སྤྲིན་ཡོད་ཀྱི་ནམ་མཁའ་སྤྲིན་སངས་སུ་གྱུར་བའི་དཔེས་མཚོན་པའི་དགོངས་པ་བསྟན་པ།

བཅུ་གཉིས་པ་སྤྲིན་ཡོད་ཀྱི་ནམ་མཁའ་སྤྲིན་སངས་སུ་གྱུར་བའི་དཔེས་མཚོན་པའི་དགོངས་པ་བསྟན་པ་ནི། ངེས་དོན་མཐར་ཐུག་ཟབ་མོའི་གནས་གྱུར་ཀྱང༌། །ངོ་བོ་མི་འགྱུར་དྲི་བཅས་དྲི་མེད་དུ། །གྱུར་པ་དྲི་བྲལ་འབྲས་བུ་ཐོབ་པ་སྟེ། །ནམ་མཁའི་སྤྲིན་སངས་གྱུར་པ་དཔེ་ཡིས་གསུངས། །རྩ་བར། ངེས་དོན་མཐར་ཐུག་ཟབ་མོ་གནས་གྱུར་ཀྱང༌། །ཞེས་པ་ནས། དཔེ་ཡིས་གསུངས་ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། ངེ༵ས་དོ༵ན་མཐ༵ར་ཐུ༵ག་པའི་ཟ༵བ་མོ༵་དེ་ཉིད་དྲི་མ་དང་བྲལ་བ་དེའི་ཚེ་གན༵ས་གྱུ༵ར་ཀྱ༵ང་ངོ༵་བོ༵་མི༵་འགྱུ༵ར་ཞིང་དྲི༵་བཅ༵ས་ཀྱི་དེ་བཞིན་ཉིད་དྲི༵་མེ༵ད་ཀྱི་དེ་བཞིན་ཉིད་དུ༵་གྱུ༵ར་བ༵་ཡིན་ལ། དེའི་ཚེ་དྲི༵་མ་དང་བྲ༵ལ་བའི་འབྲ༵ས་བུ༵་ཐོབ༵་པ༵་ཡིན་པ་སྟེ༵། ན༵མ་མཁ༵འི་སྤྲི༵ན་སང༵ས་གྱུ༵ར་པ༵་དཔེ༵་དེ་ཡི༵ས་ལེགས་པར་གསུ༵ངས་པ་ཡིན་ཏེ། རྒྱུད་བླ་མ་ལས། ཡོན་ཏན་རིན་ཆེན་མཆོག་ཚོགས་དང་ལྡན་ཡེ་ཤེས་ཆུ་མཚོ་བསོད་ནམས་ཡེ་ཤེས་ཉི་འོད་ཅན། །ཐེག་པ་མ་ལུས་ངེས་པར་བསྒྲུབས་ཏེ་མཐའ་དང་དབུས་མེད་རྒྱ་ཆེ་ནམ་མཁའ་ལྟར་ཁྱབ་པ། །སངས་རྒྱས་ཉིད་ནི་ཡོན་ཏན་དྲི་མ་མེད་གཏེར་སེམས་ཅན་ཀུན་ལ་ཁྱད་མེད་རྣམ་གཟིགས་ནས། །ཉོན་མོངས་ཤེས་བྱའི་སྤྲིན་གྱི་དྲ་བ་སངས་རྒྱས་རྣམས་ཀྱི་ཐུགས་རྗེའི་རླུང་གིས་རྣམ་པར་གཏོར། །ཞེས་གསུངས་པའི་ཕྱིར་རོ། །