བོད་ཀྱི་སྣོད་བཅུད་ཀྱི་བྱུང་བ་སྤྱི་དང་གཉའ་ཁྲི་བཙན་པོ་ཁྲིར་ཕེབས་ཚུལ།
༈ གཉིས་པ་གངས་ཅན་བོད་ཀྱི་ཡུལ་འདིར་བསྟན་པ་དམ་པའི་ཆོས་ཇི་ལྟར་བྱུང་བའི་ཚུལ། འཇམ་དཔལ་རྩ་བའི་རྒྱུད་ལས། ང་ཡི་དུས་ནས་ལོ་བརྒྱ་ན། །ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་ཐོག་མར་མཚོས་གང་བ་རིམ་གྱིས་བྲི་ནས་ཤུག་པ་ལ་སོགས་པའི་ནགས་ཆགས་པས་སཱ་ལའི་ལྗོངས་སུ་གྲགས་ཤིང་ཡུལ་དུ་རུང་བར་གྱུར་ནས། དང་པོ་མི་མ་ཡིན་གྱིས་རིམ་པར་བདག་ཏུ་བཟུང་བ་སྟེ། དེ་ཡང་ཐོག་མར་གནོད་སྦྱིན་གྱིས་བཟུང་སྟེ། ཡུལ་མིང་བཟང་ཡུལ་རྒྱན་མེད་དང་། དེ་ནས་བདུད་ཀྱིས་བཟུང་སྟེ། བདུད་ཡུལ་ཁ་རག་མགོ་དགུ། དེ་ནས་སྲིན་པོས་བཟུང་སྟེ་སྲིན་པོ་ནག་པོ་དགུ་ཡུལ། དེ་ནས་ལྷས་བཟུང་སྟེ། ལྷ་ཡུལ་གུང་ཐང་། དེ་ནས་དམུས་བཟུང་སྟེ། འཕྲང་རྩེ་འཕྲང་ཡུལ། དེ་ནས་འདྲེས་བཟུང་སྟེ། ལང་ཐང་ལི་ཐང་། དེ་ནས་མ་:བཟང་༼སང་༽སྤུན་དགུས་བཟུང་སྟེ། བོད་ཡུལ་ཉ་ཁ་དྲུགདེ་ནས་ཀླུས་བཟུང་སྟེ། བོད་ཁམས་གླིང་དགུ། དེ་ནས་རྒྱལ་པོས་བཟུང་སྟེ། དམ་པ་རྩེ་ཡུལ། དེ་ནས་མགོན་པོ་སྤུན་དགུས་བཟུང་སྟེ། སྟོང་སྡེ་བཅོ་བརྒྱད་ཅེས་ཡུལ་མིང་དུ་གྲགས་པ་འདི་ཉིད་ནི། ཡུལ་ཉི་ཤུ་རྩ་བཞིའི་ཡ་གྱལ་དུ་བྱེད་པ་བདེ་མཆོག་མཁའ་འགྲོ་རྒྱ་མཚོ་ལས། བོད་ཡུལ་དུ་ནི་ལྷན་སྐྱེས་ཏེ། །ཞི་ཞིང་གསལ་བའི་གཟུགས་ཅན་མ། །ཆུ་སྲིན་རྒྱལ་མཚན་ལག་ན་ཐོགས། །བྲག་གི་ཁྱིམ་ལ་བརྟེན་ཏེ་གནས། །རང་བྱུང་གི་ནི་སྐྱེ་གནས་ཅན། །ཞེས་གསུངས་སོ། །དེ་ཡང་སློབ་དཔོན་ཤེས་རབ་གོ་ཆའི་ལྷ་ལས་ཕུལ་བྱུང་གི་འགྲེལ་པ་ལས། སྐྱ་སེང་གི་བུ་ལྔ་དང་དགྲ་ངན་དཔུང་ཚོགས་ཡན་ལག་བཅུ་གཉིས་འཐབ་པའི་ཚེ། རྒྱལ་པོ་རུ་པ་ཏི་ཞེས་དམག་སྟོང་ཕྲག་གཅིག་དང་བཅས་བུད་མེད་ཀྱི་ཆས་སུ་ཞུགས་ཏེ་རི་གངས་ཅན་གྱི་དབུས་སུ་བྲོས་པ་ལས་མཆེད་པར་བཤད་ཅིང་ཡོངས་སུ་གྲགས་པ་སྤྱིར་འཛམ་བུ་གླིང་པའི་མི་རིགས་ལ་ཕྱི་བར་ནང་གསུམ་ལས་རྒྱལ་རིགས། རྗེ་རིགས། བྲམ་ཟེའི་རིགས། དམངས་རིགས་ཏེ་ཕྱི་རིགས་བཞི། རྒྱ་གར་ལྷ། རྒྱ་ནག་ཀླུ། ཧོར་ལྷ་མིན། བོད་སྤྲེའུ་དང་བྲག་སྲིན་མ་སྟེ་བར་གྱི་རིགས་བཞི། དེ་ཡང་སྤྲེའུ་དང་བྲག་སྲིན་གཉིས་འདུས་པའི་རིགས་དེ་ནི། ནུབ་ཕྱོགས་བདེ་བ་ཅན་ན་སངས་རྒྱས་སྣང་བ་མཐའ་ཡས་ཀྱིས་འཕགས་པ་སྤྱན་རས་གཟིགས་ལ། བོད་ཁ་བ་ཅན་གྱི་རྒྱལ་ཁམས་ཞེས་བྱ་བ་སྟོན་པ་ཤཱཀྱ་ཐུབ་པའི་དངོས་ཀྱི་གདུལ་བྱར་མ་གྱུར་པ་ཡོད་པས་དེ་དག་ལ་ཁྱོད་ཀྱིས་ཆོས་ཀྱི་སྦྱིན་པས་ཐུལ་ཅིག་ཅེས་གསུངས་པ་ལྟར། སྤྱན་རས་གཟིགས་ཀྱི་སྤྲུལ་པ་སྤྲེའུ་ཞིག་དང་རྗེ་བཙུན་སྒྲོལ་མའི་སྤྲུལ་པ་བྲག་སྲིན་མོ་གཉིས་འདུས་པ་ལས། སྤྲེའུ་ཕྲུག་མཇུག་མ་མེད་པ་སྤུས་ཁེངས་པ་གདོང་དམར་བ་དྲུག་བྱུང་བ་གཅིག་ལྷ་ལས་ཚེ་འཕོས་པ་ངང་རྒྱུད་དང་བྱད་བཞིན་བཟང་བ། ལྷ་མིན་ནས་ཚེ་འཕོས་པ་ཐུ་ལ་ཕྲག་དོག་ཆེ་བ། མི་ནས་ཚེ་འཕོས་པ་སེམས་ཆུང་ཤེས་རབ་རྒྱས་པ། ཡི་དྭགས་ནས་འཕོས་པ་ལུས་ངན་པ་ཟས་ལ་སྲེད་ཅིང་སེར་སྣ་ཆེ་བ། དུད་འགྲོ་ནས་འཕོས་པ་ལེགས་ཞན་མེད་པའི་གླེན་པ་གཅིགདམྱལ་བ་ནས་འཕོས་པ་ངོ་ནག་པ་བཞིན་མི་སྡུག་པ་སྡུག་སྲན་ཆེ་བ་རྣམས་བྱུང་། དེ་རྣམས་འཕེལ་ཏེ་བཞི་བརྒྱ་ལོང་། དེ་ཚན་པ་བཞིར་འཐབ་པ་དང་མེས་:བསོ་༼གསོ་༽བར་མཚམས་བྱས་ཏེ་ཞིང་ལ་ཆ་བཞིར་བགོས་གཅིག་ལ་གཅིག་འཇིགས་ནས་ཚན་པ་བཞིར་བྱས་པས། སེ་དང་། རྨུ་དང་། ལྡོང་དང་། སྟོང་སྟེ་ནང་གི་མིའུ་རིགས་བཞི་དང་། ཡང་འགའ་ཞིག་ཏུ་དབྲ་དང་:འབྲུ་༼འདྲུ༽བསྣན་པའི་དྲུག་སོགས་བཞེད་ཚུལ་མང་ཞིང་དུས་དེར་རྒྱལ་ཕྲན་བཅུ་གཉིས་དང་སིལ་མ་:བཅུ་བཞི༼བཅུ་གཉིས༽་རྣམས་ཀྱིས་དབང་བྱས་པར་བཤད་ཀྱང་སངས་རྒྱས་ཀྱི་བསྟན་པ་སྤེལ་བ་མ་བྱུང་། རིགས་གསུམ་མགོན་པོ་དང་སྒྲིབ་པ་རྣམ་སེལ་དང་། ཀུན་ཏུ་བཟང་པོ་སོགས་ཀྱི་རྣམ་འཕྲུལ་གྱི་ཆོས་ཀྱི་རྒྱལ་པོས་བོད་ཀྱི་འགྲོ་བ་འདུལ་བ་ལུང་བསྟན་པ་ལྟར། བོད་སྤྱི་ལ་དབང་བའི་རྒྱལ་པོའི་ཐོག་མ་རྒྱ་གར་གྱི་རྒྱལ་པོ་དམག་བརྒྱ་པའི་སྲས་མིག་མས་འགེབས་གཡུའི་སྨིན་མ་དང་དུང་སོ་འཁོར་མ། ལག་པའི་མཐིལ་དུ་འཁོར་ལོའི་རི་མོ་ཡོད་པའི་མི་ལས་འདས་པ་ཞིག་བཙས་པ་ལྷ་འདྲེའི་སྤྲུལ་པར་དོགས་ནས་སྤྱུགས་པ་ལྷ་རི་གྱང་མཐོའི་རྩེར་བྱོན་ནས་གཟིགས་པ་ན་ཡར་ཀླུང་ཡུལ་གྱི་དགེ་མཚན་ཕུན་སུམ་ཚོགས་པ་དང་། ཤམ་པོའི་གངས་རི་དཔྱད་བཟང་བར་མཁྱེན་ནས་ལྷ་རི་རོལ་པོའི་སྟེང་ནས་ལྷ་སྐས་བརྒྱུད་བཙན་ཐང་སྒོ་བཞིར་བྱོན་པས་ཕྱུགས་སྐྱོང་བ་སོགས་ཀྱིས་མཐོང་སྟེ་དྲིས་པ་ན་གནམ་ལ་མཛུབ་མོ་ཀེར་བས་ལྷར་ངེས་ནས་གཉའ་བར་ཁྲི་བྱས་གདན་དྲངས་པས་གཉའ་ཁྲི་བཙན་པོར་གྲགས།