གཉིས་པ་ཡོངས་སུ་བཟུང་བ་ཐམས་ཅད་འབུལ་བའི་ཚུལ།
གཉིས་པ་ཡོངས་སུ་བཟུང་བ་ཐམས་ཅད་འབུལ་བའི་ཚུལ་ནི།
རང་གི་དམ་ཚིག་སློབ་དཔོན་ནི། །སྦྱིན་མིན་བུ་དང་ཆུང་མ་དང༌། །རང་སྲོག་གིས་ཀྱང་བརྟེན་བྱ་ན། །ལོངས་སྤྱོད་གཡོ་བ་སྨོས་ཅི་དགོས། །ཞེས་དེ་ལྟར་བླ་མ་བསྟེན་དགོས་པ་ལས་ཇི་ལྟ་བུ་ཞིག་བྱས་ན་བླ་མ་བསྟེན་པར་འགྱུར་སྙམ་ན་ར༷ང་གི༷་ད༷མ་ཚི༷ག་མཐའ་དག་ཚུལ་བཞིན་དུ་བསྲུང་བ་དང༌། གཙོ་བོར་རྡོ་རྗེ་སློ༷བ་དཔོ༷ན་ལ་ནི༷་འཇིག་རྟེན་པ་རྣམས་ལ་ཤིན་ཏུ་འཕངས་ཤིང་གཅེས་པར་བྱེད་པས་སྦྱི༷ན་བྱ་མི༷ན་པ་བུ༷་ད༷ང་ཆུ༷ང་མ༷་ད༷ང་ཡུལ་གཞིས་དང་ར༷ང་གི་སྲོ༷ག་གི༷ས་ཀྱང་བླ་མ་མཉེས་པའི་དོན་དུ་འཕངས་པ་མེད་པར་བཏང་སྟེ། རྟག་ཏུ་བསྙེན་བཀུར་ལ་བརྩོན་པས་བསྟེ༷ན་པར་བྱ༷་བ་ཡིན་ན༷། འཕྲལ་གྱི་ལོ༷ངས་སྤྱོ༷ད་ཟས་ནོར་ལྟ་བུ་རྣམས་སྔ་མ་རྣམས་ལ་ལྟོས་ཏེ་མི་བརྟན་པས་གཡོ༷་བ༷་རྣམས་བློས་བཏང་སླ་བ་ཡིན་པས། བླ་མ་ལ་འབུལ་ཞིང་ཞབས་ཏོག་གི་ཆེད་དུ་གཏོང་བ་ལྟ་སྨོ༷ས་ཀྱང་ཅི༷་དགོ༷ས་པ་དེ་ལ་འཕངས་པ་དང༌། བློས་མི་ཐོངས་པ་ཅུང་ཟད་ཙམ་ཡང་མེད་པ་ཞིག་བྱུང་ཚེ་བླ་མ་བསྟེན་པར་འགྱུར་བ་ཡིན་ནོ། །རང་སྲོག་དང་ལོངས་སྤྱོད་རྣམས་མཐར་མི་རྟག་པའི་ངོས་ནས་གཡོ་བར་མཚུངས་མོད་ཀྱང་དེ་གཉིས་ལ་ལྟོས་ཏེ། སྲོག་དང་བུ་དང་ཆུང་མ་དང༌། ཡུལ་གཞིས་རྣམས་སྲུང་བའི་དོན་དུ་ནོར་ལོངས་སྤྱོད་བཏང་དགོས་པ་ནི། རྟོགས་བརྗོད་ལས། ནོར་ནི་ཡང་རྙེད་སྲོག་རྣམས་མིན། །ཞེས་པ་ལྟར་ཡིན་ལ། གོང་དུ་བཏང་དཀའ་བ་བཤད་པ་དེ་དག་བྱང་ཆུབ་སེམས་དཔའ་རྣམས་ཀྱི་ནི་སྦྱིན་བྱ་ཤིན་ཏུ་ཡིན་མོད་ཀྱི། རྟག་འཛིན་གྱི་སྲེད་པ་ཅན་རྣམས་ལྟོས་ཏེ་བཏང་དཀའ་སླའི་རྣམ་བཞག་མཛད་པ་ཡིན་ནོ། །