྒོམ་ལམ་ལའང་མཚན་ཉིད་ནི་མཐོང་ལམ་རྫོགས་ནས་མི་སློབ་ལམ་མ་ཐོབ་བར་གྱི་དགེ་བ་གང་ཞིག་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཞེས་གསུངས་སོ། །ཐེག་པ་རང་ལམ་གྱི་མི་སློབ་ལམ་གྱི་མཚད་ཉིད་ནི། ཐེག་པ་རང་ལམ་གྱི་མི་སློབ་པའི་རྒྱུད་ལ་མངའ་བའི་དགེ་བ་གང་ཞིག་མྱ་ངན་ལས་འདས་པར་ཕྱིན་པར་གྱུར་པའི་མངོན་རྟོགས་དེ་ཡིན་ཏེ། མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། མཐར་ཕྱིན་པའི་ལམ་གྱི་མཚན་ཉིད་ནི། མི་སློབ་པའི་རྒྱུད་ལ་མངའ་བའི་དགེ་བ་གང་ཞིག མྱ་ངན་ལས་འདས་པར་ཕྱིན་པར་གྱུར་པའོ། །ཞེས་གསུངས་སོ། །ལམ་གྱི་རྣམ་བཞག་མདོར་བསྡུས་ཞིག་སྔར་བདག་གིས་གྲུབ་མཐའི་རྣམ་བཞག་ལེགས་བཤད་འདོད་འཇོར་བཤད་ཟིན་ལ། ས་ལམ་གྱི་རྣམ་བཞག་མདོར་བསྡུས་ཞིག་ལོགས་སུ་འབྲི་འདུན་ཡོད་པས་དེ་བཞིན་དུ་འགྲུབ་པར་གྱུར་ཅིག་དེས་ན་འདིར་ཚིག་མང་དུ་དོགས་ནས་དེ་ཙམ་ལས་མ་སྤྲོས་སོ། །དེ་ལྟ་བུའི་ས་ལམ་ལ་བརྟེན་ནས་མཐར་ཐུག་རྣམ་པ་ཐམས་ཅད་མཁྱེན་པའི་ལམ་མཐར་ཕྱིན་པའི་ཕྱིར་རོ།། །།

སྨྲས་པ། ངེས་དོན་མདོ་དང་སེམས་འགྲེལ་གཞུང་བརྒྱ་ཡི། །དགོངས་དོན་ཇི་བཞིན་བཤད་པའི་དྲི༷ས་ལ༷ན་ཀུན། །མ་ནོར་ར༷བ་ཏུ་གས༷ལ་བའི་སྒྲོ༷ན་མེ༷་འདི། །སྐ༷ལ་བཟ༷ང་ཡིད་ཀྱི་རྒྱ༷ན་ཕྲེ༷ང་སྲིད་འདིར་མཛེས། །བློ་གྲོས་ཡངས་པའི་ཀུན་གསལ་ལས་འོངས་པའི། །ལེགས་བཤད་ཉིན་བྱེད་གསལ་བའི་འོད་ཟེར་གྱིས། །བློ་ལྡན་དོན་གཉེར་མི་ཤེས་མུན་བསལ་ནས། །དཔལ་ཡོན་པདྨའི་དགའ་ཚལ་རྒྱས་གྱུར་ཅིག །གལ་ཏེ་ལོག་བཤད་འཁྲུལ་པའི་ཆ་མཆིས་ན། །ཆོས་ཀུན་གཟིགས་པ་རྣམས་ཀྱིས་བཟོད་མཛད་དེ། །ལེགས་ཆ་མཆིས་ན་ལེགས་བཤད་གཟིགས་པ་རྣམས། །དགའ་བས་ལེགས་བཤད་འཕེལ་བར་མཛད་དུ་གསོལ། །རྒྱལ་བ་ཀུན་གྱི་ཐུགས་རྗེའི་བྱིན་བརླབས་དང༌། །རྒྱལ་བའི་དམ་ཆོས་བསླུ་མེད་བདེན་པ་དང༌། །རྒྱལ་བའི་ཐུགས་སྲས་ཀུན་གྱི་ཐུགས་རྗེ་ཡིས། །རྒྱལ་བའི་ལུང་རྟོགས་བསྟན་པ་རྒྱས་གྱུར་ཅིག །བདག་ཀྱང་འཁོར་ཚེ་ཚེ་རབས་ཐམས་ཅད་དུ། །ཚུལ་གནས་ཐོས་བསམ་སྒོམ་གསུམ་རབ་བརྩོན་ཏེ། །འཆད་རྩོད་རྩོམ་པས་རྒྱལ་བསྟན་གསལ་བྱེད་ཅིང༌། །ལེགས་བཤད་ཆར་གྱིས་འགྲོ་ཀུན་ཚིམ་པར་ཤོག །ཅེས་ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་གསུམ་པའི་དྲིས་ལན་རབ་གསལ་སྒྲོན་མེ་སྐལ་བཟང་རྒྱན་ཕྲེང་ཞེས་བྱ་བ་འདི་ནི་ངག་དབང་དངོས་གྲུབ་དཔལ་ལམ་དབྱངས་ཅན་ངག་གི་རོལ་མཚོས་བྲིས་པའོ། །རྒྱལ་བསྟན་ཕྱོགས་དུས་ཀུན་ཏུ་དར་ཞིང་རྒྱས་པར་གྱུར་ཅིག །ཛ་ཡནྟུ། །སརྦ་མངྒ་ལམ། །