གངས་ཅན་བོད་ཀྱི་ཡུལ་འདིར་བསྟན་པ་དམ་པའི་ཆོས་ཇི་ལྟར་བྱུང་བའི་ཚུལ།

བོད་ཀྱི་སྣོད་བཅུད་ཀྱི་བྱུང་བ་སྤྱི་དང་གཉའ་ཁྲི་བཙན་པོ་ཁྲིར་ཕེབས་ཚུལ།

༈ གཉིས་པ་གངས་ཅན་བོད་ཀྱི་ཡུལ་འདིར་བསྟན་པ་དམ་པའི་ཆོས་ཇི་ལྟར་བྱུང་བའི་ཚུལ། འཇམ་དཔལ་རྩ་བའི་རྒྱུད་ལས། ང་ཡི་དུས་ནས་ལོ་བརྒྱ་ན། །ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་ཐོག་མར་མཚོས་གང་བ་རིམ་གྱིས་བྲི་ནས་ཤུག་པ་ལ་སོགས་པའི་ནགས་ཆགས་པས་སཱ་ལའི་ལྗོངས་སུ་གྲགས་ཤིང་ཡུལ་དུ་རུང་བར་གྱུར་ནས། དང་པོ་མི་མ་ཡིན་གྱིས་རིམ་པར་བདག་ཏུ་བཟུང་བ་སྟེ། དེ་ཡང་ཐོག་མར་གནོད་སྦྱིན་གྱིས་བཟུང་སྟེ། ཡུལ་མིང་བཟང་ཡུལ་རྒྱན་མེད་དང་། དེ་ནས་བདུད་ཀྱིས་བཟུང་སྟེ། བདུད་ཡུལ་ཁ་རག་མགོ་དགུ། དེ་ནས་སྲིན་པོས་བཟུང་སྟེ་སྲིན་པོ་ནག་པོ་དགུ་ཡུལ། དེ་ནས་ལྷས་བཟུང་སྟེ། ལྷ་ཡུལ་གུང་ཐང་། དེ་ནས་དམུས་བཟུང་སྟེ། འཕྲང་རྩེ་འཕྲང་ཡུལ། དེ་ནས་འདྲེས་བཟུང་སྟེ། ལང་ཐང་ལི་ཐང་། དེ་ནས་མ་:བཟང་༼སང་༽སྤུན་དགུས་བཟུང་སྟེ། བོད་ཡུལ་ཉ་ཁ་དྲུགདེ་ནས་ཀླུས་བཟུང་སྟེ། བོད་ཁམས་གླིང་དགུ། དེ་ནས་རྒྱལ་པོས་བཟུང་སྟེ། དམ་པ་རྩེ་ཡུལ། དེ་ནས་མགོན་པོ་སྤུན་དགུས་བཟུང་སྟེ། སྟོང་སྡེ་བཅོ་བརྒྱད་ཅེས་ཡུལ་མིང་དུ་གྲགས་པ་འདི་ཉིད་ནི། ཡུལ་ཉི་ཤུ་རྩ་བཞིའི་ཡ་གྱལ་དུ་བྱེད་པ་བདེ་མཆོག་མཁའ་འགྲོ་རྒྱ་མཚོ་ལས། བོད་ཡུལ་དུ་ནི་ལྷན་སྐྱེས་ཏེ། །ཞི་ཞིང་གསལ་བའི་གཟུགས་ཅན་མ། །ཆུ་སྲིན་རྒྱལ་མཚན་ལག་ན་ཐོགས། །བྲག་གི་ཁྱིམ་ལ་བརྟེན་ཏེ་གནས། །རང་བྱུང་གི་ནི་སྐྱེ་གནས་ཅན། །ཞེས་གསུངས་སོ། །དེ་ཡང་སློབ་དཔོན་ཤེས་རབ་གོ་ཆའི་ལྷ་ལས་ཕུལ་བྱུང་གི་འགྲེལ་པ་ལས། སྐྱ་སེང་གི་བུ་ལྔ་དང་དགྲ་ངན་དཔུང་ཚོགས་ཡན་ལག་བཅུ་གཉིས་འཐབ་པའི་ཚེ། རྒྱལ་པོ་རུ་པ་ཏི་ཞེས་དམག་སྟོང་ཕྲག་གཅིག་དང་བཅས་བུད་མེད་ཀྱི་ཆས་སུ་ཞུགས་ཏེ་རི་གངས་ཅན་གྱི་དབུས་སུ་བྲོས་པ་ལས་མཆེད་པར་བཤད་ཅིང་ཡོངས་སུ་གྲགས་པ་སྤྱིར་འཛམ་བུ་གླིང་པའི་མི་རིགས་ལ་ཕྱི་བར་ནང་གསུམ་ལས་རྒྱལ་རིགས། རྗེ་རིགས། བྲམ་ཟེའི་རིགས། དམངས་རིགས་ཏེ་ཕྱི་རིགས་བཞི། རྒྱ་གར་ལྷ། རྒྱ་ནག་ཀླུ། ཧོར་ལྷ་མིན། བོད་སྤྲེའུ་དང་བྲག་སྲིན་མ་སྟེ་བར་གྱི་རིགས་བཞི། དེ་ཡང་སྤྲེའུ་དང་བྲག་སྲིན་གཉིས་འདུས་པའི་རིགས་དེ་ནི། ནུབ་ཕྱོགས་བདེ་བ་ཅན་ན་སངས་རྒྱས་སྣང་བ་མཐའ་ཡས་ཀྱིས་འཕགས་པ་སྤྱན་རས་གཟིགས་ལ། བོད་ཁ་བ་ཅན་གྱི་རྒྱལ་ཁམས་ཞེས་བྱ་བ་སྟོན་པ་ཤཱཀྱ་ཐུབ་པའི་དངོས་ཀྱི་གདུལ་བྱར་མ་གྱུར་པ་ཡོད་པས་དེ་དག་ལ་ཁྱོད་ཀྱིས་ཆོས་ཀྱི་སྦྱིན་པས་ཐུལ་ཅིག་ཅེས་གསུངས་པ་ལྟར། སྤྱན་རས་གཟིགས་ཀྱི་སྤྲུལ་པ་སྤྲེའུ་ཞིག་དང་རྗེ་བཙུན་སྒྲོལ་མའི་སྤྲུལ་པ་བྲག་སྲིན་མོ་གཉིས་འདུས་པ་ལས། སྤྲེའུ་ཕྲུག་མཇུག་མ་མེད་པ་སྤུས་ཁེངས་པ་གདོང་དམར་བ་དྲུག་བྱུང་བ་གཅིག་ལྷ་ལས་ཚེ་འཕོས་པ་ངང་རྒྱུད་དང་བྱད་བཞིན་བཟང་བ། ལྷ་མིན་ནས་ཚེ་འཕོས་པ་ཐུ་ལ་ཕྲག་དོག་ཆེ་བ། མི་ནས་ཚེ་འཕོས་པ་སེམས་ཆུང་ཤེས་རབ་རྒྱས་པ། ཡི་དྭགས་ནས་འཕོས་པ་ལུས་ངན་པ་ཟས་ལ་སྲེད་ཅིང་སེར་སྣ་ཆེ་བ། དུད་འགྲོ་ནས་འཕོས་པ་ལེགས་ཞན་མེད་པའི་གླེན་པ་གཅིགདམྱལ་བ་ནས་འཕོས་པ་ངོ་ནག་པ་བཞིན་མི་སྡུག་པ་སྡུག་སྲན་ཆེ་བ་རྣམས་བྱུང་། དེ་རྣམས་འཕེལ་ཏེ་བཞི་བརྒྱ་ལོང་། དེ་ཚན་པ་བཞིར་འཐབ་པ་དང་མེས་:བསོ་༼གསོ་༽བར་མཚམས་བྱས་ཏེ་ཞིང་ལ་ཆ་བཞིར་བགོས་གཅིག་ལ་གཅིག་འཇིགས་ནས་ཚན་པ་བཞིར་བྱས་པས། སེ་དང་། རྨུ་དང་། ལྡོང་དང་། སྟོང་སྟེ་ནང་གི་མིའུ་རིགས་བཞི་དང་། ཡང་འགའ་ཞིག་ཏུ་དབྲ་དང་:འབྲུ་༼འདྲུ༽བསྣན་པའི་དྲུག་སོགས་བཞེད་ཚུལ་མང་ཞིང་དུས་དེར་རྒྱལ་ཕྲན་བཅུ་གཉིས་དང་སིལ་མ་:བཅུ་བཞི༼བཅུ་གཉིས༽་རྣམས་ཀྱིས་དབང་བྱས་པར་བཤད་ཀྱང་སངས་རྒྱས་ཀྱི་བསྟན་པ་སྤེལ་བ་མ་བྱུང་། རིགས་གསུམ་མགོན་པོ་དང་སྒྲིབ་པ་རྣམ་སེལ་དང་། ཀུན་ཏུ་བཟང་པོ་སོགས་ཀྱི་རྣམ་འཕྲུལ་གྱི་ཆོས་ཀྱི་རྒྱལ་པོས་བོད་ཀྱི་འགྲོ་བ་འདུལ་བ་ལུང་བསྟན་པ་ལྟར། བོད་སྤྱི་ལ་དབང་བའི་རྒྱལ་པོའི་ཐོག་མ་རྒྱ་གར་གྱི་རྒྱལ་པོ་དམག་བརྒྱ་པའི་སྲས་མིག་མས་འགེབས་གཡུའི་སྨིན་མ་དང་དུང་སོ་འཁོར་མ། ལག་པའི་མཐིལ་དུ་འཁོར་ལོའི་རི་མོ་ཡོད་པའི་མི་ལས་འདས་པ་ཞིག་བཙས་པ་ལྷ་འདྲེའི་སྤྲུལ་པར་དོགས་ནས་སྤྱུགས་པ་ལྷ་རི་གྱང་མཐོའི་རྩེར་བྱོན་ནས་གཟིགས་པ་ན་ཡར་ཀླུང་ཡུལ་གྱི་དགེ་མཚན་ཕུན་སུམ་ཚོགས་པ་དང་། ཤམ་པོའི་གངས་རི་དཔྱད་བཟང་བར་མཁྱེན་ནས་ལྷ་རི་རོལ་པོའི་སྟེང་ནས་ལྷ་སྐས་བརྒྱུད་བཙན་ཐང་སྒོ་བཞིར་བྱོན་པས་ཕྱུགས་སྐྱོང་བ་སོགས་ཀྱིས་མཐོང་སྟེ་དྲིས་པ་ན་གནམ་ལ་མཛུབ་མོ་ཀེར་བས་ལྷར་ངེས་ནས་གཉའ་བར་ཁྲི་བྱས་གདན་དྲངས་པས་གཉའ་ཁྲི་བཙན་པོར་གྲགས།

ལྷ་ཐོ་ཐོ་རི་གཉན་བཙན་གྱི་སྐབས།

༈ དེ་ནས་རྒྱལ་རབས་ཉེར་བདུན་འདས་པ་ན་ལྷ་ཐོ་ཐོ་རི་གཉན་བཙན་ཕོ་བྲང་ཡུམ་བུ་གླ་སྒང་ན་བཞུགས་པའི་ཚེ་དཔང་སྐོང་ཕྱག་རྒྱ་པ། གསེར་གྱི་མཆོད་རྟེན། མདོ་སྡེ་ཟ་མ་ཏོག་གི་སྙིང་པོ་ཡི་གེ་དྲུག་མ། ཚིནྡྷ་མ་ཎིའི་རྐོས་ཕོར་རྣམས་ཕོ་བྲང་གི་ཡང་ཐོག་ཏུ་བབས་པ་ན་དམ་པ་ཆོས་ཀྱི་དབུ་བརྙེས། གང་ཡིན་མི་ཤེས་ཀྱང་བཟང་པོར་གོ་སྟེ་གཉན་པོ་གསང་བར་བཏགས་ནས་མཆོད་པ་རྒྱ་ཆེར་མཛད་པས་རྒྱལ་པོ་སླར་གཞོན་ཤ་ཅན་དུ་གྱུར་ནས་ལོ་བཞི་བཅུ་འཕར་བས་ཀུན་དྲིལ་ལོ་བརྒྱ་དང་ཉི་ཤུ་ཐུབ། དེ་ཡང་རྒྱལ་པོ་ཛཿའི་ཁང་སྟེང་དུ་གླེགས་བམ་གྱི་ཆར་བབས་ཚེ་མདོ་ཟ་མ་ཏོག་རླུང་གིས་ཁྱེར་ནས་ཡུམ་བུ་གླ་སྒང་གི་རྩེར་བབས་པས་བོད་དུ་ཆོས་དར་བའི་རྟེན་འབྲེལ་འགྲིག་ཟེར།

ཆོས་སྐྱོང་བའི་རྒྱལ་པོ་སྲོང་བཙན་སྒམ་པོའི་དུས།

༈ དེ་ནས་རྒྱལ་རབས་ལྔ་ན་འཇམ་དཔལ་རྩ་རྒྱུད་ལས། ལྷ་ལྡན་ཡུལ་ཞེས་བྱ་བ་ཡི། །གངས་ཅན་རི་ཡི་ནང་གནས་པའི། །རྒྱལ་པོ་མི་ཡི་ལྷ་ཞེས་པ། །ལི་ཙ་བྱི་རྣམས་རིགས་སུ་འབྱུང་། །ཞེས་དང་། འཇིག་རྟེན་སྒྲོལ་མ་ཞེས་གྲགས་དང་། །ལྷ་མོ་གོས་དཀར་མོ་དང་ནི། དཀར་མོ་ཆེན་མོ་གཞན་ཕན་བརྩོན། །ཞེས་སོགས་ལུང་དུ་མར་བསྟན་པ་བཞིན། ཆོས་སྐྱོང་བའི་རྒྱལ་པོ་སྲོང་བཙན་སྒམ་པོས་ཆོས་བློན་ཐུ་མི་སཾ་བྷོ་ཊ་རྒྱ་གར་དུ་བརྫངས་ཏེ་བོད་དུ་ཡི་གེ་མེད་པ་ལ་འབྲི་ཀློག་གི་སྲོལ་བཏོད། འོ་སྐོལ་གྱི་སྟོན་པ་དགུང་ལོ་བརྒྱད་པ་དང་བཅུ་གཉིས་པའི་སྐུ་ཚད་སངས་རྒྱས་དངོས་ཀྱི་ཞལ་སྐྱིན་གདན་འདྲེན་པའི་ཆེད་འཇིག་རྟེན་མཐུན་འཇུག་གི་ཚུལ་དུ་ཁྲོ་གཉེར་ཅན་གྱི་སྤྲུལ་པ་བལ་མོ་ཁྲི་བཙུན་དང་། སྒྲོལ་མའི་རྣམ་སྤྲུལ་རྒྱ་མོ་བཟའ་ཀོང་ཇོ་ཞེས་མཚོ་ནང་གི་པདྨར་གྲགས་པ་གཉིས་ཁབ་ཏུ་བསུས། འཕྲུལ་སྣང་གི་གཙུག་ལག་ཁང་བརྩིགས་པར་མི་མ་ཡིན་གྱིས་འཚེ་བ་ལ་བརྟེན་བརྩིག་ཏུ་མ་སྟེར་བས། རྒྱལ་པོ་ཡབ་ཡུམ་གསུམ་སྐུ་མཚམས་མཛད་ནས་ཡི་དམ་གྱི་ལྷ་བསྒྲུབས་པས་གྲུབ་སྟེ། ལུང་བསྟན་པ་ལྟར་བོད་སྲིན་མོ་གན་རྐྱལ་དུ་བསྒྱེལ་བའི་ས་གནད་རྣམས་སུ་མཐའ་འདུལ་ཡང་འདུལ་རུ་གནོན་གྱི་གཙུག་ལག་ཁང་རྣམས་བརྩིགས་པ་སྟེ་མ་ཎི་བཀའ་འབུམ་གྱི་རྒྱལ་པོའི་རྣམ་ཐར་ལེའུ་ཉེར་གཅིག་པའི་ནང་གི་ལེའུ་བཅུ་གསུམ་པར། སྲིན་མོ་གན་རྐྱལ་དུ་བསྒྱེལ་བ་འདྲ་བའི་དཔུང་པ་གཡོན་པར་བྱམས་པ་མི་འགྱུར་བའི་ལྷ་ཁང་ཁྲ་འབྲུག་བརྩིགས། བོད་ཀྱི་ལྷ་ཁང་ལ་སྔ་བ་དེ་ཡིན་ནོ། །དེའང་རྒྱལ་པོས་སྤྲུལ་པ་བཀྱེ་ནས་ཞག་བདུན་ལ་བརྩིགས་སོ། །དཔུང་པ་གཡས་པ་ལ་དབུ་རུ་ཀ་ཚལ་གྱི་ལྷ་ཁང་བརྩིགས། དཔྱི་གཡས་པ་ལ་གཡས་རུ་གཙང་འཕྲང་བརྩིགས། གཡོན་པ་ལ་རུ་ལག་གྲོམ་པ་རྒྱང་བཞེངས་སོ། །དེ་རྣམས་ཤིན་ཏུ་ནོན་ཆེན་པོ་བཞི་ཡིན་ཏེ། རྒྱལ་པོས་སྤྲུལ་པ་བཀྱེ་ནས་ཞག་རེ་ལ་བརྩིགས། ཡང་མཐའ་འདུལ་བཞི་བཏུལ། སྲིན་མོ་ལྟ་བུའི་གྲུ་མོ་གཡས་པར་ཀོང་པོ་བུ་ཆུ། གཡོན་པ་ལ་མཁོ་མཐིང་ལྷ་ཁང་། པུས་མོ་གཡོན་དུ་གུང་ཐང་། གཡས་སུ་བྱང་པྲ་དུམ་རྩེ་བརྩིགས། དེ་ནས་ཉིང་ལག་བཞི་མནན་ཏེ། ལག་མཐིལ་གཡས་སུ་མདོ་ཁམས་ཀློང་ཐང་སྒྲོན་མ། གཡོན་དུ་བྱང་ཚངས་པ་ཀླུ་ནོན་གྱི་ལྷ་ཁང་བརྩིགས་སོ། །རྐང་མཐིལ་གཡས་སུ་མང་ཡུལ་བྱམས་སྤྲིན། གཡོན་དུ་སྤ་གྲོ་སྐྱེར་ཆུ་ལྷ་ཁང་བཞེངས་སོ། །དེ་ཐམས་ཅད་རྒྱལ་པོས་སྤྲུལ་པ་བཀྱེ་ནས་ཞག་རེ་ལ་བཞེངས་སོ། །ཞེས་བཤད་དོ། །བུ་སྟོན་ཆོས་འབྱུང་དུ་གཞན་འདྲ་བ་ལས། པུས་མོ་གཡས་ལ་སྐ་བྲགགཡོན་ལ་པྲ་དུམ་རྩེ། ལག་མཐིལ་གཡས་ལ་བྱང་ཚལ་ཀླུ་གནོན། གཡོན་ལ་ཀློང་ཐང་སྒྲོལ་མ། རྐང་མཐིལ་གཡོན་ལ་མོན་བུམ་ཐང་བཞེངས་ཞེས་བཤད། གང་ལྟར་ཡང་མཐའ་འདུལ་ཡང་འདུལ་སོགས་དང་འཕྲུལ་སྣང་ར་མོ་ཆེའི་རྟེན་བརྟེན་པར་བཅས་པ་རྣམས་བཞེངས། ཆོས་ཀྱི་རྒྱལ་པོ་འདིའི་རིང་ལ་རྒྱ་གར་ནས་སློབ་དཔོན་ཀུ་ས་ར་དང་། བྲམ་ཟེ་ཤང་ཀ་ར། བལ་པོའི་སློབ་དཔོན་ཤྲཱི་ལ་མཉྫུ། རྒྱ་ནག་གི་སློབ་དཔོན་ཧ་ཤང་མ་ཧཱ་ཡཱ་ན་ལ་སོགས་པ་སྤྱན་དྲངས་ནས་སྡེ་སྣོད་གསུམ་དང་། རྒྱུད་ཀྱི་ཆ་ལག་མང་རབ་བསྒྱུར་ཞིང་བསྟན་པའི་སྲོལ་བཏོད། དངོས་སུ་འཆད་ཉན་མ་བྱུང་ཡང་རྒྱལ་པོ་རང་གིས་སྐལ་ལྡན་མང་པོར་ལྐོག་ཆོས་སུ་ཐུགས་རྗེ་ཆེན་པོ་ཞི་ཁྲོའི་གདམས་པ་ཕོག་སྟེ་ཉང་བྲན་ཕ་བོང་ཁར་ཐུགས་རྗེ་ཆེན་པོའི་རྣལ་འབྱོར་སྤྱོད་པའི་རལ་པ་ཅན་བརྒྱ་ཕྲག་ཙམ་རྒྱུན་དུ་བྱུང་བར་བཤད། དུས་དེར་གསུངས་པ་རྣམས་ཕྱོགས་གཅིག་ཏུ་བསྡོམས་པ་གཏེར་ཁ་གསུམ་དུ་བྱས་པ། གྲུབ་ཐོབ་དངོས་གྲུབ། མངའ་བདག་ཉང་། ཤཱཀ་འོད་གསུམ་གྱིས་གཏེར་ནས་སྤྱན་དྲངས་པའི་དེང་སང་མ་ཎི་བཀའ་འབུམ་ཞེས་གསང་སྔགས་རྙིང་མའི་ཟབ་ཆོས་སུ་གྲགས་པ་འདི་ཡིན།

རྗེ་བཙད་པོ་ཁྲི་སྲོང་ལྡེའུ་བཙན་གྱི་སྐབས།

༈ དེ་ནས་རྒྱལ་རབས་ལྔ་ན་རྗེ་བཙད་པོ་ཁྲི་སྲོང་ལྡེའུ་བཙན་ནི་མེས་སྲོང་བཙན་གྱིིས། ད་སྟེ་གདུང་རབས་ལྔ་ན་ངའི་དབོན་སྲས་རྒྱལ་པོ་ལྡེ་ཞེས་བྱ་བའི་རིང་ལ་དམ་པའི་ཆོས་འབྱུང་བའི་ལུང་བསྟན་ཟངས་ཀྱི་བྱང་བུ་ལ་བྲིས་ནས་རྗེའི་ཕྱག་སྦལ་དུ་བཅུག་པའི་དོན་ཐོག་ཏུ་ཕེབས་ཏེ་དམ་པའི་ཆོས་དར་བར་མཛད་པའི་ཐུགས་བསྐྱེད་རྨད་དུ་བྱུང་ནས་ཟ་ཧོར་གྱི་མཁན་པོ་ཤནྟ་རཀྵི་ཏ་སྤྱན་དྲངས། དགེ་བ་བཅུ་དང་ཁམས་བཅོ་བརྒྱད་ཀྱི་ཆོས་གསུངས་པས་བོད་ཀྱི་ལྷ་སྲིན་གདུག་པ་ཅན་རྣམས་ཁྲོས་ཏེ་བར་ཆད་སྣ་ཚོགས་ཀྱིས་ཐོ་འཚམ་པར་བརྟེན། སྔོན་གྱི་སྨོན་ལམ་གྱི་འབྲེལ་ཡོད་ཚུལ་གྱིས་ལུང་བསྟན་པ་ལྟར་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་སྤྱན་དྲངས། སྐུ་རྟེན་དུ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་རྟེན་བརྟེན་པར་བཅས་པ་བཞེངས་ཏེ། ཇི་སྐད་དུ། སྐུ་རྟེན་གཙུག་ལག་ཁང་ཞིག་འགྲུབ་ལགས་ཀྱང་། །གསུང་རྟེན་དམ་ཆོས་བོད་དུ་མ་བསྒྱུར་ན། །འདུས་བྱས་དགེ་བས་སངས་རྒྱས་མི་འཐོབ་འགྱུར། །ཞེས་གསུངས་པ་ལྟར་མཁན་ཆེན་ཞི་བ་འཚོ་དང་། བྷི་ཀྲ་མ་ལ་ཤཱི་ལའི་གཙུག་ལག་ཁང་ནས་ཐམས་ཅད་ཡོད་སྨྲའི་དགེ་སློང་བཅུ་གཉིས་སྤྱན་དྲངས་ཏེ་ཁ་སྐོང་དང་བཅས་པ་སྦ་གསལ་སྣང་། རྦ་ཁྲི་གཞེར་གྱི་བུ་སང་ཤི་ཏ། པ་གོར་ཧེ་འདོད་ཀྱི་བུ་བཻ་རོ་ཙ་ན། ངན་ལམ་རྒྱལ་བ་མཆོག་དབྱངས། རྨ་ཨ་ཙཱ་ར་རིན་ཆེན་མཆོགལ་སུམ་རྒྱལ་བ་བྱང་ཆུབ། རྦ་རཏྣ་དང་བདུན་ནོ། །མི་བདུན་རབ་ཏུ་བྱུང་བསྙེན་པར་རྫོགས་ནས་བསྟན་པའི་རྩ་བ་སོ་སོ་ཐར་པའི་གཞི་བཙུགས། པཎ་ཆེན་བི་མ་མི་ཏྲས་ཐོག་དྲངས་རྒྱ་གར་མཁས་པ་མང་པོ་དང་། ལོ་ཙཱ་བ་པ་གོར་བཻ་རོ་ཙ་ན། འཁོན་ཀླུའི་དབང་པོ། གཙང་ལེགས་གྲུབ། སྐ་ཅོག་ཞང་གསུམ་གྱིས་མཚོན་སྐད་གཉིས་སྨྲ་བ་སྟོང་རྩ་བརྒྱད་སོགས་མཐའ་དག་བསགས་ཏེ་ཐེག་པ་གོང་འོག་གི་ཆོས་རྣམས་བསྒྱུར་བ་བཤད་ཉན་གྱིས་གཏན་ལ་ཕབ། སློབ་དཔོན་ཆེན་པོས་རྗེ་འབངས་ཉེར་ལྔས་གཙོས་སྣོད་ལྡན་མང་པོར་བླ་རྫོགས་ཐུགས་གསུམ། བཀའ་བརྒྱད་སྤྱི་བྱེ་བྲག་སོགས་ཐེག་དགུའི་ཆོས་ཀྱིས་སྨིན་གྲོལ་ལ་བཀོད་དེ་མདོ་སྔགས་ཀྱི་བསྟན་པ་དར་རྒྱས་སུ་མཛད།

རལ་པ་ཅན་ནམ་ཁྲི་ལྡེ་གཙུག་བརྟན་གྱི་སྐབས།

༈ སླར་ཡང་སད་ན་ལེགས་མཇིང་ཡོན་གྱི་སྲས་ཕྱག་རྡོར་གྱི་རྣམ་སྤྲུལ་རལ་པ་ཅན་ནམ་ཁྲི་ལྡེ་གཙུག་བརྟན་གྱིས་སྐྱིད་སྨད་འོན་ཅང་རྡོའི་ལྷ་ཁང་ཁྱད་མཚར་བ་བཞེངས་ཏེ་རྒྱ་གར་ནས་སུ་རེཎྜ་བོ་དྷི། ཤྲཱི་ལེནྡྲ་བོ་དྷི། དཱ་ན་ཤཱི་ལ་སོགས་པཎྜི་ཏ་མང་པོ་སྤྱན་དྲངས། བོད་ཀྱི་མཁན་པོ་རཏྣ་རཀྵི་ཏ་དང་དྷརྨ་ཏ་ཤཱི་ལ་ལོ་ཙཱ་བ་ཛྙཱ་སེ་ན་ལ་སོགས་པས་སྔོན་ཡབ་མེས་ཀྱི་དུས་ལོ་པཎ་རྣམས་ཀྱིས་ཆོས་བསྒྱུར་བའི་ཚེ་བོད་སྐད་ལ་མ་གྲགས་པའི་མིང་བཏགས་པའི་ཁྲོད་ནས་ཆོས་ཀྱི་གཞུང་དང་བྱཱ་ཀ་ར་ཎའི་ལུགས་དང་མི་མཐུན་པ་དང་གོ་དཀའ་བ་རྣམས་སྐད་ཀྱི་མིང་གཅེས་སོ་འཚལ་ནས་ཀྱང་བསྣན་ཏེ་ཐེག་པ་ཆེ་ཆུང་གི་གཞུང་དང་མཐུན་པར་བསྒྱུར་བཅོས་གྱིས་ཞེས་བཀའ་བསྩལ་བ་ལྟར་ཕན་ཡུལ་ཀ་བ་ན་མོ་ཆེར་ཡུམ་རྒྱས་པ་ལ་འགྱུར་བཅོས་བྱས་ནས་དུམ་བུ་བཅུ་དྲུག་ཏུ་མཛད། དེས་མཚོན་ཡབ་མེས་ཀྱིས་བསྒྱུར་བའི་གསུང་རབ་ཕལ་ཆེར་སྐད་གསར་བཅད་ཀྱིས་གཏན་ལ་ཕབ། གསང་སྔགས་ནང་གི་རྒྱུད་སྡེ་རྣམས་བཀའ་གཉན་པས་སྣོད་ལྡན་མ་གཏོགས་སྣོད་མིན་བྱིངས་ཀྱི་སྤྱོད་ཡུལ་དུ་མ་གྱུར་པ་རང་བབས་སུ་བཞགགླང་དར་མས་བསྟན་པ་མ་བསྣུབས་པ་ཡན་ཆོད་ཀྱི་བཤད་སྒྲུབ་མཐའ་དག་གི་སྔགས་ཕྱོགས་ཡོངས་ལ་གང་དར་རྣམས་གསང་སྔགས་རྙིང་མ་དང་། མདོ་ལུགས་ཀྱང་བསྟན་པ་སྔ་དར་གྱི་ཁོངས་སུ་བསྡུ་ཞིང་། དེ་ནས་ཡུམ་བརྟན་དང་འོད་སྲུང་ནས་རྒྱལ་རབས་གསུམ་གྱི་རིང་ལོ་བདུན་ཅུའི་བར་བོད་དབུས་གཙང་ལ་རབ་བྱུང་གི་གཟུགས་བརྙན་ཀྱང་མེད་ཅིང་ཆོས་ལ་འཆད་ཉན་ལྟ་ཞོག་ནད་པའི་རིམ་གྲོ་ལ་ཡང་ཀློག་འདོན་བྱེད་པར་འདི་དམར་པོ་འདི་ནག་པོ་ཞེས་པ་ལས་མེད་པའི་སྐབས་དེར། སྟོད་ལུང་པ་རྨ་ཤཱཀྱ་མུ་ནེ། བོ་དོང་པ་གཡོ་དགེ་འབྱུང་། བཞད་ཀྱི་གཙང་རབ་གསལ་གསུམ་གྱིས་འདུལ་མངོན་སོགས་དཔེ་ཆ་དྲེལ་རྒྱབ་གཅིག་ཁྱེར་གསང་ཐབས་ཀྱིས་མངའ་རིས་སུ་བྲོས། དེ་ནས་བྱང་ལམ་བརྒྱུད་དེ་མར་ཁམས་སུ་ཕེབས་ནས་བསྟན་པའི་མེ་རོ་སྨད་ནས་བསླང་བ་ནི།

རྨ་གཡོ་གཙང་གསུམ་སོགས་ཀྱིས་བསྟན་མའི་མེ་རོ་སྨད་ནས་བསླང་བ།

༈ སྐྱེ་བ་སྔ་མ་རྒྱལ་པོའི་ཆོས་བློན་འབྲོ་སྟག་སྣང་ཁྲི་གསུམ་རྗེ་ཞེས་པ་ཞིག་གིས་ལོ་སོ་ལྔ་པ་ལ་སྨོན་ལམ་བཏབ་ནས་ཚེ་འཕོས་པ་ཡིན་ཡང་ཟེར་དོན་ལ་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་ཞིག་ཆུ་ཕོ་བྱི་བའི་ལོ་ལ་ཡུལ་ཙོང་ཁ་བདེ་ཁམས་སུ་འཁྲུངས། མཚན་མུ་ཟུ་གསལ་འབར་དུ་བཏགས། ཆུང་ངུ་ནས་རིགས་སད་དེ་ནོན་འཇམ་དཔལ་ལས་བཟླས་ལུང་བླངས། ཁང་རིན་ཆེན་རྡོ་རྗེ་ལས་བྱང་ཆུབ་ཏུ་སེམས་བསྐྱེད། སྐྱེ་ལས་དབུ་ཚད་དང་། ནམ་དགའ་ལྡན་ལས་ཡོ་ག་གསན་ནས་མཁྱེན་པར་མཛད། ནམ་ཞིག་རྨ་ཆུ་ཁའི་ཕྱུགས་རྫིས་རྨ་གཡོ་གཙང་གསུམ་དན་ཏིག་ན་བཞུགས་པ་མཐོང་ནས། འདི་ལྟར་འདུག་ཅེས་མི་རྣམས་ལ་སྨྲས་པས་ཐོས་ཏེ།

དགོངས་པ་རབ་གསལ་བསྙེན་པར་རྫོགས་ཚུལ།

མུ་ཟུ་གསལ་འབར་གྱིས་བལྟར་ཕྱིན་པས་མཐོང་བ་ཙམ་གྱིས་དད་ནས། འཁོར་བའི་སྡུག་བསྔལ་བསལ་ནས་ཐར་པ་ཡི། །བདུད་རྩིས་འགྲོ་བའི་སྡུག་བསྔལ་ཞི་བྱེད་པའི། །བསྟན་པ་ཕྱོགས་བཅུར་རྒྱས་པར་བྱ་བའི་ཕྱིར། །དང་པོར་བདག་གིས་རབ་ཏུ་བྱུང་བར་བྱ། །སྙམ་དུ་དགོངས་ཏེ། རབ་ཏུ་དབྱུང་བར་གསོལ་བས། འདུལ་བའི་པུསྟི་ཞིག་གཏད་ནས། འདི་ལ་ལྟོས་ལ་དད་ན་རབ་ཏུ་བྱུང་བར་བྱའོ་གསུང་། བལྟས་པས་ཆེས་དད་དེ་མཆི་མ་ཕྱུང་ནས་ཞུས་པས། དེར་གཙང་གིས་མཁན་པོ་དང་། གཡོས་སློབ་དཔོན་བྱས་ཏེ་དགེ་ཚུལ་དུ་བསྒྲུབས་ཤིང་། མཁན་སློབ་ཀྱི་མཚན་ལས་གྲས་ཏེ་དགེ་བ་རབ་གསལ་དུ་བཏགས། ཕྱིས་ཐུགས་རབ་ཆེས་གསལ་བས་དགོངས་པ་རབ་གསལ་དུ་གྲགས་སྐད། དེ་ནས་བསྙེན་རྫོགས་ཞུས་པས་དགེ་སློང་ལྔ་མ་ཚང་བས་མི་འོང་གསུང་བ་ལ། སྔར་ལྷ་ལུང་དཔལ་རྡོར་ཅན་གསུམ་ཀློང་ཐང་ན་འདུག་པ་མཐོང་ནས་འཚོལ་དུ་ཕྱིན་པས་རྙེད་དེ། འབྱོན་པར་ཞུས་པས། དཔལ་གྱི་རྡོ་རྗེའི་གསུང་ནས། ངས་རྒྱལ་པོ་སྡིག་ཅན་བསད་པས་ཁ་སྐོང་མི་འོང་གིངས་བཙལ་ལ་བཏང་གི་གསུང་སྟེ། རྒྱ་ནག་གི་དགེ་སློང་ཀེ་ཝང་དང་གྱིན་བན་བྱ་བ་གཉིས་འབད་པས་བཙལ་བས་རྙེད་དེ་བཏང་ངོ་། །དེ་ནས་སྔར་གྱི་མཁན་སློབ་གཉིས་ཀྱིས་མཁན་པོ་དང་ལས་སློབ། དམར་གྱིས་གསང་སྟོན། རྒྱའི་དགེ་སློང་གཉིས་ཀྱིས་ཁ་སྐོང་བྱས་ནས་བསྙེན་པར་རྫོགས་ཏེ་ངུར་སྨྲིག་གི་རྒྱལ་མཚན་འཛིན་པ་ཆེན་པོར་གྱུར། འདུལ་བའི་བཤད་པ་དང་ལག་ལེན་ལ་མཁས་པར་སྦྱངས། བསྙེན་པར་རྫོགས་ནས་ལོ་ལྔ་ལོན་པའི་ཚེ་དབུས་གཙང་གི་མི་བཅུ་མདོ་ཁམས་སུ་ཕྱིན་ནས་གཙང་ལ་བསྙེན་རྫོགས་ཞུས་པས། ང་རྒས་ནས་མཁན་པོ་མི་འཁྱོངས་པས་བླ་ཆེན་པོ་ལ་ཞུས་ཤིག་གསུངས་བ་ལྟར་ཞུས་པས། ངས་བསྙེན་པར་རྫོགས་ནས་ལོ་ལྔ་ལས་མ་ལོན་པས་མི་བཏུབ་གསུང་བ་ལ། གཙང་གི་ཞལ་ནས། དམིགས་བསལ་ལ་གང་ཟག་ཁྱད་པར་ཅན་གྱིས་བཏུབ་པས་གྱིས་གསུངས་ཏེ། བླ་ཆེན་པོས་མཁན་པོ་མཛད་ནས་ཐམས་ཅད་ཆིག་རྫོགས་མཛད་དོ། །

ནུས་པ་ཅན་གྱི་མི་བཅུ།

༈ དེ་ལ་ནུས་པ་ཅན་གྱི་མི་བཅུ་ནི། དབུས་ནས་ཀླགས་པ་ལམ་པ་ཀླུ་མེས་ཚུལ་ཁྲིམས་ཤེས་རབ། གཉལ་ནས་འབྲི་ཡེ་ཤེས་ཡོན་ཏན། གཡོ་རུ་བ་རྦ་ཚུལ་ཁྲིམས་བློ་གྲོས། རཀྴི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློས་གྲོས་དང་ལྔའོ། །གཙང་ནས་མགུར་ལོ་རབ་ཁ་བ་ལོ་སྟོན་རྡོ་རྗེ་དབང་ཕྱུགཤག་སྒོ་ལྔ་པ་ཚོང་བཙུན་ཤེས་རབ་སེང་གེམངའ་རིས་པ་འོད་བརྒྱད་སྤུན་གཉིས། བོ་དོང་པ་ཨུ་པ་དེ་དཀར་དང་ལྔའོ། །དེ་ནས་བླ་ཆེན་པོའི་ཞལ་ནས། ཀླུ་མེས་བཙུན་པས་མཁན་པོ་གྱིས། ཚོང་དགེ་བློ་རྣོ་བས་སྟོན་པ་གྱིས། འབྲིང་བསྐོས་ལ་མཁས་པས་གནས་གཞི་ཟུངས། ལོ་སྟོན་མཐུ་ཆེ་བས་བསྟན་བསྲུང་གྱིས། ཞེས་གསུངས་སོ། །དེ་ནས་སྐབས་ཤིག་སློབ་མ་རྣམས་ཀྱི་མཐོང་སྣང་ལ། བརྒྱ་བྱིན་ལ་སོགས་པའི་ལྷ་རྣམས་ཀྱིས་མཆོད་ཅིང་ཆོས་ཉན་པ་མཐོང་བས། བླ་ཆེན་པོ་ནི་སྤྲུལ་པ་ལགས་སམ་ཞུས་པས། ལན་དུ། དང་པོ་བུད་མེད་སྒོག་འཚོང་མ། །བར་དུ་སྟག་སྣང་ཁྲི་གསུམ་རྗེ། །ད་ལྟ་མུ་ཟུ་དགེ་བ་གསལ། །ཞེས་ཀྱང་གསུངས་སོ། །མཐར། དེ་ལྟར་སྒྲ་མེད་ཞི་བའི་ནགས་ཚལ་དེར། །སྡོམ་བརྩོན་ལྡན་པ་བརྩེ་ལྡན་སློབ་མའི་ཚོགས། །དེ་ལ་འགྲོགས་ན་བདེ་བ་དེ་དག་དང་། །ལྷན་ཅིག་དགེ་བའི་ཕྱོགས་ལ་བརྩོན་པར་གནས། །ཞེས་གསུངས་ནས་དགུང་ལོ་བརྒྱད་ཅུ་རྩ་བཞི་པ་ཤིང་ཕག་གི་ལོ་ལ་སྐུ་གཤེགས་ཁར། འཕགས་པ་ཐོགས་མེད་དང་མཆེ་བའི་སྡེ་གཉིས་ཀྱིས་ཡུམ་གྱི་དགོངས་པ་མི་འདྲ་བར་བཀྲལ་བ་དེ་ཁོ་བོས་བྱམས་མགོན་ལ་འདྲི་དགོས་ཏེ། སློབ་དཔོན་དེ་གཉིས་ཀྱང་ད་ལྟ་དགའ་ལྡན་ན་བཞུགས། ཞེས་གསུངས། ཡང་ཁོ་བོས་བྱམས་པ་མགོན་པོ་འཛམ་བུའི་གླིང་འདིར་མ་བྱོན་གྱི་བར་དུ་འདི་དག་ཏུ་སྐྱེ་བ་བརྒྱད་ཙམ་ལེན་དགོས་གསུངས་ནས་དགའ་ལྡན་དུ་གཤེགས་སོ། །དབུས་གཙང་གི་མི་བཅུའི་ནང་ནས་མཁན་པོར་མངའ་གསོལ་བ་ཀླུ་མེས་ཚུལ་ཁྲིམས་ཤེས་རབ་ཀྱིས་བླ་ཆེན་པོ་ལ། ཁོ་ཅག་དབུས་སུ་འགྲོ་བས་མཆོད་གནས་ཤིག་ཞུ་བྱས་པར། དབུ་ཞྭ་བཞེས་འཕྲོ་དེ་ཕུད་ནས་འདི་གྱོན་ལ་རྗེས་སུ་དྲན་པར་གྱིས་ཤིག་གསུངས་དབུ་ལ་བསྐོན་ནོ། །ཡར་བྱོན་ཏེ་བསམ་ཡས་ན་བཙན་པོ་ཁྲི་བྱ་བ་བཞུགས་པ་ལ་སྣ་གཏད་ནས་དེར་ཕྱག་ཕབ་པས། བཙན་པོས་ཀྱང་སྣེ་ལེན་བྱས་ཏེ། ཁྱེད་རྣམས་ཀྱི་དཔོན་གང་ཡིན་ཟེར་བ་ལ་ཀླུ་མེས་ཡིན་ཞེས་སྨྲས་པས་དབུ་རྩེའི་ལྡེ་མིག་གཏད། དེར་དཀོར་མཛོད་ཀྱིས་གང་བར་གཟིགས་ནས་འདོན་མི་ཐུབ་པའི་ཅ་ག་མཛད། ང་མཁན་པོར་མངགས་པས་མཁན་པོ་དཀོར་ལ་འབགས་པ་མི་རིགས་པས་འདི་མི་འཛིན་ཞེས་བཙན་པོ་ལ་ལྡེ་མིག་གཏད། དེ་ནས་ཁམས་གསུམ་ཕུལ་བས་ཀྱང་མ་བཞེས། ཀ་ཆུ་ཕུལ་བས། གཡོ་རུའི་ལམ་རྒྱགས་བྱ་ཡི་གསུངས་ཤིང་བཞེས། ཕྱིས་ཀླུ་མེས་ཀྱིས་ཡོ་བྱད་མང་པོ་སྟ་གོན་མཛད་དེེ་དབུ་རྩེ་གསོ་བར་བཞེད་པ་ན། སྦ་རག་གཉིས་ཀྱིས་བཟུང་བས་གསོར་མ་བཅུགདེར་བཙན་པོས་བར་བྱས་ཏེ། ཀླུ་མེས་ཀྱིས་གསོས་ཚར་རྗེས་སྦ་རག་ལ་གཏོད་པར་བྱས་ཏེ་ལེགས་པར་གསོས། གཞན་ཡང་ལ་མོ་ར་སྒྱེལ། ཡེར་པ་བ་རིང་། ཚོང་འདུས་གནས་སོགས་མཐའ་ཡས་པ་བརྩིགས་པས་ས་སྟེང་ཐམས་ཅད་ཀླུ་མེས་དཔོན་སློབ་ཀྱིས་གནས་གཞིས་ཁྱབ་པ་ལྟར་གྱུར། སྔགས་འཆང་ཇོ་སྲས་རྣམས་ཀྱིས་སྔོན་བསྒྱུར་བའི་བཀའ་བསྟན་གྱི་གླེགས་བམ་ཆུད་མ་ཟོས་པར་སྦས་ཏེ་བཟུང་བ་རྣམས་དེ་དག་ཏུ་སྤྱན་དྲངས། དད་པ་ཅན་མང་པོ་མཚོ་ལ་ངང་པ་འདུ་བ་ལྟར་འདུས་ནས་ཉིན་རེ་བཞིན་ཡང་རབ་ཏུ་བྱུང་བས་དགེ་འདུན་གྱི་སྡེ་མང་དུ་འཕེལ་ཏེ། དེའང་གཙོ་བོར་གྲུ་མེར་དང་སྣ་སྣམ་སོགས་ཀ་བ་བཞི། གདུང་བརྒྱད། ཕྱམ་སོ་གཉིས། དྲལ་མ་གྲངས་ལས་བརྒལ་བ་བྱུང་བར་གྲགས། ཀླུ་མེས་ཀྱི་སློབ་མ་ཡམ་ཤུད་རྒྱལ་བ་འོད་ཀྱི་སློབ་མ་དགེ་བཤེས་གྲྭ་པས་ཀྱང་གནས་གཞི་བརྒྱ་དང་རྩ་བརྒྱད་བཏིང་བར་གྲགས། ལོ་སྟོན་རྡོ་རྗེ་དབང་ཕྱུག་དང་། ཚོང་བཙུན་ཤེས་རབ་སེང་གེ་གཉིས་ཀྱིས་གཙང་དུ་དགེ་འདུན་གྱི་སྡེ་མང་དུ་སྤེལ་བས་ལོ་ཚོང་སྟོད་སྨད་གཉིས་སུ་མཆེད་དེ། རཀྴི་ཚུལ་ཁྲིམས་འབྱུང་གནས་ཀྱིས་ཁམས་སུ་འདུལ་བ་བསྐྱངས། སྦ་ཚུལ་ཁྲིམས་བློ་གྲོས་ཀྱིས་བུ་ཚལ། འབྲིང་ཡེ་ཤེས་ཡོན་ཏན་གྱིས་ཁམས་གསུམ་བཟུང་། ཀླུ་མེས་ཀྱིས་ཀ་བཅུ་ལ་སོགས་པ་བཟུང་ནས་འདུལ་བའི་བཤད་པ་མཛད་པས། རྔོག་བྱང་ཆུབ་འབྱུང་གནས། གྲུ་མེར་ཚུལ་ཁྲིམས་འབྱུང་གནས། གླན་ཡེ་ཤེས་ཤེས་རབ། སྣ་སྣམ་རྡོ་རྗེ་དབང་ཕྱུག་སྟེ་སློབ་མ་ཆེ་བ་བཞི་བྱུང་། གྲུ་མེར་གྱི་སློབ་མ་གྲ་ཕྱི་ཕུའི་རླུང་ལེགས་པའི་ཤེས་རབ། གྲ་ཕྱི་པའི་སྐྱོགས་ཤེས་རབ་འབྱུང་། གཟུས་རྡོ་རྗེ་རྒྱལ་མཚན་གསུམ་ལས། རླུང་སྐྱོགས་གཉིས་ཀྱིས་ལོ་ཙཱ་སློབ་ཏུ་ཕྱིན། གཟུས་ཀྱིས་ཀླུ་མེས་ལ་གཏུགས་ཏེ་རྒྱ་ཆེར་འགྲེལ་བམ་པོ་ལྔ་བཅུ་པ་སོགས་ལ་སྦྱངས། གཟུས་ལ་བུ་ཆེན་བཞི་བྱུང་སྟེ། འཛིམས་པ་དང་སྣེ་པོ་གཉིས་གཙང་གི་བུ་ཆེན། གླན་ཚུལ་ཁྲིམས་བྱང་ཆུབ་དང་། སྦོ་ཆུང་ཚུལ་ཁྲིམས་འབྱུང་གནས་གཉིས་དབུས་ཀྱི་བུ་ཆེན་དུ་གྲགས། དེ་དག་གི་སློབ་མ་གཙོ་ཆེ་བ་རྒྱ་འདུལ་འཛིན་གྱིས་དགའ་བ་གདོང་གི་གནས་གཞི་བཟུང་ནས་བསྟན་པ་སྤེལ་ལོ། །

ཀླུ་མེས་ཀྱི་ཀ་བ་བཞིར་གྲགས་པ།

༈ ཀླུ་མེས་ཀྱི་ཀ་བ་བཞིར་གྲགས་པ་ལས། རྒྱལ་བ་བྱམས་པའི་སྤྲུལ་པར་གྲགས་པ་སྣ་སྣམ་རྡོ་རྗེ་དབང་ཕྱུག་ནི། ཡབ་སྣ་སྣམ་ཇོ་སྲས། ཡུམ་ཞང་ལྕམ་སྒྲོལ་མའི་སྲས་སུ་མེ་ཕོ་བྱི་བ་ལ་ཡུལ་ཉམས་དགའ་མོར་འཁྲུངས། ཁོང་གི་ལོ་གསུམ་བཞེས་པ་ས་ཕོ་སྟག་ལ་འདུལ་བའི་བསྟན་པ་ཁམས་ནས་དབུས་སུ་བྱུང་། རང་ལོ་བཅོ་བརྒྱད་པ་ཆུ་མོ་བྱ་ལ་ཀླུ་མེས་ལས་རབ་ཏུ་བྱུང་། དེ་རྗེས་དང་པོར་ར་ཚག་གི་གཙུག་ལག་ཁང་བཞེངས། ཕྱིས་སོ་བདུན་བཞེས་པ་ཆུ་ཕོ་བྱི་བའི་ལོ་ལ་རྒྱལ་ལུག་ལྷས་ཀྱི་གཙུག་ལག་ཁང་བཞེངས་ཏེ་ལོ་འདི་ལ་རྗེ་མར་པ་ཡང་འཁྲུངས། རྒྱལ་ལྷ་ཁང་བཏབ་ནས་ལོ་དྲུག་སོང་བ་དང་། གྲུ་མེར་གྱིས་ཀླུ་མེས་ལ་ཞུས་ནས་སོལ་ནག་ཐང་པོ་ཆེའི་གཙུག་ལག་ཁང་བཏབ། སྣ་སྣམ་རྡོ་རྗེ་དབང་ཕྱུག་རང་ལོ་བརྒྱད་ཅུ་རྩ་ལྔ་པ་ལྕགས་ཕོ་བྱི་བ་ལ་གཤེགས། གླན་ཚུལ་ཁྲིམས་བྱང་ཆུབ་ཤིང་ཕོ་འབྲུག་ལ་འཁྲུངས། ལྔ་བཅུ་རྩ་བདུན་པ་བྱི་བའི་ལོར་རྒྱལ་ལྷ་ཁང་གི་གདན་སར་ཕེབས། དེ་རྗེས་ནས་ཀྱང་གདན་རབས་དང་ཚོགས་པ་ཡང་བསམ་གྱིས་མི་ཁྱབ་པ་བྱུང་བར་གྲགས། ཀླུ་མེས་མཁན་བུ་དགེ་བཤེས་ཡམ་ཤུད་ཀྱིས་ཁྲབ་ལ་ཁའི་དགོན་སྡེ་བཏབ། ཕུག་མོ་ཆེ་བཟུང་སྟེ་ཁྲབ་ལ་ཁའི་འདབས་ཡིན། དེར་བྱུང་བའི་མཁན་རྒྱུད་ནི། ཡམ་ཤུད་རྒྱལ་བ་འོད། གྲ་པ་མངོན་ཤེས། དགྱེར་ཆེན་དགོན་རྒྱབ་པ། དགྱེར་མོ་ཆེ་པ། མཁན་ཆེན་ངུར་པ་ཆེན་པོ། དེས་སྙན་བརྒྱུད་རྡོ་རྗེ་ཟམ་པར་ཐུགས་དམ་མཛད་དེ་རིམ་པར་བརྒྱུད་ཅིང་དར་བར་མཛད་དོ། །

དགེ་བཤེས་གྲྭ་པ་མངོན་ཤེས།

༈ དགེ་བཤེས་གྲྭ་པ་མངོན་ཤེས་ནི། ཁྲི་སྲོང་ལྡེའུ་བཙན་གྱི་བློན་པོ་མཆིམས་རྡོ་རྗེ་སྤྲེ་ཆུང་ཞེས་བྱ་བ་ཤེས་རབ་ཆེ་ཞིང་སྨྲ་མཁས་པས་རྒྱལ་པོ་དགྱེས་པ་ཞིག་བྱུང་། དེས་བསམ་ཡས་མཆོད་རྟེན་སྔོན་པོ་དང་བྱང་ཆུབ་གླིང་གོང་བཞེངས། དེ་ལ་བུ་གསུམ་ལས་འབྲིང་པོ་ལྷ་རྗེས་གྲྭའི་སྐྱིད་རུ་བཟུང་། དེ་ནས་བརྒྱུད་པ་ལྔའི་བར་མཆིམས་སུ་འབོད། ལྔ་པ་ཞང་སེ་ཚ་ལོགས་བརྟན་ནས་ཞང་དུ་འབོད། དེ་ལ་བུ་བཞི་བྱུང་བ་འབྲིང་པོ་ཞང་སྟག་དཀར་ལ་བུ་བཞི་བྱུང་བའི་ཆེ་བ་ཞང་སྟག་ཚབ་ཆུ་ཕོ་བྱི་བ་ལ་འཁྲུངས། རྗེ་མར་པ་དང་ལོ་མཉམ་ཡིན། རིགས་སད་དེ་མཁན་པོ་ཡམ་ཤུད་ལས་རབ་ཏུ་བྱུང་བའི་མཚན་ཤེས་རབ་རྒྱལ་བར་བཏགས། ཁུ་བོ་ཞང་སྟོན་ཆོས་འབར་ལ་ཆོས་མང་དུ་གསན། ཞང་འོན་གྱི་སྒྲུབ་ཐབས་བླངས་པ་ཙམ་གྱིས་ཞལ་གཟིགས། ཆོས་ཐམས་ཅད་ཅུང་ཟད་རེ་ཉན་པས་ཤེས་ཏེ་མཁྱེན་པའི་ཕུལ་དུ་བྱུང་། གཡོ་ནས་བརྩམས་ཏེ་ཕྱོགས་ཐམས་ཅད་དུ་གཙུག་ལག་ཁང་བརྒྱ་རྩ་བརྒྱད་བརྩིགས། ཁུ་བོ་གཤེགས་ནས་དགོན་པ་རེ་ཕུག་གི་གདན་སར་བཞུགས་མ་འདོད་ནས་གླག་གི་གནས་མོ་ཆེའི་གཟའ་མི་བྱས། རྒྱུད་འགྲེལ་མང་པོ་གསུངས། སློབ་མ་གཅིག་གིས་ཡར་ཀླུང་དུ་སྤྱན་དྲངས། སྐུ་བསོད་སྐྱེས་དེས་༼དགེ་བཤེས་༽གྲྭ་པ་ཞེས་པའི་མཚན་ཐོགས། དམ་པ་སངས་རྒྱས་ལ་ཞི་བྱེད་ཀྱང་གསན། དགུང་ལོ་བདུན་ཅུ་བཞེས་པ་ལྕགས་མོ་བྱ་ལ་གྲ་ཐང་གི་རྨང་བཏིང་། རང་ལོ་བདུན་ཅུ་རྩ་དགུ་པར་མཁན་བུ་གཅིག་གིས་སྙིང་ཐུར་བརྒྱབ་པ་ཐལ་ཆེས་པས་ཞི་བར་གཤེགས་ཚེ་ཕལ་ཆེར་གྲུབ་པ་ལ། ལྷག་མ་ཅུང་ཟད་དགོས་པ་རྣམས་དབོན་འབྱུང་ཤེས་དང་འབྱུང་ཚུལ་གཉིས་ཀྱིས་ལེགས་པར་ཚར་བར་བྱས་སོ། །གྲྭ་པ་གཤེགས་ནས་གྲ་ཐང་གི་གདན་ས་ཆོས་སྐྱབས་དོན་སྟེངས་པར་གྲགས་པ་དེས་མཛད། དེ་རྗེས་དེས་གྲྭ་པས་བཏབ་པའི་སྤྱན་གཡས་ཀྱི་མཁན་པོའང་མཛད་ནས་གནས་བརྟན་དར་མ་བཀྲ་ཤིས་སོགས་མཁན་རབས་མང་དུ་བྱུང་བར་གྲགས་སོ། །

རྔོག་ལོ་བློ་ལྡན་ཤེས་རབ།

༈ རྔོག་ལོ་བློ་ལྡན་ཤེས་རབ་ནི། ཆོས་རྒྱལ་ཁྲི་སྲོང་ལྡེ་བཙན་གྱི་བློན་པོ་རྔོག་ཆེན་པོ་ཞེས་བྱ་བ། བཙན་པོས་རྒྱ་ཡུལ་དུ་དམག་དྲངས་པའི་ཚེ་རྒྱལ་པོ་རི་དེའུ་གཅིིག་གི་ཁར་བཞུགས། དམག་རྣམས་ཡུལ་གཞན་འཇོམས་སུ་བཏང་བ་ན། རྒྱལ་པོའི་སྐུ་ལ་བདོ་བའི་རྒྱའི་གྱེན་ལོག་པ་འགའ་ཞིག་བྱུང་བས། བློན་པོ་རྔོག་གིས་འགའ་ཞིག་བསད། འགའ་ཞིག་འབྲོས་སུ་བཅུགདེ་ནས་རྒྱ་ཞོ་ཧབ་ཀྱིས་བཏབ། རྒྱ་ཕྲུག་བྲག་ལ་བརྡབས་ཟེར་བ་དེའི་བརྒྱུད་པ་ཡར་འབྲོག་དོའི་ཕྱི་རོལ་གྱི་མཚོ་ཆེན་པོའི་འགྲམ་དུ་གྲོང་ཆགས་པའི་སྔགས་རྙིང་མའི་དགེ་བཤེས་རྡོ་རྗེ་གཞོན་ནུ་ཞེས་བྱ་བ་ལ་སྲས་ལྔ་བྱུང་བའི་ཆེ་བ་རྔོག་ལེགས་པའི་ཤེས་རབ་ཡིན། གཉིས་པ་ཀླུ་ཁྲི། གསུམ་པ་ཀླུ་བྱང་། བཞི་པ་ཆོས་སྐྱབས། ལྔ་པ་ཐུབ་པ་རྣམས་ལས། ཆེ་བ་རྔོག་ལེགས་པའི་ཤེས་རབ་འབྲིང་ཡེ་ཤེས་ཡོན་ཏན་ལས་རབ་ཏུ་བྱུང་། སྡེ་སྣོད་བསླབ་པའི་ཕྱིར་ཁམས་སུ་བྱོན་ནས་ཇོ་བོ་སེ་བཙུན་གྱི་སློབ་མ་མཛད། ཆོས་མང་དུ་མཁྱེན་ནས་ཁུ་སྟོན་གཡུང་དྲུང་ཚུལ་ཁྲིམས་སོགས་དང་འགྲོགས་ནས་དབུས་སུ་ཕེབས། བཤད་པའི་གྲྭ་བཙུགས་ནས་སློབ་མ་མང་དུ་བྱུང་། ཇོ་བོ་སྙེ་ཐང་དུ་བཞུགས་པར་ཆོས་མང་དུ་གསན་དང་པོར་བྲག་ནག་གི་རྩར་དགོན་པ་ཞིག་མཛད་པ་ལས། ཕྱིས་ཇོ་བོས་ལུང་བསྟན་པ་བཞིན་ཆུ་མོ་གླང་གི་ལོ་ལ་གསང་ནེའུ་༼ལེའི་༽གཙུག་ལག་ཁང་ཆེན་པོ་བཏབ། དེ་དུས་འཁོན་དཀོན་མཆོག་རྒྱལ་པོས་ས་སྐྱའི་དགོན་པའང་བཏབ་པ་ཡིན། ཇོ་བོའི་ཆོས་ལ་གཙོ་བོར་མཛད་པ་ཡིན་ནོ། །དེའི་དབོན་པོ་རྔོག་བློ་ལྡན་ཤེས་རབ་ཡིན་པ་ཆོས་སྐྱབས་ཀྱི་སྲས་སུ་ས་མོ་ཕག་གི་ལོ་ལ་འཁྲུངས། ཁུ་བོ་དང་གཟུས་ཀྱི་སློབ་མ་སྦོ་ཆུང་བ་ཚུལ་ཁྲིམས་ཤེས་རབ་སོགས་ལ་གསན་པ་མང་དུ་མཛད། ཤེས་རབ་ཕུལ་དུ་བྱུང་བ་ཡིན་པས་ཁུ་བོ་མཉེས་ནས་ལོ་བཅུ་བདུན་བཞེས་པའི་ཚེ་ཁ་ཆེར་བསླབ་གཉེར་ལ་བརྫངས། དེའི་ཚེ་རྭ་ལོ། གཉན་ལོ། ཁྱུང་པོ་ཆོས་བརྩོན། བཙན་ཁ་བོ་ཆེ་རྣམས་དང་ལྷན་ཅིག་འགྲོགས་ཏེ་བྱོན་པས། མངའ་བདག་རྩེ་ལྡེས་དབུས་གཙང་ཁམས་གསུམ་གྱི་སྡེ་སྣོད་འཛིན་པ་རགས་པ་རྣམས་སྤྱན་དྲངས་ནས། མེ་ཕོ་འབྲུག་གི་ལོའི་ཆོས་འཁོར་མཛད་པ་དང་ཐུགརྩེ་ལྡེའི་སྲས་པོ་དབང་ཕྱུག་ལྡེས་ཡོན་བདག་བྱ་བར་ཆད་ནས་ཁ་ཆེར་བྱོན། པཎྜི་ཏ་ས་ཛྙ་ན་དང་། བ་ར་ཧེ་ཏ་བྷ་ཏྲ་ལ་སོགས་པ་དྲུག་ཙམ་བརྟེན་མཁས་པར་སྦྱངས། དབང་སྡེས་གསེར་མང་པོ་བསྐུར་ནས་ཚད་མ་རྒྱན་སྒྱུར་ཅིག་བྱ་བའི་ཡི་གེ་བྱུང་བས། པཎྜི་ཏ་སྐལ་ལྡན་རྒྱལ་པོ་དང་རྔོག་གཉིས་ཀྱིས་ལེགས་པར་བསྒྱུར། ཁ་ཆེར་ལོ་བཅུ་བདུན་དུ་ཡང་དག་པར་སྦྱངས་ཏེ་སླར་བོད་དུ་བྱོན་ནས་པཎྜི་ཏ་འབུམ་ཕྲག་གསུམ་པ་དང་། སུ་མ་ཏི་ཀིརྟི་གཉིས་ལ་ཆོས་གསན་ཞིང་བལ་པོར་ཡུག་ཅིག་བྱོན་ནས་ཨ་རུ་ལྱ་བཛྲ་དང་། བ་རནྡྲ་རུ་ཅི་ལ་སོགས་པ་ལ་སྔགས་ཀྱི་གསན་པའང་མཛད། སླར་བོད་དུ་ཕེབས་འགྱུར་མང་པོ་མཛད་པ་རྣམས་ཤིན་ཏུ་བཟང་ཞིང་ཕུལ་དུ་གྱུར་པས། གྲོ་ལུང་པས། དམ་ཆོས་བསྒྱུར་ལ་མངའ་བརྙེས་པའི། རྒྱལ་ཡུམ་གཉིས་དང་བསྟན་བཅོས་གཞུང་། འབུམ་ཕྲག་གཅིག་དང་ཁྲི་ཕྲག་གསུམ། །སྟོང་ཕྲག་བདུན་ནི་ལྷག་བཅས་བསྒྱུར། །ཞེས་གསུངས། དེ་ཡང་ལྷ་ས་དང་། བསམ་ཡས་དང་། མྱུ་གུ་སྣ་དང་། གཉལ་སྒང་ཐོག་དང་། གཙང་རྒྱང་མཁར་ལ་སོགས་པར་བཤད་པ་མཛད་པའི་གྲངས་ནི། མཁས་བཙུན་གྲངས་རིམ་པ་བཞིན། ཁྲི་ཚོ་གཉིས་དང་སུམ་སྟོང་དང་། ཞེས་བྱ་བ་དང་། ཟུར་ཆོས་འཆད་པའི་གྲངས་ཀྱང་། རྒྱན་དང་ཆོས་མཆོག་འཆད་མཁན་ལྔ་བཅུ་རྩ་ལྔ། རྣམ་ངེས་འཆད་པ་ཉིས་བརྒྱ་དང་བརྒྱད་ཅུ། ལུང་ཆོས་སྨྲ་བ་སྟོང་དང་བརྒྱད་བརྒྱ་སྟེ། ཆོས་སྨྲ་བ་ཉིས་སྟོང་ཆིག་བརྒྱ་སུམ་ཅུ་ཙམ་ཞིག་འདུས། ཚད་མ་དང་བྱམས་ཆོས་དང་དབུ་མ་ལ་སོགས་པའི་རྣམ་བཤད་ཀྱང་མང་དུ་མཛད་ནས་མཐར་དགུང་ལོ་ང་གཅིག་བཞེས་པའི་ཚེ་བསམ་ཡས་དང་ཉེ་བའི་ལམ་དུ་སྐུ་གཤེགས་སོ། །སློབ་མའི་ཚོགས་མཐའ་ཡས་པ་དེ་དག་གི་ནང་ནས་ཞང་ཚེ་སྤོང་ཆོས་ཀྱི་བླ་མ། གྲོ་ལུང་པ་བློ་གྲོས་འབྱུང་གནས། ཁྱུང་རིན་ཆེན་གྲགས། འབྲེ་ཤེས་རབ་འབར་བཞི་ལ་སྲས་ཀྱི་ཐུ་བོ་བཞི་ཟེར་བར་གྲགས་སོ། །

བསྟན་པ་ཕྱི་དར་གྱི་སྐབས།

བཀའ་གདམས་རྙིང་མའི་སྐབས།

ཇོ་བོ་རྗེ་ཨ་ཏི་ཤ།

༈ དེ་ཡང་སྤྱིར་སྲོང་བཙན་སྒམ་པོ་འཁྲུངས་ནས་ལོ་ཉིས་བརྒྱ་དང་ལྔ་བཅུ་རྩ་གཉིས་འདས་པ་ལྕགས་མོ་གླང་གི་ལོ་ལ་རྒྱལ་པོ་རལ་པ་ཅན་གྱིས་རྒྱ་དང་འདུམ་མཛད། ༼དེའི་ཕྱི་ལོ་ཆུ་ཕོ་སྟག་ལ་ལྷ་སའི་༽རྡོ་རིང་བཙུགས། ཆུ་སྟག་དེ་ནས་ལོ་བཅོ་ལྔ་པ་མེ་ཕོ་འབྲུག་ལ་རལ་པ་ཅན་རྒྱལ་པོ་དར་མས་བཀྲོངས་ནས། ལོ་དེ་ཉིད་ནས་ལྕགས་མོ་བྱའི་བར་དར་མས་རྒྱལ་པོ་བྱས། རབ་ཏུ་བྱུང་བའི་བསྟན་པ་བསྣུབས། བར་དེར་ལོ་བདུན་ཅུ་ཙམ་ཞིག་ལ་དབུས་གཙང་དུ་བསྟན་པའི་སྲོལ་ནུབ། དེ་ནས་སྟོད་སྨད་གཉིས་ནས་༼དར་བ་ལས། ༽མངའ་རིས་ནས་དར་བ་ནི། ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་གདུང་རྒྱུད་བཙན་པོ་སྲོང་ངེས་རྒྱལ་སྲིད་གཅུང་འཁོར་རེ་ལ་གཏད་ནས་རབ་ཏུ་བྱུང་། མཚན་ལྷ་བླ་མ་ཡེ་ཤེས་འོད་ཅེས་གྲགས། དེས་ལོ་ཙཱ་རིན་ཆེན་བཟང་པོ་སོགས་ཁྱེའུ་ཉེར་གཅིག་རྒྱ་གར་དུ་བརྫངས། དེ་རྗེས་པཎྜི་ཏ་སྨྲྀ་ཏི་དང་ཇོ་བོ་རྗེ་ཨ་ཏི་ཤ། གྷ་ཡ་དྷ་ར། པཎ་ཆེན་ཤཱཀྱ་ཤྲཱི། འབྲོག་མི་མར་མལ་འགོས། རྭ་གཉལ་ས་རྔོགཤོང་དཔང་སོགས་ཀྱིས་བསྒྱུར་བཤད་ཀྱིས་བསྟན་པ་སྤེལ་བས་ཕྱི་དར་ཞེས་གྲགས་པ་རྣམས་ལས། གྲགས་ཆེ་བ་རགས་རིམ་ཞིག་གི་ལོ་རྒྱུས་ཅུང་ཟད་བརྗོད་ན། བསྟན་པ་བསྣུབས་པའི་ལྕགས་བྱ་ནས་ལོ་བརྒྱ་དང་བཞི་བཅུ་འདས་རྗེས་ཀྱི་ཆུ་ཕོ་རྟ་ལ་ཇོ་བོ་རྗེ་བོད་དུ་ཕེབས། དེའི་ཚེ་རྗེ་མར་པ་ལོ་སོ་གཅིག་ལོན། འཁོན་དཀོན་མཆོག་རྒྱལ་པོ་ལོ་དགུ་ལོན། དུས་སྐབས་དེར་གཟུས་དང་གྲྭ་པ་མངོན་ཤེས་གཉིས་ཀྱིས་ཀྱང་མཁན་པོའི་བྱ་བ་བྱེད། གྲྭ་པའི་སློབ་མ་བཙན་ཁ་བོ་ཆེས་ཉི་ཤུ་རྩ་གསུམ་ལོན་གཟུས་ཀྱི་བུ་ཆེན་རྣམས་ཀྱང་དུས་དེར་ཡོད། ཇོ་བོས་འཆད་ཉན་གྱིས་བསྟན་པ་བསྐྱངས་པའི་གནས་གཙོ་ཆེ་བ་སྙེ་ཐང་། ལྷ་ས། ཡེར་པ། འཕན་ཡུལ་ལན་པ་རྣམས་སུ་ཆོས་མང་དུ་གསུངས། ཤིང་ཕོ་རྟའི་ལོ་སྟོན་ཟླ་འབྲིང་པོའི་ཚེས་ཉི་ཤུ་ལ་ཇོ་བོ་དགའ་ལྡན་དུ་གཤེགས། སློབ་མ་ཡང་བགྲང་བ་ལས་བརྒལ་ཡང་རགས་རིམ་རྣ་བས་ཐོས་པའི་ཡི་གེ་ལས། ལྷ་བཙུན་བྱང་ཆུབ་འོད་ཁུ་དབོན། ལོ་ཆེན་རིན་བཟང་། འབྲོམ་སྟོན། ཤར་པ་བ། པོ་ཏོ་བ། རྔོག་ལེགས་པའི་ཤེས་རབ། གུང་ཐང་སྒོམ་པ་ཚུལ་ཁྲིམས། གཟུས་རྡོ་རྗེ་རྒྱལ་མཚན། འགོས་ལོ་ཙཱ་བ། སུམ་པ། སྣ་སྣམ། རྒྱ་བརྩོན་སེང་། ཤཱཀྱ་བློ་གྲོས། ཚུལ་ཁྲིམས་འབྱུང་གནས། ཡོལ་མཆེད་དབང་གསུམ་ལ་སོགས་པའོ། །

ལོ་ཆེན་རིན་ཆེན་བཟང་པོ།

༈ ༼དེ་ལ་ལོ་ཆེན་རིན་ཆེན་བཟང་པོ་ནི། ༽པཎྜི་ཏ་བདུན་ཅུ་ཙམ་བསྟེན་ནས་ཆོས་མང་དུ་གསན། ལྷ་ལྡེ་བཙན་གྱི་དབུའི་མཆོད་གནས་སུ་གྱུར། གནས་གཞི་དང་གཙུག་ལག་ཁང་མཆོད་རྟེན་ལ་སོགས་པ་མང་དུ་བཞེངས། གུར་ཤིང་བརྩོན་འགྲུས་རྒྱལ་མཚན་ལ་སོགས་པའི་སློབ་མ་མཁས་གྲུབ་མང་དུ་ཐོན། ཞུས་ཆེན་ཕེར་བའི་ལོ་ཙཱ་བ་བཅུ་ལྷག་ཙམ་བྱུང་། མཚན་བརྗོད་སཾ་སྐྲྀ་ཏའི་སྐད་དུ་འབུམ་ཕྲག་གཅིགབོད་སྐད་དུ་འབུམ་ཕྲག་གཅིགགཞན་ལ་ཡོན་བྱིན་ཏེ་འབུམ་ཕྲག་གཅིག་བཏོན། མཐར་ཇོ་བོས་སྒྲུབ་པ་ལ་བཙུད་དེ། སྒྲུབ་ཁང་གི་ཕྱི་རོལ་ན་སྒོ་གསུམ་རིམ་དུ་ཡོད་པ་ལ། ཚེ་འདིའི་རྣམ་རྟོག་དང་། རང་དོན་ཡིད་བྱེད་ཀྱི་རྣམ་རྟོག་དང་། ཐ་མལ་གྱི་རྣམ་རྟོག་རྣམས་སྐད་ཅིག་རེ་སྐྱེས་ན། བསྟན་བསྲུང་རྣམས་ཀྱིས་ཁོ་བོའི་མགོ་བོ་ཁོས་ཤིག་ཅེས་པའི་སྒོ་ཡིག་སྦྱར་ནས། རྩེ་གཅིག་ཏུ་སྒྲུབ་པ་མཛད་པས་མཆོག་གི་དངོས་གྲུབ་བརྙེས་ཏེ་དགུང་ལོ་དགུ་བཅུ་རྩ་བརྒྱད་པ་ཤིང་མོ་ལུག་གི་ལོ་ལ་མྱ་ངན་ལས་འདའ་བའི་ཚུལ་བསྟན་ཏོ། །

འབྲོམ་སྟོན་རྒྱལ་བའི་འབྱུང་གནས།

༈ འབྲོམ་སྟོན་རྒྱལ་བའི་འབྱུང་གནས་ནི། གདུང་རུས་ཡང་ཞེར། ཡབ་རྟ་གསུམ་ཤུ་བཞེར། ཡུམ་ཁུ་ལྟོ་བཟའ་ལན་གཅིག་མ་གཉིས་ཀྱི་སྲས་སུ་ཤིང་མོ་སྦྲུལ་ལོ་ལ་སྟོད་ལུང་ཕུར་འཁྲུངས། རྒྱ་གར་དུ་ཕེབས་པའི་ལམ་ཁར་ཇོ་བོ་སྐྱིད་རོང་དུ་ཕེབས་པ་དང་མཇལ། ཆོས་མང་དུ་གསན་སླར་དབུས་སུ་ཕེབས་ནས་རྭ་སྒྲེང་གི་གཙུག་ལག་ཁང་བཏབ། ཇོ་བོ་རྗེ་གཤེགས་སྐབས་འབྲོམ་ལ་ངའི་བསྟན་པ་ཁྱོད་ལ་གཏོད་པས་ཟུངས་གསུང་བ་ལ། སྤྱིར་བདག་འཁོས་ཆུང་། ཁྱད་པར་རྟེན་དགེ་བསྙེན་དུ་སོང་བས་བྱ་བ་ཆེན་པོ་སྒྲུབ་མི་ནུས་ཞུས་པས། ང་རང་གིས་བྱིན་གྱིས་རློབ་པས་སེམས་ཁྲལ་མི་དགོས་གསུངས་ནས་གཤེགས་སོ། །དེ་ནས་བཟུང་ཇོ་བོའི་སློབ་མ་རྣམས་ཀྱང་བསྐྱངས་པས་སློབ་མ་བསྟན་པ་ལ་བྱ་བ་ནུས་པ་མང་པོ་བྱུང་ཞིང་། མཆོག་ཏུ་གྱུར་པ་དགེ་བའི་བཤེས་གཉེན་པོ་ཏོ་བ། སྤྱན་སྔ་བ། ཕུ་ཆུང་བ་གསུམ་བྱུང་བ་རྣམས་ལ་སྐུ་མཆེད་རྣམ་པ་གསུམ་དུ་གྲགས། པོ་ཏོ་བ་ལ་གདམས་པ་བསྟན་པ་ཙམ་གྱིས་ཇི་ལྟ་བ་བཞིན་ཐུགས་རྒྱུད་ལ་འཁྲུངས། སྤྱན་སྔ་བ་ལ་ཁྱོད་རང་སྟོང་པ་ཉིད་ཁོ་ན་ལེགས་པར་སྒོམས་དང་གསུངས། ཇོ་བོའི་མན་ངག་མང་པོ་ཡང་ཁོང་ལ་གནང་བས་སྤྱན་སྔ་བར་མཚན་ཐོགས། ཕུ་ཆུང་པ་ལ་འཕགས་པའི་བདེན་པ་བཞི་ལས་བརྩམས་ཏེ་ཆོས་བསྟན་ནས་ཐམས་ཅད་བསམ་གཏན་ལ་མཉམ་པར་འཇོག་ཏུ་བཅུག་པས། རྒྱལ་བའི་བཀའ་མ་ལུས་པ་གང་ཟག་གཅིག་འཚང་རྒྱ་བའི་ལམ་དུ་འཁྱེར་དགོས་པར་དགོངས་ནས་ཉམས་ལེན་མཛད་པས་དེ་རྣམས་ནས་བཀའ་གདམས་པ་ཞེས་པའི་མཚན་ཐོགས། དེ་ནས་འབྲོམ་སྟོན་མྱ་ངན་ལས་འདས་ཁར། པོ་ཏོ་བ་ལ། ངས་ཁྱེད་རྣམས་ཀྱི་རྟེན་ས་གཞན་མ་མཐོང་བས། སློབ་དཔོན་མདོ་སྡེ་ལ་ཆོལ། ཞེས་སོགས་ཞལ་གདམས་གནང་ནས་དགུང་ལོ་དྲུག་ཅུ་པ་ཤིང་ཕོ་འབྲུག་ལ་མྱ་ངན་ལས་འདས། དེ་ནས་ཕུ་ཆུང་པས་ནི་ཤ་གཟུགས་རང་ཟ་གསུངས་ནས་ཚོགས་པ་མ་བསྐྱངས། པོ་ཏོ་བས་འབྲོམ་གཤེགས་ནས་རང་ལོ་ལྔ་བཅུའི་བར་དུ་ཐུགས་དམ་འབའ་ཞིག་མཛད། ལྔ་བཅུ་རྩ་གཅིག་ནས་གཞན་དོན་མཛད་དེ་བཞུགས་པ་མཁན་བྲག་དང་། སྒྲོ་ལག་དགོན་དང་། མཐར་ཐོག་དང་། སྟག་ལུང་ལ་སོགས་པ་གནས་ངེས་མེད་དུ་བཞུགས། ཚོགས་པའང་རྒྱུན་དུ་རྗེས་སུ་འབྲང་བ་སྟོང་ཕྲག་ལྷག་པ་རེ་འདུས། གཞན་གྱིས་གནོད་པ་བྱེད་པ་བྱུང་ན་ཡང་སྤྱིར་དགེ་སློང་ཁས་ཉེན། བྱེ་བྲག་བྱང་ཆུབ་སེམས་དཔའ་ཁས་ཉེན་གསུངས་ནས་གནོད་ལན་ཡེ་མི་མཛད། ཆོས་ནི་ལམ་སྒྲོན། མདོ་སྡེ་རྒྱན། བྱང་ས། བསླབ་པ་ཀུན་ལས་བཏུས། སྐྱེས་རབས་དང་ཆེད་དུ་བརྗོད་པའི་ཚོམ་ལ་ནན་ཏན་དུ་གསུངས་བས་བཀའ་གདམས་གཞུང་དྲུག་ཏུ་གྲགས། སྐུ་ཚེའི་སྨད་ལ་པོ་ཏོ་དགོན་བཏབ། ཁོ་རང་གིས་འཕགས་པའི་གནས་བརྟན་ཡན་ལག་འབྱུང་དུ་ཡང་ཞལ་གྱིས་བཞེས། སློབ་མ་ཡང་། དོལ་ནས་རོག་དམར་ཞུར་བ། ཁ་རག་སྒོམ་ཆུང་། དྲེའུ་ལྷས་པ། གླང་རི་ཐང་པ། ཤར་པ་ལ་སོགས་པ་མང་དུ་བྱུང་། དགུང་ལོ་བདུན་ཅུ་རྩ་ལྔ་པ་ཤིང་མོ་བྱ་ལ་མྱ་ངན་ལས་འདས།

རོག་ཤེས་རབ་རྒྱ་མཚོ།

༈ དེ་ལ་རོག་ཤེས་རབ་རྒྱ་མཚོ་ནི། དོལ་པ་དམར་ཞུར་བར་གྲགས་པ་དེ་ཡིན། རབ་ཏུ་བྱུང་ནས་རོག་མངོན་པ་བ་དང་རྒྱ་འདུལ་འཛིན་གཉིས་ལ་མངོན་པ་དང་འདུལ་བ་གསན། འགྲོ་དོན་རྒྱ་ཆེར་མཛད། འགྲོ་མགོན་ཕག་གྲུ་པར་ཡང་ཆོས་འབྲེལ་གསན་པར་གྲགས་སོ། །

གླང་རི་ཐང་པ་རྡོ་རྗེ་སེངྒེ།

༈ གླང་རི་ཐང་པ་རྡོ་རྗེ་སེངྒེ་ནི། ཤིང་ཕོ་རྟ་ལ་འཁྲུངས་ནས་ཆུ་མོ་ཡོས་ཀྱི་བར་ལོ་བདུན་ཅུ་བཞུགས་ནས་པོ་ཏོ་བའི་མཛད་པ་བཞིན་བསྐྱངས། ལན་གཅིག་ཚེ་རབས་ཐམས་ཅད་དུ་དགེ་སློང་གི་དངོས་པོ་དང་མི་འབྲལ་བའི་དམ་བཅའ་མཛད་པས། དཔལ་ལྷ་མོ་དྲེའུ་སྐད་ལྷང་གིས་དེའི་བར་དུ་ངས་ཁྱོད་ཀྱི་གྲོགས་བྱའོ་གསུངས། ཁམས་ནས་དབང་ཕྱུག་རྒྱལ་མཚན་ཞེས་པ་ཞིག་བྱུང་ནས་ཇོ་བོར་ཆོས་མང་དུ་གསན། ཇོ་བོའི་མཆོད་གནས་ཀྱང་མཛད་པ་ཞིག་གིས་འགྲོ་དོན་མཛད་པའི་སློབ་མ་མང་དུ་བྱུང་བའི་གཙོ་བོ་སྣེའུ་ཟུར་པ་ཡིན། དེ་ལ་ཕྱིས་གླང་ཐང་པས་ཀྱང་ཆོས་མང་དུ་གསན། ཚོགས་པ་ཉིས་སྟོང་ཙམ་འདུས་པར་གྲགས། དེ་ནས་སློབ་མ་རྣམས་ཀྱིས་གདན་ས་ཡུན་རིང་བསྐྱངས་ནས་མཐར་གླང་ཐང་རྒྱ་མའི་སངས་རྒྱས་དབོན་ལ་ཕུལ། གླང་ཐང་ཞང་འདི་ལ་ཕག་མོ་གྲུ་པས་ཀྱང་གཏུགས་པར་གྲགས་སོ། །

དགེ་བཤེས་ཤ་ར་བ་ཆེན་པོ།

༈ དགེ་བཤེས་ཤ་ར་བ་ཆེན་པོ་ནི། བྱང་གི་རོམ་པོར་འབྲོག་པ་ཞིག་གི་སྲས་སུ་ལྕགས་ཕོ་ཁྱི་ལ་འཁྲུངས། གཞོན་པའི་དུས་སུ་ཕ་མས་བག་མ་བླངས་པ་ལ་མ་ཆགས་པར། པོ་ཏོ་བའི་སྤྱན་སྔར་བྱོན་ནས་རབ་ཏུ་བྱུང་ཞིང་གདམས་པ་གསན། ཐུགས་རབ་ཤིན་ཏུ་ཆེ་བས་བཀའ་འགྱུར་རོ་ཅོག་ཐུགས་ལ་བཞུགས་པར་གྲགས། པོ་ཏོ་བ་གཤེགས་པའི་རྗེས་སུ་པོ་ཏོ་བའི་སློབ་མ་ཕལ་ཆེར་ཁོང་ལ་འདུས། བཤད་པ་ཕལ་ཆེར་གཞུང་ཆེ་བ་ཁོ་ན་ལ་མཛད། ཚོགས་པ་སུམ་སྟོང་དྲུག་བརྒྱ་ཚོགས་པའི་ནང་ནས་པྲཛྙ་ཛྭ་ལ། ནགས་ཤོད་དཔེ་སྟོན། ལྡན་གྱི་བན་ཆེན་སྐྱེས་བུ། གཞོན་ཤེས་རབ་རྡོ་རྗེ། སྣར་ཐང་པ་གཏུམ་སྟོན། བྱ་གྲགས་པ་སེང་གེའཇིང་པ་དགྱེ་ལུང་པ། ལ་སྟོད་པ་བྱང་ཆུབ་གྲགས། མྱང་སྨད་ཀྱི་རྩེད་པ། ཤངས་ཀྱི་རྒྱུ་བུག་པ། གཙང་གད་གཉོས་པ། ཁུ་ལེའི་ཁ་མོ་ཟིན་སྟོན། མྱང་སྟོད་འོད་དཀར། མྱང་རོང་བ། བྱ་རྒྱུད་པ། མྱང་སྟོད་ཀྱི་ཇོ་སྲས། ཤར་པ་བློ་གྲོས་གྲགས། གཙང་པ་རྒྱ་སྟོན། བོ་དོང་པ་ཞར་ཆོས། གཉལ་པ་དགེ་འདུན་སྐྱབས། གཉལ་གྱི་གཉོས་སྟོན། གཉལ་པ་དར་རིན། ཇོ་སྲས་ཀོང་པོ། ལྷོ་པ་དར་མ་གྲགས། བྱ་སྟོན་འཆད་ཁ་བ་ལ་སོགས་པ་མང་དུ་བྱུང་ཞིང་འགྲོ་དོན་རྒྱ་ཆེན་པོ་མཛད་པའི་ངང་ནས་ལྕགས་མོ་བྱའི་ལོ་བདུན་ཅུ་རྩ་གཉིས་བཞེས་པ་ལ་གཤེགས་སོ། །

ཤ་ར་བའི་སློབ་མ་གཏུམ་སྟོན་བློ་གྲོས་གྲགས་པ།

༈ ཤ་ར་བའི་སློབ་མ་གཏུམ་སྟོན་བློ་གྲོས་གྲགས་པ་ལ་བླ་མས་ཁྱོད་ཀྱིས་དགེ་སློང་བཞི་དང་འགྲོགས་ཤིག་ཅེས་གདམས་པ་ལྟར་ལྕགས་མོ་བྱ་ནས་ཆུ་ཕོ་སྤྲེའུའི་བར་སྣར་ཐང་དང་ཉེ་བའི་གནས་ཅི་རིས་སུ་ཐུགས་དམ་མཛད། དེ་ནས་ཆུ་མོ་བྱ་ལ་སྣར་ཐང་གི་དགོན་པ་བཏབ་ལོ་བཅུ་གཉིས་བཞུགས་ནས་དེ་སྟེང་ལ་སྟོད་དུ་ཕེབས། ཉིད་ཀྱི་གདན་སར་རྔོག་སྟོན་ཤེས་རབ་གྲགས་པ་བསྐོས་ནས་དེས་གདན་ས་ལོ་ཉི་ཤུ་མཛད། དེ་རྗེས་ཞང་བཙུན་རྡོ་རྗེ་འོད་ཀྱིས་ལོ་བརྒྱད། གྲོ་སྟོན་བདུད་རྩི་གྲགས་ཀྱིས་ལོ་སུམ་ཅུ་རྩ་དགུ། ཞང་སྟོན་ཆོས་ཀྱི་བླ་མས་ལོ་བཅུ། སངས་རྒྱས་སྒོམ་པ་སེང་གེ་སྐྱབས་ཀྱིས་ལོ་བཅུ། མཆིམས་ནམ་མཁའ་གྲགས་ཀྱིས་ལོ་སུམ་ཅུ་རྩ་དྲུགསྐྱོ་སྟོན་སྨོན་ལམ་ཚུལ་ཁྲིམས་ཀྱིས་ལོ་བཅོ་ལྔ། ཉི་མ་རྒྱལ་མཚན་གྱིས་ལོ་བདུན། ཟེའུ་པ་བརྩོན་འགྲུས་གྲགས་ཀྱིས་ལོ་བཅུ་གཉིས། ཁོང་གི་གཅུང་པོ་གྲགས་པ་ཤེས་རབ་ཀྱི་ལོ་བཅུ་གཉིས། མཁན་ཆེན་བློ་བཟང་གྲགས་པས་ལོ་བཞི་བཅུ། འདི་ཡན་ལོ་བརྒྱ་དང་ཉི་ཤུ་རྩ་གསུམ་སོང་། དེ་སྟེང་ཤིང་མོ་ཡོས་ལ་མཁན་ཆེན་རྒྱལ་བ་བསྐོས། ཤིང་ཡོས་དེ་ནས་མེ་མོ་བྱའི་བར་ལོ་བཞི་བཅུ་ཞེ་གསུམ་མཁན་ཆེན་ཀུན་དགའ་རྒྱལ་མཚན་དང་། དེའི་དབོན་པོ་མཁན་ཆེན་རིན་པོ་ཆེ་གྲུབ་པ་ཤེས་རབ་པས་གདན་ས་མཛད་པ་ཡིན་ནོ། །དེ་ཡང་སྔོན་ཇོ་བོ་རྗེས་སྣར་ཐང་གི་སའི་ཐད་འདིར་ཕྱག་མཛུབ་གཏད་དེ། ས་ཕ་གིར་གནས་བརྟན་ཆེན་པོ་བཅུ་དྲུག་འབྱོན་ཞེས་ལུང་བསྟན་པ་ལྟར་གདན་རབས་དེ་རྣམས་ནི་གནས་བརྟན་གྱི་སྤྲུལ་པ་འབའ་ཞིག་ཡིན་པར་གསུངས་སོ། །

འབྲེ་ཤེས་རབ་འབར།

༈ རྔོག་ལོ་བློ་ལྡན་ཤེས་རབ་ཀྱི་སློབ་མ་གཙོ་བོ་བཞིའི་ཡ་གྱལ་འབྲེ་ཤེས་རབ་འབར་ནི། སྣེ་བོ་གྲགས་པ་ཤེས་རབ་ལས་རབ་ཏུ་བྱུང་ཞིང་བསྙེན་པར་རྫོགས། རྔོག་ལེགས་ཤེས་དང་ཁུ་སྟོན་བརྩོན་འགྲུས་གཡུང་དྲུང་གཉིས་དང་བསྡེབས་ཁམས་སུ་བྱོན་ཏེ། ཇོ་བོ་སེ་བཙུན་ལ་ཆོས་མང་དུ་གསན། ཕྱིས་རྔོག་ལོ་ཆེན་པོ་ལ་ཤེར་ཕྱིན་བསླབས་ཏེ་ཤེར་ཕྱིན་མདོ་བསྟན་གཉིས་ཀ་ལ་བཤད་པ་རྒྱ་ཆེར་མཛད། ཆོས་འཆད་པའི་ཚེ་ལྷ་རྣམས་ཀྱང་འོང་བར་གྲགས། རྔོག་ལོའི་ཐུགས་སྲས་དམ་པར་གྱུར་ནས་སློབ་མ་ཡང་ཨར་བྱང་ཆུབ་ཡེ་ཤེས་སོགས་བསྟན་པའི་བདག་པོ་མཐའ་ཡས་པ་ཐོན་ནོ། །རྒྱ་འདུལ་འཛིན་ནས་སློབ་རྒྱུད། འདར་འདུལ་འཛིན་མཐའ་བཞི་བརྩོན་འགྲུས་འབར། ཇོ་བསྟན་ནག་པོ་དར་ཚུལ། ཤ་མི་བ། ཀ་བ་དར་སེང་། ཐག་མ་རྡོར་གཞོན། རྣོར་བྱང་སེང་། སྦས་ཏེ་ཇོ་སྲས། བྱང་སེངྒེས་ཕྱིས་ཕན་ཡུལ་གྲོ་ས་དགོན་བཏབ། སྦས་རིས་བྲང་ར་མོ་ཆེ་བཟུང་ནས་སྐྱོར་མོ་ལུང་བཏབ། རྒྱ་འདུལ་འཛིན་གྱི་སློབ་མ་ཀ་བ་བཞིའི་ནང་གི་རྨ་ཚོ་བྱང་ཆུབ་རྡོ་རྗེས་རྒྱའི་གྲྭ་པ་ལྔ་བརྒྱ་ཙམ་ཁྲིད་ནས་དབུས་སུ་འཆད་ཉན་མཛད།

བྱ་འདུལ་བ་འཛིན་པ་བརྩོན་འགྲུས་འབར།

༈ རྨ་ཚོའི་སློབ་མ་བྱ་འདུལ་བ་འཛིན་པ་བརྩོན་འགྲུས་འབར་ནི། གཙང་རོང་གཡུང་དུ་ལྕགས་ལུག་ལ་འཁྲུངས། འབྲེ་ཆེན་པོ་ལས་རབ་ཏུ་བྱུང་ཞིང་བསྙེན་པར་རྫོགས། ཟུལ་ཕུར་བཤད་གྲྭ་བཙུགས་ནས་བསྟན་པ་བསྐྱངས། པེ་ཧར་གྱིས་བཙུན་ཆུང་དུ་སྤྲུལ་ནས་ཞབས་ཏོག་བྱས་པར་གྲགས། སློབ་མ་འགྲོ་ཕན་ནུས་པ་བདུན་ཅུ་རྩ་དྲུག་བྱུང་།

རྩིས་འདུལ་འཛིན་གཞོན་ནུ་སེང་གེ

༈ སློབ་མའི་གཙོ་བོ་རྩིས་འདུལ་འཛིན་གཞོན་ནུ་སེང་གེ་ནི། བྱ་འདུལ་ལས་རབ་ཏུ་བྱུང་ཞིང་བསྙེན་པར་རྫོགས། འདུལ་བའི་སྡེ་སྣོད་ལ་སྦྱངས་པས་ཤིན་ཏུ་མཁས་པར་གྱུར་ཏེ། སློབ་མ་ཡང་ཟུལ་ཕུའི་གདན་ས་བ་རོག་ཆོས་སེང་སོགས་བཤེས་གཉེན་མང་དུ་ཐོན་ནོ། །

དཔལ་ལྡན་གྲ་མོ་ཆེ་བ།

༈ རྩིས་འདུལ་འཛིན་གྱི་སློབ་མ་དཔལ་ལྡན་གྲ་མོ་ཆེ་བ་ནི། བྱའི་ལོ་ཆུ་སྒོར་འཁྲུངས། གདུང་རུས་གྲོ། རྩིས་འདུལ་འཛིན་ལས་རབ་ཏུ་བྱུང་ཞིང་བསྙེན་པར་རྫོགས་འདུལ་བའི་སྡེ་སྣོད་ལ་སྦྱངས། མཚན་བདུད་རྩི་གྲགས། རྡོ་སྟོན་དང་ཞང་བཙུན་ལས་ཤ་བ་པའི་གདམས་པ་རྣམས་མནོས་ཤིང་། ཆུ་མིག་པ་ཤེར་གྲགས། མུ་སྨན་པ། སངས་རྒྱས་དབོན་སྟོན། ལྷ་སྤྱིལ་བུ་བ། ར་ས་བ་དར་རྒྱས། གྲང་ཕུ་ལུང་པ་འཇམ་དབྱངས་རྒྱལ་མཚན། དྲེའུ་ལྷས་པ། འགོས་རིང་། ཆུ་ནག་པ། རྨ་ཤཀ་སེང་། གཙང་ནག་པ་སོགས་ལ་གསན་པ་རྒྱ་ཆེར་མཛད། སངས་རྒྱས་སོ་ལྔ་དང་རྗེ་བཙུན་མ་སྒྲོལ་མ་སོགས་ལྷག་པའི་ལྷ་མང་པོའི་ཞལ་གཟིགས། སྣར་ཐང་གི་གདན་སར་ཕེབས། གདན་རབས་བཞི་པ་ཡིན། ལོ་སུམ་ཅུ་སོ་དགུའི་བར་ཕྲིན་ལས་བསྐྱངས། དགུང་ལོ་བརྒྱད་ཅུ་པ་ལ་གཤེགས་སོ། །

མཆིམས་ཆེན་ནམ་མཁའ་གྲགས་པ།

༈ མཆིམས་ཆེན་ནམ་མཁའ་གྲགས་པ་ནི། ཉན་སྟོད་སྟག་ཚལ་དུ་རྟའི་ལོ་ལ་འཁྲུངས། གཞོན་ནུ་ནས་དཔལ་ལྡན་གྲོ་ལས་རབ་ཏུ་བྱུང་ཞིང་བསྙེན་པར་རྫོགས། སྡེ་སྣོད་ཀྱི་གནས་རྣམས་ལ་མཁས་པར་སྦྱངས། མཛོད་ཀྱི་ཊཱིཀ་ཆེན་སོགས་བསྟན་བཅོས་ཀྱང་མང་དུ་མཛད། དཔལ་ལྡན་གྲོ། ཞང་སྟོན། མཆིམས་བློ་བསྟན། སངས་རྒྱས་སྒོམ་པ་བཞི་ལ་བཀའ་གདམས་ཀྱི་སྐོར་དང་། བཀྲ་ཤིས་སྒང་པ་ལ་བྱང་སེམས་ཟླ་རྒྱལ་བའི་དབུ་མའི་གདམས་པ་རྣམས་གསན། ཆུ་མིག་ཆོས་འཁོར་གྱི་གྲལ་གྱི་གཙོ་བོ་ཡང་མཛད། འགྲོ་མགོན་འཕགས་པ་སོགས་ཆེ་དགུ་ཐམས་ཅད་ཀྱིས་བཀུར། ལྷག་པའི་ལྷ་དུ་མས་ཞལ་གཟིགས། སྣར་ཐང་གི་གདན་ས་བདུན་པར་ཕེབས། ལོ་སུམ་ཅུ་སོ་དྲུག་གི་བར་དུ་ཚོགས་པ་བསྐྱངས་ནས་བྱི་བའི་ལོ་ལ་སྐུ་གཤེགས་སོ། །

གྲགས་པ་ཤེས་རབ།

༈ གྲགས་པ་ཤེས་རབ་ནི། ཉང་སྟོད་དུ་ལུག་གི་ལོ་ལ་འཁྲུངས། གདུང་ཟེའུ་སྟེ། མཁན་ཆེན་འདུལ་འཛིན་གྲགས་པ་བརྩོན་འགྲུས་ཀྱི་གཅུང་པོ་ཡིན། མཆིམས་ཆེན་པོ་ལས་རབ་ཏུ་བྱུང་བསྙེན་པར་རྫོགས། མཁན་པོ་གཅེན་ལས་གཞུང་བཤད་དང་གདམས་པ་མཐའ་ཆོད་པ་གསན། གཅེན་འདུལ་འཛིན་གྱི་རྗེས་སུ་སྣར་ཐང་གི་མཁན་སར་བཞུགས་ནས་ལོ་བཅུ་གཉིས་ཀྱི་བར་གདན་ས་བསྐྱངས། གདན་རབས་བཅུ་གཅིག་པ་ཡིན་ནོ། །

མཆིམས་སྟོན་བློ་བཟང་གྲགས་པ།

༈ མཆིམས་སྟོན་བློ་བཟང་གྲགས་པ་ནི། ཉང་སྟོད་སྨོན་གྲོའི་ཕུ་ཁའུར་འཁྲུངས། གདུང་རུས་མཆིམས། ཟེའུ་པ་གྲགས་པ་ཤེས་རབ་ལས་རབ་ཏུ་བྱུང་ཞིང་བསྙེན་པར་རྫོགས། ཟེའུ་པ་སྐུ་མཆེད་དང་། རྒྱང་རོ་བྱང་འབུམ་སོགས་བླ་མར་བསྟེན། མདོ་སྔགས་ཀྱི་གཞུང་གདམས་ངག་མ་ལུས་པ་ལ་མཁྱེན་རྟོགས་རྒྱས། གྲགས་ཤེས་པས་གདན་ས་གཏད་ནས་ལོ་སོ་དགུའི་བར་དུ་བཤད་སྒྲུབ་ཀྱིས་བསྟན་པ་བསྐྱངས་ནས་ཡོས་ལོ་ལ་སྐུ་གཤེགས་སོ། །

མཁན་པོ་ཀུན་དགའ་རྒྱལ་མཚན།

༈ མཁན་པོ་ཀུན་དགའ་རྒྱལ་མཚན་ནི། ཆུ་སྒོའི་ལུང་པར་སྟག་གི་ལོ་ལ་འཁྲུངས། གདུང་རུས་གྲོ། མཆིམས་བློ་བཟང་གྲགས་པ་ལས་རབ་ཏུ་བྱུང་ཞིང་བསྙེན་པར་རྫོགས་ནས་གཞུང་གདམས་ངག་ཐམས་ཅད་དང་། བཀའ་བཅུ་གཞོན་སེང་སོགས་ལས་ཀྱང་ཆོས་མང་དུ་གསན་མཁན་པོ་གཤེགས་པའི་ལོ་དེ་དག་ལ་སྣར་ཐང་གི་གདན་སར་ཕེབས་ནས་ལོ་ཉི་ཤུ་རྩ་བདུན་གྱི་བར་བསྐྱངས། བསླབ་བཏུས་ཀྱི་ཊཱིཀ་ཀ་སོགས་མཛད་ནས་སྦྲུལ་ལོ་ལ་གཤེགས།

གྲུབ་པ་ཤེས་རབ།

༈༼རིན་པོ་ཆེ་༽གྲུབ་པ་ཤེས་རབ་ནི། སྣར་ཐང་གི་ཉེ་འཁོར་རོང་གུ་ཞེས་པར་མེ་བྱ་ལ་འཁྲུངས། གདུང་རུས་དཔང་ཡིན། དགུང་ལོ་བཅུ་པ་ལ་ཀུན་རྒྱལ་བ་ལས་རབ་ཏུ་བྱུང་ཞིང་མཚན་གྲུབ་པ་ཤེས་རབ་ཏུ་བཏགས། ཉི་ཤུ་པ་ལ་མཁན་པོ་དེ་ཉིད་དང་། སློབ་དཔོན་གྲགས་པ་སོགས་དགེ་འདུན་གྱི་དབུས་སུ་བསྙེན་པར་རྫོགས། མཁན་སློབ་གཉིས་དང་། ཡོན་ཏན་འོད། སློབ་དཔོན་སྐལ་བཟང་པ་སོགས་བླ་མ་མང་པོ་བསྟེན་ནས་མདོ་སྔགས་ཀྱི་གཞུང་ལུགས་གདམས་ངག་དང་བཅས་ཐུགས་སུ་ཆུད་པར་མཛད། དགུང་ལོ་སོ་གཉིས་པ་ལ་སྣར་ཐང་གི་གདན་སར་ཕེབས་ནས་ལོ་སུམ་ཅུ་བསྐྱངས། དེ་སྟེང་ཉིད་ཀྱི་དབོན་པོ་བསོད་ནམས་མཆོག་གྲུབ་པ་ལ་གདན་ས་གཏད་ནས་ལོ་ལྔ་ཟུར་བཞུགས་མཛད་ནས་རེ་བདུན་པ་ལ་སྐུ་གཤེགས་སོ། །

པཎ་ཆེན་དགེ་འདུན་གྲུབ་པ།

༈ འཕགས་མཆོག་སྤྱན་རས་གཟིགས་ཀྱི་རྣམ་འཕྲུལ་པཎ་ཆེན་དགེ་འདུན་གྲུབ་པ་ནི། རུ་ལག་གི་ས་ཆ་གུར་མའི་རུ་བར་ལྕགས་ལུག་ལ་འཁྲུངས། དགུང་ལོ་བཅོ་ལྔ་ལ་སྣར་ཐང་གི་མཁན་པོ་གྲུབ་པ་ཤེས་རབ་ལས་རབ་ཏུ་བྱུང་མཚན་དགེ་འདུན་གྲུབ་པ་དཔལ་བཟང་པོ་ཞེས་བཏགས། དགུང་ལོ་ཉི་ཤུ་པ་ལ་སྔར་གྱི་མཁན་པོ་ལས་བསྙེན་པར་རྫོགས། ཐུགས་སྦྱོང་མཛད་པའི་ཡོངས་འཛིན་གྱི་གཙོ་བོ་མཁན་ཆེན་གྲུབ་པ་ཤེས་རབ། སྣར་ཐང་པ་ཤེས་རབ་སེང་གེལས་སྨོན་གྱིས་འབྲེལ་བའི་རྗེ་རིན་པོ་ཆེ་ཡབ་སྲས། གཞན་ཡང་ཀུན་མཁྱེན་རོང་སྟོན། བོ་དོང་པཎ་ཆེན། སེམས་དཔའ་ཐུགས་རྗེ་དཔལ་བ་སཾ་གྷ་ཤྲཱི། གྲོ་སའི་དམར་སྟོན་ཁུ་དབོན། ཐང་ཆེན་ཉི་མ་རྒྱལ་མཚན། ཨ་བྷ་ཡ། དོན་ཡོད་པས་ལུང་བསྟན་པའི་བླ་མ་འཆད་དཀའི་ལྷ་རིན་པོ་ཆེ་དང་། སྒྲོལ་ཆེན་བསམ་འགྲུབ་རྡོ་རྗེ་ལ་སོགས་ཏེ་བཤེས་གཉེན་ལྔ་བཅུ་ཙམ་བསྟེན་ནས་མདོ་སྔགས་རིག་གནས་ཐམས་ཅད་ལ་སྦྱངས་སྟོབས་ཀྱི་མཁྱེན་པ་རྒྱས་ཤིང་རིག་པའི་དབང་ཕྱུག་ཆེན་པོ་གྱུར་པས། བོ་དོང་པཎ་ཆེན་གྱིས་ཐམས་ཅད་མཁྱེན་པ་ཞེས་མཚན་གསོལ། སྣར་ཐང་བྱང་ཆེན་དུ་སྒྲུབ་པ་མཛད་པས་ཉམས་རྟོགས་ཀྱང་མཐར་ཕྱིན་པ་བརྙེས། འཇིགས་བྱེད་དང་སྒྲོལ་མའི་ཞལ་གཟིགས། འདོད་ཁམས་མ་བྲན་དུ་ཁོལ། ཕྱིས་རྗེའི་གྲུབ་མཐའ་འཛིན་པར་མཛད་ཀྱང་། སྡེ་དང་གྲུབ་མཐའི་ཕྱོགས་རིས་མི་མཛད་པར་ཀུན་ལ་དག་སྣང་སྦྱོང་། གཞུང་ལུགས་མང་པོར་དགོངས་འགྲེལ་བརྩམས། བཀྲ་ཤིས་ལྷུན་པོའི་གཙུག་ལག་ཁང་དང་ལྷ་ཆེན་བཞེངས་ཤིང་དགེ་འདུན་མང་དུ་བསྡུས་ཏེ། སྐུ་ཚེ་ཧྲིལ་བོར་འཆད་ཉན་གྱིས་བསྟན་པ་བསྐྱངས་ནས་དགུང་ལོ་གྱ་ལྔ་པ་ཤིང་རྟ་ལ་དགའ་ལྡན་དུ་གཤེགས་སོ། །

གནས་རྙིང་པ་ཀུན་དགའ་བདེ་ལེགས།

༈ གནས་རྙིང་པ་ཀུན་དགའ་བདེ་ལེགས་ནི། སྔོན་སློབ་དཔོན་པདྨ་སམྦྷ་ཝའི་དངོས་སློབ་རྒྱ་འཇམ་དཔལ་གསང་བའི་གདུང་རབས་བརྒྱད་ཅུ་རྩ་བརྒྱད་ཀྱི་བར་ཐུགས་རྗེ་ཆེན་པོས་བྱིན་གྱིས་བརླབས་པའི་གདུང་གི་བརྒྱུད་ལས་ཉང་སྟོད་དུ་འཁྲུངས། པཎ་ཆེན་དགེ་འདུན་གྲུབ་པ་ལས་རབ་ཏུ་བྱུང་ཞིང་བསྙེན་པར་རྫོགས། མཚན་ཀུན་དགའ་བདེ་ལེགས་རིན་ཆེན་རྒྱལ་མཚན་དཔལ་བཟང་པོར་བསྩལ། མཁན་པོའི་དྲུང་དུ་གཞུང་ལུགས་གདམས་ངག་དང་བཅས་པ་ལ་མཁས་པར་སྦྱངས། འབྲས་སྤུངས་དང་འོལ་དགའ་སོགས་སུ་ཡང་ཕེབས། ཉང་སྟོད་དུ་བློ་གསལ་མང་པོའི་དོན་མཛད་དོ། །

ཐམས་ཅད་མཁྱེན་པ་དགེ་འདུན་རྒྱ་མཚོ།

༈ ཐམས་ཅད་མཁྱེན་པ་དགེ་འདུན་རྒྱ་མཚོ་ནི། རྟ་ནག་རྡོ་རྗེ་གདན་དུ་ཀུན་དགའ་རྒྱལ་མཚན་པའི་སྲས་སུ་འཁྲུངས། དགུང་ལོ་བཅུ་པ་ལ་པཎ་ཆེན་ལུང་རིག་རྒྱ་མཚོར་གཙུག་ཕུད་ཕུལ། མཚན་དགེ་འདུན་རྒྱ་མཚོ་ཞེས་བསྩལ། ལོ་དེ་ཉིད་ཀྱི་ནང་དུ་ཀུན་དགའ་བདེ་ལེགས་ཀྱི་དྲུང་དུ་བསྙེན་པར་རྫོགས། ཚིགས་སྔ་ཕྱིའི་མཁན་སློབ་རྣམས་དང་པཎ་ཆེན་ནོར་བཟང་རྒྱ་མཚོ་ཡབ་ཀུན་དགའ་རྒྱལ་བ། པཎ་ཆེན་ཡེ་ཤེས་རྩེ་མོ། ཐོན་ཡོན་རྒྱམ་སོགས་བཤེས་གཉེན་མང་པོ་བསྟེན་ཏེ། མདོ་སྔགས་རིག་གནས་དང་བཅས་པའི་གཞུང་ལུགས་རབ་འབྱམས་ལ་སྦྱང་བས་ཚིག་དོན་མཐའ་དག་ཐུགས་སུ་ཆུད། རྒྱལ་མེ་ཏོག་ཐང་གི་ཆོས་གྲྭ་བཏབ། སེ་འབྲས་བཀྲ་ཤིས་ལྷུན་པོ་རྣམས་ཀྱི་ཁྲིར་ཕེབས་ནས་འཆད་རྩོད་རྩོམ་གསུམ་གྱི་བྱ་བས་གདུལ་བྱ་བསྐྱངས། དགུང་ལོ་རེ་བརྒྱད་པ་ཆུ་སྟག་ནག་ཟླའི་ཚེས་བརྒྱད་ལ་དག་པའི་ཞིང་དུ་གཤེགས་སོ། །

བདེ་བ་ཅན་པ་དགེ་ལེགས་དཔལ་བཟང་།

༈ བདེ་བ་ཅན་པ་དགེ་ལེགས་དཔལ་བཟང་ནི། ཡུལ་འོལ་དགའ་གྱང་གསར་དུ་ཤིང་གླང་ལ་འཁྲུངས། ཐམས་ཅད་མཁྱེན་པ་དགེ་འདུན་རྒྱ་མཚོ་ལས་རབ་ཏུ་བྱུང་ཞིང་བསྙེན་པར་རྫོགས། བསམ་གཏན་གླིང་། སེ་ར་སྨད། རྒྱུད་སྟོད་སྨད་རྣམས་སུ་གཞུང་ལུགས་རབ་འབྱམས་ལ་སྦྱངས། རྒྱུད་སྟོད་དང་ཤར་རྩེའི་གདན་ས་མཛད་ནས་དགུང་ལོ་ང་བཞི་པ་ལ་དགའ་ལྡན་ཁྲིར་ཕེབས་ཐམས་ཅད་མཁྱེན་པ་བསོད་ནམས་རྒྱ་མཚོས་བསྙེན་རྫོགས་བཞེས་པའི་མཁན་པོ་ཡང་ཡིན། དྲུག་ཅུ་པ་ལ་བདེ་བ་ཅན་དུ་ཟུར་བཞུགས་མཛད། རེ་གསུམ་པ་ལ་སྐུ་གཤེགས་སོ། །

རྒྱལ་ཁང་རྩེ་པ་དཔལ་འབྱོར་རྒྱ་མཚོ།

༈ རྒྱལ་ཁང་རྩེ་པ་དཔལ་འབྱོར་རྒྱ་མཚོ་ནི། ཡུལ་སྟོད་ལུང་རམ་པའི་གད་པ་ཁར་མེ་ཁྱི་ལ་འཁྲུངས། བདེ་བ་ཅན་པ་ལས་རབ་ཏུ་བྱུང་ཞིང་བསྙེན་པར་རྫོགས། སྐྱོར་མོ་ལུང་། ར་བ་སྟོད། རྒྱུད་སྟོད་སྨད་རྣམས་ཀྱི་གྲྭ་སར་གཞུང་ལུགས་ལ་སྦྱངས་པས་འཇིགས་པ་མེད་པའི་སྤོབས་པ་ཐོབ། ར་བ་སྟོད་ཀྱི་འཆད་ཉན་རྒྱུད་སྟོད་དང་ཤར་རྩེ་སྦྲེལ་བའི་བླ་མ་མཛད། ང་བདུན་པ་ལ་དགའ་ལྡན་གྱི་ཁྲིར་ཕེབས། རེ་བཞི་པ་ལ་རྒྱལ་ཁང་རྩེར་ཟུར་བཞུགས་མཛད་དེ་འཕྲིན་ལས་རྣམ་པར་དཀར་བའི་ངང་ནས་དགུང་ལོ་དོན་བཞི་པ་ལ་གཤེགས་སོ། །

འཇམ་དབྱངས་དཀོན་མཆོག་ཆོས་འཕེལ།

༈ འཇམ་དབྱངས་དཀོན་མཆོག་ཆོས་འཕེལ་ནི། གྲྭ་བྱམས་པ་གླིང་གི་དགོན་ཞོལ་དུ་ཆུ་བྱ་ལ་འཁྲུངས། ཆུང་ངུ་ནས་དྭགས་པོ་གྲ་ཚང་དུ་གསན་སྦྱོངས་ལ་ཕེབས། དྭགས་པོ་གྲྭ་ཚང་གི་སློབ་དཔོན་བློ་བཟང་ཆོས་འཕེལ་ལས་རབ་ཏུ་བྱུང་། མཚན་དཀོན་མཆོག་ཆོས་འཕེལ་དུ་བཏགས། དེ་རྗེས་ར་བ་སྟོད་དང་རྒྱུད་སོགས་ཀློག་པའི་གྲྭ་ས་མང་པོར་བྱོན་ཏེ་མཁས་ཉན་མཛད་པས་གཞུང་ལུགས་རབ་འབྱམས་སྨྲ་བའི་དབང་ཕྱུག་ཏུ་གྱུར། དགུང་ལོ་ཉི་ཤུ་རྩ་བཞི་པ་ལ་རྒྱལ་ཁང་རྩེ་ལས་བསྙེན་པར་རྫོགས། ར་བ་སྟོད་དང་རྒྱུད་སྟོད། བློ་གསལ་གླིང་རྣམས་ཀྱི་འཆད་ཉན། གསང་ཕུར་གླིང་སྨད་ཀྱི་ཁྲི་ཤར་རྩེ་དང་དགའ་ལྡན་གྱི་ཁྲི་རྣམས་སུ་ཕེབས། རྗེ་ཐམས་ཅད་མཁྱེན་པ་རྒྱལ་མཆོག་ལྔ་པས་མཚན་ཉིད་ཀྱི་གཞུང་ལུགས་རྣམས་གསན་ནས་ཏི་ཤྲཱིར་བཀུར། འཆད་མཁས་ཤིང་ཐུགས་དགོངས་བཟང་བས་ཞལ་སློབ་དགེ་བཤེས་མང་དུ་ཐོན། དགུང་ལོ་དོན་བཞི་པ་དབུར་སྟོད་གསང་སྔགས་མཁར་དུ་མེ་ཁྱི་ལ་སྐུ་གཤེགས་སོ། །

དཀོན་མཆོག་བསྟན་འཛིན།

༈ དཀོན་མཆོག་བསྟན་འཛིན་ནི། ཆུ་མོ་ཕག་གི་ལོ་དབུ་རུ་ཁ་རབ་ཏུ་འཁྲུངས། འཇམ་དབྱངས་བླ་མ་དཀོན་མཆོག་ཆོས་འཕེལ་ལས་རབ་ཏུ་བྱུང་ཞིང་བསྙེན་པར་རྫོགས། སྐུ་ན་ཕྲ་མོ་གྲྭ་སར་བཞུགས་དུས་ནས་བཅས་པ་དང་རང་བཞིན་གྱི་ཁ་ན་མ་ཐོ་བ་དུས་དབང་གིས་འབྱུང་ཉེ་བ་རྣམས་ཀྱིས་ཀྱང་མ་གོས་པས་བཙུན་གཅིག་མར་གྲགས། ར་བ་དང་བློ་གསལ་གླིང་སོགས་སུ་ཕེབས་ནས་མཚན་ཉིད་ཀྱི་གཞུང་ལུགས་རྣམས་ལ་མཁས་པར་སྦྱངས། རྗེ་རྒྱལ་མཆོག་ལྔ་པ་དང་རང་གི་མཁན་པོ་ཁྲི་རིན་པོ་ཆེ་སོགས་བཤེས་གཉེན་དུ་མ་ལས་གཞུང་གདམས་ངག་མ་ལུས་པ་གསན་ནས་ཐུགས་སུ་ཆུད་པར་མཛད། གཉལ་སྡེ་དྲུག་གི་མཁན་པོ་ལོ་བཅོ་ལྔ་སྐོར་དང་། དེ་རྗེས་ཉང་སྟོད་དཔལ་འཁོར་བདེ་ཆེན་གྱི་མཁན་པོར་ཕེབས་ནས་གྲུབ་མཐའི་ཕྱོགས་ཆ་དང་བྲལ་བར་ཡུན་རིང་དུ་བསྐྱངས་པས་ས་ཞལ་དགེ་གསུམ་གྱི་གྲྭ་ས་ཐམས་ཅད་ཀྱིས་སྤྱི་མི་ལྟར་བཀུར་ཞིང་བསྔགས། དེ་ནས་གདན་ས་ཡར་སྟོད་པ་ངག་དབང་ཕྲིན་ལས་ལ་གཏད་དེ་གསང་སྔགས་མཁར་དུ་ལོ་ཤས་ཐུགས་དམ་ལ་བཞུགས་ནས་དགུང་ལོ་རེ་གཉིས་པ་ཤིང་ཕོ་བྱི་བ་ལ་སྐུ་གཤེགས་སོ། །

མཁན་པོ་ངག་དབང་ཆོས་དཔལ་རྒྱ་མཚོ།

༈ ༼དོན་གྱི་སླད་དུ་མཚན་ནས་སྨོས་ན་མཁན་པོ་ངག་དབང་ཆོས་དཔལ་རྒྱ་མཚོ་མཆོག་ནི། ༽མཆོག་གི་དངོས་གྲུབ་བརྙེས་པ་ཡེ་ཤེས་ཀྱི་སྐུ་ཅན་རྗེ་བཙུན་ཐམས་ཅད་མཁྱེན་པ་གཏེར་ཆེན་ཆོས་ཀྱི་རྒྱལ་པོ་དང་། སྡོམ་བརྩོན་མཁས་པ་ཆེན་པོ་རྒྱལ་སྲས་བསྟན་པའི་ཉི་མ་གཉིས་ཀྱི་རིགས་ཀྱི་གཅུང་དུ་གྲྭ་དར་རྒྱས་ཆོས་ལྡིང་སུ་:མེ་རྟ་༼ཤིང་རྟ་༽ལ་འཁྲུངས། གཅེན་རྣམ་གཉིས་ཀྱི་བཀའ་དྲིན་གྱིས་ཆུང་ངུ་ནས་རྒྱལ་བའི་བསྟན་པ་ལ་ཞུགས། རིག་པའི་གནས་ལྔ་ལ་མཁས་པའི་ཕུལ་དུ་ཕྱིན། དགུང་ལོ་ཉི་ཤུ་རྩ་བདུན་པ་ལྕགས་ཕོ་སྤྲེའུའི་ལོ་དཔྱིད་འབྲིང་ནག་ཟླའི་ཡར་ངོའི་ཚེས་བཅུ་གསུམ་གྱི་ཕྱི་དྲོའི་ཉི་མ་བརྒྱད་ཆ་ལུས་པ་གྲིབ་ཚོད་སྐྱེས་བུ་གཅིག་དང་རྐང་པ་གཉིས་ཀྱི་དུས་སུ། མཁན་སློབ་སྦྲགས་མ་མཁན་ཆེན་དཀོན་མཆོག་བསྟན་འཛིན། གསང་སྟོན་རབ་འབྱམས་པ་བློ་བཟང་སྐྱེས་མཆོགདུས་གོ་བ་རབ་འབྱམས་པ་ཕུན་ཚོགས་ལེགས་འབྱོར། གྲོགས་དན་དགེ་སློང་བློ་བཟང་ཀུན་དགའ། ཁ་སྐོང་པ་དགེ་སློང་ངག་དབང་ཆོས་འཛིན་ཏེ་དད་པའི་དགེ་འདུན་གྲངས་ཚང་བའི་དབུས་སུ་རང་བྱུང་འཕགས་པའི་གཙུག་ལག་ཁང་ཆེན་པོ་པོ་ཏ་ལར་ཚིགས་གསུམ་དུས་གཅིག་ལ་བར་མ་ཆད་པའི་ཆོ་གས་བསྙེན་པར་རྫོགས། སྔོན་ནས་འདུལ་བའི་བརྡ་ཆད་དང་ལག་ལེན་གཅེན་རྒྱལ་བའི་སྲས་པོ་དང་གུང་ཐང་པཎ་ཆེན་གཉིས་ལས་མཁྱེན་པར་མཛད་ཅིང་། བསྙེན་པར་རྫོགས་པའི་ཕྱི་ལོ་དེ་ལ། ལུང་མང་གྲུབ་པ་རྡོ་རྗེ་ལ་འདུལ་བ་ལུང་སྡེ་བཞི་ཕྲན་འགའ་དང་བཅས་པ། གཞུང་ལུགས་རབ་འབྱམས་སྨྲ་བ་སངས་རྒྱས་ཆོས་དར་ལ་མདོ་རྩ་བ་དང་ལུང་རིགས་གཏེར་མཛོད། སྡོམ་བརྩོན་ཀུན་དགའ་དར་རྒྱས་ལ་མེ་ཏོག་ཕྲེང་རྒྱུད་དང་སུམ་བརྒྱ་པ་རྩ་འགྲེལ། རིག་འཛིན་ཆེན་པོ་པདྨ་ཕྲིན་ལས་ལ་ཀུན་མཁྱེན་བུའི་ལས་ཆོག་སོགས་གསན་ཏེ་མཁས་པ་ཆེན་པོར་གྱུར་ཏེ་མདོ་སྔགས་རིག་གནས་དང་བཅས་པ་ལ་བསྟན་བཅོས་མཐའ་ཡས་པ་མཛད་དོ། །དེང་སང་གངས་ཅན་བོད་ཀྱི་ཡུལ་འདིར་འདུལ་བ་འཛིན་པ་ཐམས་ཅད་སྡེ་པ་གཞི་ཐམས་ཅད་ཡོད་པར་སྨྲ་བའི་ལུགས་གཅིག་པོ་ཡིན་ཅིང་། དེ་ལྟ་ནའང་སྡོམ་རྒྱུན་རིམ་པ་གསུམ་བྱུང་བ་སྟེ། སྔར་སྨོས་པ་རྣམས་མཁན་ཆེན་ཞི་བ་འཚོའི་སྡོམ་རྒྱུན་བསྟན་པའི་ཉི་མ་བླ་ཆེན་པོ་ལ་བརྒྱུད་པ་སྨད་འདུལ་བའི་ལུགས་སོ། །རིམ་པ་གཉིས་པ་ནི། ཤར་ཕྱོགས་ཀྱི་པཎྜི་ཏ་དྷརྨཱ་པཱ་ལ་ནས། ས་དྷུ་པཱ་ལ། པྲཛྙཱ་པཱ་ལ། གུ་ཎ་པཱ་ལ་སྟེ་པཱ་ལ་རྣམ་གསུམ་སོགས་ལས་བརྒྱུད་པ་སྟོད་འདུལ་བའི་ལུགས་ཏེ་དེའི་རྒྱུན་ད་ལྟ་ཡོད་པར་མི་སྣང་ངོ་། །རིམ་པ་གསུམ་པ་ནི། ཁ་ཆེ་པཎྜི་ཏ་ཤཱཀྱ་ཤྲཱི་ནས་བྱང་རྡོར་ས་གསུམ་ལ་བརྒྱུད་པ་ཁ་ཆེའི་ལུགས་ཏེ། ཁྲོ་ཕུ་ལོ་ཙཱ་བས་ཤིང་ཕོ་བྱི་བའི་ལོར་ཁ་ཆེ་པཎ་ཆེན་བོད་དུ་སྤྱན་དྲངས་ནས། ཆུ་མོ་བྱའི་བར་ལོ་བཅུ་བཞུགས་ཏེ་དབུས་གཙང་ཐམས་ཅད་དུ་ཆོས་ཀྱི་ཕྲིན་ལས་བསྐྱངས། ཁྲོ་ཕུར་བྱམས་པའི་སྐུ་བརྙན་གྱི་རྟེན་ཁྱད་པར་ཅན་བཞེངས་རབ་ཏུ་གནས་པ་སོགས་མཛད། ཤིང་ཕོ་ཁྱིའི་ལོ་ལ་བོད་ནས་ཁ་ཆེར་ཕེབས་ཏེ་ལོ་བཅུ་གཉིས་སུ་གཞན་དོན་མཛད། དགུང་ལོ་དགུ་བཅུ་རྩ་དགུ་པ་ཤིང་མོ་བྱ་ལ་ཞི་བར་གཤེགས་སོ། །པཎ་ཆེན་དེ་ཉིད་ཀྱིས་ཆུ་ཤུལ་དཀྲོག་མ་དགོན་པར་མི་བཅུ་གཅིག་བསྙེན་པར་རྫོགས་པའི་ནང་ནས་ལྷོ་བྲག་པ་བྱང་ཆུབ་དཔལ་བ་དང་། གཙང་པ་རྡོ་རྗེ་དཔལ་བ་གཉིས་མཁན་པོའི་གཙོ་བོར་གྱུར། བྱང་ཆུབ་དཔལ་གྱིས་དགེ་འདུན་སྒང་དང་། རྡོ་རྗེ་དཔལ་གྱིས་སྙེ་མོ་ཚལ་མིག་བཙུགས། དེ་གཉིས་ཀྱི་སློབ་མ་དབུ་མཛད་བསོད་ནམས་དང་། དཀོན་མཆོག་རྒྱལ་མཚན་གཉིས་བྱུང་སྟེ། དཀོན་མཆོག་རྒྱལ་མཚན་གྱིས་བྱི་རྫིང་ཚོགས་པ་བཙུགས། དབུ་མཛད་བསོད་ནམས་ཀྱིས་ཆོས་ལུང་ཚོགས་པ་བཙུགས་ཏེ་ཚོགས་སྡེ་བཞིར་གྲགས། དེ་རྣམས་ལས་འཕེལ་ཏེ་པཎ་ཆེན་སྡོམ་རྒྱུན་ད་ལྟའི་བར་རྒྱུན་མ་ཆད་པ་འདིའོ། །

བཀའ་གདམས་གསར་མའི་སྐབས།

ཤར་ཙོང་ཁ་པ་བློ་བཟང་གྲགས་པ།

༈ དེའི་སྡོམ་རྒྱུན་འཛིན་པ་རྗེ་བཙུན་འཇམ་དབྱངས་ཀྱི་སྤྲུལ་པ་ཤར་ཙོང་ཁ་པ་བློ་བཟང་གྲགས་པའི་དཔལ་ནི། སྔོན་བཅོམ་ལྡན་འདས་ཀྱི་ཉན་ཐོས་ཆེན་པོ་འདུལ་བ་འཛིན་པའི་མཆོག་ཉེ་བ་འཁོར་དུ་གྱུར་པ་དང་། དེ་རྗེས་པཎྜི་ཏ་མང་པོར་སྐུའི་སྐྱེ་བ་བཟུང་ནས་འཕགས་ཡུལ་དུ་བརྟན་པ་གསལ་བར་མཛད་པ་དང་། བོད་འདིར་མདོ་ཁམས་སྟོད་སྨད་གཉིས་ལས་སྨད་ཙོང་ཁའི་ཡུལ་གྲུར་མལ་གྱི་རིགས་དཔའ་ཞིང་བརྟུལ་ཕོད་པ་དཀར་ཕྱོགས་ལ་དགའ་བའི་ཡབ་ད་ར་ཁ་ཆེ་ཀླུ་འབུམ་དགེ་ཞེས་བྱ་བ་དང་། ཡུམ་ཨ་ཆོས་ཞེས་བྱ་བའི་རིགས་རུས་ཕུན་སུམ་ཚོགས་པའི་སྲས་སུ་སྟོན་པ་མྱ་ངན་ལས་འདས་ནས་ལོ་ཉིས་སྟོང་ཆིག་བརྒྱ་དགུ་བཅུ་འདས་པ་རབ་བྱུང་དྲུག་པའི་མེ་བྱ་ལོར་སྐུ་བལྟམས། དགུང་ལོ་གསུམ་པར་ཀརྨ་པ་རོལ་པའི་རྡོ་རྗེ་ལས་དགེ་བསྙེན་གྱི་སྡོམ་པ་བཞེས། མཚན་ཀུན་དགའ་སྙིང་པོར་གསོལ། དགུང་ལོ་བདུན་པའི་སྟེང་ཆོས་རྗེ་དོན་འགྲུབ་རིན་ཆེན་པའི་དྲུང་དུ་དགེ་ཚུལ་གྱི་སྡོམ་པ་བཞེས་མཚན་བློ་བཟང་གྲགས་པའི་དཔལ་དུ་གསོལ། འཇིག་བྱེད་དང་བདེ་མཆོག་སོགས་ཀྱི་དཀྱིལ་འཁོར་དུ་བཅུག་སྟེ་རྡོ་རྗེ་ཐེག་པའི་སྒོར་སྨིན་པར་མཛད། དགུང་ལོ་བཅུ་དྲུག་པ་ལ་མདོ་ཁམས་ནས་བཏེག་སྟེ་དབུས་གཙང་དུ་ཕེབས། འབྲི་གུང་དུ་སྤྱན་སྔ་དང་། ས་སྐྱར་བླ་མ་དམ་པ་བསོད་ནམས་རྒྱལ་མཚན་དང་། བོ་དོང་ཕྱོགས་ལས་རྣམ་རྒྱལ། སྣར་ཐང་མཁས་མཆོག་ལོ་ཙཱ་བ་དོན་བཟང་། སྣར་ཐང་མཁན་པོ་ཀུན་དགའ་རྒྱལ་མཚན། སྐྱོར་ལུང་མཁན་པོ་བློ་གསལ། གདན་ས་མཐིལ་སྤྱན་སྔ་བ་ཆོས་ཀྱི་གྲགས་པ། ལྷོ་བྲག་གྲུབ་ཆེན་ལས་ཀྱི་རྡོ་རྗེ་སོགས་དེ་དུས་ཀྱི་མཁས་གྲུབ་ཡོད་དོ་ཅོག་ལ་འདུལ་མངོན་ཕར་ཚད་དབུ་མ་སོགས་དང་། ས་རྙིང་དྭགས་ཤངས། གསར་མའི་ཆོས་སྐོར་རགས་རིམ་རྣམས་གསན་སྦྱོང་མཛད། ཁྱད་པར་དུའང་ཆོས་རྗེ་དོན་གྲུབ་རིན་ཆེན་པ་དང་། རེད་མདའ་བ་གཞོན་ནུ་བློ་གྲོས་གཉིས་གཙོ་བོར་བསྟེན་ནས་དབུ་ཚད་འདུལ་མངོན་སོགས་དཔྱིས་ཕྱིན་པའི་གསན་པ་མཛད་པས་མཁས་པའི་ཕུལ་དུ་གྱུར། ཡར་ཀླུང་ཚོགས་པའི་མཁན་པོ་བཀའ་བཞི་པ་ཚུལ་རིན་པས་མཁན་པོ་དང་། བྱི་རྫིང་ཚོགས་པའི་མཁན་པོ་ཤར་མགོན་པས་སློབ་དཔོན། བྱི་རྫིང་པའི་དབུ་མཛད་བསོད་ནམས་རྡོ་རྗེས་གསང་སྟོན། ཚོགས་པ་གཉིས་ཀྱི་ཁ་སྐོང་དང་བཅས་དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས་པར་མཛད་ནས་འཆད་རྩོད་རྩོམ་གསུམ་གྱིས་བསྟན་པ་གསལ་བར་མཛད་ནས་བཀའ་རྩོམ་ཡང་གསུང་འབུམ་པོད་ཆེན་བཅོ་བརྒྱད་ཙམ་བཞུགས་པར་གྲགས། དགུང་ལོ་ང་གསུམ་པར་རྒྱལ་བསྟན་དར་རྒྱས་ཀྱི་ཆེད་དང་རིགས་དྲུག་གི་འགྲོ་བ་རྣམས་བདེ་བ་ཅན་དུ་འདྲེན་པའི་དམིགས་ཕུགས་ཏེ་དགེ་འདུན་ཁྲིར་ཉེ་བར་བསྙེན་བཀུར་གྱི་ལྷ་ས་སྨོན་ལམ་ཆེན་མོ་ཇི་སྲིད་བར་འཛུགས་པར་མཛད། བུ་སློབ་འཁོར་ཚོགས་རྣམས་ཀྱིས་གསོལ་བ་བཏབ་པ་ལྟར་དགོན་གནས་ཤིག་འདིང་བར་དགོངས། གྲུབ་ཆེན་ལས་ཀྱི་རྡོ་རྗེ་ལ་ལུང་བསྟན་ཞུས་པར། བདག་གི་ཡི་དམ་ལ་ཞུའོ་གསུངས། དབང་བསྐུར་རི་ཡི་ལྡེབས་དག་ཏུ། །བཙུན་མོ་སྡིངས་ཀྱི་ངོས་ཕྱོགས་སུ། །དགེ་འདུན་དཔག་མེད་འདུ་བར་འགྱུར། །རི་ནི་གང་ཡིན་འཇམ་དཔལ་མཆེད། །དབུས་གཙང་མདོ་ཁམས་རྒྱ་ཡུལ་གྱི། །མཆོད་གནས་དམ་པ་ཚོགས་གསོག་རྟེན། །མངའ་རིས་བྱང་ཁམས་ཀུན་གྱི་སྐྱབས། །ཕྱོགས་བཅུར་སྡེ་དགོན་རྒྱས་པ་འབྱུང་། །ཞེས་གསུང་བ་འདུག་སྟེ། དགོན་པའི་མིང་ལ་རྟེན་འབྲེལ་གྱི་སྒྲ་དོན་ཡོད་པས། ཁྱོད་རང་འདི་ནས་དགའ་ལྡན་དུ་བྱམས་པའི་དྲུང་དུ་འབྱོན་ཞིང་དེར་བཞུགས་པས་དགོན་མིང་ཡང་དགའ་ལྡན་ལ་གྲས་པ་བཏགས་ན་ཁྱོད་རང་བཞུགས་པ་དང་འདྲ་བའི་རྟེན་འབྲེལ་ཡོད། ཅེས་གསུངས་པ་ལྟར་སྨོན་ལམ་གྲོལ་ནས་ཞབས་ཀྱིས་བཅགས་ཏེ་འབྲོག་དགའ་ལྡན་རྣམ་པར་རྒྱལ་བའི་གླིང་གི་ས་གཞི་བརྟག་པ་སོགས་འདུལ་བ་དང་གཙུག་ལག་ཁང་གི་དོན་ལྟར་ས་གླང་ལོར་བཏབ། བདེ་མཆོག་རྡོར་དབྱིངས་སོགས་ཀྱི་དཀྱིལ་འཁོར་བློས་བསླངས་རྣམས་རིན་པོ་ཆེ་འབའ་ཞིག་ལས་བཞེངས་ནས་སྒྲུབ་པའི་མཆོད་པ་ཡང་བཙུགས། དེ་ལྟར་ཆོས་ཀྱི་ཕྲིན་ལས་རྒྱ་ཆེར་བསྐྱངས་ནས་རེ་ཞིག་ཞིང་འདིའི་གདུལ་བྱའི་སྐལ་བ་རྫོགས་པར་གཟིགས་ཏེ་སྔ་གོང་ནས་ཐམས་ཅད་མཁྱེན་པ་དགེ་འདུན་གྲུབ་པ་དང་བཀྲ་ཤིས་རྡོ་ཁར་མཇལ་དུས་དགྱེས་པའི་འཛུམ་མདངས་དང་བཅས་ན་བཟའ་མཐང་གོས་བཞེས་འཕྲོར་གནང་སྟེ་དོན་གྱིས་བསྟན་པ་ཡོངས་སུ་གཏད། རྒྱལ་ཚབ་དར་མ་རིན་ཆེན་ལ་ན་བཟའ་པཎ་ཞུ་དང་བེར་ཐུལ་ཞིག་གཏད་དེ་དོན་གྱིས་གདན་སར་བགོ་བར་མཛད་ནས་དགུང་ལོ་རེ་གཉིས་པ་ས་ཕག་སྨིན་དྲུག་ཟླ་བའམ་འདུལ་བའི་མགོ་ཟླ་དགུན་ཟླ་ར་བ་ཧོར་ཟླ་བཅུ་པའི་མར་ངོའི་མཁའ་འགྲོ་འདུ་བའི་དུས་བཟང་ཉེར་ལྔ་ལ་གཟུགས་སྐུའི་བཀོད་པ་བསྡུས་ནས་དགའ་ལྡན་དག་པའི་ཞིང་དུ་གཤེགས་སོ། །ཕྱི་ནང་ཐམས་ཅད་མར་མེའི་རྒྱུན་བཟང་པོས་གཏམས་པའི་ལྔ་མཆོད་ཆེན་མོའི་དུས་མཆོད་ཀྱང་བཙུགས། སྐུ་གདུང་རིལ་པོར་དངུལ་གྱི་མཆོད་རྟེན་བུམ་པའི་ནང་དུ་བཞུགས་སུ་གསོལ་བའི་དངུལ་གདུང་མཐོང་བ་དོན་ལྡན་དུ་གྲགས་སོ། །རྗེ་འདི་ཉིད་ཀྱི་སྲས་ཀྱི་ཐུ་བོར་གྱུར་པ། པཎ་ཆེན་དགེ་འདུན་གྲུབ་པ། རྒྱལ་ཚབ་རིན་པོ་ཆེ། མཁས་གྲུབ་དགེ་ལེགས་དཔལ་བ་དང་གསུམ་མོ། །

གདན་ས་གཉིས་པ་རྒྱལ་ཚབ་རིན་པོ་ཆེ།

༈ གདན་ས་གཉིས་པ་རྒྱལ་ཚབ་རིན་པོ་ཆེ་ནི། གཙང་སྟོད་དུ་ཤིང་འབྲུག་ལ་འཁྲུངས། དགུང་ལོ་དྲུག་ཅུ་པར་དགའ་ལྡན་གྱི་ཁྲིར་ཕེབས། ཆོས་འཁོར་དཔག་མེད་བསྐོར་ཞིང་བསྟན་བཅོས་ཀྱང་མཐའ་ཡས་པར་སྣང་། དགུང་ལོ་རེ་དགུ་པ་ཆུ་ཁྱི་ལོར་གཤེགས། གདུང་རུས་དང་རིང་བསྲེལ་སོགས་ནང་དུ་བཞུགས་པའི་དངུལ་གདུང་རྣམ་རྒྱལ་མཆོད་རྟེན་དངུལ་གདུང་ཆེན་མོའི་གཡས་སུ་བཞུགས།

གསུམ་པ་མཁས་གྲུབ་དགེ་ལེགས་དཔལ་བ།

༈ གསུམ་པ་མཁས་གྲུབ་དགེ་ལེགས་དཔལ་བ། གཙང་སྟོད་མདོག་གཞུང་དུ་ཤིང་གླང་ལ་འཁྲུངས། ཞེ་བདུན་པར་དགའ་ལྡན་ཁྲིར་ཕེབས། ལོ་བརྒྱད་ཀྱི་བར་བསྟན་པའི་བྱ་བ་མཐའ་ཡས་པ་མཛད། བསྟན་བཅོས་ཀྱང་མང་བར་སྣང་། ང་བཞི་པ་ས་རྟ་ལ་གཤེགས་སོ། །གདུང་ཞུགས་སུ་ཕུལ་བའི་གདུང་རུས་སོགས་ནང་རྟེན་དུ་བཞུགས་པའི་རྣམ་རྒྱལ་མཆོད་རྟེན་རིན་ཆེན་གཉིས་པ་ལས་གྲུབ་པ་གཙོ་བོའི་གཡོན་དུ་བཞུགས་སོ། །

བཞི་པ་ཆོས་རྗེ་ཞྭ་ལུ་པ་ལེགས་པ་རྒྱལ་མཚན།

༈ བཞི་པ་ཆོས་རྗེ་ཞྭ་ལུ་པ་ལེགས་པ་རྒྱལ་མཚན་གཙང་དུ་ཤིང་ཡོས་ལ་འཁྲུངས། རེ་བཞི་པ་ས་རྟ་ལ་དགའ་ལྡན་གྱི་ཁྲིར་ཕེབས། དོན་དྲུག་པ་ལྕགས་རྟར་གཤེགས། དངུལ་གདུང་རྣམ་རྒྱལ་མཆོད་རྟེན་གཙོ་བོའི་གཡས་གསུམ་པར་བཞུགས།

ལྔ་པ་ཆོས་རྗེ་བློ་གྲོས་ཆོས་སྐྱོང་།

༈ ལྔ་པ་ཆོས་རྗེ་བློ་གྲོས་ཆོས་སྐྱོང་གཙང་གཡག་སྡེར་ས་སྦྲུལ་ལ་འཁྲུངས། རེ་གཉིས་པ་ལྕགས་རྟ་ལ་ཁྲིར་ཕེབས། དོན་ལྔ་པ་ཆུ་ལུག་ལ་གཤེགས་སོ། །

དྲུག་པ་བ་སོ་ཆོས་རྗེ་ཆོས་ཀྱི་རྒྱལ་མཚན།

༈ དྲུག་པ་བ་སོ་ཆོས་རྗེ་ཆོས་ཀྱི་རྒྱལ་མཚན། མཁས་གྲུབ་རྗེའི་གཅུང་པོར་ཆུ་རྟར་འཁྲུངས། རེ་གཉིས་པ་ཆུ་ལུག་ལ་ཁྲིར་ཕེབས། དོན་གཉིས་པ་ཆུ་སྦྲུལ་ལ་གཤེགས། དངུལ་གདུང་རྣམ་རྒྱལ་མཆོད་རྟེན་གཙོ་བོའི་གཡོན་གཉིས་པར་བཞུགས།

བདུན་པ་མཁས་མཆོག་བློ་གྲོས་བརྟན་པ།

༈ བདུན་པ་མཁས་མཆོག་བློ་གྲོས་བརྟན་པ་གཙང་གི་ཤངས་མགྲོན་ཁང་དུ་ཆུ་རྟར་འཁྲུངས། རེ་བདུན་པ་ལྕགས་ཁྱིར་ཁྲིར་ཕེབས། དེའི་ཕྱི་ལོ་འབྲས་སྤུངས་ཀྱི་ཁྲི་ཡང་བསྒྲགས། དོན་བདུན་ལ་གཤེགས། དབྱེན་བསྡུམས་མཆོད་རྟེན་གཙོ་བོའི་གཡོན་བཞི་པར་འཁོད་དོ། །

བརྒྱད་པ་སྨོན་ལམ་དཔལ་བ།

༈ བརྒྱད་པ་སྨོན་ལམ་དཔལ་བ། གཡས་རུ་བྱང་དུ་ཤིང་རྟར་འཁྲུངས། དོན་གཉིས་པ་ཆུ་སྦྲུལ་ལ་ཁྲིར་ཕེབས། དོན་བརྒྱད་པ་ལྕགས་ཕག་ལ་གཤེགས། འདི་ཡན་བདུན་པོར་འཇམ་དབྱངས་གཙང་པ་བདུན་བརྒྱུད་ཅེས་གྲགས་སོ། །

དགུ་པ་བློ་བཟང་ཉི་མ་ནས་ཞེ་བདུན་པ་ཆོས་རྗེ་བློ་བཟང་ཆོས་འཕེལ་བར།

༈ དེ་ནས་དགུ་པ་བློ་བཟང་ཉི་མ། བཅུ་པ་ཆོས་རྗེ་ཡེ་ཤེས་བཟང་པོ། བཅུ་གཅིག་པ་འདར་སྟོན་བློ་བཟང་གྲགས་པ། བཅུ་གཉིས་པ་འཇམ་དབྱངས་ཤེས་རབ་ལེགས་པའི་བློ་གྲོས། བཅུ་གསུམ་པ་ཆོས་རྗེ་ཆོས་ཀྱི་བཤེས་གཉེན། བཅུ་བཞི་པ་ཆོས་རྗེ་རིན་ཆེན་འོད་ཟེར། བཅོ་ལྔ་པ་པཎ་ཆེན་བསོད་ནམས་གྲགས་པ། བཅུ་དྲུག་པ་ཆོས་རྗེ་ཆོས་སྐྱོང་རྒྱ་མཚོ། བཅུ་བདུན་པ་ཆོས་རྗེ་རྡོ་རྗེ་བཟང་པོ། བཅོ་བརྒྱད་པ་ཆོས་རྗེ་རྒྱལ་མཚན་བཟང་པོ། བཅུ་དགུ་པ་ཆོས་རྗེ་ངག་དབང་ཆོས་གྲགས། ཉི་ཤུ་པ་ཆོས་རྗེ་ཆོས་གྲགས་བཟང་པོ། ཉེར་གཅིག་པ་དགེ་ལེགས་དཔལ་བཟང་། ཉེར་གཉིས་པ་དགེ་འདུན་བསྟན་པ་དར་རྒྱས། ཉེར་གསུམ་པ་ཆོས་རྗེ་ཚེ་བརྟན་རྒྱ་མཚོ། ཉེར་བཞི་པ་བྱམས་པ་རྒྱ་མཚོ། ཉེར་ལྔ་པ་ཆོས་རྗེ་དཔལ་འབྱོར་རྒྱ་མཚོ། ཉེར་དྲུག་པ་ཆོས་རྗེ་དམ་ཆོས་དཔལ་འབར། ཉེར་བདུན་པ་སངས་རྒྱས་རིན་ཆེན། ཉེར་བརྒྱད་པ་ཆོས་རྗེ་དགེ་འདུན་རྒྱལ་མཚན། ཉེར་དགུ་པ་ཆོས་རྗེ་བཤེས་གཉེན་གྲགས་པ། སུམ་ཅུ་པ་ཆོས་རྗེ་བློ་གྲོས་རྒྱ་མཚོ། སོ་གཅིག་པ་ཆོས་རྗེ་དམ་ཆོས་དཔལ། སོ་གཉིས་པ་ཆོས་རྗེ་ཚུལ་ཁྲིམས་ཆོས་འཕེལ། སོ་གསུམ་པ་ཆོས་རྗེ་གྲགས་པ་རྒྱ་མཚོ། སོ་བཞི་པ་ཆོས་རྗེ་ངག་དབང་ཆོས་ཀྱི་རྒྱལ་མཚན། སོ་ལྔ་པ་ཆོས་རྗེ་འཇམ་དབྱངས་དཀོན་མཆོག་ཆོས་འཕེལ། སོ་དྲུག་པ་ཀོང་པོ་བསྟན་འཛིན་ལེགས་བཤད། སོ་བདུན་པ་ཆོས་རྗེ་དགེ་འདུན་རིན་ཆེན། སོ་བརྒྱད་པ་ཆོས་རྗེ་བསྟན་པ་རྒྱལ་མཚན། སོ་དགུ་པ་དཀོན་མཆོག་ཆོས་བཟང་། བཞི་བཅུ་པ་དཔལ་ལྡན་རྒྱལ་མཚན། ཞེ་གཅིག་པ་བློབཟང་རྒྱལ་མཚན། ཞེ་གཉིས་པ་བློ་བཟང་དོན་ཡོད། ཞེ་གསུམ་པ་བྱམས་པ་བཀྲ་ཤིས། ཞེ་བཞི་པ་བློ་གྲོས་རྒྱ་མཚོ། ཞེ་ལྔ་པ་ཅོ་ནེ་འཇམ་དབྱངས་ཚུལ་ཁྲིམས་དར་རྒྱས། ཞེ་དྲུག་པ་བསམ་བློ་སྦྱིན་པ་རྒྱ་མཚོ། ཞེ་བདུན་པ་ཆོས་རྗེ་བློ་བཟང་ཆོས་འཕེལ་རྣམས་སོ། །

དགའ་ལྡན་ཤར་རྩེ་དང་བྱང་རྩེ།

༈ དགའ་ལྡན་ཤར་རྩེ་ནི་རྗེའི་སློབ་མ་གནས་བརྟན་རིན་ཆེན་རྒྱལ་བས་བཏབ། བྱང་རྩེ་ནི་རྗེའི་སློབ་མ་ཧོར་སྟོན་ནམ་མཁའ་དཔལ་བཟང་གིས་བཏབ་པའོ། །

ཆོས་གྲྭ་ཆེན་པོ་དཔལ་ལྡན་འབྲས་སྤུངས།

༈ ཆོས་གྲྭ་ཆེན་པོ་དཔལ་ལྡན་འབྲས་སྤུངས་ནི། རྗེའི་དངོས་སློབ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་དུ་གྲགས་པ་དེ་ས་ལུག་ལ་བསམ་ཡས་སུ་འཁྲུངས། རྩེ་ཐང་དུ་རབ་ཏུ་བྱུང་ཞིང་གྲལ་འཛིན་མཛད། སྨྱོས་རྒྱལ་བ་ལྷ་ནང་གི་སྐྱེ་བར་མཁའ་འགྲོས་ལུང་བསྟན། སྐབས་ཤིག་གསུང་གི་རྒྱལ་པོ་དགྲ་ལྷ་སྐྱེས་གཅིག་དཔོན་བློན་གྱིས། ས་ཡུལ་བསྟན་ནས་འདིར་དགོན་པ་ཞིག་ཐོབ། ངས་བཙུན་པ་སྟོང་ཕྲག་ལྔ་སྟེར་ཟེར་བ་དང་། དན་འབག་མདར་ལོངས་སྤྱོད་ཀྱི་ཆུ་ཡིན་ཟེར་རྫིང་བུ་མང་པོ་དང་། གླང་ཆེན་རི་གདོང་དུ་འཇམ་མགོན་ཆོས་ཀྱི་རྒྱལ་པོ་བཞུགས་ཏེ་འདི་རྣམས་ཐོས་བསམ་གྱི་རྫིང་བུ་ཡིན་པས་འཐུང་གསུང་བ་སོགས་ཀྱི་གཟིགས་ལྟས་ཁྱད་པར་ཅན་བྱུང་བ་དང་། འཇམ་མགོན་བླ་མས་ཀྱང་དགོན་སྡེ་ཞིག་གྱིས་གསུངས་པ་དང་དུས་འགྲིགས་པས། མེ་སྤྲེལ་ལོར་བསིལ་ལྡན་གྱི་རྒྱན་གཅིག་འཕགས་ཡུལ་དཔལ་ལྡན་འབྲས་སྤུངས་དང་གཉིས་སུ་མེད་པའི་རིག་གྲོལ་གྱི་སྡེ་ཆེན་པོའི་རྨང་འདིང་བའི་ལྟོ་ཕྱེའི་ཐིག་སོགས་འཇམ་མགོན་བླ་མས་ཞལ་བཀོད་གནང་ཞིང་། འགོག་པ་རི་ནས་གཏེར་དུ་བཞེས་པའི་མཆོད་དུང་ཁྱད་པར་ཅན་སྩལ་ཏེ། དགོན་མ་བས་བུ་ལྷག་པ་འོང་སོགས་ཀྱིས་ལུང་བསྟན། གཙུག་ལག་ཁང་དབུས་མར་དུས་གསུམ་སངས་རྒྱས་ལ་ཉེ་སྲས་བརྒྱད་ཀྱིས་བསྐོར་བ་དང་། རྗེ་སྐུ་ནང་གཟུངས་ཁྱད་པར་ཅན་སྤྲུལ་པའི་བཟོ་བོས་བཞེངས་པའི་སྐུ་རྒྱན་དང་ཞབས་སོགས་ས་ལ་མ་རེག་པར་བར་སྣང་ན་བཞུགས་པར་གྲགས་པ་རྗེ་ཉིད་ཀྱི་རབ་གནས་མ་བོད་ཡུལ་དུ་འགྲན་ཟླ་དང་བྲལ་བའི་རྟེན་ཁྱད་པར་ཅན་མཆོད་པའི་སྤྲིན་གཏིབས་པ་དང་བཅས་བཞེངས། དེར་གྲྭ་ཚང་སྒོ་མང་། བློ་གསལ་གླིང་། ཐོས་བསམ་གླིང་ངམ་རྒྱལ་པ། ཤག་སྐོར་བ་དང་འདུལ་བ་པ། བདེ་ཡངས་པ། གསང་འཇིགས་གཙོོར་སྟོན་གྱི་ཟབ་མོ་སྔགས་ཀྱི་ཐེག་པའི་དོན་ཉམས་སུ་ལེན་པའི་སྔགས་པ་གྲྭ་ཚང་སྟེ་བདུན་བཙུགས་པའི་སོ་སོར་སློབ་དཔོན་རེ་ཡང་བསྐོ་བཞག་མཛད་དོ། །གདན་ས་འདིའི་ཁྲི་ཐོག་གཉིས་པ་དཔལ་ལྡན་སེང་གེ་གཙང་རོང་ཐོན་དུ་འཁྲུངས། གསུམ་པ་རིན་ཆེན་བྱང་ཆུབ་མདོ་ཁམས་སུ་འཁྲུངས། བཞི་པ་རྗེ་བློ་བཟང་ཉི་མ་ཙོང་ཁའི་ཡུལ་དུ་འཁྲུངས། ལྔ་པ་བློ་བཟང་གྲགས་པ་མདོ་སྨད་རོང་པོར་འཁྲུངས། དྲུག་པ་ཤཱཀྱ་རིན་ཆེན་འཕན་ཡུལ་དུ་འཁྲུངས། བདུན་པ་སྨོན་ལམ་དཔལ་ལེགས། བརྒྱད་པ་ལེགས་པ་ཆོས་འབྱོར་ཚལ་དུ་འཁྲུངས། དགུ་པ་མཁས་བཙུན་ཡོན་ཏན་རྒྱ་མཚོ་གཙང་སྨད་དུ་ཐོན་པའི་ཞལ་ངོར་འཁྲུངས།

ཐམས་ཅད་མཁྱེན་པ་དགེ་འདུན་རྒྱ་མཚོ།

༈ བཅུ་པ་ཐམས་ཅད་མཁྱེན་པ་དགེ་འདུན་རྒྱ་མཚོ་ནི། གཙང་རྟ་ནག་རྡོ་རྗེ་གདན་དུ་ཡབ་རྡོ་རྗེ་འཆང་ཀུན་དགའ་རྒྱལ་མཚན་པའི་སྲས་སུ་འཁྲུངས། རྗེ་དགེ་འདུན་གྲུབ་པའི་སྔོན་རབས་གསལ་བར་གསུངས། ས་སྦྲུལ་ལོར་སྦས་ཡུལ་དཀར་མོ་ལྗོངས་སུ་ཆོས་འཁོར་རྒྱལ་མེ་ཏོག་ཐང་གི་ཆོས་གྲྭ་བཏབ། གཙུག་ལག་ཁང་རྟེན་བརྟེན་པར་བཅས་པ་བཞེངས། ཞེ་གསུམ་པར་འབྲས་སྤུངས་ཀྱི་ཁྲིར་ཕེབས། རེ་བརྒྱད་པ་ཆུ་སྟག་ལ་གཤེགས། བཅུ་གཅིག་པ་པཎ་ཆེན་བསོད་ནམས་གྲགས་པ།

ཐམས་ཅད་མཁྱེན་པ་བསོད་ནམས་རྒྱ་མཚོ།

༈ བཅུ་གཉིས་པ་ཐམས་ཅད་མཁྱེན་པ་བསོད་ནམས་རྒྱ་མཚོ་ནི། སྟོད་ལུང་མདའ་རྩེ་དགའ་ཁང་གསར་དུ་འཁྲུངས། ས་ཕག་ལོར་ཕན་བདེ་ལེགས་བཤད་གླིང་འཛུགས་པ་གནང་། ཨལ་ཐན་ཆོས་ཀྱི་རྒྱལ་པོའི་ཚེ་སྒྲུབ་ལ་རྣམ་རྒྱལ་མ་བཙུགས་པས་མིང་དེར་ཐོགས། ཨལ་ཐན་ཆོས་རྒྱལ་གྱི་དབུ་བླར་གྱུར་ཏེ། མི་རིགས་མི་གཅིག་པ་དུ་མའི་དབུས་སུ་ཡོ་བྱད་ཀྱི་དངོས་པོ་འགང་ཆེ་བ་དུ་མ་དང་། ཏཱ་ལའི་བླ་མ་བཛྲ་དྷ་ར་ཞེས་ཁྱབ་བདག་རྡོ་རྗེ་འཆང་གི་ལས་ཀ་ཕུལ། འཇང་ས་ཐམ་རྒྱལ་པོས་སྦྱིན་བདག་མཛད་དེ། ཐུབ་བསྟན་བྱམས་ཆེན་ཕྱོགས་ལས་རྣམ་རྒྱལ་གྱི་ཆོས་སྡེ་བཏབ། དགུང་ལོ་ཞེ་དྲུག་པ་ས་བྱིར་དག་ཞིང་དུ་གཤེགས། དངུལ་གདུང་འབྲས་སྤུངས་སུ་བཞུགས།

བདེ་ཆེན་ཆོས་ཀྱི་རྒྱལ་པོ་རྗེ་ཡོན་ཏན་རྒྱ་མཚོ།

༈ བཅུ་གསུམ་པ་བདེ་ཆེན་ཆོས་ཀྱི་རྒྱལ་པོ་རྗེ་ཡོན་ཏན་རྒྱ་མཚོ་ནི། ཧོར་ཇིང་གིར་གྱི་རྒྱལ་བརྒྱུད་ཡབ་སེ་ཆེན་ཆོས་ཁུར་དང་། ཡུམ་བཱ་ཁེན་སྠུ་ལ་གཉིས་ཀྱི་སྲས་སུ་འཁྲུངས། ཐམས་ཅད་མཁྱེན་པ་བསོད་ནམས་རྒྱ་མཚོའི་སྔོན་རབས་གསལ་བར་གསུང་། དགུང་ལོ་ཉེར་བརྒྱད་མེ་འབྲུག་ལ་གཤེགས། ཐུགས་ལྗགས་སྤྱན་གསུམ་དང་གདུང་རིང་བསྲེལ་ལ་སོགས་པ་བཞུགས་པའི་དངུལ་གདུང་འབྲས་སྤུངས་སུ་བཞུགས།

པཎ་ཆེན་བློ་བཟང་ཆོས་ཀྱི་རྒྱལ་མཚན།

༈ བཅུ་བཞི་པ་པཎ་ཆེན་བློ་བཟང་ཆོས་ཀྱི་རྒྱལ་མཚན་ནི། གཙང་གི་རོང་ཆེན་ལྷན་དུ་འཁྲུངས། མེ་སྦྲུལ་ལ་སེར་འབྲས་གཉིས་ཀྱི་ཁྲིར་ཕེབས། གོ་གསུམ་པ་ཆུ་སྟག་ལ་གཤེགས། གདུང་རིལ་པོར་བཞུགས་པའི་དངུལ་གདུང་རིན་ཆེན་བཀྲ་ཤིས་ལྷུན་པོ་ན་བཞུགས།

ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོ།

༈ ཁྲི་ཐོག་བཅོ་ལྔ་པ་ནི། དེ་བཞིན་གཤེགས་པ་འོད་ཟེར་ཀུན་འཕགས་དཔལ་བརྩེགས་རྒྱལ་པོ་སྣང་ཚུལ་དུ་བྱང་ཆུབ་སེམས་དཔའི་ཚུལ་གྱིས་བོད་འདིར་ངུར་སྨྲིག་གར་གྱི་རོལ་པ་ཟམ་མ་ཆད་པ་བདུན་འབྱོན་པའི་ལྔ་པ་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ་འདི་ཉིད་ནི། རཏྣའི་སྤྱི་ལུང་ལས། ཐུགས་རྗེ་ཆེན་པོའི་སྤྲུལ་པ་དབུས་ནས་འབྱུང་། །བློ་གྲོས་སྟོབས་ལྡན་བཟང་པོའི་འོད་ཟེར་ཅན། །སྣ་ཚོགས་ཐབས་ཀྱིས་འགྲོ་བའི་ཁ་ལོ་བསྒྱུར། །ཆོས་ཀྱི་རྒྱལ་པོ་དཔུང་དང་བཅས་པ་འབྱུང་། །འབྲི་ཡི་རྭ་ཅོ་ཕག་གི་མཇུག་མ་ཅན། །གུང་གི་འཚང་འཆའ་ས་ཡི་ཟས་ཟ་ཞིང་། །མིག་བཞི་གྱེན་ཐུར་དག་ལ་བལྟ་བར་བྱེད། །ལྕེ་གཉིས་བདེན་རྫུན་གཉིས་ཀྱི་ཤན་འབྱེད་པ། །དབུས་གཙང་ཐམས་ཅད་སྐུ་ཡི་ཆབ་འོག་འདུས། །རྫུ་འཕྲུལ་མཐུ་ལྡན་བསྟན་པའི་བདག་པོ་འབྱུང་། །ལྷ་ས་དམར་པོ་རི་དང་ཆུ་བོ་རི། །ཧས་པོ་རི་དང་དབུས་རི་དེ་གསུམ་ལ། །ཕོ་བྲང་བཅས་ནས་དབུས་གཡོར་མཐའ་གསུམ་སྡུད། །གཙང་གི་ངམ་རུ་རི་དང་རི་བོ་ཆེ། །ལ་སྟོད་རྡོ་རྗེའི་རི་དང་དེ་གསུམ་ལ། །ཕོ་བྲང་བྱས་ནས་གཙང་གི་རུ་གཉིས་དང་། །མངའ་རིས་བལ་པོའི་བར་རྣམས་དབང་དུ་སྡུད། །དབུས་གཙང་རྣམས་སུ་ཆོས་གྲྭ་བཅུ་གསུམ་འཆའ། །ཞེས་དང་། ཡང་འཕྲོས་ལས། དབུ་ཟླུམ་མདོ་ཡི་བསྟན་པ་དར་ཞིང་རྒྱས། །ལྕང་ལོ་སྔགས་པའི་བསྟན་པས་གྲུབ་ཐོབ་ཁེངས། །རྒྱལ་ཁྲིམས་གསེར་གྱི་གཉའ་ཤིང་ལྕི་ལ་སྦྲམ། །ཆོས་ཁྲིམས་དར་གྱི་མདུད་པ་དར་ལས་འཇམ། །ནད་མཚོན་མུ་གེའི་སྡུག་བསྔལ་གང་ཡང་མེད། །བདེ་སྐྱིད་ལྷ་ཡུལ་ལྟ་བུར་ཀུན་ཀྱང་འཚོ། །ཞེས་ལུང་བསྟན་པ་ལྟར་ཟ་ཧོར་གྱི་གདུང་གི་རིགས་ལས་ཡབ་ཧོར་བདུད་འདུལ་རབ་བརྟན་དང་ཡུམ་ཁྲི་ལྕམ་ཀུན་དགའ་ལྷ་མཛེས་ཀྱི་སྲས་སུ་རབ་བྱུང་བཅུ་པའི་མེ་སྦྲུལ་ཧོར་ཟླ་དགུ་པའི་ལྷ་བབས་ཀྱི་ཉིན་ཕྱི་མ་སྐར་མ་རྒྱལ་ལ་སྐུ་བལྟམས། རྗེ་ཡོན་ཏན་རྒྱ་མཚོའི་སྔོན་རབས་གསལ་བར་གསུངས་པས། པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་གྱིས་དགུང་ལོ་དྲུག་པ་ཆུ་ཁྱི་ཧོར་ཟླ་གཉིས་པའི་ཉེར་ལྔ་ལ་དཔལ་ལྡན་འབྲས་སྤུངས་སུ་སྤྱན་དྲངས། ལོ་དུས་སུ་སྨད་འདུལ་བའི་སྡོམ་རྒྱུན་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་མཁན་པོ་དང་ཁྲི་ཆེན་འཇམ་དབྱངས་དཀོན་མཆོག་ཆོས་འཕེལ་གྱིས་སློབ་དཔོན་བཅས་དད་པའི་དགེ་འདུན་གྲངས་ཚང་དབུས་སུ་ཚིགས་གསུམ་བར་མ་ཆད་པའི་བསྙེན་པར་རྫོགས་པར་མཛད་ནས་མཁན་སློབ་གཉིས་གཙོ་བོར་བཟུང་བཤེས་གཉེན་མཁས་པ་མང་པོ་བསྟེན་ཏེ་ཕྱི་མཚན་ཉིད་ཀྱི་ཐེག་པ་རིག་གནས་དང་བཅས་སྦྱངས་པ་མཐར་ཕྱིན་པར་མཛད། དགྲ་བཅོམ་པ་ཙུནྡ་སོགས་ཀྱི་ཡང་སྲིད་འཁོན་སྟོན་དཔལ་འབྱོར་ལྷུན་གྲུབ། གཉགས་ཛྙཱ་ན་ཀུ་མཱ་རའི་ཡང་སྲིད་ཟུར་ཆེན་ཆོས་དབྱིངས་རང་གྲོལ། གནས་གསར་བ་མགོན་པོ་བསོད་ནམས་མཆོག་ལྡན། རྣམ་པར་སྣང་མཛད་བསམ་བཞིན་ལོ་ཙཱ་བའི་ཚུལ་བཟུང་བ་བཻ་རོའི་ཡང་སྲིད་གཏེར་བདག་གླིང་པ་སོགས་རིགས་བདག་ཏུ་བཞེས་ཏེ། ཕ་རྒྱུད་གསང་བ་འདུས་པ་དང་། སྒྲུབ་སྡེ་བརྒྱད་དང་ཡང་ཟབ་གསང་བ་བླ་ན་མེད་པའི་མན་ངག་གཙོ་གྱུར་གྱིས་གསང་སྔགས་གསར་རྙིང་དུ་མའི་ཉམས་བཞེས་མཐའ་ཡས་པ་གསན་པས་ཤེས་བྱ་རིག་པའི་གནས་མཐའ་དག་ཐུགས་སུ་ཆུད་དེ་ཐམས་ཅད་མཁྱེན་པ་ཞེས་པའི་མཚན་ཐོགས། བཀའ་རྩོམ་གྱི་རིམ་པའང་མདོ་སྔགས་རིག་གནས་སོགས་ཐམས་ཅད་ལ་དགོངས་འགྲེལ་གྱི་བསྟན་བཅོས་མ་ཚང་བ་མེད་པ་ལྟ་བུ་དང་། གདུལ་བྱར་གྱུར་པའི་ཚོགས་དག་ཀྱང་། རིགས་ཀྱི་མཐོ་བ་གནམ་བསྐོས་ཇིང་གིར་དང་། བོད་ཆོས་རྒྱལ་གྱི་གདུང་རུས། འཁོན་གྱི་རིགས་ལས་གདན་ས་གོང་འོག་གི་ཞལ་ངོ་ན་རིམ། རླངས་ལྷ་གཟིགས་ཀྱི་གདུང་དཔལ་ཕག་མོ་གྲུབ་པ། སྐྱུ་ར་འབྲི་གུང་དང་སྟག་ལུང་ག་ཟི། འོད་གསལ་ལྷ་ལས་ཆད་པའི་སྨྱོས་ཀྱིས་མཚོན་རིགས་རུས་མཐོ་བ་རྣམས་དང་། སྟོབས་ཀྱིས་མཐོ་བ་གནམ་སའི་དབང་ཕྱུག་བསྟན་འཛིན་ཆོས་རྒྱལ་སོགས་རྒྱ་ཧོར་གྱི་རྒྱལ་རིགས་དང་། བོད་ཀྱི་ཆེ་དགུ་བླ་ཆེན་དཔོན་ཆེན་དང་བཅས་པ་ཇི་སྙེད་དང་། གཞན་ཡང་མཆོག་དམན་བར་མའི་སྐལ་ལྡན་མཐའ་ཡས་པ་ལ་ཟབ་རྒྱས་ཆོས་ཀྱི་ཆར་ཕབ་ནས་མཐོ་རིས་དང་ཐར་པའི་ས་བོན་ཡང་དག་པར་བསྐྲུན་པར་མཛད། གནམ་བསྐོས་རྒྱ་ནག་རྒྱལ་པོས་སྤྱན་དྲངས་ཏེ། རྒྱལ་བློན་འབངས་དང་བཅས་པར་ཐར་པའི་ས་བོན་བཞག་ནས་དད་པའི་ས་ལ་བཀོད། ནོར་སྣའི་རིགས་བྱེད་ཀྱིས་མཚོན་བཅད་རིས་ཀྱི་དངོས་པོ་འགངས་ཆེ་སྤམ་མཐོར་བསྩལ་བའི་གནང་སྐྱེས་དང་བཅས་བོད་དུ་ཕེབས་ནས་གསར་འཛུགས་ཀྱི་དགོན་གནས་བཅུ་གསུམ་གསར་དུ་བཏབ་པ་ནི། ཤངས་དགའ་ལྡན་ཆོས་འཁོར། ལྷུན་རྩེའི་རྫོང་འོག་སྨྱུག་ལར་དགའ་ལྡན་ཆོས་འཁོར་ཡང་རྩེ། གཡོ་རུ་དོལ་ཚལ་མིང་དུ་དགའ་ལྡན་གསུང་རབ་གླིང་། རུ་ལག་བྱང་རྣམ་རྒྱལ་རྩེར་དགའ་ལྡན་ཆོས་འཁོར་གླིང་། ལྷོ་བྲག་དོ་རྫོང་དུ་དགའ་ལྡན་དོན་གཉིས་གླིང་། གོང་དཀར་དུ་དགའ་ལྡན་བཤད་སྒྲུབ་གླིང་། ཡར་སྟོད་དུ་དགའ་ལྡན་ཐོས་བསམ་དར་རྒྱས་གླིང་། གཙང་གི་ཉུག་ཏུ་དགའ་ལྡན་ཆོས་འཁོར་གླིང་། དེ་རྣམས་༼སུ་༽བཀའ་ཆེན་བཞི་པ་བརྒལ་བརྟགས་ཀྱི་གཏན་ལ་ཕེབས་པའི་མཚན་ཉིད་རྒྱུའི་བཤད་གྲྭ་བརྒྱད་དང་། ནང་གསང་སྔགས་ཀྱི་ཉམས་ལེན་གཙོར་སྐྱོང་བའི་ཡེར་བ་བྲག་གསེབ་ཏུ་དགའ་ལྡན་གསང་སྔགས་གླིང་། མངའ་རིས་ཁྱུང་རྫོང་དུ་དགའ་ལྡན་འཕེལ་རྒྱས་གླིང་། ཆུ་ཤུར་དུ་གསང་སྔགས་བྱང་ཆུབ་གླིང་། ཕུང་པོ་རི་བོ་ཆེར་བདུད་འདུལ་ཟིལ་གནོན་གླིང་། ཐོབ་རྒྱལ་དུ་དགའ་ལྡན་རབ་རྒྱས་གླིང་སྟེ་བཅུ་གསུམ་གསར་དུ་བཏབ། དེ་ནས་དགོན་རྙིང་གསོ་བ་དང་གསར་བཏབ་བཅས་ཁྱོན་སུམ་ཅུ་བརྒལ་བས་མཚོན་སྟོད་མངའ་རིས་ནས་སྨད་དར་རྩེ་མདོ་ཡན་དུ་དགེ་དགོན་གྱིས་ཁྱབ་པར་མཛད། ས་རྙིང་སོགས་གྲུབ་མཐའ་གཞན་རྣམས་ཀྱང་འཕེལ་རྒྱས་སུ་ཅི་འགྱུར་མཛད་པ་སོགས་གངས་ཅན་བོད་ཀྱི་ཡུལ་འདིར་དགའ་སྐྱིད་བདེ་བའི་དཔལ་འབྱོར་རྫོགས་ལྡན་གསར་པའི་ཕན་བདེས་ཡུན་རིང་བསྐྱངས་ནས་མཐར་དགུང་ལོ་རེ་དྲུག་པ་ཁྱི་ལོར་གཟུགས་སྐུའི་བཀོད་པ་བསྡུས་ནས་དོན་དམ་ཆོས་དབྱིངས་ཀྱི་ངང་དུ་བཞུགས་པར་མཛད་དོ། །དེ་རྗེས་ལུགས་གཉིས་ཀྱི་སྲིད་སྐྱོང་ཕྱི་ནང་གི་རྟེན་བཞེངས་སོགས་སྡེ་སྲིད་སངས་རྒྱས་རྒྱ་མཚོས་མཛད་དེ། ཞབས་བརྟན་ལྷ་ཁང་ཆེན་མོའི་གསེར་གདུང་འཛམ་གླིང་རྒྱན་གཅིག་གི་བུམ་ནང་དུ་སྐུ་གདུང་རིལ་པོ་བཞུགས་པའི་གསེར་གདུང་རིན་པོ་ཆེས་མཚོན་སྐུ་གསུང་ཐུགས་རྟེན་མཐའ་ཡས་པ་དང་སྡེ་སྲིད་རང་ཉིད་ཀྱང་ཐོས་བསམ་སྒོམ་གསུམ་གྱི་མཛད་པ་མི་གཡེལ་བའི་བསྟན་བཅོས་ཀྱི་རིམ་པའང་དཔག་མེད་མངའ་འོ། །

རྒྱལ་མཆོག་དྲུག་པ་བློ་བཟང་རིན་ཆེན་ཚངས་དབྱངས་རྒྱ་མཚོ།

༈ ཁྲི་ཐོག་བཅུ་དྲུག་པར་སླར་ཡང་ཐུགས་རྗེའི་ཉི་མ་རྒྱལ་མཆོག་དྲུག་པ་བློ་བཟང་རིན་ཆེན་ཚངས་དབྱངས་རྒྱ་མཚོ་དགེ་བཅུ་ཚང་བའི་གནས་ལ་འགོ་ཡུལ་གསུམ་ཨོ་རྒྱན་གླིང་དུ་ཡབ་སྨྱོས་ཀྱི་རིག་འཛིན་བཀྲ་ཤིས་བསྟན་འཛིན་དང་ཡུམ་ཆོ་འབྲང་ཕུན་སུམ་ཚོགས་པ་ཚེ་དབང་ལྷ་མོའི་སྲས་སུ་སྐུ་བལྟམས་ནས་དགུང་ལོ་ཉེར་ལྔའི་བར་དུ་བཞུགས་ཏེ་ལྷ་ས་བླ་བྲང་སྟེང་གསེར་ཟངས་ཀྱི་བྱ་འདབ་རྒྱུ་དང་བཟོ་བཀོད་ཁྱད་པར་འཕགས་པ་སོགས་ཆོས་དང་སྲིད་ཀྱི་མཛད་པ་བློའི་རྭ་བ་ལས་འདས་པ་བསྟན་ནས་ཡང་སྲིད་ཕྱི་མའི་ལུང་བསྟན་མཚན་འདོགས་སོགས་ཀྱི་བཀའ་ཆེམས་སྩལ་ཏེ་གཟུགས་སྐུའི་བཀོད་པ་བསྡུས་སོ། །སླར་ཡང་འཛམ་གླིང་སྐྱེ་འགྲོ་ཡོངས་ཀྱི་བསོད་ནམས་ཀྱི་ཞིང་དུ་བདུན་པ་རྒྱལ་མཆོག་སྐལ་བཟང་རྒྱ་མཚོ་ཞེས་སྙན་པའི་བ་དན་ས་གསུམ་དུ་གཡོ་བ་འདི་ཉིད་བྱོན་པའོ། །

ཆོས་གྲྭ་ཆེན་པོ་སེ་ར་ཐེག་ཆེན་གླིང་།

༈ ཆོས་གྲྭ་ཆེན་པོ་སེ་ར་ཐེག་ཆེན་གླིང་ནི། འཇམ་མགོན་ཙོང་ཁ་པས་སེ་ར་ཆ ོས་ལྡིངས་སུ་རྩ་ཤེའི་འགྲེལ་པ་མཛད་སྐབས་བར་སྣང་ལ་ཤེར་ཕྱིན་གྱི་ཡི་གེ་གསེར་ཞུན་གྱིས་བྲིས་པ་ལྟ་བུ་གཟིགས་པས་ཐེག་ཆེན་བཤད་སྒྲུབ་མ་ལུས་པའི་སྡེ་འབྱུང་བར་ལུང་བསྟན་པ་ལྟར་ཚལ་གུང་ཐང་དུ་འཁྲུངས་པའི་རྗེའི་དངོས་སློབ་བྱམས་ཆེན་ཆོས་རྗེ་ཤཱཀྱ་ཡེ་ཤེས་དེ་ཉིད་རྗེ་རིན་པོ་ཆེ་རྒྱ་ནག་ཏུ་རྒྱལ་པོ་རྟའི་མིང་གིས་སྤྱན་འདྲེན་དུ་བྱུང་བའི་རྒྱལ་ཚབ་ཏུ་ཆོས་རྗེ་ཤཱཀ་ཡེ་བརྫངས་པ་རྒྱལ་པོའི་བླ་མཆོད་དུ་གྱུར། རྒྱ་ཡུལ་དུ་ཧ་ཡན་སི་ཞེས་པའི་ཆོས་སྡེ་བཏབ་ནས་ཕྱོགས་དེར་མཉམ་མེད་རྗེའི་རིང་ལུགས་དར་བ་བྱས་ནས་བོད་དུ་ཕེབས། རྗེ་སེ་ར་རྩེར་བཞུགས་པའི་དྲུང་དུ་བརྒྱ་འབུལ་མཛད་པས། རྗེའི་ཞལ་ནས་འདིར་ཁྱོད་ཀྱིས་དགོན་སྡེ་ཞིག་ཐོབས་གསུངས་པ་དང་དུ་བླངས་ཏེ། ས་ཕག་ལོར་སེ་ར་ཐེག་ཆེན་གྱི་ཆོས་གྲྭ་ཆེན་པོ་བཏབ་ཅིང་རྟེན་གཙོར་ཆོས་རྗེ་ཉིད་ཀྱིས་རྒྱ་ཡུལ་ནས་བཞེས་པའི་ཙནྡན་དཀར་པོའི་གནས་བཅུ་ནང་གཟུངས་སུ་བཞུགས་པའི་ཐུབ་དབང་ལ་གནས་བཅུས་བསྐོར་བའི་ལྷ་ཁང་བཞེངས། དགེ་འདུན་ཡང་འདུ་ཆེ་བར་སྟོད་སྨད་རྒྱ་འབྲོང་སྟེང་སྟེ་གྲྭ་ཚང་བཞི་བཙུགས། བཀའ་བཅུ་སྨྲ་བ་དར་རྒྱས་བཟང་པོ་གདན་སར་བསྐོས། དེ་རྗེས་གདན་ས་མཚུངས་མེད་ཆོས་རྗེ་རྒྱལ་མཚན་བཟང་པོས་མཛད་པ་སོགས་སོ། །

ལྷ་ས་རྨེ་རུ།

༈ ལྷ་ས་རྨེ་རུ་ནི། མངའ་བདག་ཁྲི་རལ་གྱི་ལྷ་སའི་ཕྱོགས་བཞིར་མཆོད་ཁང་དང་དགེ་འདུན་གྱི་སྡེ་གཉིས་རེ་བཙུགས་པ་ལས། ཤར་དུ་ཀ་རུ་དང་རྨེ་རུ་ཞེས་བྱུང་བ་ཀ་རུ་དར་མས་བསྣུབས། དེའི་རྒྱུན་སླར་རྗེ་བསོད་ནམས་རྒྱ་མཚོའི་དུས་དགེ་ལུགས་ཀྱི་གྲོང་ཆོག་པར་བཙུགས་པའོ། །

ར་མོ་ཆེ་བཞི་སྡེ།

༈ ར་མོ་ཆེ་བཞི་སྡེ་ནི། ཚལ་པ་ཁྲི་དཔོན་དགའ་སྡེ་བཟང་པོས་རྒྱས་བཏབ་པའི་གཙུག་ལག་ཁང་དུ་མཆོད་འབུལ་བཞི་གྲྭ་བཙུགས་པ་མིང་དེར་ཐོགས་ཤིང་དར་རོ། །

གསང་ཕུ་ཆོས་གྲྭ།

༈ གསང་ཕུ་ཞེས་པ་བོད་ཀྱི་རྡོ་རྗེ་གདན་ལྟ་བུའི་ཆོས་གྲྭ་ཆེན་པོ་འདི་ནི། སྔར་ཇོ་བོ་:སྣེ༼སྙེ༽ཐང་དུ་བཞུགས་སྐབས། རྔོག་ལེགས་པའི་ཤེས་རབ་ལ། གསང་ཕུའི་ཕྱོགས་སུ་ཕྱག་མཛུབ་གཏད་དེ། ལུང་པ་ཡ་གིའི་ཕུ་ན་དུང་གཡས་འཁྱིལ་རང་བྱོན་དང་། ནམ་མཁར་གསེར་གྱི་འཁོར་ལོ་རྩིབས་སྟོང་དང་ལྡན་པ་འཁོར་བ་དང་། ཐུབ་དབང་དཔང་དུ་བྱམས་པ་འཇམ་དབྱངས་གཉིས་དྲང་ངེས་ཀྱི་ཆོས་ལ་བགྲོ་བ་མཛད་པར་སྣང་བས། དེར་ཁྱོད་ཀྱིས་གནས་གཞི་བྱས་ན་སངས་རྒྱས་ཀྱི་བསྟན་པ་རྒྱས་པར་འགྱུར་རོ་ཞེས་ལུང་བསྟན་པས། འོ་ན་རེ་ཞིག་གསང་བར་ཞུ་ཞུས་པས་གསང་ཕུར་གྲགས། མི་རིང་བར་ཉེར་སྤྱད་ནེའུ་ལེས་ཁྱེར་བ་དེར་བསྐྱལ་བས་གསང་ནེའུ་ལེ་ཐོག་ཞེས་པའི་བསྟན་པའི་འབྱུང་ཁུངས་ཀྱི་ཆོས་གྲྭ་ཆེན་པོ་དེ་བཏབ་བོ། །ཐོག་མར་འདུས་ཚོགས་ལྔ་ཙམ་ལས་ཕྱིས་གླིང་སྟོད་སྨད་གཉིས་སུ་གྱེས་ཏེ་གྲྭ་ཚང་བཅུ་གཅིག་གམ་བཅུ་གསུམ་དུ་འཚོགས་ཏེ། གླིང་སྟོད་རྔོག་ལེགས་པའི་ཤེས་རབ་ཀྱི་ཁྲི་དང་གྲྭ་ཚང་ཡང་སྦེལ་སེར། ཉི་ཐང་། དྭགས་པོ་གྲྭ་ཚང་། རྣམ་རྒྱལ་གསེར་ཁང་། གུ་སྤེ་བ་རྣམས། གླིང་སྨད་རྔོག་ལོའི་ཁྲི་དང་གྲྭ་ཚང་ཡང་། སྒྲོས་སྙིང་པ། གཞི་བ། ཉང་རོང་གྲྭ་ཚང་། གནས་སྒོ་བ་གསུམ། སྒྲོས་གསར་བ། ར་བ་སྟོད་སྨད་གཉིས་རྣམས་སོ། །གླིང་སྟོད་སྨད་གཉིས་དང་ར་བ་སྟོད་སྨད་སོ་སོར་གྱེས་པའང་བྱམས་པ་འཇམ་དབྱངས་གཉིས་རྩོད་པའི་རྟེན་འབྲེལ་ཡིན་པར་བརྗོད་དོ། །

དྭགས་པོ་གྲྭ་ཚང་།

༈ དྭགས་པོ་གྲྭ་ཚང་ནི། འཇམ་དབྱངས་བདུན་བརྒྱུད་ཀྱི་དྲུག་པ་ཆོས་རྗེ་བློ་གྲོས་བསྟན་པས་བཏབ། བླ་ཐོག་ལྔ་པས་རྗེ་དགེ་འདུན་རྒྱ་མཚོ་ལ་ཕུལ།

མངའ་རིས་གྲྭ་ཚང་།

༈ མངའ་རིས་གྲྭ་ཚང་ནི། རྗེ་དགེ་འདུན་རྒྱ་མཚོ་ལ། མངའ་རིས་ཆོས་རྒྱལ་གྱིས་རབ་བྱུང་ངང་པའི་ཁྱུ་འདྲ་བ་མང་པོ་བཏང་བ་རྒྱལ་དུ་གྲྭ་ཚང་བཙུགས་པས་མིང་དེར་ཐོགས།

འཕྱོངས་རྒྱས་རི་བོ་བདེ་ཆེན།

༈ འཕྱོངས་རྒྱས་རི་བོ་བདེ་ཆེན་ནི་མཁས་གྲུབ་དགེ་ལེགས་དཔལ་བཟང་གི་དངོས་སློབ་འགར་སྟོན་ཆོས་རྗེས་བཏབ།

ཉང་སྟོད་དཔལ་འཁོར་བདེ་ཆེན།

༈ ཉང་སྟོད་དཔལ་འཁོར་བདེ་ཆེན་ནི། ཆོས་རྒྱལ་རབ་བརྟན་ཀུན་བཟང་དང་མཁས་གྲུབ་ཆོས་རྗེ་དགེ་ལེགས་དཔལ་བཟང་མཆོད་ཡོན་གཉིས་ཀྱིས་བཏབ་པའོ། །

སྨྲ་བའི་སེང་གེ་རོང་སྟོན།

༈ སྨྲ་བའི་སེང་གེ་རོང་སྟོན་ནི། བྱང་ཆུབ་སེམས་དཔའི་སྨོན་ལམ་གྱི་མཐུ་ཅན་ཞིག་རྒྱལ་མོ་རོང་དུ་བོན་པོའི་རིགས་སུ་མེ་ལུག་ལ་འཁྲུངས། དབུས་གཙང་དུ་བྱོན། གསང་ཕུར་རྔོག་ལོ་ཆེན་པོར་ཆོས་ཉན་ནས་རིག་གནས་ལ་སྦྱངས། འཕན་ཡུལ་གྲོ་སར་དམར་སྟོན་ཆེན་པོ་ལས་སོ་སོར་ཐར་པའི་བསླབ་པ་ཡང་དག་པ་བླངས། སྡེ་སྣོད་མཐའ་དག་ལ་མཁས་པའི་དབང་ཐོབ་པར་གྱུར་ནས་ལ་སྟོད། ལྷོ་བྱང་། གཙང་སྟོད་སྨད། དབུ་གཡོར་གྱི་གནས་མང་པོར་ཆོས་དར་བར་མཛད་ནས་བློ་དང་ལྡན་པ་མང་པོ་ལ་ཇི་ལྟར་འོས་པའི་སྡེ་སྣོད་སོ་སོའི་བཤད་པ་མཛད། སློབ་མ་རྣམས་ལའང་རང་གི་ཡིད་ལ་ཇི་ལྟར་འཐད་པའི་གྲུབ་མཐའ་བཟུང་ཆོག་གསུངས། འཕྲལ་དུ་ཆོས་བཤད་པ་ལྟར་སྣང་ཡང་རྣལ་འབྱོར་ལ་རྒྱུན་ཏུ་གནས་པས་རླུང་ལྔའི་ཁོག་སོ་སོར་གཟིགས། ཤིང་མོ་ཡོས་ལོར་ན་ལེནྡྲའི་དགོན་གནས་བཏབ། ཨར་བྱང་ཆུབ་ཡེ་ཤེས་དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་འཕྲོ་ལ་གཤེགས་འདུག་པས་ང་ཡང་སློབ་མས་སྤུར་ཆོས་ཁྲིའི་ཁ་ནས་གདན་འདྲེན་པ་ཞིག་བྱེད་ཅེས་རྒྱུན་ལྡན་དུ་གསུང་བ་ལ། ང་ཁམས་པ་ཕོབ་ཕོབ་འདི་འདྲ་མི་བྱེད་པར་དགའ་ལྡན་དུ་ལྷའི་བུ་བདུད་རྩི་འཐུང་བ་ཞིག་བྱེད་གསུང་བ། སྤུར་ཆོས་ཁྲི་ཁ་ནས་གདན་འདྲེན་པ་མ་བྱུང་ཡང་། ཞི་བར་གཤེགས་པ་དང་ཆོས་འཕྲོ་བཅད་པའི་བར་ན་ཉིན་ཞག་གཉིས་ལས་མེད་པར་གཤེགས་ནས་དགའ་ལྡན་དུ་བཞུགས་པར་ངེས་སོ། །

ལོ་ཙཱ་བ་རོང་ཟོམ་ཆོས་བཟང་།

༈ ལོ་ཙཱ་བ་རོང་ཟོམ་ཆོས་བཟང་ནི། རུ་ལག་གཙང་སྨད་ཀྱི་སའི་ཆ་རོང་གི་སྣར་ལུང་པར་འཁྲུངས། སྐུ་གཞོན་ནུ་ནས་སྒྲ་ཚད་སོགས་ཤེས་བྱ་མཐའ་དག་ལ་མཁས་ཤིང་དངོས་སྟོབས་ཀྱི་རིགས་པས་གཞན་དག་ཚར་གཅོད་ནུས། ཁ་ཅིག་པཎྜི་ཏ་སྨྲྀ་ཏི་དང་། ཁ་ཅིག་པཎྜི་ཏ་ཕྲ་ལ་རིང་མོའི་སྐྱེ་བ་ཡིན་ཡང་ཟེར། ཕྱིས་ཇོ་བོ་དང་མཇལ་ཏེ་རྩོད་པ་མཛད་པས། ཇོ་བོས་རྩོད་པའི་འགྲམ་མ་ཐེག་ནས། ཁྱེད་རྒྱ་གར་གྱི་ཨཱ་ཱཙཱརྱ་ནག་པོ་ཞབས་ཀྱི་སྐྱེ་བར་འདུག་སྟེ་ཁོ་བོས་ཁྱེད་དང་ཆོས་ཀྱི་གཏམ་བྱ་བར་ག་ལ་ནུས་གསུངས། སྤྱི་མཐུན་དུ་འཇམ་དབྱངས་ཀྱི་སྤྲུལ་པར་གྲགས། དགུང་ལོ་བཅུ་གཅིག་པ་ལ་མཚན་ཉིད་གསན། བཅུ་གསུམ་པ་ཡན་ལ་གསན་པ་རྫོགས་ཏེ། བདག་ཐོས་པ་ཆུང་བ་ཡང་མ་ཡིན་ཏེ། ཆོས་ཐམས་ཅད་མ་ཐོས་པ་མེད། ཐོས་པ་ཆེ་བ་ཡང་མ་ཡིན་ཏེ་ཆོས་ཐམས་ཅད་ཚར་རེ་ལས་མ་ཐོས་གསུངས་ཏེ་དོན་ལ་མི་བརྗེད་པའི་གཟུངས་ཐོབ་པར་བཤད། པཎྜི་ཏ་མང་པོ་བསྟེན་ནས་དེ་དག་གི་ལོ་ཙཱ་བ་མཛད་དེ། རྡོ་རྗེ་འཇིགས་བྱེད་དང་། གཤིན་རྗེ་དགྲ་ནག་དང་། འཇམ་དཔལ་སྔགས་དོན་དང་། བདེ་མཆོག་རྩ་རྒྱུད་ལ་སོགས་པ་མང་དུ་བསྒྱུར། དགུང་ལོ་བཅུ་གཉིས་པའི་དུས་ཉང་སྨད་དུ་འགར་སྟོན་ཚུལ་ཁྲིམས་བཟང་པོ་ལ་སྔགས་རྙིང་མ་གསན་པའི་ནུབ་ཅིག་མནལ་ལམ་དུ། གསང་བ་སྙིང་པོས་ཟན་བྱས། སངས་རྒྱས་མཉམ་སྦྱོར་གྱི་ཚོད་མ་བྱས་གསོལ་བ་རྨིས་པ་སློབ་དཔོན་ལ་ཞུས་པས་ཤིན་ཏུ་བཟང་། ཆོས་ཁོང་དུ་ཆུད་པའི་རྟགས་ཡིན་འདུགདེ་གཉིས་ལ་འགྲེལ་པ་རེ་གྱིས་གསུངས་ཏེ་འགྲེལ་པ་རེ་ཡང་མཛད། བསླབ་པ་གསུམ་རྒྱུད་ལ་བསྟེན་པའི་ཆེད་དུ། ཚུལ་ཁྲིམས་ཀྱི་བསླབ་པའི་དམ་ཚིག་མདོ་རྒྱས། ཏིང་ངེ་འཛིན་གྱི་བསླབ་པའི་འགྲེལ་པ་ཚུལ་བཞི་ཡན་ལག་བཅོ་ལྔ། ཤེས་རབ་ཀྱི་བསླབ་པའི་ཆེད་དུ་རྫོགས་པ་ཆེན་པོའི་ལྟ་སྒོམ་གྱི་མན་ངག་རྣམས་མཛད། ཆེ་གཉན་གྱི་མི་ཀུན་མ་ཟད། བོད་ཀྱི་ལྷ་འདྲེ་ཐམས་ཅད་ཀྱིས་ཀྱང་ཆོས་ཞུ་ཞིང་ཅི་བགྱིའི་བཀའ་ནོད་ཅིང་འཕྲིན་ལས་སྒྲུབ། སློབ་དཔོན་པདྨ། བཻ་རོ་ཙ་ན། གཡུ་སྒྲ་སྙིང་པོ་སོགས་དང་། བི་མ་ལ་དང་། མྱང་ཏིང་འཛིན་བཟང་པོ། རྨ་གཉགས་ཁུ་ཁྱུང་སོགས་ཀྱི་གདམས་སྐོར་མ་ལུས་པ་ཐུགས་ལ་མངའ། ཨ་རོ་ཡེ་ཤེས་འབྱུང་གནས་ཀྱིས་གདམས་པའི་བདག་པོར་ཡང་གྱུར་། འདི་ལ་རྒྱ་གར་བདུན་རྒྱུད་དང་། རྒྱའི་ཧ་ཤང་བདུན་རྒྱུད་ཀྱི་གདམས་པ་ཡང་ཡོད་པར་གྲགས་ཏེ་མདོར་ན་རྒྱ་བོད་ཀུན་ཏུ་གྲགས་པའི་བསྟན་པའི་བདག་པོར་གྱུར་པ་ཡིན་ནོ། །འདི་ལ་སྲས་བརྒྱུད་དང་སློབ་བརྒྱུད་གཉིས་ལས། སྲས་བརྒྱུད་ནི་གཟི་བརྗིད་འབར་དང་འབུམ་འབར་གཉིས་ལས་མཆེད་པའི་གདུང་རབས་མང་ཙམ་བྱུང་ཡང་དེང་སང་གདུང་བརྒྱུད་ཆད་པར་སྣང་ངོ་། །སློབ་བརྒྱུད་ནི། སྤྱིར་དམ་པ་འདི་ལ་དེ་དུས་ཀྱི་མཁས་གྲུབ་ཐམས་ཅད་ཀྱིས་ཞབས་ལ་གཏུགས་པས་བསམ་གྱིས་མི་ཁྱབ་ཅིང་། ཁྱད་པར་དུ་འཕགས་པ་གོ་རུབ་ལོ་ཙཱ་བ། མར་པ་དོ་པ། རྗེ་འགོས་ལ་སོགས་པ་ལོ་ཙཱ་བ་བཅུ་བདུན། གཡག་རྡོ་རྗེ་འཛིན་པ་ལ་སོགས་པ་གྲུབ་ཐོབ་ཆེན་པོ་སུམ་ཅུ་རྩ་ལྔ། མ་ཅིག་ཞ་མའི་མིང་པོ་རྗེ་འཁོན་བུ་ལ་སོགས་པ་སྒོམ་ཆེན་གྲུབ་པ་ཐོབ་པ་བརྒྱ་དང་བརྒྱད་ཅུ། ཡོལ་དགེ་བསྙེན་རྡོ་རྗེ་དབང་ཕྱུག་དང་། ཡང་ཁྱེད་བླ་མ་སོགས་སྟོན་པ་གདུགས་ཐོབ་པ་ལྔ་བརྒྱ་ལ་སོགས་པ་བྱུང་བ་ཡིན་ནོ། །

ཀོ་བྲག་པ་བསོད་ནམས་རྒྱལ་མཚན།

༈ ཀོ་བྲག་པ་བསོད་ནམས་རྒྱལ་མཚན་ཞེས་ཡོངས་སུ་གྲགས་པ་དེ་ནི། ཡུལ་དིང་རི། གདུང་རུས་ནི་ལྡོང་། ཡབ་གཙོ་རྒྱལ་དང་ཡུམ་སྟོང་མོ་རྗེ་མ་གཉིས་ཀྱིས་སྲས་སུ་ཆུ་ཕོ་སྟག་ལ་འཁྲུངས། ས་སྐྱ་པཎྜི་ཏ་དང་འཁྲུངས་ལོ་གཅིགབླ་མ་རྡོ་རྗེ་དཔལ་བ་ལ་རིག་འཛིན་བཅུ་དང་རྫོགས་ཆེན་དམར་ཁྲིད་ལ་སོགས་ཆོས་མང་དུ་གསན། གྱང་རིམ་དང་ཀོང་མོའི་རི་ལ་མཚམས་མཛད་པས་ཕྱག་ཆེན་གྱི་རྟོགས་པ་འཁྲུངས། ཆོས་རྗེ་ཀོ་པ་ལར་བསྙེན་རྫོགས་ཆིག་རྫོགས་མཛད། མཚན་བསོད་ནམས་རྒྱལ་མཚན་དུ་གསོལ། ཕྱིས་ཉང་སྟོད་ཀོ་བྲག་གི་དགོན་པ་བཏབ་པས་ས་སྐམ་པོར་ཆུ་མིག་རྡོལ། ཀོ་བྲག་པ་ཞེས་གྲགས། སྒྲུབ་པ་པོ་དང་མཁས་གྲུབ་ཆེ་དགུ་ཐམས་ཅད་ཀྱིས་ཞབས་ལ་གཏུགས། ཆོས་ལའང་འདི་མི་མཁྱེན་བྱ་བ་མེད། འགྲོ་དོན་རྒྱ་ཆེར་མཛད་ནས་དགུང་ལོ་བརྒྱད་ཅུ་པ་ལྕགས་མོ་བྱའི་ལོ་ལ་ཞི་བར་གཤེགས། སློབ་མ་ཡང་དཔལ་ཡང་དགོན་པ། དེའི་གཅེན་པོ་རིན་ཆེན་རྒྱལ་མཚན་པ། རིན་པོ་ཆེ་ལྷ་པ། རིན་པོ་ཆེ་རྒྱལ་པོ། མཆིམས་ནམ་མཁའ་གྲགས་ལ་སོགས་པ་བསྟན་པའི་བདག་པོ་མང་པོ་དང་། དཔྱལ་ལོ། ཁྲོ་ཕུ་ལོ་ཙཱ་བ། ཆག་ལོ། ནམ་མཁའ་དཔལ་ལོ། རས་པ་ལོ་ཙཱ་བ། གཉལ་ལོ་ལ་སོགས་པའི་ལོ་ཙཱ་བ་མང་པོ་དང་། དགེ་བཤེས་གཙང་པ། དགེ་བཤེས་ཉི་མ། མངའ་རིས་དགྲ་བཅོམ། མཁས་བཙུན་བྱང་ཆུབ་ལ་སོགས་པའི་མཁས་པ་མང་པོ་དང་། མྱང་འཚལ་པ། ལྷ་རྗེ་སྐྱོབ་པ་བ་སོ་ཟུར། གཉིས་སྟོན་ཞིག་པོ། ཤམ་འབུམ། ཆུ་མིག་པ། དར་སེང་ལ་སོགས་པའི་དགོན་སྡེའི་བདག་པོ་སོགས་སློབ་མ་བསམ་ཡས་པར་བྱུང་བར་གྲགས་སོ། །

ནི་གུ་མ་ལས་བྱུང་བའི་ཆོས་དྲུག་གི་རིམ་པ།

༈ ན་རོ་པའི་ལྕམ་མོ་ནི་གུ་མ་ལས་བྱུང་བའི་ཆོས་དྲུག་གི་རིམ་པ་ནི། ལུགས་དེའི་ལེན་པ་པོ་ནི་མཁས་གྲུབ་ཁྱུང་པོ་རྣལ་འབྱོར་ཏེ། དེ་གདུང་རུས་ཁྱུང་པོ། ཡབ་སྟག་སྐྱེས་དང་ཡུམ་བཀྲ་ཤིས་སྐྱིད་གཉིས་ཀྱི་སྲས་སུ་སྙེེ་མོ་ར་མངས་སུ་འཁྲུངས། བཙས་མ་ཐག་ཏུ་རྒྱ་གར་གྱི་གྲུབ་ཐོབ་ཨ་མོ་གྷ་བྱོན་ནས་ལུང་ལེགས་པར་བསྟན། བླ་མ་འབྱུང་གནས་སེང་གེ་ལ་རྫོགས་ཆེན་སེམས་སྡེའི་སྐོར་ཞུས་ནས་བཤད་པས་སློབ་མ་བདུན་བརྒྱ་ཙམ་བྱུང་། རྒྱ་གར་དུ་ལན་གཉིས་ཙམ་བྱོན་ནས་རྡོ་རྗེ་གདན་པ་དང་མེ་ཏྲི་པ་ལ་སོགས་ལ་ཆོས་མང་དུ་གསན། དེར་རྡོ་རྗེ་འཆང་དངོས་ལ་ཐུག་པ་སུ་ཡོད་དྲིས་པས། ན་རོ་པའི་ལྕམ་མོ་ནི་གུ་མ་ཞེས་བྱ་བ་ཡོད་དེ། དེ་དག་པའི་ས་ན་སྐུ་འཇའ་ལུས་སུ་གྱུར་པས་སུ་རུང་རུང་གིས་མི་མཐོང་། སོ་ས་གླིང་གི་དུར་ཁྲོད་དུ་མཁའ་འགྲོ་མའི་ཚོགས་དཔོན་ལ་འབྱོན་པས་ལས་དག་ན་དེར་མཐོང་སྲིད་ཟེར། དེར་ཕྱིན་ཏེ་ན་མོ་བུདྡྷ་ཡའི་གསོལ་བ་བཏབ་པས། ཏཱ་ལ་བདུན་སྲིད་ཙམ་གྱི་ནམ་མཁའ་ལ་སྐུ་མདོག་སྨུག་ནག་རུས་པས་བརྒྱན་པ་ཕྱག་ན་ཁ་ཊཾ་དང་ཐོད་པ་བསྣམས་པ་གར་བསྒྱུར་བ་ཞིག་མཐོང་ནས། ནི་གུ་མ་ཡིན་པར་ངེས་ནས་ཕྱག་དང་བསྐོར་བ་བྱས། ཡང་དག་པའི་གདམས་པ་ཞུ་འཚལ་ཞུས་པས། ང་ནི་ཤ་ཟ་ཌཀྐི་ཡིན་གསུངས། ཡང་བཏུད་དེ་ཞུས་པས། གསང་སྔགས་ཀྱི་གདམས་པ་དགོས་ན་གསེར་དགོས་གསུང་། གསེར་སྲང་བརྒྱ་ཡོད་པ་དེ་ཕུལ་བས་ཕྱག་ཏུ་བཞེས་ནས་ནགས་སུ་གཏོར་སོང་བས། ཤ་ཟ་མཁའ་འགྲོ་མ་རང་ཡིན་ནམ་ཐེ་ཚོམ་དུ་གྱུར་པ་ན། སྤྱན་ནམ་མཁའ་ལ་གཟིགས་པས་མཁའ་འགྲོའི་ཚོགས་མང་པོ་འདུས་ནས་དཀྱིལ་འཁོར་སྤྲུལ། དེར་སྒྱུ་ལུས་རྨི་ལམ་གྱི་དབང་བསྐུར་ནས། མཁའ་འགྲོ་མས་དཔག་ཚད་གསུམ་དུ་ཁྱེར་ནས་གསེར་གྱི་རིའི་ཁར་བཞགདེར་རྨི་ལམ་དུ་རྡོ་རྗེ་བཙུན་མོས་ཆོས་དྲུག་ཚར་གཅིགདངོས་སུ་ཚར་གསུམ་རྡོ་རྗེ་ཚིག་རྐང་སྒྱུ་མ་ལམ་རིམ་གནང་། གཞན་ཡང་རྒྱུད་དང་སྒྲུབ་ཐབས་ཤིན་ཏུ་མང་པོ་གསུངས་ནས། ཆོས་དྲུག་གི་གདམས་པ་འདི་རྣམས་ཤེས་པ་ང་དང་ལྭ་བ་པ་མ་གཏོགས་མེད། བརྒྱུད་པ་བདུན་གྱི་བར་དུ་ཆིག་བརྒྱུད་གྱིས། དེ་རྣམས་ངས་བྱིན་གྱིས་རློབ་ཅིང་ལུང་ཡང་སྟོན་པ་ཡིན་གསུངས། དེ་ནས་སླར་བོད་དུ་བྱོན་པའི་མངའ་རིས་སུ་ཇོ་བོ་དང་མཇལ། གསང་འདུས་ལ་སོགས་ཆོས་མང་དུ་གསན་གླང་རི་ཐང་པ་ལ་བསྙེན་རྫོགས་ཞུས། འཕན་ཡུལ་འཇོག་པོར་འཆད་ཉན་དགོན་བཏབ། འཇོག་པོ་ནས་གདན་འདྲེན་བྱུང་བས་ཤངས་སུ་བྱོན་ལོ་གསུམ་གྱི་ནང་དུ་ཞོང་ཞོང་ལ་སོགས་དགོན་གནས་བརྒྱ་རྩ་བརྒྱད་བཏབ། འདིས་དགུང་ལོ་བརྒྱ་དང་ལྔ་བཅུ་བཞུགས་པར་གྲགས། སློབ་མའི་གཙོ་བོ་ནི། རྨེའུ་སྟོན་པ། གཡོར་པོ་རྒྱ་མོ་ཆེ། རྡུལ་སྟོན་རིན་དབང་། ལ་སྟོད་དཀོན་མཆོག་མཁར། རྨོག་ལྕོག་པ། ཞང་སྒོམ་ཆོས་སེང་རྣམས་ཡིན།

བརྒྱུད་པ་བཞི་པ་རྨོག་ལྕོག་པ་སོགས།

༈ བརྒྱུད་པ་བཞི་པ་རྨོག་ལྕོག་པ་ནི། ལྷ་བུ་སྤང་རྩར་འཁྲུངས། ལོ་བཅུ་བདུན་ལ་ཞོང་ཞོང་དུ་ཆོས་སྒོར་ཞུགས། བླ་མ་ཤངས་པས་སྨིན་པར་མཛད། བརྒྱུད་འཛིན་ལྔ་པ་རྨོག་ལྕོག་པའི་གསུང་གི་སྲས་གྲུབ་ཐོབ་སྐྱེར་སྒང་པ་དྷརྨ་སེང་གེ་ཡིན། བརྒྱུད་པ་དྲུག་པ་སངས་རྒྱས་གཉག་སྟོན་ཆོས་ཀྱི་ཤེས་རབ་ཅེས་བྱ་བ་སྐྱེར་སྒང་པའི་ཐུགས་ཀྱི་སྲས་སུ་འཁྲུངས་པ་དེ་ཡིན། བརྒྱུད་པ་བདུན་པ་སངས་རྒྱས་སྟོན་པ་སངས་རྒྱས་གཉག་སྟོན་གྱི་རྒྱལ་ཚབ་ཏུ་གྱུར་པ་དེ་ཡིན། དེའི་སློབ་མ་མཁས་གྲུབ་ཤངས་སྟོན། དེའི་སློབ་མ་འཇོག་པ་རྒྱལ་མཚན་འབུམ། དེའི་སློབ་མ་གྲུབ་ཐོབ་ཆོས་འབྱུང་རིན་ཆེན་ལ་སོགས་པ་རྣམས་ཀྱིས་ཤངས་པའི་ཆོས་རྣམས་དར་བར་མཛད་པ་ཡིན་ནོ། །

སྒྲ་སྒྱུར་མར་པ་ལོ་ཙཱ།

༈ སྒྲ་སྒྱུར་མར་པ་ལོ་ཙཱ་ནི། ཡུལ་ལྷོ་ཕུ་ཆུ་ཁྱེར། ཡབ་མར་པ་དབང་ཕྱུགཡུམ་རྒྱལ་མོ་འོད་ཟེར་གཉིས་ཀྱི་སྲས་སུ་ཆུ་ཕོ་བྱི་བ་ལ་འཁྲུངས། རྒྱ་གར་དུ་ལན་ལྔ་བྱོན་པའི་དང་པོ་ནཱ་རོ་པའི་དྲུང་དུ་སྒྲོན་གསལ་མ་ཧཱ་ཡཱ་ན་ཀྱེ་རྡོར་སོགས་ཀྱི་དབང་རྒྱུད་སྒྲུབ་ཐབས་རྫོགས་རིམ་དང་བཅས་པ་གསན། དེ་ནས་བོད་དུ་འགྲོ་དོན་བསྐྱངས་སྐབས། ནཱ་རོ་པ་སྤྱོད་པ་ལ་གཤེགས་ཁར་སློབ་མ་རྣམས་ལ་རྟེན་གནས་སོ་སོར་གནང་ནས་མར་པའི་སྐལ་བ་ཡིན་ཟེར་བ་ཞིག་བཞག་ནས་གནང་ཞེས་ཐོས་ཏེ། སླར་ཡང་རྒྱ་གར་ལ་གཤེགས་ཏེ་ནཱ་རོ་པ་བཙལ་བས། ནམ་ཞིག་ན་ནགས་གསེབ་ཅིག་ཏུ་མཇལ། གསེར་རྣམས་ཕུལ་བས་ཐམས་ཅད་གཏོར། ཅུང་ཟད་ཡིད་མ་ཆེས་པ་ན། ཞབས་ཀྱི་མཐེ་བོང་ས་ལ་རེག་ཙམ་མཛད་པས་གསེར་དུ་སོང་། ཞལ་ནས་ཀྱང་ཐམས་ཅད་གསེར་གླིང་ཡིན་ནོ་གསུངས། དེ་ནས་མི་སྣང་བར་གྱུར། དེ་ནས་བོད་དུ་ཕེབས་དགུང་ལོ་བཞི་བཅུ་ལོན་ཚེ། བདག་མེད་མ་ཡང་བཙུན་མོར་བླངས། ཡང་མེ་ཏྲི་པའི་བསྔགས་པ་གསན་པས་རྒྱ་གར་དུ་བྱོན། རྒྱ་གར་ཤར་ཕྱོགས་སུ་མེ་ཏྲི་པ་དང་མཇལ། རྒྱུད་ཀྱི་གསན་པ་མང་པོ་མཛད། ཕྱག་ཆེན་མན་ངག་གི་རྟོགས་པ་མངོན་སུམ་དུ་འཁྲུངས་ཏེ། རྗེ་མངའ་བདག་ཆེན་པོའི་བཀའ་དྲིན་གྱིས། །གཞི་ཆོས་ཉིད་སྐྱེ་བ་མེད་པར་རྟོགས། །སེམས་སྟོང་པ་ཉིད་ལ་སྦར་ཟིན་བྱས། །མི་ཁོ་བོའི་སྤྲོས་པ་དེ་ནས་ཆོད། །ཅེས་མགུར་གསུངས་ནས་བོད་དུ་ཕེབས། དེ་རྗེས་སུའང་ལན་གཉིས་བྱོན་ནས་པཎྜི་ཏ་རྣམས་དང་གྲུབ་ཐོབ་དུ་མ་ལ་མན་ངག་མང་དུ་མནོས་པར་མཛད་དེ་བོད་དུ་ཕེབས་ནས་ཆོས་ཀྱི་ཕྲིན་ལས་བསྐྱངས་མཐར་དགུང་ལོ་བརྒྱད་ཅུ་རྩ་དྲུག་པ་མེ་མོ་གླང་གི་ལོ་གཤེགས་སོ། །སློབ་མ་ཡང་བསམ་གྱིས་མི་ཁྱབ་པ་བྱུང་བའི་ནང་ནས། རྔོག་ཆོས་སྐུ་རྡོ་རྗེ། འཚུར་དབང་ངེ་། མེས་སྟོན་བསོད་ནམས་རྒྱལ་མཚན། རྗེ་བཙུན་མི་ལ་རས་པ་རྣམས་ལ་ཀ་བ་བཞི་ཟེར། རྔོག་འཚུར་མེས་གསུམ་གྱིས་བཤད་པའི་བཀའ་བཟུང་སྟེ།

རྔོག་ཆོས་རྡོར།

༈ དེ་ལ་རྔོག་ཆོས་རྡོར་མེ་ཕོ་ཁྱི་ལ་འཁྲུངས་ནས་ཆུ་ཕོ་རྟའི་བར་ཆོས་ཀྱི་འཕྲིན་ལས་བསྐྱངས་ནས་དགུང་ལོ་དྲུག་ཅུ་རྩ་བདུན་ལ་གཤེགས།

འཚུར་དབང་ངེ།

༈ འཚུར་དབང་ངེ་ནི། དོལ་མདའ་ན་འཚེར་དང་འཚུར་ཞེས་པའི་རིགས་གཉིས་ལས་འཚུར་གྱི་རིགས་སུ་འཁྲུངས། མཚན་འཚུར་དབང་གི་རྡོ་རྗེ་ཞེས་གྲགས། ཕྱིས་དོལ་མདར་མར་པ་སྤྱན་དྲངས་ནས་རྗེ་མར་པར་ཡེ་ཤེས་ཞབས་ལུགས་ཀྱི་ཛ་ཡན་དང་། ཐ་ག་ན་དང་། སྙིམ་པའི་མེ་ཏོག་དང་བཅས་པའི་བཤད་སྲོལ་གསུམ་ཡོད་པ་དེ་རྣམས་རྒྱུད་དོན་མན་ངག་ཏུ་བསྒྲིལ་ནས་སྣང་བས་ཆོས་ཀྱི་ཕྲིན་ལས་རྒྱ་ཆེར་བསྐྱངས་སོ། །

མེས་སྟོན་བསོད་ནམས་རྒྱལ་མཚན།

༈ མེས་སྟོན་བསོད་ནམས་རྒྱལ་མཚན་ནི། ཞི་བ་ལྷའི་རྣམ་སྤྲུལ་ཏེ། སྤྱོད་འཇུག་ལས། དཔག་བསམ་ཤིང་གི་སྐྱེད་མོས་ཚལ། །སངས་རྒྱས་དང་ནི་སངས་རྒྱས་སྲས། །ཆོས་སྙན་སྒྲོག་པས་གང་བ་ཡི། །ཕྱོགས་དེར་བདག་ནི་འབྱུང་བར་ཤོག། ཅེས་འབྲས་ཡུལ་སྐྱེད་མོས་ཚལ་ཏུ་གནས་གཞི་བཏབ་ནས་བསྟན་པ་སྤེལ་བར་སྨོན་ལམ་གྱི་མཐུ་གྲུབ་པ་སྟེ། དེ་ཡང་མར་པའི་དྲུང་དུ་སྒྲུབ་བརྒྱུད་ཀྱི་བསྟན་པའི་ཉམས་ལེན་གཙོ་བོར་བསྟན་ནས་མཁས་ཉན་མཛད་པས་རྗེ་མར་པས་རྫོང་དཀར་སྐྱེད་མོས་ཚལ་གྱི་སའི་དཔྱད་ཀྱི་ཡོན་ཏན་རྣམས་བཤད་ནས་གནས་དེ་འཚོལ་ལ་བཤད་སྒྲུབ་ཀྱི་བསྟན་པ་སྐྱོངས་ཞེས་ལུང་བསྟན་ཀྱང་ཅུང་ཟད་རྟེན་འབྲེལ་མ་འགྲིགས་པས་རིན་སྤུངས་ཀྱི་ཐད་ཀྱི་ས་དེར་ངོས་བཟུང་སྟེ་གནས་གཞི་དེར་བཏབ། བརྟག་གཉིས་ཀྱི་བཤད་པ་གཙོ་བོར་བཟུང་ནས་བཤད་སྒྲུབ་ཀྱི་ཕྲིན་ལས་བསྐྱངས་སྐབས་ནུབ་ཅིག་མར་པ་བྱོན་ནས་སྔར་ལུང་བསྟན་པའི་གནས་དེ་འདི་མ་ཡིན་སྐྱེ་བ་ཕྱི་མ་འགྲུབ་པའི་སྨོན་ལམ་ཐོབ་གསུངས་པ་ལྟར། སྐྱེ་བ་ཕྱི་མ་སྣར་རྡོ་དཔེར་འཁྲུངས་ནས་རོང་བྱམས་ཆེན་དུ་རབ་ཏུ་བྱུང་། རིགས་སད་པས་སྔོན་གྱི་མཛད་སྤྱོད་དྲན་པས་སྐུ་ཚེ་སྔོན་མར་ལུང་བསྟན་པའི་གནས་བཙལ་བས་འདི་ཡིན་དགོངས། ཁ་རག་བུམ་སྒྲུབ་ཀྱི་དགོན་གནས་བཏབ་ནས་འཆད་ཉན་བསྐྱངས་སྐབས་ནུབ་ཅིག་མར་པ་བྱོན་ནས་འདི་ནས་ཡར་རོང་ཆུང་དུ་སོང་ཞེས་པའི་ལུང་བསྟན་གྱིས་བསྐུལ་བ་ལྟར་རོང་ཆུང་བརྒྱུད་དེ་བྱོན་པས་རྒྱུན་ལྡན་མཚན་བརྗོད་ལ་ཞལ་འདོན་མཛད་པར་སྐྱེད་ཚལ་གྱི་སའི་ཐད་དེར་ཕེབས་སྐབས་ཆོས་ཀྱི་རྒྱལ་མཚན་ལེགས་པར་འཛུགས། ཞེས་པའི་ཚིག་མཚམས་སུ་ཅུང་ཟད་སྐུ་ངལ་བརྟེན་པ་དེར་བརྟགས་པས་སྔར་བླ་མས་ལུང་བསྟན་པའི་གནས་ཀྱི་མཚན་ཉིད་ཀྱང་ཚང་འདུག་པས་འདི་རང་ཡིན་པར་ངེས་ཤེས་སྐྱེས་ཏེ་འབྲས་ཡུལ་རྫོང་མཁར་སྐྱེད་མོས་ཚལ་གྱི་བཤད་གྲྭ་བཏབ། སྡེ་སྲིད་རིན་སྤུངས་པས་དབུའི་མཆོད་གནས་སུ་བཀུར་ནས་དུས་བཞི་ཁེབས་པའི་ཆོས་གཞིས་ཀྱི་ས་རིས་རྒྱ་ཆེར་སྩལ། ཆོས་ཀྱི་ཕྲིན་ལས་བསྐྱངས་པས་ཀུན་མཁྱེན་སངས་རྒྱས་འཕེལ་ཞེས་སྙན་པའི་གྲགས་པས་ཁྱབ་སྟེ། དང་པོར་ཟབ་གསལ་མཉམ་མེད་ཞི་བ་ལྷ། །བར་དུ་སྒྲུབ་བརྒྱུད་གཙུག་རྒྱན་མེས་སྟོན་འཚུར། །ཐ་མར་སྤངས་རྟོགས་མཐར་ཕྱིན་སངས་རྒྱས་འཕེལ། །ཞེས་བཤད། སློབ་མ་ཡང་གདན་སའི་བཀའ་བབས་པ་འཇམ་དབྱངས་ཀུན་དགའ་ཆོས་བཟང་། ཀུན་མཁྱེན་གོ་བོ་རབ་འབྱམས། བྱ་རྒོད་གཤོངས་ཀྱི་གནས་གཞི་འདེབས་པ་པོ་འབུམ་ཕྲག་གསུམ་པ་སོགས་མཐའ་ཡས་བྱུང་ངོ་། །

རྗེ་བཙུན་མི་ལ་རས་པ།

༈ རྗེ་བཙུན་མི་ལ་རས་པས་ནི་སྒྲུབ་བརྒྱུད་ཀྱི་བསྟན་པའི་བཀའ་གཙོ་བོར་བཟུང་བ་སྟེ། དེ་ནི་ཡབ་མི་ལ་ཤེས་རབ་རྒྱལ་མཚན་དང་། ཡུམ་མྱང་བཟའ་དཀར་རྒྱན་གཉིས་ཀྱི་སྲས་སུ་ལྕགས་ཕོ་འབྲུག་གི་ལོ་ལ་སྐུ་བལྟམས། མཚན་ཐོས་པ་དགའ་ཞེས་བཏགས། དང་པོ་ལྷ་རྗེ་གནུབས་ཆུང་ལ་དྲག་སྔགས་གཟའ་གདོང་དམར་ནག་དང་སྒྱུ་འཕྲུལ་སོགས་གསན། ལོ་སུམ་ཅུ་རྩ་བརྒྱད་ལོན་པ་ན་རྗེ་མར་པའི་དྲུང་དུ་བྱོན་གདམས་པ་གནང་དགོས་པའི་ཞུ་བ་ཕུལ་བས། ལོ་དྲུག་ཏུ་ཕྲུ་རློག་པ་དང་མཁར་ལས་མང་པོ་དང་རྡོ་བསྐྱལ་བ་སོགས་སྒལ་པ་རྣག་ཁྲག་ཏུ་སོང་སོང་འབུངས། དེ་ནས་སྙན་བརྒྱུད་ཀྱི་གདམས་ངག་རྫོགས་པར་གནང་ཁྱོན་ལོ་བཞི་བཅུ་རྩ་བཞིའི་བར་དུ་བཞུགས། ཞེ་ལྔ་ནས་སྒྲུབ་པ་ལ་རྩེ་གཅིག་ཏུ་ལོ་བཞི་བཅུའི་བར་མཉམ་བཞག་མཛད་པས་ཉམས་རྟོགས་མཐར་ཕྱིན་ནས་དགུང་ལོ་བརྒྱད་བཅུ་རྩ་བཞི་ལ་ཞི་བའི་དབྱིངས་སུ་གཤེགས་སོ། །རྗེ་བཙུན་དེ་ལ་བུ་སློབ་བསམ་གྱིས་མི་ཁྱབ་པ་ཡོད་ཀྱང་མཆོག་གསུམ་སྟེ། མིའི་འགྲོ་བ་འདུལ་བའི་མཆོག་རྗེ་སྒམ་པོ་པ། མི་མ་ཡིན་འདུལ་བའི་མཆོག་བཀྲ་ཤིས་ཚེ་རིང་མ། ཌཱ་ཀི་མ་རྣམས་འདུལ་བའི་མཆོག་སྔགས་སྐྱེས་ལྷན་ཅིག་སྐྱེས་པའི་སྒྲོལ་མ་རྣམས་སོ། །

རྗེ་སྒམ་པོ་པ།

༈ དེ་ལ་རྗེ་སྒམ་པོ་པ་ནི། སྔོན་རྒྱལ་པོའི་ཁབ་ཀྱི་གྲོང་ཁྱེར་དུ་ཁྱིམ་བདག་ཕྱུག་ཅིང་རིགས་མཐོ་༼བའི་༽སྲས་སུ་ཟླ་འོད་གཞོན་ནུར་གྱུར་པའི་ཚེ། བྱ་རྒོད་ཕུང་རིར་བྱོན་ཏེ་ཐུབ་པའི་དབང་པོར་མདོ་ཏིང་འཛིན་རྒྱལ་པོ་ཞུ་བར་གསོལ་བས། ཞལ་གྱིས་བཞེས་པར་རང་གི་ཁྱིམ་དུ་སྟོན་པ་འཁོར་བཅས་སྤྱན་དྲངས་ནས་ལེགས་པར་བསྙེན་བཀུར། སྟོན་པས་ཀྱང་ཁྱོད་ཀྱིས་སྙིགས་མའི་དུས་སུ་མདོ་སྡེ་འདི་ཟུངས་ཤིག་ཅེས་བཀའ་སྩལ། དེ་བཞིན་དུ་བགྱིད་ལགས་སོ་ཞེས་ཞལ་གྱིས་བཞེས་པའི་ཚེ་སྟོན་པས་ཀྱང་ཁྱོད་མདོ་སྡེ་འདི་འཛིན་པའི་ཚེ་ང་ཉིད་ཀྱིས་གྲོགས་བྱེད་དོ་ཞེས་བཀའ་སྩལ་བའི་བྱང་ཆུབ་སེམས་དཔའ་ཟླ་འོད་གཞོན་ནུ་དེ་རྗེ་སྒམ་པོ་དང་། གྲོགས་མཛད་པར་ཞལ་གྱིས་བཞེས་པའི་ཐུབ་པ་ནི་ཕག་མོ་གྲུ་པ་ཡིན་པར་བཤད་དོ། །རྗེ་དེ་ཉིད་ནི་ཡུལ་བུང་རྙིར། ཡབ་རྙི་བ་རྒྱལ་པོ་དང་ཡུམ་ཤོ་མོ་བཟའ་གཉིས་ཀྱི་སྲས་སུ་ས་མོ་ལུག་གི་ལོ་ལ་སྐུ་བལྟམས། གཞོན་ནུའི་དུས་སྨན་བསླབས་ཤིང་། ཉི་ཤུ་རྩ་དྲུག་པ་ལ་དགེ་བཤེས་ཤན་པ་གླིང་པ་ལ་ཆིག་རྫོགས་མཛད། དེ་ནས་རྗེ་བཙུན་མི་ལའི་སྙན་པ་གསན་པས་དེ་རྩད་བཅད་པས་སྙེ་ནམ་གྱི་རི་ལ་བཞུགས་པ་ཐོས། དེར་བྱོན་པས་མདུན་དུ་ཆང་ཀ་པཱ་ལ་གང་འདུག་པ་གནང་བྱུང་བས། དགེ་སློང་ཡིན་པས་བཏུང་དུ་མི་རུང་སྙམ་བྱུང་བ་ན། བླ་མས་མཁྱེན་ཏེ། ནན་གྱིས་བཀའ་སྩལ་བྱུང་བས། ལྷག་མ་མ་ལུས་པར་གསོལ་བས། ཁྱོད་ཀྱི་མིང་ཅི་ཡིན་གསུང་བསོད་ནམས་རིན་ཆེན་བྱ་བ་ལགས་ཞུས་པས། བསོད་ནམས་བསོད་ནམས་བྱ་བ་ལན་གསུམ་གསུངས་ནས། བསོད་ནམས་ཚོགས་གཉིས་བསགས་ལས་བྱུང་། །སེམས་ཅན་ཀུན་གྱི་རིན་པོ་ཆེ། །ཞེས་པའི་མགུར་ཡང་གསུངས། དེ་ནས་གདམས་པ་ཟབ་མོ་ཞིག་ཞུ་ཞུས་པས། ཁྱོད་ཀྱིས་དབང་ཐོབ་བམ་གསུངས། མར་ཡུལ་བློ་ལྡན་ལ་རིན་ཆེན་རྒྱན་དྲུག་དང་བདེ་མཆོག་ལ་སོགས་པའི་དབང་མང་པོ་ཐོབ། དབུ་རུ་བྱང་ཕྱོགས་སུ་བཀའ་གདམས་ཀྱི་གདམས་པ་ཡང་མང་དུ་ཉན། ཞག་བཅུ་གསུམ་དུ་མི་འཆོར་བའི་ཏིང་ངེ་འཛིན་ཞིག་ཀྱང་ཡོད་ཞུས་པས། ཧ་ཧ་ཞེས་བཞད་མོ་ཆེན་པོ་ཞིག་མཛད། དེ་འདྲ་བའི་ཏིང་ངེ་འཛིན་ལས་གཟུགས་དང་གཟུགས་མེད་པའི་ལྷ་ལ་བསྐལ་པའི་བར་དུ་མི་འཆོར་བའི་ཏིང་ངེ་འཛིན་ཡོད་དེ་འཚང་རྒྱ་བ་ལ་མི་ཕན། བྱེ་མ་བཙིར་བས་མར་ཁུ་མི་ཡོང་བ་འདྲ། བཀའ་གདམས་པ་ལ་གདམས་ངག་ཡོད་དེ་མན་ངག་མེད། བོད་ཀྱི་སྙིང་ལ་འདྲེ་ཞུགས་པས། ཇོ་བོ་རྗེ་གསང་སྔགས་འཆད་ཏུ་མ་བཅུགདེ་བཅུག་ན་ད་ལྟ་བོད་གྲུབ་ཐོབ་ཀྱིས་གང་བ་འོང་བ་ཡིན། བཀའ་གདམས་པ་ལ་བསྐྱེད་རིམ་ལྷ་ཕོ་རིང་པོ་རེ་དང་རྫོགས་རིམ་སྣོད་བཅུད་འོད་གསལ་དུ་སྡུད་པ་རེ་ལས་མེད། ད་ཁྱོད་ངའི་གཏུམ་མོ་ཨ་ཐུང་སྒོམས་དང་གསུངས་གདམས་པ་རྣམས་གནང་སྟེ། བསྒོམས་པས་རྟགས་མཐའ་ཡས་པ་རིམ་པར་བྱུང་བ་བླ་མ་ལ་ཞུས་པས། ཐམས་ཅད་ལ་ལུས་ཀྱི་གནས་འདིར་རླུང་དང་ཁམས་ཟིན་པའི་རྟགས་ཡིན། སྐྱོན་ཡང་མིན་ཡོན་ཏན་ཡང་མ་ཡིན་ད་དུང་སྒོམས་ཤིག་སུངས། དེ་ལྟར་ཞབས་དྲུང་དུ་ཟླ་བ་བཅུ་གསུམ་བར་བསྡད་དེ་ཉམས་རྟོགས་ཁྱད་པར་ཅན་འཁྲུངས། ད་དབུས་པ་སྟོན་པ་རང་དབུས་སུ་བཞུད་གསུངས། ཁྱོད་དུག་གསུམ་རྒྱས་པའི་མི་དང་མ་འགྲོགས་ཞེས་སོགས་བསླབ་བྱ་མང་པོ་གནང་། ད་དུང་རི་ཁྲོད་འགྲིམས་ལ་ལོ་གསུམ་ན་ཁྱོད་ལ་དགེ་སྦྱོར་གཤའ་མ་ཞིག་སྐྱེའོ་གསུངས། དེ་ནས་དབུས་སུ་བྱོན། འོ་དེ་གུང་རྒྱལ་གྱི་གངས་ལ་བཞུགས་པས་བླ་མ་རྗེ་བཙུན་ཆོས་ཀྱི་སྐུར་གཟིགས། དེ་ནས་སྒམ་པོར་བྱོན་ནས་ཆོས་ཀྱི་ཕྲིན་ལས་བསྐྱངས་ཏེ། རྗེ་བཙུན་གྱི་ཐབས་ལམ་དང་ཕྱག་ཆེན་ལོགས་སུ་མི་མཛད་པར། སྔགས་ཀྱི་སྣོད་དུ་རུང་བ་རྣམས་ལ་ཐབས་ལམ་གྱི་གདམས་པ་བསྟན། དབང་བསྐུར་མེད་ཀྱང་ཕ་རོལ་ཏུ་ཕྱིན་པའི་སྣོད་དུ་རུང་བ་རྣམས་ལ་ཕྱག་ཆེན་གྱི་གདམས་པ་བཏབ་སྟེ་ལྷན་ཅིག་སྐྱེས་སྦྱོར་ཞེས་བྱ་བའི་ཁྲིད་རིམ་ཡང་མཛད། དེ་ལ་དྭགས་པོའི་རྟོགས་ཆོས་ཀྱང་ཟེར། བཀའ་གདམས་ཀྱི་བསྟན་པའི་རིམ་པའི་བསྟན་བཅོས་ཀྱང་མཛད་གདམས་པ་མང་དུ་བསྟན་པས། འདི་ནས་བཀའ་ཕྱག་ཆུ་བོ་གཉིས་འདྲེས་སུ་གྱུར་ཏེ། སྙན་པས་ཕྱོགས་ཐམས་ཅད་དུ་ཁྱབ། མཐར་དགུང་ལོ་བདུན་ཅུ་རྩ་ལྔ་ཆུ་མོ་བྱི་བའི་ལོ་ལ་གཤེགས་སོ། །གསུང་ལས་སྐྱེས་པའི་བུ་ཆེན་མཐའ་ཡས་ཀྱང་གཙོ་ཆེ་བ་ཤོ་རམ་འཕགས་པ། ཟིམ་ཤིང་ཡེ་ཤེས་སྙིང་པོ། གསེར་སྒོམ་ཡེ་ཤེས་སྙིང་པོ། རཾ་ཉི་བ་ཆོས་ཀྱི་གཡུང་དྲུང་སྟེ་གྲུབ་ཐོབ་ཀྱི་བུ་བཞི། དྭགས་པོ་སྒོམ་ཚུལ། ཕག་མོ་གྲུ་པ། འབའ་རོམ་པ། དུས་གསུམ་མཁྱེན་པ་སྟེ་བརྒྱུད་འཛིན་གྱི་བུ་བཞི། དྭགས་པོ་འདུལ་འཛིན་ལ་སོགས་པ་བརྒྱད་དེ་བུ་ཆེན་བཅུ་དྲུག་ཏུ་གྲགས་སོ། །

དུས་གསུམ་མཁྱེན་པ།

༈ དེ་ལ་དུས་གསུམ་མཁྱེན་པ་ནི། བསྐལ་བཟང་གི་སངས་རྒྱས་བྱམས་པའི་རྗེས་སུ་དེ་བཞིན་གཤེགས་པ་སེང་གེ་ཞེས་བྱ་བར་ལུང་བསྟན་པ་དེ་ཡིན་ཅིང་། ཞིང་འདིར་ནི་སྔོན་དཔལ་མགོན་ཀླུ་སྒྲུབ་ཀྱི་སློབ་མ་པྲཛྙཱ་ཨ་ལངྐཱ་ཞེས་བྱ་བ་དང་། སློབ་དཔོན་པདྨའི་སློབ་མ་རྒྱལ་བ་མཆོག་དབྱངས་ལ་སོགས་དང་། ཕྱིས་དགེ་བའི་བཤེས་གཉེན་པོ་ཏོ་བ་རིན་ཆེན་གསལ་རྣམས་སུ་སྐྱེ་བ་བཟུང་ནས། དེ་རྗེས་མདོ་ཁམས་ཡུལ་གྱི་ཏེ་ཤོས་གངས་ཀྱི་ར་བར། ཡབ་གཤིན་རྗེ་གཤེད་ཀྱི་རྣལ་འབྱོར་པ་སྒོམ་པ་རྡོ་རྗེ་མགོན་དང་། ཡུམ་རྣལ་འབྱོར་མ་ལྷ་ཐོག་བཟའ་གཉིས་ཀྱི་སྲས་སུ་ལྕགས་ཕོ་སྟག་ལ་སྐུ་བལྟམས། ཡབ་ལས་རྒྱལ་པོའི་སྲོག་སྙིང་ཞུས་ནས་སྒྲུབ་པས་གྲུབ་པ་བརྙེས། མཁན་པོ་མལ་འདུལ་འཛིན་ལས་བསྙེན་པར་རྫོགས། འདུལ་བ་ལ་མཁས་པར་མཛད། དེ་ནས་ཆོས་རྗེ་སྒམ་པོ་པའི་དྲུང་དུ་བྱོན་ནས་དབང་དང་གདམས་པ་མཐའ་ཡས་པ་གསན། ཐབས་ལམ་གྱི་གདམས་ངག་གནང་ནས་བསྒོམས་པས་ཞག་དགུ་ན་བཙན་ཐབས་སུ་བདེ་དྲོད་འབར་ཏེ་རྟོགས་པ་འཁྲུངས། མཚུར་ཕུ་དགོན་སྡེ་བཏབ། དེ་ནས་ཕྱོགས་ངེས་མེད་དུ་ཕེབས་ཏེ་འགྲོ་དོན་ཕྲིན་ལས་རྒྱ་ཆེར་བསྐྱངས་ནས་མཐར་སྐུ་འདའ་ཁར་ཉེ་འཁོར་བགྲེས་པ་རྣམས་ལ་དངོས་པོ་མང་དུ་ཡོད་པ་རྣམས་ཀྱིས་དཀོན་མཆོག་གི་རྟེན་དང་དགེ་འདུན་ལ་བསྙེན་བཀུར་གྱིས་གསུངས་ནས་ཆུ་མོ་གླང་གི་ལོ་དགུང་ལོ་བརྒྱད་ཅུ་རྩ་བཞི་ལ་དཔའ་བོ་མཁའ་འགྲོའི་བསུ་བས་དག་པའི་ཞིང་དུ་གཤེགས་སོ། །

སངས་རྒྱས་རས་ཆེན།

༈ སློབ་མ་མཐའ་ཡས་པའི་ནང་ནས་སངས་རྒྱས་རས་ཆེན་ནི། ཡུལ་ཡར་ཀླུང་དུ་ཡབ་གཙང་པ་དཔལ་གྲགས་དང་། ཡུམ་བཙུན་ཆུང་མ་བྱ་བའི་སྲས་སུ་འཁྲུངས། བྱིས་པའི་དུས་ནས་གར་བྱོན་དུ་འཇའ་གུར་འོང་བ་དང་། མཁའ་འགྲོ་མ་གསེར་གྱི་རྒྱན་ཅན་བཞི་ཕྱི་བཞིན་དུ་འབྲང་བ་ཡོད་པར་གྲགས། དུས་གསུམ་མཁྱེན་པ་སོགས་བཤེས་གཉེན་དུ་མ་ལ་གསན་པ་མང་དུ་མཛད། འགྲོ་དོན་ཕུན་སུམ་ཚོགས་པའི་མཐར་དགུང་ལོ་བདུན་ཅུ་པ་དབྱར་ཟླ་ར་བའི་ཉེར་ལྔ་ལ་དག་ཞིང་དུ་གཤེགས་སོ། །

ཆོས་རྗེ་སྤོམ་བྲག་པ།

༈ དེའི་སློབ་མ་ཆོས་རྗེ་སྤོམ་བྲག་པ་ཡིན་ཏེ། དེ་ནི་སྐྱེ་བ་སྔ་མ་བྱ་རྒོད་ཕུང་རི་དང་རྡོ་རྗེ་གདན་གྱི་བར་དུ་ས་ཐོབ་པའི་བྱང་སེམས་ཡེ་ཤེས་བློ་གྲོས་ཞེས་བྱ་བར་སྐྱེ་བ་བཞེས་པར་བཤད། དེ་ནས་འདར་འབྲི་རྒྱལ་དམ་པ་ཆོས་ཕྱུག་ཅེས་བྱ་བར་འཁྲུངས། ལོ་བཅུ་བཞི་ལ་སངས་རྒྱས་རས་ཆེན་དང་མཇལ་བས་ཕྱག་ན་རྡོ་རྗེ་དངོས་ཡིན་པའི་སྣང་བ་ཤར། ས་གཞན་དུ་འགྲོ་འདོད་པ་ལ་དུས་གསུམ་མཁྱེན་པ་དངོས་སུ་བྱོན་ནས་ཁྱོད་ཀྱི་བུ་སློབ་དང་ཡང་སློབ་ཀྱི་བར་དུ་ཡང་འཕྲིན་ལས་རྒྱ་ཆེན་པོ་འོང་བ་ཡིན། གར་ཡང་མ་འགྲོ་ས་འདི་ཉིད་དུ་སྒོམས་དང་རང་གཞན་གཉིས་ཀའི་དོན་འགྲུབ་ཅེས་ལུང་བསྟན་པ་ལྟར། སྤེལ་སྒོ་དགོན་པར་ཕྱག་ཕེབས་ནས་ལོ་བཅུ་དྲུག་སྒྲུབ་པ་མཛད་པས་དག་པའི་སྣང་བ་བསམ་གྱིས་མི་ཁྱབ་པ་ཤར། སྙན་པས་ཕྱོགས་ཐམས་ཅད་དུ་ཁྱབ་བོ། །

རིན་པོ་ཆེ་ཀརྨ་པཀྵི།

༈ དེའི་སློབ་མ་རིན་པོ་ཆེ་ཀརྨ་པཀྵི་ཡིན། སངས་རྒྱས་ཀྱི་གསུང་རབ་རྣམས་ཐོས་པ་ཙམ་གྱིས་ཐུགས་སུ་ཆུད། སྙན་པའི་གྲགས་པ་ཤིན་ཏུ་ཆེ་བའི་ཚེ་ཧོར་རྒྱལ་པོས་གསེར་ཡིག་པ་བཏང་སྟེ་གདན་དྲངས། རྒྱལ་པོ་འཁོར་བཅས་བྱང་ཆུབ་ལ་བཙུད། མི་ཉག་གི་ཡུལ་དུ་གཙུག་ལག་ཁང་ཆེན་པོ་བརྩིགས། མཐར་དགུང་ལོ་བརྒྱད་ཅུ་པ་ཆུ་མོ་ལུག་གི་ལོ་ལ་གཤེགས་སོ། །དེའི་སློབ་མ་གྲུབ་ཐོབ་ཨོ་རྒྱན་པ་ཡིན།

ཆོས་རྗེ་རང་བྱུང་པ།

༈ དེའི་སློབ་མ་ཆོས་རྗེ་རང་བྱུང་པ་ཡིན། ཀརྨ་པཀྵིས་སྟོད་ལུང་འཕར་ཚང་དུ་གྲོང་འཇུག་མཛད་པས་ཤི་ནས་ལོག་པ་མི་རུང་སྙམ། ཕ་མས་སྤྱན་ལ་ཁབ་ཀྱིས་བཙབས་པས་དེར་རྟེན་འབྲེལ་མ་འགྲིགས་ནས་ཙའི་ཕུ་གངས་ཞུལ་མོའི་འགྲམ་དུ་ཆོས་རྗེ་སྲིད་པ་བར་མའི་གཟུགས་ཀྱིས་བྱོན་ནས་དེར་ཤིང་ཕོ་སྤྲེའུའི་ལོ་ཡར་ངོའི་ཚེས་བརྒྱད་ལ་སྐུ་བལྟམས། དེ་ནས་ལོ་ལྔ་ལོན་པ་ན་གྲུབ་ཆེན་ཨོ་རྒྱན་པའི་གསུང་གིས་སང་ངའི་བླ་མ་འབྱོན་པ་ཡོད་གསུངས་ནས་སྟན་མཐོན་པོ་བཤམས། དེར་གྲུབ་ཆེན་པའི་དྲུང་དུ་བྱོན་པ་ན་སྟན་མཐོན་པོ་དེ་ལ་ཐོགས་པ་མེད་པར་འཛེགས་ཏེ་བཞུགས་པར། གྲུབ་ཆེན་པའི་གསུང་གིས་བྱིས་པ་ཁྱོད་ངའི་བླ་མའི་གདན་ལ་སྡོད་པ་ཅི་ཡིན་གསུངས་པས། བླ་མ་ང་ཡིན་ཏེ། ད་ཁྱོད་ལ་རེ་དགོས་པར་འདུག་བྱས་ནས་ཞོལ་གྱིས་བབས། དེ་ནས་ཨོ་རྒྱན་པས་སེམས་བསྐྱེད་དང་འཁོར་ལོ་སྡོམ་པ་དྲིལ་བུ་ལུགས་ཀྱི་དབང་དང་མ་ཕུར་གྱི་དབང་རྣམས་གནང་། དེ་ནས་དགུང་ལོ་བཅོ་བརྒྱད་པ་ལ་མཁན་པོ་གཞོན་ནུ་བྱང་ཆུབ་དང་། སློབ་དཔོན་དགེ་འདུན་པ་རིན་ཆེན་སྒང་ལས་བསྙེན་པར་རྫོགས། བདེ་ཆེན་སྟེང་དང་ལྷུན་གྲུབ་སྟེང་གི་རི་ཁྲོད་བཏབ། དེ་ནས་ཧོར་རྒྱལ་པོའི་སྤྱན་འདྲེན་པ་བྱུང་ནས་ཐེགས། འགྲོ་དོན་དཔག་མེད་མཛད་ནས་བོད་ལ་ཕེབས་ཁར་ཁྱི་ལོ་རི་བོ་རྩེ་ལྔར་ཐེགས། དེ་ནས་བོད་ལ་ཕེབས་ནས་བསམ་ཡས་མཆིམས་ཕུར་ཏིང་ངེ་འཛིན་ལ་རྩེ་གཅིག་ཏུ་བཞུགས་ནས། སླར་ཡང་རྒྱའི་ཡུལ་དུ་ཐེགས་ནས། དེར་སྐུ་ཚེའི་འདུ་བྱེད་བཏང་སྟེ་ཆོས་ཉིད་ཟླ་བའི་དཀྱིལ་འཁོར་གྱི་ནང་དུ་བཞུགས་པར་བསྟན་ནས་རྒྱལ་པོ་འཁོར་བཅས་དད་པའི་ས་ལ་བཀོད་དོ། །དེ་ནི་དགུང་ལོ་ལྔ་བཅུ་རྩ་དྲུག་བཞེས་པ་ས་མོ་ཡོས་ཀྱི་ལོ་ཡིན་པར་བཤད་དོ། །སློབ་མ་ཡང་གཡུང་སྟོན་རྡོ་རྗེ་དཔལ་ལ་སོགས་པ་མཐའ་ཡས་པ་བྱུང་ངོ་། །

རྗེ་རོལ་པའི་རྡོ་རྗེ།

༈ རྗེ་རོལ་པའི་རྡོ་རྗེ་ནི། རང་བྱུང་པའི་སྐུའི་སྐྱེ་བ་དེ་མ་ཐག་པ་ཡུལ་ཀོང་ཡུལ་དུ་འཁྲུངས། འཕྲིན་ལས་རྒྱ་ཆེར་བསྐྱངས་ནས་དགུང་ལོ་བཞི་བཅུ་རྩ་བཞི་ལ་གཤེགས།

དེ་བཞིན་གཤེགས་པ།

༈ དེའི་སྐུའི་སྐྱེ་བ་དེ་བཞིན་གཤེགས་པ་ནི། ཡུལ་ཨེ་མྱང་དུ་ཤིང་ཕོ་བྱི་བའི་ལོར་འཁྲུངས། འཕྲིན་ལས་རྒྱ་ཆེར་སྤེལ་ནས་དགུང་ལོ་སུམ་ཅུ་རྩ་གཉིས་པ་ཤིང་མོ་ལུག་ལ་གཤེགས།

ཆོས་རྗེ་མཐོང་བ་དོན་ལྡན།

༈ དེ་བཞིན་གཤེགས་པའི་སྐུའི་ཡང་སྲིད་ཆོས་རྗེ་མཐོང་བ་དོན་ལྡན་ནི་ཀརྨ་པཀྵི་སྐུ་བལྟམས་ཡུལ་དང་ཉེ་བའི་ས་ཆ་ངོམ་དུ་མེ་ཕོ་སྤྲེལ་ལོར་འཁྲུངས། འཕྲིན་ལས་རྒྱ་ཆེར་སྤེལ་ནས་དགུང་ལོ་སུམ་ཅུ་རྩ་བརྒྱད་པ་ཆུ་མོ་བྱ་ལ་གཤེགས། དེ་དག་ནི་བརྒྱུད་པ་དང་པོའི་སྐབས་སོ། །

སྤྲུལ་པའི་སྐུའི་བརྒྱུད་པ་གཉིས་པའི་རིམ་པ།

༈ སྤྲུལ་པའི་སྐུའི་བརྒྱུད་པ་གཉིས་པའི་རིམ་པ་བརྗོད་པར་བྱ་སྟེ། རྗེ་བཙུན་ཏེ་ལོ་པའི་སློབ་མ་ཁོལ་པོ་དགའ་ཞེས་བྱ་བ་ལས་སྐུ་ཚེ་འཕོས་ནས། ན་རོ་པའི་སློབ་མ་ཛ་ལནྡྷ་རར་འཁྲུངས་པའི་ཚེ་ནགས་སུ་མེ་ཏོག་འཐུར་བྱོན་པའི་སྐབས་ཤིག་སྤྲིན་གསེབ་ནས་མཁའ་འགྲོའི་ལུང་གིས། བུ་བུ་བྱང་ཕྱོགས་ཁ་བ་ཅན་གྱི་ལྗོངས། །རྒྱལ་བས་ལུང་བསྟན་བོད་ཅེས་གྲགས་པའི་ཡུལ། །དེར་སོང་ཁྱོད་ཀྱི་འདོད་པ་འགྲུབ་བྱེད་དེ། །བདེ་གཤེགས་ཉིད་སྤྲུལ་ཁྱོད་ཀྱིས་མཐོང་བར་འགྱུར། །ཞེས་ལུང་བསྟན་པ་ལྟར་བོད་དུ་བྱོན། བཤེས་གཉེན་དུ་མ་དང་མཇལ། ཁྱད་པར་རྗེ་མི་ལ་དང་མཇལ་ནས། རྗེ་བཙུན་མི་ལས། ཁྱོད་ནི་ཁ་བ་ཅན་ལྗོངས་འདིར། །ཡང་ཡང་སྐྱེ་ཞིང་ཆོས་སྤྱོད་དེ། །ཞེས་སོགས་ལུང་བསྟན་ནས་བལ་བོད་ཀྱི་མཚམས་སུ་དཀའ་ཐུབ་ལ་གནས་པ་ལས་སྐུ་ཚེ་འཕོས་ཏེ། དབུར་སྟོད་དུ་ཡབ་དགེ་བསྙེན་འབྱུང་སེང་དང་ཡུམ་སྒྲོལ་མ་འབུམ་གྱི་སྲས་སུ་མེ་ཕོ་བྱི་བ་ལ་འཁྲུངས། ཆེར་གྱུར་པ་ན་སྒམ་པོ་པ་ཁུ་དབོན་གྱི་དྲུང་དུ་བསྙེན་པར་རྫོགས། མཚན་ཚུལ་ཁྲིམས་དཔལ་དུ་གསོལ། ཕྲིན་ལས་རྒྱ་ཆེར་བསྐྱངས་ནས་ཆུ་ཕོ་བྱི་བར་གཤེགས། དེའི་སྐུ་སྐྱེ་དགེ་སློང་ནམ་མཁའ་འོད་དྲུག་ཅུ་རྩ་བདུན་ལ་གཤེགས། དེའི་སྐུའི་སྐྱེ་བ་བཀྲ་ཤིས་གྲགས་པ་བརྒྱད་ཅུ་རྩ་གསུམ་ལ་གཤེགས། དེའི་སྐུའི་སྐྱེ་བ་རྟོགས་ལྡན་གྲགས་པ་སེང་གེདེའི་སྐུའི་སྐྱེ་བ་ཆོས་རྗེ་མཁའ་སྤྱོད་དབང་པོ། དེའི་སྐུའི་སྐྱེ་བ་ཆོས་རྗེ་ཆོས་དཔལ་ཡེ་ཤེས། དེའི་སྐུའི་སྐྱེ་བ་ཆོས་ཀྱི་རྗེ་ཞྭ་དམར་བཞི་པའོ། །

རྗེ་ཕག་མོ་གྲུ་པ།

༈ རྗེ་སྒམ་པོ་པས་དགེ་བཤེས་ཁམས་པ་ཆེན་པོ་ཞེས་བསྔགས་པར་མཛད་པའི་རྗེ་ཕག་མོ་གྲུ་པ་ནི། ཐུབ་པའི་དབང་པོ་རང་ཉིད་ཡིན་པར་སངས་རྒྱས་ཉིད་ཀྱིས་ལུང་བསྟན་ཅིང་། རྒྱ་བོད་ཀུན་ཏུ་གྲུབ་པའི་སྐྱེས་མཆོག་རྣམས་སུ་སྐུའི་སྐྱེ་བ་བཟུང་བ་ནི། ཨོ་རྒྱན་གྱི་ཡུལ་དུ་དྲང་སྲོང་འགྲོ་བ་དབུགས་འབྱིན་ཞེས་བྱ་བས་རྗེས་སུ་བཟུང་བའི་དཔའ་བོ་རྡོ་རྗེ། དེ་ནས་རིམ་གྱིས་དམ་ཚིག་རྡོ་རྗེ། པདྨའི་རྡོ་རྗེ། ལྷན་ཅིག་སྐྱེས་པའི་རྡོ་རྗེ། ཐ་ག་པ་རྡོ་རྗེ་སོགས་སུ་སྐྱེ་བ་བཟུང་ནས་བོད་འདིར་ཡུལ་མདོ་ཁམས་ཀྱི་ལྷོ་བརྒྱུད་འབྲི་ལུང་རྣེ་ཤོད་ཏུ་ལྕགས་ཕོ་སྟག་གི་ལོ་ལ་འཁྲུངས། དགུང་ལོ་དགུ་ལོན་ཚེ་སློབ་དཔོན་ལྷིང་ངེ་འོད་ཟེར་རྒྱལ་མཚན་པ་ལས་རབ་ཏུ་བྱུང་མཚན་རྡོ་རྗེ་རྒྱལ་པོར་གསོལ། བཅུ་དགུ་ལོན་ཚེ་དབུས་སུ་ཕེབས། བཀའ་གདམས་པའི་དགེ་བཤེས་གང་པ་དང་དོན་སྟེང་པ་དང་བྱ་ཡུལ་བ་སོགས་ལ་གསན་པ་རྒྱ་ཆེར་མཛད། ཉི་ཤུ་རྩ་ལྔར་ཟུལ་ཕུར་བྱ་འདུལ་བ་ལས་བསྙེན་པར་རྫོགས། དེ་ནས་ས་སྐྱ་པ་ཆེན་པོ་ལ་ལམ་འབྲས་སོགས་གདམས་པ་མང་དུ་གསན། དེ་རྗེས་རྗེ་སྒམ་པོ་པའི་དྲུང་དུ་བྱོན་པས་བླ་མས་ཆོས་གང་ལ་ཉན་ཞེས་སོགས་ཀྱི་གསུང་གླེང་མང་ཙམ་གསུང་བྱུང་བར། བླ་མ་ས་ཆེན་གྱིས་མཐོང་ལམ་རྣམ་པར་མི་རྟོག་པའི་ཡེ་ཤེས་ངོ་སྤྲད་ལགས་ཞུས་པས། ཟན་ཆང་ཞིག་ཕྱག་ན་འདུག་པ་དེར། ཁྱོད་ཀྱི་དེ་ལས་འདི་མི་དགའ་རེ་ཤི་གསུངས་པས་ཐུགས་སྐྱོག་གིས་སོང་བར། ཁྱོད་རང་ཤར་གྱི་རི་དེའུ་ཕ་གིའི་ཁར་ཁམས་སེང་ལ་བྱོན་ཅིགཁོང་འགའ་ཞིག་གིས་ཆོས་ཟིན་པ་དང་། འོ་སྐོལ་གསུང་གླེང་བྱའོ་གསུངས་པས། དེའུ་ཤར་མའི་ཁར་བྱོན་ནས་མནོ་བསམ་མཛད་པས། སྔར་གྱི་ཆོས་ཐམས་ཅད་ཕྱི་ཤུན་དང་སྦུན་པར་སོང་ནས་ནམ་མཁའ་རྣམ་པར་དག་པ་ལྟ་བུའི་རྟོགས་པ་བཟང་པོ་འཁྲུངས། ཐུགས་རབ་ཀྱང་ནམ་མཁའ་ལ་མདུང་བསྐོར་བ་ལྟར་སོང་། དེ་ནས་སྤྱན་སྔར་བྱོན་པས་སྒམ་པོ་པས་མཁྱེན་ཏེ། ད་ང་ལ་ཡང་དེ་ལས་ལྷག་པ་བསྟན་རྒྱུ་མེད་འོན་ཀྱང་ང་རང་གི་ལུགས་ཀྱི་ཁྲིད་ཅིག་བྱའོ་གསུངས་ནས་ལྷན་ཅིག་སྐྱེས་སྦྱོར་གྱི་ཁྲིད་གནང་། དེ་ནས་རིང་པོར་མ་ལོངས་པར་སྒམ་པོ་པ་གཤེགས། དེ་ནས་ཐུགས་དགོངས་ལ། ནགས་ཁྲོད་དབེན་པ་སྟེས་དབང་གིས། །སྤྱོད་ཅིང་རང་དབང་རྟེན་མཛད་གསོལ། །ཞེས་པའི་གསོལ་བ་བཏབ་ནས། གདན་ས་མཐིལ་དུ་ས་ཕོ་སྟག་གི་ལོར་ཕེབས། དེར་རྒྱ་སྒོམ་རྨི་རས་བྱ་བའི་སྤྱིལ་པོར་བཞུགས་ནས་ཁྱོད་ཀྱི་སྤྱིལ་པོ་འདི་སྐྱིད་བྱ་བ་ལན་གསུམ་གསུངས་པས་བཞེད་ན་ཕུལ་བས་ཆོག་ཟེར། ས་དེ་གནས་ཀྱི་སྙིང་པོར་འདུག་པས་འོ་ན། ཁོ་བོའི་ཀོ་གདན་ལོངས་ཤོག་གསུང་སྟེ་དེ་ཉིད་དུ་གནས་བཅས། དེར་འཇག་སྤྱིལ་ལས་མེད་པས། དེ་ནས་སྟག་ལུང་ཐང་པས་བླ་མའི་སྤྱིལ་པོ་གཅིག་བྱེད་པར་ཞུས་པས། ཉིན་གཅིག་ལ་གྲུབ་ན་གྱིས་གསུངས། དེ་ལས་རིང་བ་མི་རུང་གསུང་ནས་ཉིན་གཅིག་ཁོ་ན་ལ་གླང་སྤྱིལ་དེ་གྲུབ་བོ། །དེར་དགེ་འདུན་མང་དུ་འདུས་ནས་གྲྭ་པ་བརྒྱད་བརྒྱ་ལ་གདུགས་ཐོགས་ཀྱི་སློབ་མ་ལྔ་བརྒྱ་བྱུང་བར་གྲགས། དེ་ལྟར་ཆོས་ཀྱི་ཕྲིན་ལས་རྒྱ་ཆེར་མཛད་ནས་ལྕགས་ཕོ་སྟག་གི་ཟླ་བ་བདུན་པའི་ཚེས་ཉེར་ལྔ་ལ་སྤྲུལ་པའི་སྐུ་བསྡུ་བར་མཛད་དོ། །དེའི་སློབ་མ་བུ་ཆེན་དུ་བྱོན་པ་ནི། མོས་གུས་མཐར་ཐུག་སྟག་ལུང་པ། རྟོགས་པའི་མཐར་ཐུག་སྣ་ཕུ་བ། ཤེས་རབ་མཐར་ཐུག་པར་ཕུ་བ། ནུས་པའི་མཐར་ཐུག་མཆན་བུ་རྒྱ་རས་ཏེ་མཐར་ཐུག་གི་བུ་བཞི། སྐལ་ལྡན་ཡེ་ཤེས་སེང་གེརྟོགས་ལྡན་མི་ཉག་སྒོམ་རིན། གྲུབ་ཐོབ་ཉང་རེ་སེ་བོ། ཀུན་ལྡན་གཙང་པ་རས་ཆུང་རྣམས་ལ་གདམས་པའི་བུ་བཞི་ཟེར། ཆོས་རྗེ་འཇིག་རྟེན་མགོན་པོ། འབན་རྟ་ཕུག་པ། ཆོས་རྗེ་ལྡུམ། ཆོས་རྗེ་གཏུམ་རྣམས་ལ་རོ་གཅིག་རྟོགས་པ་ཕྱེད་བཞི། གཤེ་སྒོམ་དཀར་བ་སོགས་ཐུགས་ཀྱི་སྲས་བཞི་དང་། རིན་ཆེན་ཤུག་རྩར་བ་སོགས་ཡི་གེ་མའི་བུ་བཞི་དང་། ཡེ་ཕུག་པ་སོགས་ཉེ་བའི་སྲས་བཞི་སོགས་མཐའ་ཡས་སོ། །འདི་ལ་འབྲི་གུང་སྒོམ་པ་ཤཱཀ་རིན་གྱིས། གདན་ས་དཔལ་གྱི་ཕག་གྲུ་དེ། །ཆུ་མིག་བརྒྱ་རྩའི་མགོ་བོ་ཡིན། །ཞེས་སྨྲས་པ་ལྟར་བོད་ཀྱི་ཡུལ་འདིར་གཙུག་ལག་ཁང་དང་སྡེ་དགོན་ལ་སོགས་པ་གདན་ས་འདི་ལས་མཆེད་པ་མང་བར་བཤད་དོ། །འབྲི་གུང་ལས་མཆེད་པ་བོད་ཁམས་གཉིས་སུ་བགྲང་གིས་མི་ལང་བ་དང་། གླིང་རས་པ་ལས་མཆེད་པ་འབྲུག་སྐོར་རྣམས་ཀྱིས་བྱ་རྒོད་ཀྱི་ཉི་ལམ་བཅུ་གསུམ་གྱིས་ཁྱབ་པར་གྲགས་པ་དང་། སྟག་ལུང་ཐང་པ་ལས་གྱེས་པའང་དབུས་དང་ཁམས་ཀྱི་ས་ཆར་ཤིན་ཏུ་མང་བ་དང་བཅས་ཕྱོགས་ཐམས་ཅད་ལ་ཁྱབ་པར་གྲགས་སོ། །

འབྲི་གུང་ཆོས་རྗེ།

༈ དེ་རྗེས་ཕག་གྲུའི་གདན་ས་འབྲི་གུང་ཆོས་རྗེས་མཛད་པས་ལོངས་སྤྱོད་ཆུང་ཞིང་གྲྭ་པ་རྣམས་རེ་ཆེ་བར་བྱུང་བས། འགྲོ་མགོན་ལ་གསོལ་བ་བཏབ་པས། འགྲོ་མགོན་བྱོན་ནས་ཟ་འོག་གི་འབོལ་རྙིང་པ་ཞིག་འདུག་པ་དེ་ཁོ་རང་ཚོར་གཏོད། ཁྱོད་རང་དབུ་རུ་བྱང་ཕྱོགས་སུ་སོང་གསུངས་པའི་ལུང་བསྟན་བྱུང་བ་ལྟར། གདན་ས་ལོ་གསུམ་དུ་ཉེ་བ་ཞིག་མཛད་ནས། དགུང་ལོ་སུམ་ཅུ་རྩ་བདུན་པ་ས་ཕག་ལོར་འབྲི་གུང་དུ་ཕེབས། ལོ་དེ་ཉིད་ལ་བཙུན་གསར་བརྒྱ་ཐམ་པ་བྱུང་། ཟབ་མོའི་གདམས་པ་དེ་ཁོ་ན་ཉིད་རྟོགས་པའི་སློབ་མ་མང་པོ་ཨོ་རྒྱན་དང་ཛ་ལནྡྷ་ར་ཚུན་ཆོད་དང་རི་བོ་རྩེ་ལྔ་ཡན་ཆོད་ཀྱི་ལུང་སུལ་དང་དབེན་གནས་ཐམས་ཅད་དུ་ཁྱབ་པར་མཛད། ཁྱད་པར་ལྕགས་ཕོ་བྱི་བའི་ལོ་ལ་འབྲི་གུང་ཐེལ་གྱི་ཆོས་སྡེ་བཏབ། ཕྱིས་དགུང་ལོ་དྲུག་ཅུའི་སྟེང་དུ་ཕེབས་པའི་ཚེ། སིངྒ་ལའི་གླིང་གི་དགྲ་བཅོམ་པ་ཁ་ཆེ་པ་༼མ་ཡིག་ཏུ་མི་གསལ་༽མེ་ཏོག་བཞི་པ་ཞིག་སྒམ་བུར་རྒྱས་བཏབ་ནས་སོ་སོར་མ་འཕྲོད་ཀྱི་བར་མི་རྙིང་བར་བྱིན་གྱིས་བརླབས་ཏེ། གཅིག་འབྲི་ཞེས་བྱ་བའི་སར་སློབ་དཔོན་ཀླུ་སྒྲུབ་བྱང་སེམས་རིན་ཆེན་དཔལ་དུ་སྐྱེ་བ་བླང་ནས་ཡོད་པ་དེ་ལ་ཕུལ། གཅིག་རཏྣ་ཀུ་དེ་ཞེས་བྱ་བའི་གཙུག་ལག་ཁང་ན་བྱང་ཆུབ་སེམས་དཔའ་སྐལ་ལྡན་ཤིང་རྟ་ཡོད་པ་དེ་ལ་ཕུལ། གཅིག་དྭི་བྷཱ་ཥི་ཞིག་ཡོད་པ་དེ་ལ་ཕུལ། གཅིག་དེས་ལྷ་ཆེན་པོ་ཞིག་བཞེངས་འདུག་པ་དེའི་ཐུགས་ཁར་ཞོག་ཅེས་གསུངས་པ་ལྟར། རྗེ་འབྲི་གུང་པ་ནི་ཀླུ་སྒྲུབ་ཡིན་པར་བཤད་དེ། དེ་ལྟ་བུའི་བདག་ཉིད་ཆེན་པོ་དེ་ནི་དགུང་ལོ་བདུན་ཅུ་རྩ་ལྔ་པ་མེ་མོ་གླང་གི་ལོ་ལ་གཤེགས་པའི་ཚུལ་བསྟན། དེ་ཡང་གཤེགས་པར་ཉེ་བ་ན་དྲུང་ན་གནས་པས། ད་ཆོས་རྗེ་རིན་ཆེན་གང་དུ་གཤེགས་ཞུས་པར། ང་གང་དུ་ཡང་མི་འགྲོ། ཁྱེད་རང་སློབ་མ་རྣམས་ཀྱི་ཁམས་རྒྱུད་ལ་སྡོད་པ་ཡིན་གསུངས། སློབ་མ་གྲུབ་པ་བརྙེས་པ་བགྲང་བར་མི་ནུས་ཀྱང་། འགྲོ་དོན་སྐྱོང་ནུས་པ། རྗེ་སྤྱན་སྔ་རིན་པོ་ཆེ། དབོན་རིན་པོ་ཆེ། གཅུང་རིན་པོ་ཆེ། གཉོས་འགར་ཆོས་གསུམ། དབོན་ཤེར་འབྱུང་། བསོད་ནམས་གླིང་པ། ཏི་ཤྲཱི་རས་པ། ཤྲཱི་ཕུག་པ། བ་ལུ་གོང་པ། ནི་མ་བྱང་ཆུབ། གཡག་རུ་དཔལ་གྲགས། བྱང་ཆུབ་རྡོ་རྗེ་ལ་སོགས་པ་མང་ངོ་། །

སྟག་ལུང་ཐང་པ།

༈ ཕག་གྲུའི་སློབ་མ་སྟག་ལུང་ཐང་པ་ནི། གཡང་ཤོད་བོང་ར་སྟེང་དུ་ཆུ་ཕོ་ཁྱི་ལ་འཁྲུངས། བཅོ་བརྒྱད་ལ་རབ་ཏུ་བྱུང་ནས་འགྲོ་མགོན་ལོ་དྲུག་ཏུ་བསྟེན། དེ་ནས་སྔར་པོ་ཏོ་བའི་བཞུགས་གནས་ཀྱི་ས་དེར་ལྕགས་བྱི་ལ་སྟག་ལུང་དགོན་གནས་བཏབ། ལོ་ངོ་སུམ་ཅུ་ཙམ་གྱི་བར་འགྲོ་དོན་མཛད། ཆོས་དང་ཟང་ཟིང་གི་འབྱོར་པ་མངའ་བས་ཕག་གྲུའི་གདན་སར་དཀོན་མཆོག་གི་སྲི་ཞུ་བསྐྲུན་པའི་དགེ་སྟོབས་བླ་ན་མེད་པ་མཛད། ཁམས་ཕྱོགས་སུའང་རི་བོ་ཆེ་ལ་སོགས་པའི་དགོན་སྡེ་རྒྱས་པར་སྤེལ། མཐར་དགུང་ལོ་དྲུག་ཅུ་རྩ་དགུ་ས་རྟའི་ལོ་ལ་ཞི་བར་གཤེགས་སོ། །

གླིང་ཆེན་རས་པ།

༈ ཕག་གྲུའི་སློབ་མ་རྟོགས་པའི་མཐར་ཐུག་སྣ་ཕུ་བ་གླིང་ཆེན་རས་པ་ནི། མྱང་སྟོད་གླང་ཕུ་སྣར། ཡབ་རྒྱལ་པོ་སྐྱབས་དང་ཡུམ་གཟུས་མོ་དར་ཆུང་གི་སྲས་སུ་ས་སྤྲེལ་ལ་འཁྲུངས། དེ་དུས་ཀྱི་མཁས་གྲུབ་དུ་མ་ལ་མདོ་རྒྱུད་དབང་ལུང་མན་ངག་མང་དུ་གསན་པས་ད་ལྟ་འཛམ་གླིང་ན་གདམས་པའི་ཐོབ་རྒྱ་ང་རང་ལས་ཆེ་བ་མེད་སྙམ་མཛད། དེ་ནས་དགུང་ལོ་སུམ་ཅུ་རྩ་བརྒྱད་པ་ཤིང་མོ་བྱ་ལ་འགྲོ་མགོན་ཕག་གྲུའི་ཞབས་སྤྱི་བོས་བླངས་ནས་གདམས་ཁྲིད་ཞུས། ལོ་བདུན་ཟླ་བ་བདུན་ཞག་བདུན་གྱི་བར་མཚམས་ཀྱི་དམ་བཅའ་ཞུས་ནས་བསྒྲགས་ངར་ཕུག་ཏུ་བསྒོམས་པས་ཞག་གསུམ་ན་རྟོགས་པ་ཁྱད་པར་ཅན་འཁྲུངས། བླ་མའི་དྲུང་དུ་རྟོགས་པ་ཕུལ་ཏེ། སྒོམས་ཤིག་གསུངས་ནས་བསྒོམས་ལགས་པས། བསྒོམ་བྱ་དང་སྒོམ་བྱེད་སྟོར་ནས་ཐལ། ཞེས་སོགས་ཀྱི་མགུར་གསུངས་སོ། །དེ་ནས་ཕྱོགས་ཐམས་ཅད་དུ་འགྲོ་དོན་མཛད་ནས། ཕྱིས་སྣ་ཕུར་དགོན་པའི་གཞི་བཟུང་ནས་གཞན་དོན་མང་དུ་བསྐྱངས། དེར་སློབ་མ་རྣམས་ལ་ཁྲིད་ཀྱི་རིམ་པ་དང་ཚོགས་ཆོས་མང་དུ་སྐྱོང་གིན་བཞུགས། སྐབས་ཤིག་དམ་ཚིག་ལྔ་པ་གསུངས་ཤིང་ཡོད་པའི་འཕྲོ་ལ་དམ་ཚིག་མི་གཙང་བའི་མི་གཉིས་བྱུང་བས་རྐྱེན་བྱས། ས་སྤྲེལ་ལོ་དྲུག་ཅུ་རེ་གཅིག་ལ་གཤེགས་སོ། །

གཙང་པ་ཡེ་ཤེས་རྡོ་རྗེ།

༈ དེའི་སློབ་མ་གཙང་པ་ཡེ་ཤེས་རྡོ་རྗེ་ནི། སྣ་ཕུར་ལོ་ལྔའི་བར་གདམས་ཁྲིད་གསན། གདན་ས་བཟུང་དགོས་པའི་བཀའ་གནང་བ་ལྟར་སྣ་ཕུའི་གདན་ས་བཟུང་། འབྲུག་འཛིན་པའི་ལུང་བསྟན་ཡང་བྱུང་བ་གྲགས། དབུས་གཙང་གི་མཁས་པ་རྣམས་ལ་སྦྱངས་ཡོན་མཐར་ཕྱིན་པ་གསན། འབྲུག་ཏུ་དགོན་པ་བཏབ་པས་ལོ་དེ་ཉིད་ལ་སྤྱིལ་པོ་སྟོང་ཙམ་ཐེབས། འཇིག་རྟེན་ལ་ཞེན་པ་ལོགཚེ་བློས་བཏང་གི་སྒྲུབ་པ། བླ་མའི་མོས་གུས་གསུམ་གཙོ་བོར་འཛིན་ཅིང་ཕྱག་ཆེན་གྱི་རྟོགས་པ་ཤར་བའི་སློབ་མ་སྟོང་ཕྲག་ལྔ་ཙམ་བྱུང་། བྱ་རྒོད་ཀྱི་ཉི་ལམ་བཅོ་བརྒྱད་དུ་འབྲུག་པའི་བུ་སློབ་ཀྱིས་ཁྱབ་པར་བྱས་ནས་དགུང་ལོ་ལྔ་བཅུ་རྩ་གཅིག་པ་ལྕགས་མོ་ལུག་ལ་གཤེགས་སོ། །མཆོག་གི་སློབ་མ་ནི། དང་པོར་ཆེ་བ་སྤ་རྐྱང་གཉིས་ཏེ། སྤ་རི་བས་སྤ་རའི་བྱང་ཆུབ་གླིང་བཏབ། རྐྱང་མོ་ཁ་བས་དགོན་རྐྱང་མོ་ཁ་བཏབ་ནས་འགྲོ་དོན་མཛད་དོ། །བར་དུ་ཆེ་བ་རྒྱ་འབྲས་གཉིས་ཏེ། རྒྱ་ཡགས་པས་ནི་གྲྭའི་ཟར་ཕུར་རྒྱ་ཡགས་བཏབ། འབྲས་ལོ་བ་ནི། དགོན་པའི་མིང་སྟེ་མྱང་སྟོད་ན་ཡོད་དེ་དེ་གཉིས་ཀྱིས་ཀྱང་འགྲོ་དོན་བསྐྱངས་སོ། །ཐ་མར་ཆེ་བ་ལོ་རྒོད་གཉིས་ཏེ། དེ་ལྟར་ལོ་རས་ནས་བརྒྱུད་པ་རྣམས་ལ་སྨད་འབྲུག་དང་། རྒོད་ཚང་ནས་བརྒྱུད་པ་རྣམས་ལ་སྟོད་འབྲུག་ཅེས་གྲགས་སོ། །

ཞང་རིན་པོ་ཆེ་སོགས།

༈ སྒོམ་པ་ཚུལ་ཁྲིམས་སྙིང་པོ་ལས་ཡང་དག་པའི་དོན་བརྙེས་པའི་ཞང་རིན་པོ་ཆེ་ནི། ཡུལ་ཚ་བ་གྲུར། ཡབ་སྔགས་པ་རྡོ་རྗེ་སེམས་དཔའ་དང་ཡུམ་མང་སྐྱིད་བྱ་བའི་སྲས་སུ་ངོ་མཚར་བའི་ལྟས་དང་བཅས་ཏེ་ཆུ་མོ་ཡོས་ལ་འཁྲུངས། ལོ་ལྔ་ལོན་སྐབས་ཡབ་ཀྱིས་དམྱལ་བའི་སྡུག་བསྔལ་བཤད་པས་ཤིན་ཏུ་བྲེད་ནས་ཉིན་མཚན་དལ་མེད་དུ་ལྷ་ཕྱག་དང་བསྐོར་བ་མཛད། དེ་ནས་ཆེར་སོང་བ་ན། བྱིའུ་སྟོན། རྔོག་མདོ་སྡེ། གསང་ཕུ་ལོ་ཙཱ་བ་རྣམས་ལ་གསན་པ་མང་དུ་མཛད། དཔལ་རྒ་ལོའི་སྤྱན་སྔར་བྱོན་པས་ཞལ་མཐོང་བ་ཙམ་གྱིས་དད་པ་ལྷག་པར་སྐྱེས། སྒོམ་ལུང་ཞུས་པས་ཐོག་མར་ཧེ་རུ་ཀའི་གོ་འཕང་ཚེ་འདི་ཉིད་ལ་ཐོབ་པར་བྱ་སྙམ་པ་གྱིས་གསུངས། སྦྱོར་དྲུག་ལ་སོགས་པའི་གདམས་པ་མང་དུ་གནང་། དགུང་ལོ་སོ་གསུམ་པར་སློབ་དཔོན་སྒོམ་པ་དང་མཇལ། ལྷན་ཅིག་སྐྱེས་སྦྱོར་གནང་ནས་བསྒོམས་པས། ཤེས་རབ་ཀྱི་རྩལ་སྐྱེས་ཏེ་གསུང་རབ་ཀྱི་ཚིག་དོན་མང་པོ་ལ་འདིའི་དོན་འདི་ཡིན་འདུག་སྙམ་པས། བརྟག་དཔྱད་མ་བྱེད་པར་སྒོམས་ཤིག། ངེད་ཀྱི་འདི་བྱིན་རླབས་ལ་རེ་བ་ཡིན་གསུངས་ནས་བསྒོམས་པས་གཟོད་དངོས་པོའི་དེ་ཁོ་ན་ཉིད་ལྷང་གིས་རྟོགས་ཏེ། བྱ་བྱེད་ཐམས་ཅད་གཞི་རྩ་དང་བྲལ་བར་ཐུགས་སུ་ཆུད། སྔར་རང་གིས་ཆོས་ཟབ་མོ་བཤད་པ་རྣམས་ཀྱང་དོན་ཐོག་ཏུ་དུས་དེར་ཕེབས་ནས་སྨྱོན་པ་བརྟུལ་ཞུགས་ཀྱི་སྤྱོད་པས་གཞན་དོན་རྒྱ་ཆེར་མཛད་ནས་དགུང་ལོ་བདུན་ཅུ་རྩ་གཅིག་པ་ཆུ་མོ་གླང་གི་ལོ་ལ་ཞི་བར་གཤེགས་སོ། །དེའི་བུ་སློབ་གནས་ལ་མིང་བཏགས་པ་ལྷ་རི་བ་ནམ་མཁའ་འོད། ལྷ་ཕྱུག་པ་ཉི་མ་འོད། ཁ་རག་པ་འདུལ་བ་འོད། འབྲི་ར་བ་ཤཱཀྱ་འོད་ཅེས་གྲགས་པ་རྣམས་དང་། མཉམ་མེད་ཤཱཀྱ་ཡེ་ཤེས་དང་། བྲག་དཀར་ཤེས་རབ་ཡེ་ཤེས་ལ་སོགས་པ་གཞན་དོན་ནུས་པ་མང་དུ་བྱུང་ངོ་། །དེ་དག་ལས་གྲྭ་འཇད་པ་ནམ་མཁའ་འོད་སངས་རྒྱས་རས་ཆེན་དུ་གྲགས་པས་ལྷ་རི་ཁའི་དགོན་པ་བཏབ་སྟེ། དབོན་པོ་ལྷ་དགས་གདན་ས་མཛད། དེ་ནས་དབོན་རྒྱུད། དེ་ནས་དེ་བ་ཀུ་མཱ་ར་ཞེས་པ་ལ་སོགས་པ་བྱོན་ཞིང་། ལྷ་རི་གྱང་མཐོ་སོགས་དགོན་པ་སྐོར་གསུམ་དང་འབྲོག་ཡངས་སྟེངས་ལ་སོགས་པ་བཏབ། འགྲོ་ཕན་རྒྱ་ཆེར་མཛད་པར་གྲགས་སོ། །ཞང་རིན་པོ་ཆེའི་གདན་ས་པ་མཉམ་མེད་ཤཱཀྱ་ཡེ་ཤེས་ནི། མེ་མོ་ཡོས་ལོ་ཞེ་བརྒྱད་པ་ཤིང་སྟག་ལ་གདན་སར་བསྐོས། དྲུག་ཅུ་རེ་གཅིག་པ་ལ་གཤེགས། དེ་རྗེས་གདན་ས་སློབ་དཔོན་བྱང་ཡེས་ལོ་གསུམ། དེ་རྗེས་ལྷ་དབང་ཕྱུག་མཁར་པས་ལོ་ལྔ། དེ་རྗེས་སངས་རྒྱས་འབུམ་པས་ལོ་བཅོ་བརྒྱད། དེ་རྗེས་སྒོམ་ཡེ་ཤེས་ལྡན་གྱིས་ལོ་བདུན། དེ་རྗེས་རིན་པོ་ཆེ་སངས་རྒྱས་གཞོན་ནུས་ལོ་ལྔ། དེ་ནས་རིམ་པར་སངས་རྒྱས་འབུམ་མོ། རིན་པོ་ཆེ་གསེར་ཁང་པ། རིན་པོ་ཆེ་སངས་རྒྱས་རིན་ཆེན། དེ་རྗེས་རིན་ཆེན་ཤཱཀྱ་འབུམ། དེ་རྗེས་རིན་ཆེན་བྱང་ཆུབ་བཟང་པོ། དེ་རྗེས་སྤྱན་སྔ་གྲགས་པ་བཤེས་གཉེན་གྱིས་གདན་ས་ལོ་ཉི་ཤུ་རྩ་བཞི་མཛད་དེ། དྲུག་ཅུ་ལ་གཤེགས་སོ། །དེ་རྣམས་ཚལ་གུང་ཐང་པའི་བླ་རབས་ཀྱི་རིམ་པའོ། །དེ་ཡང་རྗེ་མར་པ་ནས་བརྒྱུད་པའི་གདམས་པ་རྣམས་ཚིག་བརྒྱུད་ཡིན་པར། དོན་ལ་ཕྱག་རྒྱ་ཆེན་པོ་དྲི་མ་མེད་པར་རྟོགས་པའི་བརྒྱུད་པ་ཡིན་པར་བཤད། ཕྱག་རྒྱ་ཆེན་པོའི་རྟོགས་པ་དེ་ཡང་རྗེ་མར་པ་དང་མི་ལ་ཡན་ལ་སྔོན་དུ་གཏུམ་མོའི་ཡེ་ཤེས་བསྐྱེད་ནས། དེའི་སྟོབས་ཀྱིས་ཕྱག་ཆེན་གྱི་རྟོགས་པ་སྐྱེད་པར་མཛད་པས་རྫོགས་པའི་རིམ་པར་ཡང་བཞེད། དྭགས་པོ་རིན་པོ་ཆེས་ནི། ལས་དང་པོ་པ་དབང་མ་ཐོབ་པ་དག་ལ་ཡང་ཕྱག་རྒྱ་ཆེན་པོའི་རྟོགས་པ་བསྐྱེད་པར་མཛད་པ་ནི་ཕ་རོལ་ཏུ་ཕྱིན་པའི་ལུགས་ཡིན་གསུངས། དེ་ཡང་ཐེག་པ་ཆེན་པོ་རྒྱུད་བླ་མ་ལ་བརྟེན་ནས་སོ་གསུངས།

༈ བསྟན་པ་ཕྱི་དར་གྱི་དུས་སུ་མངའ་བདག་དཔལ་འཁོར་བཙན་གྱི་སྲས་ཁྲི་བཀྲ་ཤིས་བརྩེགས་པ་དཔལ་གྱིས་རུ་ལག་གི་སའི་ཆར་རྒྱལ་སྲིད་བསྐྱངས་པའི་སྲས་དཔལ་ལྡེ། འོད་ལྡེ། སྐྱིད་ལྡེ་ཞེས་པའི་སྲས་གསུམ་བྱུང་བ་དེས། ལོ་སྟོན་ལ་བདག་གི་ཐད་དུ་མཁན་སློབ་ཟུང་གཅིག་བསྟན་པ་སྤེལ་བར་ཞུས་པས། མཁན་པོ་ཤཱཀྱ་གཞོན་ནུ་དང་། སློབ་དཔོན་ཡེ་ཤེས་བརྩོན་འགྲུས་གཉིས་བཏང་བས། དེ་གཉིས་ཀྱིས་བཀའ་བགྲོས་ནས་འབྲོག་མི་དང་སྟག་ལོ་གཞོན་ནུ་གཉིས་ལ་གསེར་མང་པོ་བསྐུར་ནས་རྒྱ་གར་དུ་བརྫངས་པས་སྟག་ལོས་རྡོ་རྗེ་གདན་དུ་བསྐོར་བ་མཛད་ཅིང་བསླབ་གཉེར་མ་མཛད། འབྲོག་མིས་ཤནྟི་པའི་སར་ལོ་བརྒྱད་བཞུགས་ནས་གསན་པ་མང་དུ་མཛད། སླར་བོད་དུ་བྱོན་སློབ་དཔོན་གཉིས་ཀྱང་དགྱེས་པར་གྱུར། དེ་ནས་བརྟག་གཉིས་ལ་སོགས་པའི་གསང་སྔགས་ཀྱི་ཆོས་མང་དུ་བསྒྱུར། ཤཱནྟི་པའི་དག་ལྡན་ལའང་འགྱུར་མཛད། འགོས་ལོ་ཙཱ་བ་དང་མར་པ་ལོ་ཙཱ་གཉིས་ཀྱང་ཁོང་གི་སློབ་མ་ཡིན་པར་བཤད་དེ། མར་པས། དཔལ་མྱུ་གུ་ལུང་གི་དགོན་པ་རུ། །སྒྲ་སྒྱུར་འབྲོག་མི་ལོ་ཙཱ་ལ། །སྒྲ་ཐད་ཀློག་སྐད་ཀྱིས་ཡིག་ཚང་བསླབས། །ཁོང་བཀའ་དྲིན་མི་ཆུང་ཆེ་བར་འཁུམས། །ཞེས་པའི་མགུར་བཞེས་སྐད། དེ་ལྟར་ན་བླ་ཆེན་འབྲོག་མི་ནི། གདམས་པ་མང་དུ་གསན་པའི་ཡོན་ཏན། བསྐྱེད་རྫོགས་གཉིས་ལ་བསྟན་པ་ཐོབ་ཅིང་། རླུང་གི་སྟོབས་ཀྱིས་ནམ་མཁའ་ལ་སྐྱིལ་ཀྲུང་འཆའ་བ། འཆི་བ་ལམ་དུ་བྱས་པས་སྐུ་ལུས་དེ་ཉིད་མ་སྤངས་པར་འཚང་རྒྱ་བར་བཞེད་ནས་རྟེན་འབྲེལ་མ་འགྲིག་པས་བར་དོར་ཕྱག་རྒྱ་ཆེན་པོའི་ཡེ་ཤེས་བརྙེས་པ་ཞིག་གོ།

དཔལ་ལྡན་ས་སྐྱ་པའི་བླ་རབས།

དེ་ལ་སློབ་མ་མང་དུ་ཡོད་ཀྱང་གཞུང་དང་གདམས་པ་གཉིས་ཀའི་བདག་པོར་གྱུར་པ་ནི། དཔལ་ལྡན་ས་སྐྱ་པའི་བླ་མ་རྣམས་ཏེ། དེ་དག་གང་ལས་སུའི་རིགས་བརྒྱུད་དུ་བྱུང་བའི་རིམ་པ་ཡང་། བོད་ཡུལ་དུ་ལྷ་སྲིན་དར་བའི་ཚེ་ཡར་ཀླུང་ཤར་གྱི་གཡའ་སྤང་སྐྱེས་གཅིག་དང་སི་ལི་མ་གཉིས་མཛའ་བར་གྱུར་པ་ན། སྲིན་ཁྲག་མེད་ཀྱང་དེ་ལ་ཆགས་པས་དེ་གཉིས་འཁོན་པའི་བར་དུ་ལྷ་སྲས་སྐྱེས་པ་ལ་ཇོ་བོ་འཁོན་བར་སྐྱེས་ཞེས་གྲགས་པ་ལ། མ་སངས་ལས་འཁོན་ནས་སྐྱེ་བརྒྱུད་རིམ་པར་བྱོན་ཞིང་། རྒྱལ་པོ་ཁྲི་སྲོང་ལྡེ་བཙན་གྱི་ནང་བློན་དུ་གཏོགས་པ་འཁོན་དཔལ་མོ་ཆེའི་སྲས་བཞི་སྟེ། ཁྲི་མཛེས་ལྷ་ལེགས། ཚེ་ལ་དབང་ཕྱུགའཁོན་ཀླུའི་དབང་པོ་བསྲུང་བ། ཚེ་འཛིན་ནོ། །གསུམ་པ་དེ་སད་མི་བདུན་གྱི་དྲུག་པ་ཡིན། བཞི་པའི་སྲས་རྡོ་རྗེ་རིན་པོ་ཆེ་ནས་བུ་བརྒྱུད་རིམ་པ་བཞིན། ཤེས་རབ་ཡོན་ཏན། ཡོན་ཏན་འབྱུང་གནས། ཚུལ་ཁྲིམས་རྒྱལ་པོ། རྡོ་རྗེ་གཙུག་ཏོར། དགེ་སྐྱབས། དགེ་མཐོང་། བལ་པོ་ཤཱཀྱ་བློ་གྲོས། དེ་དག་ཐམས་ཅད་ཀྱང་གསང་སྔགས་རྙིང་མའི་ཆོས་ཀྱི་བདག་པོ་དང་ཡོན་ཏན་དང་ལྡན་པའོ། །དེ་ལ་སྲས་གཉིས། གཅེན་ཤེས་རབ་ཚུལ་ཁྲིམས་ཚངས་སྤྱོད་བསྲུང་། གཅུང་དཀོན་མཆོག་རྒྱལ་པོ་ཤིང་ཕོ་ཁྱི་ལ་འཁྲུངས། བཞི་བཅུ་བཞེས་པ་ཆུ་མོ་གླང་ལ་ས་སྐྱ་བཏབ། དྲུག་ཅུ་རྩ་དགུ་པ་ཆུ་ཕོ་རྟ་ལ་གཤེགས། དེའི་སྲས་ས་ཆེན་ཀུན་སྙིང་ཡབ་ཀྱི་ང་དགུ་པ་ཆུ་ཕོ་སྤྲེལ་ལ་འཁྲུངས། བཅུ་གཅིག་ལོན་པ་ལ་ཡབ་གཤེགས། ལོ་སྐབས་དེར་བ་རི་ལོ་ཙཱ་བ་དྲུག་ཅུ་རྩ་གསུམ་ལོན་པ་གདན་སར་བསྐོས། དེ་ནས་རང་ལོ་ཉི་ཤུ་པ་ནས་དྲུག་ཅུ་རྩ་བདུན་བར་གདན་ས་ལོ་ཞེ་བརྒྱད་བཟུང་ནས་ས་ཕོ་སྟག་ལ་གཤེགས། ས་ཆེན་ལ་སྲས་བཞི་ལས་ཀུན་དགའ་འབར་རྒྱ་གར་ལ་བྱོན་མཁས་པར་གྱུར་ཀྱང་ཉི་ཤུ་རྩ་གཉིས་ལ་རྒྱ་གར་དུ་གཤེགས། གཉིས་པ་སློབ་དཔོན་བསོད་ནམས་རྩེ་མོ་ཡབ་ཀྱི་ང་གཅིག་པ་ཆུ་ཕོ་ཁྱི་ལ་འཁྲུངས། བཞི་བཅུ་རྩ་གཅིག་པ་ཆུ་ཕོ་སྟག་ལ་གཤེགས། གསུམ་པ་རྗེ་བཙུན་གྲགས་པ་རྒྱལ་མཚན་ནི། ཡབ་ཀྱི་ང་དྲུག་པ་མེ་མོ་ཡོས་ལ་འཁྲུངས། རང་ལོ་ཉེར་དྲུག་པ་ཆུ་འབྲུག་ནས་གདན་ས་བསྐྱངས། བདུན་ཅུ་པ་མེ་ཕོ་བྱི་བ་ལ་གཤེགས། བཞི་པ་དཔལ་ཆེན་འོད་པོ་ཡབ་ཀྱི་ང་དགུ་པ་ལྕགས་རྟ་ལ་འཁྲུངས། ང་བཞི་པ་ཆུ་མོ་བྱ་ལ་གཤེགས། དེ་ལ་སྲས་གཉིས་ལས། ཆེ་བ་ས་པཎྜི་ཏ་ཡབ་ཀྱི་སོ་གསུམ་པ་ཆུ་ཕོ་སྟག་ལ་འཁྲུངས། དྲུག་ཅུ་རྩ་གསུམ་པ་ཤིང་ཕོ་འབྲུག་ལ་གོང་མ་རྒྱལ་པོས་རྒྱ་ནག་ཏུ་སྤྱན་དྲངས། བདུན་ཅུ་པ་ལྕགས་མོ་ཕག་ལ་གཤེགས། གཅུང་ཟངས་ཚ་བསོད་ནམས་རྒྱལ་མཚན་ཡབ་ཀྱི་སོ་ལྔ་པ་ཤིང་ཕོ་འབྲུག་ལ་འཁྲུངས། ང་དྲུག་པ་ས་མོ་ཕག་ལ་གཤེགས། དེའི་སྲས་བླ་མ་འཕགས་པ་ཡབ་ཀྱི་ང་གཉིས་པ་ཤིང་མོ་ལུག་ལ་འཁྲུངས། ཟུལ་ཕུར་ན་བཟའ་ཕྲེད་གསོལ་ལ་དགེ་ཚུལ་མཛད། ཉི་ཤུ་རྩ་གཅིག་པ་ཤིང་མོ་ཡོས་ལ་བསྙེན་པར་རྫོགས། ཉི་ཤུ་རྩ་དྲུག་པ་ལྕགས་ཕོ་སྤྲེལ་ལ་སེ་ཆེན་རྒྱལ་སར་ཐོན་པས་གོང་མས་བླ་མར་བཀུར། བོད་ཁྲི་སྐོར་བཅུ་གསུམ་སོགས་སྲིད་ཞིའི་དཔལ་འབྱོར་ཕུན་སུམ་ཚོགས་པས་བཀུར་སྟི་བླ་ན་མེད་པ་བྱས། སོ་གཅིག་པ་ཤིང་མོ་གླང་ལ་བོད་ལ་བཏེགསླར་ས་མོ་སྦྲུལ་ལ་གོང་མའི་དྲུང་དུ་བྱོན་ལོ་བདུན་བཞུགས་ནས་ཞེ་གཉིས་པ་མེ་ཕོ་བྱི་བ་ལ་གདན་སར་ཕེབས། མེ་མོ་གླང་ལ་:ཆོས་༼ཆུ་༽མིག་ཆོས་འཁོར་མཛད། བཞི་བཅུ་རྩ་དྲུག་པ་ལྕགས་ཕོ་འབྲུག་ལ་གཤེགས། དེའི་གཅུང་པོ་བླ་མ་ཕྱག་ན་ཡབ་ཀྱི་ང་དྲུག་པ་ས་མོ་ཕག་ལ་འཁྲུངས། ཉི་ཤུ་རྩ་དགུ་པ་མེ་མོ་ཡོས་ལ་གཤེགས། སློབ་དཔོན་རིན་ཆེན་རྒྱལ་མཚན་ཡབ་ཟངས་ཚས་ང་ལྔ་བཞེས་པ་ས་ཕོ་ཁྱི་ལ་འཁྲུངས་ཞེ་གཉིས་པ་ས་མོ་ཡོས་ལ་གཤེགས། ཡང་བླ་མ་ཡེ་ཤེས་འབྱུང་གནས་ཀྱི་སྲས་བདག་ཉིད་ཆེན་པོ་བཟང་པོ་དཔལ་ཡབ་ཀྱི་ཉེར་ལྔ་པ་ཆུ་ཕོ་ཁྱི་ལ་འཁྲུངས། རེ་གཅིག་པ་ཆུ་ཕོ་ཁྱི་ལ་གཤེགས། བླ་མ་འདི་ལ་སྲས་བཅུ་གཉིས་ཡོད་པར་གྲགས། དེ་ལ་སོགས་པ་ནས་ད་ལྟ་སྔགས་འཆང་ཀུན་དགའ་བཀྲ་ཤིས་ཀྱི་སྲས་འདི་རྣམས་འཁོན་གྱི་རིགས་ལས་བསྟན་འཛིན་སྐྱེས་ཆེན་ཟམ་མ་ཆད་པར་བྱོན་པའོ། །

དམ་པའི་ཆོས་སྡུག་བསྔལ་ཞི་བྱེད་ཇི་ལྟར་བྱུང་བའི་ལོ་རྒྱུས།

༈ དམ་པའི་ཆོས་སྡུག་བསྔལ་ཞི་བྱེད་ཇི་ལྟར་བྱུང་བའི་ལོ་རྒྱུས་ནི། དེའང་ཕ་རོལ་ཏུ་ཕྱིན་པ་བདུད་ཀྱི་གཅོད་ཡུལ་ཞེས་བྱ་བ་གཅོད་ཀྱི་བསམ་གཏན་ནི། སྡུད་པ་ལས། རྒྱུ་རྣམས་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པ་མི་ནུས་ཏེ། །སྟོང་པར་གནས་དང་སེམས་ཅན་ཡོངས་སུ་མི་གཏོང་དང་། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཞེས་གསུངས་པའི་དོན་ཉམས་སུ་ལེན་པ་སྟེ། སྟོང་པར་གནས་པའི་ལྟ་བ། སེམས་ཅན་ཡོངས་སུ་མི་གཏོང་བའི་སྙིང་རྗེ། ཇི་སྐད་སྨྲས་བཞིན་བྱེད་པའི་བྱང་སེམས་ཀྱི་ཚུལ་ཁྲིམས། བདེ་བར་གཤེགས་པས་བྱིན་གྱིས་བརླབས་པ་སྟེ། དེ་ཉམས་སུ་ལེན་པ་ལ་གཅོད་ཡུལ་ཞེས་བྱ་སྟེ། དེ་ཡང་གང་ལ་གཅོད་ཅེ་ན། མཛོད་ལས། ཕྲ་རྒྱས་སྤངས་པ་མ་ཡིན་དང་། །ཡུལ་ནི་ཉེ་བར་གནས་པ་དང་། །ཚུལ་བཞིན་མ་ཡིན་ཡིད་བྱེད་ལས། །ཉོན་མོངས་སྐྱེ་སྟེ། ཞེས་བཤད་པས་གཅད་བྱ་ནི་ཉོན་མོངས་པ་ཡིན་ལ། ཉོན་མོངས་པ་དེ་དག་ཕྲ་རྒྱས་དང་། ཡུལ་དང་། ཚུལ་བཞིན་མ་ཡིན་པའི་ཡིད་ལ་བྱེད་པ་ལས་སྐྱེ་བས་ན། རྣལ་འབྱོར་པས་ཡུལ་དེ་ཉེ་བར་བཅུག་ནས་བག་ཆགས་བླངས་ཏེ། ཚུལ་བཞིན་མ་ཡིན་པའི་ཡིད་ལ་བྱེད་པ་སྔོན་དུ་འགྲོ་བའི་སྒོ་ནས་ཉོན་མོངས་པ་རྣམས་ཡུལ་གྱི་ཐོག་དེ་ཉིད་དུ་གཅོད་པར་བྱེད་པས་གཅོད་ཡུལ་ཞེས་བྱའོ། །དེའི་གདམས་ངག་ཀྱང་དམ་པ་ནས་བརྒྱུད་པ་ལ་ཕོ་གཅོད་དང་། མ་ཅིག་ནས་བརྒྱུད་པ་ལ་མོ་གཅོད་ཅེས་བྱ། དེ་སྤྱིར་བོད་དུ་བྱོན་པའི་གདམས་པ་ཁྲིད་ལུགས་ཕལ་ཆེ་བ་ནི་སློབ་མ་མི་དགེ་བ་ལས་བཟློག་ཏུ་བཅུག་ནས་དེའི་སེམས་རྒྱུད་ཀྱི་ཉོན་མོངས་པ་སྦྱོང་བར་བྱེད་པ་གཙོ་ཆེ་བ་ཡིན་མོད། ཞི་བྱེད་ཀྱི་ཆོས་འདི་ནི་ཚེ་རབས་སྔ་མའི་ལས་དབང་གིས་ཚེ་འདིར་ལུས་དམན་པར་གྱུར་པ་དང་། ནད་བུ་ཅན་དང་། དབུལ་ཕོངས་ཅན་དང་། མི་མ་ཡིན་པས་གཙེས་པ་དག་གི་སྡུག་བསྔལ་རྣམས་འཕྲལ་འཕྲལ་དུ་ཞི་བར་བྱས་ནས་རྣལ་འབྱོར་ལ་སྦྱོར་བས་ན་སྡུག་བསྔལ་ཞི་བྱེད་ཅེས་བྱ་སྟེ། རྒྱལ་བའི་ཡུམ་ལས་ཀྱང་། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས། ཞེས་གསུངས་སོ། །

དམ་པ་སངས་རྒྱས།

༈ འདིའི་ཆོས་ཀྱི་བདག་པོ་ནི་དམ་པ་སངས་རྒྱས་ཏེ། དེ་ནི་རྒྱ་གར་ལྷོ་ཕྱོགས་སུ་ཡབ་ནོར་བུ་ལེན་པའི་རིགས་ཅན་བརྩོན་འགྲུས་གོ་ཆ་དང་། ཡུམ་དཀོན་མཆོག་མཆོད་པ་ལ་མཁས་པ་སྤོས་སྦྱོར་ལ་བརྩོན་པའི་རིགས་བ་ར་ས་ཧ་ཞེས་བྱ་བའི་སྲས་སུ་འཁྲུངས་མ་ཐག་ནས་ཚེམས་དང་ལྡན་པ་ཞིག་སྟེ། སྐྱེ་བ་བདུན་པ་ཡིན་པས་སྡིག་པའི་དྲི་མ་མེད་ཅིང་དགེ་བ་ལ་ངང་གིས་དགའ་བ་སྟེ། བི་ཀྲ་མ་ལ་ཤྲཱི་ལར་མཁན་པོ་དགེ་བའི་ལྷ་ལས་རབ་ཏུ་བྱུང་ནས་དམ་པའི་ཆོས་འདུལ་བ་ལ་མཁས་པར་སྦྱངས། བླ་མ་གསེར་གླིང་པ་ལས་བྱང་ཆུབ་མཆོག་ཏུ་སེམས་བསྐྱེད། ངག་གི་དབང་ཕྱུག་སོགས་བླ་མ་མང་པོ་ལས་དབང་དང་གདམས་པ་མཐའ་ཡས་པ་ནོས་ཏེ་རྟེན་སྡོམ་པ་གསུམ་ལྡན་དུ་མཛད་དོ། །དེ་ཡང་མཚན་ཉིད་སྒྲ་རིག་པའི་བླ་མ་བཅུ་གཅིག་ནི། ཀླུ་སྒྲུབ། ཤེས་རབ་བཟང་པོ། ཡོན་ཏན་འོད། ཆོས་གྲགས། ཨཱ་ཀ་ར་སིདྡྷི་། ཤངྐ་ར། ཡེ་ཤེས་སྙིང་པོ། ཐོགས་མེད། ཨཱཪྻ་དེ་བ། ཞི་བ་ལྷ། བླ་མ་གསེར་གླིང་པ་རྣམས་སོ། །ཕ་རྒྱུད་གཡོ་བ་རླུང་གི་བླ་མ་བཅུ་གཅིག་ནི། ངག་གི་དབང་ཕྱུགབུདྡྷ་གུཔྟགོ་དྷ་རི། ༼ཀརྨཱ་བཛྲ། ༽ཛ་བ་རི་པ། ཡེ་ཤེས་ཞབས། ཀླུ་བྱང་། ཨཱ་ནནྟ། ཀྲྀཥྞ་པ། བ་སུ་དྷ་རི། པདྨ་བཛྲ་རྣམས་སོ། །མ་རྒྱུད་བདེ་བ་ཉམས་མྱོང་གི་བླ་མ་བཅུ་གཅིག་ནི། མཚོ་སྐྱེས་རྡོ་རྗེ། ཨིནྡྲ་བྷུ་ཏི། ཌོཾམྦྷི་པ། རྡོ་རྗེ་དྲིལ་བུ་པ། ཏིལླི་པ། ནག་པོའི་ཞབས། སྒེག་པ་རྡོ་རྗེ། ལཱུ་ཨི་པ། བི་རུ་པ། ཀུན་དགའ་སྙིང་པོ། ཀུ་ཀུ་རཱི་པ་རྣམས་སོ། །ཕྱག་རྒྱ་ཆེན་པོ་བརྡའི་བླ་མ་བཅུ་གཅིག་ནི། ས་ར་ཧ། ཙརྨ་པ། གུ་ཎ་རི། ཏོག་ཙེ་པ་ལ་སོགས་པ་རྣམས་སོ། །རིག་པ་ངོ་སྤྲོད་ཀྱི་བླ་མ་བཅུ་ནི། རི་ཁྲོད་མ། དྲི་མེད་མ། པདྨོ་ཞབས། ཀུ་མུ་ད། བདེ་བའི་འབྱུང་གནས་ལ་སོགས་པ་རྣམས་སོ། །དེ་རྣམས་བསྟེན་ནས་ཉན་བཤད་མཛད་པས། ཐུན་མོང་གི་དངོས་གྲུབ། ས་འོག་དང་། མིག་སྨན་དང་། རྐང་མགྱོགས། རིལ་བུ། གནོད་སྦྱིན་མོ། རལ་གྲི། མཁའ་སྤྱོད་ལ་སོགས་པ་གྲུབ་ཅིང་། མཆོག་གི་དངོས་གྲུབ་མཐོང་ལམ་ཆེན་པོའི་ཡེ་ཤེས་བརྙེས་པར་མཛད་དོ། །དེ་ལ་བོད་ཡུལ་དུ་གཞན་དོན་ཇི་ལྟར་མཛད་པའི་ཚུལ་ནི། སྤྱིར་བོད་དུ་ལན་ལྔ་བྱོན་པ་ལ། དང་པོ་འབྲིན་ཐང་ལས་སྒོ་ནས་རྩ་རིར་བྱོན། ཀོང་ཡུལ་དང་སུམ་ཡུལ་གྱི་བར་བཅད་དེ་སྨད་ཁམས་གསུམ་ཞབས་ཀྱིས་བཅགས། དེ་དུས་ཉིད་ན་ཆོས་སྦྱིན་པའི་སྣོད་མེད་ཀྱང་། ཕྱིས་དེ་རྣམས་སུ་བསྟན་པ་དར་བར་ལུང་བསྟན། གཉིས་པ་ནི་ཁ་ཆེ་ནས་འཐོན་ཏེ་མངའ་རིས་སུ་བྱོན། ཞང་ཞུང་གླིང་ཁ་བ་དང་། འབྲུག་བླ་མ་ལ་གདམས་པ་འགའ་རེ་གནང་། གསུམ་པ་ནི་བལ་པོ་ནས་ཚོང་པ་དང་འགྲོགས་ཏེ་བྱོན། ཡར་ཀླུང་གི་སྨ་ར་སེར་པོ་དང་མཇལ་ཏེ་གཅོད་ཀྱི་གདམས་པ་མང་དུ་གནང་ངོ་། །བཞི་པ་ནི་ཤ་འུག་སྟག་སྒོ་ལ་བྱོན་ནས་གཉལ་དུ་བཞུགས། དེ་ནས་དབུས་སུ་ཕེབས་ནས་རྨ་སོ་ལ་སོགས་པའི་དོན་མཛད། ལྔ་པ་ནི་རྒྱ་ནག་ཏུ་བྱོན་དེར་ལོ་བཅུ་གཉིས་བཞུགས་ནས་དིང་རིར་ཕེབས་སོ། །དེ་ལྟར་སློབ་མ་དཔག་ཏུ་མེད་ཀྱང་གྲགས་ཆེ་བའི་བརྒྱུད་འཛིན་སྔ་ཕྱི་གསུམ་སྟེ། བརྒྱུད་པ་དང་པོ་ནི། ཁ་ཆེ་ཛྙཱ་ན་གུ་ཧྱ་ལ་གསུངས་པའི་ཞི་བྱེད་སྒྲོལ་མའི་སྐོར་གསུམ་དང་། གཤིན་རྗེ་གཤེད་ལ་སོགས་པའི་སྒྲུབ་ཐབས་རྣམས་ཏེ། དེ་རིམ་པར་བརྒྱུད་པའི་མཐར་རོག་ཤེས་རབ་འོད་ལ་བརྒྱུད་དོ། །བརྒྱུད་པ་བར་མ་ནི། གཙོ་བོ་རྨ་སོ་སྐམ་གསུམ་ཕྲན་དང་བཅས་པ་རྣམས་ཏེ། དམ་པ་རྨ་ནི། ཡར་སྟོད་སྐྱེར་སྣར་རྨ་སྨོན་ལམ་ཞེས་བྱ་བའི་སྲས་སུ་འཁྲུངས་པ་དེའོ། །དེ་ལས་རིམ་པར་བརྒྱུད་པའི་མཐར་རོག་ཤེས་རབ་འོད་ལ་བརྒྱུད་དོ། །སོ་ལུགས་ནི། ཡུལ་ར་མོ་བ་དེར་ལོ་ཉེས་བྱུང་ནས་བཟའ་མི་རྣམས་སྤྲང་དུ་སོང་། བུ་སྤུན་གཉིས་ཡོད་པ། ཆུང་བ་སོ་ཆུང་དང་། ཆེ་བ་ལ་སོ་རིང་ཞེས་ཟེར། སོ་ཆུང་དམ་པས་རྗེས་སུ་བཟུང་བས་རྟོགས་པ་ཁྱད་པར་ཅན་འཁྲུངས་གདམས་པ་མ་ལུས་པ་གནང་ནས་རྗེས་སུ་བཟུང་བར་མཛད་དོ། །སོ་ལུགས་ཀྱི་ཆོས་ཀྱི་རྣམ་གྲངས་ནི། ཚིག་བརྒྱུད་དང་དོན་བརྒྱུད་གཉིས་ལས། ཚིག་བརྒྱུད་ལའང་བརྒྱུད་པ་ཆེན་པོ་དང་བརྒྱུད་ཕྲན་གཉིས་ལས། ཆེན་མོ་ལ་དམ་པ་སྐྱེས་མཆོག་ཆེ་བ་ང་བཞི། འབྲིང་པོ་གཉིས། ཆུང་བ་བཅུ་བདུན་དེ། དེ་ལ་གྲུབ་པ་ཐོབ་པ་རེ་རེའི་ལོ་རྒྱུས་དང་གདམས་པའི་ངོ་བོ་སློབ་མ་འཁྲིད་ལུགས་ཆ་ཚང་རེ་རེ་ཡོད་པས་བརྒྱུད་པ་ལྔ་བཅུ་རྩ་བཞིའོ། །བརྒྱུད་པ་བརྒྱ་དང་གསུམ་དུ་འགྱུར་བས་བརྒྱུད་པ་ཆེན་མོ་ཞེས་བྱའོ། །བརྒྱུད་ཕྲན་ནི། དོན་སྐོར་ལམ་རིམ་པ་བཞི་ལ། བསམ་གཏན་གྱི་ཐུན་ཆེ་ཆུང་། གྲགས་པ་བརྒྱད། ཡབ་སྲས་གསུམ་མམ་སྐྱོན་ཅན་སྐྱོན་མེད་ལ་སོགས་ཆོས་སྡེ་སུམ་ཅུ་རྩ་གཉིས་བཞུགས། དོན་བརྒྱུད་ལ་ཕྱོགས་སུ་ལྷུང་མ་ལྷུང་གཉིས་ལས་དང་པོ་ནི་རྣལ་འབྱོར་ཕོ་མོ་ལྔ་བཅུ་རྩ་བཞི་ལ་དོན་བརྒྱུད་ལྔ་བཅུ་རྩ་བཞི་བླ་མ་སུམ་ཅུ་སོ་གཉིས་ལ་དོན་བརྒྱུད་སོ་གཉིས། དམ་པ་བཅུ་བདུན་ལ་དོན་བརྒྱུད་བཅུ་བདུན་བཞུགས། ཕྱོགས་སུ་མ་ལྷུང་བ་ལ་མིག་འབྱེད་ཀྱི་སྐོར་དང་མཁའ་འགྲོ་མའི་སྐོར་ལས། དང་པོ་ལ་བུ་བཞི་མ་ལྔ་སྟེ། དེ་ཡང་གཞུང་སྦས་པ་མིག་འབྱེད། དེའི་ཡན་ལག་དུས་དང་དུས་ཕྲན་ལ་གདམས་པ། ངོ་སྤྲོད་བརྒྱ་རྩ་དྲུག་པ། མ་འགགས་རྣམ་དག་རྡོ་རྗེ་སེམས་དཔའི་གསང་ལམ་མོ། །མཁའ་འགྲོ་མའི་སྐོར་ལ། སོའི་སྐོར་མགོ་ཆེན་མོ་བཞི་སྟེ་མཆོག་སྒྲུབ་པ་ལ་བརྡའ་སྐོར། ཐུན་མོང་སྒྲུབ་པ་ལ་ཡི་གེ་བཞི་པའི་སྐོར། གཉིས་ཀ་སྒྲུབ་པ་ལ་ཛ་ག་ཏའི་སྐོར་དང་ཐུན་སྐོར་རོ། །བརྡའ་སྐོར་ལ་ཧེ་རུ་ཀའི་བརྡའ་སྐོར། བདེ་བར་གཤེགས་པའི་བརྡའ་སྐོར། རྡོ་རྗེ་དྲིལ་བུའི་བརྡའ་སྐོར། དམ་པའི་བརྡའ་སྐོར་ཐོར་བུའོ། །ཐུན་མོང་སྒྲུབ་པ་ལ་དམར་མོ་གསུང་སྒྲུབ་དང་། ནག་མོ་ཐུགས་སྒྲུབ་བོ། །དེ་ལ་ཡང་ཕག་མོ་ཆོས་སྐུའི་སྒྲུབ་ཐབས། ལོངས་སྐུའི་སྒྲུབ་ཐབས། སྤྲུལ་སྐུའི་སྒྲུབ་ཐབས་སོ། །ཛ་ག་ཏའི་སྐོར་ནི། གཏུམ་མོ་འཁོར་ལོ་གཅིག་མ་ཡིན། ཐུན་སྐོར་ལ། སྤྱོད་ལམ་གྱི་ཉམས་སྐྱོང་ལུགས་སོ། །དེ་རྣམས་ཀྱི་རྩ་བའི་སྙིང་པོར་གྱུར་པ་ནི། རྒྱུད་སྡེ་དང་ཆོས་སྐད་བསྟུན་པ་སྨྲ་བའི་སེང་གེའི་དོན་བརྒྱུད། ཆོས་སྐད་མ་བསྟུན་པ་བརྒྱུད་པ་བཞི་པ་ཡོངས་སུ་མ་གྲགས་པའི་དོན་བརྒྱུད། མ་ཚང་མདོར་བསྡུས། སོའི་རིགས་པ་སྲང་འཇུག། སྙན་བརྒྱུད་བཞི་རྣམས་བཞུགས་སོ། །སྐམ་ལུགས་ནི། དགེ་བཤེས་གྲྭ་པའི་སློབ་མ་རྟེན་དགེ་སློང་དུ་བཞུགས། དེ་ནི་དམ་པ་ལ་རྗེས་སུ་བཟུང་ལ་གདམས་པ་གནང་བར་གསོལ་ཞུས་པས། ཞལ་གྱིས་མ་བཞེས་ནན་གྱིས་ཞུས་པས་མིང་ཅི་ཡིན་གསུངས། སྐམ་ཡེ་ཤེས་རྒྱལ་མཚན་ཡིན་ཞུས་པས། འོ་ན་ཕན་ཐོགས་པར་འདུག་པས་གནང་། ནངས་པར་འོང་གིས་གསུང་། དེ་ནུབ་ཁ་བ་ཆེན་པོ་བབས་པའི་ནངས་པར་ནམ་ལངས་མ་ཐག་ཨ་ཙར་གཅིག་ནང་དུ་བྱོན་པས། བླ་མ་ཡིན་ནམ་བྱས་པས་ཡིན་ཟེར། ནངས་པར་འབྱོན་སྙམ་པ་ལ་བྱས་པས་བར་ཆད་བྱུང་དོགས་ནངས་རང་འོང་གསུངས། ཁ་བ་ལ་འོ་རྒྱལ་ལམ་བྱས་པས་ཁ་བ་ལ་མ་རིག་གསུངས། སྒོ་མ་ཕྱེ་བྱས་པས་ངེད་རྩིག་པ་ལ་ཐོགས་རྡུགས་མེད་གསུངས་ནས་བཞུགས་སོ། །དེར་ཉེ་འབྲེལ་སོགས་ཚོགས་པའི་གསེབ་ཏུ་བརྡའི་ངོ་སྤྲོད་ཅིག་མཛད་པའི་ངེས་ཤེས་སྐྱེས་ནས་མི་མང་གི་གསེབ་ཏུ་གནང་བ་སྙམ་ནས། བརྡའ་མིག་ཅན་གྱིས་མཐོང་བ་ཡིན། །མིག་མེད་གྱིས་ནི་མི་མཐོང་ངོ་། །གསུང་པས་གཞན་གྱིས་གོ་བར་མ་གྱུར་ཏོ། །དེར་ཞག་བཞི་བཅུ་བཞུགས་པ་ལ་ཞག་ལྔར་གླེང་བསླང་མཛད། ཞག་དགུ་ཆོས་ཐུན་དུ་བཅུག་ནས་གསུངས་ཏེ། སྐབས་དང་པོ་ལ་ནད་ཐོག་ཏུ་བསྐོར་བ་དང་སྒོམ་ཐོག་དུ་བསྐོར་བ་གཉིས་སུ་ངོ་སྤྲད། བར་དུ་བདེན་བཞི་དང་སྐྱབས་འགྲོ་དང་ཐོར་བུ་བ་རྣམས་གསུངས། ཞག་བཅུ་བཞི་ལོན་ནས་ང་འགྲོ་གསུངས། བཞུགས་པར་ཞུས་ཀྱང་མ་གནང་། ཕྱིས་མཇལ་བར་ཞུས་པས་རྒྱ་ནག་རི་བོ་རྩེ་ལྔར་ཡེ་ཤེས་ཀྱི་མཁའ་འགྲོ་མ་དང་ལྷན་ཅིག་ཏུ་གནས་པས་དེར་གསོལ་བ་ཐོབ་གསུངས་སོ། །ཤུལ་དུ་མ་བདེ་བ་བྱུང་ན་སུ་ལ་འདྲི་ཞུས་པས། རབ་རིག་པའི་ཡེ་ཤེས་ཡིན་པས་སྒྲོ་འདོགས་གཅོད་པའི་བླ་མ་ནང་ནས་འབྱོན། འབྲིང་འཕགས་པའི་དགེ་བཤེས་ཡིན་པས་མདོ་རྒྱས་འབྲིང་བསྡུས་གསུམ་ལ་ལྟོས། ཐ་མ་གང་ཟག་གི་དགེ་བའི་བཤེས་གཉེན་ཡིན་པས། ང་དང་མི་འཕྲད་མཆེད་པོ་ཉམས་མྱོང་ཅན་དང་གླེང་བསླང་གྱིས་ལ་ལོ་བརྒྱད་སྒོམས། དེ་ནས་མངོན་ཤེས་འཆར་གསུངས། སྐམ་གྱིས་ང་ལ་དེ་ཙམ་སྒོམ་ལོང་མེད། ཁོང་པ་ན་སྐྲན་མང་དགུ་ཡང་ཡོད། གྲགས་པ་མངོན་ཤེས་ཀྱིས་ཟླ་བ་གསུམ་ན་འཆི་བར་ལུང་བསྟན་བྱས་པས། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལ་མགོ་ན་བ་ཙམ་ཡང་འབྱུང་བར་མི་འགྱུར་རོ་གསུངས་ནས་བཞུད་དོ། །དེ་ནས་ཇི་ལྟར་གསུང་བ་བཞིན་སྐྲན་རྣམས་ཀྱང་ཐོན། ལོ་བརྒྱད་ནས་མངོན་ཤེས་ཀྱང་ཤར། མངོན་རྟོགས་བརྒྱད་ཀ་བཤད་མདོ་སྡུད་པའི་སྟེང་དུ་མདོ་རྒྱས་འབྲིང་གཉིས་དྲངས་ནས་ཀྱང་བཤད་པས། སློབ་མ་ཡས་བརྒྱུད་དང་མས་བརྒྱུད་གཉིས་སུ་གྲགས། ཡས་བརྒྱུད་པ་འཁུན་འཛི་ཡང་དབེན་པ་དབང་ཕྱུག་རྡོ་རྗེ་སོགས་ལ་ནད་ཐོག་ཏུ་ངོ་སྤྲོད་པ་གཞུང་སྐབས་དང་པོ། གདམས་ངག་བདེན་བཞི། ལག་ལེན་ཐོར་བུ་དང་བཅས་པ་གསུངས། མས་བརྒྱུད་ནི། སྒྲོ་ནས་བརྒྱུད་པ་སྟེ། ནད་པ་མིན་པས་གང་ཟག་རིམ་ཅིག་ཅར་གྱི་དབྱེ་བས་སྙིང་པོའི་དོན་དང་མངོན་པར་རྟོགས་པ་གཉིས་སུ་ངོ་སྤྲད་ནས། ལ་ལ་ལུས་པ་རྟེན་འབྲེལ་གྱི་འགྲོས་བཞིས་འཆད་དེ་མས་བརྒྱུད་སྒོམ་ཐོག་ཏུ་བསྐོར་བའི་གདམས་པའོ། །བར་དུ་བྱུང་བའི་བརྒྱུད་ཕྲན་ལ། གྲ་པ་དང་། ལྕེ་དང་། ལྗང་ལུགས་གསུམ་མོ། །དེ་ལ་དགེ་བཤེས་གྲ་པ་ལ་ཞི་བྱེད་སྒྲོལ་མ་དགུ་སྐོར་གྱི་གདམས་པ་གནང་སྟེ། མན་ངག་སྐུའི་སྒྲོལ་མ། ཐེག་པ་གསུང་གི་སྒྲོལ་མ། གསང་བ་ཐུགས་ཀྱི་སྒྲོལ་མ། ཡང་དག་ལྟ་བའི་སྒྲོལ་མ། རིན་ཆེན་སྒོམ་པའི་སྒྲོལ་མ། བྱང་ཆུབ་སྤྱོད་པའི་སྒྲོལ་མ། མཉམ་ཉིད་གཞིའི་སྒྲོལ་མ། རྣལ་འབྱོར་ལམ་གྱི་སྒྲོལ་མ། དངོས་གྲུབ་འབྲས་བུའི་སྒྲོལ་མ་རྣམས་སོ། །ལྕེ་ལུགས་ནི། བཟང་ཡུལ་གྱི་དགེ་བཤེས་ལྕེ་པ་སོགས་ལ་བཀའ་བབས་པ་རྣམས་སོ། །ལྗང་ལུགས་ནི་མཆིམས་ཡུལ་གྱི་ལྗང་བཀའ་གདམས་པ་ལ་ཤེར་ཕྱིན་ཡི་གེ་གཅིག་མའི་གདམས་པ་གནང་སྟེ། ལྗང་གིས་ལྗང་ཆུང་ལ། དེས་འཆུས་པ་ཡབ་སྲས་ལ། དེས་རོག་ཤེས་རབ་འོད་ལ་གསུངས་སོ། །བརྒྱུད་པ་ཐོར་བུའི་སྐོར་ནི། འགྲོ་སྒོམ་ལ་མཚན་བརྗོད་གསེར་གྱི་ཐུར་མ། དགུ་སྒོམ་ལ་ལས་རྒྱའི་གདམས་པ། ཆུ་སྒོམ་ལ་སྙིང་གཏམ་ལྷུགས་པའི་གདམས་པ། སྒོམ་པ་དམར་སྒོམ་ལ་ཆིག་ཆོད་གསུམ་གྱི་གདམས་པ། གཉགས་ལོ་ཙཱ་བ་ལ་བདེ་མཆོག་དཔའ་བོ་གཅིག་པའི་གདམས་པ། ལྕེ་མོ་དཔལ་སྒྲོན་ལ་གྲུབ་ཐོབ་ཉམས་ཀྱི་ཆོས་སྡེ་བཅུ་དྲུག་པ། གཉལ་སྟོད་ངོར་རྗེ་སྒོམ་པ་ལ་ལྷན་གཅིག་སྐྱེས་སྦྱོར། ཆུ་དབར་གྱི་གནས་བརྟན་འབྱུང་གྲགས་ལ་ཤེར་སྙིང་གི་གདམས་པ། སྔགས་ཤངས་ཤེས་རབ་རྒྱལ་མཚན་ལ་དུས་འཁོར་གྱི་གདམས་པ། ཤངས་པ་དབུ་སྡེབས་ལ་ཡི་གེ་བཞི་པའི་གདམས་པ། སྙེ་མོའི་རྒྱ་སྟོན་སྐྱིད་རྩེགས་ལ་དགྱེས་རྡོར་གྱི་གདམས་པ། ཞང་སག་ཆུང་པ་ལ་ཕག་མོའི་གསང་སྒྲུབ། བླ་མ་དགོན་དཀར་བ་ལ་ཕྱག་རྡོར་གྱི་གདམས་པ། སྐྱིད་ཤོད་ཀྱི་འབན་གུང་རྒྱལ་ལ་བདེ་མཆོག་སྙན་རྒྱུད། མ་གཅིག་ལབ་སྒྲོན་ལ་གཅོད་ཀྱི་གདམས་པ་གནང་སྟེ། དེ་རྣམས་ནི་བརྒྱུད་པ་བར་མའི་སྐོར་རོ། །བརྒྱུད་པ་ཕྱི་མ་ནི་དམ་པ་རྒྱ་ནག་ཏུ་ལོ་བཅུ་གཉིས་འགྲོ་དོན་མཛད་ནས་དིང་རིར་ཕེབས་སྟེ་མ་ཇོ་ཉི་ཤུ་རྩ་བཞི་སྨིན་གྲོལ་ལ་བཀོད། དིང་རིའི་དམ་པ་ཀུན་དགའ་ལ་བཀའ་བབས་པ་སྟེ། ཀུན་དགའ་ནི་དམ་པས་སྐྱེ་བ་ལྔའི་བར་དུ་རྗེས་སུ་བཟུང་བའི་སློབ་མ། དམ་པ་མྱ་ངན་ལས་འདའ་ཁར་ཡང་། ང་དང་མཉམ་པ་ཀུན་དགའ་ཙམ། །ཐུར་ལ་བབས་པ་ཆུ་བོ་ཙམ། །མཁའ་ལ་འཆར་བ་ཉི་ཟླ་ཙམ། །གསུངས། དེའི་སློབ་མ་འཕན་ཡུལ་གྱི་པ་ཚབ་སྒོམ་པ། དེ་ནི་ཆོས་ཉིད་དབང་པོའི་མངོན་སུམ་ཤར་བས་རྟོགས་པའི་མཐའ་ཆོད་པ་ཞིག་བྱུང་ཞུས་པས་ལེགས་སོ་གནང་། དབུ་ཐོག་ན་ཤོག་རིལ་གཅིག་བཏགས་འདུག་པ་དེ་ལ། འདི་ན་ཚ་བཟང་པོ་ཡོད། ལ་སྟོད་ན་མྱང་ཤེས་པ་མེད་གསུངས་ནས་པ་ཚབ་ལ་གནང་། སྣ་མར་གྱི་ཐིལ་ལ་ཁ་ཕྱེ་གསུངས་ནས་དེར་བྱོན་གཟིགས་པས། ཟུག་པ་རྩ་བའི་ཆོས་སྡེ་ཞུས་ལན་དགུ། འགྲིལ་བ་སྡོང་པོའི་ཆོས་དོན་རྒྱུད་སྐོར་གསུམ། གྱེས་པ་ཡལ་གའི་ཆོས་མཚོན་དཔེ་དང་བྲུལ་ཚོ། ལོ་འདབ་ཀྱི་ཆོས་སྡེ་བཅུ་དྲུགམཛེས་པ་མེ་ཏོག་གི་ཆོས་སྡེ་ལྔ། འབྲས་བུའི་ཆོས་སྡེ་ཨཱ་ལི་ཀཱ་ལི་ཕྱི་ནང་གསང་གསུམ་རྣམས་བྱུང་ངོ་། །དེའི་སློབ་མ་ཆིག་བརྒྱུད་ཀྱི་གདམས་པ་མ་ལུས་པ་རྫོགས་པ་རྒྱལ་བ་ཏེ་ནེའོ། །དེ་གསུམ་ལ་ཆིག་བརྒྱུད་སྦས་པའི་བླ་མ་རྣམ་གསུམ་དུ་གྲགས་སོ། །རྒྱལ་བ་ཏེ་ནེས་ཆོས་ཀྱི་བརྒྱུད་པ་ཡང་དག་པར་གཏད་པ་རོག་སྐུ་མཆེད་གཉིས་སོ། །དེ་ཡང་བསྟན་པ་སྔ་དར་གྱི་དུས་སུ་རོག་ནམ་མཁའ་ཡེ་ཤེས་ཞེས་བྱ་བ་མཁྱེན་པ་དང་ནུས་པ་ལྡན་པ་ཞིག་བྱུང་བའི་གདུང་རབས་ཐམས་ཅད་དུ་སྔགས་འཆང་ཁྱད་པར་ཅན་ཤ་སྟག་བྱུང་བའི་ཉི་ཤུ་རྩ་བཞི་པ་རོག་ཤེས་རབ་བླ་མ། དེའི་སྲས་བཀྲ་ཤིས་གྲགས་པ། དེའི་སྲས་རོག་ཤེས་རབ་འོད། དེ་ནས་རིམ་པར་ཞིག་པོ་སོགས་ལ་བརྒྱུད་དོ། །ཆོས་སྐོར་འདི་ལ་ཐུན་མོང་དང་ཐུན་མོང་མ་ཡིན་པ་གཉིས་ལས་ཐུན་མོང་པ་ལ། མདོ་རྒྱུད་ཕྱག་ལེན་དང་བཅས་པ། བཀའ་བབས་སྙན་བརྒྱུད་དང་བཅས་པ། དྲི་མེད་ཕྲ་རིག་དང་བཅས་པ། དར་ཚགས་བཤད་འབུམ་དང་བཅས་པའོ། །དང་པོ་ནི། སྤྱི་མདོ་ཆུ་ཀླུང་རོལ་པའི་མདོ། དགོས་མདོ་ཤེར་ཕྱིན། སྤྱི་རྒྱུད་སྡེ་སྣོད་གསལ་བྱེད། དགོས་རྒྱུད་ཆུ་ཀླུང་ཆེན་པོ། ཕྱག་ལེན་ནི། དབང་འཁོར་ཆེ་འབྲིང་དང་ལམ་རིམ་ཆེ་ཆུང་གསུམ། བཀའ་བབས་སྙན་བརྒྱུད་ནི་བཀའ་བབས་བཞི། དེའི་ལམ་སློང་སྙན་བརྒྱུད་བཞི། དྲི་མེད་ཕྲ་རིག་ནི། དྲི་མེད་ལ་ཟུག་པ་རྩ་བའི་ཆོས་སྐོར་ལ་སོགས་དྲུགཕྲ་རིག་ནི་པ་ཚབ་ཀྱི་ཀུན་དགའ་ལ་གེགས་རྣམས་དྲིས་པའི་གདམས་པའོ། །དར་ཚགས་བཤད་འབུམ་ནི། དར་ཚགས་ཞལ་གདམས་སྐོར་སོགས་བརྒྱད་ཡོད་དེ། པ་ཚབ་ལ་འཕྲལ་གཏམ་ཏེ་ནེས་ཡི་གེར་བཏབ་པའོ། །

གསང་སྔགས་རྙིང་མ།

༈ གསང་སྔགས་རྙིང་མ་ནི། དེ་ལྟར་བོད་ཀྱི་ཡུལ་འདིར་འདུལ་བའི་བསྟན་པ་ལ་འཕེལ་འགྲིབ་ཆེར་བྱུང་མོད། ཐེག་པ་ཆེན་པོ་གསང་སྔགས་ཀྱི་བསྟན་པ་ནི། དེང་སང་གི་བར་དུ་ནུབ་མ་མྱོང་ཞིང་དེ་ཡང་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་ཡབ་སྲས་ཀྱི་རིང་ལ་དར་བ་ཡིན་ཏེ། འཇམ་དཔལ་སྐུའི་རྒྱུད་ནི་ཤཱིནྟཾ་གརྦྷ་བོད་དུ་བྱོན་ནས་དར་བར་མཛད། ཡང་དག་ཐུགས་ཀྱི་སྐོར་ནི་སློབ་དཔོན་ཧཱུྃ་ཀ་རས་བོད་དུ་སྐལ་ལྡན་རྣམས་ལ་སྩལ། པདྨ་གསུང་དང་ཕུར་པ་ཕྲིན་ལས་ནི། སློབ་དཔོན་པདྨས་རྒྱལ་པོ་དང་ཇོ་མོ་བཟའ་མཚོ་རྒྱལ་དང་འབྲི་ཨ་ཙར་ས་ལེ་རྣམས་ལ་བསྟན། བདུད་རྩི་ཡོན་ཏན་ནི་སློབ་དཔོན་བི་མ་ལ་མི་ཏྲས་བོད་དུ་སྣོད་ལྡན་ལ་བསྟན་པ་སྟེ་ཡེ་ཤེས་ལྷའི་སྒྲུབ་སྡེ་ལྔ་དང་། མ་མོ་རྦོད་གཏོང་ལ་སོགས་ཏེ་འཇིག་རྟེན་པའི་རིགས་ཀྱི་སྒྲུབ་སྡེ་གསུམ་ནི་དེ་དག་གི་བཀའ་སྲུང་གི་ཚུལ་དུ་གནས་པའོ། །ཁྱད་པར་སེམས་ཀློང་མན་ངག་གི་སྡེ་གསུམ་ལས་སེམས་སྡེ་ནི། སེམས་མད་བཅོ་བརྒྱད་ལས་ལྔ་བཻ་རོ་དང་བཅུ་གསུམ་བི་མ་ལས་དར་བར་མཛད་དོ། །ཀློང་སྡེ་ཡང་བཻ་རོ་ལས་བྱུང་བའི་མན་ངག་སྟེ། ནམ་མཁའ་དང་མཉམ་པའི་རྒྱུད་ཆེན་པོའི་དོན་ཀློང་དགུ་དང་ཚིག་བམ་པོ་ཉི་ཁྲི་ཞེས་འབྱུང་ལ། བམ་པོ་ཉི་ཁྲི་ནི་གྲུབ་པའི་སྐྱེས་བུ་རྣམས་ཀྱི་ཕྱག་ན་བཞུགས་པའི་དབང་དུ་བྱས་པ་ཡིན་གྱི། འདིར་གཞུང་ཚང་བ་འགྱུར་བ་ནི་མེད་པར་གྲགས། ནམ་མཁའ་དང་མཉམ་པའི་རྒྱུད་ཆུང་བའི་དོན་ཡང་ཀློང་དགུ་རྣམས་སོ། །དང་པོ་ལྟ་བའི་ཀློང་། གཉིས་པ་སྤྱོད་པའི་ཀློང་། གསུམ་པ་དཀྱིལ་འཁོར་གྱི་ཀློང་། བཞི་པ་དབང་གི་ཀློང་། ལྔ་པ་དམ་ཚིག་གི་ཀློང་། དྲུག་པ་སྒྲུབ་པའི་ཀློང་། བདུན་པ་ཕྲིན་ལས་ཀྱི་ཀློང་། བརྒྱད་པ་ས་ལམ་གྱི་ཀློང་། དགུ་པ་འབྲས་བུའི་ཀློང་སྟེ། གཞན་ཡང་ཡེ་ཤེས་གསང་བ་ལ་སོགས་པའི་རྒྱུད་ལ་བརྟེན་པའི་རྡོ་རྗེ་ཟམ་པའི་མན་ངག་རྣམས་ཀྱང་བཻ་རོས་སྤང་མི་ཕམ་མགོན་པོ་ལ་གནང་སྟེ། དེའི་དྲུང་དུ་ངན་ལམ་བྱང་ཆུབ་རྒྱལ་མཚན་གྱིས་གསན་པ་སྟེ། དེ་ནི་ཡུལ་དབུ་རུ་ངན་ལམ་རལ་གསུམ་པ་ཡིན། ལོ་བརྒྱ་དང་བདུན་ཅུ་རྩ་གཉིས་བཞུགས་ནས་ལྷག་མེད་དུ་གཤེགས། དེའི་སློབ་མ་ཟ་ངམ་རིན་ཆེན། ཁུ་འགྱུར་གསལ་བ་མཆོག་སོགས་ཀྱང་ལོ་གྲངས་མང་པོ་བཞུགས་པའི་མཐར་འཇའ་ལུས་སུ་གཤེགས་པ་ཤ་སྟག་གོ། མན་ངག་གི་སྡེ་ནི། བི་མ་ལས་མྱང་ཏིང་འཛིན་བཟང་པོ་སོགས་ལ་སྩལ་ཏེ་དར་བས་གསུམ་པོ་འདི་དག་བོད་ཡུལ་འདིར་ཤིན་ཏུ་དར་རྒྱས་ཆེ་བ་བྱུང་ཞིང་། སྔ་འགྱུར་གྱི་རྒྱུད་ཀྱི་བཤད་པ་དེང་སང་གི་བར་དུ་གནས་པ་སྒྱུ་འཕྲུལ་གསང་བ་སྙིང་པོའི་སྐོར་རྣམས་ཡིན་ཏེ། འདི་ནི་བི་མ་ལས་ལོ་ཙཱ་བ་རྨ་རིན་ཆེན་མཆོག་ལ་གནང་ཞིང་། དེས་ལེགས་པར་བསྒྱུར་ནས། མཁས་པ་གཙུག་གྱེར་རྣམ་གཉིས་ལ་བཤད། དེ་གཉིས་ཀྱིས་དར་རྗེ་དཔལ་གྱི་གྲགས་པ་དང་ཞང་རྒྱལ་བའི་ཡོན་ཏན་གཉིས་ལ་བཤད། ཞང་ནས་བརྒྱུད་པ་རྣམས་ལ་བཀའ་མཆིམས་ཕུ་མའམ་མན་ངག་བརྒྱུད་པ་ཅེས་གྲགས། དར་རྗེས་དབུས་གཙང་ཁམས་གསུམ་དུ་བཤད་པས། ཡོངས་གྲགས་དབུས་ལུགས་པ་དང་། ཁམས་ལུགས་པ་ཞེས་གཉིས་སུ་གྲགས་སོ། །ཞང་རྒྱལ་བའི་ཡོན་ཏན་གྱིས་གནུབས་སངས་རྒྱས་ཡེ་ཤེས་ལ་བཤད་པ་དང་། ཡང་སློབ་དཔོན་པདྨ་དང་། བི་མ་ལ་གཉིས་ཀས་གཉགས་ཛྙཱ་ན་ཀུ་མཱ་ར་ལ། དེས་སོག་པོ་དཔལ་གྱི་ཡེ་ཤེས་ལ། དེས་གནུབས་སངས་རྒྱས་ཡེ་ཤེས་ལ་བཤད་པ་སྟེ། གནུབས་ལ་བརྒྱུད་པའི་ཆུ་བོ་ཐམས་ཅད་འདུས་པར་གྲགས་སོ། །དེ་ཡང་རྡོ་རྗེ་ཐེག་པ་ལ་བརྟེན་ནས་གྲུབ་པ་བརྙེས་པ་མང་དུ་བྱུང་བ་སྟེ། འབྲེ་དཔལ་གྱི་བློ་གྲོས། སྣ་སྣམ་རྡོ་རྗེ་བདུད་འཇོམས། ངན་ལམ་རྒྱལ་བ་མཆོག་དབྱངས། ཨུ་ན་ཨ་ནང་གགནུབས་ནམ་མཁའི་སྙིང་པོ། རླངས་དཔལ་གྱི་སེང་གེརླངས་གཙུག་གི་རིན་ཆེན། འབྲེ་རྒྱལ་བའི་བློ་གྲོས། ཁམས་པ་གོ་ཆ། བཻ་རོ་ཙ་ན། གཉགས་ཛྙཱ་ན་ཀུ་མཱ་ར། གཉན་དཔལ་དབྱངས་ལ་སོགས་པ་རྣམས་ནམ་མཁར་འགྲོ་བ་དང་། རི་བྲག་ལ་འཛུལ་བ་དང་། ཆུ་ལ་མི་འབྱིང་པ་དང་། ལུས་ལྷའི་དཀྱིལ་འཁོར་དུ་སྐྱེ་བོ་མང་པོ་ལ་སྟོན་ནུས་པ་དང་། གཞན་ཡང་འབྲོ་བཟའ་དཱི་པམ་ལ་སོགས་པ་བུད་མེད་གྲུབ་པ་ཐོབ་པའང་མང་དུ་བྱུང་། དེ་རྣམས་ཕལ་ཆེར་འདས་པ་ན་གནུབས་སངས་རྒྱས་ཡེ་ཤེས་བྱོན་ཏེ། རྒྱ་གར་དང་བལ་པོ་དང་བྲུ་ཤའི་ཡུལ་རྣམས་ན་བཞུགས་པའི་མཁས་པའི་སྐྱེ་བོ་མང་པོ་བསྟེན། ཁོང་གི་བླ་མ་བྲུ་ཤའི་ལོ་ཙཱ་བ་ཆེ་བཙན་སྐྱེས་ཀྱིས་མདོ་དགོངས་འདུས་བོད་དུ་བསྒྱུར། དེ་ལེགས་པར་གསན་ཅིང་དར་བར་མཛད། དགུང་ལོ་བརྒྱ་དང་བཅུ་གསུམ་བཞུགས་ནས་གསང་སྔགས་ཀྱི་བསྟན་པ་དར་བར་མཛད་པ་ཡིན། སློབ་དཔོན་འདི་ལ་ཐུགས་ཟིན་གྱི་སྲས་བཞི། སྲས་ཀྱི་དམ་པ་གཅིག་དང་ལྔ་བྱུང་བ་ལས། སྲས་བཞི་ནི། སོ་ཡེ་ཤེས་དབང་ཕྱུག། དེ་ལ་ལྟ་བ་སྒང་དྲིལ་བཤད། པ་གོར་བློ་ཆེན་འཕགས། དེ་ལ་མདོ་འགྲེལ་ཊཱིཀ་དང་སྦྱར་ནས་བཤད། དོན་ཡོན་ཏན་མཆོགདེ་ལ་སྟར་ཁ་གེགས་སེལ་གྱི་ཚུལ་དུ་བཤད། སྲུ་ལེགས་པའི་སྒྲོན་མ། དེ་ལ་ཚིག་སྡེབ་སྦྱོར་ལེགས་པས་བཤད། སྲས་ཀྱི་དམ་པ་ཡོན་ཏན་རྒྱ་མཚོ་ལ། ལྟ་བ་སྒང་དྲིལ། གབ་པ་མངོན་བྱུང་། མན་ངག་ཁོག་སྡེབ། ༼ཟབ་མོ་གསང་བ་ཁོང་ལྟོ་ལྟར་བཤད་པ། འདི་མཆན་ཡིན་ནམ་སྙམ༽སྟར་ཁ་གེགས་སེལ་གྱི་ཚུལ་ཏེ་བཞི་ཀ་བཤད་པས་ཆོས་སྐོར་ཐམས་ཅད་ཚང་བ་ཡོན་ཏན་རྒྱ་མཚོ་ཡིན། འདི་ལ་སྲས་ཡེ་ཤེས་རྒྱ་མཚོ་དང་པདྨ་དབང་རྒྱལ་གཉིས། ཡེ་ཤེས་རྒྱ་མཚོའི་སྲས་ལྷ་རྗེ་ཧཱུཾ་ཆུང་། འདིས་རྗེ་བཙུན་མི་ལ་ལ་དྲག་སྔགས་གསུངས་པར་གྲགས། ཡོན་ཏན་རྒྱ་མཚོ་ཡབ་སྲས་ཀྱི་སློབ་མ་མྱང་ཤེས་རབ་མཆོགདེས་དོག་ལ་གཤོངས་ཀྱི་གཙུག་ལག་ཁང་བཞེངས། བསྐྱེད་རྫོགས་གསུམ་ལ་མཁས་པར་སྦྱངས། གྲུབ་པ་བརྙེས་པའི་གྲུབ་རྟགས་ཀྱི་ལོ་རྒྱུས་མང་དུ་སྣང་། དེའི་སློབ་མ་བསྐྱེད་རྫོགས་གསུམ་ཀ་ལ་མཁས་པ་ཆོས་ལུང་གི་མྱང་ཡེ་ཤེས་འབྱུང་གནས་ཡིན། དེ་དག་ལས་བརྒྱུད་པ་ཕལ་ཆེར་ལ་རོང་ལུགས་དང་། གདུང་རུས་ལས་བཏགས་ཏེ་མྱང་ལུགས་ཞེས་ཀྱང་བྱའོ། །དེའི་སློབ་མ་ཟུར་པོ་ཆེ་སྟེ། ཟུར་པོ་ཆེ་འདི་སྟོང་ཚབ་འཕགས་པ་རིན་ཆེན་༼གྱི་༽སློབ་མ་ཡང་ཡིན་པས་སངས་རྒྱས་ཡེ་ཤེས་༼དང་༽ཟུར་པོ་ཆེའི་བར་ན་བླ་མ་གཅིག་ལས་མེད་པར་ཡང་བཤད་དོ། །མན་ངག་གི་སྡེ་ལ་སྙིང་ཐིག་ཅེས་བྱ་སྟེ། དེ་ནི་བི་མ་ལས་ཁྲི་སྲོང་དང་མྱང་ཏིང་འཛིན་བཟང་པོ་ལ་སྩལ་བ། མྱང་གིས་དབུ་རུ་ཞྭ་ཡི་ལྷ་ཁང་བཞེངས་ནས་སྙིང་ཐིག་གི་གདམས་པ་རྣམས་གཏེར་དུ་སྦས། ཚིག་བརྒྱུད་རྣམས་འབྲེ་རིན་ཆེན་འབར་ལ་བཤད། དེས་སྦས་བློ་གྲོས་དབང་ཕྱུག་ལ་བཤད་པས་ཚིག་བརྒྱུད་གང་ཟག་བརྒྱུད་པ་ལའང་ཡོད་པར་གྲགས། ཕྱིས་བཱི་མ་ལའི་སྤྲུལ་པ་གནས་བརྟན་ལྡང་མ་ལྷུན་རྒྱལ་གྱིས་གཏེར་ནས་ཕྱུང་སྟེ། རང་གིས་ཉམས་སུ་བླངས། མྱང་སྟོད་ཀྱི་ལྕེ་བཙུན་སེང་གེ་དབང་ཕྱུག་ལ་གདམས་པ་རིམ་པ་བདུན་བཏབ་ཉམས་སུ་བླངས་པས་གྲུབ་པ་བརྙེས་ནས་ཟག་བཅས་མི་སྣང་བར་འོད་སྐུར་གྱུར་། དེ་ནས་གདམས་པ་རྣམས་ལང་གྲོང་གི་འཆད་པ་ལྟག་དང་། ཇལ་གྱི་ཕུ་སྟེ་གཏེར་ཁ་གསུམ་དུ་སྦས། དེ་ནས་ལོ་སུམ་ཅུ་ན་རོང་སྣར་མདའི་ལྕེ་སྒོམ་ནག་པོས་གཏེར་ཞིག་བཏོན་ནས། རང་ཉམས་དང་གཞན་སྤེལ་མཛད། ཤངས་པ་རལ་པ་ཞེས་བྱ་བས་ཀྱང་ལང་གྲོང་འཆད་པ་ལྟག་གི་གཏེར་ཕྱུང་ནས་འགྲོ་དོན་མཛད། ཡང་ཡར་འབྲོག་གི་སྦུབས་མཚོ་གླིང་དགུའི་བློ་དོ་ཞེས་བྱ་བར་འཁྲུངས་པའི་ཞང་སྟོན་བཀྲ་ཤིས་རྡོ་རྗེ་ཞེས་བྱ་བ། རྡོར་ལེགས་ཀྱིས་བསྐུལ་ནས་ནུ་མའི་རིའི་བྲག་མཐོན་པོ་ཞིག་གི་སྟེང་དུ་བསྐྱལ། དེར་ཁ་བྱང་དུ་ལྟ་བའི་ཕུག་པ་སྒོ་རྩྭས་འགགས་པ་ཞིག་ནས་གཏེར་ཕྱུང་དུས་ཨེ་ཀ་ཛ་ཊཱིས་གཟུགས་བསྟན་ཅིང་སྐད་འབྱིན་པ་ན། རྡོར་ལེགས་ཀྱིས་འདི་ལུང་བསྟན་པ་དེ་ཡིན་བྱས་པས། ཨེ་ཀ་ཛ་ཊཱི་ན་རེ་འོ་ན་ཚོགས་འཁོར་བརྒྱ་རྩ་བརྒྱད་ཐོངས། ལོ་གསུམ་དུ་མི་ལ་མ་ཤོད་ཟེར་ནས་སོང་། གཞན་ཡང་ཇལ་གྱི་ཕུར་ལྕེ་བཙུན་གྱིས་སྦས་པའི་ཆོས་གཏེར་དང་། མཆིམས་ཕུར་བི་མ་ལས་སྦས་པའི་ཆོས་གཏེར་ཡང་ཐོན་ཏེ་རྒྱ་ཆེར་སྤེལ་ནས་དགུང་ལོ་བདུན་ཅུ་རྩ་གཅིག་ལ་གཤེགས། གདམས་པ་རྣམས་རང་གི་སྲས་ཉི་འབུམ་ལ་གཏད་རྒྱ་མཛད་པར་གྲགས་སོ། །

ཟུར་གྱི་གདུང་རབས།

༈ དེ་ལ་ཟུར་གྱི་གདུང་རབས་ནི། ལྷ་རྗེ་ཟུར་པོ་ཆེའི་མེས་པོ་ཟུར་ཤེས་རབ་འབྱུང་གནས། དེའི་སྲས་བཟངས་མིག་པོ་ཆེ། ལྷ་རྗེ་སྒོམ་ཆེན་ཤཱཀཱ་སྡེ། སྒོམ་ཆེན་རྡོར་འབྱུང་། ལྷ་རྗེ་ཟུར་པོ་ཆེ་དང་བཞི་ལས། ཟུར་པོ་ཆེས་ཚངས་སྤྱོད་མཛད་པས་སྲས་མེད་ཅིང་འདིས་སྤྱིར་མཁས་གྲུབ་ཀྱི་བླ་མ་མང་དུ་བསྟེན། ཁྱད་པར་ཆོས་ལུང་གི་མྱང་ཡེ་ཤེས་འབྱུང་གནས་ལ་སྒྱུ་འཕྲུལ་དང་སེམས་ཕྱོགས་གསན་ནས་རྩལ་བཏོན་དུ་སྤེལ། རྩ་རྒྱུད་དང་བཤད་རྒྱུད་དུ་ཕྱེ། རྩ་བ་དང་འགྲེལ་པ་བསྡེབས། རྒྱུད་དང་སྒྲུབ་ཐབས་བསྡེབས། སྒྲུབ་ཐབས་དང་ཆོག་ཡིག་ལ་སོགས་པར་བསྡེབས་ནས་ཆོས་ཀྱི་ཕྲིན་ལས་བསྐྱངས། འུག་པ་ལུང་གི་གཙུག་ལག་ཁང་དང་། ཤངས་ཀྱི་མདར་སྲམ་པ་སྒྲུབ་ཁང་དང་སྐུ་རྟེན་དཔལ་ཆེན་པོ་ལྷ་དགུ་ལྡེ་གུར་བཞེངས་སྐབས་འོག་གདོང་གི་བྲག་སྣར་ཀླུ་ཞིག་ཡོད་པ་བཟུང་ནས་རྫ་མར་བཅུག་རྒྱ་རིམ་པ་བདུན་བཏབ་ནས་བཞག་པས། ཀླུ་དེས་ཕྱོགས་ཕྱོགས་ཀྱི་ཆང་རྣམས་བསྡུས་ནས་ལས་བྱེད་སྐབས་དང་རབ་གནས་ཀྱི་སྐབས་སུ་ཆང་ཟད་མི་ཤེས་པ་བྱུང་བ་བྱས། རབ་གནས་ཀྱི་ཚེ་གྲོང་པའི་ཕྱུགས་མང་པོ་གཡར་ནས་བསད་དེ་ཤ་སྟོན་ཆེན་པོ་བྱས། ཉིན་ནུབ་ཁར་ཕྱུགས་རྣམས་མ་ཚང་བ་མེད་པར་གྲོང་པ་སོ་སོར་གཏད་པ་སོགས་རྫུ་འཕྲུལ་གྱི་མཛད་པ་དཔག་པར་དཀའ། དེ་ནས་སྐབས་ཤིགཉ་རི་ན་མ་མ་གཡུང་དྲུང་བཀྲ་ཤིས་བཟའ་མི་གཉིས་ཆོས་འཁོར་བྱ་བ་འདོད་ནས། ཡུལ་མི་དང་ཉེ་དུ་ཀུན་བསགས་ཏེ། སློབ་དཔོན་གང་བཟང་དྲིས་པར། ལ་ལས་སྔགས་པ། ལ་ལས་བཙུན་པ། ལ་ལས་བོན་པོ་བཟང་ཟེར་ཁ་མ་འཆམས་ངེད་རྣམས་ཁ་མི་འཆམས་པར་འདུགཁྱེད་རང་གང་མོས་ལ་གྱིས་ཞེས་སྨྲས་པས། མོ་ན་རེ། འོ་ན་ངའི་ཡོ་བྱད་ཀྱིས་ལྡེང་པ་ཡོད་པས་གསུམ་ཀ་སྤྱན་འདྲེན་ནོ་ཟེར་ནས། སྔགས་པར་འུག་པ་ལུང་ཟུར་ཆེན། བཙུན་པ་ཆུ་མིག་རི་མོ་བ། བོན་པོ་ལ་ཀེ་ཙེ་པ་གདན་དྲངས་པས། མཆོད་གནས་གསུམ་པོ་ན་རེ། འུ་ཅག་ཚོ་ལྷ་ཁང་ཞིག་རྩིག་དགོས་ཅེས་བཀའ་བགྲོས་པར། ལྷའི་གཙོ་བོ་ལ་མ་མཐུན་ཏེ། སྔགས་པས་རྡོ་རྗེ་སེམས་དཔའ་ལ་བྱེད་ཟེར། བཙུན་པས་ཤཱཀྱ་ཐུབ་པ་དང་། བོན་པོས་གཤེན་རབས་མི་བོ་ལ་བྱེད་ཟེར། མ་མཐུན་པས་ལྷ་ཁང་སོ་སོར་བརྩིགས་སོ། །འུག་པ་ལུང་པ་ཟུར་ཆེན་ལ། སྒྲོ་སྟོན་གྱིས་སྒྲོ་ཕུག་ཕུལ་ཏེ། དེར་བརྩིགས་པས་སྒྲོ་ཕུག་གི་གཙང་ཁང་འབྱོངས་ཙམ་ལ་དགུང་ལོ་དྲུག་ཅུ་རྩ་གཅིག་ཐོག་སྐུ་གཤེགས་སོ། །དེ་ལ་སློབ་མ་རྩེ་མོ་བཞི། རྩེ་ལྐོག་ལྔ། སྒོམ་ཆེན་བརྒྱ་རྩ་བརྒྱད་སོགས་བྱུང་། རྩེ་མོ་བཞི་ནི། ལྟ་སྒོམ་གྱི་རྩེ་མོ་ཟུར་ཆུང་ཤེས་རབ་གྲགས། སྒྱུ་འཕྲུལ་གྱི་རྩེ་མོ་པན་ནམ་བྲེས་ཀྱི་མི་ཉག་འབྱུང་གྲགས། མཁྱེན་རྒྱའི་རྩེ་མོ་ར་ཟའི་ཞང་འགོས་ཆུང་པ། སྒོམ་སྒྲུབ་ཀྱི་རྩེ་མོ་འཚོ་ཉའི་བཟང་སྒོམ་ཤེས་རབ་རྒྱལ་བའོ། །

ཟུར་ཆུང་ཤེས་རབ་གྲགས་པ།

༈ དེ་ལ་ཟུར་ཆུང་ཤེས་རབ་གྲགས་པ་ནི། མེས་པོ་ཨ་ཙ་ར་བྱ་བའི་བུ་ཟུར་སྒོམ་ཞེས་བྱ་བ་ལ། ལྡོམ་བུ་བྱེད་པའི་བཙུན་རྒན་ཞིག་ཡོད་པ་ལ། བཙུན་ཆུང་བའི་ཕྱིར་འབྲང་སྟེ་འུག་པ་ལུང་དུ་ཕྱིན་པས། ལྷ་རྗེ་ཟུར་པོ་ཆེའི་ཞལ་ནས། ཁྱོད་ཀྱི་རུས་ཅི་ཡིན་གསུངས་པས། ཟུར་ལགས་བྱས་པས། འོ་ན་བཙུན་ཆུང་འདི་ངའི་རྩར་ཞོགངས་གསོས་པས་ཆོག་གསུངས་པས། ཁོ་དགའ་སྟེ། བུ་ལྷ་རྗེར་ཕུལ་བ། བསླབ་གཉེར་བྱེད་དུ་གཅུགས་པས་ཤེས་རབ་ཤིན་ཏུ་ཆེ་བས་ཆོས་མཁས་པར་ཤེས་ཀྱང་ཡོ་བྱད་མེད་པས་དབང་རྣམས་མ་ཐོབ་ཅིང་དཔེ་ཆ་ཡང་མེད་པ་དེ་ཚེ། ལྷ་རྗེས། པན་གྱི་ཁང་སྔོན་ན་ཇོ་མོ་གཡུ་མོ་བྱ་བ་ཕྱུག་མོ་མ་མད་གཉིས་ཡོད་པར། ཁྱོད་རང་མ་མད་འདི་གཉིས་ཀྱི་ཐོག་ཏུ་སྡོད་གསུངས་པས། ང་ཁྱིམ་ཐབ་མི་བྱེད་ཞུས་པར། འདུ་ཤེས་མ་ཆུང་། ཁྱོད་ཡོ་བྱད་མེད་པ་ལ་ཁོང་གཉིས་ཀྱི་ཡོ་བྱད་ལ་སྤྱད་ནས་དབང་ཞུས་དཔེ་བྲིས། ཆོས་ཉན་པས་ཆོག་པ་ཡིན་མོད། དེས་ཁོང་གཉིས་ཀྱི་ཚོགས་ཀྱང་རྫོགས། ཁྱོད་རང་གི་དོན་ཡང་གྲུབ་པས་དེ་དགའ་མོད་གསུངས། དེར་གསུངས་པ་བཞིན་མཛད་པ་གདམས་པ་ཐམས་ཅད་ཡོངས་སུ་རྫོགས་པར་གྱུར་པ་དང་། ད་ཁྱོད་དེར་མ་སྡོད་པར་དཔེ་ཆ་རྣམས་ཁྱེར་ཏེ་ངའི་འདིར་སྡོད་པར་ཤོག་གསུངས་པས། དེ་ལྟར་བྱས་ན་ཁོང་གཉིས་ཀྱང་དྲིན་ཆེ་སྟེ་ཞུས་པས། བློ་མ་ཆུང་ཁྱོད་ཀྱིས་འགྲོ་བའི་དོན་ནུས་པ་ཞིག་འོང་བ་འདུག་པས། སྙིགས་མའི་དུས་འདིར་བསྟན་པ་རྒྱས་པར་བྱས་ནས་འགྲོ་བ་མཐའ་དག་གི་དོན་བྱེད་དགོས་པ་ཡིན། ཁོང་གཉིས་ཀྱི་དྲིན་ལན་དུ་ཡང་དེ་ཆེ། ཁོང་གཉིས་ལ་འགབ་པས་རང་གཞན་གྱི་དོན་གང་ཡང་མི་ནུས་གསུངས་པས། དེ་ནས་ཇི་སྐད་གསུང་བ་བཞིན་མཛད་པས། ལུང་སྟོང་བྱེ་མའི་གསེབ་ཏུ་ཞལ་སྐྱེམས་པ་ལ་སྐྱེམས་ཞུ་དང་། རི་སྟོང་གི་རྩེར་སྐུ་བཀྲེས་པ་ལ་ཞལ་ཟས་འདྲེན་པ་འབྱུང་བ་སོགས་གང་འདོད་པའི་ཐུགས་དགོངས་འབད་མེད་དུ་གྲུབ་པ་བྱུང་བས། ད་ནི་འགྲོ་བའི་དོན་བྱས་ཀྱང་འགྲུབ་པར་འདུག་སྙམ་པ་ན། བླ་མའི་ཞལ་ནས། ད་ཁྱོད་ཀྱིས་བཤད་པ་ཞིག་གྱིས་གསུངས་ནས། དེར་མདོ་དགོངས་འདུས་གསུངས་པས་དུས་གཅིག་ལ་དཔེ་འགྲེལ་སུམ་བརྒྱ་བྱུང་ངོ་། །དང་པོ་ཆུང་ངུའི་དུས་འུག་པ་ལུང་གི་སྒོ་རྩར་མཆོད་རྟེན་ཞིག་ཡོད་པར་སྐོར་བ་མཛད་སྐབས་ཞབས་ཁྲུ་གང་ཙམ་ས་ལ་མ་རེག་པར་དང་། ཤངས་ཀྱི་སྲམ་པ་སྒྲུབ་ཁང་དུ་ཡང་དག་གི་ལོ་སྒྲུབ་མཛད་སྐབས་རུ་ལུའི་སྒྲ་རྒྱང་རིང་པོར་ཀུན་གྱིས་ཐོས་པ་དང་། དཔལ་ཆེན་པོ་ལ་གཽ་རཱི་མ་བརྒྱད་ཀྱིས་བསྐོར་འདྲའི་བྲག་རྒྱ་བོར་ལོ་རིལ་པོ་བཅུ་གསུམ་སྒྲུབ་པ་ལ་བཞུགས་སྐབས་སྣང་བ་ཟད་པར་གྱི་སྐྱེ་མཆེད་བརྙེས། ཅིར་སྣང་ཐམས་ཅད་རྡོ་རྗེ་སེམས་དཔའི་རང་བཞིན་དུ་གསལ། ས་རྡོ་རི་བྲག་ཐམས་ཅད་ལ་ཐོགས་མེད་ཀྱི་རྫུ་འཕྲུལ་མངའ་བ་སོགས་མཛད་པ་བརྗོད་ཀྱིས་མི་ལང་ངོ་། །དེ་ལྟར་ཤིང་སྟག་ལ་འཁྲུངས་ནས་མཐར་དགུང་ལོ་རེ་གཅིག་པ་ཤིང་སྟག་ལ་འབྲུམ་པའི་སྙུན་གྱིས་ཞི་བར་གཤེགས་སོ། །དེ་ལ་སློབ་མ་ཀ་བ་བཞི། གདུང་མ་བརྒྱད། ཕྱམ་བཅུ་དྲུགདྲལ་མ་སུམ་ཅུ་སོ་གཉིས། ཡུས་པོ་ཆེ་མི་གཉིས་ལ་སོགས་པ་བྱུང་ངོ་། །འདི་ལ་སྐུའི་སྲས་སྔ་ཚར་ཕྱི་ཚར་གཉིས་ལས། སྔ་ཚར་ལ་རྩ་ཚ་རྡོར་འབར་དང་། ཕྱི་ཚར་གྱི་ཡུམ་དང་པོ་ནས་ཇོ་མོར་བཞེས་པ་ཡིན་ཡང་། མདའ་ཏིག་ཇོ་ཤཱཀ་གི་ལྕམ་མོ་དེ། གྲྭ་ས་ན་ཆོས་ཉན་ལ་བལྟར་བྱོན་པས། གྲྭ་པ་རྣམས་བག་སྡང་བས་འདོན་པར་བྱས་པ་ན། སྐྱོ་སྟོན་ཤཱཀ་ཡེ་ན་རེ། འདིའི་སྲིན་ལག་ལ་བསྟན་པའི་གཙོ་བོ་ཞིག་འདུག་པར་རྨིས་པས། སྲས་བྱུང་ན་ཕན་ཐོགས་པ་འོང་ཉེན་ཆེ་བས་ཞོག་གསུང་སྐད། དེར་བཞག་པས་ལྷ་རྗེ་སྒྲོ་ཕུག་པ་ཤཱཀྱ་སེང་གེ་ཤིང་སྟག་ལ་འཁྲུངས་སོ། །ཡབ་ཀྱི་ཞལ་ནས། སྐྱོ་སྟོན་ཤཱཀ་ཡེའི་རྨི་ལྟས་བཟང་། ངའི་བུ་འདི་བསྟན་པའི་གཙོ་བོ་དང་ཚུལ་མཐུན་པ་འགྲོ་བ་ལ་ཕན་ཐོགས་པ་གཅིག་འོང་བར་འདུག་པས། མིང་ཤཱཀྱ་སེང་གེར་ཐོགས་གསུངས། དེ་ནས་ཟླ་བ་གསུམ་ཙམ་ན་ཟུར་ཆུང་པ་གཤེགས་སོ། །

སྒྲོ་ཕུག་པ་ཤཱཀྱ་སེང་གེ

༈ སྒྲོ་ཕུག་པ་ཤཱཀྱ་སེང་གེ་ནི། སྐུ་ན་གཞོན་དུས་ཡུམ་དང་ཞང་པོས་བསྐྱངས་ནས་མདའ་ཕུར་ལོ་བཅོ་ལྔ་བཞུགས། དེ་ནས་ཆུ་བར་དུ་གླན་དང་། སྐེད་ལུང་དུ་ཡང་ཁྱེད་བླ་མའི་སར་ཆོས་མང་དུ་གསན། དགུང་ལོ་བཅུ་དགུ་ལ་ཆེ་འདོན་མཛད་པས། སྐུ་བསོད་ཆེན་པོ་རྒྱས་ཏེ་བསླབ་གཉེར་གྱི་འཕྲོ་བྱེད་པའི་སྐབས་མ་བྱུང་། བླ་མ་མཁས་པ་དག་ཚུར་གདན་དྲངས་སློབ་གཉེར་འཕྲོ་རྫོགས་པར་མཛད། ཁྱད་པར་ཟུར་གྱི་སློབ་མ་ཀ་བ་བཞི་ལ་མདོ་སྒྱུ་སེམས་གསུམ་སོགས་རྒྱུད་ལུང་མན་ངག་ཕྲིན་སྒྲུབ་ཕྱག་བཞེས་དང་བཅས་པ་གསན། དབང་རྣམས་ཀྱང་རྫོགས་པར་ཞུས། གླན་ཤཱཀྱ་བྱང་ཆུབ་ལ་རྫོགས་ཆེན་སྐོར་གསན་ཏེ་ཐོས་བསམ་སྒོམ་གསུམ་གྱི་མཐའ་རྒྱ་ཆོད་པར་མཛད། སྤྱིར་རྗེ་སྒྲོ་ཕུག་པ་འདི་ཕྱག་རྡོར་གྱི་སྤྲུལ་པར་གྲགས་ཏེ་བྱང་ཕྱོགས་ཀྱི་རྒྱུད་འདིར་གསང་སྔགས་ཀྱི་བསྟན་པ་སྤེལ་བ་ལ་བྱོན་ནས་གདུལ་བྱའི་ཚོགས་བསམ་གྱིས་མི་ཁྱབ་པར་ཆོས་འཁོར་བསྐོར་བས། སློབ་མ་བཤེས་གཉེན་ཆེན་པོ་གྲྭ་ས་འཛིན་ཞིང་བསྟན་པ་སྐྱོང་བ་གདུགས་ཐོགས་སྟོང་བྱུང་བར་གྲགས། དེའི་ནང་ནས་ཀྱང་ཐུགས་ཟིན་གྱི་སློབ་མ་བཞི་གསུམ་བཅུ་གཉིས་བྱུང་། དེ་ལ་ནག་པོ་བཞི་ནི། ཟུར་ནག་འཁོར་ལོ། ལྕེ་སྟོན་རྒྱ་ནག་པ། ཉང་མདོ་བོ། འདར་ནག་གཙུག་ཏོར་དབང་ཕྱུག་གམ་ཁ་ཅིག་དཔལ་སེང་ཟེར། སྟོན་པ་བཞི་ནི། ཉེ་སྟོན། གྱབས་སྟོན། ཞང་སྟོན། རྒྱ་སྟོན་ནོ། །ཕྱི་མ་གཉིས་ཕྲི་ནས་གཉན་སྟོན་དང་། ཁ་རག་སྟོན་སྙིང་བསྣན་པའང་མཐོང་། མི་བཞི་ནི། གཡུང་སྟོན་ཧོར་པོ། དཔང་སྟོན་ལྕགས་ཀྱུ། གཙང་པ་བྱིས་སྟོན། དབུས་པ་ཆོས་སེང་སྟེ། དེ་ནས་དུས་ལན་གཅིག་ཙམ་ན་སྟོན་པ་བཞི་ལ། ཁྱེད་རྣམས་ཚོས་ཚོགས་འཁོར་ཆ་རྐྱེན་འདྲ་ཁྱེར་ཤོགངས་ཀྱང་ཁྱེར་ལ་འོང་གིས་གསུངས་ནས་སྒྲོ་ཕུག་གི་ལྟག་ན་རི་སྤོ་ཏོ་གཅིག་ཡོད་པའི་ཁར་བྱོན། ཚོགས་འཁོར་བསྐོར་གསུང་གླེང་མང་པོ་མཛད་ནས། ཁྱེད་རྣམས་ང་མེད་པ་ལ་མྱ་ངན་མ་བྱེད། ངས་ད་རེས་ལུས་མ་སྤངས་པར་ཁྱེར་ནས་རིག་འཛིན་གྱི་ས་ལ་སོང་བ་འདིས། ཁྱེད་རྣམས་ལ་ཤུལ་དུ་ཡང་བཀྲ་ཤིས་ཤིང་མི་བརྒྱུད་དང་བསྟན་པ་འཕེལ་བ་གཅིག་འོང་གསུང་ནས་མགུར་གཅིག་བཞེངས། ནམ་མཁའ་ལ་འཕགས་ནས་གཤེགས་སོ། །ཡང་མགུར་རེ་བཞེངས་འཕགས། ཡང་འཕགས་ཏེ་མཇུག་ཏུ་ནམ་མཁའི་དབྱིངས་མིག་གིས་མི་མཐོང་བའི་ས་ན་ཡར་གཤེགས་སོ། །དེ་ནས་ཁོང་རྣམས་ཀྱི་སེམས་ཀྱིས་མ་བཟོད་དེ་ངུས། ཆོ་ངེ་བཏབ། རྒྱ་འདྲེད་བྱས་མཚན་ནས་བོས་པས་མར་ལ་བྱོན་ཏེ། ཁྱེད་རྣམས་ཞན་དེ་ལྟར་མི་བྱེད་པར་ངས་གོང་དུ་ཁ་ཆོས་ལེགས་པར་བཅུགདེ་ལ་མི་ཉན་པར། ད་ངའི་མི་བརྒྱུད་ལ་བཀྲ་ཤིས་པ་བག་མི་འོང་གསུངས་སོ། །དེ་ནས་དེའི་ཕྱི་ལོ་ལ་སྐུ་འདའ་ཚུལ་བསྟན་པ་ཡིན་ཏེ་དགུང་ལོ་དྲུག་ཅུ་རེ་གཅིག་པ་ཤིང་སྟག་ལ་གཤེགས་སོ། །

ལྕེ་སྟོན་རྒྱ་ནག་པ།

༈ ཐུགས་ཟིན་གྱི་སློབ་མ་ནག་པོ་བཞིའི་ནང་ནས་ལྕེ་སྟོན་རྒྱ་ནག་པ་ནི། མེས་པོས་ཁམས་ལ་བྱོན་ནས་ཡར་ལོག་གློང་ཐང་སྒྲོལ་མའི་གཙུག་ལག་ཁང་ལ་དཔེ་བླངས་ནས་སྐྱི་མཁར་ལྷ་ཁང་བཞེངས། དེ་ལ་སྐུ་མཆེད་གསུམ་ཡོད་པའི་ཨ་མི་ཤིར་བཙོན་གྱི་སྲས་རྒྱལ་གསུམ། དེ་ལ་སྲས་བཞི་སྟེ། རིན་ཆེན། ཉི་སོ། རྒྱལ་བཟང་། རྒྱ་ནག་པའོ། །རྒྱ་ནག་པ་ནི་ཤིང་ཁྱི་ལ་འཁྲུངས་ཉི་ཤུ་རྩ་གཅིག་ནས་མཚན་ཉིད་གསན་ཏེ་གཞུང་ལུགས་མ་ལུས་པ་ཐུགས་སུ་ཆུད་པར་མཛད། དེ་ནས་རྗེ་སྒྲོ་ཕུག་པའི་ཞབས་དྲུང་དུ་སྔགས་གསན་དུ་བྱོན་ལོ་བཅུ་གཅིག་བཞུགས། ཟུར་ཚོ་གཞན་རྣམས་ལའང་གཏུགས་ཏེ་གདམས་པ་མ་ལུས་པ་རྫོགས་པར་མཛད་པས་སྔགས་མཚན་ཉིད། གཞུང་གདམས་ངགརྒྱུད་སྒྲུབ་ཐབས་དང་བཅས་པ་ཀུན་གྱི་བདག་པོར་གྱུར། བདུད་རྩིའི་སྒྲུབ་པ་མཛད་སྐབས་སྨན་གྱི་ཕོ་བྲང་ནས་སྨན་གྱི་ལྷ་མོ་ཞིག་བྱུང་སྟེ། དཀྱིལ་འཁོར་ལ་སྐོར་བ་ལན་གསུམ་བྱས་པ་ཀུན་གྱིས་མཐོང་བ་སོགས་གྲུབ་པའི་མཚན་མ་མཐའ་ཡས་པ་མངའ། དགུང་ལོ་ཞེ་གཅིག་པ་ལ་རྗེ་སྒྲོ་ཕུག་པ་གཤེགས། རྗེའི་འགྲོ་དོན་གྱི་རྒྱུན་བསྐྱངས་ནས་ལྔ་བཅུ་རྩ་དྲུག་པ་ས་སྦྲུལ་ལ་གཤེགས་སོ། །ཉི་སོ་ལ་སྲས་གསུམ། སྔོ་སྐྱེས། བླ་མ་ཆེན་པོ། དཔོན་ནག་རྡོ་རྗེའོ། །

བླ་མ་ཆེན་པོ་ཡོན་ཏན་གཟུངས།

༈ བླ་མ་ཆེན་པོ་ཡོན་ཏན་གཟུངས་ནི། མེ་རྟ་ལ་འཁྲུངས། ཁུ་བོ་རྒྱ་ནག་པ་དང་ལོ་བཅུ་གསུམ་འགྲོགས་ནས་བཀའ་བསྐྱེད་རྫོགས་གསུམ་གྱི་རྒྱུད་ལུང་མན་ངག་དང་བཅས་པ་ཀུན་ཆུབ་པར་མཛད། དགུང་ལོ་ཉེར་བཞི་ལ་བླ་མ་རྒྱ་ནག་པ་གཤེགས་ནས་གདན་ས་མཛད། བསླབ་གཉེར་འཕྲོས་ཅུང་ཟད་ཡོད་པ་དབུས་པ་སྟོན་ཤཱཀ་དང་དབུས་པ་ཞིག་པོ་གཉིས་ལས་མཐའ་ཆོད་པར་མཛད།

དབུས་པ་སྟོན་ཤཱཀ

༈ དེ་ལ་དབུས་པ་སྟོན་ཤཱཀ་ནི། མི་ཆོས་གཟད་ཀྱི་གཅེར་པ་ཝང་ཐུང་གི་བརྒྱུད་པ་ཡིན། གཙང་དུ་དགོན་པ་བཏབ་ནས་སྒྲུབ་པ་མཛད་པས་ལྷ་འདྲེ་དམ་ལ་ཐོགས་པ་དང་། གདུལ་བྱ་མང་པོའི་དོན་མཛད་ནུས་པ་བྱུང་སྟེ་དམ་པ་སེ་སྦྲག་པ་ཞེས་གྲགས་པ་དེ་ཡིན།

དབུས་པ་ཞིག་པོ།

༈ དབུས་པ་ཞིག་པོ་ནི། མི་ཆོས་ཡར་ཀླུང་བྱ་ས་བ་ཡིན། སྒྲོ་ཕུག་པའི་གྲྭ་སར་ཡིག་མཁན་ཆོས་ལ་ཚུད་པ་ཞིག་སྟེ། ལྷ་རྗེ་རྒྱ་ནག་པའི་དྲུང་དུ་བསྐྱེད་རྫོགས་གསུམ་ལ་མཁས་པར་མཛད། སྙན་བརྒྱུད་རྡོ་རྗེ་ཟམ་པའི་མན་ངག་གནང་སྟེ་སྒོམ་པས་ཞག་བདུན་ལ་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་འཁྲུངས། ཐེག་པ་ཐམས་ཅད་ཀྱི་ཆོས་ཀྱི་ཚིག་མ་ལུས་པར་ཐུགས་ལ་ལམ་ལམ་ཤར་བ་བྱུང་། སྒོམ་སྒྲུབ་ལ་བཞུགས་ནས་མཚམས་འོག་ནས་གྲྭ་ས་སྐྱོང་བ་ལོ་བཅོ་བརྒྱད་མཛད་ནས་དགུང་ལོ་བདུན་ཅུ་པ་ཤིང་ཡོས་ལ་གཤེགས་སོ། །བདག་ཉིད་ཆེན་པོ་དེའི་སློབ་མར་གྱུར་པ་ཞིག་པོ་བདུད་རྩི་དང་། སྟོན་པ་བླ་སྐྱབས་དང་། དབུས་པ་ཇོ་བསོད་དང་། སྙེ་སྟོན་ཉི་མ་རྡོ་རྗེ་ལ་སོགས་པ་གཞུང་ལུགས་སྨྲ་བའི་མཁས་པ་མང་དུ་བྱོན་ནོ། །

སྤྲུལ་སྐུ་ཞིག་པོ་བདུད་རྩི།

༈ བླ་མ་ལྷ་ཁང་པའི་ཐུགས་ཀྱི་སྲས་དམ་པ་སྤྲུལ་སྐུ་ཞིག་པོ་བདུད་རྩི་ནི། མེས་རྡོ་རྗེ་རྒྱལ་མཚན་བཤེས་གཉེན་ལ་སྲས་མཁར་རེ་དང་མཁར་ཆུང་། མཁར་ཆུང་གི་སྲས་ཤུ་སྟོན་མོན་སྲན་བྱ་བ། དེའི་སྲས་སྟོན་པ་ལྷ་སྣང་བྱ་བ། དེ་ལ་སྲས་སངས་རྒྱས་དགས་ཆུང་དང་སྒོམ་ཤུ་གཉིས། སངས་རྒྱས་དགས་ཆུང་ཞིག་པོ་བདུད་རྩིའི་ཡབ་ཡིན། གཟད་པའི་ཡོན་བདག་རྣམས་ཀྱིས། གཟད་ཀྱི་ལྷ་གདོང་དགོན་དང་འུག་སྐད་དགོན་ལ་སོགས་ཕུལ་བས། བླ་མ་དགས་ཆུང་གིས་གཟད་ཀྱི་གཅེན་པ་ཝང་ཐུང་བརྒྱུད་ཀྱི་སྲིང་མོ་ཝང་མོ་རྒྱ་གར་གསལ་བྱ་བ་ཁབ་ཏུ་བཞེས་པས། དེ་ལ་ཇོ་སྲས་མ་རྒྱ་མ་སྐྱེས་ནས་ཟླ་བ་བརྒྱད་ལོན་པ་ལ་མ་འདས། དེར་ཨ་མའི་ནུ་མོའི་ཝང་མོ་གཅིག་ཡོད་པ་བོས་ནས་ནུ་བཅོལ་ལ་བཏང་བས་དེ་ཇོ་མོར་སོང་སྟེ་ཞིག་པོ་བདུད་རྩི་ས་སྦྲུལ་ལ་ལྷ་གདོང་དགོན་དུ་སྐུ་འཁྲུངས། མངལ་ན་བཞུགས་སྐབས་ཡུམ་གྱི་རྨི་ལམ་ལ་མི་དཀར་པོ་ཞིག་གིས་གདུགས་དཀར་པོ་གསེར་གྱི་ཡུ་བ་ཅན་ཞིག་ཡང་ཡང་མགོ་ལ་ཕུབ་པ་རྨིས་པ་དང་། སྐུ་བལྟམས་ནས་ཞིག་མའི་ནང་དུ་བསྙལ་བས་འཇའ་ཚོན་ཟུག་པ་སོགས་ལྟས་ངོ་མཚར་བ་མང་པོ་བྱུང་། དེ་ནས་ལོ་གཉིས་ལོན་ཙམ་ན་ཡབ་ལ་རྨི་ལྟས་ངོ་མཚར་བ་མང་པོ་རྨིས་པས་ཡབ་ཀྱིས་བུ་འདི་འགྲོ་བ་ལ་ཕན་ཐོགས་པ་འོང་བ་འདུག་གསུངས། དེ་ནས་ཟླ་གཉིས་ཙམ་སོང་བ་ན་ཡབ་དགས་ཆུང་དགུང་ལོ་བཞི་བཅུ་རྩ་དགུར་གཤེགས་སོ། །དེ་ནས་ཆེར་ལོང་པ་དང་། མས་ཞང་པོ་སེ་སྤྲག་པའི་སར་བསླབ་གཉེར་ལ་བརྫངས་ལོ་གསུམ་སེ་སྤྲག་པ་དང་འགྲོགས། དེ་ནས་སེ་སྤྲག་པ་སྐུ་གཤེགས། བླ་མ་རྒྱ་ནག་པའི་དྲུང་དུ་བྱོན་ནས་ཆོས་མང་དུ་གསན། ང་སེམས་ཕྱོགས་ཁོ་ན་སྒྲུབ་པ་ཡིན་གསུངས་ནས་ཉམས་ལེན་དང་འཆད་ཉན་སེམས་ཕྱོགས་ཁོ་ན་ལ་མཛད། སེམས་ཕྱོགས་ཇི་ལྟར་གསན་ཚུལ་ཡང་། ཀུན་བྱེད་མདོ་བཅུ་ལ་སོགས་པ་རྒྱུད་སྡེ་ཆེན་པོ་ཉི་ཤུ་རྩ་བཞི། རྩ་བ་སེམས་སྡེའི་སྐོར་ལ་རྩ་བ་བཅོ་བརྒྱད་སྐོར་ལུགས་རོང་ལུགས་ཁམས་ལུགས་ལ་སོགས་པ་ཀུན་གྱི་བཤད་སྲོལ་ལུགས་མི་གཅིག་པ་བཅུ་བཞི་གསན། གདམས་པ་སྙན་བརྒྱུད་ཀྱི་སྐོར་ལ་སྐོར་ལུགས་རོང་ལུགས་ཁམས་ལུགས་གསུམ་གྱི་གདམས་ངག་སོགས་ཐོས་བསམ་གྱིས་མཐའ་རྒྱ་ཆོད་པར་མཛད་དོ། །དེ་ནས་ཆེ་འདོན་མཛད་དེ་འུག་སྐད་དགོན་པ་ལ་སོགས་པ་བཟུང་། གཙང་དུ་སེ་སྤྲག་དགོན་ཡང་བཟུང་སྟེ་འགྲོ་དོན་བསྐྱངས། དེ་ནས་ངེད་ཀྱིས་སེ་སྤྲག་ལ་མི་ཐར་བ་འདུག་པས་རི་སྒབ་འདིར་ངལ་གསོ་ས་ཞིག་བྱེད་གསུངས་ནས་ཆོས་སྡིངས་བཏབ། བླ་མ་ཞང་གི་སྙན་པ་ཐོས་པས་སྤྱན་དྲངས་ཆོས་འབྲེལ་ཞུས་པས། ཞང་གི་ཞལ་ནས། ཁྱོད་ཀྱི་དགོན་པ་འདི་ཆུ་ཤིང་འཛོམ་པ་མི་འདུག་སྟེ། མི་འདུ་བ་འགྲོ་བ་ལ་ཕན་ཐོགས་པ་གཅིག་འོང་བ་འདུག་པས་མིང་ཆོས་སྡིངས་སུ་ཐོགས་གསུངས། དགོན་མིང་ཞང་གིས་བཏགས། དེའི་ཚེ་མི་རྣམས་ཀྱིས་ཆོས་ལྷ་ཁང་པ་ལ་ཞུས་ནས་ཞབས་ཏོག་འཚལ་པ་ལ་བྱེད་ཟེར་སྨད་པའང་བྱུང་སྐྱེས་བུ་ཆེན་པོ་འདི་རྟོགས་གྲོལ་དུས་གཅིག་ལ་བྱུང་བ་རྫོགས་ཆེན་རང་སྣང་རིས་མེད་ཀྱི་དགོངས་པ་རང་ཤར་ནས་རྡོ་རི་བྲག་སོགས་ལ་ཐོགས་མེད་དུ་འགྲོ་ནུས། བྱང་ཕྱོགས་ཀྱི་རྒྱུད་གངས་རིའི་ཁྲོད་འདིར་སྐྱེ་དགུ་རྣམས་བློ་བསྒྱུར་ནས་ཆོས་ལ་བཅུད་དེ་ཐར་པའི་ལམ་ལ་བཀོད། སློབ་མ་དགེ་བཤེས་ཉི་ཟླ་ལྟར་གྲགས་པ་བསམ་གྱིས་མི་ཁྱབ་པ་མང་དུ་བྱུང་། རྒྱ་གར་རྒྱ་ནག་བལ་པོ་ལ་སོགས་སྐད་རིགས་མི་གཅིག་པའི་སྐྱེ་བོ་དུ་མ་འདུས། རྡོ་རྗེ་གདན་ལ་མཆོད་པ་ལན་གསུམ་བསྐྱལ། མཐར་དགུང་ལོ་ལྔ་བཅུ་རྩ་གཅིག་པ་ས་ལུག་གསང་ཕུའི་རྒྱ་ར་གད་ལོགས་ཀྱི་དགོན་པར་སྐུ་གཤེགས། སྤུར་ཆབ་ལ་གདན་དྲངས་ནས་གཟད་དུ་འུག་སྐད་དགོན་པར་ཟླ་བ་བཞི་བཞུགས། དེ་ནས་ཐང་སྐྱར་སྤྱན་དྲངས་ནས་སྤུར་སྦྱངས་པའི་ཚེ་ན་སྒྲ་དང་འོད་དང་འཇའ་ཚོན་སོགས་དང་སྐུ་དང་ཡིག་འབྲུ་མཆོད་རྟེན་དང་རིང་བསྲེལ་གྱི་ཚོགས་དཔག་མེད་བྱོན་ནོ། །གཅེན་པོ་དཔོན་དང་སློབ་མར་གྱུར་པ་རྣམས་ཀྱིས་སྐྱེས་བུ་ཆེན་པོ་དེའི་གདན་སར་དགོངས་ནས་གཟད་ཐང་སྐྱའི་གཙུག་ལག་ཁང་བཏབ།

རྟ་སྟོན་ཇོ་ཡེ།

༈ ཞིག་པོ་ལ་ཐུགས་ཟིན་གྱིས་སློབ་མ་དྲུག་གི་ནང་ནས་ཀྱང་གདམས་པའི་བཀའ་བྱོ་ཞིང་མཁྱེན་པའི་བཅུད་ཐོབ་པའི་ཐུ་བོར་གྱུར་པ་རྟ་སྟོན་ཇོ་ཡེ་ཡིན། དེ་ནི་མེས་པོ་རྟ་བོན་དབང་གྲགས་བྱ་བ་ཆོས་བོན་གཉིས་ཀ་བྱེད་པ་གཡུ་རུ་སྟོད་ཀྱི་བདག་པོར་གྱུར་པ་ཞིག་ལ་བུ་བརྒྱད་ཡོད་པའི་ཆུང་ཤོས་རྟ་སྟོན་ཇོ་འབུམ། དེའི་བུ་རྟ་སྟོན་ཇོ་ཡེ་འདི་ཡིན། བླ་མའི་མཁྱེན་རྟོགས་བུམ་པ་གང་བྱོའི་ཚུལ་དུ་ཐོབ་པས། འདི་སྐད་གསུངས་ཏེ། ཐོག་མ་མེད་ནས་འཁྲུལ་ལུགས་བསམ་མི་ཁྱབ། །ལས་འཕྲོ་སད་དམ་བསགས་པའི་སྟོབས་ཀྱིས་སུ། །ཚད་ལྡན་བླ་མ་གསང་སྔགས་ཟབ་མོ་དང་། །མང་དུ་མཇལ་ཏེ་ཐོས་པ་བག་རེ་བྱས། །སེམས་ཀྱི་སྒྲོ་འདོགས་ཞིག་པོའི་དྲུང་དུ་ཆོད། །མཉམ་མེད་རིན་ཆེན་དེ་ཡི་ཐུགས་ཀྱི་བཅུད། །བརྒྱུད་པ་བཞི་ལྡན་གདམས་པ་ཟབ་དགུ་གནང་། །ཞེས་ཀྱང་གསུངས། རྟ་སྟོན་ཇོ་ཡེ་འདི་ཆུ་ལུག་ལ་འཁྲུངས། ཉེར་ལྔ་ལ་ཞིག་པོ་དང་མཇལ། ལོ་བཅུ་གཅིག་པར་དབུ་སྔས་སྦྲེལ་ཏེ་བཞུགས། སོ་བདུན་ལ་བླ་མ་ཞིག་པོ་ཞི་བར་གཤེགས། དེ་རྗེས་དེའི་ཕྲིན་ལས་ཀྱི་རྒྱུན་རྒྱ་ཆེར་བསྐྱངས་ནས་དགུང་ལོ་དྲུག་ཅུ་རྩ་བརྒྱད་པ་ལྕགས་སྟག་ལ་ཞི་བར་གཤེགས་སོ། །

གཡུང་སྟོན་རྡོ་རྗེ་དཔལ་བ།

༈ གཡུང་སྟོན་རྡོ་རྗེ་དཔལ་བ་ནི། གདུང་རུས་གླན་ཏེ་ཚོང་འདུས་སུ་འཁྲུངས། གཞོན་ནུ་ནས་མཁྱེན་པ་ཤིན་ཏུ་ཆེ། སྔགས་གསར་རྙིང་དང་མཚན་ཉིད་ཀྱིའང་མངོན་པ་ཀུན་ལས་བཏུས་ལ་མཁས། གཤེད་སྐོར་ཤངས་པ་ཤཱཀ་འབུམ་༼ལ༽གསན་ནས་འཁྲུལ་འཁོར་ལས་སྦྱོར་སོགས་ལ་མཁས་ཤིང་མཐུ་ཆེ། གཞོན་དུས་གོང་མའི་ལུང་གིས་རྒྱ་ཡུལ་དུ་བྱོན། འཆམས་ལ་སོགས་པའི་རྣམ་འགྱུར་དང་། གོང་མ་ལ་འབྲུ་གདབ་དགོས་པའི་མི་སྡེ་མང་པོས། ཐན་པ་བྱུང་བའི་ཚེ་གོང་མ་ལ་ཆར་འབེབས་པ་ཞུས་པས། དེར་ཁོང་བརྫངས་པས། ཁོང་གིས་དཀོན་མཆོག་ལ་གསོལ་བ་བཏབ་པས། ཆར་ཡང་དག་པར་ཕེབས། གོང་མ་དགྱེས་ཏེ་གནང་སྦྱིན་མང་པོ་གནང་བས། ནོམ་པ་ཆེན་པོ་དང་བཅས་བོད་དུ་ཕེབས། ངོ་ཤེས་དང་གྲོགས་མཆེད་སོགས་ལ་ཅི་ཡང་མ་སྦྱིན་པར་ཡུམ་གྱི་དོན་དུ་བླ་མ་དང་དགེ་འདུན་ལ་ཡོ་བྱད་རྣམས་ཕུལ། སྐུ་ཚེའི་སྨད་ལ་ཚོགས་པ་ཆོས་ལུང་པ་ལས་བསྙེན་པར་རྫོགས། མཚན་རྡོ་རྗེ་འབུམ་ཞེས་པ་རྡོ་རྗེ་དཔལ་ཞེས་གསོལ་ལོ། །འདི་ཉིད་ཤིང་སྤྲེལ་ལ་འཁྲུངས་ནས་དགུང་ལོ་བརྒྱད་ཅུ་རྩ་གཉིས་པ་ཤིང་སྦྲུལ་ལ་ཞི་བའི་དབྱིངས་སུ་གཤེགས་སོ། །

ཀུན་མཁྱེན་ཀློང་ཆེན་རབ་འབྱམས།

༈ ཀུན་མཁྱེན་ཀློང་ཆེན་རབ་འབྱམས་པ་ནི། སྟོན་པ་ཉིད་ཀྱིས་གསང་བ་བླ་ན་མེད་པའི་རྒྱུད་ཐལ་འགྱུར་ལས། སློབ་དཔོན་ཆེན་པོ་དགའ་རབ་རྡོ་རྗེ་ནས་བཟུང་རིམ་པ་བཞིན་ལུང་བསྟན་ནས། དེ་འོག་དགེ་སློང་དཔལ་དང་ལྡན། ཞེས་རིག་འཛིན་ཀུ་མཱ་ར་ཛ་དང་དེ་ནས་བློ་གྲོས་མཆོག་གི་འཛིན། ཞེས་ཆོས་རྗེ་ཀུན་མཁྱེན་ཆེན་པོ་ལུང་བསྟན་པ་ཡིན་ཏེ། ཤེས་བྱ་ཐམས་ཅད་ལ་ཆགས་ཐོགས་མི་མངའ་བའི་དོན་དང་། བློ་གྲོས་ཞེས་པའི་མཚན་སྒྲས་ཚིག་གི་སྒོ་ནས་ཀྱང་ཤིན་ཏུ་གསལ་བར་བསྟན་པ་ཡིན་ནོ། །དེས་ན་དམ་པ་འདི་ཉིད་ངོ་བོ་རྒྱལ་བ་ཀུན་དང་རྣམ་དབྱེར་མ་མཆིས་པའི་ཕྲིན་ལས་ལ་དབང་འབྱོར་ཡང་། གནས་སྐབས་གདུལ་བྱ་ཐུན་མོང་གི་དོན་མཛད་ཚུལ་གྱི་ལོ་རྒྱུས་ཅུང་ཟད་བརྗོད་ན། རིགས་ནི་སད་མི་བདུན་གྱི་ནང་ཚན་རྟ་མགྲིན་གྱི་གྲུབ་ཐོབ་ངན་ལམ་རྒྱལ་བ་མཆོག་དབྱངས་ཀྱི་དབོན་རབས་ཉི་ཤུ་རྩ་ལྔ་པ་སློབ་དཔོན་ལྷ་བསྲུང་ཞེས་བདུད་རྩིའི་གྲུབ་ཐོབ་དགུང་ལོ་བརྒྱ་དང་ལྔ་བཞུགས་པ་དེའི་སྲས་སློབ་དཔོན་བརྟན་བསྲུང་ཞེས་པའི་བར་དུ་གྲུབ་ཐོབ་རྒྱུན་ཆགས་པར་བྱོན་པ་དེ་དང་། ཡུམ་འབྲོམ་བཟའ་བསོད་ནམས་རྒྱན་ཞེས་པའི་སྲས་སུ་ས་སྤྲེལ་ལ་གཡུ་རུ་གྲྭའི་སྟོད་གྲོང་ཞེས་བྱ་བར་འཁྲུངས། བཙས་མ་ཐག་ནས་ནམ་གྲུ་རེ་མ་ཏཱིས་གཟུགས་དངོས་སུ་བསྟན་ནས་བསྲུང་བ་དང་། གསུང་བྱེ་ཚེ་དད་པ་དང་སྙིང་རྗེ་བློ་གྲོས་ཀྱི་མཐུ་རྣམས་སྐྱེ་བས་ཐོབ་པའི་རྟགས་ཤིན་ཏུ་གསལ། ལོ་ལྔ་ནས་བྲིས་ཀློག་བརྡ་བསྟན་པ་ཙམ་གྱིས་ཚེགས་མེད་པར་མཁྱེན། བདུན་ནས་བཟུང་ཡབ་ལས། བཀའ་བརྒྱད་བདེ་གཤེགས་འདུས་པ། རྟ་མགྲིན། ཕུར་པ། གུ་རུ་ཞི་དྲག་རྣམས་ཀྱི་དབང་ལུང་མན་ངག་ཕྱག་བཞེས་དང་བཅས་པ་དང་སྨན་རྩིས་ལ་སོགས་པའང་གསན་ཅིང་ཀུན་ཆུབ་པར་མཛད། དགུ་པ་ལ་གྲྭ་ཕྱིའི་ཚོང་འདུས་སུ་ཉི་ཁྲི་དང་བརྒྱད་སྟོང་པ་བརྒྱ་ཚར་སྒྲོག་པས་ཚིག་དོན་ཐུགས་སུ་ཆུད། བཅུ་གཉིས་པ་ལ་བསམ་ཡས་སུ་མཁན་པོ་བསམ་འགྲུབ་རིན་ཆེན་དང་། སློབ་དཔོན་ཀུན་དགའ་འོད་ཟེར་ལས་རབ་ཏུ་བྱུང་། མཚན་ཚུལ་ཁྲིམས་བློ་གྲོས་སུ་གསོལ། འདུལ་བ་ལ་སྦྱངས་ཤིང་བཅུ་བཞི་པ་ལ་བཤད་གསར་མཛད་པས་མཁས་པའི་གྲགས་པ་འཐོན། བཅུ་དགུ་པ་ལ། གསང་ནེའུ་ཐོག་ཏུ་སློབ་དཔོན་བཙན་དགོན་པ་དང་། ཁྱད་པར་བླ་བྲང་པ་ཆོས་དཔལ་རྒྱལ་མཚན་དང་། ཆོས་གྲགས་གཉིས་པར་གྲགས་པ་གཞོན་ནུ་རིན་ཆེན་གཉིས་གཙོ་བོར་བསྟེན་ཅིང་། ཕར་ཚད་ཀྱི་གཞུང་འགྲེལ་མཐའ་དག་གསན་ནས་ཚིག་དོན་རྣམས་ལ་མཁས་པར་སྦྱངས། སློབ་དཔོན་གཞོན་ནུ་རྒྱལ་པོ་ལས་དབུ་མ་རྩ་འཇུག་སོགས་ཀྱི་གཞུང་འགྲེལ་མན་ངགདཔང་ལོ་ཆེན་པོ་ལས་མངོན་པ་དང་མདོ་ཏིང་འཛིན་རྒྱལ་པོ་སོགས་ཟབ་མོ་མདོ་ལྔའི་བཤད་པ་དང་སྙན་ངག་སོགས་ཐ་སྙད་ཀྱི་གཙུག་ལག་རྣམས་ཀྱང་གསན་ཅིང་། དེ་དག་གི་ཚིག་དོན་མཐའ་དག་ལོ་གསུམ་ལ་ཀུན་ཆུབ་པར་གྱུར་ཏེ། ལུང་རིགས་སྨྲ་བའི་སྡེ་རྣམས་སུ་གྲྭ་སྐོར་མཛད་པས། གཞུང་ཚོགས་ཀྱི་རྒྱ། མཁྱེན་རབ་ཀྱི་རྩལ། རིག་པའི་རྣམ་འགྱུར་ཀུན་ལ་ཐོགས་པ་མི་མངའ་བས། ཐམས་ཅད་ཀྱིས་བསྔགས་པའི་ཡུལ་དུ་མཐུན་སྣང་གྲུབ་ཅིང་། བསམ་ཡས་ལུང་མང་པ་ཞེས་མཚན་དུ་ཐོགས། དེ་དག་གི་སྔ་ཕྱི་ཅི་རིགས་པར་དན་ཕག་པ་གཞོན་ནུ་དོན་གྲུབ་ལས། མདོ་སྒྱུ་འཕྲུལ་སེམས་ཕྱོགས་ཀྱི་དབང་ཁྲིད་བཤད་བཀའ་ཐམས་ཅད་དང་། གསང་འདུས་སྦྱོང་རྒྱུད་ལ་སོགས་པ། སློབ་དཔོན་བཀྲ་ཤིས་རིན་ཆེན་ལས་བདེ་མཆོག་དང་ལམ་འབྲས། སྦྱོར་དྲུགཞི་བྱེད་རྫོགས་ཆེན་སེམས་ཕྱོགས་ཀྱི་སྐོར། སློབ་དཔོན་གཞོན་ནུ་རྡོ་རྗེ་ལས་སྤྱོད་འཇུག་དང་བསླབ་བཏུས་བསྟན་རིན་མ་ལ་སོགས་པ། མཐིང་མ་བ་སངས་རྒྱས་གྲགས་འོད་ལས། བཀའ་བརྒྱད་བདེ་གཤེགས་འདུས་པ་སོགས་གསང་སྔགས་གཏེར་མ་མང་པོ་དང་། གཞན་ཡང་ཆོས་རྗེ་རང་བྱུང་རྡོ་རྗེ། ས་སྐྱ་པའི་བླ་མ་བདག་ཉིད་ཆེན་པོ། སློབ་དཔོན་དབང་ཡེས། བླ་མ་འཇམ་དབྱངས་པ། རིན་ཆེན་ཁྲོ་ཕུ་བ། ཁང་དམར་བ། བླ་མ་ཚོང་འདུས་པ། ཟ་ལུང་རིན་པོ་ཆེ། ཤུག་གསེག་རི་པ་སོགས་ཡོངས་སུ་འཛིན་པའི་བཤེས་གཉེན་ཉི་ཤུ་ལྷག་ཙམ་ལས་གསང་སྔགས་གསར་རྙིང་གི་དབང་བཀའ་རྗེས་གནང་། མདོ་སྔགས་ཀྱི་གཞུང་ཆེ་ཆུང་མང་པོའི་བཤད་པ་དང་ལུང་ཟབ་ཁྲིད་གདམས་ངགརྩིས་སོགས་ཐ་སྙད་ཀྱི་ཕྱག་ཁྲིད་སོགས་ཤེས་བྱའི་ཆོས་ཚུལ་མཐའ་དག་ལ་སྦྱངས་ཤིང་མཁས་པར་མཛད། གསང་ཕུར་སྡེ་སྣོད་ཀྱི་གསན་པ་མཛད་པའི་སྐབས་དེ་རྣམས་སུ་མི་གཡོ་བ། དབྱངས་ཅན་མ། ཕག་མོ་ཤེས་རབ་གསལ་བྱེད་རྣམས་ཀྱི་བསྙེན་སྒྲུབ་མཛད་པས་དེ་དག་ཞལ་གཟིགས་ཤིང་། ཁྱད་པར་ལྷ་མོ་དབྱངས་ཅན་མས་ཕྱག་མཐིལ་དུ་བཞག་སྟེ་གླིང་བཞི་རི་རབ་དང་བཅས་པ་ཞག་བདུན་དུ་བསྟན་པས་ཐོགས་པ་མེད་པའི་བློ་གྲོས་ཀྱི་མཐུ་གྲུབ། གསང་ཕུར་བཞུགས་སྐབས་ཁམས་པའི་ཆགས་སྡང་གི་རྩོད་པས་ཐུགས་ཕྱུངས་ཏེ་དབུར་སྟོད་རྒྱ་མ་ལྕོག་ལའི་བྲག་ཕུག་དུ་ཟླ་བ་བརྒྱད་ལ་མུན་མཚམས་ཁོ་ནར་ཏིང་ངེ་འཛིན་ལ་རྩེ་གཅིག་ཏུ་མཉམ་པར་བཞག་པས་ཉམས་རྟོགས་ཁྱད་པར་ཅན་འཁྲུངས། དེའི་ཚེ་རྗེ་བཙུན་འཕགས་མ་མཛེས་སྡུག་མཚུངས་པ་མེད་པའི་ཡེ་ཤེས་ཀྱི་སྐུས་རིན་པོ་ཆེའི་ཅོད་པཎ་ཉིད་ཀྱི་དབུ་ལ་བཅིངས་ཏེ། རྟག་ཏུ་བྱིན་གྱིས་བརླབ་ཅིང་དངོས་གྲུབ་སྩོལ་བར་དབུགས་དབྱུང་བ་ཐོབ། དགུང་ལོ་ཉེར་བདུན་པ་ལ་ཡི་དམ་ལྷས་ལུང་བསྟན་པའི་བླ་མ་རིག་འཛིན་ཆེན་པོ་ཀུ་མཱ་ར་ཛའི་སྤྱན་སྔར་ཕེབས། ཡར་སྟོད་སྐྱམ་གྱི་ཕུར་བཞུགས་པ་དང་མཇལ། ངའི་ཆོས་ཀྱི་བརྒྱུད་པ་འཛིན་པ་འདུག་གསུངས་དགྱེས་པར་མཛད། སྤྱིར་དབང་དང་གདམས་པ་མང་དུ་གསན། ཁྱད་པར་གསང་བ་བླ་ན་མེད་པའི་དབང་དང་གདམས་པ་རྣམས་ཉམས་ཁྲིད་དུ་གསན་ནས་ཟས་གོས་གནས་མལ་སོགས་དཀའ་སྤྱད་ལ་མི་ཞུམས་པའི་སྙིང་སྟོབས་ཀྱིས་ཉམས་ལེན་ཆིག་སྒྲིལ་དུ་མཛད་པས་རྫོགས་པ་ཆེན་པོ་རང་སྣང་རིས་མེད་ཀྱི་ཉམས་རྟོགས་མཐར་ཕྱིན། གཞན་ཡང་དེ་དག་གི་རྒྱུད་འགྲེལ་གདམས་ངག་ཕྲན་ཚེགས་དང་བཅས་པ་རྣམས་ཀྱང་རྫོགས་པར་གསན་ཅིང་གདམས་པའི་གཏད་རྒྱ་དང་བཅས་རྒྱལ་ཚབ་ཏུ་དབང་བསྐུར། མཆིམས་ཕུ་ལ་སོགས་པའི་དབེན་གནས་རྣམས་སུ་ལོ་གསུམ་མའི་དམ་བཅས་མཚོན་ལོ་བདུན་དུ་ཟབ་ལམ་གྱི་སྒྲུབ་པ་ལ་ནན་ཏན་དུ་མཛད། སྐབས་འགར་བླ་མའི་དྲུང་དུ་བསྙེན་ནས་ཉམས་རྟོགས་གྱི་མཐའ་རྒྱ་ལེགས་པར་བཅད་པ་ལས། གནས་ལུགས་ཟབ་མོའི་ལྟ་བའི་གནད། སྒོམ་པ་ཏིང་ངེ་འཛིན་གྱི་དྲོད་རྟགས། ཤེས་བྱ་རབ་འབྱམས་ལ་ཐོགས་མེད་ཀྱི་མཁྱེན་པ། སྲི་ཞུའི་སྤྱོད་ལམ་བསྟེན་ཚུལ་འཁོར་གསུམ་ཡོངས་དག་གི་འབུལ་བ་མང་པོ་སོགས་སྒོ་དུ་མ་ནས་མཉེས་པར་བསྒྲུབས་ཤིང་ཐུགས་ཀྱི་སྲས་གཅིག་པུར་གྱུར། མཆིམས་ཕུར་སྒྲུབ་པའི་དམ་བཅའ་ལ་བཞུགས་སྐབས། གུ་རུ་ཞི་དྲགདཔལ་ཆེན་པོ་གཙོ་འཁོར། རྡོར་སེམས་དང་རྗེ་བཙུན་སྒྲོལ་མ་སོགས་ཡི་དམ་དུ་མའི་ཞལ་གཟིགས། མ་མགོན་གཟའ་དང་དམ་ཅན་རྣམས་ཀྱིས་ཕྲིན་ལས་སྒྲུབ་པར་དམ་མནོས། མཁའ་འགྲོ་རྣམས་དང་ཆོས་ཀྱི་བགྲོ་བ་མི་ལབ་པ་བཞིན་བྱུང་། ལྷ་སར་ཇོ་བོ་མཆོད་ནས་གསོལ་བ་བཏབ་པས། མཛོད་སྤུ་ལས་འོད་ཟེར་འཕྲོས་པ་རང་ལ་ཐིམ་པས་རྒྱ་གར་བྱ་རྒོད་ཕུང་རི་དང་ལི་ཡུལ་གྱི་བཀོད་པ་དེར་པཎྚི་ཏར་འཁྲུངས་ཚེ་ཆོས་མཁྱེན་པ་རྣམས་གསལ་བར་ཤར། ཡོས་ཀྱི་ལོ་མཆིམས་ཕུའི་རི་མོ་ཅན་དུ་སྐལ་ལྡན་འགའ་ལ་སྙིང་ཐིག་གི་དབང་ཁྲིད་དང་པོར་གསུངས་ཤིང་། དེ་དང་འབྲེལ་བར་སྔར་སྲོག་སྒྲུབ་མས་གླེགས་བམ་གཏད་པའི་བརྡའ་དང་གཟུགས་ཅན་གྱིས་གསོལ་འདེབས་ལ་བརྟེན་མཁའ་འགྲོ་སྙིང་ཐིག་གི་དབང་ཁྲིད་ཀྱང་གསུང་དུས་ཨོ་རྒྱན་ཡབ་ཡུམ་གྱིས་དབང་བསྐུར་ཞིང་མཚན་བཏགས། རྡོ་རྗེ་ཕག་མོ་ཡེ་ཤེས་སུ་བབས་པས་གདམས་པའི་གནད་བསྟན། ལས་འབྲེལ་རྩལ་གྱི་འོག་ཏུ་ལོངས་སྐུའི་ཞིང་ཉུལ་བར་བཤད་པ་དེར་ངོས་བཟུང་ནས་ལྐོག་འགྱུར་ལུང་བསྟན་པ་སོགས་ངོ་མཚར་བའི་ཆོ་འཕྲུལ་མཐའ་ཡས་ཀུན་གྱི་སྤྱོད་ཡུལ་དུ་གྱུར། གཡུ་སྒྲོན་མས་བསྐུལ་ཏེ་གངས་རི་ཐོད་དཀར་དུ་ཕེབས། དེར་མཁའ་འགྲོ་སྙིང་ཐིག་གི་ཟབ་མོ་གསལ་བྱེད་ཡང་ཐིག་གི་ཡིག་ཆ་མཛད་པ་ན་རིག་འཛིན་མཁའ་འགྲོའི་དབུགས་དབྱུང་དང་བཅས་ཡུན་ཐུང་ངུ་ལ་གྲུབ། ཀུ་མཱ་ར་ཛས་དབང་གི་བརྡའ་བསྟན། གཤེགས་པའི་མཚན་མ་ཤར་བ་ཏིང་ངེ་འཛིན་གྱིས་མོད་ལ་བཟློགསྐབས་འདི་ནས་ལྷུན་གྲུབ་འོད་གསལ་གྱི་སྣང་བ་དང་། ལྷ་དང་བླ་མའི་ཞལ་གཟིགས་དང་ལུང་བསྟན་པའང་རྒྱུན་ཆགས་པ་བྱུང་། གསུང་རབ་ཀྱི་རྩོམ་པ་ཕལ་ཆེར་ཡང་གནས་འདིར་མཛད། ལྷ་རིང་བྲག་ཏུ་ཞི་ཁྲོའི་སྐོང་ཆོག་མཛད་དུས་ནམ་མཁའ་ལ་ཞི་ཁྲོའི་དཀྱིལ་འཁོར་དེར་འཁོད་ཐམས་ཅད་ཀྱིས་མཐོང་། རྒྱ་མའི་གནས་སུ་སྤྱན་དྲངས་དགེ་བའི་བཤེས་གཉེན་མང་དུ་འདུས་པ་ལ། སྙིང་ཐིག་གི་དབང་ཁྲིད་གསུངས། མཁས་རློམ་འགའི་བློར་མ་ཤོངས་པས་བརྒལ་བརྟག་ཞུས་པ་རྣམས་ལུང་རིགས་ཟབ་མོས་ལོག་རྟོག་བསལ་ནས་དད་པའི་ལམ་ལ་བཀོད། སྒོམ་པ་ཀུན་རིན་གྱིས་འབྲི་གུང་དུ་སྤྱན་དྲངས། གྲོགས་ཨོ་རྒྱན་གྱི་དགོན་པ་ཕུལ་དད་པས་བསྙེན་ཅིང་གདམས་པ་དུ་མས་ཐར་པའི་ལམ་བསྟན། ལུང་བསྟན་བཞིན་ཞྭ་ལྷ་ཁང་གསོས་དུས་དབུ་རྩེའི་ཐད་ནས་གསེར་འགུ་ཚེ་གང་བཏོན་པས་གཙུག་ལག་ཁང་གི་ཆ་རྐྱེན་དང་རྟེན་གྱི་ན་བཟར་གསོལ། གཏེར་མང་དུ་འདུག་པ་ལས་སྒྲུབ་ཐབས་ཟབ་པ་འགའ་ཞིག་བཞེས། དམ་ཅན་བྱིས་པར་བརྫུས་ནས་བཟོ་བོ་རྣམས་ཀྱི་གྲོགས་བྱས། རྡོ་རིང་གཉིས་པོ་སྔར་ཅབ་འགྱེལ་དུ་ཡོད་པ་ཐབས་འཕྲུལ་ཅིས་ཀྱང་མ་ལྷོངས་པ་ཆོས་རྗེ་ཉིད་ཀྱིས་བདེན་སྟོབས་བརྗོད་ནས་སྐུ་ཆོས་ཀྱི་གཡབ་མོས་མོད་ལ་བསླངས། ས་རྡོ་བསལ་དུས་འཐོན་པའི་མནན་པ་རྣམས་སླར་གནོན་པར་བརྩམས་པ་ན་ཐུག་ཆོམ་གྱི་སྒྲ་ཆེན་པོས་འཕར་ཞིང་ས་རྡོའི་ཆར་དང་རླུང་འཚུབ་མུན་བསྲོས་པ་ལྟ་བུའི་ཆོ་འཕྲུལ་གྱིས་འཁོར་རྣམས་བག་འཁུམས་ཏེ་ཅི་བྱ་གཏོལ་དང་བྲལ་བ་ན་ཉིད་ཀྱི་སྐུའི་འགྱུར་བ་དང་གསུང་གི་སྔགས་སྒྲ་དྲག་པོས་མནན་པས་ཆོ་འཕྲུལ་རྣམས་མོད་ལ་ཞི། རབ་གནས་མཛད་དུས་སངས་རྒྱས་བྱང་སེམས་ནམ་མཁའ་གང་བས་ཤིས་བརྗོད་ཀྱི་མེ་ཏོག་འཐོར་བ་དང་། མགོན་པོ་བྱམས་པས་སྐྱེ་བ་གཉིས་འདས་པའི་འོག་ཏུ་པདྨ་བརྩེགས་པའི་ཞིང་དུ་རྒྱལ་བ་རི་རབ་མར་མེའི་རྒྱལ་མཚན་ཞེས་བྱ་བར་འགྱུར་རོ། །ཞེས་ལུང་བསྟན་པ་གཟིགས། ཚེས་བཅུའི་མཆོད་པ་མཛད་ཚེ་སློབ་དཔོན་པདྨ་མཁའ་འགྲོའི་འཁོར་དང་བཅས་པ་བྱོན་ནས་བྱིན་གྱིས་བརླབས། ཏེ་སྒྲོའི་མཁའ་འགྲོ་རྣམས་ཀྱིས་བུམ་ཐང་དུ་འབྱོན་པར་ལུང་བསྟན། གནས་དེར་ཞི་ཁྲོའི་སྐོང་བཤགས་ཡུན་རིང་དུ་མཛད། མིས་མི་ཐར་བའི་བྲག་གཡང་གཟར་པོ་ལ་རྒྱལ་མཚན་དང་བ་དན་བཙུགས། དེ་དག་ཏུ་འགྲོ་བ་མང་པོ་རྗེས་སུ་བཟུང་ནས་ཐར་པའི་ལམ་དུ་རིགས་སད་པར་མཛད། ཕྱིར་ལམ་ལྷ་སར་བྱོན་དུས་ཡར་ཀླུང་པས་ཐོ་འཚམས་པར་བརྩམ་པ་ན་མི་སྣང་བའི་སྒྱུ་འཕྲུལ་གྱིས་ངན་པ་དེ་དག་དམུས་ལོང་དུ་གྱུར། ཇོ་བོ་ལ་མཆོད་ཅིང་གསོལ་བ་བཏབ་པའི་ཚེ་སྐུ་ལས་འོད་ཟེར་འཕྲོས་པའི་སྟེང་གི་ནམ་མཁར་སངས་རྒྱས་བྱང་སེམས་གྲངས་མེད་བཞུགས་པས་བྱིན་གྱིས་བརླབས་པ་དང་། དམ་ཅན་མང་པོས་བྲན་བཞིན་དུ་དམ་ནོད། ཤུག་གསེབ་ཏུ་ཕེབས་དུས་ས་ཕག་གི་འཁྲུག་པས་བོད་མི་བདེ་བའི་མཚན་མ་གཟིགས་ནས་ལྷོ་མོན་དུ་ཐེགས་པར་ཕྱོགས། མཁའ་རི་སོགས་གཞི་བདག་རྣམས་ཀྱིས་ཕོ་མ་ནས་བསུས། ལ་ཡག་མན་ཐང་གནས་སུ་མཁན་ཆེན་པའི་དབུས་སྐལ་ལྡན་དུ་མས་གུས་པར་མཆོད་ཅིང་ཟབ་ལམ་གྱི་གདམས་པས་སྨིན་པར་མཛད། བུམ་ཐང་དང་རྔ་ལོང་སོགས་མཐའ་འཁོབ་མུན་པའི་གླིང་ལྟ་བུར་དབང་ཁྲིད་སེམས་བསྐྱེད་སོགས་སྐལ་བ་དང་འཚམ་པའི་ཆོས་ཀྱི་སྒྲོན་མེས་ཐར་པའི་ལམ་གསལ་བར་བསྟན། ཐར་འདོད་མང་པོའི་འདུས་སྡེར་ཚོགས་པ་ལ་ཐར་པའི་གླིང་དུ་མིང་བཏགས་ནས་རེ་ཞིག་བཞུགས། སླར་ཡང་ལྷོ་འབྲོག་གི་ཆེ་དགུས་སྤྱན་དྲངས་ལ་ཡག་ལྷ་ལུང་དང་མན་ཐང་གནས་སུ་དགེ་འདུན་གཙོ་བོར་གྱུར་པའི་འདུས་པ་སྟོང་ཕྲག་ལོངས་པ་ལ། གསང་བ་སྙིང་ཐིག་གི་དབང་ཁྲིད་སྤྱི་དང་ཁྱད་པར་མཁན་ཆེན་དགེ་འདུན་རྒྱལ་མཚན་ལ་གདམས་པའི་བཀའ་སྲོལ་རྫོགས་པར་གནང་ནས་བསྟན་པའི་གཉེར་གཏད། ཡར་འབྲོག་ཏུ་ཁྲི་དཔོན་རྡོ་རྗེ་རྒྱལ་མཚན་པས་དད་པས་མཆོད། སྐལ་ལྡན་བཅོ་ལྔ་ལ་མཁའ་འགྲོ་སྙིང་ཐིག་དང་འདུས་པ་མང་པོར་ཆོས་འཁོར་རྒྱ་ཆེར་བསྐོར། མཁྱེན་རྟོགས་དང་ཕྲིན་ལས་ཀྱིས་ཕག་གྲུ་ཏཱ་སི་དད་པར་གྱུར་ནས་གཡོར་པོ་གཞུང་དུ་རྙེད་བཀུར་བཟང་པོས་ཡུན་རིང་དུ་མཆོད་ཅིང་ཉིས་སྟོང་དུ་ལོངས་པའི་འདུས་པ་ལ་སྙིང་ཐིག་གི་དབང་ཁྲིད་དང་གོང་དཀར་དུ་སི་ཏུ་པ་གཙོ་བོར་གྱུར་པ་ལ་དབང་དང་གདམས་པ་དུ་མས་རྗེས་སུ་བཟུང་། ས་སྐྱ་པའི་བླ་མ་དམ་པ་དང་གསང་ཕུ་གྲགས་བཟང་གིས་ལྟ་གྲུབ་ཀྱི་གནད་ལ་ཐེ་ཚོམ་གཅོད་པའི་དྲི་ཡིག་ཕུལ་བ་ཆོས་དང་མཐུན་པའི་ལན་གྱིས་གུས་ཤིང་རངས་པར་མཛད། སྐྱིད་ཤོད་གསང་མདར་གླིང་སྟོད་སློབ་དཔོན་ཡོན་རྒྱམ་པ་སོགས་འདུས་པའི་བསྙེན་བཀུར་དང་ཆོས་ཀྱི་དྲི་བ་མང་དུ་བྱས་པ་ལུང་རིགས་དང་འབྲེལ་བའི་ལན་གྱིས་སྤོབས་པ་བཅོམ། གསེར་སྲང་བཅུ་སོགས་ཡོ་བྱད་མང་པོས་ཚིམས་པར་མཛད། ལྷ་སར་བྱོན་དགེ་འདུན་མང་པོའི་སེར་ཕྲེང་གིས་བསུས། ལྷ་ར་གཉིས་ཀྱི་བར་དུ་ཆོས་ཀྱི་ཁྲི་བརྩིགས་པའི་སྟེང་ནས་སེམས་བསྐྱེད་སོགས་ཆོས་འཁོར་རྒྱ་ཆེར་བསྐོར། ཁེངས་པའི་བློ་ཅན་མང་པོ་ལུང་རིགས་ཀྱིས་བརྟུལ་ནས་དད་པའི་གནས་ལ་བཀོད། གནས་རྟེན་རྣམས་མཆོད་ཅིང་བཤད་སྒྲུབ་ཀྱི་སྡེ་མང་པོར་ཚོགས་གསོག་རྒྱ་ཆེར་སྤེལ་ནས་བསྟན་འགྲོའི་ཕན་བདེ་རྒྱས་པའི་རྒྱུར་བསྔོས། སྙེ་ཕུ་ཤུག་གསེབ་ཏུ་ཕེབས་སྐལ་ལྡན་འདུས་པ་སྟོང་ཕྲག་བརྒལ་བར་ཟབ་ལམ་རྫོགས་པ་ཆེན་པོས་སྨིན་པར་མཛད་ནས་དབུར་སྟོད་དུ་སྤྱན་དྲངས། མཁར་བ་རིར་སི་ཏུ་ཤཱཀྱ་བཟང་པོས་མཆོད། དབང་དང་གདམས་པ་དུ་མས་བྱིན་གྱིས་བརླབས། དབྱར་བཞུགས་ཀྱི་ཕོགས་ཕུལ་ནས་གྲོག་ཨོ་རྒྱན་དགོན་པའི་ཕུའི་རྫ་འདབས་ནས་མདའི་བྲག་རྩ་ཡན་གང་བའི་ཆོས་ཉན་འབྲི་གུང་གི་མཁན་སློབ་སོགས་ཆོས་འཆད་ཀྱི་སློབ་དཔོན་བཞི་བཅུ་ཙམ་དང་མི་ཆེན་སྐྱ་བཙུན་མང་པོས་མཚོན་འདུས་པ་སུམ་སྟོང་དུ་ལོངས་པ་ལ་འོད་གསལ་རྡོ་རྗེ་སྙིང་པོའི་དབང་ཁྲིད་རྒྱབ་ཆོས་དང་བཅས་པ་གསུངས་ཤིང་ཡོ་བྱད་དུ་མའི་འགྱེད་ཆེན་གྱིས་ཀྱང་ཚིམ་པར་མཛད། སླར་ཡང་གཞན་དོན་ནུས་པ་བརྒྱ་ཕྲག་བརྒལ་བ་ལ་དབང་གོང་མ་སོགས་ཐུན་མོང་མིན་པའི་གདམས་པ་དང་རྒྱུད་འགྲེལ་མན་ངག་རྣམས་མཐའ་རྒྱས་སུ་སྩལ། ཆོས་ཐོན་པའི་ཚོགས་འཁོར་གྱི་ཚེ། རང་རེ་དཔོན་སློབ་ཆོས་འཁོར་བསྐོར་ནས་ཚོགས་མཆོད་བྱེད་པ་ད་རེས་ཙམ་དུ་གདའ། ཁྱེད་རྣམས་ཀྱིས་ཚེ་འདི་བློས་བཏང་ནས་ཟབ་མོའི་ལམ་གྱིས་གཏན་བདེའི་སྙིང་པོར་ལོངས་པ་གྱིས་ཤིག་ཅེས་ཞལ་བཀོད་ཀྱང་ནན་ཏན་དུ་མཛད། ཞྭ་ལྷ་ཁང་དུ་མཆོད་ཅིང་སྨོན་ལམ་མཛད། དེར་ཁྲོམ་ཆོས་གསུངས་དུས་མེ་ཏོག་གི་ཆར་ངོ་མཚར་བ་བབས། བསམ་ཡས་དུད་གཏོང་དྲུག་གིས་སྤྱན་འདྲེན་ལ་བརྟེན་རྒྱ་མར་དད་ཅན་དུ་མས་མཆོད་ཅིང་གདམས་པའང་ཅི་རིགས་པ་སྩལ་ནས་མཆིམས་ཕུར་ཕེབས། ཆོས་ཉན་པ་མང་དུ་འདུས་པ་ལ་གསང་བ་བླ་ན་མེད་པའི་ཁྲིད་བཙུགས་ཚོགས་པ་ཆེས་པས་སྤྲོས་མེད་ཀྱི་དབང་ཞག་དུ་མར་སྦྲེལ་བ་ཚེས་བཅུ་དྲུག་གི་བར་དུ་གསུངས་ནས། ང་ནི་མི་སྡོད་པདྨ་ལས་འབྲེལ་རྩལ། །འཆི་མེད་བདེ་ཆེན་བཙན་ས་འཛིན་དུ་འགྲོ། །གཡུལ་ལས་རྣམ་པར་རྒྱལ་བའི་ལྷ་དབང་དང་། །རྒྱ་མཚོར་དོན་ཡོངས་གྲུབ་པའི་ཚོང་པ་དང་། །བསམ་གཏན་གྲུབ་པའི་དགའ་བས་ཆེས་ལྷག་གོ། ཞེས་སོགས་ཀྱིས་ཞལ་ཆེམས་གསུངས་པ་བཞིན་དུ་དགུང་ལོ་ལྔ་བཅུ་རྩ་དྲུག་བཞེས་པ་ཆུ་མོ་ཡོས་ཀྱི་ལོ་རྒྱལ་ཟླའི་ཚེས་བཅོ་བརྒྱད་ཀྱི་དྲོ་ཁར་ཆོས་སྐུའི་བཞུགས་སྟངས་ཀྱིས་གདོད་མའི་ཟད་སར་གཤེགས་སོ། །དེའི་ཚེ་རྡུལ་བྲལ་གྱི་ནམ་མཁར་འཇའ་ཚོན་གྱི་གུར་དང་མེ་ཏོག་གི་ཆར་སོགས་ངོ་མཚར་བའི་ལྟས་ཟླ་མཆོད་ཀྱི་བར་རྒྱུན་ཆགས་པ་དང་། ཁྱད་པར་གདུང་བསྲེག་ཁང་དུ་སྤྱན་དྲངས་ཚེ་ས་ལན་གསུམ་དུ་གཡོས་ཐུགས་ལྗགས་སྤྱན་གསུམ་མེས་མ་རྨས་པ་དང་རིགས་ལྔའི་གདུང་དང་རིང་བསྲེལ་གྲངས་མེད་པ་བྱོན་ནོ། །སློབ་མ་ཡང་དུས་མཉམ་གྱི་སྐྱེས་ཆེན་ཕལ་མོ་ཆེས་གསང་བ་སྙིང་ཐིག་གི་ཆོས་འདི་དང་འབྲེལ་བའི་མན་ངག་ཅི་རིགས་པ་མ་གསན་པ་མེད་པ་ལྟ་བུ་དང་། དབང་ལུང་མན་ངག་རྫོགས་པར་ཐོབ་པ་ནི་སྟོང་ཕྲག་མང་པོ་དང་། དབང་ཁྲིད་ཙམ་ཐོབ་པ་ནི་བགྲང་བའི་ཡུལ་ལས་འདས་ཤིང་། ཉམས་མྱོང་དྲོད་ཚད་ཐོབ་པའང་ཤིང་ཏུ་མང་བས་ལྗོངས་འདིའི་རི་སུལ་ཐམས་ཅད་རྫོགས་པ་ཆེན་པོའི་རྣལ་འབྱོར་གྱིས་ཁྱབ་པར་མཛད་དོ། །གཙོ་བོར་གྱུར་པ་ནི། མཁས་གྲུབ་ཁྱབ་བརྡལ་ལྷུན་གྲུབ། གུ་རུ་འོད་གསལ་རང་གྲོལ། མཁས་གྲུབ་བདེ་ལེགས་རྒྱ་མཚོ། བྱ་བྲལ་བཀྲ་ཤིས་འབྱུང་གནས། གྲོག་ཨོ་རྒྱན་ཆོས་རྗེ། རྒྱལ་སྲས་བཟོད་པ་གྲགས། ལྡན་སྒོམ་ཆོས་གྲགས་བཟང་པོ། འཁྲུལ་ཞིག་སངས་རྒྱས་དབོན་པོ། ཤུག་གསེབ་པ་ཡེ་ཤེས་རབ་འབྱམས་རྣམས་ཀྱིས་ཕྲིན་ལས་ཀྱིས་རྒྱུན་རྒྱ་ཆེར་སྤེལ་བར་མཛད་པའོ། །

སྒྲུབ་བརྒྱུད་ཀྱི་གདན་རབས།

སྤྲུལ་སྐུ་སྣ་ཚོགས་རང་གྲོལ།

༈ ད་ནི་རང་ཅག་རྣམས་ཀྱི་སྒྲུབ་བརྒྱུད་ཀྱི་གདན་རབས་བརྗོད་པར་བྱ་སྟེ། དེ་ལ་སྤྲུལ་སྐུ་སྣ་ཚོགས་རང་གྲོལ་ནི། གཏེར་ཆེན་རཏྣ་གླིང་པའི་སྐྱེ་བ་དེ་མ་ཐག་པ་སྟེ། ལྷོ་བྲག་སྨན་ཐང་ཞོལ་དུ་ཡབ་ཚེ་དབང་བསམ་གྲུབ་དང་། ཡུམ་ཨོ་རྒྱན་སྐྱིད་ཀྱི་སྲས་སུ་ཤིང་སྟག་ལ་འཁྲུངས། བྱིས་པའི་དུས་ནས་དད་པ་དང་སྙིང་རྗེ་ཆེ་ཞིང་དམ་པའི་བག་ཆགས་སད། དགུང་ལོ་བདུན་བརྒྱད་ལ་བྲིས་ཀློག་སྦྱངས་པ་ཚེགས་མེད་དུ་མཁྱེན། བཅོ་ལྔ་ལ་ལྷ་ལུང་དུ་མཁན་ཆེན་ཚུལ་དཔལ་བ་དང་། ལྷུན་བཀྲས་པ་ལས་རབ་ཏུ་བྱུང་། ཆོས་སྤྱོད་ཕྲིན་སྒྲུབ་གར་འཆམས་དཀྱིལ་འཁོར་བྲི་ཐིག་སོགས་སྦྱངས་པས་མི་རིང་བར་གཞན་གྱི་སློབ་དཔོན་ཕེར་བ་བྱུང་། ཕྱིས་སྤོས་ཁང་པ་ཀུན་དགའ་བློ་གྲོས་དང་། ཆོས་ལུང་པ་ཚུལ་དཔལ་ལ་མཁན་སློབ་ཞུས་ནས་བསྙེན་པར་རྫོགས་ཤིང་འདུལ་བའི་བསླབ་བྱ་དང་ལག་ལེན་རྣམས་ཀྱང་ལེགས་པར་སྦྱངས། མཁན་སློབ་གཉིས་དང་། མཁས་གྲུབ་རིན་ཆེན་བཟང་པོ། གཏེར་ཆེན་པདྨ་གླིང་པ། སྤྲུལ་སྐུ་བྱང་ཆུབ་གླིང་པ། ཀུན་སྤངས་ལེགས་པའི་ཤེས་རབ་སོགས་བཤེས་གཉེན་དམ་པ་དྲུག་ཅུ་ཙམ་སྔ་ཕྱིར་བསྟེན་ནས་བཀའ་གདམས་པ་ས་རྙིང་དྭགས་ཤངས་ཞི་གཅོད་ཇོ་ཞལ་བོ་དོང་པ་སོགས་ཡོངས་སུ་གྲགས་པའི་ཆོས་ཚུལ་དུ་མའི་དབང་ཁྲིད་ལུང་བཤད་མན་ངག་སོགས་གྲངས་འཛིན་པ་ཙམ་ཡང་དཀའ་བའི་གནས་སུ་གྱུར་པ་གསན་ཅིང་། ཁྱད་པར་མཚུངས་མེད་ཀུན་དགའ་རྒྱལ་མཚན། རྫོགས་ཆེན་པ་ཀུན་དགའ་བཀྲ་ཤིས། སྨན་རྩེ་བ་བློ་གྲོས་རྒྱལ་མཚན། མཁས་གྲུབ་མ་ཏི་དྷྭ་ཛ། བྱམས་སྡིངས་པ་ཁུ་དབོན་ལ་སོགས་ལས་ཆོས་རྗེ་ཀུན་མཁྱེན་ཆེན་པོའི་བཀའ་སྲོལ་སྙིང་ཐིག་ཡ་བཞི་མཛོད་བདུན་ངལ་གསོ་སྐོར་གསུམ་གྱིས་མཚོན་ཕྲིན་ལས་བཀའ་སྲུང་དང་བཅས་པ་མཐའ་དག་དོན་གཉེར་ཆེན་པོས་གསན་ནས་བསམ་སྒོམ་གྱིས་ཀུན་ཆུབ་པར་མཛད་ཅིང་། ཤེལ་བྲགམཆིམས་ཕུ། མཁར་ཆུ། ཡང་རྫོང་སོགས་དབེན་པའི་སྒྲུབ་གནས་དུ་མར་བསྐྱེད་རྫོགས་ཟབ་མོའི་རྣལ་འབྱོར་ལ་རྩེ་གཅིག་པའི་ཉམས་ལེན་ལོ་ཟླ་དུ་མར་སྦྲེལ་བ་ལན་མང་དུ་མཛད་པས་རང་བཞིན་རྫོགས་པ་ཆེན་པོའི་ལྟ་སྒོམ་འབྲས་བུའི་དྲོད་ཚད་མཐར་ཕྱིན། ཡི་དམ་ལྷག་པའི་ལྷ་དུ་མས་ཞལ་གཟིགས་ཤིང་ལུང་བསྟན་པ་ཐོབ། ཆོས་བརྒྱད་ཀྱི་འཆིང་བས་མ་གོས་པའི་འགྲོ་ཕན་གྱི་འཕྲིན་ལས་ལྷུན་གྲུབ་ཏུ་ཤར། དགུང་ལོ་ཞེ་གཉིས་པ་ཤིང་ལུག་ལོར་དར་རྒྱས་ཆོས་སྡིངས་ཀྱི་རི་ཁྲོད་བཏབ། ཐར་པ་དོན་གཉེར་གྱི་ཚོགས་པའང་ལྔ་བརྒྱར་ལོངས་ཙམ་འདུས། ཆོས་དང་མཐུན་པའི་རྣམ་ཐར་ལ་བཀོད། དབྱར་དགུན་གྱི་དུས་ཆོས་ཁྲིགས་སུ་བཅད་ནས། དུས་མེད་ཀྱི་དབང་ཆོས་སོ་སོའི་མོས་པ་དང་འཚམ་པར་གསུངས་ནས་ཉམས་རྟོགས་ཅན་མང་དུ་ཐོན། ཕྱོགས་ཀྱི་དད་ལྡན་རྣམས་ཀྱི་ཞིང་དུ་དབུས་གཙང་ལྷོ་མོན་ལ་སོགས་པར་བྱོན་ནས་སྒྲུབ་དབང་ཁྲིད་ལུང་མན་ངག་སོགས་ཆོས་སྒོ་རིས་མེད་སྐལ་བ་བཞིན་བསྟན་པས་འབྲེལ་ཚད་དོན་ཡོད་པར་མཛད། དམ་པའི་ཆོས་ལ་བརྟེན་པའི་སློབ་མའང་ཞྭ་དམར་བ་དཀོན་མཆོག་འབངས་དང་། འབྲི་གུང་ཟུར་པ་སོགས་ཆེ་དགུ་དུ་མ་དང་། སྤྲུལ་སྐུ་བྱང་ཆུབ་གླིང་པ། སྣང་རྩེ་བ་གར་གྱི་དབང་པོ། བདེ་ཆེན་གླིང་པ་སོགས་ཟབ་གཏེར་གྱི་བཀའ་བབས་པ་རྣམས་དང་། དཔལ་སྡིངས་རབ་འབྱམས་པ་དང་དཔལ་སྒང་ལོ་ཙཱ་བ་སོགས་མཁས་པ་དུ་མ་དང་། གྲུབ་ཆེན་ཀུན་བཟང་དཔལ་འབར་དང་། ཀློང་ཡངས་པ་སོགས་སྒོམ་ཉམས་ཅན་གྱི་རྣལ་འབྱོར་པ་དུ་མ་དང་། ཁྱད་པར་བསྟན་འཛིན་ཆོས་ཀྱི་རྒྱལ་པོ་དང་། ཐུགས་སྲས་ཀུན་དགའ་གྲགས་པ། ཤ་མི་དཔལ་འབྱོར་རྒྱལ་མཚན་པ་སོགས་བཀའ་སྲོལ་སྙིང་པོར་འཛིན་པ་དུ་མ་དང་། ས་སྐྱོང་ཡར་འབྲོག་པ་དང་། འཕྱོངས་རྒྱས་པ་སོགས་སྡེ་བདག་མང་པོ་དང་། གཞན་ཡང་རབ་བྱུང་། སྔགས་པ། སྒོམ་ཆེན་ཕོ་མོ་ཁྱིམ་བདག་སོགས་གདུལ་བྱ་མང་པོའི་དོན་མཛད་པས་དབུས་གཙང་མངའ་རིས་ཁམས་ཀོང་མོན་སོགས་སུ་ཆོས་བརྒྱུད་འཛིན་པའི་སློབ་མ་ཡང་སློབ་དང་བཅས་པ་མང་དུ་བྱུང་བས་མཚོན་རྙིང་མའི་བསྟན་འཛིན་ཞིག་ལ། ཆོས་ཀྱི་ཕྲིན་ལས་ཆེ་བར་མངོན་སུམ་དུ་གྲུབ་བོ། །དེ་ལྟར་ཞིང་འདིར་ལོ་གྲངས་དོན་བདུན་དུ་བཞུགས་ནས་ལྕགས་རྟ་ལ་གཡོ་རུ་ཁྲ་འབྲུག་གི་ཉེ་འདབས་སུ་གཤེགས་སོ། །

སྤྲུལ་སྐུ་བསྟན་འཛིན་གྲགས་པ།

༈ སྤྲུལ་སྐུ་བསྟན་འཛིན་གྲགས་པ་ནི། སྔན་ལུང་རྒབ་ལར་ཡབ་བཀྲ་ཤིས་དང་ཡུམ་བསམ་གཏན་བཟང་མོའི་སྲས་སུ་མེ་སྤྲེལ་ལ་འཁྲུངས། གཏེར་ཆེན་པདྨ་གླིང་པའི་སྤྲུལ་པར་ལུང་གིས་ཟིན། གསུང་བྱེ་བ་ཙམ་ནས་སྔོན་གྱི་བག་ཆགས་གསལ་བར་གསུངས། དགུང་ལོ་བཞི་པ་ལ་གཏེར་སྟོན་གྱི་སྲས་རྣམས་ཀྱིས་བུམ་ཐང་དུ་སྤྱན་དྲངས་སོ་སོའི་སར་རྙེད་བཀུར་ཕུན་སུམ་ཚོགས་པས་མཆོད། པདྨ་གླིང་དུ་སྲས་དཀོན་མཆོག་བཟང་པོའི་གདུང་ཚབ་ཏུ་བཞུགས་པར་བྱས་ཏེ་རབ་ཏུ་བྱུང་། གོང་མའི་གཏེར་ཁའི་དབང་ལུང་སྒྲུབ་ཕྲིན་རྣམས་གསན་སྦྱོང་ལ་ཞུགས་ནས་མི་རིང་བར་ཆོས་རྗེ་དཀོན་མཆོག་བཟང་པོ་གཤེགས་པས་བདེ་ཆེན་གླིང་དུ་སྲས་ཟླ་བའི་སར་རེ་ཞིག་བཞུགས་ཏེ་ཆོས་བཀའ་ཅི་རིགས་པ་གསན། དགུང་ལོ་བཅུ་གཉིས་པ་ལ་སྤྲུལ་སྐུ་སྣ་ཚོགས་རང་གྲོལ་གྱིས་བོད་དུ་སྤྱན་དྲངས། ལྷོ་བོད་ཀྱི་བསྟི་གནས་རྣམས་སུ་བཞུགས་སུ་གསོལ་ཏེ། རྙེད་བཀུར་གྱིས་རིམ་གྲོ་དང་། མདོ་སྔགས་གསར་རྙིང་གི་ཆོས་སྒོ་མཐའ་ཡས་པ་དང་། ཁྱད་པར་ཆོས་རྗེ་ཀུན་མཁྱེན་ཆེན་པོ་དང་། གཏེར་སྟོན་པདྨ་གླིང་པའི་ཆོས་སྐོར་རྣམས་ཀྱི་དབང་ཁྲིད་ལུང་མན་ངག་ཕྱག་ལེན་དང་བཅས་པ་ཐམས་ཅད་བུམ་པ་གང་བྱོར་གསན་ཅིང་དེ་དག་གི་དོན་བསྐྱེད་རྫོགས་ཟབ་མོའི་རྣལ་འབྱོར་གྱིས་སྒོམ་སྒྲུབ་དང་སྦྱངས་པ་རྣམས་བླ་མའི་དྲུང་དུ་སྒྲོ་འདོགས་ཆོད་པར་མཛད། ཉི་ཤུ་པ་ལ་ལྷོ་བྲག་ཏུ་བྱོན། མཚོ་ཡུལ་བྲག་དཀར་བས་དགོན་གནས་སོགས་ཀྱི་འབུལ་བས་མཚོན་སྔོན་གྱི་བུ་སློབ་དང་ཡོན་བདག་ཐམས་ཅད་ཀྱིས་བཏུད་ཅིང་མཆོད། དེར་བླ་མ་དབུ་མཛད་པ་ལས་དབང་ལུང་ཅི་རིགས་པ་དང་འཆམས་དབྱངས་སོགས་གསན་ཅིང་སྦྱངས། བུམ་ཐང་དུ་སྲས་ཟླ་བའི་སྤྱན་སྔར་བཀའ་བརྒྱད་སྒྲུབ་དབང་སོགས་དབང་ལུང་འགའ་ཞིག་གསན། ཕྱོགས་དེའི་སྐྱེ་བོ་མཆོག་དམན་ཀུན་གྱིས་མཆོད་ཅིང་མོས་པ་དང་འཚམ་པའི་ཆོས་ཀྱིས་དོན་ལྡན་དུ་མཛད་སླར་ཡང་བོད་དུ་བྱོན་ནས་རིགས་བདག་སྤྲུལ་སྐུ་ཆེན་པོ་ཉིད་དང་། གཞན་ཡང་ས་སྐྱ་སྔགས་འཆང་ཆེན་པོ། རྗེ་བཙུན་གྲོལ་མཆོགསྣང་རྩེ་རིག་འཛིན་སོགས་ཡོངས་འཛིན་དུ་མ་ལ་ཆོས་སྒོ་རྣམ་གྲངས་མཐའ་ཡས་པ་གསན། མཆིམས་ཕུ་ལ་སོགས་པར་ཟབ་ལམ་གྱི་སྒྲུབ་པ་ནན་ཏན་དུ་མཛད་ཅིང་གནས་ལུགས་ཟབ་མོའི་དོན་རྟོགས། ལྷག་པའི་ལྷ་དུ་མའི་ཞལ་གཟིགས་ཤིང་ལུང་བསྟན་པའང་ཐོབ། དེ་ནས་ཆོས་རྗེ་ཉིད་ཀྱི་དགོན་གནས་རྟེན་གསུམ་དང་བཅས་པ་ཕོག་ནས་གདན་སར་དབང་བསྐུར། ཞི་བར་གཤེགས་རྗེས་དགོངས་རྫོགས་རྟེན་བཞེངས་སོགས་སྒྲུབ་པའི་ཁུར་བཞེས་ཤིང་། ཕྱིས་གུ་རུ་གཙོ་འཁོར་གྱི་གསེར་སྐུ་མི་ཚད་མ་སོགས་རྟེན་བཞེངས་དུ་མ་དང་། དབྱར་དགུན་གྱི་སྒྲུབ་དབང་དུས་ཁྲིད་གསུང་བས་མཚོན་བུ་སློབ་ཡོན་བདག་གི་འཛིན་སྐྱོང་སོགས་བླ་མའི་འཕྲིན་ལས་སྐྱོང་བའི་ཁུར་བཞེས་ཤིང་། རྒྱལ་སྲས་པདྨ་ཆོས་རྒྱལ་དང་། བྱང་བདག་དབང་པོའི་སྡེ་སོགས་ཀྱིས་ཀྱང་གུས་པར་བཏུད་པས་མཚོན། ལྷོ་མོན་དང་གཙང་རོང་སོགས་ཀྱི་གདུལ་བྱ་སོ་སོའི་ཞིང་དུ་བྱོན་ཏེ་དེ་དག་གི་རེ་བ་དང་མཐུན་པའི་དོན་མཛད། རིགས་སྲས་པདྨ་འཕྲིན་ལས་ཆོས་དང་ཟང་ཟིང་གཉིས་ཀས་བསྐྱངས་ཏེ། རང་གི་འཁྲུངས་ཡུལ་དང་ཉེ་བའི་རི་ལ་དགོན་གནས་འདེབས་པར་བཀའ་བསྒོས་པ་ལྟར་སྒང་སྟེང་གསང་སྔགས་ཆོས་གླིང་གི་དགོན་སྡེ་བཏབ་ཅིང་བསྟན་པའི་རྒྱུན་བཟུང་བ་ཡང་འདིའི་ཕྲིན་ལས་ཀྱི་རྒྱུན་ཡིན། དབུས་སུ་རྗེ་སྣ་ཚོགས་རང་གྲོལ་གྱི་སྤྲུལ་སྐུ་གདན་སར་སྤྱན་དྲངས། དབང་ལུང་མན་ངག་དང་བཅས་པ་མཐའ་རྒྱས་སུ་སྩལ་ཏེ་བསྟན་པའི་བདག་པོར་མངའ་གསོལ་ནས། མི་རིང་བར་དགུང་ལོ་དྲུག་ཅུ་རེ་གཉིས་པ་མེ་མོ་བྱ་ལོ་ནག་ཟླའི་ཉེར་བརྒྱད་ལ་དར་རྒྱས་ཆོས་སྡིངས་ཀྱི་དབེན་གནས་སུ་ངོ་མཚར་བའི་ལྟས་དང་བཅས་ཏེ་གཤེགས་སོ། །

མཁས་གྲུབ་མདོ་སྔགས་བསྟན་འཛིན།

༈ མཁས་གྲུབ་མདོ་སྔགས་བསྟན་འཛིན་ནི། གཡོ་རུ་དོལ་དུ་ཡབ་སྨྱོས་རྡོ་རྗེ་ཚེ་དབང་དང་ཡུམ་བསོད་ནམས་བུ་ཁྲིད་ཀྱི་སྲས་སུ་མེ་བྱི་ལ་འཁྲུངས། རྗེ་སྣ་ཚོགས་རང་གྲོལ་གྱི་སྔོན་རབས་གསལ་བར་གསུངས་པས་མཚོན་དམ་པའི་བག་ཆགས་བཟང་པོ་སད། དགུང་ལོ་དྲུག་པ་ལ་གོང་མའི་གདན་སར་སྤྱན་དྲངས། བྲི་ཀློག་དང་ཕྲིན་སྒྲུབ་སོགས་ཀྱི་ཐུགས་སྦྱོང་ཚེགས་མེད་དུ་ཆུབ། བརྒྱད་པ་ལ་ཞྭ་དམར་དཀོན་མཆོག་འབངས་ལས་དགེ་བསྙེན་གྱི་སྡོམ་པ་ནོད། དཀོན་མཆོག་འོད་ཟེར་དུ་བཏགས། བཅུ་གསུམ་པ་ལ་རྒྱལ་དབང་བསྟན་འཛིན་གྲགས་པ་ལས་རབ་ཏུ་བྱུང་། མདོ་སྔགས་བསྟན་འཛིན་བཟང་པོར་གསོལ། ཆོས་རྗེ་ཀུན་མཁྱེན་ཆེན་པོ་དང་། གཏེར་ཆེན་པདྨ་གླིང་པའི་ཆོས་སྐོར་ཡོངས་སུ་རྫོགས་པའི་དབང་ལུང་ཁྲིད་མན་ངག་ཕྱག་བཞེས་དང་བཅས་པ་མཐའ་རྒྱས་དང་། གཞན་ཡང་ཐུགས་སྲས་ཀུན་དགའ་གྲགས་པ། གྲུབ་ཆེན་ཀུན་དགའ་རྡོ་རྗེ། སྔགས་འཆང་ཀུན་བཟང་དཔལ་འབྱོར། རྒྱལ་སྲས་ནོར་བུ་དབང་རྒྱལ། བྱང་བདག་དབང་པོའི་སྡེ་སོགས་ལས་རྙིང་མ་དང་། ས་སྐྱ་པ་ཁྲི་ཆེན། ཞྭ་དམར་ནག་སོགས་བཤེས་གཉེན་མང་པོར་གསར་རྙིང་གི་ཆོས་བཀའ་ཇི་སྙེད་པ་སྔ་ཕྱིར་གསན། བཅོ་བརྒྱད་པ་ལ་འབྲས་ཡུལ་སྐྱེད་ཚལ་དུ་འབུམ་རམ་པ་ཐར་པ་རྒྱལ་མཚན་ལ་བསྟེན་ནས་བསྡུས་ཚད་དབུ་ཕར་འདུལ་མངོན་སྡོམ་རིག་དང་བཅས་པའི་གཞུང་ལུགས་རྣམས་ལ་ནན་ཏན་ཆེན་པོས་སྦྱངས་ཤིང་། ཆོས་གྲྭ་དེར་ལུང་རིགས་སྨྲ་བའི་འགྲན་ཟླ་མེད་པའི་མཐུན་སྣང་དུ་གྲུབ། སྒྲ་དང་སྙན་ངག་སྡེབ་སྦྱོར་གསོ་རིག་བཟོ་གནས་སོགས་ཀྱང་ལས་དེ་དང་དེ་ལ་མཁས་པའི་སློབ་དཔོན་འགའ་ཞིག་ལས་ཐུགས་སུ་ཆུད་པར་སྦྱངས་པས་མཁས་པའི་གནས་ཐོབ། དགུང་ལོ་ཉེར་ལྔ་པ་ལ་ཀརྨ་པ་དགུ་པ་མཁྱེན་པས་ཐུགས་ཕྲོགས་ཏེ། སྒར་ཆེན་གྱི་འབེལ་གཏམ་གླེང་བར་བཀས་བསྐུལ་བ་ལས་ལོ་གསུམ་དུ་མདོ་སྔགས་རིག་གནས་ལོ་རྒྱུས་དང་བཅས་པའི་གསུང་རབ་འབེལ་མཆིད་ཀྱིས་འཆད་པ་དང་། རྩོད་ངག་གིས་རྒོལ་ཞིང་ལན་འདོན་པ་སོགས་གང་ལ་ཡང་ཐོགས་པ་མེད་པའི་རྣམ་དཔྱོད་ཀྱིས་བློ་ལྡན་ཐམས་ཅད་ཀྱིས་བསྔགས་པའི་གནས་སུ་གྱུར། སྐབས་གཞན་དུ་གདན་ས་ཕན་ཚུན་དང་། མཆིམས་ཕུ། གཡའ་མ་ལུང། ལྷོ་བྲག་མཁར་ཆུ་སོགས་དབེན་གནས་དུ་མར་ཡི་དམ་ལྷའི་བསྙེན་སྒྲུབ་དང་། རང་བཞིན་རྫོགས་པ་ཆེན་པོའི་རྣལ་འབྱོར་ལ་རྩེ་གཅིག་པའི་སྒྲུབ་པ་ལོ་དང་ཟླ་བ་མང་པོར་སྦྲེལ་བ་སོགས་སྔ་ཕྱིར་མཛད་པས་བསྐྱེད་རྫོགས་ཟབ་མོའི་ཉམས་རྟོགས་མཐར་ཕྱིན། གུ་རུ་རིན་པོ་ཆེ་དང་། རྗེ་བཙུན་སྒྲོལ་མ་སོགས་ཡི་དམ་དུ་མས་ཞལ་གཟིགས་ཤིང་དབུགས་དབྱུང་བ་ཐོབ། ལྷོ་དབུས་ཀྱི་གདན་ས་རྣམས་དང། དད་པའི་ཞིང་དུ་མར་བླ་མ་དང་ཐུགས་རྗེ་ཆེན་པོ་ཞི་ཁྲོ། བཀའ་བརྒྱད་རྣམས་ཀྱི་སྒྲུབ་ཆེན་ལ་བརྟེན་ནས་དམ་རྫས་ཀྱི་འགྲོ་ཕན་དང་། དབང་ཁྲིད་ལུང་མན་ངག་མང་པོ་དུས་དང་དུས་མེད་དུ་གསུངས་པ་ལས། རིགས་སྲས་གསང་བདག་ཆེན་པོ་དང་། རྫོགས་ཆེན་པ་ནམ་མཁའ་འབྲུག་སྒྲ། མངའ་བདག་བསྟན་འཛིན་ཆོས་བཟང་། སྤ་གྲོ་བ་ཆོས་དབང་ལྷུན་གྲུབ། སྤོ་བོ་རྦ་ཁ་སྐུ་སྐྱེ་རིག་འཛིན་རྒྱ་མཚོ། མང་ཐོས་དམ་ཆོས་བཟང་པོ་སོགས་བཀའ་སྲོལ་སྐྱོང་བ་དུ་མ་དང་། ལུང་རིགས་སྨྲ་བའི་སྟོན་ཆེན། ཐ་སྙད་འཛིན་པའི་མཁས་པ། སྒོམ་ཉམས་ཅན་གྱི་རྣལ་འབྱོར་ཕོ་མོ་སོགས་དམ་པའི་ཆོས་ཀྱིས་བསྡུས་པའི་བུ་སློབ་དབུས་གཙང་ལྷོ་མོན་གྱི་ཕྱོགས་ཐམས་ཅད་ཁྱབ་པ་དང་། ས་སྐྱོང་སྐུ་རབ་པ་དང་། བྱ་ས་ཁྲི་དཔོན་འཕྱོངས་རྒྱས་སྟག་རྩེ་བ། ཡར་ཀླུང་ཕོ་བྲང་པ་སོགས་རིགས་དང་ལོངས་སྤྱོད་ཀྱིས་མཐོ་བས་མཚོན་ཡོན་བདག་དུ་མས་དད་པས་བསྙེན་བཀུར། དབང་ཆོས་དང་ཕྲིན་ལས་བཞིའི་ཡུལ་གང་ལ་གང་འཇུག་པ་དེས་ལས་འབྲས་དོན་ལྡན་གྱིས་རེ་བ་བསྐངས། ལྐོག་གྱུར་གྱི་གནས་ལུང་དུ་བསྟན་པ་རྣམས་ཀྱང་ཇི་ལྟ་བ་བཞིན་མངོན་དུ་གྱུར་པས་བླང་དོར་གྱི་དམིགས་ཕྱེ། ལྷོ་བྲག་བཀྲ་ཤིས་སྒང་གི་རི་བོར་དང་ཚུགས་ཅན་གྱི་འདུས་སྡེ་བཏབ་པ་ཡང་རེ་ཞིག་གནས། བྱང་ཆུབ་གླིང་དུ་རྫོགས་ཆེན་བླ་བརྒྱུད་ཀྱི་སྣང་བརྙན་ངོ་མཚར་བའི་འབུར་སྐུ་དང་། ཐུབ་པ་གནས་བཅུ་དང་། སྒྲུབ་སྡེ་དགུ། མཚན་བརྒྱད་སོགས་བྲིས་ཐང་མང་པོ་དང་། འདུལ་བ་ལུང་སོགས་བཀའ་བསྟན་གྱི་གླེགས་བམ་ཇི་སྙེད་པ་བཞེངས་ཤིང་། ཆོས་འཁོར་བསམ་ཡས་དང་། ལྷ་ས་ལ་སོགས་པར་སྔ་ཕྱིར་མར་མེ་སོགས་མཆོད་འབུལ་སྨོན་ལམ་དང་བཤད་སྒྲུབ་ཀྱི་འདུས་སྡེ་མང་པོར་ཚོགས་གསོག་གི་ཡོ་བྱད་དུ་མས་བསྙེན་བཀུར་བས་མཚོན་སྐུ་གསུང་ཐུགས་ཀྱི་ཕྲིན་ལས་འཁོར་ལོ་གསུམ་གྱི་འཇུག་པ་ཅི་རིགས་པ་ལས་ནམ་ཡང་མི་གཡེལ་བས་བསྟན་པ་དང་འགྲོ་བའི་དོན་རྒྱ་ཆེན་པོ་མཛད་ནས། དགུང་ལོ་ང་གསུམ་པ་ས་ཕོ་འབྲུག་གི་ལོའི་བར་གྱི་རྣམ་ཐར་ཞལ་གསུང་མའི་མཐར། ཁྱད་པར་བརྒྱུད་འཛིན་བུ་ལ་དབང་ལུང་དང་། །མན་ངག་ཁྲིད་ལུང་མང་པོ་བར་མེད་བཤད། །གསང་ཆེན་བསྟན་པ་འཛིན་པའི་རྟེན་འབྲེལ་བསྒྲིགས། །ད་ནི་བྱ་བ་ཟིན་གྱིས་འགྱོད་པ་མེད། །འཆི་བར་དགའ་བའི་མདོ་སྔགས་བསྟན་འཛིན་ང་། །གདོད་མའི་ས་ལ་གཏན་སྲིད་འཛིན་དུ་འགྲོ། །ཞེས་སོགས་ཀྱིས་དོན་བསྡུས་ཞལ་གདམས་སུ་མཛད་ནས་ཟླ་བ་གསུམ་འདས་པ་ཆུ་ཟླའི་ཚེས་བཞི་ལ་དར་རྒྱས་ཆོས་སྡིངས་སུ་སྤྲུལ་པའི་དཀྱིལ་འཁོར་ངོ་མཚར་བའི་ལྟས་དང་བཅས་པ་བསྡུས་ཤིང་དགོངས་པ་སྐོང་བའི་མཆོད་འབུལ་ཕྱི་ནང་གི་རྟེན་བཞེངས་ཕྲིན་ལས་མི་ཉམས་པའི་རྒྱུན་སྐྱོང་བ་རྣམས་རིགས་སྲས་གསང་བདག་ཆེན་པོས་མཛད་དོ། །

རིག་འཛིན་ཆེན་པོ་འཕྲིན་ལས་ལྷུན་གྲུབ།

༈ རིག་འཛིན་ཆེན་པོ་འཕྲིན་ལས་ལྷུན་གྲུབ་ནི། ཡབ་སྨྱོས་སྟོན་མཁས་གྲུབ་མདོ་སྔགས་བསྟན་འཛིན་དང་ཡུམ་རྒྱལ་རིགས་དགོས་དགོས་འཛོམ་པའི་སྲས་སུ་ལྕགས་ཕག་ལོར་ལྷོ་བྲག་བྱང་ཆུབ་གླིང་དུ་འཁྲུངས། གསུང་བྱེ་བ་ཙམ་ནས་དམ་པའི་ངང་ཚུལ་འབའ་ཞིག་པས་བློ་ལྡན་ཐམས་ཅད་དང་བར་མཛད། དགུང་ལོ་ལྔ་ནས་བྲི་ཀློག་གཉིས་ཀ་བྱང་བར་མཁྱེན། བརྒྱད་ལ་ཡབ་རྗེ་ལས་རབ་ཏུ་བྱུང་། མཚན་ཨོ་རྒྱན་ཚེ་འཕེལ་དུ་གསོལ། རིམ་བཞིན་ཕྲིན་སྒྲུབ་ཕྱག་བཞེས་དང་བཅས་པ་ནས་བརྩམས་ཡིད་བཞིན་མཛོད་དང་། སེམས་ཉིད་ངལ་གསོ་རྩ་འགྲེལ་རྣམས་དང་། སྒྲ་དང་རྩིས་སོགས་ཤེས་བྱ་རྣམས་ལ་ཐུགས་སྦྱོང་མཛད་པས་ཐུགས་རབ་ཕུལ་དུ་བྱུང་བའི་བློ་གྲོས་ཀྱི་མཐུ་ཐོབ། ཁྱད་པར་ཡབ་རྗེ་ཉིད་ལས་བླ་རྫོགས་ཐུགས་གསུམ། སྙིང་ཐིག་ཡ་བཞི། ཞི་ཁྲོ་བཀའ་བརྒྱད་སོགས་གསང་ཆེན་བཀའ་གཏེར་དུ་མའི་དབང་ཁྲིད་བཤད་ལུང་མན་ངག་སོགས་མཐའ་ཆོད་པར་གསན་ཅིང་། བསམ་པ་དང་སྒོམ་པའི་ཉམས་བཞེས་ཀྱིས་གཏན་ལ་ཕབ་སྟེ་ཀུན་ཆུབ་པར་མཛད། སྐབས་དེར་ལྷོ་རྒྱུད་ཀྱི་བདག་པོ་འཕོས་པའི་དབང་ལས་རེ་ཞིག་ལྷ་ལུང་གི་འདུས་སྡེར་བཞུགས་ཏེ། དཔའ་བོ་གཙུག་ལག་རྒྱ་མཚོ་ལ་དགེ་ཚུལ་དང་། ཀུན་རིགས་ཕག་མོ་དུས་འཁོར་སོགས་ཀྱི་དབང་ལུང་རྣམས་གསན་ཅིང་། དེ་དག་གི་སྒྲུབ་དཀྱིལ་བྲི་ཐིག་གར་འཆམས་སོགས་ཀྱང་ཚེགས་མེད་མཁྱེན། ཁྱད་པར་རྒྱུད་བླ་དང་ཟབ་མོ་ནང་དོན་འགྲེལ་པ་དང་བཅས་པར་སྦྱངས་ཏེ་མདོ་སྔགས་ཀྱི་ཟབ་དོན་མཐའ་དག་ཐུགས་སུ་ཆུད། སླར་ཡང་རང་གནས་སུ་ཡབ་རྗེ་ཉིད་ལས་སྙིང་ཐིག་གི་དབང་ཁྲིད་ནན་ཏན་ཆེན་པོས་གསན་པས་མཚོན་ཟབ་ཆོས་མང་པོའི་མཐའ་རྒྱ་བཅད་ཅིང་བསྟན་པའི་གཉེར་ཁ་གཏད་པ་བཟུང་། མི་རིང་བར་ཡབ་རྗེ་ཉིད་དར་རྒྱས་ཆོས་སྡིངས་སུ་ཞི་བར་གཤེགས་པའི་སྐུ་གདུང་གི་མཆོད་འབུལ་ཕྱི་ནང་གི་རྟེན་བཞེངས་སོགས་དགོངས་པ་རྫོགས་པར་མཛད། སྤྱིར་ཡབ་རྗེ་ཉིད་གཙོ་བོར་གྱུར་པའི་བླ་མ་ཡང་གསུང་སྤྲུལ་ཚུལ་ཁྲིམས་རྡོ་རྗེ། ལོ་ཆེན་གཞན་ཕན་རྡོ་རྗེ། ལྷ་བཙུན་ཀུན་བཟང་རྣམ་རྒྱལ། རྫོགས་ཆེན་ནམ་མཁའ་འབྲུག་སྒྲ། བོན་ལུང་པ་ཚུལ་ཁྲིམས་རྒྱལ་མཚན། ཟུར་ཆེན་ཆོས་དབྱིངས་རང་གྲོལ་སོགས་རྙིང་མ་དང་། དཔའ་བོ་གཙུག་ལག་རྒྱ་མཚོ། གུ་ཤྲི་གྲགས་པ་མཆོག་དབྱངས། གནས་གསར་བཀའ་འགྱུར་བ། སྤྲུལ་སྐུ་ཀརྨ་བསྟན་བསྲུང་སོགས་གསར་མ་སྟེ། བཤེས་གཉེན་དམ་པ་བཅུ་ཕྲག་གསུམ་ལྷག་པ་ལས་མདོ་དང་སྔགས་ཀྱི་ཆོས་ཚུལ་རབ་འབྱམས་གསན་ཅིང་། དེ་དག་གི་སྙིང་པོའི་ལམ་སྲོལ་ཇི་བཞིན་པ་བསྐྱེད་རྫོགས་ཟབ་མོའི་གནད་ཀྱི་སྒྲུབ་པ་ལོ་ཟླ་དུ་མར་སྦྲེལ་བ་ལན་མང་པོ་དང་། རྒྱུན་གྱིས་ཐུགས་དམ་ཁྲིགས་སུ་བཅད་པ་ལས་མི་གཡེལ་བས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་གྱུར། འཁོར་འདས་ཡེ་ཤེས་ཀྱི་རོལ་པར་ཤར་བས་ཡི་དམ་དུ་མའི་གཟིགས་སྣང་ལ་དབང་འབྱོར། ཆོས་ཀྱི་རྗེས་སུ་འབྲང་བའི་བུ་སློབ་ནི། ཡབ་རྗེ་དང་། གསུང་སྤྲུལ་རིན་པོ་ཆེ། དཔའ་བོ་རྒྱལ་ཚབ་པ་ཙམ་མ་གཏོགས་རང་གི་ཡོངས་འཛིན་རྣམས་ཀྱིས་ཀྱང་ཆོས་ཀྱི་བདུད་རྩི་ངོམས་མེད་དུ་གསོལ་ཞིང་གུས་པར་བཏུད། གཞན་ཡང་དཔལ་རི་སྤྲུལ་སྐུ་ཕྲིན་ལས་རྣམ་རྒྱལ། ལོ་ཆེན་ཆོས་རྒྱལ་བསྟན་འཛིན། དམ་པ་ཀློང་ཡངས་འོད་གསལ། ཁྲི་དཔོན་སྔགས་འཆང་ཆེན་པོ་སོགས་རིགས་དང་སྐྱེ་བརྒྱུད་ཡོན་ཏན་གྱིས་མཐོ་བ་དུ་མས་མཚོན། བླ་མ་སློབ་དཔོན། རབ་བྱུང་། སྔགས་པ། སྒོམ་ཆེན། ཁྱིམ་བདག་སོགས་སྐལ་ལྡན་དུ་མ་ལ། སྤྱིར་སྒྲུབ་དབང་ཁྲིད་ལུང་མན་ངག་སོགས་ཐུན་མོང་དུ་སྩལ་བ་དང་། ཁྱད་པར་བཞེད་པ་ཐ་དད་པའི་ཆོས་ཀྱི་རྣམ་གྲངས་སོ་སོའི་སྐལ་བ་བཞིན་སྩོལ་བ་ལ་ཐོགས་པ་མི་མངའ་བས་སྔ་འགྱུར་གྱི་བསྟན་འཛིན་ཐོག་མཉམ་གཅིག་ལ་ཆོས་ཀྱི་ཕྲིན་ལས་འགྲན་དུ་མེད་པ་མངོན་སུམ་དུ་གྲུབ། ངོ་བོ་ཆོས་ཉིད་མཉམ་པ་ཆེན་པོའི་གནས་ལུགས་ལས་མ་གཡོས་བཞིན་དུ་རྣམ་འགྱུར་རྡོ་རྗེ་སློབ་དཔོན་ཉིད་ཀྱི་དེ་ཉིད་བཅུ་ལ་དབང་འབྱོར་བས་དེ་དང་དེའི་ལས་ལ་ངེས་ཤེས་འདྲེན་ཅིང་། ཁྱད་པར་དབང་དུས་སུ་ཡེ་ཤེས་ཀྱི་བྱིན་ཕེབས་པས་དབང་དོན་རྒྱུད་ཐོག་ཏུ་འབྱོར། ཁྲིད་བཀའ་གསུང་དུས་སོ་སོའི་ཉམས་མྱོང་གི་སྣེ་ནས་ཁྲིད་མཁས་པས་ཟབ་ལམ་གྱི་རྟོགས་པ་འཁྲུལ་མེད་ངོ་འཕྲོད་པས་ཉམས་མྱོང་དྲོད་ཚད་ཐོབ་པ་མང་དུ་ཐོན། གདུལ་བྱ་ཐུན་མོང་པ་རྣམས་ཀྱི་ངོར་ཡང་བསྲུང་བཟློག་སོགས་ཕྲིན་ལས་བཞིའི་ལས་ཕྲན་དོན་ལྡན་དུ་གྲུབ་པ་ལ་ཐོགས་པ་མེད་ཅིང་། གདོན་དྲག་པོས་བཟུང་བའི་ནད་པ་ལུས་རེངས་པ། ངག་ལྐུགས་པ། སེམས་སྨྱོ་འབོག་གིས་འཆི་བར་ཐག་བཅད་པ་དུ་མ་ཡང་། བཀའ་བསྒོ་བྱིན་རླབས་རྟེན་འབྲེལ་གྱི་བསྒྱུར་ཁ་ཅི་རིགས་མཛད་པའི་མོད་ལ་གསོས་པ་དང་མཛེ་འཕྲོ་ཆོད་པའང་མང་དུ་བྱུང་། འཆི་ཁར་འཕོ་བའི་མཚམས་སྦྱོར་དང་རྗེས་འཛིན་མཛད་པ་ལ་སྤྱི་བོ་འཕར་ཞིང་སྐྱེ་བ་ངོས་ཟིན་ཡང་མང་། སད་སེར་དང་མི་ཕྱུགས་ནད་རིམས་ཀྱིས་མནར་བ་ལ་ཐུགས་གཏད་པ་ཙམ་གྱིས་བཟློག་ཅིང་ཞི་བ་སོགས་འགྲོ་བ་སོ་སོའི་རེ་བ་ཡིད་བཞིན་དུ་སྐོང་བ་ལ་དབང་འབྱོར། དོན་དེ་རྣམས་མཆོག་དམན་སུས་བསྐུལ་ཡང་མི་ཆོས་ངོ་འཛིན་གྱིས་དབྱེ་བ་མི་འབྱེད་པར་ཐམས་ཅད་ཀྱི་རེ་བ་ཡིད་བཞིན་དུ་སྐོང་། ཕྱག་ཏུ་འབྱོར་བའི་ཡོ་བྱད་ཀྱི་དངོས་པོ་ཆེ་ཆུང་གང་ལ་ཡང་འཁོར་འདབས་ཀྱི་བསྲི་ཚགས་མེད་པར་དཀོན་མཆོག་གི་རྟེན་བརྟེན་པ་མང་པོ་དང་ཁྱད་པར་བཀའ་གཏེར་གྱི་གླེགས་བམ་བརྒྱ་ཕྲག་བརྒལ་བ་གསར་དུ་སྤེལ་ཞིང་། མཆོད་སྦྱིན་གྱི་ཡུལ་ལ་ཚོགས་གཉིས་ཀྱི་རྒྱུར་སྨིན་པར་མཛད་པས་མཚོན། མདོར་ན་ཆོས་བརྒྱད་ཀྱི་འཆིང་བས་མ་གོས་ཤིང་བསྟན་འགྲོའི་ཕན་བདེ་ཁོ་ན་སྐུ་སྲོག་ལས་ཀྱང་གཅེས་པར་འཛིན་པའི་ཐུགས་བསྐྱེད་ཀྱིས་དབུས་གཙང་ལྷོ་མོན་སོགས་གདུལ་བྱའི་ཞིང་རྣམས་སུ་འཁོར་ལོ་གསུམ་གྱི་རྣམ་ཐར་གཞན་ཕན་གྱི་ཕྲིན་ལས་རིས་མེད་དུ་བསྐྱངས་པས་དོན་གཉིས་ཀྱི་འབྲས་བུ་ལྷུན་གྲུབ་ཏུ་སྩོལ་བ་ལས་གཡེལ་བ་མི་མངའ་བའི་ངང་ནས་དགུང་ལོ་ལྔ་བཅུ་རྩ་གཉིས་པ་ཆུ་སྟག་དབོ་ཟླའི་ཉེར་གཉིས་ལ་དབུ་གཙུག་འཕྱུར་པོར་འཕར་བ་ལས་སྤོས་དུད་ལྟ་བུའི་རླངས་པ་འཕྲོ་བཞིན་དུ་སྤྲུལ་པའི་དཀྱིལ་འཁོར་འོད་གསལ་ཆོས་སྐུའི་དབྱིངས་སུ་བསྡུས་སོ། །མཆོད་འབུལ་རྟེན་བཞེངས་ཕྲིན་ལས་ཀྱི་རྒྱུན་སྐྱོང་བ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་ཉིད་ཀྱིས་མཛད་དོ། །

གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ།

༈ བདག་ཅག་གི་དཔལ་ལྡན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་ནི། ངོ་བོ་རྒྱལ་བ་ཐམས་ཅད་དང་རྣམ་དབྱེར་མ་མཆིས་ཀྱང་གནས་སྐབས་གདུལ་བྱའི་དོན་དུ་སྤྲུལ་པའི་ཟློས་གར་བསྟན་པའི་ཚུལ་ནི། རང་གཏེར་གབ་རྒྱ་ཅན་གྱི་ལུང་བསྟན་ལས། བཻ་རོ་ཁྱོད་ནི་སྐྱེ་མཐའི་བྱང་སེམས་ཏེ༔ཁྱོད་ཀྱི་འདི་གོང་སྐྱེ་བ་འདས་པ་ནི༔སྨྲ་བསམ་བརྗོད་འདས་ཡེ་ཤེས་སྙིང་པོའི་དོན༔སེམས་ཅན་སངས་རྒྱས་མཉམ་ཉིད་ཁྱབ་བརྡལ་ཡང༔ཁམས་གསུམ་འགྲོ་བའི་འདྲེན་པ་རྡོ་རྗེ་ཆོས༔ཤཱཀྱའི་ཉེ་གནས་ཨཱ་ནྟན་ཞེས་དང༔རྒྱལ་པོ་ཛཿདང་ཤིནྟཾ་གརྦྷ་དང༔བོད་འདིར་སམྦྷོ་ཊ་སོགས་དག་པ་ཡི༔སྐྱེ་བ་དེ་ཙམ་སྣང་གི་མ་དག་པའི༔སྐྱེ་ཚུལ་བརྗོད་དུ་ལང་བའི་གནས་མ་ཡིན༔དེ་ལྟར་དག་པའི་སྐྱེ་བ་དེ་དག་གིས༔འགྲོ་ལ་སྙིང་རྗེ་ཆེན་པོའི་ཐུགས་བསྐྱེད་པས༔བཻ་རོ་ཁྱོད་དུ་སྐྱེ་བ་བླངས་པ་ཡིན༔ཁྱོད་ཀྱང་ཤྲཱི་སེངྷ་ཡེ་ཤེས་མདོ༔པདྨ་བདག་སོགས་གཙུག་གི་བླ་མར་བསྟེན༔གདམས་པའི་གནད་རྣམས་ཕུ་ཐག་བཅད་བྱས་ནས༔ཆོས་སྐུའི་རང་ཞལ་མངོན་སུམ་རྟོགས་འགྱུར་བས༔ལས་འཕྲོ་མ་དག་སྐྱེ་བ་ལེན་མི་སྲིད༔འོན་ཀྱང་སེམས་བསྐྱེད་སྨོན་ལམ་བཟང་པོ་ཡིས༔མཚམས་སྦྱར་མཐའ་ཡས་འགྲོ་བའི་དཔལ་ཉིད་དུ༔དབང་ཕྱུག་འབར་དང་རཀྴ་རྡོ་རྗེ་གླིང༔ཀུན་སྐྱོང་གླིང་དང་མདོ་སྔགས་གླིང་པ་སོགས༔པདྨ་བདག་གི་ཟབ་གཏེར་བདག་པོ་དང༔གཞན་ཡང་ཐེག་པ་ཆེ་ཆུང་སྣ་ཚོགས་ལ༔དེ་དང་མཐུན་པའི་ངོ་མཚར་སྐྱེ་བའི་གྲངས༔བཅུ་ཕྲག་གཅིག་དང་གསུམ་ཙམ་འདས་པའི་མཐར༔ཞེས་གསུངས་པ་ལྟར། སྟོན་པས་ལངྐའི་ཡུལ་དུ་ལི་ཙ་བི་དྲི་མེད་གྲགས་པ་སོགས་རིག་འཛིན་གྱི་འཁོར་རྣམས་ལ་གསང་སྔགས་ཀྱི་རྒྱུད་རྣམས་གསུངས་ནས་ཕྱག་ན་རྡོ་རྗེ་ལ་གཏད་དེ་རྡོ་རྗེ་ཆོས་ཞེས་མིང་བཏགས་ཏེ་བཀའི་བསྡུ་བ་པོར་གྲགས་པ་དང་། དེ་ནས་བསྐལ་བཟང་གི་སངས་རྒྱས་བཞི་པ་ཤཱཀྱ་ཐུབ་པ་འཇིག་རྟེན་དུ་བྱོན་པའི་དུས་ཤཱཀྱའི་རིགས་ལས་ཐོས་པ་འཛིན་པའི་མཆོག་འཕགས་པ་ཀུན་དགའ་བོར་གྱུར་ནས་དེ་བཞིན་གཤེགས་པའི་རིམ་གྲོ་བ་མཛད་པ་དང་། དེའི་འོག་ཏུ་ཟ་ཧོར་གྱི་རྒྱལ་པོ་ཛཿརུ་གྱུར་ནས་རྒྱ་གར་ཤར་ཕྱོགས་སུ་རྣལ་འབྱོར་ཕྱི་ནང་གི་རྒྱུད་རྣམས་ཆེས་དར་བར་མཛད་པ་དང་། དེའི་འོག་ཏུ་སློབ་དཔོན་ཤིནྟཱཾ་གརྦྷར་སྐྱེ་བ་བཞེས་ཏེ། བསིལ་བའི་ཚལ་དུ་སློབ་དཔོན་བརྒྱད་ལ་སྒྲུབ་སྡེ་ཆེན་པོ་བརྒྱད་མ་མོ་དང་མཁའ་འགྲོ་མ་རྣམས་ཀྱིས་གཏད་པའི་ཚེ་སློབ་དཔོན་འདི་ཉིད་ལ་གཟིའི་སྒྲོམ་བུ་བབས་ཏེ་དྲག་སྔགས་དམོད་པའི་སྒྲུབ་པ་ལ་མཁས་པར་མད་པ་དང་། དེའི་འོག་ཏུ་ཆོས་རྒྱལ་སྲོང་བཙན་སྒམ་པོ་བོད་རྗེར་བྱོན་པའི་དུས། དེ་ཉིད་ཀྱི་བློན་པོ་ཐུ་མི་སྣང་གྲགས་ཀྱི་བུ་ཐུ་མི་སམྦྷོ་ཊ་ཞེས་བྱ་བར་སྐྱེ་བ་བཟུང་ནས་བོད་དུ་འདྲི་ཀློག་གིས་སྲོལ་མེད་པ་ལ། པཎྜི་ཏ་ལྷ་རིག་པའི་སེང་གེ་ལ་སྒྲ་བསླབ་སྟེ་བོད་སྐད་དང་བསྟུན་ནས་ཀཱ་ལི་སུམ་ཅུ་དང་། ཨཱ་ལི་བཞིར་བསྡུས། གཟུགས་ཁ་ཆེའི་ཡི་གེ་དང་བསྟུན་ནས་བཅོས། བྱཱ་ཀ་ར་ཎའི་བསྟན་བཅོས་བརྒྱད་མཛད་དེ་རྒྱལ་པོ་ལ་བསླབས། དཔང་སྐོང་། མདོ་ཟ་མ་ཏོག་བཀོད་པ། དཀོན་མཆོག་སྤྲིན་སོགས་བསྒྱུར་ཏེ་བསྟན་པའི་སྲོལ་བཏོད་པར་མཛད་པ་དང་། དེའི་འོག་ཏུ་རྒྱལ་མོ་ལེགས་ཞེར་དཔལ་མོའི་བུ་དགེ་སློང་པུརྞ་ཞེས་བྱ་བར་སྐྱེ་བ་བཞེས་པའི་ཕྱི་མ་ལ་ལོ་ཙཱ་བ་བཻ་རོ་ཙ་ནར་སྐུ་འཁྲུངས་པ་ཡིན་ཏེ། རང་གཏེར་ཤ་འུག་ལུང་བྱང་ལས། ཤཀ་ཐུབ་ཉེ་གནས་ཀུན་དགའ་བོ༔ཨིནྡྲ་བྷུ་ཏི་རྒྱལ་པོ་ཛཿཐུ་མི་པུརྞ་ལ་སོགས་པ༔འགྲོ་འདུལ་སྐྱེ་སྲིད་དེ་དག་ལས༔བཻ་རོ་ཁྱོད་དུ་འཕོས་པ་ཡིན༔ཞེས་གསུངས་ཏེ། ལོ་ཙཱ་བ་ཆེན་པོ་བཻ་རོ་ཙཱ་ན་ནི་གཙང་སྙེ་མོ་བྱེ་མཁར་དུ་སྤ་གོར་ཧེ་འདོད་ཀྱི་སྲས་སུ་འཁྲུངས། མཁན་པོ་ཞི་འཚོ་ལས་རབ་ཏུ་བྱུང་། རྒྱ་གར་དུ་ལན་གྲངས་མང་དུ་བྱོན་ཏེ། པཎྚི་ཏ་ལྔ་བརྒྱ་ལ་རྒྱུ་འབྲས་ཀྱི་ཆོས་སྤྱི་དང་ཕྱི་མ་བདུན་ལ་གསང་སྔགས་ནང་གི་ཆོས་མང་དུ་བསླབས། ཁྱད་པར་ཤྲཱི་སེངྷ་གཙོ་བོར་བསྟེན་ཅིང་། དེའི་སློབ་མ་ཡེ་ཤེས་མདོ་དང་བཱི་མ་ལ་སོགས་ལའང་གཏུགས་ཏེ་རྫོགས་པ་ཆེན་པོའི་ཆོས་ལ་མཁས་པར་སྦྱངས། རྐང་མགྱོགས་གྲུབ་པས་བོད་ཡུལ་དུ་ཉིན་གཅིག་ལ་བརྟོལ། རྗེ་བློན་རྣམས་ལ་ཉིན་པར་རྒྱུ་འབྲས་སྤྱི་དང་ནམ་གུང་མན་ངག་གི་ཆོས་རྣམས་བསྒྱུར་བཤད་ཀྱིས་གཏན་ལ་ཕབ། སློབ་དཔོན་སངས་རྒྱས་གཉིས་པས་རྗེ་འབངས་ཉེར་ལྔ་ལ་དབང་བསྐུར་བའི་ཚེ་སྟོབས་ལྡན་ནག་པོའི་མེ་ཏོག་ལ་དབང་བར་གྱུར་ཏེ་དྲག་སྔགས་ཀྱི་གྲུབ་པ་བརྙེས། གཡའ་མ་ལུང་སོགས་བོད་ཡུལ་གྱི་དབེན་གནས་རྣམས་དང་། གཞན་ཡང་རྒྱལ་མོ་རོང་། རྒྱ་ནགལི་ཡུལ། སོག་ཡུལ་སོགས་སུ་བྱོན་ནས་འགྲོ་དོན་མཛད་མཐར་འོད་ཀྱི་སྐུར་ཡལ་ལོ། །དེའི་འོག་ཏུ་དགེ་བའི་བཤེས་གཉེན་དབང་ཕྱུག་འབར་དུ་སྐྱེ་བ་བཞེས་ཏེ་སྔར་གྲྭ་པ་མངོན་ཤེས་ཀྱི་ལོ་རྒྱུས་བརྗོད་པ་དེའོ། །དེའི་འོག་ཏུ་རཀྴག་ཆོས་འབར་ཏུ་སྐྱེ་བ་བཞེས་ནས་སྦས་པའི་རྣལ་འབྱོར་གྱི་ཚུལ་བཟུང་སྟེ་མ་མོ་སྒང་ཤར་སོགས་མདོས་ཆོག་གི་ཕྲིན་ལས་འབའ་ཞིག་སྐྱོང་བར་མཛད་པ་དང་། དེའི་འོག་ཏུ་རྒྱལ་སྲས་རྡོ་རྗེ་གླིང་པར་གྲྭའི་ཕུ་གྲོག་གད་དུ་སྐུ་འཁྲུངས། ཞང་ཡེ་ཤེས་མཛེས་པ་ལས་རབ་ཏུ་བྱུང་། ཀུན་མཁྱེན་འཁྲས་པ། སྨན་ལུང་པ་ཤཱཀྱ་འོད། ཁྱབ་བརྡལ་ལྷུན་གྲུབ་སོགས་ལ་ཆོས་མང་དུ་གསན། གནམ་ལྕགས་བྲགཡང་རྫོང་། སྤ་གྲོ། མཆིམས་ཕུ་སོགས་དབུས་གཙང་ལྷོ་མོན་གྱི་གཏེར་གནས་མང་པོ་ནས། སྙིང་ཐིག་བཅུ་གསུམ། བོན་རྫོགས་ཆེན་གསེར་ཞུན། ལྟ་བ་ཀློང་ཡངས། གུ་རུ་ཞི་དྲགབཀའ་བརྒྱད། བླ་མ་རྒྱལ་བ་རྒྱ་མཚོ་སོགས་གཏེར་ཆོས་ཤིན་ཏུ་མང་བ་བཏོན་ཏེ་འགྲོ་དོན་མཛད་པ་དང་། དེའི་འོག་ཏུ་ཀུན་སྐྱོང་གླིང་པར་སྐྱེ་བ་བཞེས་ཏེ་ཟབ་བུ་ལུང་། བསམ་ཡས་མཆོད་རྟེན་དཀར་པོ་སོགས་ནས། རྡོར་སེམས་སྙིང་ཐིགགུ་རུའི་ཟངས་སྐུ་མེ་ཐུབ་མ། བྲམ་ཟེ་དྲི་མེད་བཤེས་གཉེན་གྱི་དབུ་ཐོད་སོགས་ཆོས་དང་དམ་རྫས་ཀྱི་ཟབ་གཏེར་སྤྱན་དྲངས་ནས་འགྲོ་དོན་མཛད་པ་དང་། དེའི་འོག་ཏུ་མདོ་སྔགས་གླིང་པའམ། མཚན་གཞན་མཆོག་ལྡན་མགོན་པོ་སྟེ། ལྷོ་བྲག་བན་པ་ལུང་དུ་སྐུ་འཁྲུངས་ཏེ། མངའ་རིས་གུང་ཐང་རྒྱལ་པོས་བླ་མར་བཀུར་ཏེ་མཐའ་དམག་བཟློག་པ་ལ་སོགས་པའི་འགྲོ་ཕན་རྒྱ་ཆེར་མཛད་པ་དང་། དེའི་སྐུ་ཕྱི་མར་ལྷོ་ནུབ་རྔ་ཡབ་གླིང་དུ་སློབ་དཔོན་པདྨས་རྗེས་སུ་བཟུང་སྟེ་འཇའ་ལུས་འཕོ་བ་ཆེན་པོའི་སྐུ་བརྙེེས་པ་སྲིན་པོ་ཆོས་ཀྱི་གོ་ཆར་སྐྱེ་བ་བཞེས་ནས་བདག་ཉིད་ཆེན་པོ་ཉིད་དུ་སྐུ་འཕོས་པ་ཡིན་ནོ། །གཞན་ཡང་རྡོ་རྗེ་གླིང་པའི་ལུང་བྱང་ལས། ཉི་མ་སེང་གེ་ཁྱུང་པོ་རྣལ་འབྱོར་དང༔སུམ་སྟོན་ཇོ་དར་གྲྭ་པ་མངོན་ཤེས་དང༔བསྟན་པ་གཞུང་འཛིན་རོང་སྒོམ་ཆོས་བཟང་དང༔དགེ་བཤེས་ཉམས་བྲོ་གུ་རུ་རྣོན་རྩེ་དང༔ཁྱུང་གྲགས་ལྷ་འབུམ་ཤཱཀྱ་འབྱུང་གནས་དང༔གྲུབ་ཐོབ་དངོས་གྲུབ་གཡག་སྡེ་པཎ་ཆེན་དང༔མཚལ་ཐང་སྒོམ་སྡེ་སྤྲུལ་སྐུར་གྲགས་པའི་མཐར༔ཞེས་འབྱུང་བས། ཁྱུང་པོ་རྣལ་འབྱོར་དང་། དགེ་བཤེས་གྲགས་པ། རོང་ཟོམ། བོན་པོ་ལྷ་འབུམ་རྣམས་དུས་མཚུངས་ཀྱི་སྐུའི་སྤྲུལ་པས་འགྲོ་དོན་མཛད་པ་དང་། སུམ་སྟོན་ཇོ་དར། བསྟན་པ་གཞུང་འཛིན། དགེ་བཤེས་ཉམས་བྲོ་རྣམས་གང་དུ་བྱོན་དང་ཕྲིན་ལས་གང་བསྐྱངས་ཀྱི་ལོ་རྒྱུས་བདག་གིས་མ་ཐོས་ལ། དེ་ལས་གཞན་པ་ཉི་མ་སེང་གེ་ནི། རོག་ཤེས་རབ་འོད་ཀྱི་གཅུང་ཞིག་པོ་རིན་ཆེན་ཞེས་བསམ་གྱིས་མི་ཁྱབ་པའི་ཡོན་ཏན་མངའ་བ་སྟེ། རྒྱལ་བ་ཏེ་ནེའི་ཆིག་བརྒྱུད་ཀྱི་བཀའ་བབས་པ་ཞི་བྱེད་བཀའ་བབས་ཕྱི་མ་ཕྱོགས་ཀུན་ཏུ་རྒྱས་པའི་ཆུ་མགོ་ལྟ་བུར་གྱུར་པ་དེའོ། །ཁྱུང་གྲགས་ཀྱང་། ཡེ་ཤེས་ཁྱུང་གྲགས་ཞེས་པའི་གཏེར་སྟོན་ཞིག་བྱུང་བར་སྣང་། བོན་པོ་ལྷ་འབུམ། གཏེར་སྟོན་བོན་པོ་ལྷ་འབུམ་ཞེས་གྲགས་པ་དེའོ། །ཤཱཀྱ་འབྱུང་གནས་ནི། བདེ་གཤེགས་ཟུར་པོ་ཆེ་ཞེས་མཚན་ཉི་ཟླ་ལྟར་གྲགས་པ་དེའོ། །གྲུབ་ཐོབ་དངོས་གྲུབ་ནི་གཙང་གི་རི་བོ་ཆེའི་གཏེར་སྤྱན་འདྲེན་པ་པོ་སྟེ། འདི་གཏེར་བཞེས་དུས་དགུང་ལོ་དྲུག་བརྒྱ་ཡིན་པར་གྲགས་པས། སྔ་མོ་ཞིག་ནས་བྱུང་བར་མངོན། གཡག་སྡེ་པཎ་ཆེན་ནི། རང་བྱུང་པ་དང་གཡུང་སྟོན་པ་སོགས་ཀྱི་སློབ་མ་མཁས་གྲུབ་ཆེན་པོར་གྱུར་པ་དེའོ། །མཚལ་ཐང་སྒོམ་སྡེ་སྤྲུལ་སྐུ་ནི། མཚལ་གྱི་གདན་རབས་བཞི་པ་སངས་རྒྱས་འབུམ་གྱི་དུས། བླ་ཚང་དང་དབོན་ཚང་ཞིག་ནས་ཁོང་གི་ཟུར་དུ་ཕྲིན་ལས་བསྐྱངས་པ་ལས་སྒོམ་སྡེ་བྱུང་བར་གྲགས་པས་སངས་རྒྱས་འབུམ་ལགས་སོ། །གཞན་རྣམས་སྔར་སྨོས་པ་དང་། དེར་མ་ཟད་སྤྲུལ་པའི་ཟློས་གར་ཙ་མི་སངས་རྒྱས་གྲགས། ཆོས་རྗེ་ས་པཎྜི་ཏ། ལོ་ཆེན་བསོད་ནམས་རྒྱ་མཚོ། གཏེར་སྟོན་ཡང་སངས་རྒྱས་བླ་མ། རྒྱ་ལོ་ཙཱ་བ། ལྡང་མ་ལྷུན་རྒྱལ། གཡག་འཕྱར་སྔོན་པོ་སོགས་མཐའ་ཡས་ཏེ་འཕགས་ཆེན་རྣམས་ཀྱིས་མཛད་པ་བསམ་གྱིས་མི་ཁྱབ་པའི་གནས་ཡིན་པའི་ཕྱིར་ན་རྨོངས་པ་བདག་ལྟ་བུས་བརྗོད་པར་མི་ནུས་སོ། །དེའི་ཕྱིར་སྐུ་ཚེ་སྔ་མའི་ཕྲིན་ལས་དང་སྐྱེ་བའི་ཕྲེང་བ་ཟུར་ཙམ་ཞིག་སྨོས་ནས། ད་ནི་སྐུ་ཚེ་འདི་ཉིད་ཀྱི་མཛད་པ་ཆ་ཙམ་ཞིག་བརྗོད་པ་ནི། བདག་ཉིད་ཆེན་པོ་འདིའི་རིགས་ནི་འོད་གསལ་གྱི་ལྷ་ལས་ཆད་པ་ཞིག་སྟེ། དེ་ཡང་སྔོན་གྱི་དུས་ན་བོད་ཡུལ་གྱི་སའི་ཆ་ཁ་རག་ཏུ་སྔོན་ཆད་མཐོང་མ་མྱོང་བའི་སྐྱེས་བུ་གཟུགས་བཟང་ཞིང་མཛེས་པ་ལྟ་ན་སྡུག་པ་མིག་གི་བདུད་རྩི་གྱུར་པ་ཞིག་སྣང་བས། དེར་མི་རྣམས་ཡ་མཚན་པར་གྱུར་ཏེ་བླའི་གནས་སུ་བཀུར་བར་བྱས་སོ། །དེའི་ཚེ་མིའི་གྲིབ་ཀྱིས་ལྷའི་བུ་ཉིད་མྱོས་པར་གྱུར་པ་ན་སྨྱོས་ཞེས་པའི་རིགས་རྒྱུད་དུ་གྲགས་པ་ལས་ཕྱི་རུས་སྨྱོས་སྟོན་ཡོན་ཏན་གྲགས་པ་སོགས་ཁ་རག་གི་ལྷ་པ་རྣམས་ཡིན་ཅིང་། ནང་རུས་མཐིང་སྟེ། མཐིང་མ་སྨྱོས་ཞིག་ཆེན་པོ་ནས་སྨྱོས་སྒོམ་ཆེན་པོ་པདྨ་རྡོ་རྗེ་སོགས་ནས་སྨྱོས་སྟོན་གྲགས་པ་རིན་ཆེན་གྱི་སྲས་གྲགས་པ་རྒྱལ་མཚན། དེའི་སྲས་ཇོ་འབུམ་དཔལ་ལ་གོང་མའི་ཞལ་ཏས། སྔོན་ལྷ་སྲས་མུ་རུབ་བཙན་པོས་གྲ་དོལ་གཞུང་གསུམ་གྱི་བདག་པོར་དབང་བར་བྱས་པའི་ཞང་རྣམ་སྣང་གི་སར་སྐུ་མག་ཏུ་བྱོན་པ་ལས་མི་རབས་ལྔའི་མཐར་ཡབ་སྨྱོས་ཚེ་དབང་རྡོ་རྗེ་དང་ཡུམ་སྤ་གོར་གྱི་རིགས་ཚེ་རིང་བུ་དགའ་གཉིས་ཀྱི་སྲས་སུ་ལང་གྲོའི་རྣམ་འཕྲུལ་ཀུན་མཁྱེན་མདོ་སྔགས་བསྟན་འཛིན་སྐུ་འཁྲུངས། དེའི་སྲས་སུ་ཡབ་རྗེ་རིག་འཛིན་ཕྲིན་ལས་ལྷུན་གྲུབ་སྐུ་བལྟམས་པ་དེ་དང་ཡུམ་ཡང་བོད་ཆོས་རྒྱལ་གྱི་གདུང་རྒྱུད་དྲི་མ་མེད་པ་ཐ་སྙད་རིག་གནས་ཀྱི་དབང་ཕྱུག་གོང་མ་རྒྱལ་མཆོག་ལྔ་པས་རྩིས་རིག་གྱི་སློབ་དཔོན་དུ་བཀུར་བ་ཁྱིམ་ན་གནས་ཀྱང་བྱང་ཆུབ་སེམས་དཔའི་སྤྱོད་པས་འཚོ་བ་རྗེ་དོན་འགྲུབ་དབང་རྒྱལ་གྱི་སྲས་མོ་ལྷ་འཛིན་དབྱངས་ཅན་སྒྲོལ་མ་སྟེ། མཁའ་འགྲོ་མ་བདེ་ཆེན་རྒྱལ་མོས་ཡབ་ལ་སྩལ་བའི་ལུང་བྱང་ལས། རྟ་ནག་ཤེལ་དཀར་མཚོ་སྒྲོན་གྱི༔སྤྲུལ་པ་བྱི་ལོ་དབྱངས་ཅན་མིང༔རང་གནས་གྲ་ཡི་ཕྱོགས་ནས་འབྱུང༔ཞེས་གསུངས་པའི་ཡབ་ཡུམ་དེ་གཉིས་ཀྱི་སྲས་སུ་མེ་ཁྱི་ཧོར་ཟླ་གཉིས་པའི་ཡར་ངོའི་ཚེས་དགུའི་མཚན་མོའི་ཐོ་རངས་ཀྱི་ཐུན་གྱི་ཆ་ལ། གྲ་ནང་རིག་པའི་འབྱུང་གནས་སྤྲུལ་པའི་སྐྱེས་མཆོག་སྣ་ཚོགས་རང་གྲོལ་གྱི་གདན་ས་དར་རྒྱས་ཆོས་གླིང་གི་འོད་གསལ་རྩེ་ཞེས་པའི་གཟིམས་ཆུང་དུ་ས་གཡོ་བ་དང་འོད་འབྱིན་པ་དང་མཁའ་ལ་འཇའ་ཚོན་འཁྲིགས་པ་སོགས་ངོ་མཚར་བའི་དགེ་མཚན་དང་བཅས་བལྟམས་ཏེ། གབ་རྒྱ་ཅན་གྱི་ལུང་བྱང་ལས། སུམ་ཅུ་ཁ་རལ་སྙིགས་མ་ལྔ་བདོའི་དུས༔བསམ་ཡས་ལྷོ་ནུབ་གྲ་ཞེས་གཡོ་རུའི་སར༔ལུང་པ་བྱང་ལྟ་དོར་མ་བརྐྱང་འདྲའི་ཚིགས༔སྲིན་མོ་འཛེགས་འདྲའི་དགེ་བསྙེན་སྔགས་ཞོལ་དུ༔བུདྡྷ་ཛྙཱ་ནའི་སྤྲུལ་པ་ཚེ་མིང་ཕ༔ཤེལ་དཀར་མཚོ་སྒྲོན་སྤྲུལ་པ་དབྱངས་མིང་མས༔བསྐྱེད་པའི་རྣལ་འབྱོར་སྔགས་ཀྱི་བརྟུལ་ཞུགས་ཅན༔མེ་ཁམས་ཁྱི་ཡི་ལོ་པ་པདྨའི་མིང༔གཟུགས་བྱད་ཧ་ཅང་མི་རིང་མི་ཐུང་བ༔མདངས་སྣུམ་རིན་ཆེན་རིགས་ཀྱི་རྟགས་འཆང་བས༔པདྨ་ང་ལ་མོས་པ་ལྷག་པར་བྱེད༔བཅོ་བརྒྱད་ལོ་ལ་གཏེར་ཁ་དང་པོ་འབྱེད༔ཅེས་གསུངས་པ་བཞིན་ནོ། །དེ་ལྟར་སྐུ་བལྟམས་མ་ཐག་དོན་གྲུབ་དབང་རྒྱལ་གྱིས་རྡེའུ་བརྒྱ་སོ་དྲུག་པས་གཏན་ལ་ཕབ་པའི་བཙས་ཀླུང་སོགས་བརྩིས་པ་ལས་བྱུང་བའི་མཚན་ཀུན་དགའ་དངོས་གྲུབ་རིན་ཆེན་དབང་གི་རྒྱལ་པོ་ཞེས་གསོལ། ཡབ་རྗེ་ཉིད་ཀྱིས་དབང་བསྐུར་བྱིན་རླབས་དུ་མས་རྟེན་འབྲེལ་བསྒྲིགས། ལོ་གསུམ་བཞི་ཙམ་ནས་བྲི་ཀློག་ཉེར་མཁོའི་ཆོག་ཕྲིན་དབང་རབ་གནས་ལུང་དང་བཅས་པའི་ཚིག་དང་ལག་ལེན་ཚེགས་ཆུང་ངུས་མཁྱེན་པར་མཛད། དགུང་ལོ་བཅུ་གཅིག་པ་ལ་དཔལ་ལྡན་འབྲས་སྤུངས་སུ་འཛམ་གླིང་གཙུག་གི་ནོར་བུ་ཀུན་མཁྱེན་རྒྱལ་དབང་ལྔ་པའི་དྲུང་དུ་གཙུག་ཕུད་ཕུལ། མཚན་ངག་དབང་པདྨ་བསྟན་འཛིན་ཞེས་སྩལ། སྐྱིད་གྲོང་གི་རང་བྱུང་འཕགས་པ་ཐོག་མར་ཕེབས་པ་དང་དུས་འགྲིགས་པས་རྟེན་འབྲེལ་བཟང་ཞེས་དགྱེས་པས་དབུགས་དབྱུང་། རིམ་བཞིན་གནས་དུས་ཅི་རིགས་པར་ཀུན་མཁྱེན་རྒྱལ་བའི་དབང་པོ། རིག་འཛིན་ཕྲིན་ལས་ལྷུན་གྲུབ་སྟེ་བཀའ་དྲིན་མཚུངས་མེད་རྣམ་གཉིས། སྨིན་གྲོལ་ལམ་བཟང་སྟོན་པའི་བསྟན་འཛིན་ཆེན་པོ་བཅུ་དྲུགཟབ་ཆོས་སྣ་ཚོགས་གསན་པའི་ཡོངས་འཛིན་སོ་ལྔ་རྣམས་གུས་པར་བསྟེན་ནས། ཡོངས་རྫོགས་དགེ་བསྙེན་དང་། བྱང་སྡོམ་བཀའ་སྲོལ་གསུམ་བཀའ་བརྒྱད་ཡོངས་རྫོགས་ཀྱི་དབང་བསྐུར་བརྡ་དོན་འཕྲོད་པ་ཐོག་མའི་སྨིན་བྱེད་དུ་གསན་ནས་སྡོམ་པ་གསུམ་ལྡན་གྱི་གཞི་བཟུང་། མདོ་སྒྱུ་སེམས་གསུམ་སོགས་སྔ་འགྱུར་བཀའ་མ་དེང་སང་རྒྱུན་ཡོད་དོ་ཅོག་དང་། གཏེར་མ་བླ་རྫོགས་ཐུགས་གསུམ་སྒྲུབ་སྡེ་སྤྱི་བྱེ་བྲག་མང་པོས་མཚོན་ཡོངས་གྲགས་ཕལ་ཆེ་བ། སྔགས་གསར་མ་རགས་པ་རྣམས་དང་། མདོ་ཕྱོགས་མང་པོ་དང་བཅས་པའི་དབང་ཁྲིད་བཤད་ལུང་ཇི་སྙེད་པ་རྣམས་གསན། དགུང་ལོ་བཅུ་གསུམ་ནས་གཞུང་ལུགས་ཅི་རིགས་པ་སྦྱོང་བ་ལ་ཞུགས་ཏེ། དཔལ་གསང་བ་སྙིང་པོ་དང་། རྒྱུད་བླ། སེམས་ཉིད་ངལ་གསོ། ཡིད་བཞིན་མཛོད་རྩ་འགྲེལ་གསན་ནས་གཞན་ལ་འཆད་སྤེལ་མཛད། ཁྱད་པར་ཀུན་མཁྱེན་ཆེན་པོའི་གསུང་རབ་རྣམས་ལ་གསན་གཟིགས་ནན་ཏན་དུ་མཛད་པས་སྔར་དོན་སྤྱི་ཙམ་གྱི་ཤུན་པ་བུད་ནས་དོན་གྱི་གནས་ལུགས་རྟོགས་པའི་སྤྲོས་པ་ཆོད་པར་མཛད། དེ་ནས་གནས་སྐབས་ཅི་རིགས་པར་མཆིམས་ཕུ་དང་། གཡའ་མ་ལུང་སོགས་གནས་ཆེན་དང་རང་གནས་ཀྱི་དབེན་པ་རྣམས་སུ་ལོ་སྦྲེལ་དང་། ཟླ་དྲུག་མ། ཟླ་གཅིག་གི་མཐའ་བརྟེན་པ་ཡན་གྱིས། གུ་རུ་ཞི་དྲགརྡོར་སེམས་བཀའ་བརྒྱད། ཡང་ཕུར་གཤིན་རྗེ་གཤེད། རྟ་མགྲིན། མཁའ་སྤྱོད་མ་སོགས་ཞི་ཁྲོ་སུམ་ཅུ་སོ་ལྔ་ཙམ་བསྙེན་པས་ཞལ་གཟིགས་དང་ལུང་བསྟན་གྱི་རིམ་པ་མཐའ་ཡས་ཏེ་གསང་བའི་རྣམ་ཐར་དུ་འཁོད་པ་ལྟར་དང་། ཁྱད་པར་ཐོད་རྒལ་དང་རླུང་སྦྱོར་གྱི་རྟགས་སྣང་མངོན་དུ་གྱུར། དགུང་ལོ་བཅོ་བརྒྱད་པ་ལ་གཡའ་མ་ལུང་ནས་ཟབ་ཆོས་རིག་འཛིན་ཐུགས་ཐིག་གི་ཆོས་སྐོར་མ་བུ་སོགས་དང་མྱོང་གྲོལ་བྱིན་རླབས་ཀྱི་རིལ་བུ་དང་བཅས་པའི་ཟབ་གཏེར་སྤྱན་དྲངས་ནས་སྐལ་ལྡན་མང་པོ་སྨིན་གྲོལ་ལ་བཀོད། དགུང་ལོ་ཉེར་གཅིག་པ་ནས་བཟུང་རྒྱལ་དབང་ལྔ་པ་ཆེན་པོ་དང་འཇམ་མགོན་སྡེ་སྲིད་སངས་རྒྱས་རྒྱ་མཚོ་གཉིས་ཀྱི་དབུའི་བླ་མར་བཀུར་བས་ལོ་རེ་བཞིན་རྐྱེན་སེལ་གྱི་སྐུ་རིམ་དབང་བཀའ་མང་པོ་དང་། ཁྱད་པར་བཀའ་གཏེར་གྱི་ཆོས་སྐོར་ཇི་སྙེད་པ་ཕུལ། རང་གི་ཡོངས་འཛིན་དུ་མས་ཀྱང་ཆོས་ཀྱི་རྣམ་གྲངས་མང་པོ་དོན་གཉེར་ཆེན་པོས་གསན་པའི་རེ་བ་བསྐང་། གཞན་ཡང་བསྟན་འཛིན་གྱི་སྐྱེས་མཆོག་དུ་མ་དང་། ཆེན་པོའི་གོ་སར་བཞུགས་པ་མང་པོ་སོགས་མཆོག་དམན་བར་གསུམ་ལ་དབང་དང་སྒྲུབ་ཆེན་ཁྲིད་ལུང་མན་ངག་སོགས་ཆོས་འཆད་པའི་རྣམ་གྲངས་འདི་ཙམ་ཞེས་དཔག་པར་མི་ནུས། ཁྱད་པར་རྙིང་མ་རང་ལུགས་ལ་མེད་དུ་མི་རུང་བའི་ཆོས་བཀའ་ཁྱད་པར་ཅན་ཆད་དུ་ཉེ་བ་དུ་མ་འབད་རྩོལ་ཆེན་པོས་ཉན་བཤད་དང་། བཤད་སྒྲུབ་ཀྱིས་སྲོལ་བཏོད་ནས་སྲོག་མཐུད་པར་མཛད། དེ་བཞིན་དུ་བཀའ་རྩོམ་གྱི་རིམ་པ་ཡང་མཐའ་ཡས་སོ། །བསྟན་པའི་བདག་པོ་མཆོད་ཡོན་ཟུང་གིས་དབུས་ཕུལ་བའི་དངོས་པོ་རྣམས་དོན་ཡོད་པར་བྱ་བའི་ཕྱིར་དང་། གཏེར་ལུང་ལས་ཀྱང་། ཁྱད་པར་གཡོ་རུ་གཙང་མའི་སར༔ཚོམ་བུ་གཅིག་ཏུ་འདུས་པའི་སྡེ༔མ་འོངས་བསྟན་པ་ཆེར་འཕེལ་ནས༔བོད་ཀྱི་བདེ་སྐྱིད་དགུང་དུ་འདེགས༔ཞེས་ལུང་བསྟན་པ་ལྟར། འདུས་སྡེ་ཨོ་རྒྱན་སྨིན་གྲོལ་གླིང་འདི་ཉིད་མེ་འབྲུག་གསར་དུ་བསྐྲུན་ནས་རིམ་པར་གཙུག་ལག་ཁང་གསུམ་དུ་བཞེངས། གྲྭ་ཚོགས་ཀྱང་དང་པོ་བརྒྱད་གྲྭ་ཙམ་ལས་ཕྱིས་སུམ་བརྒྱར་ཉེ་བར་སྡོམ་པ་གསུམ་གྱི་བསླབ་ཁྲིམས་ལ་བཀོད་ནས་འཁོར་ལོ་གསུམ་གྱི་རྣམ་ཐར་ལྷུར་ལེན་པ་རྙེད་བཀུར་གྱིས་མི་བྲེལ་བ་རྒྱུན་ཆགས་པ་དང་། དེ་དག་གི་གནས་མལ་རྟེན་གསུམ་མཆོད་རྫས་དང་བཅས་པ་དང་། དཀྱིལ་འཁོར་ཆེན་པོ་དུ་མའི་སྒྲུབ་མཆོད་དུས་བཞིར་སྒྲུབ་པའི་གཞི་རྟེན་ཡོ་བྱད་དུ་མ་དང་། བྲིས་འབུར་གྱི་སྐུ་བརྙན་མང་པོ་དང་། གསེར་དངུལ་གྱི་བཀའ་འགྱུར་གྱིས་མཚོན་གླེགས་བམ་ལྔ་བརྒྱ་སྐོར་དང་། མཆོད་རྟེན་ཆེན་མོ་སོགས་ཐུགས་རྟེན་དུ་མ་སྟེ་ཡོ་བྱད་ཀྱི་དངོས་པོ་ཐམས་ཅད་མཆོད་རྫས་སུ་ཐིམས་པར་མཛད་པ་དང་། གནམ་ལྕགས་བྲག་དང་ཤེལ་བྲག་ཤ་འུག་སོགས་གཏེར་གནས་རྣམས་ནས་ཟབ་གཏེར་གྱི་ཆོས་སྒོ་མང་པོ་སྤྱན་དྲངས་ནས་སྐལ་ལྡན་རྣམས་སྨིན་གྲོལ་ལ་བཀོད་པ་སྟེ་མཛད་པ་ཆ་ཤས་ཙམ་ཞིག་སྨོས་སོ། །དེ་ལྟར་དགུང་ལོ་བཅུ་དྲུག་ནས་དྲུག་ཅུ་རེ་དགུའི་བར་ཆོས་ཀྱི་ཕྲིན་ལས་བསྐྱངས་པའི་སློབ་མ་ནི་བགྲངས་བ་ལས་འདས། མཐར་ཤིང་རྟ་ཧོར་ཟླ་དང་པོ་ནས་ཅུང་ཟད་བསྙུན་པའི་ཚུལ་བསྟན་ནས། ཁྱད་པར་ཉེར་ལྔ་ནས་ཁུ་དབོན་རྣམས་ལ་ཞལ་གདམས་ཕྱི་མཐའི་བསླབ་བྱ་རྣམས་སྩལ། དེ་ནས་བཟུང་ཞབས་རིམ་དུ་གནས་པ་རྣམས་ཀྱི་སྣང་ངོར་ནུབ་ཀྱི་ཕྱིའི་རྩིག་ངོས་ན་ཡོད་པ་འདྲ་བའི་རྒྱ་གླིང་ལྟ་བུའི་སྒྲ་ཤིན་ཏུ་སྙན་པ་རྒྱུན་ཆགས་སུ་བྱུང་ཞིང་དེ་མཚུངས་ག་བུར་ལྟ་བུའི་དྲི་ངད་ཀྱིས་གཟིམ་ཆུང་ཕྱི་ནང་ཐམས་ཅད་ཁྱབ་པའང་བྱུང་། ཤར་ཕྱོགས་སུ་གོམས་པ་བདུན་འགྲོ་དགོས་ཡོད་གསུངས་བཞེངས་ཏེ་ཞབས་གོམ་བདུན་སྤོས་ནས་སྐྱིལ་ཀྲུང་གིས་བཞུགས་ནས། སྣང་གྲགས་རིག་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་པར་འབྱམས་ཀླས་པ། །ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག། ཅེས་འདའ་ཁ་ཞལ་ཆེམས་ཀྱི་ཚུལ་དུ་གསུངས་ཏེ། ཤིང་རྟ་ཧོར་ཟླ་གཉིས་པའི་ཚེས་གཉིས་ཀྱི་ཉི་དྲོས་ལ་ད་སྟེ་མཁའ་འགྲོའི་བསུ་བ་ཡང་བྱུང་ངོ་གསུང་སྟེ། ཕྱག་གཉིས་ཌཱ་དྲིལ་འཁྲོལ་བའི་བརྡ་དང་སྤྱན་ལྟ་སྟངས་དང་བཅས་སྐད་ཅིག་ལ་མཁའ་སྤྱོད་དུ་གཤེགས་སོ། །དེའི་ཚེ་ནམ་མཁའ་འཇའ་སྤྲིན་གྱིས་ཁེབས་པ་དང་མེ་ཏོག་དཀར་པོ་འདབ་མ་དྲུག་པ་དང་བརྒྱད་པའི་ཆར་ངོ་མཚར་བ་བབས། དེ་ནས་བཟུང་ཞག་མང་པོའི་བར་དུ་མེ་ཏོག་གི་ཆར་དང་འཇའ་འོད་དང་ས་གཡོ་བ་ལ་སོགས་པའི་ལྟས་ངོ་མཚར་བ་དུ་མ་བྱུང་ངོ་། །དེ་ནས་ཞབས་དྲུང་ཁུ་དབོན་རྣམས་ཀྱིས་མཆོད་འབུལ་ཕྱི་ནང་གི་རྟེན་བཞེངས་ཕྲིན་ལས་ཀྱི་རྒྱུན་སྐྱོང་བ་ལ་སོགས་པ་མཛད་ཅིང་། ཁྱད་པར་གདུང་ཞུགས་ལ་ཕུལ་སྐབས་དབུ་ཐོད་དང་ཐུགས་མེས་མ་རྨས་པར་ཕེབས་ཤིང་། རིང་བསྲེལ་གྱི་ཚོགས་དང་ཞུན་ཐིགས་ལ་རྣམ་རོལ་མཐའ་ཡས་མགོན་པོའི་སྐུ་བརྙན་འབྱོན་གཙང་གཟི་བྱིན་དང་ལྡན་པ་ཕེབས་ཏེ། གཏེར་ལུང་ལས། འདས་དུས་གདུང་ལ་རིང་བསྲེལ་འབྱུང༔སུས་མྱོང་མཁའ་སྤྱོད་བཙན་ས་ཟིན༔ཞེས་གསུངས་པས་སོ། །ཐུགས་ཀྱི་སྲས་དང་གསུང་ཀྱི་སྲས་ཀྱིས་མཚོན་པའི་བུ་སློབ་གཏེར་ལུང་ནས་བཤད་པ་ནི། དམ་ལྡན་ཆོས་བདག་སློབ་བུ་ནི༔ད་ལྟའི་མངའ་བདག་ཡབ་སྲས་སོགས༔ས་ཐོབ་རྗེ་འབངས་སྐྱེ་བའི་མཐའ༔འགྲོ་དོན་ནུས་པ་སུམ་ཅུ་ལྔ༔རང་དོན་གྱུར་པ་བརྒྱ་རྩ་བརྒྱད༔ཆོས་ཀྱི་འབྲེལ་པ་སྟོང་ཚོ་གཉིས༔སྨོན་ལམ་འབྲེལ་པ་ཁྲི་ཕྲག་ལྔ༔ལས་ཀྱིས་འབྲེལ་པ་དྲུག་ཅུ་བདུན༔གདུགས་ཐོགས་བདུན་གྱིས་ཞབས་ནས་འདེགས༔མི་ཆེན་གསུམ་གྱིས་མངའ་ཐང་སྤེལ༔ཞེས་སོ། །རགས་ཙམ་ཞིག་བརྗོད་ན། མཆོད་ཡོན་ཉི་ཟླ་ཟུང་འབྲེལ། ས་སྐྱ་བདག་ཆེན་ཀུན་དགའ་བཀྲ་ཤིས། ཆབ་མདོ་རྒྱལ་བ་འཕགས་པ་ལྷ། ཐུགས་སྲས་གསུང་སྤྲུལ། སྤྲེ་བོ་ཆོས་ཀྱི་དབང་པོ། ཀོང་པོ་ཐང་འབྲོག་སྤྲུལ་སྐུ། འཕྱོངས་རྒྱས་དཔལ་རི་སྤྲུལ་སྐུ། གཙང་ནས་དྲེགས་པ་སྤྲུལ་སྐུ། ཟངས་ལ་མཁར་སྤྲུལ་སྐུ། དྭ་ལའི་ཧུ་ཐོག་ཐུ་ངག་དབང་བཤད་སྒྲུབ་རྒྱ་མཚོ། བོན་པོ་སྤྲུལ་སྐུ། ཁམས་ནས་རྫོགས་ཆེན་པ་དང་ཀཿཐོག་རྒྱལ་སྲས། ཀོང་པོ་རྦ་ཁ་སྐུ་སྐྱེ། མེ་རག་བླ་མ་སོགས་དང་། གཞན་ཡང་དུས་དེའི་མཁས་གྲུབ་ཐོག་མཉམ་ཕལ་ཆེར་གྱིས་ཞབས་ལ་མ་གཏུགས་ཞེས་བྱ་བ་མེད་པས་མཐའ་ཡས་སོ། །ཁྱད་པར་དུ་ཡང་བཀའི་བུམ་པ་བྱོ་ཞིང་མཁྱེན་པའི་བཅུད་ཐོབ་པའི་ཐུགས་སྲས་དང་གསུང་གི་སྲས། མཁན་ཆེན་ལོ་ཙཱ་བ་ཆོས་དཔལ་རྒྱ་མཚོ། གདུང་སྲས་པདྨ་འགྱུར་མེད་རྒྱ་མཚོ། གཅུང་ཡིད་བཞིན་ལེགས་གྲུབ། གཅུང་རིན་ཆེན་རྣམ་རྒྱལ་ཏེ། འདི་རྣམས་ནི་ཆུང་ངུ་ནས་རྗེས་སུ་བཟུང་སྟེ། དབང་ལུང་ཁྲིད་མན་ངག་རྒྱུད་བཤད་ལག་ལེན་རིག་གནས་དང་བཅས་པ་བུམ་པ་གང་བྱོའི་ཚུལ་དུ་རྫོགས་པར་གནང་ནས་ཆོས་ཀྱི་རྒྱལ་སྲིད་ལ་དབང་བསྐུར་ཏེ་རྒྱལ་ཚབ་ཏུ་མངའ་གསོལ་བའོ། །

མཁན་ཆེན་ལོ་ཙཱ་བ་ཆོས་དཔལ་རྒྱ་མཚོ།

༈ དེ་ལ་མཁན་ཆེན་ལོ་ཙཱ་བ་ཆོས་དཔལ་རྒྱ་མཚོ་ནི། གཏེར་ལུང་ལས། གཡུ་སྒྲའི་སྤྲུལ་པ་བློ་ལྡན་དྷརྨའི་མིང༔བྱང་སེམས་དད་བརྩོན་སྙིང་སྟོབས་ལྡན་པ་འབྱུང༔ཞེས་ལུང་གིས་བསྟན་པའི་སྐྱེས་ཆེན་སྐུ་ཚེ་རིལ་པོར་འཆད་རྩོད་རྩོམ་གསུམ་གྱིས་ཕྲིན་ལས་བསྐྱངས་པས། རིག་གནས་མང་པོ་ལ་འགྲེལ་བཤད་སོགས་ཀྱི་བསྟན་བཅོས་དང་། མདོའི་སྐོར་ལ་སྡོམ་གསུམ་རྣམ་ངེས་ཀྱི་འགྲེལ་པ་དཔག་བསམ་སྙེ་མ་དང་། སྔགས་ཕྱི་ནང་སྐོར་ལ། དབང་སྒྲུབ་ཐབས་རྗེས་གནང་ལ་སོགས་པའི་བསྟན་བཅོས་མཐའ་ཡས་པ་དང་། ཁྱད་པར་གསང་བ་སྙིང་པོ་ལ་ཊཱི་ཀ་གསང་བདག་དགོངས་རྒྱན། སྤྱི་དོན་གསང་བདག་ཞལ་ལུང་ལ་སོགས་པའི་བསྟན་བཅོས་མཛད་ནས་དབྱར་དགུན་གྱི་ཆོས་གྲྭར་རྒྱུད་ཀྱི་བཤད་པ་ཚར་རེ་སྨིན་རྒྱས་སྟར་ཆགས་པ་དང་། གནས་དུས་ཅི་རིགས་པར་ལོ་དང་ཟླ་འབྲེལ་གྱིས་ཟབ་མོའི་ཉམས་བཞེས་ལ་སྙིང་པོར་མཛད་པས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་གྱུར། སློབ་མ་ཡང་ས་སྐྱ་བདག་ཆེན་ཀུན་དགའ་བཀྲ་ཤིས་དང་ཆབ་མདོ་རྒྱལ་བ་འཕགས་པ་ལྷ་སོགས་ཆེ་གཉན་དུ་མས་བཀུར་ཞིང་མཆོད། དེ་ལྟར་མཆོག་དམན་བར་མའི་སྐྱེ་དགུ་ཐམས་ཅད་ལ་ཆོས་ཀྱི་ཕྲིན་ལས་རྒྱ་ཆེར་བསྐྱངས་ནས་མཐར་དགུང་ལོ་རེ་ལྔ་པ་:ས་ཁྱི་༼མེ་བྱ་༽ཧོར་ཟླ་བཅུ་གཉིས་པའི་ཉེར་བཞི་ལ། ལོག་སྨོན་སྟོབས་སུ་གྱུར་པའི་:སྦྱོངས་འགར་༼ཇུན་གར་༽བའི་དམག་དཔུང་གིས་དབུས་གཙང་གི་རྙིང་མའི་ཆོས་སྡེ་ཡོད་དོ་ཅོག་ཐམས་ཅད་ཀྱི་དགོན་སྡེ་དམིགས་མེད་དུ་བཤིགགྲྭ་པ་རྣམས་གཅེར་བུར་ཕྱུངས་ནས་སྐྱ་བོར་བསྒྱུར་ཏེ་ཁྱིམ་ཐབ་བྱེད་པའི་གན་སྡོམ་བླངས། བླ་མ་སྐྱེས་བུ་དམ་པ་རྣམས་བཀྲོངས་པའི་དུས་དེར་ཧོར་ཟླ་དང་པོའི་ཉེར་བཞི་ལ། ལྷ་ལྡན་ཕོ་བྲང་ཆེན་པོའི་མདུན་ཐད་ཀྱི་པདྨ་རགས་གསར་ཟེར་བའི་ས་དེའི་ཐད་དུ་སྤྱན་དྲངས་པར་སྐད་ཅིག་དེ་ཉིད་ལ་ཟབ་ལམ་འཕོ་བའི་མཚམས་སྦྱོར་གྱིས་དག་པའི་ཞིང་དུ་ཐ་ལེར་གཤེགས་པས། གཤེད་མ་རྣམས་ཡུ་བུར་གྱུར་ཏེ་ཁ་སྐྱེངས་སོ། །

རིགས་སྲས་པདྨ་འགྱུར་མེད་རྒྱ་མཚོ།

༈ རིགས་སྲས་པདྨ་འགྱུར་མེད་རྒྱ་མཚོ་ནི། གཏེར་ལུང་ལས། རིགས་སྲས་རྟ་མགྲིན་སྤྲུལ་པ་ནི༔རྡོ་རྗེའི་མིང་གིས་འགྲོ་དོན་སྤྱོད༔ཅེས་ལུང་གིས་ཟིན་པ་འདི་ཉིད། ཡབ་གཏེར་ཆེན་ཉིད་དང་ཡུམ་མཁའ་འགྲོའི་རྟགས་ཀྱིས་སྤྲས་པའི་ཡོན་ཏན་སྒྲོལ་མ་ཞེས་པའི་སྲས་སུ་མེ་སྟག་ལ་འཁྲུངས། བཙས་པའི་མཚན་ལས། ཤེས་རབ་རྣམ་རྒྱལ་རྡོ་རྗེ་འབུམ་ཞེས་གསོལ། ཆུང་ངུ་ནས་དམ་པ་རྣམ་གཉིས་ཀྱིས་ཆོས་ཀྱི་བདུད་རྩི་བུམ་པ་གང་བྱོའི་ཚུལ་དུ་གནང་། དགུང་ལོ་ཉི་ཤུ་པ་ལ་མཁན་པོ་ལོ་ཙཱ་བ་ངག་དབང་ཆོས་དཔལ་ལས་ཆིག་རྫོགས་ཀྱིས་བསྙེན་པར་རྫོགས་ནས། ཆོས་རྗེ་གཞན་ཕན་དབང་པོའི་དྲུང་དུ་འདུལ་མཛོད་ཕར་ཕྱིན་ལ་སོགས་པ་རིགས་ལམ་ནས་ལུང་རིགས་ཀྱི་བཤད་པ་མཐའ་ཆོད་པ་གསན། བླ་མ་དམ་པ་གཉིས་ཀྱིས་གསན་པ་གང་ཡོད་ཀྱི་སྟེང་དུ་གོང་དཀར་ཆོས་སྡེ་ནས་སློབ་དཔོན་དབང་ཕྱུག་པ་སྤྱན་དྲངས་ནས་རྡོ་རྗེ་ཕྲེང་བ་ལ་སོགས་པ་གསར་མའི་ཆོས་ཀྱི་རྒྱུན་ཡོད་དོ་ཅོག་ཀྱང་གསན། བསྟན་བཅོས་ཀྱང་སྙན་ངག་གི་ཊཱི་ཀ། ཕར་ཕྱིན་གྱི་སྤྱི་དོན། གསང་སྙིང་གི་སྤྱི་དོན། སྡོམ་གསུམ་གྱི་ཟུར་འདེབས། ཚེ་བདག་གི་ལས་སྦྱོར་ལ་གཅེས་པའི་མན་ངག་གི་སྒྲོན་མ་བདུན་པ་དབང་དང་སྒྲུབ་ཕྲིན་ལས་ཁ་ཚར་དང་བཅས་པའི་བསྟན་བཅོས་མཐའ་ཡས་པས་ཡབ་ཀྱི་ཞལ་ཆེམས་སུ་ཡང་། ཆོས་ཀྱི་ཆ་ཕ་ལས་བུ་ལྷག་ཅེས་དབུགས་དབྱུང་། དེ་ལྟར་ཆོས་ཀྱི་ཕྲིན་ལས་བསྐྱངས་པའི་མཐར་དགུང་ལོ་སོ་གསུམ་པ་ས་ཁྱི་ཧོར་ཟླ་དང་པོའི་ཉེར་དྲུག་ལ་ལོག་སྨོན་ཅན་དེ་རྣམས་ལ་ལུས་སྲོག་ལྟོས་མེད་བཏང་སྟེ་ཡ་ང་དང་བག་ཚ་མེད་པའི་ལྟ་གདེངས་ཀྱིས་གཤེགས་སོ། །

གཅུང་ཡིད་བཞིན་ལེགས་གྲུབ།

༈ གཅུང་ཡིད་བཞིན་ལེགས་གྲུབ་ཀྱང་རིག་གནས་སོགས་མཁས་པའི་ཕུལ་དུ་ཕྱིན་ཡང་ལོག་སྨོན་ཅན་དེ་རྣམས་ཀྱི་དབང་དུ་སོང་ངོ་། །

རིགས་སྲས་རིན་ཆེན་རྣམ་རྒྱལ།

༈ རིགས་སྲས་རིན་ཆེན་རྣམ་རྒྱལ་ནི། སྡིག་ཅན་དེ་རྣམས་ཀྱིས་བརྫི་བར་མ་ནུས་ཏེ། མོན་བོད་ཀྱི་ས་མཐའ་རྣམས་སུ་རེ་ཞིག་བསྐུང་ནས་བཞུགས། དེ་ནས་ཙཱ་རི་བརྒྱུད་ཁམས་ཕྱོགས་ཀྱི་དབེན་རིར་གསང་ཐབས་ཀྱིས་བཞུགས་ནས་གུ་རུ་ཞི་དྲག་ལ་སོགས་པའི་ཡི་དམ་དུ་མ་བསྙེན། སྐབས་སུ་དྲག་པོ་མངོན་སྤྱོད་ཀྱིས་ལས་ལ་ཡང་འབད་པ་གང་ཐོན་བྱས་ཏེ་ལོ་ངོ་གཉིས་ཙམ་བཞུགས་སྐབས། གནམ་བསྐོས་འཇམ་དབྱངས་གོང་མ་ཆེན་པོའི་ཐུགས་རྗེའི་ཉི་མས་བདུད་ཚོགས་མུན་པའི་དམག་དཔུང་དེ་དག་ཕ་མཐར་བསྐྲད་དེ་སྤ་བཀོང་བར་བྱས། གངས་ཅན་བོད་ཀྱི་ལྷ་གཅིག་འཛམ་གླིང་སྐྱེ་དགུའི་འདྲེན་པ་རྒྱལ་བ་སྐལ་བཟང་རྒྱ་མཚོ་གྲུ་འཛིན་འཇིག་རྟེན་དབང་ཕྱུག་གི་ཕོ་བྲང་ཆེན་པོའི་གསེར་ཁྲིའི་སྟེང་དུ་མངའ་གསོལ། བོད་ཡུལ་སྐྱེ་རྒུ་སོ་སོའི་ལུགས་ཀྱི་ཆོས་དང་སྲིད་ཀྱི་བྱ་བ་སྔར་ལུགས་བཞིན་སྐྱོངས་ཞེས་པའི་བཙན་པོའི་ལུང་བསྒྲགས་ནས། རྫོགས་ལྡན་གསར་པའི་ཉི་མ་ཕྱོགས་ཐམས་ཅད་དུ་བརྡལ་བས། སྔར་ཡབ་མེས་ཀྱི་བུ་སློབ་ཁམས་པ་བླ་དཔོན་རྣམས་ཀྱིས་བསྙེན་བཀུར་གྱིས་འབུལ་བ་རྒྱ་ཆེར་བསྟབ་ཅིང་། ཆོས་དང་ཟང་ཟིང་གིས་ཕྲིན་ལས་རྒྱ་ཆེར་གྱུར་པ་ན། གདན་ས་མ་ལག་དང་བཅས་པ་སྔར་ལྟར་ལྷོགས་པས། དབུ་ཆེན་ཁུར་བཞེས་པ་རྣམས་ཀྱིས་སྤྱན་འདྲེན་བྱུང་བར། དེ་འཕྲལ་ལམ་སྟེགས་ནས་ཕོ་བྲང་ཆེན་པོར་རྒྱལ་བ་སྐལ་བཟང་རྒྱ་མཚོར་མཇལ་ཕྱག་མཛད་པས། གོང་མ་གཏེར་ཆེན་ཆོས་ཀྱི་རྒྱལ་པོའི་ཁྲི་ཐོག་ཏུ་མངའ་གསོལ་བའི་བསྐོན་ཆ་དང་:འཇགས་༼འཇའ་༽ས་སོགས་ཐམ་ག་སྤྱི་བོར་སྩལ་བས། གུས་འདུད་ཀྱིས་ཐོན་ཕྱག་ཞུས་ནས་ལམ་དུ་ཞུགས། རང་ཞབས་པ་རྣམས་ཀྱིས་བསུ་བ་སེར་སྦྲེངས་ཀྱི་བཀུར་སྟི་དང་བཅས་རང་དགོན་དུ་ཕེབས་སོ། །དམ་པ་འདི་ཉིད་ནི་སྔོན་ནས་གཏེར་ཆེན་ཉིད་ཀྱིས་ཕྱི་མཐའི་གཟིགས་པས་དོན་གྱི་གདན་སར་ཁྲི་ནོན་མཛད་པ་འདྲ་སྟེ། སྐུ་མྱ་ངན་ལས་འདའ་བར་ཕྱོགས་པའི་ལོ་དེའི་ནང་དུ་གཅུང་ཀུན་དགའ་ཚུལ་ཁྲིམས་ཀྱིས་དོ་ཁུར་ཆེན་པོས་བཀའ་འགྱུར་གསར་བཞེངས་དང་ཆོས་འཁོར་ལྷུན་པོའི་སྟེང་དུ་གསེར་གྱི་རྒྱ་ཕིབས་བཟོ་བཀོད་ཀྱིས་མཚར་བ་མཛེས་པར་སྤྲས་ནས་རབ་ཏུ་གནས་པ་གསོལ་བས་དེ་ལེགས་ཤིན་ཏུ་ལེགས་ཏེ་དེ་དུས་བུ་ཆུང་རྒན་པར་ཁྲི་ནོན་ཀྱང་བྱས་ངེད་ཀྱིས་ནས་ཞིག་འཐོར་བྱས་ན་ཡོང་གསུངས་པར། རེ་ཞིག་སྐུ་ཉིད་བཞུགས་རིང་ཁྲི་ནོན་ཀྱི་རིགས་མི་གནང་བ་ཞུ་ཞེས་ནན་གྱིས་བཤོལ་བས། སང་ཉིན་རབ་སྟོན་གྱི་ཚོགས་ལ་ཕེབས་རྒྱུའི་དགོངས་ཁ་ཚུན་ད་རེས་ངེད་ཀྱིས་བྱས་པ་དེ་རང་ལེགས་འདྲ་ཡང་། འོ་ན་ངེད་རང་ཕ་བུ་ཡང་ཡང་དུས་གཅིག་ཏུ་འཛོམས་པ་དཀའ་བས་སང་ཉིན་བུ་ཆུང་རིན་ཆེན་རྣམ་རྒྱལ་ཡང་ཚོགས་སུ་ཕྱིན་ན་ལེགས་གསུངས་པས། མགྲོན་གཉེར་གྱིས་གདན་གྱི་བཀོད་པ་རྣམས་ཚར་བས་བཞུགས་ས་གང་དུ་བྱེད་ཞུས་པར། གདོང་གྲལ་གཡོན་གྱི་མགོ་དེར་གདན་མཐོ་ལིང་ངེ་བ་ཞིག་བྱས་པས་ཡོང་གསུང་བ་ལྟར་ཐོག་མར་ཚོགས་སུ་ཕེབས་པ་དེ་ཡིན་པས་མ་འོངས་པའི་ཕྱི་མཐར་དེ་དུས་མངའ་གསོལ་བའོ། །དེ་ལྟར་གདན་སར་ཕེབས་ནས་གཙུག་ལག་ཁང་ཕན་ཚུན་སྔར་རྒྱུན་ལྟར་གསོས། འདུས་ཚོགས་སྔར་ཡོད་རྣམས་ལ་བར་སྐབས་སུ་ཁྲིམས་གཙང་མི་གཙང་གིས་དག་ཐེར་མཛད། གསར་ཞུགས་བརྒྱ་སྐོར་ཙམ་བསླབ་པ་གསུམ་གྱིས་བསྡམས་ནས་འཁོར་ལོ་གསུམ་གྱི་བྱ་བའི་གནས་ལ་བཀོད། ཡབ་མེས་ཀྱིས་བཙུགས་པའི་ཚུལ་སྒྲུབ་མཆོད་ཉམས་པ་རྣམས་གསོས་སོ། །གར་འཆམས་སྤྱན་གཟིགས་ལ་སོགས་པའི་ཡོ་བྱད་སྔོན་དུས་ཀྱི་གྲངས་ཚང་བ་བསྒྲིགས། དེ་ནས་དབུས་གཙང་གཉིས་ཀྱི་སྡེ་འཁྲུག་གིས་མཐར་ས་སྤྲེལ་ཧོར་ཟླ་ལྔ་པའི་ཚེས་ཉེར་ལྔ་ལ་བསོད་ནམས་དཔུང་པ་མཐོ་བས་སྟོབས་ཀྱིས་འཁོར་ལོས་སྒྱུར་བའི་རྒྱལ་པོར་མི་དབང་འགྱུར་མེད་བསོད་ནམས་སྟོབས་རྒྱལ་ཤུགས་འབྱུང་དུ་སོན་པ། འཇམ་དབྱངས་གོང་མ་རྒྱལ་པོས་བོད་ཁྲི་སྐོར་བཅུ་གསུམ་གྱི་རྒྱལ་སྲིད་ལ་དབང་བསྐུར་བའི་མངའ་གསོལ་ལེགས་སྐྱེས་ཀྱི་མཇལ་འབུལ་ལ་ཕེབས། དད་མོས་ཀྱིས་གུས་པར་བཏུད་དེ་རྐྱེན་སེལ་གྱི་དབང་སོགས་གསན་ཏེ་ཏི་ཤྲཱིར་བཀུར། རྙེད་བཀུར་གྱི་གནང་སྐྱེས་མི་དམན་པས་དབུགས་དབྱུང་བའི་བསླབ་སྟོན་རྒྱ་ཆེར་སྩལ་བ་ཡི་རང་གི་གནས་སུ་མཛད། དེ་ནས་རང་དགོན་དུ་བླ་མ་གོང་མའི་རྣམ་ཐར་གྱི་རྗེས་སུ་ཞུགས་ཏེ་དབང་ལུང་ཁྲིད་སོགས་དང་། ཁྱད་པར་གསང་བ་སྙིང་པོའི་རྒྱུད་ཀྱི་བཤད་པ་ཆད་དུ་ཉེ་བ་འཆད་ཉན་གྱིས་སྤེལ་ནས་སྔར་གྱི་སྲོལ་བཏོད་དེ་ཆོས་ཀྱི་ཕྲིན་ལས་སྐྱོང་བཞིན་པ་འདིའོ། །གཞན་ཡང་གཏེར་ཆེན་དེ་ཉིད་ཀྱི་དངོས་སློབ་གྲྭ་ས་འདིར་སྒྲིགས་སུ་ཞུགས་པའི་བཤེས་གཉེན་ནི། འཆད་ཕྲིན་གྱི་ལས་སོགས་ལ་དབང་འབྱོར་བ། ཆོས་རྗེ་གཞན་ཕན་དབང་པོ། མངའ་བདག་རིག་འཛིན་རྒྱ་མཚོ། བླ་མ་སྐྱི་སྟོན་པ། སྙེ་མདོ་བླ་མ་ཨོ་རྒྱན་རྣམ་རྒྱལ། དགེ་སློང་བློ་གསལ་རྒྱ་མཚོ། འབུམ་རབ་འབྱམས་པ་ཨོ་རྒྱན་སྐལ་བཟང་། ཟེངས་སྟོན་ཨོ་རྒྱན་དཔལ་འབྱོར་རྣམས་དང་། འཚོ་བྱེད་གཞན་ཕན་མཆོག་སྦྱིན། འདུལ་མངོན་ཕར་ཚད་དབུ་མ་སྡོམ་གསུམ་སྟེ་པོད་ཆེན་དྲུག་གི་སྟེང་གསང་བདག་དགོངས་རྒྱན་ཏེ་གཞུང་ཚོགས་དེ་རྣམས་རིགས་ལམ་ནས་དྲངས་པའི་བཤད་སྦྱངས་མཐར་ཕྱིན་པའི་དགེ་བཤེས་རབ་འབྱམས་པ་བསྟན་འཛིན་གར་དབང་། རབ་འབྱམས་པ་ངག་དབང་དཔལ་བཟང་། རབ་འབྱམས་པ་ཕྲིན་ལས་རབ་འཕེལ། རབ་འབྱམས་པ་མཐུ་སྟོབས་རྣམ་རྒྱལ། རབ་འབྱམས་པ་ཨོ་རྒྱན་མཆོག་དགའ། རབ་འབྱམས་པ་ཨོ་རྒྱན་དཔལ་མགོན། བདག་ཀྱང་དེ་རྣམས་ཀྱི་ཕྱོགས་སུ་གཏོགས་ཙམ་དང་བཅས་པ་རྣམས་ལ་དམ་པ་དེ་ཉིད་ཀྱིས་དེང་སང་གྲྭ་ས་གཞན་ལ་བརྟགས་ན། དགེ་བཤེས་ཀྱི་གྲས་སུ་འདུག་ཅེས་དབུགས་དབྱུང་བས་མཚོན་དམ་པ་དེའི་བཀའ་དྲིན་གྱིས་རང་གཞན་གྱི་དོན་ནུས་པའང་མང་བར་སྣང་ངོ་། །

གཏེར་སྟོན་དང་གཏེར་གནས་རགས་ཙམ་ཞིག་གཏེར་ཆེན་བླ་མས་ཟིན་ཐོར་བཀོད་པ།

༈ གཏེར་སྟོན་དང་གཏེར་གནས་རགས་ཙམ་ཞིག་གཏེར་ཆེན་བླ་མས་ཟིན་ཐོར་བཀོད་པ་ནི། ཤེལ་གྱི་བྲག་ཕུག་གསང་གཏེར་བཀའ་འདུས་སྦས༔ལྷོ་བྲག་མཁོ་མཐིང་བདེ་གཤེགས་འདུས་པ། མཁར་ཆུ་གནམ་སྐས་ཅན་ལ་ཡོངས་རྫོགས། གཏམ་ཤུལ་སྲིན་མོ་སྦར་རྗེས་གསང་གཏེར། གྲ་ཡི་གཡུ་སྒོམ་བྲག་ལ་གཏེར་སྨྱོན། མུ་ཏིག་སྤ་མ་གོང་ལ་གསང་གཏེར། ཟར་ཕུ་ཟངས་ཀྱི་མཚོ་བྲག་གཏེར་ཕྲན། མགོན་མཁར་མགོན་པོ་གདོང་ལ་ཐུགས་གཏེར་ལྔ། ནོར་གཏེར་གཡུ་ཁྲབ་དབུལ་དང་བྲལ་བ་སྦས། གྲ་ཕྱི་བྲག་:གོ་༼པོ༽ཆེ་ལ་བོད་གཏེར། གྲ་ཡི་སྣེ་གདོང་ཟུར་ལ་རལ་གྲི། དོལ་གྱི་སྤྱི་སྡེའི་ཟུར་ལ་ཁྲབ་རྨོགགཞུང་གི་ར་གྲོང་རྒྱབ་ལ་གསེར་ཀ་སྦས། ཨོ་དཀར་བྲག་ཏུ་ཟླ་བ་གཉིས། སྙིང་པོའི་རྫ་ལ་ཟླ་བ་གཉིས། དབུ་རྩེར་ལོ་དྲུག་ཅུ། མཆིམས་ཕུར་ལོ་ལྔ། ཡང་རྫོང་ལོ་གསུམ། གཡའ་མ་ལུང་དུ་ལོ་བཞི། ཤེལ་བྲག་ཏུ་ལོ་གསུམ། སྤ་མ་གོང་དུ་ལོ་གཉིས། ཤམ་པོའི་གངས་ལ་ལོ་གསུམ། མཁར་ཆུར་ལོ་བདུན། ཏེ་སྒྲོར་ལོ་བདུན།  ཡེར་པ་དང་ཆུ་བོ་རིར་ལོ་རེ། ཟབ་བུར་ལོ་གཉིས། གཡུ་སྒོམ་བྲག ་ལ་ཟླ་བ་གཉིས། རྡོར་འབུམ་ཆོས་གྲགས་ནི་འཁྲུངས་ས་མངའ་རིས་པའོ། །ཡབ་ཡུམ་གྱིས་རྡོར་གཅོད་དང་འབུམ་བཞེངས་པས་དེར་གྲགས། པྲ་དུན་རྩེའི་རྟ་མགྲིན་དྲེགས་པ་ཟིལ་གནོན་གྱི་ཐུགས་ཀ་ནས་བདུད་རྩི་བུམ་པ་དང་བྱམས་སྤྲིན་ནས་འབྲུམ་བསྲུང་སོགས་བཏོན། ལྷ་བཙུན་སྔོན་མོ་ནི། ཡུམ་བརྟན་གྱི་རྒྱུད་བོ་དྷི་རཱ་ཛ་ཇོ་བོ་རྗེའི་རབ་བྱུང་བབས་པའི་སྲས་ཡིན། དབུ་རྩེ་དང་། འོན་འཇང་ལྷ་རིངས་སོགས་ནས་སྨན་རྫས་ཀྱི་གཏེར་ཁ་འགའ་ཞིག་བཏོན། རི་བོ་ཆེའི་གཏེར་གྲུབ་ཐོབ་དངོས་གྲུབ་ཀྱིས་འདོན་པར་གསུངས་ཀྱང་མ་མཐོང་། ལྷ་ས་ནས་མ་ཎི་བཀའ་འབུམ་བཏོན་པ་ལས་གཞན་རྒྱུན་བཞུགས་པ་མ་མཐོང་། རཀྴག་ནི་ཡར་འབྲོག་གཉན་དུ་འཁྲུངས། སྒང་ཤར་མདོས་བཅུ་སོགས་གཏེར་མང་། དྭགས་སྒམ་སོགས་དུས་རྟགས། མི་ལས་ཚེ་རིང་མའི་སྒྲུབ་སྐོར་འདི་ལ་ཞུས་པར་ངེས། ཉང་༼རལ་ནི་༽གྲུབ་ཐོབ་དངོས་གྲུབ་དང་རཀྴག་གཉིས་ཀར་ཐུགགཏེར་ཁ་ནི་མང་། ༼མ་ཡིག་ཏུ་མི་གསལ༽ལྕགས་སྤྲེལ་གཏེར་ཁ་བཅོ་བརྒྱད། རྒྱལ་སྲས་༼ལེགས་པ་༽ཡབ་དབང་ཕྱུག་རྒྱལ་པོ། ཨོ་རྒྱན་པ་གཉལ་དུ་ཕེབས་དུས་ད་སྟེ་ལོ་བཅོ་ལྔ་ན་ཁྱོད་ལ་བུ་ཁྱད་པར་ཅན་ཞིག་འབྱུང་ཞེས་ལུང་བསྟན་པ་དེའོ། །༼མ་ཡིག་ཏུ་མི་གསལ་༽དྲོར་དགུང་སྙིང་གླང་། མཁའ་འགྲོ་ཀུན་དགའ་འབུམ་ནི་འོན་གྱི་བཀྲ་ཤིས་དོ་མཁར་འཁྲུངས། ཚེས་བཞི་རྙིང་མ་གྲགས་རྒྱལ་གྱི་གྲྭ་པ་ཡིན། དེའི་སློབ་མ་དུང་མཚོ་རས་པ་ནི། དྭགས་པོ་ལྷ་རྗེའི་སློབ་མ་དུང་མཚོ་རས་པའི་སྐྱེ་བ་ཡིན་པས་དེ་སྐད་དུ་གྲགས། ཀོང་པོ་མོན་གནས་ཀྱི་སྒོ་ཕྱི་ཡང་ཏི་ཡང་འདིའི་གཏེར། དྲི་མེད་ལྷུན་པོ་ནི་ཀོང་པོ་འོ་ཤོད་དུ་ཆུ་འབྲུག་ལོ། ལྷ་སའི་རྟ་མགྲིན་གྱི་ཕྱག་གཡོན་འོག་ནས་དོན་ཏིགརྒོད་ལྡེམ་ནི་ཐང་ཡིག་ནས་མི་གསལ། ལ་སྟོད་བྱང་པ། མེ་ཕོ་རྟའི་ལོའི་སྦྲུལ་ཟླ་ལ་གཏེར་བཏོན། ཨོ་རྒྱན་གླིང་པ་གྲྭ་ཡར་རྗེར་འཁྲུངས། གཏེར་ཁ་ཉེར་བརྒྱད་ཙམ་བཏོན། དུས་རྟགས་ཕག་གིས་ས་སློག་ཅེས་པ་སྟེ་ཏི་སི་བྱུང་བ། རྡོར་གླིང་ནི་གྲྭ་གྲོག་སྐེད་དུ་མེ་ཁྱི་ལ་འཁྲུངས། ཁྲ་འབྲུག་གི་གཏེར་ནས་བརྩམས་ཏེ་གཏེར་ཁ་ཞེ་གསུམ་བཏོན་པ་གཏེར་སྟོན་ཉིད་ཀྱིས་མཛད་པའི་གཏེར་བྱུང་ན་གསལ། དེ་ནས་ཀྱང་འགའ་རེ་བཏོན་པར་སྣང་། སྲས་གྲོ་བོ་ལུང་དང་དབུས་ཀྱི་འུག་སྐད་སོགས་ཀྱང་བཟུང་། ཚེ་ཆུའི་སྣོད་ནི་བྱང་ཐང་ལྕགས་རུ་བ་ལ་ཡོད་འདུགདུས་རྟགས་ས་བཙན་རི་བོས་རི་ལ་ཞེས་པ། འདི་དང་དུས་མཚུངས་༼དོ་བན་༽རྒྱ་མཚོ། དུས་རྟགས་སིང་མ་ལ་ཁར། མོན་རྩེ་བ་ཡིན་ཟེར། གཏེར་གནས་མུ་ཏིགསངས་གླིང་པ། ཀོང་པོ་ལོང་པོ་གྱི་མ། དགུང་ལོ་ཉེར་ལྔ་ནས་སོ་དྲུག་ཡན་ལ་གཏེར་ཁ་བཅུ་དྲུག་བཏོན་པ་གཏེར་བྱུང་ཞལ་གསུང་མར་འདུགདེ་ནས་ཀྱང་འགའ་རེ་བཏོན་པར་སྣང་། བསམ་གཏན་བདེ་ཆེནགླིང་པ་ཀོང་པོ་ལོང་པོར་འཁྲུངས། ཞིང་སྐྱོང་གི་སྒྲུབ་སྐོར་ཞིག་འདུག། ཀུན་སྐྱོང་གླིང་པ་ཤངས་ཀྱི་ཕུར་འཁྲུངས། དགུང་ལོ་བཅོ་ལྔ་ནས་གཏེར་བཏོན། གཏེར་ཁ་མང་། ད་ལྟ་ནི་རྡོར་སེམས་སྙིང་ཐིག་ཙམ་དར། རཏྣ་གླིང་དང་དུས་མཚུངས། དྲི་མེད་ཀུན་དགའ་གྲྭ་ཁང་དམར་དུ་འཁྲུངས། གྲྭ་ཕུག་པ་བའི་སློབ་མ་ཡིན། ཐུགས་རྗེ་ཆེན་པོ་འོད་མཆོག་གི་རྒྱུན་ཡོད། སོ་གསུམ་ལ་ཀོང་པོར་གཤེགས། མགོན་པོ་རིན་ཆེན་ནི། ཡུགས་སུ་ཤུད་བུའི་རིགས་ལས་འཁྲུངས། བཅུ་གསུམ་པ་ལ་གྲུབ་ཆེན་ཕྱག་རྡོར་པའི་དྲུང་དུ་ཆོས་སྒོར་ཞུགས། མོན་ཟངས་ཡག་ནས་གཏེར་བཞེས། རཏྣ་གླིང་པས་ཀྱང་ཆོས་གསན། གྱ་བཞི་པ་ཆུ་རྟ་ལ་གཤེགས། གུ་རུ་ཇོ་རྩེ་དང་། ཤུད་བུ་ཆོས་གྲགས་ཞེས་པ་མཚན་གྱི་རྣམ་གྲངས། གཏེར་ཆོས་ནི་པདྨ་སྙིང་ཐིག་སོགས། རཏྣ་གླིང་པ། གྲོ་ཤུལ་ཐང་དཀར་དུ་ཆུ་ལུག་ལ་འཁྲུངས། ཉེར་བདུན་པ་ལ་ཁ་བྱང་རྙེད། སུམ་ཅུ་པ་ལ་གཏེར་ཁ་དང་པོ་ནས་ཁྱོན་གཏེར་ཁ་ཉི་ཤུ་རྩ་ལྔ་བཏོན། དོན་བཞི་པ་ལ་ཞབས་ལ་ཚེར་མ་ཟུག་པའི་རྐྱེན་གྱིས་གཤེགས། པདྨ་གླིང་པ་རྟ་ལོ་ལ་བུམ་ཐང་དུ་འཁྲུངས། ཉི་ཤུ་རྩ་བདུན་པ་ལ་སྣ་རིང་བྲག་ནས་ཀློང་གསལ་བཏོན་པ་ནས་བཟུང་། གཏེར་ཁ་སོ་གཉིས་བཏོན། གྱ་བཞི་པ་ཆུ་སྦྲུལ་ཧོར་ཟླ་དང་པོའི་ཚེས་གསུམ་ལ་གཤེགས། ཀརྨ་གླིང་པ་དྭགས་པོ་སྒེར་སྟོད་ཉི་ཟླ་སངས་རྒྱས་ཀྱི་སྲས་སུ་འཁྲུངས། བྱར་གཡག་མགོའི་བཅུ་གཅིག་ཞལ་ནི་ཙཱ་རི་ནས་བཏོན། ཐོས་གྲོལ་སྒམ་པོ་གདར་གྱི་མཚོ་ནས་བཏོན། བསྟན་གཉིས་གླིང་པ་གཙང་བྱ་བཟངས་སུ་འཁྲུངས། ཆོས་ལུང་པའི་ཇོ་སྟན་སྐྱེད་ཚལ་དུ་སློབ་སྦྱོང་མཛད། དུས་རྟགས་ནི། ཡར་འབྲོག་མཚོ་གླིང་དགུ་ལ་དམག་སྒར་འཆའ། གཏེར་སངས་རྒྱས་དགོངས་འདུས་སོགས་མང་། མདོ་སྔགས་གླིང་པ་ནི་མཆོག་ལྡན་མགོན་པོ་སྟེ། བན་པ་སྣབ་མཁན་པ་ལུང་ནས་གཏེར་གྱི་ཁ་བྱང་དང་། སྟོང་རི་ཉི་ཤར་ནས་གཏེར་ཐོན། རྡོར་གླིང་གི་གཏེར་ཤུལ་དུ་གཏེར་སྟོན་རྡོར་གླིང་གིས་གཏེར་ཁ་ཞེ་གསུམ་བཏོན་པའི་བཅུ་གསུམ་པ་ཟངས་མཚོའི་གཏེར་ནི་ས་སྤྲེལ་ཟླ་བ་བཅུ་པ་ལ་གཟའ་བདུད་ཀྱིས་འདོན་པར་བསྐུལ་བ་ལས་བཅུ་གཉིས་པའི་ཉེར་གཉིས་ལ་གནམ་ལྕགས་ཀྱི་ཁ་བྱང་བཞིན་མཚོ་གཉིས་ཀྱི་བར་བྲག་བྱ་ཁྱུང་འདྲ་བའི་དཀྱིལ་ནས་མི་བདུན་ཅུ་ཙམ་གྱི་དབུས་སུ་འདོམ་དོ་ཙམ་གྱི་བྲག་གཤགས་མ་རྙེད་པའི་ཚེ་གཏེར་བདག་བུད་མེད་གཅིག་ལ་བབས་ནས་ལྷོར་ལྟོས་ནས་བརྐོས་ཟེར། དེ་བཞིན་བྱས་པས་ལ་བསེའི་སྒྲོམ་བུ་མཐོ་སྐོར་མ་གཅིགགཟའ་བདུད་ཀྱི་སྐུ་ཁྲུ་གང་། ཁྲོ་ཆུ་ལས་བྱས་པ་གཅིག་པོ་ཏི་གཅིགཤོག་དྲིལ་གཅིག་བྱུང་། དེར་བཞུགས་ནས་ནངས་པར་ཁ་ཕྱེ་བས་རྡོར་སེམས་སྙིང་ཐིག་དང་འབྲས་མོ་གཤོངས་ཀྱི་ལམ་ཡིག་རྣམས་སྤེལ། ངན་སྔགས་སྐོར་གྱི་ཤོག་དྲིལ་བདུན་ཅུ་གཟའི་སྐུ་བཅས་བྲག་རིན་ཆེན་འདྲ་བ་ལ་སྦས། ཕྱིས་གཏེར་སྟོན་གཞན་གཅིག་དབང་གསུང་། གཏེར་ཁ་དགུ་པ། ལུག་ལོ་ཟླ་བ་བརྒྱད་པའི་ཚེས་བརྒྱད་ལ་ཟངས་མཚོའི་རི་ལ་ཕྱིན། མཚོ་འགྲམ་ནས་ཉམས་འུར། རྒོད་ཚང་ཡོད་པའི་རྩ་ན་བྲག་ལམ་གྱི་མཚམས་ནས་ཕུག་པ་མི་ལྔ་ཙམ་ཤོང་བ་ཅིག་འདུགདེའི་ནང་ནས་རྡོ་ཁ་སྦྱར་འདྲ་བའི་ནང་ནས་ཕུག་པ་ཁྲུ་གང་པ་གཅིག་ནག་ཧུར་རེ་སྣང་། དེ་ནས་ཟངས་ཀྱི་སྦུག་མ་གཅིག་བྱུང་། མར་ལམ་མ་ཐར་བར་མཆོངས་པས་རྟིང་པའི་རྗེས་གཅིག་བྱུང་། མཚོ་འགོར་ཟངས་སྦུག་དེ་ཁ་ཕྱེ་བས་ཚེ་སྒྲུབ་འོད་ཟེར་དྲ་བ་དང་། ཉི་ཟླ་གའུ་མ་གཉིས་ཆ་ལག་བཅས་བྱུང་། གྲུབ་ཐོབ་མེ་ལོང་རྡོ་རྗེ་ལོ་དགུ་པ་ལ། གྲྭ་ཕུའི་གྲུབ་ཐོབ་ཟ་ལུང་པ་དང་། མཁན་ཆེན་སེ་ལུང་པ་གཉིས་ལས་རབ་ཏུ་བྱུང་། ཞི་བྱེད་ཕག་མོ་ར་ལུགས་དང་ཨིནྡྲ་བྷོ་དྷིའི་ཐབས་ལམ་ཞུས། བཅུ་བདུན་ཡན་ཟངས་མཚོར་བསྒོམ་པས་ལྷ་འདྲེའི་ཆོ་འཕྲུལ་ཆེར་བྱུང་། ཕྱིས་ཆོས་ཐམས་ཅད་སྟོང་ཉིད་དུ་རྟོགས། བཅོ་ལྔ་པ་དཀྲི་ཞལ་སེང་གེ་རྒྱབ་ཏུ་གྲུབ་ཐོབ་ཟ་ལུང་པས་ལུང་བསྟན་པ་བཞིན་བྱོན། ཟླ་བ་བཞི་བརྟེན། ཟླ་བ་གཉིས་བསྙུང་། དྲུག་ལོན་པའི་ཚེས་བཅུ་གཉིས་ལ་གཤེགས། བཅོ་བརྒྱད་ལོན་ཚེ་སངས་རྒྱས་དབོན་པོ་རྒྱལ་མཚན་ལ་སྙིང་ཐིག་གསན་ནོ། །ཆོས་འབྱུང་བསྟན་པའི་ཉི་མ་ལས། གངས་ཅན་བོད་ཀྱི་སྐབས་ཏེ་གཉིས་པའོ།། །།