གདན་ས་རྒྱལ་ཚབ་རིན་པོ་ཆེ་དང་གསུམ་པ་མཁས་གྲུབ་དགེ་ལེགས་དཔལ་བ་བཞི་པ་ཆོས་རྗེ་ཞྭ་ལུ་པ་ལེགས་པ་རྒྱལ་མཚན་ལྔ་པ་ཆོས་རྗེ་བློ་གྲོས་ཆོས་སྐྱོང་དྲུག་པ་བ་སོ་ཆོས་རྗེ་ཆོས་ཀྱི་རྒྱལ་མཚན།
༈ གདན་ས་གཉིས་པ་རྒྱལ་ཚབ་རིན་པོ་ཆེ་ནི། གཙང་སྟོད་དུ་ཤིང་འབྲུག་ལ་འཁྲུངས། དགུང་ལོ་དྲུག་ཅུ་པར་དགའ་ལྡན་གྱི་ཁྲིར་ཕེབས། ཆོས་འཁོར་དཔག་མེད་བསྐོར་ཞིང་བསྟན་བཅོས་ཀྱང་མཐའ་ཡས་པར་སྣང་། དགུང་ལོ་རེ་དགུ་པ་ཆུ་ཁྱི་ལོར་གཤེགས། གདུང་རུས་དང་རིང་བསྲེལ་སོགས་ནང་དུ་བཞུགས་པའི་དངུལ་གདུང་རྣམ་རྒྱལ་མཆོད་རྟེན་དངུལ་གདུང་ཆེན་མོའི་གཡས་སུ་བཞུགས། ༈ གསུམ་པ་མཁས་གྲུབ་དགེ་ལེགས་དཔལ་བ། གཙང་སྟོད་མདོག་གཞུང་དུ་ཤིང་གླང་ལ་འཁྲུངས། ཞེ་བདུན་པར་དགའ་ལྡན་ཁྲིར་ཕེབས། ལོ་བརྒྱད་ཀྱི་བར་བསྟན་པའི་བྱ་བ་མཐའ་ཡས་པ་མཛད། བསྟན་བཅོས་ཀྱང་མང་བར་སྣང་། ང་བཞི་པ་ས་རྟ་ལ་གཤེགས་སོ། །གདུང་ཞུགས་སུ་ཕུལ་བའི་གདུང་རུས་སོགས་ནང་རྟེན་དུ་བཞུགས་པའི་རྣམ་རྒྱལ་མཆོད་རྟེན་རིན་ཆེན་གཉིས་པ་ལས་གྲུབ་པ་གཙོ་བོའི་གཡོན་དུ་བཞུགས་སོ། ༈ །བཞི་པ་ཆོས་རྗེ་ཞྭ་ལུ་པ་ལེགས་པ་རྒྱལ་མཚན་གཙང་དུ་ཤིང་ཡོས་ལ་འཁྲུངས། རེ་བཞི་པ་ས་རྟ་ལ་དགའ་ལྡན་གྱི་ཁྲིར་ཕེབས། དོན་དྲུག་པ་ལྕགས་རྟར་གཤེགས། དངུལ་གདུང་རྣམ་རྒྱལ་མཆོད་རྟེན་གཙོ་བོའི་གཡས་གསུམ་པར་བཞུགས། ༈ ལྔ་པ་ཆོས་རྗེ་བློ་གྲོས་ཆོས་སྐྱོང་གཙང་གཡག་སྡེར་ས་སྦྲུལ་ལ་འཁྲུངས། རེ་གཉིས་པ་ལྕགས་རྟ་ལ་ཁྲིར་ཕེབས། དོན་ལྔ་པ་ཆུ་ལུག་ལ་གཤེགས་སོ། ༈ །དྲུག་པ་བ་སོ་ཆོས་རྗེ་ཆོས་ཀྱི་རྒྱལ་མཚན། མཁས་གྲུབ་རྗེའི་གཅུང་པོར་ཆུ་རྟར་འཁྲུངས། རེ་གཉིས་པ་ཆུ་ལུག་ལ་ཁྲིར་ཕེབས། དོན་གཉིས་པ་ཆུ་སྦྲུལ་ལ་གཤེགས། དངུལ་གདུང་རྣམ་རྒྱལ་མཆོད་རྟེན་གཙོ་བོའི་གཡོན་གཉིས་པར་བཞུགས།