གསུམ་པ་རྐྱེན་གསུམ་བཤད་པ།
གསུམ་པ་རྐྱེན་གསུམ་བཤད་པ་ལ།
མདོར་བསྡུས་ཙམ་བརྗོད་ན། རང་འབྲས་ཤེས་པ་ཡུལ་གྱི་རྣམ་ལྡན་དུ་གཙོ་བོར་བསྐྱེད་པའི་རྐྱེན་དེ། དམིགས་རྐྱེན་གྱི་མཚན་ཉིད་ཡིན་ཏེ། ས་བཟང་གི་མངོན་པ་ཀུན་བཏུས་འགྲེལ་བ་ལས། ཤེས་པ་ཡུལ་གྱི་རྣམ་ལྡན་བསྐྱེད་པ། དམིགས་པའི་རྐྱེན་དང༌། ཞེས་གསུངས་སོ། །རང་འབྲས་ཤེས་པ་ཕྱི་མ་གསལ་རིག་ཏུ་གཙོ་བོར་སྐྱེད་བྱེད་དེ། དེ་མ་ཐག་རྐྱེན་གྱི་མཚན་ཉིད་ཡིན་ཏེ། དེ་ལས། ཁྱད་པར་ཤེས་རིག་ཕྱི་མ་སྐྱེད་པ་དེ་མ་ཐག་པའི་རྐྱེན་དང༌། ཞེས་གསུངས་པའི་ཕྱིར། རང་འབྲས་རང་དབང་དུ་གཙོ་བོར་བསྐྱེད་པའི་རྐྱེན་དེ། བདག་རྐྱེན་གྱི་མཚན་ཉིད་ཡིན་ཏེ། འབྲས་བུ་འབྱུང་བ་ལ་དབང་བྱེད་པ་བདག་པོའི་རྐྱེན་གྱི་མཚན་ཉིད་ཅན་དུ་ལྟའོ། །ཞེས་གསུངས་པའི་ཕྱིར་རོ། །