གཉིས་པ་གུས་པས་ཇི་ལྟར་གྲུབ་པ།
གཉིས་པ་གུས་པས་ཇི་ལྟར་གྲུབ་པ་ལ།
ཡོན་འབུལ་བ་དང༌། སངས་རྒྱས་སུ་ལྟ་བ་དང༌། བཀའ་སྒྲུབ་པ་དང༌། བླ་མའི་རྫས་དང་འཁོར་ལ་ཇི་ལྟར་བྱ་བ་དང༌། འཕྲལ་གྱི་ཀུན་སྤྱོད་དག་པར་བྱ་བ་དང༌། ལུས་ངག་གི་བསྙེན་བསྐུར་བའི་ཁྱད་པར་དང༌། ང་རྒྱལ་སྤང་བ་དང༌། རང་དབང་མི་འཇུག་པ་དང་བརྒྱད། དང་པོ་ལ་མ་གུས་པའི་དག་བྱེད་དུ་ཡོན་འབུལ་བ་དང༌། ཡོངས་སུ་བཟུང་བ་ཐམས་ཅད་འབུལ་བའི་ཚུལ་དང༌། དེ་ལྟར་བྱེད་པའི་འཐད་པ་དང༌། རྒྱུན་གྱི་དམ་ཚིག་གསུམ་བསྲུང་ཚུལ་དང་བཞི། དང་པོ་ནི། བླ་མ་ལ་ནི་གུས་བཅས་ཡོན། །རྗེས་སུ་མཐུན་པར་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་འབྱུང་བར་མི་འགྱུར་རོ། །ཞེས་རང་གི་བླ༷་མ༷་ལ༷་ནི༷་གུ༷ས་པ་དང་བཅ༷ས་པས་མི་ཆོས་ཀྱི་ངོ་ཟིན་ལ་རེ་བ་མ་ཡིན་པར་ཞེ་ཐག་པ་ནས་གུས་པ་དང་བཅས་པས་ནོར་ལོངས་སྤྱོད་ཟས་གོས་ལ་སོགས་པའི་ཡོ༷ན་བླ་མ་ཉིད་ལ་ཉེ་བར་མཁོ་ཞིང་སྐབས་སུ་བབས་པ། ཆ་ལུགས་མཛད་པ་འཕྲིན་ལས་དང་རྗེ༷ས་སུ་མཐུ༷ན་པ་ཁྱོ༷ད་ཀྱི༷ས་སྦྱིན་ཞིང་འབུལ་བ༷ར་བྱ༷་སྟེ༷། དེ༷ས་ཕན་ཡོན་ཅི་འབྱུང་བར་འགྱུར་སྙམ་ན་ནི༷། རི༷མས་ལ་སོ༷གས་པའི་ནད་དང་གདོན་ལ་སོགས་པའི་མི་མ་ཡིན་དང་གཞན་གྱི་གནོ༷ད་པ༷་རྣ༷མས་སྔར་བྱུང་ན་ཕྱི༷ར་ཟློག་པའི་ཚུལ་གྱིས་ཞི་ཞི༷ང༌། སླར་གསར་དུ་འབྱུ༷ང་བ༷ར་མི༷་འགྱུ༷ར་རོ༷། །