བླ་མ་རྒྱང་འབོད་མདོར་བསྡུས་མོས་གུས་གསོལ་འདེབས།

༄༅། །བླ་མ་རྒྱང་འབོད་མདོར་བསྡུས་མོས་གུས་གསོལ་འདེབས་བཞུགས་སོ། །བླ་མ་མཁྱེན་ནོ། །བླ་མ་མཁྱེན་ནོ། །བླ་མ་མཁྱེན་ནོ། །རབ་འབྱམས་རྒྱལ་བ་ཀུན་གྱི་ཡེ་ཤེས་ཀྱི་སྤྱི་གཟུགས། །དྲན་པས་སྙིང་གི་གདུང་སེལ་དྲིན་ཆེན་གྱི་བླ་མ། །འབྲལ་མེད་ཚངས་གནས་དད་པའི་པདྨོ་རུ་བཞུགས་ནས། །བདག་རྒྱུད་སྨིན་ཅིང་གྲོལ་བའི་དངོས་གྲུབ་ཅིག་སྩོལ་མཛོད། །ཡེ་གྲོལ་གདོད་མའི་མགོན་པོ་ས་མནྟ་བྷ་དྲ། །ཡེ་ཤེས་རང་མདངས་མ་འགགས་རྡོ་རྗེ་ཡི་སེམས་དཔའ། །འོད་གསལ་བསྟན་པའི་ཤིང་རྟ་དགའ་རབ་ནི་རྡོ་རྗེ། །སྐུ་གསུམ་རིག་འཛིན་འདུས་པའི་ཚོམ་བུ་གསུམ་མཁྱེན་ནོ། །ཤེས་བྱ་ཀུན་མཁྱེན་པཎ་ཆེན་འཇམ་དཔལ་ནི་བཤེས་གཉེན། །སྣང་བཞི་ཟད་སར་འཁྱོལ་བ་ཤྲཱི་ཡི་སེངྷ། །འོད་ལུས་མངོན་པར་བྱང་ཆུབ་ཛྙཱ་ན་ནི་སུ་ཏྲ། །ཟླ་མེད་རིག་འཛིན་བྱེ་བའི་གཙུག་ནོར་གསུམ་མཁྱེན་ནོ། །པཎ་གྲུབ་ལྔ་བརྒྱའི་གཙུག་རྒྱན་བི་མ་ལ་མི་ཏྲ། །འཕོ་ཆེན་རྡོ་རྗེའི་སྐུར་བཞེངས་མཚོ་སྐྱེས་ཀྱི་རྡོ་རྗེ། །ངེས་གསང་བཀའ་ཡི་སྡུད་མོ་དབྱིངས་ཕྱུག་ནི་མཚོ་རྒྱལ། །ངོ་མཚར་བཀའ་དྲིན་ཁྱད་འཕགས་རྣམ་གསུམ་དེ་མཁྱེན་ནོ། །ལྷ་སྲས་རྣམ་འཕྲུལ་གྲུབ་དབང་ཀུན་བཟང་ནི་གཞན་ཕན། །ཕྱག་ན་པདྨོ་འཇིགས་མེད་རྒྱལ་བ་ཡི་མྱུ་གུ། །བཀའ་བབས་བདུན་ལྡན་འོད་གསལ་སྤྲུལ་པ་ཡི་རྡོ་རྗེ། །འགྲོ་དོན་མཁའ་དང་མཉམ་པའི་འདྲེན་མཆོག་གསུམ་མཁྱེན་ནོ། །སྒྲུབ་བརྩོན་རྣལ་འབྱོར་དབང་ཕྱུག་འཇམ་དབྱངས་ནི་གྲགས་པ། །མདོ་སྔགས་བསྟན་པའི་སྒྲོན་མེ་ཆོས་ཀྱི་ནི་ཉིན་བྱེད། །གོང་མས་རྗེས་བཟུང་འགྱུར་མེད་པདྨ་ནི་རྣམ་རྒྱལ། །བཀའ་དྲིན་མཚུངས་པ་མེད་པའི་སྐྱེས་ཆེན་གསུམ་མཁྱེན་ནོ། །གཞན་ཡང་སྨིན་བྱེད་དབང་བཞིའི་ཆུ་བོ་ཀུན་སྩོལ་ཞིང་། །གསང་བའི་ཏན་ཏྲ་འགྲོལ་དང་མན་ངག་མཆོག་སྦྱིན་མཛད། །ཉམས་ཆག་སྐོང་དང་ཤེས་རྒྱུད་འགྲོལ་བ་ཡི་བླ་མ། །ལུས་པ་མེད་ཀུན་མཁྱེན་ནོ་ཐུགས་རྗེ་ཡི་དགོངས་མཛོད། །རྙེད་དཀའ་དོན་ཆེན་དལ་འབྱོར་རྟེན་བཟང་འདི་ཐོབ་ཚེ། །མི་རྟག་སྙིང་ལ་ཞུགས་པའི་རྩོན་པ་ནི་དྲག་པོས། །དཀར་ནག་ལས་འབྲས་བླང་དོར་ཚུལ་བཞིན་དུ་བརྩོན་པས། །སྡུག་བསྔལ་སྲིད་མཚོ་བརྒལ་ནུས་བྱིན་གྱིས་རང་རློབས་ཤིག །ཐར་པ་བྱང་ཆུབ་མཆོག་གི་ཡོན་ཏན་དེ་དྲན་ནས། །ནམ་ཡང་མི་བསླུ་མཆོག་གསུམ་སྐྱབས་གནས་སུ་བརྟེན་ཅིང་། །ཉམ་ཐག་མ་རྒན་སྒྲོལ་བའི་གོ་ཆ་ཡི་ཁུར་ཁྱེར། །སྒྲིབ་སྦྱང་ཚོགས་བསགས་མཐར་ཕྱིན་བྱིན་གྱིས་རང་རློབས་ཤིག །ཁྱད་པར་མོས་གུས་བླ་མའི་ལམ་ཁྱེར་ལ་བརྟེན་ཏེ། །དགོངས་བརྒྱུད་བྱིན་རླབས་འཕོ་བའི་དབང་མཆོག་དེ་ཐོབ་ནས། །རྟོགས་གྲོལ་དུས་མཉམ་ཚེ་འདིར་ཀ་དག་གི་གྲོལ་སར། །གདོད་མའི་གསང་མཆོག་གྲུབ་པའི་བྱིན་རླབས་ཤིག་སྩོལ་མཛོད། །གལ་སྲིད་འཆི་བ་བཟློག་མེད་བཙན་ཐབས་སུ་བྱུང་ན། །འདའ་ཀ་གསེང་ལམ་སྒོམ་པའི་མན་ངག་ལ་བརྟེན་ནས། །དབྱིངས་ཕྱུག་ཌཱ་ཀི་དགྱེས་པའི་བསུ་མ་དང་བཅས་ཏེ། །དག་པ་མཁའ་སྤྱོད་བགྲོད་{བསྒྲོད}པའི་བྱིན་རླབས་མཆོག་སྩོལ་མཛོད། །མདོར་ན་འདི་ནས་བཟུང་སྟེ་བྱང་ཆུབ་ཀྱི་བར་དུ། །རེ་ས་གཞན་ན་མེད་དོ་ཐུགས་རྗེ་ཡིས་དགོངས་ལ། །ཆོས་མཐུན་བསམ་ཀུན་གེགས་མེད་ཡིད་བཞིན་དུ་འགྲུབ་ནས། །དོན་གཉིས་ཕུན་སུམ་ཚོགས་པའི་དངོས་གྲུབ་ཅིག་སྩོལ་མཛོད། །ཅེས་པའང་དད་མོས་ལྡན་པ་སིབ་དགོན་གྲྭ་རིགས་དབང་དགའ་ནས་འདི་ལྟར་བྲིས་ཞེས་གསུང་ནན་ངོར་པདྨ་བི་ཛས་གང་ཤར་བརྗོད་པ་བླ་མའི་བྱིན་རླབས་སེམས་ལ་འཇུག་པའི་རྒྱུར་གྱུར་ཅིག༈ ན་མོ་གུ་རུ། འགྱུར་མེད་ཡོངས་གྲུབ་དོན་དམ་བདེ་གཤེགས་སྙིང་། །རང་བཞིན་འོད་གསལ་ལྷུན་གྲུབ་འདུས་མ་བྱས། །གློ་བུར་འཁྲུལ་པའི་སྦུབས་རྒྱ་ལས་གྲོལ་བའི། །བློ་བྲལ་དོན་གྱི་བླ་མར་གསོལ་བ་འདེབས། །གདོད་མའི་དབྱིངས་ལས་གཞི་སྣང་ཤར་བའི་ཚེ། །རང་ཡུལ་གཞིར་ཐིམ་ཀུན་བཟང་ཆོས་དྲུག་གིས། །མ་རིག་དྲུག་བཅོམ་མཁྱེན་ཆ་ནང་གསལ་སྐུ། །སྤྲོས་བྲལ་ཆོས་སྐུའི་བླ་མར་གསོལ༴ གཏིང་གསལ་འགགས་པ་མེད་པའི་ལྷུན་གྲུབ་གདངས། །ཕྱིར་གསལ་ལྔ་ལྡན་རང་སྣང་ཚོམ་བུའི་སྤྲིན། །ཞི་དང་ཁྲོ་བོའི་རོལ་གར་འབྱམས་ཀླས་པ། །ཁ་སྦྱོར་ལོངས་སྐུའི་བླ་མར་གསོལ༴ རྩལ་སྣང་ཐུགས་རྗེའི་རོལ་གར་བསམ་ཡས་ཤིང་{ཞིང}། །འདུལ་བཞིས་ཆོ་འཕྲུལ་ཕ་མཐའ་མི་མངོན་པའི། །སྟོན་པ་བཅུ་གཉིས་རིགས་གསུམ་དྲྭ་མ་ལྔ། །འགྲོ་འདུལ་སྤྲུལ་སྐུའི་བླ་མར་གསོལ༴ སྐུ་ལྔ་ལྷུན་གྲུབ་ཡེ་ཤེས་རྡོ་རྗེ་ཅན། །མཚན་མཆོག་བརྒྱད་དང་འཁྲུལ་མཚན་ཉེར་ལྔ་སོགས། །བསམ་ཡས་སྒྱུ་འཕྲུལ་དྲྭ་བའི་རོལ་གར་མཁན། །ཁྱབ་བདག་མཚོ་སྐྱེས་བླ་མར་གསོལ༴ ལྟ་བའི་རྫོང་ཟིན་སྒོམ་པའི་འཕྲང་ལས་གྲོལ། །སྤྱོད་པའི་སྲོག་ཐོབ་གདེང་བཞིས་གྲོལ་ཚད་བརྙེས། །གྲུབ་གཉིས་རོལ་རྩེད་ནམ་མཁའི་མུ་ཁྱུད་བརྡལ། །དུས་གསུམ་རིག་འཛིན་བླ་མར་གསོལ༴ ཁྱད་པར་ཡེ་ཤེས་སྐུ་ཅན་འཁོར་ལོའི་མགོན། །དྲན་པས་གཟུང་འཛིན་སྲིད་པའི་འཁྲུལ་འཁོར་གཞིག །བརྗོད་བྲལ་ལྷན་སྐྱེས་ཡེ་ཤེས་མཆོག་སྩོལ་བའི། །སྐྱབས་གཅིག་དྲིན་ཆེན་བླ་མར་གསོལ༴ རབ་འབྱམས་རྩ་གསུམ་དཀྱིལ་འཁོར་རྒྱ་མཚོའི་སྤྲིན། །སྤྲོ་བསྡུའི་བྱེད་པོ་ཁྱབ་བདག་ཧེ་རུ་ཀཿ། །ཁྱོད་མིན་བདག་ལ་སྐྱབས་གཞན་མ་མཆིས་པས། །ཡེ་ཤེས་གཟིགས་པས་འབྲལ་མེད་རྗེས་འཛིན་མཛོད། །འཁོར་འདས་ཆོས་ཀུན་ཡེ་ནས་སངས་རྒྱས་གཤིས། །དག་མཉམ་བདེན་གཉིས་དབྱེར་མེད་ལྷག་པའི་ཆོས། །དེ་ལྟར་མ་རྟོགས་འཁྲུལ་འཛིན་ཞེན་པས་བཅིངས། །དུས་རིང་སྲིད་པའི་ལམ་འདིར་ཉམས་ཉེས་གྱུར། །སྣ་ཚོགས་ལས་ཀྱིས་བྲིས་{དྲིས}པའི་འགྲོ་བ་རྣམས། །དོན་ལ་མེད་ཀྱང་འཁྲུལ་པའི་གཞན་དབང་གིས། །བརྒྱ་ཕྲག་སྡུག་བསྔལ་ནད་ཀྱིས་ཉེན་པ་ན། །བརྩེ་ལྡན་ཐུགས་རྗེའི་སྨན་གྱིས་གསོ་བར་མཛོད། །རྩེ་གཅིག་གསོལ་བ་འདེབས་པའི་སྐལ་བཟང་ལ། །དགོངས་བརྒྱུད་བྱིན་རླབས་འཕོ་བའི་དབང་ཆེན་གྱིས། །རྟོགས་གྲོལ་དུས་མཉམ་སྣང་བཞིའི་གསེང་ལམ་ནས། །གདོད་མའི་གསང་མཆོག་ཚེ་འདིར་འགྲུབ་བྱིན་རློབས། །འཆི་སྲིད་ཀ་དག་ཆོས་སྐུའི་ངང་དུ་འཕོ། །བར་དོ་འོད་གསལ་ལྷུན་གྲུབ་ལོངས་སྐུར་ལྡང་། །སྐྱེ་གནས་དག་པ་རྣམ་གྲོལ་དབུགས་འབྱིན་བསྒྲོད། །དོན་གཉིས་མཐའ་རུ་ཕྱིན་པའི་དཔལ་རྩོལ་ཅིག །མདོར་ན་འདི་ནས་བྱང་ཆུབ་སྙིང་པོའི་བར། །རེ་ས་གཞན་ན་མེད་དོ་བརྩེ་བས་དགོངས། །འཇིགས་གསུམ་ཆུ་སྲིན་རྒྱུ་བའི་འཁོར་མཚོ་ལས། །མྱུར་བསྒྲལ་རྣམ་གྲོལ་གླིང་ལ་འགོད་མཛོད་ཀྱེ། །གཞན་ཡང་རྒྱལ་བའི་བསྟན་པ་དར་ཞིང་རྒྱས། །བསྟན་འཛིན་སྐྱེས་བུ་ཐམས་ཅད་སྐུ་ཚེ་བརྟན། །ཡངས་པའི་རྒྱལ་ཁམས་བདེ་སྐྱིད་ཆོས་ལ་སྤྱོད། །སྲིད་ཞིས་དགེ་མཚན་རྒྱས་པའི་བཀྲ་ཤིས་ཤོག །ཅེས་པ་འདིའང་ཨོ་རྒྱན་བསམ་འགྲུབ་ལགས་ཀྱིས་ཐུགས་ཀྱིས་བཞེད་དོན་བསྒྲུབ་པའི་སླད་དུ། སྤྲུལ་མིང་འཇམ་དབྱངས་འཁས་གྲུབ་རྒྱ་མཚོས་བྲིས་པའི་དགེ་བས་སྐྱེ་བ་ཀུན་ཏུ་དཔལ་ལྡན་བླ་མའི་བྱིན་རླབས་རྒྱུད་ལ་འཇུག་པའི་རྒྱུར་གྱུར་ཅིག༈ ཨེ་མ་ཧོ། ངོ་བོ་ཀ་དག་འོད་གསལ་ཆོས་ཀྱི་སྐུ། །རང་བཞིན་ལྷུན་འགྲུབ་ལྔ་ལྡན་ལོངས་སྐུའི་རྩལ། །གང་འདུལ་དེར་སྣང་འགྲོ་འདུལ་མཚན་མཆོག་བརྒྱད། །རྣམ་ཐར་དཔག་ཡས་མཆོག་ལ་གསོལ་བ་འདེབས། །དགོངས་བརྡ་སྙན་བརྒྱུད་རིག་འཛིན་འདུས་པའི་སྐུ། །རྒྱུད་སྡེ་བཞི་དྲུག་ཡི་དམ་སྤྲིན་ཕུང་འཕྲོ། །ལྷན་སྐྱེས་ཞིང་སྔགས་དཔའ་བོ་མཁའ་འགྲོའི་རྗེ། །རྩ་གསུམ་འདུས་ཞལ་མཆོག་ལ་གསོལ་བ་འདེབས། །དགོངས་ཀློང་དུས་གསུམ་རྒྱལ་དང་རབ་མཉམ་ཞིང་། །བརྒྱད་ཁྲི་བཞི་སྟོང་ཆོས་ཆར་སྤྲོ་མཛད་གསུང་། །ཐེག་གསུམ་དགེ་འདུན་འདུས་པའི་གཙུག་ནོར་མཆོག །སྐྱབས་གསུམ་ཀུན་འདུས་མཆོག་ལ་གསོལ་བ་འདེབས། །འབྱུང་བཞིའི་གཡོ་འཁྲུགས་གནོད་བྱེད་ཕྱི་ཡི་སྒྲ། །རྩ་རླུང་ཐིག་ལེའི་གེགས་ཆགས་ནང་གི་གདོན། །གཟུང་འཛིན་སེམས་ཀྱི་རྟོག་ཚོགས་གསང་བའི་བདུད། །ཐམས་ཅད་ཀ་དག་ཆོས་དབྱིངས་ཀློང་དུ་བཟློག །ཕྱི་སྣོད་འཇིག་རྟེན་དགེ་བཅུའི་འབྱོར་པ་རྒྱས། །ནང་བཅུད་འགྲོ་ཀུན་བདེ་ལྡན་ཆོས་ལ་སྤྱོད། །བསྟན་འཛིན་ཞབས་བརྟན་བཤད་སྒྲུབ་བསྟན་པ་དར། །དོན་གཉིས་ལྷུན་གྱིས་འགྲུབ་པའི་བཀྲ་ཤིས་ཤོག །ཅེས་པའང་མེ་ཁྱི་ཟླ་བ་གཉིས་པའི་ཚེས་བཅུར་གུ་རུའི་སྒྲུབ་གནས་འོ་ཡུག་མ་ར་ལུག་གདོང་དུ་ཚོགས་ཀྱི་མཆོད་པ་དང་རྗེས་སུ་འབྲེལ་བར་གསོལ་བ་འདེབས་པ་པོ་ནི་རྙིང་བན་པདྨ་རྣམ་རྒྱལ་ལོ། །༈ ན་མོ་གུ་རུ། གཞི་གྲོལ་ཀ་དག་སྤྲོས་པ་བྲལ་བའི་མཁར། །འོད་གསལ་ལྷུན་གྲུབ་ཉི་ཟླའི་ཚོམ་བུ་བཀྲ། །གདུལ་བྱའི་མོས་ངོར་གང་འདུལ་གཟུགས་བརྙན་ངོམ། །དུས་གསུམ་རྩ་བརྒྱུད་བླ་མར་གསོལ་བ་འདེབས། །མཆོག་བྱིན་ཉི་མ་འབར་བའི་གཟི་བྱིན་གྱིས། །བདག་བློའི་རྨོངས་ཆེན་མུན་པ་ཀུན་བསལ་ནས། །ཇི་ལྟ་ཇི་སྙེད་ཤེས་བྱའི་སྣང་བ་ཡིས། །བློ་གྲོས་འདབ་སྟོང་བཞད་པར་མཛད་དུ་གསོལ། །ངེས་འབྱུང་འཛིན་མའི་གཞི་ལས་ཉེར་འཁྲུངས་པའི། །རྣམ་དག་ཚུལ་ཁྲིམས་གཙང་མའི་ཨུཏྤ་ལ། །འཆལ་སྤྱོད་དུས་ཀྱི་བ་མོས་གོས་མིན་པར། །ངེས་ལེགས་སྦྲང་རྩིའི་བཅུད་ཀྱིས་གཏམ་པར་མཛོད། །རྣམ་གཡེང་འདུ་འཛིའི་དགྲ་ཡིས་མི་བརྫི་བའི། །དབེན་གསུམ་རྡོ་རྗེའི་མཁར་རྫོང་རབ་བརླིང་ཞིང་། །རྨད་བྱུང་བྱང་ཆུབ་སེམས་ཀྱི་བཅུད་ལེན་རྩིས། །རང་དོན་ཡིད་བྱེད་གཅོང་ནང་གཞིལ་བར་མཛོད། །རྣམ་དག་དད་དམ་ཞིང་ས་གཤིན་པོའི་གཞིར། །དབང་བཞིའི་ཆར་གྱིས་བརླན་པའི་རིགས་ཁམས་སོན། །རིམ་གཉིས་གསེར་གྱི་སྙེ་མ་མྱུར་འཁྲུངས་ཏེ། །རྡོ་རྗེ་གསུམ་གྱི་འབྲས་བཟང་གཡུར་སྨིན་མཛོད། །ཀ་དག་རིག་སྟོང་རྗེན་པ་གཉུག་མའི་གཤིས། །མ་བཅོས་ཆོས་ཟད་དགོངས་པ་བླ་མའི་ཞལ། །དོན་བརྒྱུད་བྱིན་རླབས་མཐུ་ཡིས་མྱུར་མཇལ་ནས། །ཚེ་འདིར་གདོད་མའི་གྲོལ་ས་སྙོགས་བྱིན་རློབས། །སྐྱེ་ཀུན་བླ་མ་མཆོག་དང་མི་འབྲལ་ཞིང་། །ཐེག་མཆོག་སྙིང་པོའི་ཆོས་དང་འཕྲད་གྱུར་ནས། །ཆོས་བརྒྱད་འཁྲུལ་པའི་མགོ་སྐོར་མི་འབྱུང་བར། །དོན་གཉིས་བསམ་ཀུན་ཡིད་བཞིན་འགྲུབ་པར་ཤོག །ཅེས་པའང་དད་དམ་རྨད་བྱུང་བཙུན་ཚུང་པདྨ་ཚེ་སྒྲུབ་ལགས་ཀྱི་བཞེད་སྐོང་དུ་ཤཱཀྱའི་དགེ་ཚུལ་སྙོམ་ལས་པ་འགྱུར་མེད་པདྨ་རྣམ་རྒྱལ་གྱིས་ཤར་མར་བྲིས་པ་དགེ །མངྒལཾ།