རྡོ་རྗེ་སེམས་དཔའི་སྒྲུབ་ཐབས།
ཀུ་ཀུ་རི་པ།
༄། །རྒྱ་གར་སྐད་དུ། བཛྲ་ས་ཏྭ་སཱ་དྷ་ནཾ། བོད་སྐད་དུ། རྡོ་རྗེ་སེམས་དཔའི་སྒྲུབ་ཐབས། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཡིད་དགའི་གནས་སུ་སོད་ནས་ནི། །རཾ་ལས་ཆོས་འབྱུང་གྲུ་གསུམ་སྟེ། །མཾ་ལས་ཉི་མ་ཡོངས་སུ་ཤེས། །དེ་དབུས་ཧཱུཾ་ལས་འོད་ཟེར་འཕྲོས། །སེམས་ཅན་ཀུན་གྱི་ལུས་ལ་ཕོག །དེ་ཡིས་སེམས་ཅན་སྨིན་བྱས་ནས། །སླར་འདུས་ཧཱུཾ་ལ་རབ་ཏུ་ཐིམ། །རྡོ་རྗེ་སེམས་དཔའི་གཟུགས་སུ་གྱུར། །སྐུ་མདོག་དཀར་ལ་ཞལ་གཅིག་པ། །གཡས་ན་རྡོ་རྗེ་དྲིལ་བུ་གཡོན། །རྒྱན་ནི་ཅི་རིགས་པ་རུ་སྦྱར། །རང་འདྲའི་ལྷ་མོས་འཁྲིལ་བར་བསམས། །དེ་ལྟར་ཤིན་ཏུ་གསལ་བྱས་ཏེ། །པཾ་ལས་ཡོངས་སུ་གྱུར་པ་ཡི། །པདྨ་དཀར་པོ་འདབ་བཞི་པ། །སྙིང་ག་རུ་ནི་བསམ་པར་བྱ། །དེ་ནི་འབྱུང་བཞིའི་རང་བཞིན་ཅན། །དེ་ཡི་འདབ་བཞིར་ཐིག་ལེ་བཞི། །གསལ་བ་ཉིད་དུ་བསམ་པར་བྱས། །དེ་ནི་ཚད་མེད་བཞི་ཡི་དངོས། །དེ་ཡི་ལྟེ་བར་བསམ་པ་ནི། །ཉི་དཀྱིལ་ཐིག་ལེ་ཟླ་བ་སྟེ། །དབྱིབས་ནི་གའུ་ཁ་སྦྱར་འདྲ། །ཉི་མ་ཐབས་ལ་ཤེས་རབ་ཟླ།། པ་ཐག་ཡི་གེ་ལྡན་པ་ཡིས། །ལས་ཀྱི་རྡོ་རྗེ་ལྡན་པར་བྱ། །ཤེས་རབ་ཆ་ཡི་དབུས་སུ་ནི། །རྡ་འབྲུམ་ཕྲ་བའི་སྐར་ཁུང་བསམ། །ཡི་གེ་གསུམ་གྱིས་འགྲོ་འོང་བྱ། །དེ་ལྟར་ལན་བདུད་བྱས་ནས་ནི། །སྐར་ཁུང་དག་གི་ལམ་ནས་ནི། །ཤིན་ཏུ་འདབ་པའི་བསམ་པ་ཡིས།། དབྱིངས་ཀྱི་ཐིག་ལེ་ཉིད་ལ་བལྟ། །དེ་ལས་ཡང་ནི་ཞུགས་ནས་ནི། །མཚན་མ་ལྔའམ་བརྒྱད་འབྱུང་ངོ༌། །དེ་ནས་འོད་གསལ་ལ་གནས་འགྱུར། །ཞག་དང་ཟླ་བ་ལ་སོགས། །ཇི་སྲིད་འདོད་ཀྱི་བར་དུ་གནས། །སེམས་ཅད་དོན་ལ་སོགས་བྱ་ཀུན། །འབད་པ་མེད་པར་ལྷུན་
༄། །གྱིས་གྲུབ། །ཏིང་འཛིན་དེ་ལས་ལངས་པའི་ཚེ། །གཞན་ནི་བསམ་པར་མི་བྱ་སྟེ། །ཐིག་ལེ་གཅིག་ཏུ་རྟག་ཏུ་བཟུང༌། །བདག་གིས་འདི་བྱས་བསོད་ནམས་ཀྱིས། །ནམ་མཁའི་མཐས་གཏུགས་ཇི་སྙེད་པའི། །སེམས་ཅན་ཐམས་ཅད་འཁོར་བ་ཡི། །སྡུག་བསྔལ་རབ་ཏུ་ཞི་གྱུར་ཅིག །ཤིན་ཏུ་སྤྲོས་པ་མེད་པའི་མན་ངག་སློབ་དཔོན་ཀུ་ཀུ་རི་པས་མཛད་པ་རྫོགས་སོ།།