བཞི་བ་རབ་བྱུང་ཉེ་བར་བསྒྲུབ་པ།
བཞི་བ་རབ་བྱུང་ཉེ་བར་བསྒྲུབ་པ་ནི།
རྩ་བར། སྐྱབས་སུ་འགྲོ་བ་རྩོམ་པས་རབ་ཏུ་འབྱུང་བ་ཉེ་བར་བསྒྲུབ་ཅེས་པ་འདིའི་དོན་ལ་ལྔ་ལས། དང་པོ་རབ་ཏུ་བྱུང་བ་བར་མའི་དགེ་བ་བྱིན་པའི་དགོས་པ་ནི། བསླབ་པའི་ཚིགས་ལས་འདས་པའི་ཉེས་པ་ཁེགས་པ་དང༌། དགེ་ཚུལ་གྱི་སྡོམ་པའི་སྣོད་དུ་རུང་བའོ། །གཉིས་པ་ཡུལ་གང་ལས་བླང་བ་ནི། མཁན་པོ་ལས་བླང་སྟེ། ཊཱི་ཀ་ལས། རབ་ཏུ་འབྱུང་བ་ནི་མཁན་པོ་ཁོ་ན་ལས་འགྱུར་ལ། ཞེས་སོ། །གསུམ་པ་རྟེན་གང་གིས་བླང་བ་ནི་ལུས་དང་བསམ་པ་ཕུན་སུམ་ཚོགས་པས་སོ། །