ཆོས་སྐྱོང་བའི་རྒྱལ་པོ་སྲོང་བཙན་སྒམ་པོའི་དུས།
༈ དེ་ནས་རྒྱལ་རབས་ལྔ་ན་འཇམ་དཔལ་རྩ་རྒྱུད་ལས། ལྷ་ལྡན་ཡུལ་ཞེས་བྱ་བ་ཡི། །གངས་ཅན་རི་ཡི་ནང་གནས་པའི། །རྒྱལ་པོ་མི་ཡི་ལྷ་ཞེས་པ། །ལི་ཙ་བྱི་རྣམས་རིགས་སུ་འབྱུང་། །ཞེས་དང་། འཇིག་རྟེན་སྒྲོལ་མ་ཞེས་གྲགས་དང་། །ལྷ་མོ་གོས་དཀར་མོ་དང་ནི། དཀར་མོ་ཆེན་མོ་གཞན་ཕན་བརྩོན། །ཞེས་སོགས་ལུང་དུ་མར་བསྟན་པ་བཞིན། ཆོས་སྐྱོང་བའི་རྒྱལ་པོ་སྲོང་བཙན་སྒམ་པོས་ཆོས་བློན་ཐུ་མི་སཾ་བྷོ་ཊ་རྒྱ་གར་དུ་བརྫངས་ཏེ་བོད་དུ་ཡི་གེ་མེད་པ་ལ་འབྲི་ཀློག་གི་སྲོལ་བཏོད། འོ་སྐོལ་གྱི་སྟོན་པ་དགུང་ལོ་བརྒྱད་པ་དང་བཅུ་གཉིས་པའི་སྐུ་ཚད་སངས་རྒྱས་དངོས་ཀྱི་ཞལ་སྐྱིན་གདན་འདྲེན་པའི་ཆེད་འཇིག་རྟེན་མཐུན་འཇུག་གི་ཚུལ་དུ་ཁྲོ་གཉེར་ཅན་གྱི་སྤྲུལ་པ་བལ་མོ་ཁྲི་བཙུན་དང་། སྒྲོལ་མའི་རྣམ་སྤྲུལ་རྒྱ་མོ་བཟའ་ཀོང་ཇོ་ཞེས་མཚོ་ནང་གི་པདྨར་གྲགས་པ་གཉིས་ཁབ་ཏུ་བསུས། འཕྲུལ་སྣང་གི་གཙུག་ལག་ཁང་བརྩིགས་པར་མི་མ་ཡིན་གྱིས་འཚེ་བ་ལ་བརྟེན་བརྩིག་ཏུ་མ་སྟེར་བས། རྒྱལ་པོ་ཡབ་ཡུམ་གསུམ་སྐུ་མཚམས་མཛད་ནས་ཡི་དམ་གྱི་ལྷ་བསྒྲུབས་པས་གྲུབ་སྟེ། ལུང་བསྟན་པ་ལྟར་བོད་སྲིན་མོ་གན་རྐྱལ་དུ་བསྒྱེལ་བའི་ས་གནད་རྣམས་སུ་མཐའ་འདུལ་ཡང་འདུལ་རུ་གནོན་གྱི་གཙུག་ལག་ཁང་རྣམས་བརྩིགས་པ་སྟེ་མ་ཎི་བཀའ་འབུམ་གྱི་རྒྱལ་པོའི་རྣམ་ཐར་ལེའུ་ཉེར་གཅིག་པའི་ནང་གི་ལེའུ་བཅུ་གསུམ་པར། སྲིན་མོ་གན་རྐྱལ་དུ་བསྒྱེལ་བ་འདྲ་བའི་དཔུང་པ་གཡོན་པར་བྱམས་པ་མི་འགྱུར་བའི་ལྷ་ཁང་ཁྲ་འབྲུག་བརྩིགས། བོད་ཀྱི་ལྷ་ཁང་ལ་སྔ་བ་དེ་ཡིན་ནོ། །དེའང་རྒྱལ་པོས་སྤྲུལ་པ་བཀྱེ་ནས་ཞག་བདུན་ལ་བརྩིགས་སོ། །དཔུང་པ་གཡས་པ་ལ་དབུ་རུ་ཀ་ཚལ་གྱི་ལྷ་ཁང་བརྩིགས། དཔྱི་གཡས་པ་ལ་གཡས་རུ་གཙང་འཕྲང་བརྩིགས། གཡོན་པ་ལ་རུ་ལག་གྲོམ་པ་རྒྱང་བཞེངས་སོ། །དེ་རྣམས་ཤིན་ཏུ་ནོན་ཆེན་པོ་བཞི་ཡིན་ཏེ། རྒྱལ་པོས་སྤྲུལ་པ་བཀྱེ་ནས་ཞག་རེ་ལ་བརྩིགས། ཡང་མཐའ་འདུལ་བཞི་བཏུལ། སྲིན་མོ་ལྟ་བུའི་གྲུ་མོ་གཡས་པར་ཀོང་པོ་བུ་ཆུ། གཡོན་པ་ལ་མཁོ་མཐིང་ལྷ་ཁང་། པུས་མོ་གཡོན་དུ་གུང་ཐང་། གཡས་སུ་བྱང་པྲ་དུམ་རྩེ་བརྩིགས། དེ་ནས་ཉིང་ལག་བཞི་མནན་ཏེ། ལག་མཐིལ་གཡས་སུ་མདོ་ཁམས་ཀློང་ཐང་སྒྲོན་མ། གཡོན་དུ་བྱང་ཚངས་པ་ཀླུ་ནོན་གྱི་ལྷ་ཁང་བརྩིགས་སོ། །རྐང་མཐིལ་གཡས་སུ་མང་ཡུལ་བྱམས་སྤྲིན། གཡོན་དུ་སྤ་གྲོ་སྐྱེར་ཆུ་ལྷ་ཁང་བཞེངས་སོ། །དེ་ཐམས་ཅད་རྒྱལ་པོས་སྤྲུལ་པ་བཀྱེ་ནས་ཞག་རེ་ལ་བཞེངས་སོ། །ཞེས་བཤད་དོ། །བུ་སྟོན་ཆོས་འབྱུང་དུ་གཞན་འདྲ་བ་ལས། པུས་མོ་གཡས་ལ་སྐ་བྲགགཡོན་ལ་པྲ་དུམ་རྩེ། ལག་མཐིལ་གཡས་ལ་བྱང་ཚལ་ཀླུ་གནོན། གཡོན་ལ་ཀློང་ཐང་སྒྲོལ་མ། རྐང་མཐིལ་གཡོན་ལ་མོན་བུམ་ཐང་བཞེངས་ཞེས་བཤད། གང་ལྟར་ཡང་མཐའ་འདུལ་ཡང་འདུལ་སོགས་དང་འཕྲུལ་སྣང་ར་མོ་ཆེའི་རྟེན་བརྟེན་པར་བཅས་པ་རྣམས་བཞེངས། ཆོས་ཀྱི་རྒྱལ་པོ་འདིའི་རིང་ལ་རྒྱ་གར་ནས་སློབ་དཔོན་ཀུ་ས་ར་དང་། བྲམ་ཟེ་ཤང་ཀ་ར། བལ་པོའི་སློབ་དཔོན་ཤྲཱི་ལ་མཉྫུ། རྒྱ་ནག་གི་སློབ་དཔོན་ཧ་ཤང་མ་ཧཱ་ཡཱ་ན་ལ་སོགས་པ་སྤྱན་དྲངས་ནས་སྡེ་སྣོད་གསུམ་དང་། རྒྱུད་ཀྱི་ཆ་ལག་མང་རབ་བསྒྱུར་ཞིང་བསྟན་པའི་སྲོལ་བཏོད། དངོས་སུ་འཆད་ཉན་མ་བྱུང་ཡང་རྒྱལ་པོ་རང་གིས་སྐལ་ལྡན་མང་པོར་ལྐོག་ཆོས་སུ་ཐུགས་རྗེ་ཆེན་པོ་ཞི་ཁྲོའི་གདམས་པ་ཕོག་སྟེ་ཉང་བྲན་ཕ་བོང་ཁར་ཐུགས་རྗེ་ཆེན་པོའི་རྣལ་འབྱོར་སྤྱོད་པའི་རལ་པ་ཅན་བརྒྱ་ཕྲག་ཙམ་རྒྱུན་དུ་བྱུང་བར་བཤད། དུས་དེར་གསུངས་པ་རྣམས་ཕྱོགས་གཅིག་ཏུ་བསྡོམས་པ་གཏེར་ཁ་གསུམ་དུ་བྱས་པ། གྲུབ་ཐོབ་དངོས་གྲུབ། མངའ་བདག་ཉང་། ཤཱཀ་འོད་གསུམ་གྱིས་གཏེར་ནས་སྤྱན་དྲངས་པའི་དེང་སང་མ་ཎི་བཀའ་འབུམ་ཞེས་གསང་སྔགས་རྙིང་མའི་ཟབ་ཆོས་སུ་གྲགས་པ་འདི་ཡིན།