ལྔ་པ་ཆོ་ག་གང་གིས་བླང་བ།
ལྔ་པ་ཆོ་ག་གང་གིས་བླང་བ་ནི།
སྦྱོར་དངོས་མཇུག་གསུམ་སྟེ་སྡོམ་ཆོག་ལྟར་རོ། །ལྔ་པ་གོ་རིམ་ནི། མཚོ་ཊཱིཀ་ལས། གོ་རིམ་གྱི་རྣམ་པ་གཞན་ཉེ་བར་བསྟན་པའི་ཕྱིར་མཁན་པོར་གསོ༷ལ་བ༷འི་འོ༷ག་སྐྲ་དང་ཁ་སྤུ་བྲེགས་པ་དང་གོས་ངུར་སྨྲིག་བྱིན་པའི་གོང་དུ༷་ཡ༷ང་རབ་ཏུ་དབྱུང་དུ་རུ༷ང་ངོ༷༌། །ཞེས་གསུངས་ལ། ཊཱི་ཀ་ལས། ཁ་ཅིག་ན་རེ་དཔེར་ན་དགེ་ཚུལ་ཉིད་རབ་ཏུ་དབྱུང་བ་ཁོ་ན་ལ་བྱེད་པ་དེ་བཞིན་དུ། སྐྲ་དང་ཁ་སྤུ་བྲེགས་པ་དང་ངུར་སྨྲིག་བྱིན་ཞིང་བསྐོན་པ་ཡང་རབ་ཏུ་བྱུང་བ་ཁོ་ནའི་ཚུལ་ཡིན་པས། དེའི་ཕྱིར་མཁན་པོར་གསོལ་བའི་མོད་ཁོ་ན་ལ་རབ་ཏུ་འབྱུང་བར་བྱ་ཞིང༌། ཕྱིས་སྐྲ་དང་ཁ་སྤུ་འདྲེག་པ་ལ་སོགས་པ་བྱའོ་ཞེས་ཟེར་རོ། །ཞེས་བཤད་དོ། །དེ་ལ་བརྟེན་ནས་བོད་ཁ་ཅིག་ཀྱང་གོ་རིམ་དེ་ཁོ་ན་བཞིན་བྱ་སྟེ། ཊཱི་ཀ་ལས། གཞན་དུ་ན་ཆོ་ག་ལས་ཁྱིམ་པའི་རྟགས་སྤོང་ངོ་རབ་ཏུ་བྱུང་བའི་རྟགས་ཡང་དག་པར་ལེན་ཏོ། །ཞེས་ད་གཟོད་སྤོང་བ་དང་ད་གཟོད་ལེན་པའི་ཚིག་ཏུ་བྱུང་བས་སྒྲ་དོན་འགལ་བར་འགྱུར་རོ་ཞེས་ཟེར་རོ། །དེ་ལ་ཁ་ཅིག་ན་རེ་དེ་ནི་མི་འཐད་དེ། གནོད་བྱེད་བརྗོད་པ་ན། ལུང་གཞི་ལས་སྐྲ་བྲེགས་ཤིང་ཆོས་གོས་བསྐོན་ནས་དེའི་འོག་ཏུ་རབ་ཏུ་བྱུང་བར་གསུངས་པ་དང་འགལ་ཞིང༌། གོ་རིམ་དེ་ལས་བཟློག་པ་ལྟར་ན་གཙུག་ཕུད་གཞག་པ་དོན་མེད་དུ་ཐལ། གཙུག་ཕུད་འཇོག་པ་ནི་རབ་ཏུ་འབྱུང་བར་ངེས་མ་ངེས་བརྟག་པ་ཡིན་པ་ལ་རབ་ཏུ་བྱུང་ཟིན་པའི་ཕྱིར་རོ། །སྒྲུབ་བྱེད་གཞིག་པ་ནི། གཞན་གྱི་སྒྲུབ་བྱེད་འདི་སྐད་དུ་སྐྲ་འདྲེག་པ་དང་ཆོས་གོས་ངུར་སྨྲིག་བྱིན་ཞིང་བསྐོན་པ་འདི་ཆོས་ཅན། རབ་ཏུ་བྱུང་ཟིན་པའི་རྗེས་སུ་བྱ་བ་ཡིན་ཏེ། རབ་ཏུ་བྱུང་བ་ཁོ་ནའི་ཚུལ་ཡིན་པའི་ཕྱིར་ཟེར་བ་དེའང་མི་འཐད་དེ། འོ་ན་བསྙེན་རྫོགས་ཀྱི་སྡོམ་པ་འབོགས་པའི་ཚེ་ན་ཆོས་གོས་སྣམ་སྦྱར་བྱིན་གྱིས་རློབ་པ་དེ་ཆོས་ཅན། བསྙེན་པར་རྫོགས་ཟིན་པའི་རྗེས་སུ་བྱ་བ་ཡིན་པར་ཐལ། བསྙེན་པར་རྫོགས་པ་ཁོ་ནའི་ཚུལ་ཡིན་པའི་ཕྱིར། ཞེས་མཚུངས་སོ། །རྟགས་མ་གྲུབ་ན་དེར་ཡང་ངོ༌། །རབ་ཏུ་འབྱུང་བའི་ཆོ་ག་ལས། སྤོང་ངོ་ལེན་ཏོ་ཞེས་ད་གཟོད་སྤོང་བ་དང་ད་གཟོད་ལེན་པའི་ཚིག་ཏུ་གསུངས་པ་དང་མི་འགལ་ཏེ། བསམ་པའི་སྒོ་ནས་ད་གཟོད་ཁྱིམ་པའི་རྟགས་སྤོང་ཞིང་རབ་བྱུང་གི་རྟགས་ལེན་པའི་དམ་བཅའ་ད་གཟོད་ལེན་པ་ཡིན་པའི་ཕྱིར་རོ། །གལ་ཏེ་རབ་བྱུང་མ་ཟིན་པར་ཁྱིམ་པ་ལ་ཆོས་གོས་བསྐོན་ན་ཆོས་ཀྱི་རྒྱལ་མཚན་ལ་མི་གུས་པར་འགྱུར་བའི་ཕྱིར། རབ་ཏུ་བྱུང་ཟིན་ནས་ཆོས་གོས་བསྐོན་པའི་ལུགས་འདི་འཐད་དོ་ཞེ་ན། རབ་ཏུ་མ་བྱུང་བར་ཁྱིམ་པ་ལ་ཆོས་གོས་བསྐོན་ཡང་སྐབས་འདིར་ཆོས་ཀྱི་རྒྱལ་མཚན་ལ་མ་གུས་པའི་ཉེས་པར་མི་འགྱུར་ཏེ། དམིགས་བསལ་ཡིན་པའི་ཕྱིར་རོ། །གོ་རིམ་གྱི་རྣམ་གྲངས་གཞན་རབ་ཏུ་བྱུང་ཟིན་ནས་སྐྲ་དང་ཁ་སྤུ་འདྲེག་པའི་ལུགས་ལྟར་བྱས་ཀྱང༌། གཙུག་ཕུད་བཞག་པ་དོན་མེད་དུ་མི་འགྱུར་ཏེ། རབ་ཏུ་བྱུང་ཟིན་ཡང་དགེ་ཚུལ་བྱེད་པར་ངེས་མ་ངེས་བརྟག་པའི་དགོས་པ་ཡོད་པའི་ཕྱིར་རོ། །ཞེས་གསུངས་སོ། །རང་ལུགས་ནི་རབ་ཏུ་དབྱུང་བ་དང་རབ་བྱུང་གི་ཆ་ལུགས་བྱིན་པ་འདི་གཉིས་ལ་གོ་རིམ་སྔ་ཕྱི་ངེས་པ་མེད་དེ། གསོལ་བའི་འོག་ཏུ་ཡང་རུང་ངོ༌། །ཞེས་རྣམ་གྲངས་ཀྱི་ཚིག་ཏུ་གསུངས་པའི་ཕྱིར་རོ། །འགྲེལ་ཆུང་ལས། མཁན་པོར་གསོལ་བའི་འོག་དང་སྐབས་འདི་གཉིས་གང་དུ་བྱས་ཀྱང་ཉེས་པ་མེད་དོ། །ཞེས་གསུངས་སོ། །ཊཱི་ཀ་ལས། དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པའི་ངང་ཚུལ་གང་ལ་ཡོད་པའི་དགེ་སློང་དེ་ལ་གཏད་པར་བྱའོ། །ཞེས་སོ། །དེའི་དོན་ནི་ཊཱི་ཀ་ལས། དགེ་སློང་དེ་དགེ་ཚུལ་གྱི་སྡོམ་པ་བྱིན་པར་ནུས་ནའོ། །ཞེས་སོ། །