བཞི་པ་དེ་དག་གི་དོན་བསྡུ་བ།
བཞི་པ་དེ་དག་གི་དོན་བསྡུ་བ་ནི།
དེ་བས་འབད་པ་ཐམས་ཅད་ཀྱིས། །རྡོ་རྗེ་སློབ་དཔོན་བློ་གྲོས་ཆེ། །དགེ་བ་རབ་ཏུ་མི་སྤྱོམས་པ། །ནམ་ཡང་སྨད་པར་མི་བྱའོ། །ཞེས་དེ༷་ལྟར་གནས་སྐབས་དང་མཐར་ཐུག་གི་ཉེས་དམིགས་རྣམས་འབྱུང་བར་འགྱུར་བ༷ས། དེ་དག་ལ་བསམས་ནས་ཉེས་དམིགས་མི་འབྱུང་བར་བྱ་བའི་ཆེད་དུ་ལུས་དང་སྲོག་ལ་མ་ལྟོས་པར་དཀའ་ལས་ཇི་ལྟར་གྱུར་ཀྱང་དང་དུ་བླངས་ཏེ་སྒྲུབ་པར་ནུས་པའི་འབ༷ད་པ༷་ཐ༷མས་ཅ༷ད་ཀྱི༷ས་མི་ལེགས་པ་སྤོང་བར་བྱེད་ཅིང་ཐབས་དུ་མའི་སྒོ་ནས་རང་གི་རྡོ༷་རྗེ༷འི་སློ༷བ་དཔོ༷ན་སྙིང་རྗེ་ཆེ་བ་སོགས་རྟོགས་པའི་བློ༷་གྲོ༷ས་ཆེ༷་ཞིང་སྐྱོན་རྣམས་སྤངས་པས་དགེ༷་བ༷་ཡོན་ཏན་གྱི་མཚན་ཉིད་རྣམས་དང་ལྡན་པ་ནི་ར༷བ་ཏུ༷་མི༷་སྤྱོ༷མས་པ༷་སྟེ་རང་ལ་བསྟོད་པར་མི་བྱེད་པས་མཚོན་ནས། དེ་ལྟ་བུ་ལ་རང་གི་ཚེ་འདིའི་འདོད་པ་ཕྲན་ཚེགས་མ་གྲུབ་པ་དང༌། བློ་དང་ཅུང་ཟད་མ་མཐུན་པ་ལ་སོགས་པའི་རྐྱེན་གྱིས་སློབ་དཔོན་ལ་ན༷མ་ཡ༷ང་སྨ༷ད་པ༷ར་འོས་པའི་སྐྱོན་བཙལ་ཏེ། འདི་དང་འདི་ལྟ་བུ་ཞེས་ཁ་ཟེར་བ་ནི་སྨད་པ་སྟེ། དེ་ལྟར་བྱས་ན་གོང་གི་ཉེས་པ་ཆེན་པོ་འགྱུར་བས་མི༷་བྱ༷འོ༷། །སློབ་དཔོན་སྨོད་པ་གྲོགས་སུ་བྱས་ན་སྔར་བཤད་ལྟར་ཉེས་པ་ཆེ་བ་ཡིན་ཏེ། སྒྱུ་འཕྲུལ་དྲྭ་བའི་རྒྱུད་ལས། སློབ་དཔོན་སྨོད་པར་བྱེད་པ་དག །རྨི་ལམ་དུ་ཡང་མཐོང་མི་བྱ། །སློབ་དཔོན་སྨོད་པ་གང་ཡིན་དེ། །བགེགས་དང་ལོག་འདྲེན་རྣམས་ཀྱིས་བཟུང༌། །ངན་པ་གཏུམ་པོའི་ལས་བྱེད་པ། །མཁས་པས་རྟག་ཏུ་སྤང་བར་བྱ། །ཞེས་གསུངས་པས་སོ། །