འབྱུང་བའི་ཆོས་བྱེ་བྲག་ཏུ་འཆད་པ།
〈༢〉གཉིས་པ་འབྱུང་བའི་ཆོས་བྱེ་བྲག་ཏུ་འཆད་པ་ལ་བདུན་ལས། ༡ ངོ་བོ་ནི། གཞི་སྣང་ལས་འཁོར་འདས་བྱུང་བའི་རྩལ་མ་འགགས་པར་སྣང་བ། དངས་མའི་ངོ་བོ་ཡེ་ཤེས་ལྔའི་རང་གདངས་སུ་སྣང་བ་སྙིགས་མའི་ངོ་བོ་ས་ཆུ་མེ་རླུང་ནམ་མཁའི་སྣང་བའོ། །༢ ངེས་ཚིག་ནི། གདངས་ལས་རོལ་པ་མ་འགགས་པར་འབྱུང་བས་འབྱུང་བའོ། །ནང་ཡེ་ཤེས་ཀྱི་རང་སྣང་དག་པས་དངས་མ་དང་། ཕྱི་བག་ཆགས་འཁྲུལ་པར་བྱུང་བས་སྙིགས་མའི་འབྱུང་བ་ཞེས་བྱ། ༣ དབྱེ་ན་བཞི་སྟེ། དངས་མ། སྙིགས་མ། དངས་མའི་སྙིགས་མ། སྙིགས་མའི་དངས་མའོ། །
དངས་མ་ནི། ལྷུན་གྲུབ་ཀྱི་འབྱུང་ཆེན་ལྔ་སྟེ། སྲ་བ་མེད་པའི་ས། གཤེར་བ་མེད་པའི་ཆུ། ཚ་བ་མེད་པའི་མེ། གཡོ་བ་མེད་པའི་རླུང་། ཁྱབ་པ་མེད་པའི་གདངས་ཅན་ནམ་མཁའོ། །བྱེད་ལས་སྐུ་དང་ཡེ་ཤེས་ཀྱི་འབྱུང་གནས་བྱེད་པས། གསང་བ་འབྱུང་བའི་ཡེ་ཤེས་རྣམ་པར་དག་པའོ། །སྙིགས་མ་ནི། ཕལ་ཆེར་རིག་ཤེས་དང་བཅས་པའོ། །སྲ་བ་ས། གཤེར་བ་ཆུ། ཚ་བ་མེ། གཡོ་བ་རླུང་། ཁྱབ་པ་ནམ་མཁའ་སྟེ་ནང་འབྱུང་ལུས་ཀྱི་རྟེན་དུ་གྱུར་པའོ། །དངས་མའི་སྙིགས་མ། ཤ་རུས་པ་ཁྲག་དང་ཆུ་སེར་ཁུ་བ་ཆུ་དྲོད་མེ་དབུགས་རླུང་། ནང་གི་ཁོང་སྟོང་ནམ་མཁའོ། །སྙིགས་མའི་དངས་མ་ལྔ། སྙིགས་མ་ཕྱིས་འབྱུང་གཟུགས་ས་ཆུ་མེ་རླུང་ནམ་མཁར་སྣང་བ་དང་ལྔའོ། །དེའི་དངས་མ་འཇའ་ཚོན་ལྔའོ། །བསྡོམས་པས་སྙིགས་མའི་དངས་མ། །༤ དཔེ་ནི། ཉི་མའི་འོད་ཟེར་སྣང་བ་ཤེལ་ལས་འོད་སྣང་བ་ལྟ་བུའོ། །༥ མཚན་ཉིད་ལ། སྤྱི་ནི་གང་ཞིག་གང་ལས་བྱུང་བའོ། །བྱེ་བྲག་གི་མཚན་ཉིད་ལ་གཉིས་སོ། །དབྱེ་ན་སྲ་བ་མེད་པར་བསྟན་པ་སོགས་འབྱུང་ཆེན་ལྔ་ཡུམ་ལྔར་དག་པའི་ཀློང་ན་རིགས་ལྔའི་སངས་རྒྱས་ཐམས་ཅད་བཞུགས་ལ། དེའི་གདངས་གཟུགས་བརྙན་གྱི་འོད་ལས་སྙིགས་མ་ལྔར་སྣང་བ་ཡང་ཡུམ་ལྔའི་གདངས་སམ་རྩལ་ཤར་བས་ཡུམ་ལྔའི་རྣམ་དག་ཏུ་སྦྱོར་བའི་དབྱིངས་ན་སྣང་སྲིད་འཁོར་འདས་ཀྱི་ཆོས་ཐམས་ཅད་གནས་པས་སྣང་སྲིད་ཐམས་ཅད་ཡུམ་གྱི་བྷ་གའི་ཀློང་ཞེས་བྱའོ། །སྙིགས་མའི་འབྱུང་ལྔའི་མཚན་ཉིད། གཟུགས་བརྙན་གྱི་
འོད་ལས་སོ་སོའི་འབྱུང་བའི་གཞིར་སྣང་ཞིང་། ཆོས་གཞན་འབྱུང་བའི་དབྱིངས་སུ་གནས་པ། དབྱེ་ན་སྲ་ཞིང་བརྟན་པ་སོགས་རྨི་ལམ་གྱི་འབྱུང་བ་ལྟ་བུས་སྣོད་བཅུད་ཀྱི་རྟེན་དང་འབྱུང་གནས་བྱེད་པ། །༦ ཤར་ལུགས་གཉིས། རང་བཞིན་གྱི་འོད་ལྔ་སྙིང་པོ་འོད་ལྔའི་ཀློང་དུ་ཡེ་ནས་ཤར་བ་ཤེལ་གྱི་ནང་འོད་ལྟ་བུ་ལས། གཟུགས་བརྙན་གདངས་ཀྱི་འོད་ཡེ་ཤེས་རླུང་གིས་བསྐྱོད་པས་རང་ཤར་བའོ། །སྙིགས་མའི་ཤར་ལུགས་གཟུགས་བརྙན་གྱི་འོད་ལས་སྙིགས་མར་ཤར་ཏེ། སྲ་བ་མེད་པའི་སའི་འོད་དཀར་པོ་ལས་སྲ་བའི་སར་ཤར། གཤེར་བ་མེད་པ་ཆུ་འོད་སེར་པོ་ལས་གཤེར་བའི་ཆུར་ཤར་བ་སོགས་སོ། །༧ གྲོལ་ལུགས་ནི། དང་པོ་གང་ལས་ཤར་བ་དེའི་ངང་དུ་གྲོལ་བ་སྟེ། འབྱུང་བ་མ་ལ་ཞ་དགོས་པའི་ཕྱིར་རོ། །དེ་ཡང་སྙིགས་མའི་འབྱུང་བ་ལྔ་གཟུགས་བརྙན་གྱི་ངང་དུ་གྲོལ་ཏེ་སྣང་སྲིད་ཞིང་ཁམས་གསུམ་སྣང་བའི་དུས་སུ་འཁྲུལ་སྣང་ནུབ་པའོ། །གཟུགས་བརྙན་གྱི་འོད་རང་བཞིན་དངས་མའི་འོད་ལྔ་སོ་སོའི་ངང་དུ་ཐིམ་པས་འོད་གསལ་ཞིང་ནང་དུ་ཤར་བ་གཞི་རང་མལ་ལྷུན་གྲུབ་རིན་པོ་ཆེའི་སྦུབས་སུ་འཁྱིལ་བ་རིག་པ་ཟིན་པའི་དུས་སུའོ། །དེས་ན། འབྱུང་བ་ཆེན་པོ་བཅོམ་ལྡན་འདས། །འགྲོ་བ་ཀུན་ལ་རང་བཞིན་གནས། །དེ་ལ་ཕྱོགས་ཀྱི་འོད་འདུས་པ། །མཚམས་བཞི་བླ་དང་སྟེང་འོག་གྲུབ། །མ་ངེས་ཁ་དོག་ཁྱད་པར་ལས། །རིགས་ཀྱི་ཁྱད་པར་སོ་སོར་སྣང་། །དེ་བཞིན་གཡོ་རྡུལ་མི་གཡོ་བ། །འབྱུང་བ་ལྔ་ལས་གཙོ་ཆེན་ཡིན། །ཞེས་ཀུན་བྱེད་དུ་གསུངས་པ་བཞིན་ནོ། །དེ་
ལྟར་དངས་མའི་འབྱུང་ལྔ་ལས་གདངས་ཤར་བ་སྙིགས་མར་འཁྲུལ་པ་ལ་བསྐལ་པ་གསུམ་དུ་བརྗོད་ཚུལ་ཡང་། བཤད་རྒྱུད་ལས། བསྐལ་པའི་ངོ་བོ་བསྟན་པ་ནི། །གཞི་ལམ་འབྲས་བུ་ང་ཡིས་བསྟན། །དང་པོ་ཡེ་ཤེས་ཡུལ་ལ་ཤར། །ཤར་བྱ་ཤར་བྱེད་ལྟར་སྣང་བས། །དང་པོའི་དུས་སུ་ཆོས་ཉིད་བསྐལ། །བར་དུ་འཛིན་པའི་རྣམ་རྟོག་གིས། །ཡེ་ཤེས་སྣང་བ་ནང་དུ་ནུབ། །དེ་ཡི་རྣམ་པ་སྣོད་དུ་ཆགས། །སྣོད་ཀྱིས་འཇིག་རྟེན་བསྐལ་ཞེས་བྱ། །མཐའ་མ་གཟུང་འཛིན་གཉིས་སུ་བསྐལ། །སངས་རྒྱས་སེམས་ཅན་དེ་བཞིན་བསྐལ། །ངེས་ཚིག་བསྟན་ཚིག་བཅས་པ་ཡིན། །དབྱེ་བ་རྣམ་པ་གསུམ་ཡིན་ནོ། །ཡུན་དུ་གནས་པས་བསྐལ་པར་བརྗོད། །ཅེས་གསུངས་སོ། །འབྱུང་བའི་གནས་བཤད་ཟིན་ཏོ། །