གཉིས་པ་མངོན་སུམ་ལྟར་སྣང་བཤད་པ།
གཉིས་པ་མངོན་སུམ་ལྟར་སྣང་བཤད་པ་ལ།
མཚན་ཉིད། དབྱེ་བ་གཉིས། དང་པོ་ནི། རང་གི་སྣང་ཡུལ་ལ་འཁྲུལ་བའི་བློ། མངོན་སུམ་ལྟར་སྣང་གི་མཚན་ཉིད། མཚན་གཞི་ནི། རྗེས་དཔག་ལྟ་བུའོ། །གཉིས་པ་དབྱེ་བ་ནི། རྟོག་པ་དང་རྟོག་མེད་མངོན་སུམ་ལྟར་སྣང་གཉིས། དང་པོའི་མཚན་ཉིད། རང་གི་སྣང་ཡུལ་ལ་འཁྲུལ་བའི་ཞེན་རིག གཉིས་པའི་མཚན་ཉིད། རང་གི་བདག་རྐྱེན་དབང་པོ་སླད་པ་ལས་སྐྱེས་པའི་ཞེན་བྲལ་གྱི་རིག་པ། ཡང་ན་དབྱེ་ན་ཚད་མ་མདོ་ལྟར་བདུན་ཡོད་དེ། ཚད་མ་མདོ་ལས། འཁྲུལ་དང་ཀུན་རྫོབ་ཤེས་པ་དང༌། །རྗེས་དཔག་རྗེས་སུ་དཔག་ལས་བྱུང༌། །དྲན་དང་མངོན་འདོད་ཅེས་བྱའོ། །མངོན་སུམ་ལྟར་སྣང་རབ་རིབ་བཅས། །ཞེས་གསུངས་ལ། དང་པོ་ནི། སྨིག་རྒྱུ་ཆུར་འཛིན་གྱི་རྟོག་པ་ལྟ་བུ་རྟོག་པ་དོན་མི་མཐུན་དང༌། གཉིས་པ་ནི། བུམ་འཛིན་རྟོག་པ་ལྟ་བུ་རྟོག་པ་དོན་མཐུན་གྱི་ཀུན་རྫོབ་དོན་སྤྱི་སྣང་ཡུལ་དུ་བྱེད་པའི་རྟོག་པ་རྣམས་དང༌། གསུམ་པ་ནི། རྟགས་འཛིན་སེམས་ཀྱི་རྟོག་པ་དང༌། བཞི་བ་ནི།་རྟགས་ཅན་རྗེས་དཔག་དང༌། ལྔ་བ་ནི། འདས་པའི་དོན་མི་བརྗེད་པར་དྲན་པའི་དྲན་རྟོག་དང༌། དྲུག་པ་མ་འོངས་པའི་དོན་མངོན་པར་འདོད་པའི་རྟོག་པ་དང༌། བདུན་པ་དུང་སེར་སྣང་གི་དབང་ཤེས་ལྟ་བུ་རྟོག་མེད་ལོག་ཤེས་རྣམས་སོ། །དེ་ལས་དང་པོ་དྲུག་རྟོག་པ་མངོན་སུམ་ལྟར་སྣང་དང༌། བདུན་པ་རྟོག་མེད་མངོན་སུམ་ལྟར་སྣང་ཡིན་པའོ། །ཡང་ན་རྣམ་འགྲེལ་ལས་མངོན་སུམ་ལྟར་སྣང་བཞི་བསྟན་ཏེ། རྣམ་འགྲེལ་ལེའུ་གསུམ་པ་ལས། མངོན་སུམ་ལྟར་སྣང་རྣམ་པ་བཞི། །རྟོག་པའི་ཤེས་པ་རྣམ་གསུམ་དང༌། །རྟེན་སླད་པ་ལས་བྱུང་བ་ཅན། །རྟོག་པ་མེད་པ་གཅིག་ཡིན་ནོ། །ཞེས་དང༌། དེའི་ཐད་ཀྱི་རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། མངོན་སུམ་ལྟར་སྣང་ཆོས་ཅན། ཁྱོད་ལ་རྣམ་པ་བཞིར་ཡོད་དེ། ཁྱོད་ཀྱི་ནང་ཚན་ལ་བརྡ་བརྟེན་ཅན་དང་དོན་གཞན་ལ་སྒྲོ་གདོགས་པ་དང་ལྐོག་ཏུ་གྱུར་བའི་དོན་ཅན་ཏེ་རྟོག་པའི་ཤེས་པ་རྣམ་གསུམ་དང༌། བརྟེན་བསླད་པ་ལས་བྱུང་བ་རྟོག་མེད་འཁྲུལ་ཤེས་རྣམས་ཡོད་པས་སོ། །ཞེས་གསུངས་སོ། །བརྡ་བརྟེན་ཅན་ནི་གོང་གི་ཀུན་རྫོབ་ཤེས་པ་དང༌། དོན་གཞན་ལ་སྒྲོ་གདོགས་པ་ནི་རྟོག་པ་དོན་མི་མཐུན་འཁྲུལ་བའི་ཤེས་པ་དང༌། རྟོག་པ་མངོན་སུམ་ལྟར་སྣང་ཕྱི་མ་བཞི་ནི་ལྐོག་གྱུར་དོན་ཅན་གྱི་རྟོག་པ་མངོན་སུམ་ལྟར་སྣང་ཡིན་པའོ། །