བཞི་པ་དངོས་པོ་གང་ཞུ་བ་ནི་གསུམ་ལས།

བཞི་པ་དངོས་པོ་གང་ཞུ་བ་ནི་གསུམ་ལས།

རབ་ཏུ་འབྱུང་བར་འདོད་པ་སྟེ་ཆོ་ག་ལས། མིང་འདི་ཞེས་བགྱི་བ་འདི་རབ་ཏུ་འབྱུང་བར་འཚལ་ཞིང༌། ཞེས་སོ། །བར་ཆད་དང་མི་ལྡན་པ་སྟེ། རྩ་བར། དག་ན་ཞུ་བར་བྱའོ། །ཞེས་སོ། །མངོན་སུམ་ན་ཡོད་པ་སྟེ། ཆོ་ག་ལས། ཚེ་དང་ལྡན་པ་མིང་འདི་ཞེས་བགྱི་བ་འདི་ཞེས་གསུངས་ཏེ། འདི་ཞེས་བྱ་བའི་སྒྲ་མངོན་སུམ་ན་ཡོད་པ་ལ་འཇུག་གི རྒྱང་རིང་པོ་ན་ཡོད་པ་ལ་མི་འཇུག་པའི་ཕྱིར་རོ། །འཕྲིན་གྱིས་རབ་ཏུ་འབྱིན་ན་གང་ཟག་དེ་མངོན་སུམ་ན་ཡོད་པ་མ་ཡིན་པ་སྟེ་དམིགས་བསལ་ཡིན་ནོ། །ལྔ་པ་ཆོ་ག་གང་གིས་ཞུ་བ་ནི། སྦྱོར་དངོས་མཇུག་གསུམ་སྟེ། སྦྱོར་བ་ནི་མཁན་པོས་ཞུ་བ་པོ་ལ་གཏད་པ་དང་ཅི་ཡོངས་སུ་དག་གམ་ཞེས་འདྲི་ཞིང་ལན་གདབ་པ་དང༌། དགེ་འདུན་ལ་ཕྱག་འཚལ་དུ་བཅུག་ནས་སྤྱོད་ལམ་བསྟེན་དུ་འཇུག་པའོ། །དངོས་གཞི་སྔགས་ལན་གཅིག་གིས་ཞུ་བའོ། །མཇུག་དགེ་འདུན་གྱིས་གལ་ཏེ་ཡོངས་སུ་དག་ནའོ་ཞེས་ལན་གདབ་པའོ། །གནས་ཁང་སོ་སོ་ན་འཁོད་པ་ཞེས་པ་ནི་འགྲེལ་ཆུང་ལས། ལ་ལ་ཞིག་མ་འོངས་ན་ཡང་གནས་གང་ལ་འདུག་པར་གནས་གནས་སུ་དྲི་ཞེས་པ་ལ་བརྟེན་ནས། གནས་ཁང་སོ་སོ་ན་འཁོད་པ་དགེ་འདུན་དུ་མ་ལོངས་པ་ལ་ཡང་ཞུ་ཞེས་ཁ་ཅིག་ཟེར་རོ། །དེ་ནི་མ་ཡིན་ཏེ། རྩ་བར། དགེ་འདུན་ལ་ཞུ་ཞེས་པ་དང༌། ལུང་དང་ཀརྨ་ཤ་ཏཾ་ལས། དགེ་འདུན་བཙུན་པ་རྣམས་གསན་དུ་གསོལ། ཞེས་དང༌། ཊཱི་ཀ་ལས། དགེ་འདུན་དུ་གྱུར་པའི་དགེ་སློང་དག་རང་རང་གི་གནས་ཁང་དག་ན་གནས་པའི་ཚེ་གནས་ཁང་སོ་སོར་སོང་སྟེ་དེ་དག་གི་མདུན་དུ་ཞུར་ཡང་རུང་ངོ་ཞེས་བཤད་པ་དང་འགལ་ལོ། །